‎1 ‏כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י מוֹאָ֔ב וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־שָׂרְפ֛וֹ עַצְמ֥וֹת מֶֽלֶךְ־אֱד֖וֹם לַשִּֽׂיד׃

‎2 ‏וְשִׁלַּחְתִּי־אֵ֣שׁ בְּמוֹאָ֔ב וְאָכְלָ֖ה אַרְמְנ֣וֹת הַקְּרִיּ֑וֹת וּמֵ֤ת בְּשָׁאוֹן֙ מוֹאָ֔ב בִּתְרוּעָ֖ה בְּק֥וֹל שׁוֹפָֽר׃

‎3 ‏וְהִכְרַתִּ֥י שׁוֹפֵ֖ט מִקִּרְבָּ֑הּ וְכָל־שָׂרֶ֛יהָ אֶהֱר֥וֹג עִמּ֖וֹ אָמַ֥ר יְהוָֽה׃ פ

‎4 ‏כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י יְהוּדָ֔ה וְעַל־אַרְבָּעָ֖ה לֹ֣א אֲשִׁיבֶ֑נּוּ עַֽל־מָאֳסָ֞ם אֶת־תּוֹרַ֣ת יְהוָ֗ה וְחֻקָּיו֙ לֹ֣א שָׁמָ֔רוּ וַיַּתְעוּם֙ כִּזְבֵיהֶ֔ם אֲשֶׁר־הָלְכ֥וּ אֲבוֹתָ֖ם אַחֲרֵיהֶֽם׃

‎5 ‏וְשִׁלַּ֥חְתִּי אֵ֖שׁ בִּֽיהוּדָ֑ה וְאָכְלָ֖ה אַרְמְנ֥וֹת יְרוּשָׁלִָֽם׃ פ

‎6 ‏כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י יִשְׂרָאֵ֔ל וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־מִכְרָ֤ם בַּכֶּ֙סֶף֙ צַדִּ֔יק וְאֶבְי֖וֹן בַּעֲב֥וּר נַעֲלָֽיִם׃

‎7 ‏הַשֹּׁאֲפִ֤ים עַל־עֲפַר־אֶ֙רֶץ֙ בְּרֹ֣אשׁ דַּלִּ֔ים וְדֶ֥רֶךְ עֲנָוִ֖ים יַטּ֑וּ וְאִ֣ישׁ וְאָבִ֗יו יֵֽלְכוּ֙ אֶל־הַֽנַּעֲרָ֔ה לְמַ֥עַן חַלֵּ֖ל אֶת־שֵׁ֥ם קָדְשִֽׁי׃

‎8 ‏וְעַל־בְּגָדִ֤ים חֲבֻלִים֙ יַטּ֔וּ אֵ֖צֶל כָּל־מִזְבֵּ֑חַ וְיֵ֤ין עֲנוּשִׁים֙ יִשְׁתּ֔וּ בֵּ֖ית אֱלֹהֵיהֶֽם׃

‎9 ‏וְאָ֨נֹכִ֜י הִשְׁמַ֤דְתִּי אֶת־הָֽאֱמֹרִי֙ מִפְּנֵיהֶ֔ם אֲשֶׁ֨ר כְּגֹ֤בַהּ אֲרָזִים֙ גָּבְה֔וֹ וְחָסֹ֥ן ה֖וּא כָּֽאַלּוֹנִ֑ים וָאַשְׁמִ֤יד פִּרְיוֹ֙ מִמַּ֔עַל וְשָׁרָשָׁ֖יו מִתָּֽחַת׃

‎10 ‏וְאָנֹכִ֛י הֶעֱלֵ֥יתִי אֶתְכֶ֖ם מֵאֶ֣רֶץ מִצְרָ֑יִם וָאוֹלֵ֨ךְ אֶתְכֶ֤ם בַּמִּדְבָּר֙ אַרְבָּעִ֣ים שָׁנָ֔ה לָרֶ֖שֶׁת אֶת־אֶ֥רֶץ הָאֱמֹרִֽי׃

‎11 ‏וָאָקִ֤ים מִבְּנֵיכֶם֙ לִנְבִיאִ֔ים וּמִבַּחוּרֵיכֶ֖ם לִנְזִרִ֑ים הַאַ֥ף אֵֽין־זֹ֛את בְּנֵ֥י יִשְׂרָאֵ֖ל נְאֻם־יְהוָֽה׃

‎12 ‏וַתַּשְׁק֥וּ אֶת־הַנְּזִרִ֖ים יָ֑יִן וְעַל־הַנְּבִיאִים֙ צִוִּיתֶ֣ם לֵאמֹ֔ר לֹ֖א תִּנָּבְאֽוּ׃

‎13 ‏הִנֵּ֛ה אָנֹכִ֥י מֵעִ֖יק תַּחְתֵּיכֶ֑ם כַּאֲשֶׁ֤ר תָּעִיק֙ הָעֲגָלָ֔ה הַֽמְלֵאָ֥ה לָ֖הּ עָמִֽיר׃

