‎1 ‏וַיָּבֹ֤א הַמֶּ֙לֶךְ֙ וְהָמָ֔ן לִשְׁתּ֖וֹת עִם־אֶסְתֵּ֥ר הַמַּלְכָּֽה׃

‎2 ‏וַיֹּאמֶר֩ הַמֶּ֨לֶךְ לְאֶסְתֵּ֜ר גַּ֣ם בַּיּ֤וֹם הַשֵּׁנִי֙ בְּמִשְׁתֵּ֣ה הַיַּ֔יִן מַה־שְּׁאֵלָתֵ֛ךְ אֶסְתֵּ֥ר הַמַּלְכָּ֖ה וְתִנָּ֣תֵֽן לָ֑ךְ וּמַה־בַּקָּשָׁתֵ֛ךְ עַד־חֲצִ֥י הַמַּלְכ֖וּת וְתֵעָֽשׂ׃

‎3 ‏וַתַּ֨עַן אֶסְתֵּ֤ר הַמַּלְכָּה֙ וַתֹּאמַ֔ר אִם־מָצָ֨אתִי חֵ֤ן בְּעֵינֶ֙יךָ֙ הַמֶּ֔לֶךְ וְאִם־עַל־הַמֶּ֖לֶךְ ט֑וֹב תִּנָּֽתֶן־לִ֤י נַפְשִׁי֙ בִּשְׁאֵ֣לָתִ֔י וְעַמִּ֖י בְּבַקָּשָׁתִֽי׃

‎4 ‏כִּ֤י נִמְכַּ֙רְנוּ֙ אֲנִ֣י וְעַמִּ֔י לְהַשְׁמִ֖יד לַהֲר֣וֹג וּלְאַבֵּ֑ד וְ֠אִלּוּ לַעֲבָדִ֨ים וְלִשְׁפָח֤וֹת נִמְכַּ֙רְנוּ֙ הֶחֱרַ֔שְׁתִּי כִּ֣י אֵ֥ין הַצָּ֛ר שׁוֶֹ֖ה בְּנֵ֥זֶק הַמֶּֽלֶךְ׃ ס

‎5 ‏וַיֹּ֙אמֶר֙ הַמֶּ֣לֶךְ אֲחַשְׁוֵר֔וֹשׁ וַיֹּ֖אמֶר לְאֶסְתֵּ֣ר הַמַּלְכָּ֑ה מִ֣י ה֥וּא זֶה֙ וְאֵֽי־זֶ֣ה ה֔וּא אֲשֶׁר־מְלָא֥וֹ לִבּ֖וֹ לַעֲשׂ֥וֹת כֵּֽן׃

‎6 ‏וַתֹּ֣אמֶר־אֶסְתֵּ֔ר אִ֚ישׁ צַ֣ר וְאוֹיֵ֔ב הָמָ֥ן³ הָרָ֖ע הַזֶּ֑ה וְהָמָ֣ן נִבְעַ֔ת מִלִּפְנֵ֥י הַמֶּ֖לֶךְ וְהַמַּלְכָּֽה׃

‎7 ‏וְהַמֶּ֜לֶךְ קָ֤ם בַּחֲמָתוֹ֙ מִמִּשְׁתֵּ֣ה הַיַּ֔יִן אֶל־גִּנַּ֖ת הַבִּיתָ֑ן וְהָמָ֣ן עָמַ֗ד לְבַקֵּ֤שׁ עַל־נַפְשׁוֹ֙ מֵֽאֶסְתֵּ֣ר הַמַּלְכָּ֔ה כִּ֣י רָאָ֔ה כִּֽי־כָלְתָ֥ה אֵלָ֛יו הָרָעָ֖ה מֵאֵ֥ת הַמֶּֽלֶךְ׃

‎8 ‏וְהַמֶּ֡לֶךְ שָׁב֩ מִגִּנַּ֨ת הַבִּיתָ֜ן אֶל־בֵּ֣ית׀ מִשְׁתֵּ֣ה הַיַּ֗יִן וְהָמָן֙ נֹפֵ֔ל עַל־הַמִּטָּה֙ אֲשֶׁ֣ר אֶסְתֵּ֣ר עָלֶ֔יהָ וַיֹּ֣אמֶר הַמֶּ֔לֶךְ הֲ֠גַם לִכְבּ֧וֹשׁ אֶת־הַמַּלְכָּ֛ה עִמִּ֖י בַּבָּ֑יִת הַדָּבָ֗ר יָצָא֙ מִפִּ֣י הַמֶּ֔לֶךְ וּפְנֵ֥י הָמָ֖ן חָפֽוּ׃ ס

‎9 ‏וַיֹּ֣אמֶר חַ֠רְבוֹנָה אֶחָ֨ד מִן־הַסָּרִיסִ֜ים לִפְנֵ֣י הַמֶּ֗לֶךְ גַּ֣ם הִנֵּה־הָעֵ֣ץ אֲשֶׁר־עָשָׂ֪ה הָמָ֟ן לְֽמָרְדֳּכַ֞י אֲשֶׁ֧ר דִּבֶּר־ט֣וֹב עַל־הַמֶּ֗לֶךְ עֹמֵד֙ בְּבֵ֣ית הָמָ֔ן גָּבֹ֖הַּ חֲמִשִּׁ֣ים אַמָּ֑ה וַיֹּ֥אמֶר הַמֶּ֖לֶךְ תְּלֻ֥הוּ עָלָֽיו׃

‎10 ‏וַיִּתְלוּ֙ אֶת־הָמָ֔ן עַל־הָעֵ֖ץ אֲשֶׁר־הֵכִ֣ין לְמָרְדֳּכָ֑י וַחֲמַ֥ת הַמֶּ֖לֶךְ שָׁכָֽכָה׃ פ

1 wayyāḇō’ hammeleḵə wəhāmān lišətwōṯ ‘im-’esətēr hammaləkâ:

2 wayyō’mer hammeleḵə lə’esətēr gam bayywōm haššēnî bəmišətēh hayyayin mah-ššə’ēlāṯēḵə ’esətēr hammaləkâ wəṯinnāṯēn lāḵə ûmah-baqqāšāṯēḵə ‘aḏ-ḥăṣî hammaləḵûṯ wəṯē‘āś:

3 wat^a‘an ’esətēr hammaləkâ watō’mar ’im-māṣā’ṯî ḥēn bə‘êneyḵā hammeleḵə wə’im-‘al-hammeleḵə ṭwōḇ tinnāṯen-lî nafəšî bišə’ēlāṯî wə‘ammî bəḇaqqāšāṯî:

4 kî niməkarənû ’ănî wə‘ammî ləhašəmîḏ lahărwōḡ ûlə’abēḏ wə’illû l^a‘ăḇāḏîm wəlišəfāḥwōṯ niməkarənû heḥĕrašətî kî ’ên haṣṣār šwōeh bənēzeq hammeleḵə: s

5 wayyō’mer hammeleḵə ’ăḥašəwērwōš wayyō’mer lə’esətēr hammaləkâ mî hû’ zeh wə’ê-zeh hû’ ’ăšer-məlā’wō libwō l^a‘ăśwōṯ kēn:

6 watō’mer-’esətēr ’îš ṣar wə’wōyēḇ hāmān³ hārā‘ hazzeh wəhāmān niḇə‘aṯ millifənê hammeleḵə wəhammaləkâ:

7 wəhammeleḵə qām b^aḥămāṯwō mimmišətēh hayyayin ’el-ginnaṯ habîṯān wəhāmān ‘āmaḏ ləḇaqqēš ‘al-nafəšwō mē’esətēr hammaləkâ kî rā’â kî-ḵāləṯâ ’ēlāyw hārā‘â mē’ēṯ hammeleḵə:

8 wəhammeleḵə šāḇ miginnaṯ habîṯān ’el-bêṯ| mišətēh hayyayin wəhāmān nōfēl ‘al-hammiṭṭâ ’ăšer ’esətēr ‘āleyhā wayyō’mer hammeleḵə hăḡam liḵəbwōš ’eṯ-hammaləkâ ‘immî babāyiṯ hadāḇār yāṣā’ mipî hammeleḵə ûfənê hāmān ḥāfû: s

9 wayyō’mer ḥarəḇwōnâ ’eḥāḏ min-hassārîsîm lifənê hammeleḵə gam hinnēh-hā‘ēṣ ’ăšer-‘āśâ hāmān ləmārədŏḵay ’ăšer diber-ṭwōḇ ‘al-hammeleḵə ‘ōmēḏ bəḇêṯ hāmān gāḇōhha ḥămiššîm ’ammâ wayyō’mer hammeleḵə təluhû ‘ālāyw:

10 wayyiṯəlû ’eṯ-hāmān ‘al-hā‘ēṣ ’ăšer-hēḵîn ləmārədŏḵāy w^aḥămaṯ hammeleḵə šāḵāḵâ: f