‎1 ‏וּמֹשֶׁ֗ה הָיָ֥ה רֹעֶ֛ה אֶת־צֹ֛אן יִתְר֥וֹ חֹתְנ֖וֹ כֹּהֵ֣ן מִדְיָ֑ן וַיִּנְהַ֤ג אֶת־הַצֹּאן֙ אַחַ֣ר הַמִּדְבָּ֔ר וַיָּבֹ֛א אֶל־הַ֥ר הָאֱלֹהִ֖ים חֹרֵֽבָה׃

‎2 ‏וַ֠יֵּרָא מַלְאַ֨ךְ יְהוָֹ֥ה אֵלָ֛יו בְּלַבַּת־אֵ֖שׁ מִתּ֣וֹךְ הַסְּנֶ֑ה וַיַּ֗רְא וְהִנֵּ֤ה הַסְּנֶה֙ בֹּעֵ֣ר בָּאֵ֔שׁ וְהַסְּנֶ֖ה אֵינֶ֥נּוּ אֻכָּֽל׃

‎3 ‏וַיֹּ֣אמֶר מֹשֶׁ֔ה אָסֻֽרָה־נָּ֣א וְאֶרְאֶ֔ה אֶת־הַמַּרְאֶ֥ה הַגָּדֹ֖ל הַזֶּ֑ה מַדּ֖וּעַ לֹא־יִבְעַ֥ר הַסְּנֶֽה׃

‎4 ‏וַיַּ֥רְא יְהוָ֖ה כִּ֣י סָ֣ר לִרְא֑וֹת וַיִּקְרָא֩ אֵלָ֨יו אֱלֹהִ֜ים מִתּ֣וֹךְ הַסְּנֶ֗ה וַיֹּ֛אמֶר מֹשֶׁ֥ה מֹשֶׁ֖ה וַיֹּ֥אמֶר הִנֵּֽנִי׃

‎5 ‏וַיֹּ֖אמֶר אַל־תִּקְרַ֣ב הֲלֹ֑ם שַׁל־נְעָלֶ֙יךָ֙ מֵעַ֣ל רַגְלֶ֔יךָ כִּ֣י הַמָּק֗וֹם אֲשֶׁ֤ר אַתָּה֙ עוֹמֵ֣ד עָלָ֔יו אַדְמַת־קֹ֖דֶשׁ הֽוּא׃

‎6 ‏וַיֹּ֗אמֶר אָנֹכִי֙ אֱלֹהֵ֣י אָבִ֔יךָ אֱלֹהֵ֧י אַבְרָהָ֛ם אֱלֹהֵ֥י יִצְחָ֖ק וֵאלֹהֵ֣י יַעֲקֹ֑ב וַיַּסְתֵּ֤ר מֹשֶׁה֙ פָּנָ֔יו כִּ֣י יָרֵ֔א מֵהַבִּ֖יט אֶל־הָאֱלֹהִֽים׃

‎7 ‏וַיֹּ֣אמֶר יְהוָ֔ה רָאֹ֥ה רָאִ֛יתִי אֶת־עֳנִ֥י עַמִּ֖י אֲשֶׁ֣ר בְּמִצְרָ֑יִם וְאֶת־צַעֲקָתָ֤ם שָׁמַ֙עְתִּי֙ מִפְּנֵ֣י נֹֽגְשָׂ֔יו כִּ֥י יָדַ֖עְתִּי אֶת־מַכְאֹבָֽיו׃

‎8 ‏וָאֵרֵ֞ד לְהַצִּיל֣וֹ׀ מִיַּ֣ד מִצְרַ֗יִם וּֽלְהַעֲלֹתוֹ֮ מִן־הָאָ֣רֶץ הַהִוא֒ אֶל־אֶ֤רֶץ טוֹבָה֙ וּרְחָבָ֔ה אֶל־אֶ֛רֶץ זָבַ֥ת חָלָ֖ב וּדְבָ֑שׁ אֶל־מְק֤וֹם הַֽכְּנַעֲנִי֙ וְהַ֣חִתִּ֔י וְהָֽאֱמֹרִי֙ וְהַפְּרִזִּ֔י וְהַחִוִּ֖י וְהַיְבוּסִֽי׃

‎9 ‏וְעַתָּ֕ה הִנֵּ֛ה צַעֲקַ֥ת בְּנֵי־יִשְׂרָאֵ֖ל בָּ֣אָה אֵלָ֑י וְגַם־רָאִ֙יתִי֙ אֶת־הַלַּ֔חַץ אֲשֶׁ֥ר מִצְרַ֖יִם לֹחֲצִ֥ים אֹתָֽם׃

‎10 ‏וְעַתָּ֣ה לְכָ֔ה וְאֶֽשְׁלָחֲךָ֖ אֶל־פַּרְעֹ֑ה וְהוֹצֵ֛א אֶת־עַמִּ֥י בְנֵֽי־יִשְׂרָאֵ֖ל מִמִּצְרָֽיִם׃

