‎1 ‏לֹא־תִזְבַּח֩ לַיהוָ֨ה אֱלֹהֶ֜יךָ שׁ֣וֹר וָשֶׂ֗ה אֲשֶׁ֨ר יִהְיֶ֥ה בוֹ֙ מ֔וּם כֹּ֖ל דָּבָ֣ר רָ֑ע כִּ֧י תוֹעֲבַ֛ת יְהוָ֥ה אֱלֹהֶ֖יךָ הֽוּא׃ ס

‎2 ‏כִּֽי־יִמָּצֵ֤א בְקִרְבְּךָ֙ בְּאַחַ֣ד שְׁעָרֶ֔יךָ אֲשֶׁר־יְהוָ֥ה אֱלֹהֶ֖יךָ נֹתֵ֣ן לָ֑ךְ אִ֣ישׁ אוֹ־אִשָּׁ֗ה אֲשֶׁ֨ר יַעֲשֶׂ֧ה אֶת־הָרַ֛ע בְּעֵינֵ֥י יְהוָֽה־אֱלֹהֶ֖יךָ לַעֲבֹ֥ר בְּרִיתֽוֹ׃

‎3 ‏וַיֵּ֗לֶךְ וַֽיַּעֲבֹד֙ אֱלֹהִ֣ים אֲחֵרִ֔ים וַיִּשְׁתַּ֖חוּ לָהֶ֑ם וְלַשֶּׁ֣מֶשׁ׀ א֣וֹ לַיָּרֵ֗חַ א֛וֹ לְכָל־צְבָ֥א הַשָּׁמַ֖יִם אֲשֶׁ֥ר לֹא־צִוִּֽיתִי׃

‎4 ‏וְהֻֽגַּד־לְךָ֖ וְשָׁמָ֑עְתָּ וְדָרַשְׁתָּ֣ הֵיטֵ֔ב וְהִנֵּ֤ה אֱמֶת֙ נָכ֣וֹן הַדָּבָ֔ר נֶעֶשְׂתָ֛ה הַתּוֹעֵבָ֥ה הַזֹּ֖את בְּיִשְׂרָאֵֽל׃

‎5 ‏וְהֽוֹצֵאתָ֣ אֶת־הָאִ֣ישׁ הַה֡וּא אוֹ֩ אֶת־הָאִשָּׁ֨ה הַהִ֜וא אֲשֶׁ֣ר עָ֠שׂוּ אֶת־הַדָּבָ֨ר הָרָ֤ע הַזֶּה֙ אֶל־שְׁעָרֶ֔יךָ אֶת־הָאִ֕ישׁ א֖וֹ אֶת־הָאִשָּׁ֑ה וּסְקַלְתָּ֥ם בָּאֲבָנִ֖ים וָמֵֽתוּ׃

‎6 ‏עַל־פִּ֣י׀ שְׁנַ֣יִם עֵדִ֗ים א֛וֹ שְׁלֹשָׁ֥ה עֵדִ֖ים יוּמַ֣ת הַמֵּ֑ת לֹ֣א יוּמַ֔ת עַל־פִּ֖י עֵ֥ד אֶחָֽד׃

‎7 ‏יַ֣ד הָעֵדִ֞ים תִּֽהְיֶה־בּ֤וֹ בָרִאשֹׁנָה֙ לַהֲמִית֔וֹ וְיַ֥ד כָּל־הָעָ֖ם בָּאַחֲרֹנָ֑ה³ וּבִֽעַרְתָּ֥ הָרָ֖ע מִקִּרְבֶּֽךָ׃ פ

‎8 ‏כִּ֣י יִפָּלֵא֩ מִמְּךָ֙ דָבָ֜ר לַמִּשְׁפָּ֗ט בֵּֽין־דָּ֨ם׀ לְדָ֜ם בֵּֽין־דִּ֣ין לְדִ֗ין וּבֵ֥ין נֶ֙גַע֙ לָנֶ֔גַע דִּבְרֵ֥י רִיבֹ֖ת בִּשְׁעָרֶ֑יךָ וְקַמְתָּ֣ וְעָלִ֔יתָ אֶל־הַמָּק֔וֹם אֲשֶׁ֥ר יִבְחַ֛ר יְהוָ֥ה אֱלֹהֶ֖יךָ בּֽוֹ׃

‎9 ‏וּבָאתָ֗ אֶל־הַכֹּהֲנִים֙ הַלְוִיִּ֔ם וְאֶל־הַשֹּׁפֵ֔ט אֲשֶׁ֥ר יִהְיֶ֖ה בַּיָּמִ֣ים הָהֵ֑ם וְדָרַשְׁתָּ֙ וְהִגִּ֣ידוּ לְךָ֔ אֵ֖ת דְּבַ֥ר הַמִּשְׁפָּֽט׃

‎10 ‏וְעָשִׂ֗יתָ עַל־פִּ֤י הַדָּבָר֙ אֲשֶׁ֣ר יַגִּ֣ידֽוּ לְךָ֔ מִן־הַמָּק֣וֹם הַה֔וּא אֲשֶׁ֖ר יִבְחַ֣ר יְהוָ֑ה וְשָׁמַרְתָּ֣ לַעֲשׂ֔וֹת כְּכֹ֖ל אֲשֶׁ֥ר יוֹרֽוּךָ׃

‎11 ‏עַל־פִּ֨י הַתּוֹרָ֜ה אֲשֶׁ֣ר יוֹר֗וּךָ וְעַל־הַמִּשְׁפָּ֛ט אֲשֶׁר־יֹאמְר֥וּ לְךָ֖ תַּעֲשֶׂ֑ה לֹ֣א תָס֗וּר מִן־הַדָּבָ֛ר אֲשֶׁר־יַגִּ֥ידֽוּ לְךָ֖ יָמִ֥ין וּשְׂמֹֽאל׃

‎12 ‏וְהָאִ֞ישׁ אֲשֶׁר־יַעֲשֶׂ֣ה בְזָד֗וֹן לְבִלְתִּ֨י שְׁמֹ֤עַ אֶל־הַכֹּהֵן֙ הָעֹמֵ֞ד לְשָׁ֤רֶת שָׁם֙ אֶת־יְהוָ֣ה אֱלֹהֶ֔יךָ א֖וֹ אֶל־הַשֹּׁפֵ֑ט וּמֵת֙ הָאִ֣ישׁ הַה֔וּא וּבִֽעַרְתָּ֥ הָרָ֖ע מִיִּשְׂרָאֵֽל׃

‎13 ‏וְכָל־הָעָ֖ם יִשְׁמְע֣וּ וְיִרָ֑אוּ וְלֹ֥א יְזִיד֖וּן עֽוֹד׃ ס

‎14 ‏כִּֽי־תָבֹ֣א אֶל־הָאָ֗רֶץ אֲשֶׁ֨ר יְהוָ֤ה אֱלֹהֶ֙יךָ֙ נֹתֵ֣ן לָ֔ךְ וִֽירִשְׁתָּ֖הּ וְיָשַׁ֣בְתָּה בָּ֑הּ וְאָמַרְתָּ֗ אָשִׂ֤ימָה עָלַי֙ מֶ֔לֶךְ כְּכָל־הַגּוֹיִ֖ם אֲשֶׁ֥ר סְבִיבֹתָֽי׃

‎15 ‏שׂ֣וֹם תָּשִׂ֤ים עָלֶ֙יךָ֙ מֶ֔לֶךְ אֲשֶׁ֥ר יִבְחַ֛ר יְהוָ֥ה אֱלֹהֶ֖יךָ בּ֑וֹ מִקֶּ֣רֶב אַחֶ֗יךָ תָּשִׂ֤ים עָלֶ֙יךָ֙ מֶ֔לֶךְ לֹ֣א תוּכַ֗ל לָתֵ֤ת עָלֶ֙יךָ֙ אִ֣ישׁ נָכְרִ֔י אֲשֶׁ֥ר לֹֽא־אָחִ֖יךָ הֽוּא׃

‎16 ‏רַק֮ לֹא־יַרְבֶּה־לּ֣וֹ סוּסִים֒ וְלֹֽא־יָשִׁ֤יב אֶת־הָעָם֙ מִצְרַ֔יְמָה לְמַ֖עַן הַרְבּ֣וֹת ס֑וּס וַֽיהוָה֙ אָמַ֣ר לָכֶ֔ם לֹ֣א תֹסִפ֗וּן לָשׁ֛וּב בַּדֶּ֥רֶךְ הַזֶּ֖ה עֽוֹד׃

‎17 ‏וְלֹ֤א יַרְבֶּה־לּוֹ֙ נָשִׁ֔ים וְלֹ֥א יָס֖וּר לְבָב֑וֹ וְכֶ֣סֶף וְזָהָ֔ב לֹ֥א יַרְבֶּה־לּ֖וֹ מְאֹֽד׃

‎18 ‏וְהָיָ֣ה כְשִׁבְתּ֔וֹ עַ֖ל כִּסֵּ֣א מַמְלַכְתּ֑וֹ וְכָ֨תַב ל֜וֹ אֶת־מִשְׁנֵ֨ה הַתּוֹרָ֤ה הַזֹּאת֙ עַל־סֵ֔פֶר מִלִּפְנֵ֥י הַכֹּהֲנִ֖ים הַלְוִיִּֽם׃³

‎19 ‏וְהָיְתָ֣ה עִמּ֔וֹ וְקָ֥רָא ב֖וֹ כָּל־יְמֵ֣י חַיָּ֑יו לְמַ֣עַן יִלְמַ֗ד לְיִרְאָה֙ אֶת־יְהוָ֣ה אֱלֹהָ֔יו לִ֠שְׁמֹר אֶֽת־כָּל־דִּבְרֵ֞י הַתּוֹרָ֥ה הַזֹּ֛את וְאֶת־הַחֻקִּ֥ים הָאֵ֖לֶּה לַעֲשֹׂתָֽם׃

‎20 ‏לְבִלְתִּ֤י רוּם־לְבָבוֹ֙ מֵֽאֶחָ֔יו וּלְבִלְתִּ֛י ס֥וּר מִן־הַמִּצְוָ֖ה יָמִ֣ין וּשְׂמֹ֑אול לְמַעַן֩ יַאֲרִ֨יךְ יָמִ֧ים עַל־מַמְלַכְתּ֛וֹ ה֥וּא וּבָנָ֖יו בְּקֶ֥רֶב יִשְׂרָאֵֽל׃ ס

1 lō’-ṯizəb^aḥ layhwâ ’ĕlōheyḵā šwōr wāśeh ’ăšer yihəyeh ḇwō mûm kōl dāḇār rā‘ kî ṯwō‘ăḇaṯ yəhwâ ’ĕlōheyḵā hû’: s

2 kî-yimmāṣē’ ḇəqirəbəḵā bə’^aḥaḏ šə‘āreyḵā ’ăšer-yəhwâ ’ĕlōheyḵā nōṯēn lāḵə ’îš ’wō-’iššâ ’ăšer y^a‘ăśeh ’eṯ-hār^a‘ bə‘ênê yəhwâ-’ĕlōheyḵā l^a‘ăḇōr bərîṯwō:

3 wayyēleḵə wayy^a‘ăḇōḏ ’ĕlōhîm ’ăḥērîm wayyišət^aḥû lâem wəlaššemeš| ’wō layyārēḥa ’wō ləḵāl-ṣəḇā’ haššāmayim ’ăšer lō’-ṣiûîṯî:

4 wəhugaḏ-ləḵā wəšāmā‘ətā wəḏārašətā hêṭēḇ wəhinnēh ’ĕmeṯ nāḵwōn hadāḇār ne‘eśəṯâ hatwō‘ēḇâ hazzō’ṯ bəyiśərā’ēl:

5 wəhwōṣē’ṯā ’eṯ-hā’îš hahû’ ’wō ’eṯ-hā’iššâ hahiw’ ’ăšer ‘āśû ’eṯ-hadāḇār hārā‘ hazzeh ’el-šə‘āreyḵā ’eṯ-hā’îš ’wō ’eṯ-hā’iššâ ûsəqalətām bā’ăḇānîm wāmēṯû:

6 ‘al-pî| šənayim ‘ēḏîm ’wō šəlōšâ ‘ēḏîm yûmaṯ hammēṯ lō’ yûmaṯ ‘al-pî ‘ēḏ ’eḥāḏ:

7 yaḏ hā‘ēḏîm tihəyeh-bwō ḇāri’šōnâ lahămîṯwō wəyaḏ kāl-hā‘ām bā’^aḥărōnâ³ ûḇi‘arətā hārā‘ miqqirəbeḵā: f

8 kî yipālē’ mimməḵā ḏāḇār lammišəpāṭ bên-dām| ləḏām bên-dîn ləḏîn ûḇên neḡ^a‘ lāneḡ^a‘ diḇərê rîḇōṯ bišə‘āreyḵā wəqamətā wə‘ālîṯā ’el-hammāqwōm ’ăšer yiḇəḥar yəhwâ ’ĕlōheyḵā bwō:

9 ûḇā’ṯā ’el-hakōhănîm haləwîyim wə’el-haššōfēṭ ’ăšer yihəyeh bayyāmîm hâēm wəḏārašətā wəhigîḏû ləḵā ’ēṯ dəḇar hammišəpāṭ:

10 wə‘āśîṯā ‘al-pî hadāḇār ’ăšer yagîḏû ləḵā min-hammāqwōm hahû’ ’ăšer yiḇəḥar yəhwâ wəšāmarətā l^a‘ăśwōṯ kəḵōl ’ăšer ywōrûḵā:

11 ‘al-pî hatwōrâ ’ăšer ywōrûḵā wə‘al-hammišəpāṭ ’ăšer-yō’mərû ləḵā t^a‘ăśeh lō’ ṯāsûr min-hadāḇār ’ăšer-yagîḏû ləḵā yāmîn ûśəmō’l:

12 wəhā’îš ’ăšer-y^a‘ăśeh ḇəzāḏwōn ləḇilətî šəmō‘a ’el-hakōhēn hā‘ōmēḏ ləšāreṯ šām ’eṯ-yəhwâ ’ĕlōheyḵā ’wō ’el-haššōfēṭ ûmēṯ hā’îš hahû’ ûḇi‘arətā hārā‘ mîyiśərā’ēl:

13 wəḵāl-hā‘ām yišəmə‘û wəyirā’û wəlō’ yəzîḏûn ‘wōḏ: s

14 kî-ṯāḇō’ ’el-hā’āreṣ ’ăšer yəhwâ ’ĕlōheyḵā nōṯēn lāḵə wîrišətāh wəyāšaḇətâ bāh wə’āmarətā ’āśîmâ ‘ālay meleḵə kəḵāl-hagwōyim ’ăšer səḇîḇōṯāy:

15 śwōm tāśîm ‘āleyḵā meleḵə ’ăšer yiḇəḥar yəhwâ ’ĕlōheyḵā bwō miqqereḇ ’^aḥeyḵā tāśîm ‘āleyḵā meleḵə lō’ ṯûḵal lāṯēṯ ‘āleyḵā ’îš nāḵərî ’ăšer lō’-’āḥîḵā hû’:

16 raq lō’-yarəbeh-llwō sûsîm wəlō’-yāšîḇ ’eṯ-hā‘ām miṣərayəmâ ləm^a‘an harəbwōṯ sûs wayhwâ ’āmar lāḵem lō’ ṯōsifûn lāšûḇ badereḵə hazzeh ‘wōḏ:

17 wəlō’ yarəbeh-llwō nāšîm wəlō’ yāsûr ləḇāḇwō wəḵesef wəzâāḇ lō’ yarəbeh-llwō mə’ōḏ:

18 wəhāyâ ḵəšiḇətwō ‘al kissē’ maməlaḵətwō wəḵāṯaḇ lwō ’eṯ-mišənēh hatwōrâ hazzō’ṯ ‘al-sēfer millifənê hakōhănîm haləwîyim:³

19 wəhāyəṯâ ‘immwō wəqārā’ ḇwō kāl-yəmê ḥayyāyw ləm^a‘an yiləmaḏ ləyirə’â ’eṯ-yəhwâ ’ĕlōhāyw lišəmōr ’eṯ-kāl-diḇərê hatwōrâ hazzō’ṯ wə’eṯ-h^aḥuqqîm hā’ēlleh l^a‘ăśōṯām:

20 ləḇilətî rûm-ləḇāḇwō mē’eḥāyw ûləḇilətî sûr min-hammiṣəwâ yāmîn ûśəmō’wl ləm^a‘an ya’ărîḵə yāmîm ‘al-maməlaḵətwō hû’ ûḇānāyw bəqereḇ yiśərā’ēl: s