‎1 ‏וַיִּסְפֹּ֨ר שְׁלֹמֹ֜ה שִׁבְעִ֥ים אֶ֙לֶף֙ אִ֣ישׁ סַבָּ֔ל וּשְׁמוֹנִ֥ים אֶ֛לֶף אִ֖ישׁ חֹצֵ֣ב בָּהָ֑ר וּמְנַצְּחִ֣ים עֲלֵיהֶ֔ם שְׁלֹ֥שֶׁת אֲלָפִ֖ים וְשֵׁ֥שׁ מֵאֽוֹת׃ פ

‎2 ‏וַיִּשְׁלַ֣ח שְׁלֹמֹ֔ה אֶל־חוּרָ֥ם מֶֽלֶךְ־צֹ֖ר לֵאמֹ֑ר כַּאֲשֶׁ֤ר עָשִׂ֙יתָ֙ עִם־דָּוִ֣יד אָבִ֔י וַתִּֽשְׁלַֽח־ל֣וֹ אֲרָזִ֔ים לִבְנֽוֹת־ל֥וֹ בַ֖יִת לָשֶׁ֥בֶת בּֽוֹ׃

‎3 ‏הִנֵּה֩ אֲנִ֨י בֽוֹנֶה־בַּ֜יִת לְשֵׁ֣ם׀ יְהוָ֣ה אֱלֹהָ֗י לְהַקְדִּ֣ישׁ ל֡וֹ לְהַקְטִ֣יר לְפָנָ֣יו קְטֹֽרֶת־סַמִּים֩ וּמַעֲרֶ֨כֶת תָּמִ֤יד וְעֹלוֹת֙ לַבֹּ֣קֶר וְלָעֶ֔רֶב לַשַּׁבָּתוֹת֙ וְלֶ֣חֳדָשִׁ֔ים וּֽלְמוֹעֲדֵ֖י יְהוָ֣ה אֱלֹהֵ֑ינוּ לְעוֹלָ֖ם זֹ֥את עַל־יִשְׂרָאֵֽל׃

‎4 ‏וְהַבַּ֛יִת אֲשֶׁר־אֲנִ֥י בוֹנֶ֖ה גָּד֑וֹל כִּֽי־גָד֥וֹל אֱלֹהֵ֖ינוּ מִכָּל־הָאֱלֹהִֽים׃

‎5 ‏וּמִ֤י יַעֲצָר־כֹּ֙חַ֙ לִבְנֽוֹת־ל֣וֹ בַ֔יִת כִּ֧י הַשָּׁמַ֛יִם וּשְׁמֵ֥י הַשָּׁמַ֖יִם לֹ֣א יְכַלְכְּלֻ֑הוּ וּמִ֤י אֲנִי֙ אֲשֶׁ֣ר אֶבְנֶה־לּ֣וֹ בַ֔יִת כִּ֖י אִם־לְהַקְטִ֥יר לְפָנָֽיו׃

‎6 ‏וְעַתָּ֡ה שְֽׁלַֽח־לִ֣י אִישׁ־חָכָ֡ם לַעֲשׂוֹת֩ בַּזָּהָ֨ב וּבַכֶּ֜סֶף וּבַנְּחֹ֣שֶׁת וּבַבַּרְזֶ֗ל וּבָֽאַרְגְּוָן֙ וְכַרְמִ֣יל וּתְכֵ֔לֶת וְיֹדֵ֖עַ לְפַתֵּ֣חַ פִּתּוּחִ֑ים עִם־הַֽחֲכָמִ֗ים אֲשֶׁ֤ר עִמִּי֙ בִּֽיהוּדָ֣ה וּבִֽירוּשָׁלִַ֔ם אֲשֶׁ֥ר הֵכִ֖ין דָּוִ֥יד אָבִֽי׃

‎7 ‏וּֽשְׁלַֽח־לִי֩ עֲצֵ֨י אֲרָזִ֜ים בְּרוֹשִׁ֣ים וְאַלְגּוּמִּים֮ מֵֽהַלְּבָנוֹן֒ כִּ֚י אֲנִ֣י יָדַ֔עְתִּי אֲשֶׁ֤ר עֲבָדֶ֙יךָ֙ יֽוֹדְעִ֔ים לִכְר֖וֹת עֲצֵ֣י לְבָנ֑וֹן וְהִנֵּ֥ה עֲבָדַ֖י עִם־עֲבָדֶֽיךָ׃

‎8 ‏וּלְהָכִ֥ין לִ֛י עֵצִ֖ים לָרֹ֑ב כִּ֥י הַבַּ֛יִת אֲשֶׁר־אֲנִ֥י בוֹנֶ֖ה גָּד֥וֹל וְהַפְלֵֽא׃

‎9 ‏וְהִנֵּ֣ה לַֽחֹטְבִ֣ים׀ לְֽכֹרְתֵ֣י׀ הָעֵצִ֡ים נָתַתִּי֩ חִטִּ֨ים׀ מַכּ֜וֹת לַעֲבָדֶ֗יךָ כֹּרִים֙ עֶשְׂרִ֣ים אֶ֔לֶף וּשְׂעֹרִ֕ים כֹּרִ֖ים עֶשְׂרִ֣ים אָ֑לֶף וְיַ֗יִן בַּתִּים֙ עֶשְׂרִ֣ים אֶ֔לֶף וְשֶׁ֕מֶן בַּתִּ֖ים עֶשְׂרִ֥ים אָֽלֶף׃ פ

‎10 ‏וַיֹּ֨אמֶר חוּרָ֤ם מֶֽלֶךְ־צֹר֙ בִּכְתָ֔ב וַיִּשְׁלַ֖ח אֶל־שְׁלֹמֹ֑ה בְּאַהֲבַ֤ת יְהוָה֙ אֶת־עַמּ֔וֹ נְתָנְךָ֥ עֲלֵיהֶ֖ם מֶֽלֶךְ׃

‎11 ‏וַיֹּאמֶר֮ חוּרָם֒ בָּר֤וּךְ יְהוָה֙ אֱלֹהֵ֣י יִשְׂרָאֵ֔ל אֲשֶׁ֣ר עָשָׂ֔ה אֶת־הַשָּׁמַ֖יִם וְאֶת־הָאָ֑רֶץ אֲשֶׁ֣ר נָתַן֩ לְדָוִ֨יד הַמֶּ֜לֶךְ בֵּ֣ן חָכָ֗ם יוֹדֵ֙עַ֙ שֵׂ֣כֶל וּבִינָ֔ה אֲשֶׁ֤ר יִבְנֶה־בַּ֙יִת֙ לַיהוָ֔ה וּבַ֖יִת לְמַלְכוּתֽוֹ׃

‎12 ‏וְעַתָּ֗ה שָׁלַ֧חְתִּי אִישׁ־חָכָ֛ם יוֹדֵ֥עַ בִּינָ֖ה לְחוּרָ֥ם אָבִֽי׃

‎13 ‏בֶּן־אִשָּׁ֞ה מִן־בְּנ֣וֹת דָּ֗ן וְאָבִ֣יו אִישׁ־צֹרִ֡י יוֹדֵ֡עַ לַעֲשׂ֣וֹת בַּזָּֽהָב־וּ֠בַכֶּסֶף בַּנְּחֹ֨שֶׁת בַּבַּרְזֶ֜ל בָּאֲבָנִ֣ים וּבָעֵצִ֗ים בָּאַרְגָּמָ֤ן בַּתְּכֵ֙לֶת֙ וּבַבּ֣וּץ וּבַכַּרְמִ֔יל וּלְפַתֵּ֙חַ֙ כָּל־פִּתּ֔וּחַ וְלַחְשֹׁ֖ב כָּל־מַחֲשָׁ֑בֶת אֲשֶׁ֤ר יִנָּֽתֶן־לוֹ֙ עִם־חֲכָמֶ֔יךָ וְֽחַכְמֵ֔י אֲדֹנִ֖י דָּוִ֥יד אָבִֽיךָ׃

‎14 ‏וְ֠עַתָּה הַחִטִּ֨ים וְהַשְּׂעֹרִ֜ים הַשֶּׁ֤מֶן וְהַיַּ֙יִן֙ אֲשֶׁ֣ר אָמַ֣ר אֲדֹנִ֔י יִשְׁלַ֖ח לַעֲבָדָֽיו׃

‎15 ‏וַ֠אֲנַחְנוּ נִכְרֹ֨ת עֵצִ֤ים מִן־הַלְּבָנוֹן֙ כְּכָל־צָרְכֶּ֔ךָ וּנְבִיאֵ֥ם לְךָ֛ רַפְסֹד֖וֹת עַל־יָ֣ם יָפ֑וֹ וְאַתָּ֛ה תַּעֲלֶ֥ה אֹתָ֖ם יְרוּשָׁלִָֽם׃ פ

‎16 ‏וַיִּסְפֹּ֣ר שְׁלֹמֹ֗ה כָּל־הָאֲנָשִׁ֤ים הַגֵּירִים֙ אֲשֶׁר֙ בְּאֶ֣רֶץ יִשְׂרָאֵ֔ל אַחֲרֵ֣י הַסְּפָ֔ר אֲשֶׁ֥ר סְפָרָ֖ם דָּוִ֣יד אָבִ֑יו וַיִּמָּצְא֗וּ מֵאָ֤ה וַחֲמִשִּׁים֙ אֶ֔לֶף וּשְׁלֹ֥שֶׁת אֲלָפִ֖ים וְשֵׁ֥שׁ מֵאֽוֹת׃

‎17 ‏וַיַּ֨עַשׂ מֵהֶ֜ם שִׁבְעִ֥ים אֶ֙לֶף֙ סַבָּ֔ל וּשְׁמֹנִ֥ים אֶ֖לֶף חֹצֵ֣ב בָּהָ֑ר וּשְׁלֹ֤שֶׁת אֲלָפִים֙ וְשֵׁ֣שׁ מֵא֔וֹת מְנַצְּחִ֖ים לְהַעֲבִ֥יד אֶת־הָעָֽם׃

1 wayyisəpōr šəlōmōh šiḇə‘îm ’elef ’îš sabāl ûšəmwōnîm ’elef ’îš ḥōṣēḇ bâār ûmənaṣṣəḥîm ‘ălêhem šəlōšeṯ ’ălāfîm wəšēš mē’wōṯ: f

2 wayyišəl^aḥ šəlōmōh ’el-ḥûrām meleḵə-ṣōr lē’mōr ka’ăšer ‘āśîṯā ‘im-dāwîḏ ’āḇî watišəl^aḥ-lwō ’ărāzîm liḇənwōṯ-lwō ḇayiṯ lāšeḇeṯ bwō:

3 hinnēh ’ănî ḇwōneh-bayiṯ ləšēm| yəhwâ ’ĕlōhāy ləhaqədîš lwō ləhaqəṭîr ləfānāyw qəṭōreṯ-sammîm ûm^a‘ăreḵeṯ tāmîḏ wə‘ōlwōṯ labōqer wəlā‘ereḇ laššabāṯwōṯ wəleḥŏḏāšîm ûləmwō‘ăḏê yəhwâ ’ĕlōhênû lə‘wōlām zō’ṯ ‘al-yiśərā’ēl:

4 wəhabayiṯ ’ăšer-’ănî ḇwōneh gāḏwōl kî-ḡāḏwōl ’ĕlōhênû mikāl-hā’ĕlōhîm:

5 ûmî y^a‘ăṣār-kōḥa liḇənwōṯ-lwō ḇayiṯ kî haššāmayim ûšəmê haššāmayim lō’ yəḵaləkəluhû ûmî ’ănî ’ăšer ’eḇəneh-llwō ḇayiṯ kî ’im-ləhaqəṭîr ləfānāyw:

6 wə‘atâ šəl^aḥ-lî ’îš-ḥāḵām l^a‘ăśwōṯ bazzâāḇ ûḇakesef ûḇannəḥōšeṯ ûḇabarəzel ûḇā’arəgəwān wəḵarəmîl ûṯəḵēleṯ wəyōḏē‘a ləfatēḥa pitûḥîm ‘im-h^aḥăḵāmîm ’ăšer ‘immî bîhûḏâ ûḇîrûšālaim ’ăšer hēḵîn dāwîḏ ’āḇî:

7 ûšəl^aḥ-lî ‘ăṣê ’ărāzîm bərwōšîm wə’aləgûmmîm mēhalləḇānwōn kî ’ănî yāḏ^a‘ətî ’ăšer ‘ăḇāḏeyḵā ywōḏə‘îm liḵərwōṯ ‘ăṣê ləḇānwōn wəhinnēh ‘ăḇāḏay ‘im-‘ăḇāḏeyḵā:

8 ûləhāḵîn lî ‘ēṣîm lārōḇ kî habayiṯ ’ăšer-’ănî ḇwōneh gāḏwōl wəhafəlē’:

9 wəhinnēh l^aḥōṭəḇîm| ləḵōrəṯê| hā‘ēṣîm nāṯatî ḥiṭṭîm| makwōṯ l^a‘ăḇāḏeyḵā kōrîm ‘eśərîm ’elef ûśə‘ōrîm kōrîm ‘eśərîm ’ālef wəyayin batîm ‘eśərîm ’elef wəšemen batîm ‘eśərîm ’ālef: f

10 wayyō’mer ḥûrām meleḵə-ṣōr biḵəṯāḇ wayyišəl^aḥ ’el-šəlōmōh bə’ahăḇaṯ yəhwâ ’eṯ-‘ammwō nəṯānəḵā ‘ălêhem meleḵə:

11 wayyō’mer ḥûrām bārûḵə yəhwâ ’ĕlōhê yiśərā’ēl ’ăšer ‘āśâ ’eṯ-haššāmayim wə’eṯ-hā’āreṣ ’ăšer nāṯan ləḏāwîḏ hammeleḵə bēn ḥāḵām ywōḏē‘a śēḵel ûḇînâ ’ăšer yiḇəneh-bayiṯ layhwâ ûḇayiṯ ləmaləḵûṯwō:

12 wə‘atâ šāl^aḥətî ’îš-ḥāḵām ywōḏē‘a bînâ ləḥûrām ’āḇî:

13 ben-’iššâ min-bənwōṯ dān wə’āḇîw ’îš-ṣōrî ywōḏē‘a l^a‘ăśwōṯ bazzâāḇ-ûḇakesef bannəḥōšeṯ babarəzel bā’ăḇānîm ûḇā‘ēṣîm bā’arəgāmān batəḵēleṯ ûḇabûṣ ûḇakarəmîl ûləfatēḥa kāl-pitûḥa wəl^aḥəšōḇ kāl-m^aḥăšāḇeṯ ’ăšer yinnāṯen-lwō ‘im-ḥăḵāmeyḵā wəḥaḵəmê ’ăḏōnî dāwîḏ ’āḇîḵā:

14 wə‘atâ h^aḥiṭṭîm wəhaśśə‘ōrîm haššemen wəhayyayin ’ăšer ’āmar ’ăḏōnî yišəl^aḥ l^a‘ăḇāḏāyw:

15 wa’ăn^aḥənû niḵərōṯ ‘ēṣîm min-halləḇānwōn kəḵāl-ṣārəkeḵā ûnəḇî’ēm ləḵā rafəsōḏwōṯ ‘al-yām yāfwō wə’atâ t^a‘ăleh ’ōṯām yərûšālāim: f

16 wayyisəpōr šəlōmōh kāl-hā’ănāšîm hagêrîm ’ăšer bə’ereṣ yiśərā’ēl ’^aḥărê hassəfār ’ăšer səfārām dāwîḏ ’āḇîw wayyimmāṣə’û mē’â w^aḥămiššîm ’elef ûšəlōšeṯ ’ălāfîm wəšēš mē’wōṯ:

17 wayy^a‘aś mēhem šiḇə‘îm ’elef sabāl ûšəmōnîm ’elef ḥōṣēḇ bâār ûšəlōšeṯ ’ălāfîm wəšēš mē’wōṯ mənaṣṣəḥîm ləh^a‘ăḇîḏ ’eṯ-hā‘ām: