‎1 ‏וְאֵ֗לֶּה הַבָּאִ֤ים אֶל־דָּוִיד֙ לְצִ֣יקְלַ֔ג ע֣וֹד עָצ֔וּר מִפְּנֵ֖י שָׁא֣וּל בֶּן־קִ֑ישׁ וְהֵ֙מָּה֙ בַּגִּבּוֹרִ֔ים עֹזְרֵ֖י הַמִּלְחָמָֽה׃

‎2 ‏נֹ֣שְׁקֵי קֶ֗שֶׁת מַיְמִינִ֤ים וּמַשְׂמִאלִים֙ בָּֽאֲבָנִ֔ים וּבַחִצִּ֖ים בַּקָּ֑שֶׁת מֵאֲחֵ֥י שָׁא֖וּל מִבִּנְיָמִֽן׃

‎3 ‏הָרֹ֨אשׁ אֲחִיעֶ֜זֶר וְיוֹאָ֗שׁ בְּנֵי֙ הַשְּׁמָעָ֣ה הַגִּבְעָתִ֔י ויזואל וִיזִיאֵ֥ל³ וָפֶ֖לֶט בְּנֵ֣י עַזְמָ֑וֶת וּבְרָכָ֕ה וְיֵה֖וּא הָעֲנְּתֹתִֽי׃

‎4 ‏וְיִֽשְׁמַֽעְיָ֧ה הַגִּבְעוֹנִ֛י גִּבּ֥וֹר בַּשְּׁלֹשִׁ֖ים וְעַל־הַשְּׁלֹשִֽׁים׃

‎5 ‏וְיִרְמְיָ֤ה וְיַחֲזִיאֵל֙ וְי֣וֹחָנָ֔ן וְיוֹזָבָ֖ד הַגְּדֵרָתִֽי׃

‎6 ‏אֶלְעוּזַ֤י וִירִימוֹת֙ וּבְעַלְיָ֣ה וּשְׁמַרְיָ֔הוּ וּשְׁפַטְיָ֖הוּ החריפי הַחֲרוּפִֽי׃

‎7 ‏אֶלְקָנָ֡ה וְ֠יִשִּׁיָּהוּ וַעֲזַרְאֵ֧ל וְיוֹעֶ֛זֶר וְיָשָׁבְעָ֖ם הַקָּרְחִֽים׃

‎8 ‏וְיוֹעֵאלָ֧ה וּזְבַדְיָ֛ה בְּנֵ֥י יְרֹחָ֖ם מִן־הַגְּדֽוֹר׃

‎9 ‏וּמִן־הַגָּדִ֡י נִבְדְּל֣וּ אֶל־דָּוִיד֩ לַמְצַ֨ד מִדְבָּ֜רָה גִּבֹּרֵ֣י הַחַ֗יִל אַנְשֵׁ֤י צָבָא֙ לַמִּלְחָמָ֔ה עֹרְכֵ֥י צִנָּ֖ה וָרֹ֑מַח וּפְנֵ֤י אַרְיֵה֙ פְּנֵיהֶ֔ם וְכִצְבָאיִ֥ם עַל־הֶהָרִ֖ים לְמַהֵֽר׃ ס

‎10 ‏עֵ֖זֶר הָרֹ֑אשׁ עֹבַדְיָה֙ הַשֵּׁנִ֔י אֱלִיאָ֖ב הַשְּׁלִשִֽׁי׃

‎11 ‏מִשְׁמַנָּה֙ הָרְבִיעִ֔י יִרְמְיָ֖ה הַחֲמִשִֽׁי׃

‎12 ‏עַתַּי֙ הַשִּׁשִּׁ֔י אֱלִיאֵ֖ל הַשְּׁבִעִֽי׃

‎13 ‏יֽוֹחָנָן֙ הַשְּׁמִינִ֔י אֶלְזָבָ֖ד הַתְּשִׁיעִֽי׃

‎14 ‏יִרְמְיָ֙הוּ֙ הָעֲשִׂירִ֔י סמַכְבַּנַּ֖י עַשְׁתֵּ֥י עָשָֽׂר׃

‎15 ‏אֵ֥לֶּה מִבְּנֵי־גָ֖ד רָאשֵׁ֣י הַצָּבָ֑א אֶחָ֤ד לְמֵאָה֙ הַקָּטָ֔ן וְהַגָּד֖וֹל לְאָֽלֶף׃

‎16 ‏אֵ֣לֶּה הֵ֗ם אֲשֶׁ֨ר עָבְר֤וּ אֶת־הַיַּרְדֵּן֙ בַּחֹ֣דֶשׁ הָרִאשׁ֔וֹן וְה֥וּא מְמַלֵּ֖א עַל־כָּל־גדיתיו גְּדוֹתָ֑יו וַיַּבְרִ֙יחוּ֙ אֶת־כָּל־הָ֣עֲמָקִ֔ים לַמִּזְרָ֖ח וְלַֽמַּעֲרָֽב׃ ס

‎17 ‏וַיָּבֹ֗אוּ מִן־בְּנֵ֤י בִנְיָמִן֙ וִֽיהוּדָ֔ה עַד־לַמְצָ֖ד לְדָוִֽיד׃

‎18 ‏וַיֵּצֵ֣א דָוִיד֮ לִפְנֵיהֶם֒ וַיַּ֙עַן֙ וַיֹּ֣אמֶר לָהֶ֔ם אִם־לְשָׁל֞וֹם בָּאתֶ֤ם אֵלַי֙ לְעָזְרֵ֔נִי יִֽהְיֶה־לִּ֧י עֲלֵיכֶ֛ם לֵבָ֖ב לְיָ֑חַד וְאִֽם־לְרַמּוֹתַ֣נִי לְצָרַ֗י בְּלֹ֤א חָמָס֙ בְּכַפַּ֔י יֵ֛רֶא אֱלֹהֵ֥י אֲבוֹתֵ֖ינוּ וְיוֹכַֽח׃ ס

‎19 ‏וְר֣וּחַ לָבְשָׁ֗ה אֶת־עֲמָשַׂי֮ רֹ֣אשׁ השלושים הַשָּׁלִישִׁים֒ לְךָ֤ דָוִיד֙ וְעִמְּךָ֣ בֶן־יִשַׁ֔י שָׁל֨וֹם׀ שָׁל֜וֹם לְךָ֗ וְשָׁלוֹם֙ לְעֹ֣זְרֶ֔ךָ כִּ֥י עֲזָרְךָ֖ אֱלֹהֶ֑יךָ וַיְקַבְּלֵ֣ם דָּוִ֔יד וַֽיִּתְּנֵ֖ם בְּרָאשֵׁ֥י הַגְּדֽוּד׃ פ

‎20 ‏וּמִֽמְּנַשֶּׁ֞ה נָפְל֣וּ עַל־דָּוִ֗יד בְּבֹא֨וֹ עִם־פְּלִשְׁתִּ֧ים עַל־שָׁא֛וּל לַמִּלְחָמָ֖ה וְלֹ֣א עֲזָרֻ֑ם כִּ֣י בְעֵצָ֗ה שִׁלְּחֻ֜הוּ סַרְנֵ֤י פְלִשְׁתִּים֙ לֵאמֹ֔ר בְּרָאשֵׁ֕ינוּ יִפּ֖וֹל אֶל־אֲדֹנָ֥יו שָׁאֽוּל׃

‎21 ‏בְּלֶכְתּ֣וֹ אֶל־צִֽיקְלַ֗ג נָפְל֣וּ עָלָ֣יו׀ מִֽמְּנַשֶּׁ֡ה עַ֠דְנַח וְיוֹזָבָ֤ד וִידִֽיעֲאֵל֙ וּמִיכָאֵ֣ל וְיוֹזָבָ֔ד וֶאֱלִיה֖וּא וְצִלְּתָ֑י רָאשֵׁ֥י הָאֲלָפִ֖ים אֲשֶׁ֥ר לִמְנַשֶּֽׁה׃

‎22 ‏וְהֵ֗מָּה עָזְר֤וּ עִם־דָּוִיד֙ עַֽל־הַגְּד֔וּד כִּֽי־גִבּ֥וֹרֵי חַ֖יִל כֻּלָּ֑ם וַיִּהְי֥וּ שָׂרִ֖ים בַּצָּבָֽא׃

‎23 ‏כִּ֚י לְעֶת־י֣וֹם בְּי֔וֹם יָבֹ֥אוּ עַל־דָּוִ֖יד לְעָזְר֑וֹ עַד־לְמַחֲנֶ֥ה גָד֖וֹל כְּמַחֲנֵ֥ה אֱלֹהִֽים׃ פ

‎24 ‏וְ֠אֵלֶּה מִסְפְּרֵ֞י רָאשֵׁ֤י הֶֽחָלוּץ֙ לַצָּבָ֔א בָּ֥אוּ עַל־דָּוִ֖יד חֶבְר֑וֹנָה³ לְהָסֵ֞ב מַלְכ֥וּת שָׁא֛וּל אֵלָ֖יו כְּפִ֥י יְהוָֽה׃ ס

‎25 ‏בְּנֵ֣י יְהוּדָ֔ה נֹשְׂאֵ֥י צִנָּ֖ה וָרֹ֑מַח שֵׁ֧שֶׁת אֲלָפִ֛ים וּשְׁמוֹנֶ֥ה מֵא֖וֹת חֲלוּצֵ֥י צָבָֽא׃ ס

‎26 ‏מִן־בְּנֵ֣י שִׁמְע֗וֹן גִּבּ֤וֹרֵי חַ֙יִל֙ לַצָּבָ֔א שִׁבְעַ֥ת אֲלָפִ֖ים וּמֵאָֽה׃ ס

‎27 ‏מִן־בְּנֵי֙ הַלֵּוִ֔י אַרְבַּ֥עַת אֲלָפִ֖ים וְשֵׁ֥שׁ מֵאֽוֹת׃ ס

‎28 ‏וִיהוֹיָדָ֖ע הַנָּגִ֣יד לְאַהֲרֹ֑ן וְעִמּ֕וֹ שְׁלֹ֥שֶׁת³ אֲלָפִ֖ים וּשְׁבַ֥ע מֵאֽוֹת׃ ס

‎29 ‏וְצָד֥וֹק נַ֖עַר גִּבּ֣וֹר חָ֑יִל וּבֵית־אָבִ֥יו שָׂרִ֖ים עֶשְׂרִ֥ים וּשְׁנָֽיִם׃ ס

‎30 ‏וּמִן־בְּנֵ֧י בִנְיָמִ֛ן אֲחֵ֥י שָׁא֖וּל שְׁלֹ֣שֶׁת אֲלָפִ֑ים וְעַד־הֵ֙נָּה֙ מַרְבִּיתָ֔ם שֹׁמְרִ֕ים מִשְׁמֶ֖רֶת בֵּ֥ית שָׁאֽוּל׃ ס

‎31 ‏וּמִן־בְּנֵ֣י אֶפְרַ֔יִם עֶשְׂרִ֥ים אֶ֖לֶף וּשְׁמוֹנֶ֣ה מֵא֑וֹת גִּבּ֣וֹרֵי חַ֔יִל אַנְשֵׁ֥י שֵׁמ֖וֹת לְבֵ֥ית אֲבוֹתָֽם׃ ס

‎32 ‏וּמֵחֲצִי֙ מַטֵּ֣ה מְנַשֶּׁ֔ה שְׁמוֹנָ֥ה עָשָׂ֖ר אָ֑לֶף אֲשֶׁ֤ר נִקְּבוּ֙ בְּשֵׁמ֔וֹת לָב֖וֹא לְהַמְלִ֥יךְ אֶת־דָּוִֽיד׃ ס

‎33 ‏וּמִבְּנֵ֣י יִשָּׂשכָ֗ר יוֹדְעֵ֤י בִינָה֙ לַֽעִתִּ֔ים לָדַ֖עַת מַה־יַּעֲשֶׂ֣ה יִשְׂרָאֵ֑ל רָאשֵׁיהֶ֣ם מָאתַ֔יִם וְכָל־אֲחֵיהֶ֖ם עַל־פִּיהֶֽם׃ ס

‎34 ‏מִזְּבֻל֞וּן יוֹצְאֵ֣י צָבָ֗א עֹרְכֵ֧י מִלְחָמָ֛ה בְּכָל־כְּלֵ֥י מִלְחָמָ֖ה חֲמִשִּׁ֣ים אָ֑לֶף וְלַעֲדֹ֖ר בְּלֹא־לֵ֥ב וָלֵֽב׃ ס

‎35 ‏וּמִנַּפְתָּלִ֖י שָׂרִ֣ים אָ֑לֶף וְעִמָּהֶם֙ בְּצִנָּ֣ה וַחֲנִ֔ית שְׁלֹשִׁ֥ים וְשִׁבְעָ֖ה אָֽלֶף׃ ס

‎36 ‏וּמִן־הַדָּנִי֙ עֹרְכֵ֣י מִלְחָמָ֔ה עֶשְׂרִֽים־וּשְׁמוֹנָ֥ה אֶ֖לֶף וְשֵׁ֥שׁ מֵאֽוֹת׃ ס

‎37 ‏וּמֵאָשֵׁ֗ר יוֹצְאֵ֥י צָבָ֛א לַעֲרֹ֥ךְ מִלְחָמָ֖ה אַרְבָּעִ֥ים אָֽלֶף׃ ס

‎38 ‏וּמֵעֵ֣בֶר לַ֠יַּרְדֵּן מִן־הָראוּבֵנִ֨י וְהַגָּדִ֜י וַחֲצִ֣י׀ שֵׁ֣בֶט מְנַשֶּׁ֗ה בְּכֹל֙ כְּלֵי֙ צְבָ֣א מִלְחָמָ֔ה מֵאָ֥ה וְעֶשְׂרִ֖ים אָֽלֶף׃

‎39 ‏כָּל־אֵ֜לֶּה אַנְשֵׁ֣י מִלְחָמָה֮ עֹדְרֵ֣י מַעֲרָכָה֒ בְּלֵבָ֤ב שָׁלֵם֙ בָּ֣אוּ חֶבְר֔וֹנָה לְהַמְלִ֥יךְ אֶת־דָּוִ֖יד עַל־כָּל־יִשְׂרָאֵ֑ל וְ֠גַם כָּל־שֵׁרִ֧ית יִשְׂרָאֵ֛ל לֵ֥ב אֶחָ֖ד לְהַמְלִ֥יךְ אֶת־דָּוִֽיד׃

‎40 ‏וַיִּהְיוּ־שָׁ֤ם עִם־דָּוִיד֙ יָמִ֣ים שְׁלוֹשָׁ֔ה אֹכְלִ֖ים וְשׁוֹתִ֑ים כִּֽי־הֵכִ֥ינוּ לָהֶ֖ם אֲחֵיהֶֽם׃

‎41 ‏וְגַ֣ם הַקְּרֽוֹבִים־אֲ֠לֵיהֶם עַד־יִשָׂשכָ֨ר וּזְבֻל֜וּן וְנַפְתָּלִ֗י מְבִיאִ֣ים לֶ֡חֶם בַּחֲמוֹרִ֣ים וּבַגְּמַלִּ֣ים וּבַפְּרָדִ֣ים׀ וּֽבַבָּקָ֡ר מַאֲכָ֡ל קֶ֠מַח דְּבֵלִ֨ים וְצִמּוּקִ֧ים וְיַֽיִן־וְשֶׁ֛מֶן וּבָקָ֥ר וְצֹ֖אן לָרֹ֑ב כִּ֥י שִׂמְחָ֖ה בְּיִשְׂרָאֵֽל׃ פ

1 wə’ēlleh habā’îm ’el-dāwîḏ ləṣîqəlaḡ ‘wōḏ ‘āṣûr mipənê šā’ûl ben-qîš wəhēmmâ bagibwōrîm ‘ōzərê hammiləḥāmâ:

2 nōšəqê qešeṯ mayəmînîm ûmaśəmi’lîm bā’ăḇānîm ûḇ^aḥiṣṣîm baqqāšeṯ mē’ăḥê šā’ûl mibinəyāmin:

3 hārō’š ’ăḥî‘ezer wəywō’āš bənê haššəmā‘â hagiḇə‘āṯî wîzû’ēl wîzî’ēl³ wāfeleṭ bənê ‘azəmāweṯ ûḇərāḵâ wəyēhû’ hā‘ănnəṯōṯî:

4 wəyišəm^a‘əyâ hagiḇə‘wōnî gibwōr baššəlōšîm wə‘al-haššəlōšîm:

5 wəyirəməyâ wəy^aḥăzî’ēl wəywōḥānān wəywōzāḇāḏ hagəḏērāṯî:

6 ’elə‘ûzay wîrîmwōṯ ûḇə‘aləyâ ûšəmarəyâû ûšəfaṭəyâû h^aḥărîfî h^aḥărûfî:

7 ’eləqānâ wəyiššîyâû w^a‘ăzarə’ēl wəywō‘ezer wəyāšāḇə‘ām haqqārəḥîm:

8 wəywō‘ē’lâ ûzəḇaḏəyâ bənê yərōḥām min-hagəḏwōr:

9 ûmin-hagāḏî niḇədəlû ’el-dāwîḏ laməṣaḏ miḏəbārâ gibōrê h^aḥayil ’anəšê ṣāḇā’ lammiləḥāmâ ‘ōrəḵê ṣinnâ wārōm^aḥ ûfənê ’arəyēh pənêhem wəḵiṣəḇā’yim ‘al-hehārîm ləmahēr: s

10 ‘ēzer hārō’š ‘ōḇaḏəyâ haššēnî ’ĕlî’āḇ haššəlišî:

11 mišəmannâ hārəḇî‘î yirəməyâ h^aḥămišî:

12 ‘atay haššiššî ’ĕlî’ēl haššəḇi‘î:

13 ywōḥānān haššəmînî ’eləzāḇāḏ hatəšî‘î:

14 yirəməyâû hā‘ăśîrî smaḵəbannay ‘ašətê ‘āśār:

15 ’ēlleh mibənê-ḡāḏ rā’šê haṣṣāḇā’ ’eḥāḏ ləmē’â haqqāṭān wəhagāḏwōl lə’ālef:

16 ’ēlleh hēm ’ăšer ‘āḇərû ’eṯ-hayyarədēn b^aḥōḏeš hāri’šwōn wəhû’ məmallē’ ‘al-kāl-giḏəyōṯāyw gəḏwōṯāyw wayyaḇərîḥû ’eṯ-kāl-hā‘ămāqîm lammizərāḥ wəlamm^a‘ărāḇ: s

17 wayyāḇō’û min-bənê ḇinəyāmin wîhûḏâ ‘aḏ-laməṣāḏ ləḏāwîḏ:

18 wayyēṣē’ ḏāwîḏ lifənêhem wayy^a‘an wayyō’mer lâem ’im-ləšālwōm bā’ṯem ’ēlay lə‘āzərēnî yihəyeh-llî ‘ălêḵem lēḇāḇ ləyāḥaḏ wə’im-lərammwōṯanî ləṣāray bəlō’ ḥāmās bəḵapay yēre’ ’ĕlōhê ’ăḇwōṯênû wəywōḵ^aḥ: s

19 wərûḥa lāḇəšâ ’eṯ-‘ămāśay rō’š haššəlwōšîm haššālîšîm ləḵā ḏāwîḏ wə‘imməḵā ḇen-yišay šālwōm| šālwōm ləḵā wəšālwōm lə‘ōzəreḵā kî ‘ăzārəḵā ’ĕlōheyḵā wayəqabəlēm dāwîḏ wayyitənēm bərā’šê hagəḏûḏ: f

20 ûmimmənaššeh nāfəlû ‘al-dāwîḏ bəḇō’wō ‘im-pəlišətîm ‘al-šā’ûl lammiləḥāmâ wəlō’ ‘ăzārum kî ḇə‘ēṣâ šilləḥuhû sarənê fəlišətîm lē’mōr bərā’šênû yipwōl ’el-’ăḏōnāyw šā’ûl:

21 bəleḵətwō ’el-ṣîqəlaḡ nāfəlû ‘ālāyw| mimmənaššeh ‘aḏən^aḥ wəywōzāḇāḏ wîḏî‘ă’ēl ûmîḵā’ēl wəywōzāḇāḏ we’ĕlîhû’ wəṣilləṯāy rā’šê hā’ălāfîm ’ăšer limənaššeh:

22 wəhēmmâ ‘āzərû ‘im-dāwîḏ ‘al-hagəḏûḏ kî-ḡibwōrê ḥayil kullām wayyihəyû śārîm baṣṣāḇā’:

23 kî lə‘eṯ-ywōm bəywōm yāḇō’û ‘al-dāwîḏ lə‘āzərwō ‘aḏ-ləm^aḥăneh ḡāḏwōl kəm^aḥănēh ’ĕlōhîm: f

24 wə’ēlleh misəpərê rā’šê heḥālûṣ laṣṣāḇā’ bā’û ‘al-dāwîḏ ḥeḇərwōnâ³ ləhāsēḇ maləḵûṯ šā’ûl ’ēlāyw kəfî yəhwâ: s

25 bənê yəhûḏâ nōśə’ê ṣinnâ wārōm^aḥ šēšeṯ ’ălāfîm ûšəmwōneh mē’wōṯ ḥălûṣê ṣāḇā’: s

26 min-bənê šimə‘wōn gibwōrê ḥayil laṣṣāḇā’ šiḇə‘aṯ ’ălāfîm ûmē’â: s

27 min-bənê hallēwî ’arəb^a‘aṯ ’ălāfîm wəšēš mē’wōṯ: s

28 wîhwōyāḏā‘ hannāḡîḏ lə’ahărōn wə‘immwō šəlōšeṯ³ ’ălāfîm ûšəḇ^a‘ mē’wōṯ: s

29 wəṣāḏwōq n^a‘ar gibwōr ḥāyil ûḇêṯ-’āḇîw śārîm ‘eśərîm ûšənāyim: s

30 ûmin-bənê ḇinəyāmin ’ăḥê šā’ûl šəlōšeṯ ’ălāfîm wə‘aḏ-hēnnâ marəbîṯām šōmərîm mišəmereṯ bêṯ šā’ûl: s

31 ûmin-bənê ’efərayim ‘eśərîm ’elef ûšəmwōneh mē’wōṯ gibwōrê ḥayil ’anəšê šēmwōṯ ləḇêṯ ’ăḇwōṯām: s

32 ûmēḥăṣî maṭṭēh mənaššeh šəmwōnâ ‘āśār ’ālef ’ăšer niqqəḇû bəšēmwōṯ lāḇwō’ ləhaməlîḵə ’eṯ-dāwîḏ: s

33 ûmibənê yiśśāsḵār ywōḏə‘ê ḇînâ l^a‘itîm lāḏ^a‘aṯ mah-yy^a‘ăśeh yiśərā’ēl rā’šêhem mā’ṯayim wəḵāl-’ăḥêhem ‘al-pîhem: s

34 mizzəḇulûn ywōṣə’ê ṣāḇā’ ‘ōrəḵê miləḥāmâ bəḵāl-kəlê miləḥāmâ ḥămiššîm ’ālef wəl^a‘ăḏōr bəlō’-lēḇ wālēḇ: s

35 ûminnafətālî śārîm ’ālef wə‘immâem bəṣinnâ w^aḥănîṯ šəlōšîm wəšiḇə‘â ’ālef: s

36 ûmin-hadānî ‘ōrəḵê miləḥāmâ ‘eśərîm-ûšəmwōnâ ’elef wəšēš mē’wōṯ: s

37 ûmē’āšēr ywōṣə’ê ṣāḇā’ l^a‘ărōḵə miləḥāmâ ’arəbā‘îm ’ālef: s

38 ûmē‘ēḇer layyarədēn min-hār’ûḇēnî wəhagāḏî w^aḥăṣî| šēḇeṭ mənaššeh bəḵōl kəlê ṣəḇā’ miləḥāmâ mē’â wə‘eśərîm ’ālef:

39 kāl-’ēlleh ’anəšê miləḥāmâ ‘ōḏərê m^a‘ărāḵâ bəlēḇāḇ šālēm bā’û ḥeḇərwōnâ ləhaməlîḵə ’eṯ-dāwîḏ ‘al-kāl-yiśərā’ēl wəḡam kāl-šērîṯ yiśərā’ēl lēḇ ’eḥāḏ ləhaməlîḵə ’eṯ-dāwîḏ:

40 wayyihəyû-šām ‘im-dāwîḏ yāmîm šəlwōšâ ’ōḵəlîm wəšwōṯîm kî-hēḵînû lâem ’ăḥêhem:

41 wəḡam haqqərwōḇîm-’ălêhem ‘aḏ-yiśāsḵār ûzəḇulûn wənafətālî məḇî’îm leḥem b^aḥămwōrîm ûḇagəmallîm ûḇapərāḏîm| ûḇabāqār ma’ăḵāl qem^aḥ dəḇēlîm wəṣimmûqîm wəyayin-wəšemen ûḇāqār wəṣō’n lārōḇ kî śiməḥâ bəyiśərā’ēl: f