‎14 ‏וְאָבַ֤ד מָנוֹס֙ מִקָּ֔ל וְחָזָ֖ק לֹא־יְאַמֵּ֣ץ כֹּח֑וֹ וְגִבּ֖וֹר לֹא־יְמַלֵּ֥ט נַפְשֽׁוֹ׃

‎15 ‏וְתֹפֵ֤שׂ הַקֶּ֙שֶׁת֙ לֹ֣א יַעֲמֹ֔ד וְקַ֥ל בְּרַגְלָ֖יו לֹ֣א יְמַלֵּ֑ט וְרֹכֵ֣ב הַסּ֔וּס לֹ֥א יְמַלֵּ֖ט נַפְשֽׁוֹ׃

‎16 ‏וְאַמִּ֥יץ לִבּ֖וֹ בַּגִּבּוֹרִ֑ים עָר֛וֹם יָנ֥וּס בַּיּוֹם־הַה֖וּא נְאֻם־יְהוָֽה׃ פ

1 kōh ’āmar yəhwâ ‘al-šəlōšâ pišə‘ê mwō’āḇ wə‘al-’arəbā‘â lō’ ’ăšîḇennû ‘al-śārəfwō ‘aṣəmwōṯ meleḵə-’ĕḏwōm laśśîḏ:

2 wəšill^aḥətî-’ēš bəmwō’āḇ wə’āḵəlâ ’arəmənwōṯ haqqərîywōṯ ûmēṯ bəšā’wōn mwō’āḇ biṯərû‘â bəqwōl šwōfār:

3 wəhiḵəratî šwōfēṭ miqqirəbāh wəḵāl-śāreyhā ’ehĕrwōḡ ‘immwō ’āmar yəhwâ: f

4 kōh ’āmar yəhwâ ‘al-šəlōšâ pišə‘ê yəhûḏâ wə‘al-’arəbā‘â lō’ ’ăšîḇennû ‘al-mā’ŏsām ’eṯ-twōraṯ yəhwâ wəḥuqqāyw lō’ šāmārû wayyaṯə‘ûm kizəḇêhem ’ăšer-hāləḵû ’ăḇwōṯām ’^aḥărêhem:

5 wəšill^aḥətî ’ēš bîhûḏâ wə’āḵəlâ ’arəmənwōṯ yərûšālāim: f

6 kōh ’āmar yəhwâ ‘al-šəlōšâ pišə‘ê yiśərā’ēl wə‘al-’arəbā‘â lō’ ’ăšîḇennû ‘al-miḵərām bakesef ṣadîq wə’eḇəywōn b^a‘ăḇûr n^a‘ălāyim:

7 haššō’ăfîm ‘al-‘ăfar-’ereṣ bərō’š dallîm wəḏereḵə ‘ănāwîm yaṭṭû wə’îš wə’āḇîw yēləḵû ’el-hann^a‘ărâ ləm^a‘an ḥallēl ’eṯ-šēm qāḏəšî:

8 wə‘al-bəḡāḏîm ḥăḇulîm yaṭṭû ’ēṣel kāl-mizəbēḥa wəyên ‘ănûšîm yišətû bêṯ ’ĕlōhêhem:

9 wə’ānōḵî hišəmaḏətî ’eṯ-hā’ĕmōrî mipənêhem ’ăšer kəḡōḇ^ah ’ărāzîm gāḇəhwō wəḥāsōn hû’ kā’allwōnîm wā’ašəmîḏ pirəywō mimm^a‘al wəšārāšāyw mitāḥaṯ:

10 wə’ānōḵî he‘ĕlêṯî ’eṯəḵem mē’ereṣ miṣərāyim wā’wōlēḵə ’eṯəḵem bammiḏəbār ’arəbā‘îm šānâ lārešeṯ ’eṯ-’ereṣ hā’ĕmōrî:

11 wā’āqîm mibənêḵem linəḇî’îm ûmib^aḥûrêḵem linəzirîm ha’af ’ên-zō’ṯ bənê yiśərā’ēl nə’um-yəhwâ:

12 watašəqû ’eṯ-hannəzirîm yāyin wə‘al-hannəḇî’îm ṣiûîṯem lē’mōr lō’ tinnāḇə’û:

13 hinnēh ’ānōḵî mē‘îq t^aḥətêḵem ka’ăšer tā‘îq hā‘ăḡālâ haməlē’â lāh ‘āmîr:

14 wə’āḇaḏ mānwōs miqqāl wəḥāzāq lō’-yə’ammēṣ kōḥwō wəḡibwōr lō’-yəmallēṭ nafəšwō:

15 wəṯōfēś haqqešeṯ lō’ y^a‘ămōḏ wəqal bəraḡəlāyw lō’ yəmallēṭ wərōḵēḇ hassûs lō’ yəmallēṭ nafəšwō:

16 wə’ammîṣ libwō bagibwōrîm ‘ārwōm yānûs bayywōm-hahû’ nə’um-yəhwâ: f