‎11 ‏וַיֹּ֤אמֶר מֹשֶׁה֙ אֶל־הָ֣אֱלֹהִ֔ים מִ֣י אָנֹ֔כִי כִּ֥י אֵלֵ֖ךְ אֶל־פַּרְעֹ֑ה וְכִ֥י אוֹצִ֛יא אֶת־בְּנֵ֥י יִשְׂרָאֵ֖ל מִמִּצְרָֽיִם׃

‎12 ‏וַיֹּ֙אמֶר֙ כִּֽי־אֶֽהְיֶ֣ה עִמָּ֔ךְ וְזֶה־לְּךָ֣ הָא֔וֹת כִּ֥י אָנֹכִ֖י שְׁלַחְתִּ֑יךָ בְּהוֹצִֽיאֲךָ֤ אֶת־הָעָם֙ מִמִּצְרַ֔יִם תַּֽעַבְדוּן֙ אֶת־הָ֣אֱלֹהִ֔ים עַ֖ל הָהָ֥ר הַזֶּֽה׃

‎13 ‏וַיֹּ֨אמֶר מֹשֶׁ֜ה אֶל־הָֽאֱלֹהִ֗ים הִנֵּ֨ה אָנֹכִ֣י בָא֮ אֶל־בְּנֵ֣י יִשְׂרָאֵל֒ וְאָמַרְתִּ֣י לָהֶ֔ם אֱלֹהֵ֥י אֲבוֹתֵיכֶ֖ם שְׁלָחַ֣נִי אֲלֵיכֶ֑ם וְאָֽמְרוּ־לִ֣י מַה־שְּׁמ֔וֹ מָ֥ה אֹמַ֖ר אֲלֵהֶֽם׃

‎14 ‏וַיֹּ֤אמֶר אֱלֹהִים֙ אֶל־מֹשֶׁ֔ה אֶֽהְיֶ֖ה אֲשֶׁ֣ר אֶֽהְיֶ֑ה וַיֹּ֗אמֶר כֹּ֤ה תֹאמַר֙ לִבְנֵ֣י יִשְׂרָאֵ֔ל אֶֽהְיֶ֖ה שְׁלָחַ֥נִי אֲלֵיכֶֽם׃

‎15 ‏וַיֹּאמֶר֩ ע֨וֹד אֱלֹהִ֜ים אֶל־מֹשֶׁ֗ה כֹּֽה־תֹאמַר֮ אֶל־בְּנֵ֣י יִשְׂרָאֵל֒ יְהוָ֞ה אֱלֹהֵ֣י אֲבֹתֵיכֶ֗ם אֱלֹהֵ֨י אַבְרָהָ֜ם אֱלֹהֵ֥י יִצְחָ֛ק וֵאלֹהֵ֥י יַעֲקֹ֖ב שְׁלָחַ֣נִי אֲלֵיכֶ֑ם זֶה־שְּׁמִ֣י לְעֹלָ֔ם וְזֶ֥ה זִכְרִ֖י לְדֹ֥ר דֹּֽר׃

‎16 ‏לֵ֣ךְ וְאָֽסַפְתָּ֞ אֶת־זִקְנֵ֣י יִשְׂרָאֵ֗ל וְאָמַרְתָּ֤ אֲלֵהֶם֙ יְהוָ֞ה אֱלֹהֵ֤י אֲבֹֽתֵיכֶם֙ נִרְאָ֣ה אֵלַ֔י אֱלֹהֵ֧י אַבְרָהָ֛ם יִצְחָ֥ק וְיַעֲקֹ֖ב לֵאמֹ֑ר פָּקֹ֤ד פָּקַ֙דְתִּי֙ אֶתְכֶ֔ם וְאֶת־הֶעָשׂ֥וּי לָכֶ֖ם בְּמִצְרָֽיִם׃

‎17 ‏וָאֹמַ֗ר אַעֲלֶ֣ה אֶתְכֶם֮ מֵעֳנִ֣י מִצְרַיִם֒ אֶל־אֶ֤רֶץ הַֽכְּנַעֲנִי֙ וְהַ֣חִתִּ֔י וְהָֽאֱמֹרִי֙ וְהַפְּרִזִּ֔י וְהַחִוִּ֖י וְהַיְבוּסִ֑י אֶל־אֶ֛רֶץ זָבַ֥ת חָלָ֖ב וּדְבָֽשׁ׃

