‎1 ‏וַיַּמְלִיכוּ֩ יוֹשְׁבֵ֨י יְרוּשָׁלִַ֜ם אֶת־אֲחַזְיָ֨הוּ בְנ֤וֹ הַקָּטֹן֙ תַּחְתָּ֔יו כִּ֤י כָל־הָרִאשֹׁנִים֙ הָרַ֣ג הַגְּד֔וּד הַבָּ֥א בָֽעַרְבִ֖ים לַֽמַּחֲנֶ֑ה וַיִּמְלֹ֛ךְ אֲחַזְיָ֥הוּ בֶן־יְהוֹרָ֖ם מֶ֥לֶךְ יְהוּדָֽה׃ פ

‎2 ‏בֶּן־אַרְבָּעִ֨ים וּשְׁתַּ֤יִם שָׁנָה֙ אֲחַזְיָ֣הוּ בְמָלְכ֔וֹ וְשָׁנָ֣ה אַחַ֔ת מָלַ֖ךְ בִּֽירוּשָׁלִָ֑ם וְשֵׁ֣ם אִמּ֔וֹ עֲתַלְיָ֖הוּ בַּת־עָמְרִֽי׃

‎3 ‏גַּם־ה֣וּא הָלַ֔ךְ בְּדַרְכֵ֖י בֵּ֣ית אַחְאָ֑ב כִּ֥י אִמּ֛וֹ הָיְתָ֥ה יֽוֹעַצְתּ֖וֹ לְהַרְשִֽׁיעַ׃

‎4 ‏וַיַּ֧עַשׂ הָרַ֛ע בְּעֵינֵ֥י יְהוָ֖ה כְּבֵ֣ית אַחְאָ֑ב כִּי־הֵ֜מָּה הָֽיוּ־ל֣וֹ יֽוֹעֲצִ֗ים אַחֲרֵ֛י מ֥וֹת אָבִ֖יו לְמַשְׁחִ֥ית לֽוֹ׃

‎5 ‏גַּ֣ם בַּעֲצָתָם֮ הָלַךְ֒ וַיֵּלֶךְ֩ אֶת־יְהוֹרָ֨ם בֶּן־אַחְאָ֜ב מֶ֣לֶךְ יִשְׂרָאֵ֗ל לַמִּלְחָמָ֛ה עַל־חֲזָאֵ֥ל מֶֽלֶךְ־אֲרָ֖ם בְּרָמ֣וֹת גִּלְעָ֑ד וַיַּכּ֥וּ הָֽרַמִּ֖ים אֶת־יוֹרָֽם׃

‎6 ‏וַיָּ֜שָׁב לְהִתְרַפֵּ֣א בְיִזְרְעֶ֗אל כִּ֤י הַמַּכִּים֙ אֲשֶׁ֣ר הִכֻּ֣הוּ בָֽרָמָ֔ה בְּהִלָּ֣חֲמ֔וֹ אֶת־חֲזָהאֵ֖ל מֶ֣לֶךְ אֲרָ֑ם וַעֲזַרְיָ֨הוּ בֶן־יְהוֹרָ֜ם מֶ֣לֶךְ יְהוּדָ֗ה יָרַ֡ד לִרְא֞וֹת אֶת־יְהוֹרָ֧ם בֶּן־אַחְאָ֛ב בְּיִזְרְעֶ֖אל כִּי־חֹלֶ֥ה הֽוּא׃

‎7 ‏וּמֵֽאֱלֹהִ֗ים הָיְתָה֙ תְּבוּסַ֣ת אֲחַזְיָ֔הוּ לָב֖וֹא אֶל־יוֹרָ֑ם וּבְבֹא֗וֹ יָצָ֤א עִם־יְהוֹרָם֙ אֶל־יֵה֣וּא בֶן־נִמְשִׁ֔י אֲשֶׁ֣ר מְשָׁח֣וֹ יְהוָ֔ה לְהַכְרִ֖ית אֶת־בֵּ֥ית אַחְאָֽב׃

‎8 ‏וַיְהִ֕י כְּהִשָּׁפֵ֥ט יֵה֖וּא עִם־בֵּ֣ית אַחְאָ֑ב וַיִּמְצָא֩ אֶת־שָׂרֵ֨י יְהוּדָ֜ה וּבְנֵ֨י אֲחֵ֧י אֲחַזְיָ֛הוּ מְשָׁרְתִ֥ים לַאֲחַזְיָ֖הוּ וַיַּהַרְגֵֽם׃

‎9 ‏וַיְבַקֵּשׁ֩ אֶת־אֲחַזְיָ֨הוּ וַֽיִּלְכְּדֻ֜הוּ וְה֧וּא מִתְחַבֵּ֣א בְשֹֽׁמְר֗וֹן וַיְבִאֻ֣הוּ אֶל־יֵהוּא֮ וַיְמִתֻהוּ֒ וַֽיִּקְבְּרֻ֔הוּ כִּ֤י אָֽמְרוּ֙ בֶּן־יְהוֹשָׁפָ֣ט ה֔וּא אֲשֶׁר־דָּרַ֥שׁ אֶת־יְהוָ֖ה בְּכָל־לְבָב֑וֹ וְאֵין֙ לְבֵ֣ית אֲחַזְיָ֔הוּ לַעְצֹ֥ר כֹּ֖חַ לְמַמְלָכָֽה׃

‎10 ‏וַעֲתַלְיָ֙הוּ֙ אֵ֣ם אֲחַזְיָ֔הוּ רָאֲתָ֖ה כִּ֣י מֵ֣ת בְּנָ֑הּ וַתָּ֗קָם וַתְּדַבֵּ֛ר אֶת־כָּל־זֶ֥רַע הַמַּמְלָכָ֖ה לְבֵ֥ית יְהוּדָֽה׃

‎11 ‏וַתִּקַּח֩ יְהוֹשַׁבְעַ֨ת בַּת־הַמֶּ֜לֶךְ אֶת־יוֹאָ֣שׁ בֶּן־אֲחַזְיָ֗הוּ וַתִּגְנֹ֤ב אֹתוֹ֙ מִתּ֤וֹךְ בְּנֵֽי־הַמֶּ֙לֶךְ֙ הַמּ֣וּמָתִ֔ים וַתִּתֵּ֥ן אֹת֛וֹ וְאֶת־מֵֽינִקְתּ֖וֹ בַּחֲדַ֣ר הַמִּטּ֑וֹת וַתַּסְתִּירֵ֡הוּ יְהוֹשַׁבְעַ֣ת בַּת־הַמֶּ֣לֶךְ יְהוֹרָ֡ם אֵשֶׁת֩ יְהוֹיָדָ֨ע הַכֹּהֵ֜ן כִּ֣י הִיא֩ הָיְתָ֨ה אֲח֧וֹת אֲחַזְיָ֛הוּ מִפְּנֵ֥י עֲתַלְיָ֖הוּ וְלֹ֥א הֱמִיתָֽתְהוּ׃

‎12 ‏וַיְהִ֤י אִתָּם֙ בְּבֵ֣ית הָֽאֱלֹהִ֔ים מִתְחַבֵּ֖א שֵׁ֣שׁ שָׁנִ֖ים וַעֲתַלְיָ֖ה מֹלֶ֥כֶת עַל־הָאָֽרֶץ׃ פ

1 wayyaməlîḵû ywōšəḇê yərûšālaim ’eṯ-’ăḥazəyâû ḇənwō haqqāṭōn t^aḥətāyw kî ḵāl-hāri’šōnîm hāraḡ hagəḏûḏ habā’ ḇā‘arəḇîm lamm^aḥăneh wayyiməlōḵə ’ăḥazəyâû ḇen-yəhwōrām meleḵə yəhûḏâ: f

2 ben-’arəbā‘îm ûšətayim šānâ ’ăḥazəyâû ḇəmāləḵwō wəšānâ ’^aḥaṯ mālaḵə bîrûšālāim wəšēm ’immwō ‘ăṯaləyâû baṯ-‘āmərî:

3 gam-hû’ hālaḵə bəḏarəḵê bêṯ ’^aḥə’āḇ kî ’immwō hāyəṯâ ywō‘aṣətwō ləharəšî‘a:

4 wayy^a‘aś hār^a‘ bə‘ênê yəhwâ kəḇêṯ ’^aḥə’āḇ kî-hēmmâ hāyû-lwō ywō‘ăṣîm ’^aḥărê mwōṯ ’āḇîw ləmašəḥîṯ lwō:

5 gam b^a‘ăṣāṯām hālaḵə wayyēleḵə ’eṯ-yəhwōrām ben-’^aḥə’āḇ meleḵə yiśərā’ēl lammiləḥāmâ ‘al-ḥăzā’ēl meleḵə-’ărām bərāmwōṯ gilə‘āḏ wayyakû hārammîm ’eṯ-ywōrām:

6 wayyāšāḇ ləhiṯərapē’ ḇəyizərə‘e’l kî hammakîm ’ăšer hikuhû ḇārāmâ bəhillāḥămwō ’eṯ-ḥăzâ’ēl meleḵə ’ărām w^a‘ăzarəyâû ḇen-yəhwōrām meleḵə yəhûḏâ yāraḏ lirə’wōṯ ’eṯ-yəhwōrām ben-’^aḥə’āḇ bəyizərə‘e’l kî-ḥōleh hû’:

7 ûmē’ĕlōhîm hāyəṯâ təḇûsaṯ ’ăḥazəyâû lāḇwō’ ’el-ywōrām ûḇəḇō’wō yāṣā’ ‘im-yəhwōrām ’el-yēhû’ ḇen-niməšî ’ăšer məšāḥwō yəhwâ ləhaḵərîṯ ’eṯ-bêṯ ’^aḥə’āḇ:

8 wayəhî kəhiššāfēṭ yēhû’ ‘im-bêṯ ’^aḥə’āḇ wayyiməṣā’ ’eṯ-śārê yəhûḏâ ûḇənê ’ăḥê ’ăḥazəyâû məšārəṯîm la’ăḥazəyâû wayyaharəḡēm:

9 wayəḇaqqēš ’eṯ-’ăḥazəyâû wayyiləkəḏuhû wəhû’ miṯəḥabē’ ḇəšōmərwōn wayəḇi’uhû ’el-yēhû’ wayəmiṯuhû wayyiqəbəruhû kî ’āmərû ben-yəhwōšāfāṭ hû’ ’ăšer-dāraš ’eṯ-yəhwâ bəḵāl-ləḇāḇwō wə’ên ləḇêṯ ’ăḥazəyâû l^a‘əṣōr kōḥa ləmaməlāḵâ:

10 w^a‘ăṯaləyâû ’ēm ’ăḥazəyâû rā’ăṯâ kî mēṯ bənāh watāqām watəḏabēr ’eṯ-kāl-zer^a‘ hammaməlāḵâ ləḇêṯ yəhûḏâ:

11 watiqq^aḥ yəhwōšaḇə‘aṯ baṯ-hammeleḵə ’eṯ-ywō’āš ben-’ăḥazəyâû watiḡənōḇ ’ōṯwō mitwōḵə bənê-hammeleḵə hammûmāṯîm watitēn ’ōṯwō wə’eṯ-mêniqətwō b^aḥăḏar hammiṭṭwōṯ watasətîrēhû yəhwōšaḇə‘aṯ baṯ-hammeleḵə yəhwōrām ’ēšeṯ yəhwōyāḏā‘ hakōhēn kî hî’ hāyəṯâ ’ăḥwōṯ ’ăḥazəyâû mipənê ‘ăṯaləyâû wəlō’ hĕmîṯāṯəhû:

12 wayəhî ’itām bəḇêṯ hā’ĕlōhîm miṯəḥabē’ šēš šānîm w^a‘ăṯaləyâ mōleḵeṯ ‘al-hā’āreṣ: f