‎1 ‏וְזֹ֣את הַמִּצְוָ֗ה הַֽחֻקִּים֙ וְהַמִּשְׁפָּטִ֔ים אֲשֶׁ֥ר צִוָּ֛ה יְהוָ֥ה אֱלֹהֵיכֶ֖ם לְלַמֵּ֣ד אֶתְכֶ֑ם לַעֲשׂ֣וֹת בָּאָ֔רֶץ אֲשֶׁ֥ר אַתֶּ֛ם עֹבְרִ֥ים שָׁ֖מָּה לְרִשְׁתָּֽהּ׃

‎2 ‏לְמַ֨עַן תִּירָ֜א אֶת־יְהוָ֣ה אֱלֹהֶ֗יךָ לִ֠שְׁמֹר אֶת־כָּל־חֻקֹּתָ֣יו וּמִצְוֹתָיו֮ אֲשֶׁ֣ר אָנֹכִ֣י מְצַוֶּךָ֒ אַתָּה֙ וּבִנְךָ֣ וּבֶן־בִּנְךָ֔ כֹּ֖ל יְמֵ֣י חַיֶּ֑יךָ וּלְמַ֖עַן יַאֲרִכֻ֥ן יָמֶֽיךָ׃

‎3 ‏וְשָׁמַעְתָּ֤ יִשְׂרָאֵל֙ וְשָׁמַרְתָּ֣ לַעֲשׂ֔וֹת אֲשֶׁר֙ יִיטַ֣ב לְךָ֔ וַאֲשֶׁ֥ר תִּרְבּ֖וּן מְאֹ֑ד כַּאֲשֶׁר֩ דִּבֶּ֨ר יְהוָ֜ה אֱלֹהֵ֤י אֲבֹתֶ֙יךָ֙ לָ֔ךְ אֶ֛רֶץ זָבַ֥ת חָלָ֖ב וּדְבָֽשׁ׃ פ

‎4 ‏שְׁמַ֖ע⁵ יִשְׂרָאֵ֑ל יְהוָ֥ה אֱלֹהֵ֖ינוּ יְהוָ֥ה׀ אֶחָֽד׃⁵

‎5 ‏וְאָ֣הַבְתָּ֔ אֵ֖ת יְהוָ֣ה אֱלֹהֶ֑יךָ בְּכָל־לְבָבְךָ֥ וּבְכָל־נַפְשְׁךָ֖ וּבְכָל־מְאֹדֶֽךָ׃

‎6 ‏וְהָי֞וּ הַדְּבָרִ֣ים הָאֵ֗לֶּה אֲשֶׁ֨ר אָנֹכִ֧י מְצַוְּךָ֛ הַיּ֖וֹם עַל־לְבָבֶֽךָ׃

‎7 ‏וְשִׁנַּנְתָּ֣ם לְבָנֶ֔יךָ וְדִבַּרְתָּ֖ בָּ֑ם בְּשִׁבְתְּךָ֤ בְּבֵיתֶ֙ךָ֙ וּבְלֶכְתְּךָ֣ בַדֶּ֔רֶךְ וּֽבְשָׁכְבְּךָ֖ וּבְקוּמֶֽךָ׃

‎8 ‏וּקְשַׁרְתָּ֥ם לְא֖וֹת עַל־יָדֶ֑ךָ וְהָי֥וּ לְטֹטָפֹ֖ת בֵּ֥ין עֵינֶֽיךָ׃

‎9 ‏וּכְתַבְתָּ֛ם עַל־מְזוּזֹ֥ת בֵּיתֶ֖ךָ וּבִשְׁעָרֶֽיךָ׃ ס

‎10 ‏וְהָיָ֞ה כִּ֥י יְבִיאֲךָ֣׀ יְהוָ֣ה אֱלֹהֶ֗יךָ אֶל־הָאָ֜רֶץ אֲשֶׁ֨ר נִשְׁבַּ֧ע לַאֲבֹתֶ֛יךָ לְאַבְרָהָ֛ם לְיִצְחָ֥ק וּֽלְיַעֲקֹ֖ב לָ֣תֶת לָ֑ךְ עָרִ֛ים גְּדֹלֹ֥ת וְטֹבֹ֖ת אֲשֶׁ֥ר לֹא־בָנִֽיתָ׃

‎11 ‏וּבָ֨תִּ֜ים מְלֵאִ֣ים כָּל־טוּב֮ אֲשֶׁ֣ר לֹא־מִלֵּאתָ֒ וּבֹרֹ֤ת חֲצוּבִים֙ אֲשֶׁ֣ר לֹא־חָצַ֔בְתָּ כְּרָמִ֥ים וְזֵיתִ֖ים אֲשֶׁ֣ר לֹא־נָטָ֑עְתָּ וְאָכַלְתָּ֖ וְשָׂבָֽעְתָּ׃

‎12 ‏הִשָּׁ֣מֶר לְךָ֔ פֶּן־תִּשְׁכַּ֖ח אֶת־יְהוָ֑ה אֲשֶׁ֧ר הוֹצִֽיאֲךָ֛ מֵאֶ֥רֶץ מִצְרַ֖יִם מִבֵּ֥ית עֲבָדִֽים׃

‎13 ‏אֶת־יְהוָ֧ה אֱלֹהֶ֛יךָ תִּירָ֖א וְאֹת֣וֹ תַעֲבֹ֑ד וּבִשְׁמ֖וֹ תִּשָּׁבֵֽעַ׃

‎14 ‏לֹ֣א תֵֽלְכ֔וּן אַחֲרֵ֖י אֱלֹהִ֣ים אֲחֵרִ֑ים מֵאֱלֹהֵי֙ הָֽעַמִּ֔ים אֲשֶׁ֖ר סְבִיבוֹתֵיכֶֽם׃

‎15 ‏כִּ֣י אֵ֥ל קַנָּ֛א יְהוָ֥ה אֱלֹהֶ֖יךָ בְּקִרְבֶּ֑ךָ פֶּן־יֶ֠חֱרֶה אַף־יְהוָ֤ה אֱלֹהֶ֙יךָ֙ בָּ֔ךְ וְהִשְׁמִ֣ידְךָ֔ מֵעַ֖ל פְּנֵ֥י הָאֲדָמָֽה׃ ס

‎16 ‏לֹ֣א תְנַסּ֔וּ אֶת־יְהוָ֖ה אֱלֹהֵיכֶ֑ם כַּאֲשֶׁ֥ר נִסִּיתֶ֖ם בַּמַּסָּֽה׃

‎17 ‏שָׁמ֣וֹר תִּשְׁמְר֔וּן אֶת־מִצְוֹ֖ת יְהוָ֣ה אֱלֹהֵיכֶ֑ם וְעֵדֹתָ֥יו וְחֻקָּ֖יו אֲשֶׁ֥ר צִוָּֽךְ׃

‎18 ‏וְעָשִׂ֛יתָ הַיָּשָׁ֥ר וְהַטּ֖וֹב בְּעֵינֵ֣י יְהוָ֑ה לְמַ֙עַן֙ יִ֣יטַב לָ֔ךְ וּבָ֗אתָ וְיָֽרַשְׁתָּ֙ אֶת־הָאָ֣רֶץ הַטֹּבָ֔ה אֲשֶׁר־נִשְׁבַּ֥ע יְהוָ֖ה לַאֲבֹתֶֽיךָ׃

‎19 ‏לַהֲדֹ֥ף אֶת־כָּל־אֹיְבֶ֖יךָ מִפָּנֶ֑יךָ כַּאֲשֶׁ֖ר דִּבֶּ֥ר יְהוָֽה׃ ס

‎20 ‏כִּֽי־יִשְׁאָלְךָ֥ בִנְךָ֛ מָחָ֖ר לֵאמֹ֑ר מָ֣ה הָעֵדֹ֗ת וְהַֽחֻקִּים֙ וְהַמִּשְׁפָּטִ֔ים אֲשֶׁ֥ר צִוָּ֛ה יְהוָ֥ה אֱלֹהֵ֖ינוּ אֶתְכֶֽם׃

‎21 ‏וְאָמַרְתָּ֣ לְבִנְךָ֔ עֲבָדִ֛ים הָיִ֥ינוּ לְפַרְעֹ֖ה בְּמִצְרָ֑יִם וַיּוֹצִיאֵ֧נוּ יְהוָ֛ה מִמִּצְרַ֖יִם בְּיָ֥ד חֲזָקָֽה׃

‎22 ‏וַיִּתֵּ֣ן יְהוָ֡ה אוֹתֹ֣ת וּ֠מֹפְתִים גְּדֹלִ֨ים וְרָעִ֧ים׀ בְּמִצְרַ֛יִם בְּפַרְעֹ֥ה וּבְכָל־בֵּית֖וֹ לְעֵינֵֽינוּ׃

‎23 ‏וְאוֹתָ֖נוּ הוֹצִ֣יא מִשָּׁ֑ם לְמַ֙עַן֙ הָבִ֣יא אֹתָ֔נוּ לָ֤תֶת לָ֙נוּ֙ אֶת־הָאָ֔רֶץ אֲשֶׁ֥ר נִשְׁבַּ֖ע לַאֲבֹתֵֽינוּ׃

‎24 ‏וַיְצַוֵּ֣נוּ יְהוָ֗ה לַעֲשׂוֹת֙ אֶת־כָּל־הַחֻקִּ֣ים הָאֵ֔לֶּה לְיִרְאָ֖ה אֶת־יְהוָ֣ה אֱלֹהֵ֑ינוּ לְט֥וֹב לָ֙נוּ֙ כָּל־הַיָּמִ֔ים לְחַיֹּתֵ֖נוּ כְּהַיּ֥וֹם הַזֶּֽה׃

‎25 ‏וּצְדָקָ֖ה תִּֽהְיֶה־לָּ֑נוּ כִּֽי־נִשְׁמֹ֨ר לַעֲשׂ֜וֹת אֶת־כָּל־הַמִּצְוָ֣ה הַזֹּ֗את לִפְנֵ֛י יְהוָ֥ה אֱלֹהֵ֖ינוּ כַּאֲשֶׁ֥ר צִוָּֽנוּ׃ ס

1 wəzō’ṯ hammiṣəwâ h^aḥuqqîm wəhammišəpāṭîm ’ăšer ṣiûâ yəhwâ ’ĕlōhêḵem ləlammēḏ ’eṯəḵem l^a‘ăśwōṯ bā’āreṣ ’ăšer ’atem ‘ōḇərîm šāmmâ lərišətāh:

2 ləm^a‘an tîrā’ ’eṯ-yəhwâ ’ĕlōheyḵā lišəmōr ’eṯ-kāl-ḥuqqōṯāyw ûmiṣəwōṯāyw ’ăšer ’ānōḵî məṣaûeḵā ’atâ ûḇinəḵā ûḇen-binəḵā kōl yəmê ḥayyeyḵā ûləm^a‘an ya’ăriḵun yāmeyḵā:

3 wəšām^a‘ətā yiśərā’ēl wəšāmarətā l^a‘ăśwōṯ ’ăšer yîṭaḇ ləḵā wa’ăšer tirəbûn mə’ōḏ ka’ăšer diber yəhwâ ’ĕlōhê ’ăḇōṯeyḵā lāḵə ’ereṣ zāḇaṯ ḥālāḇ ûḏəḇāš: f

4 šəm^a‘⁵ yiśərā’ēl yəhwâ ’ĕlōhênû yəhwâ| ’eḥāḏ:⁵

5 wə’âaḇətā ’ēṯ yəhwâ ’ĕlōheyḵā bəḵāl-ləḇāḇəḵā ûḇəḵāl-nafəšəḵā ûḇəḵāl-mə’ōḏeḵā:

6 wəhāyû hadəḇārîm hā’ēlleh ’ăšer ’ānōḵî məṣaûəḵā hayywōm ‘al-ləḇāḇeḵā:

7 wəšinnanətām ləḇāneyḵā wəḏibarətā bām bəšiḇətəḵā bəḇêṯeḵā ûḇəleḵətəḵā ḇadereḵə ûḇəšāḵəbəḵā ûḇəqûmeḵā:

8 ûqəšarətām lə’wōṯ ‘al-yāḏeḵā wəhāyû ləṭōṭāfōṯ bên ‘êneyḵā:

9 ûḵəṯaḇətām ‘al-məzûzōṯ bêṯeḵā ûḇišə‘āreyḵā: s

10 wəhāyâ kî yəḇî’ăḵā| yəhwâ ’ĕlōheyḵā ’el-hā’āreṣ ’ăšer nišəb^a‘ la’ăḇōṯeyḵā lə’aḇərâām ləyiṣəḥāq ûləy^a‘ăqōḇ lāṯeṯ lāḵə ‘ārîm gəḏōlōṯ wəṭōḇōṯ ’ăšer lō’-ḇānîṯā:

11 ûḇātîm məlē’îm kāl-ṭûḇ ’ăšer lō’-millē’ṯā ûḇōrōṯ ḥăṣûḇîm ’ăšer lō’-ḥāṣaḇətā kərāmîm wəzêṯîm ’ăšer lō’-nāṭā‘ətā wə’āḵalətā wəśāḇā‘ətā:

12 hiššāmer ləḵā pen-tišək^aḥ ’eṯ-yəhwâ ’ăšer hwōṣî’ăḵā mē’ereṣ miṣərayim mibêṯ ‘ăḇāḏîm:

13 ’eṯ-yəhwâ ’ĕlōheyḵā tîrā’ wə’ōṯwō ṯ^a‘ăḇōḏ ûḇišəmwō tiššāḇē‘a:

14 lō’ ṯēləḵûn ’^aḥărê ’ĕlōhîm ’ăḥērîm mē’ĕlōhê hā‘ammîm ’ăšer səḇîḇwōṯêḵem:

15 kî ’ēl qannā’ yəhwâ ’ĕlōheyḵā bəqirəbeḵā pen-yeḥĕreh ’af-yəhwâ ’ĕlōheyḵā bāḵə wəhišəmîḏəḵā mē‘al pənê hā’ăḏāmâ: s

16 lō’ ṯənassû ’eṯ-yəhwâ ’ĕlōhêḵem ka’ăšer nissîṯem bammassâ:

17 šāmwōr tišəmərûn ’eṯ-miṣəwōṯ yəhwâ ’ĕlōhêḵem wə‘ēḏōṯāyw wəḥuqqāyw ’ăšer ṣiûāḵə:

18 wə‘āśîṯā hayyāšār wəhaṭṭwōḇ bə‘ênê yəhwâ ləm^a‘an yîṭaḇ lāḵə ûḇā’ṯā wəyārašətā ’eṯ-hā’āreṣ haṭṭōḇâ ’ăšer-nišəb^a‘ yəhwâ la’ăḇōṯeyḵā:

19 lahăḏōf ’eṯ-kāl-’ōyəḇeyḵā mipāneyḵā ka’ăšer diber yəhwâ: s

20 kî-yišə’āləḵā ḇinəḵā māḥār lē’mōr mâ hā‘ēḏōṯ wəh^aḥuqqîm wəhammišəpāṭîm ’ăšer ṣiûâ yəhwâ ’ĕlōhênû ’eṯəḵem:

21 wə’āmarətā ləḇinəḵā ‘ăḇāḏîm hāyînû ləfarə‘ōh bəmiṣərāyim wayywōṣî’ēnû yəhwâ mimmiṣərayim bəyāḏ ḥăzāqâ:

22 wayyitēn yəhwâ ’wōṯōṯ ûmōfəṯîm gəḏōlîm wərā‘îm| bəmiṣərayim bəfarə‘ōh ûḇəḵāl-bêṯwō lə‘ênênû:

23 wə’wōṯānû hwōṣî’ miššām ləm^a‘an hāḇî’ ’ōṯānû lāṯeṯ lānû ’eṯ-hā’āreṣ ’ăšer nišəb^a‘ la’ăḇōṯênû:

24 wayəṣaûēnû yəhwâ l^a‘ăśwōṯ ’eṯ-kāl-h^aḥuqqîm hā’ēlleh ləyirə’â ’eṯ-yəhwâ ’ĕlōhênû ləṭwōḇ lānû kāl-hayyāmîm ləḥayyōṯēnû kəhayywōm hazzeh:

25 ûṣəḏāqâ tihəyeh-llānû kî-nišəmōr l^a‘ăśwōṯ ’eṯ-kāl-hammiṣəwâ hazzō’ṯ lifənê yəhwâ ’ĕlōhênû ka’ăšer ṣiûānû: s