‎18 ‏וְשָׁמְע֖וּ לְקֹלֶ֑ךָ וּבָאתָ֡ אַתָּה֩ וְזִקְנֵ֨י יִשְׂרָאֵ֜ל אֶל־מֶ֣לֶךְ מִצְרַ֗יִם וַאֲמַרְתֶּ֤ם אֵלָיו֙ יְהוָ֞ה אֱלֹהֵ֤י הָֽעִבְרִיִּים֙ נִקְרָ֣ה עָלֵ֔ינוּ וְעַתָּ֗ה נֵֽלֲכָה־נָּ֞א דֶּ֣רֶךְ שְׁלֹ֤שֶׁת יָמִים֙ בַּמִּדְבָּ֔ר וְנִזְבְּחָ֖ה לַֽיהוָ֥ה אֱלֹהֵֽינוּ׃

‎19 ‏וַאֲנִ֣י יָדַ֔עְתִּי כִּ֠י לֹֽא־יִתֵּ֥ן אֶתְכֶ֛ם מֶ֥לֶךְ מִצְרַ֖יִם לַהֲלֹ֑ךְ וְלֹ֖א בְּיָ֥ד חֲזָקָֽה׃

‎20 ‏וְשָׁלַחְתִּ֤י אֶת־יָדִי֙ וְהִכֵּיתִ֣י אֶת־מִצְרַ֔יִם בְּכֹל֙ נִפְלְאֹתַ֔י אֲשֶׁ֥ר אֶֽעֱשֶׂ֖ה בְּקִרְבּ֑וֹ וְאַחֲרֵי־כֵ֖ן יְשַׁלַּ֥ח אֶתְכֶֽם׃

‎21 ‏וְנָתַתִּ֛י אֶת־חֵ֥ן הָֽעָם־הַזֶּ֖ה בְּעֵינֵ֣י מִצְרָ֑יִם וְהָיָה֙ כִּ֣י תֵֽלֵכ֔וּן לֹ֥א תֵלְכ֖וּ רֵיקָֽם׃

‎22 ‏וְשָׁאֲלָ֨ה אִשָּׁ֤ה מִשְּׁכֶנְתָּהּ֙ וּמִגָּרַ֣ת בֵּיתָ֔הּ כְּלֵי־כֶ֛סֶף וּכְלֵ֥י זָהָ֖ב וּשְׂמָלֹ֑ת וְשַׂמְתֶּ֗ם עַל־בְּנֵיכֶם֙ וְעַל־בְּנֹ֣תֵיכֶ֔ם וְנִצַּלְתֶּ֖ם אֶת־מִצְרָֽיִם׃

1 ûmōšeh hāyâ rō‘eh ’eṯ-ṣō’n yiṯərwō ḥōṯənwō kōhēn miḏəyān wayyinəhaḡ ’eṯ-haṣṣō’n ’^aḥar hammiḏəbār wayyāḇō’ ’el-har hā’ĕlōhîm ḥōrēḇâ:

2 wayyērā’ malə’aḵə yəhwōâ ’ēlāyw bəlabaṯ-’ēš mitwōḵə hassəneh wayyarə’ wəhinnēh hassəneh bō‘ēr bā’ēš wəhassəneh ’ênennû ’ukāl:

3 wayyō’mer mōšeh ’āsurâ-nnā’ wə’erə’eh ’eṯ-hammarə’eh hagāḏōl hazzeh madû‘a lō’-yiḇə‘ar hassəneh:

4 wayyarə’ yəhwâ kî sār lirə’wōṯ wayyiqərā’ ’ēlāyw ’ĕlōhîm mitwōḵə hassəneh wayyō’mer mōšeh mōšeh wayyō’mer hinnēnî:

5 wayyō’mer ’al-tiqəraḇ hălōm šal-nə‘āleyḵā mē‘al raḡəleyḵā kî hammāqwōm ’ăšer ’atâ ‘wōmēḏ ‘ālāyw ’aḏəmaṯ-qōḏeš hû’:

6 wayyō’mer ’ānōḵî ’ĕlōhê ’āḇîḵā ’ĕlōhê ’aḇərâām ’ĕlōhê yiṣəḥāq wē’lōhê y^a‘ăqōḇ wayyasətēr mōšeh pānāyw kî yārē’ mēhabîṭ ’el-hā’ĕlōhîm:

7 wayyō’mer yəhwâ rā’ōh rā’îṯî ’eṯ-‘ŏnî ‘ammî ’ăšer bəmiṣərāyim wə’eṯ-ṣ^a‘ăqāṯām šām^a‘ətî mipənê nōḡəśāyw kî yāḏ^a‘ətî ’eṯ-maḵə’ōḇāyw:

8 wā’ērēḏ ləhaṣṣîlwō| mîyaḏ miṣərayim ûləh^a‘ălōṯwō min-hā’āreṣ hahiw’ ’el-’ereṣ ṭwōḇâ ûrəḥāḇâ ’el-’ereṣ zāḇaṯ ḥālāḇ ûḏəḇāš ’el-məqwōm hakən^a‘ănî wəh^aḥitî wəhā’ĕmōrî wəhapərizzî wəh^aḥiûî wəhayəḇûsî:

9 wə‘atâ hinnēh ṣ^a‘ăqaṯ bənê-yiśərā’ēl bā’â ’ēlāy wəḡam-rā’îṯî ’eṯ-hall^aḥaṣ ’ăšer miṣərayim lōḥăṣîm ’ōṯām:

10 wə‘atâ ləḵâ wə’ešəlāḥăḵā ’el-parə‘ōh wəhwōṣē’ ’eṯ-‘ammî ḇənê-yiśərā’ēl mimmiṣərāyim:

11 wayyō’mer mōšeh ’el-hā’ĕlōhîm mî ’ānōḵî kî ’ēlēḵə ’el-parə‘ōh wəḵî ’wōṣî’ ’eṯ-bənê yiśərā’ēl mimmiṣərāyim:

12 wayyō’mer kî-’ehəyeh ‘immāḵə wəzeh-lləḵā hā’wōṯ kî ’ānōḵî šəl^aḥətîḵā bəhwōṣî’ăḵā ’eṯ-hā‘ām mimmiṣərayim t^a‘aḇəḏûn ’eṯ-hā’ĕlōhîm ‘al hâār hazzeh:

13 wayyō’mer mōšeh ’el-hā’ĕlōhîm hinnēh ’ānōḵî ḇā’ ’el-bənê yiśərā’ēl wə’āmarətî lâem ’ĕlōhê ’ăḇwōṯêḵem šəlāḥanî ’ălêḵem wə’āmərû-lî mah-ššəmwō mâ ’ōmar ’ălēhem:

14 wayyō’mer ’ĕlōhîm ’el-mōšeh ’ehəyeh ’ăšer ’ehəyeh wayyō’mer kōh ṯō’mar liḇənê yiśərā’ēl ’ehəyeh šəlāḥanî ’ălêḵem:

15 wayyō’mer ‘wōḏ ’ĕlōhîm ’el-mōšeh kōh-ṯō’mar ’el-bənê yiśərā’ēl yəhwâ ’ĕlōhê ’ăḇōṯêḵem ’ĕlōhê ’aḇərâām ’ĕlōhê yiṣəḥāq wē’lōhê y^a‘ăqōḇ šəlāḥanî ’ălêḵem zeh-ššəmî lə‘ōlām wəzeh ziḵərî ləḏōr dōr:

16 lēḵə wə’āsafətā ’eṯ-ziqənê yiśərā’ēl wə’āmarətā ’ălēhem yəhwâ ’ĕlōhê ’ăḇōṯêḵem nirə’â ’ēlay ’ĕlōhê ’aḇərâām yiṣəḥāq wəy^a‘ăqōḇ lē’mōr pāqōḏ pāqaḏətî ’eṯəḵem wə’eṯ-he‘āśûy lāḵem bəmiṣərāyim:

17 wā’ōmar ’^a‘ăleh ’eṯəḵem mē‘ŏnî miṣərayim ’el-’ereṣ hakən^a‘ănî wəh^aḥitî wəhā’ĕmōrî wəhapərizzî wəh^aḥiûî wəhayəḇûsî ’el-’ereṣ zāḇaṯ ḥālāḇ ûḏəḇāš:

18 wəšāmə‘û ləqōleḵā ûḇā’ṯā ’atâ wəziqənê yiśərā’ēl ’el-meleḵə miṣərayim wa’ămarətem ’ēlāyw yəhwâ ’ĕlōhê hā‘iḇərîyîm niqərâ ‘ālênû wə‘atâ nēlăḵâ-nnā’ dereḵə šəlōšeṯ yāmîm bammiḏəbār wənizəbəḥâ layhwâ ’ĕlōhênû:

19 wa’ănî yāḏ^a‘ətî kî lō’-yitēn ’eṯəḵem meleḵə miṣərayim lahălōḵə wəlō’ bəyāḏ ḥăzāqâ:

20 wəšāl^aḥətî ’eṯ-yāḏî wəhikêṯî ’eṯ-miṣərayim bəḵōl nifələ’ōṯay ’ăšer ’e‘ĕśeh bəqirəbwō wə’^aḥărê-ḵēn yəšall^aḥ ’eṯəḵem:

21 wənāṯatî ’eṯ-ḥēn hā‘ām-hazzeh bə‘ênê miṣərāyim wəhāyâ kî ṯēlēḵûn lō’ ṯēləḵû rêqām:

22 wəšā’ălâ ’iššâ miššəḵenətāh ûmigāraṯ bêṯāh kəlê-ḵesef ûḵəlê zâāḇ ûśəmālōṯ wəśamətem ‘al-bənêḵem wə‘al-bənōṯêḵem wəniṣṣalətem ’eṯ-miṣərāyim: