‎1 ‏וַיֹּ֨אמֶר יְהוָ֜ה אֶל־מֹשֶׁ֗ה ע֣וֹד נֶ֤גַע אֶחָד֙ אָבִ֤יא עַל־פַּרְעֹה֙ וְעַל־מִצְרַ֔יִם אַֽחֲרֵי־כֵ֕ן יְשַׁלַּ֥ח אֶתְכֶ֖ם מִזֶּ֑ה כְּשַׁ֨לְּח֔וֹ כָּלָ֕ה גָּרֵ֛שׁ יְגָרֵ֥שׁ אֶתְכֶ֖ם מִזֶּֽה׃

‎2 ‏דַּבֶּר־נָ֖א בְּאָזְנֵ֣י הָעָ֑ם וְיִשְׁאֲל֞וּ אִ֣ישׁ׀ מֵאֵ֣ת רֵעֵ֗הוּ וְאִשָּׁה֙ מֵאֵ֣ת רְעוּתָ֔הּ כְּלֵי־כֶ֖סֶף וּכְלֵ֥י זָהָֽב׃

‎3 ‏וַיִּתֵּ֧ן יְהוָ֛ה אֶת־חֵ֥ן הָעָ֖ם בְּעֵינֵ֣י מִצְרָ֑יִם גַּ֣ם׀ הָאִ֣ישׁ מֹשֶׁ֗ה גָּד֤וֹל מְאֹד֙ בְּאֶ֣רֶץ מִצְרַ֔יִם בְּעֵינֵ֥י עַבְדֵֽי־פַרְעֹ֖ה וּבְעֵינֵ֥י הָעָֽם׃ ס

‎4 ‏וַיֹּ֣אמֶר מֹשֶׁ֔ה כֹּ֖ה אָמַ֣ר יְהוָ֑ה כַּחֲצֹ֣ת הַלַּ֔יְלָה אֲנִ֥י יוֹצֵ֖א בְּת֥וֹךְ מִצְרָֽיִם׃

‎5 ‏וּמֵ֣ת כָּל־בְּכוֹר֮ בְּאֶ֣רֶץ מִצְרַיִם֒ מִבְּכ֤וֹר פַּרְעֹה֙ הַיֹּשֵׁ֣ב עַל־כִּסְא֔וֹ עַ֚ד בְּכ֣וֹר הַשִּׁפְחָ֔ה אֲשֶׁ֖ר אַחַ֣ר הָרֵחָ֑יִם וְכֹ֖ל בְּכ֥וֹר בְּהֵמָֽה׃

‎6 ‏וְהָֽיְתָ֛ה צְעָקָ֥ה גְדֹלָ֖ה בְּכָל־אֶ֣רֶץ מִצְרָ֑יִם אֲשֶׁ֤ר כָּמֹ֙הוּ֙ לֹ֣א נִהְיָ֔תָה וְכָמֹ֖הוּ לֹ֥א תֹסִֽף׃

‎7 ‏וּלְכֹ֣ל׀ בְּנֵ֣י יִשְׂרָאֵ֗ל לֹ֤א יֶֽחֱרַץ־כֶּ֙לֶב֙ לְשֹׁנ֔וֹ לְמֵאִ֖ישׁ וְעַד־בְּהֵמָ֑ה לְמַ֙עַן֙ תֵּֽדְע֔וּן אֲשֶׁר֙ יַפְלֶ֣ה יְהוָ֔ה בֵּ֥ין מִצְרַ֖יִם וּבֵ֥ין יִשְׂרָאֵֽל׃

‎8 ‏וְיָרְד֣וּ כָל־עֲבָדֶיךָ֩ אֵ֨לֶּה אֵלַ֜י וְהִשְׁתַּֽחֲוּוּ־לִ֣י לֵאמֹ֗ר צֵ֤א אַתָּה֙ וְכָל־הָעָ֣ם אֲשֶׁר־בְּרַגְלֶ֔יךָ וְאַחֲרֵי־כֵ֖ן אֵצֵ֑א וַיֵּצֵ֥א מֵֽעִם־פַּרְעֹ֖ה בָּחֳרִי־אָֽף׃ ס

‎9 ‏וַיֹּ֤אמֶר יְהוָה֙ אֶל־מֹשֶׁ֔ה לֹא־יִשְׁמַ֥ע אֲלֵיכֶ֖ם פַּרְעֹ֑ה לְמַ֛עַן רְב֥וֹת מוֹפְתַ֖י בְּאֶ֥רֶץ מִצְרָֽיִם׃

‎10 ‏וּמֹשֶׁ֣ה וְאַהֲרֹ֗ן עָשׂ֛וּ אֶת־כָּל־הַמֹּפְתִ֥ים הָאֵ֖לֶּה לִפְנֵ֣י פַרְעֹ֑ה וַיְחַזֵּ֤ק יְהוָה֙ אֶת־לֵ֣ב פַּרְעֹ֔ה וְלֹֽא־שִׁלַּ֥ח אֶת־בְּנֵֽי־יִשְׂרָאֵ֖ל מֵאַרְצֽוֹ׃ פ

1 wayyō’mer yəhwâ ’el-mōšeh ‘wōḏ neḡ^a‘ ’eḥāḏ ’āḇî’ ‘al-parə‘ōh wə‘al-miṣərayim ’^aḥărê-ḵēn yəšall^aḥ ’eṯəḵem mizzeh kəšalləḥwō kālâ gārēš yəḡārēš ’eṯəḵem mizzeh:

2 daber-nā’ bə’āzənê hā‘ām wəyišə’ălû ’îš| mē’ēṯ rē‘ēhû wə’iššâ mē’ēṯ rə‘ûṯāh kəlê-ḵesef ûḵəlê zâāḇ:

3 wayyitēn yəhwâ ’eṯ-ḥēn hā‘ām bə‘ênê miṣərāyim gam| hā’îš mōšeh gāḏwōl mə’ōḏ bə’ereṣ miṣərayim bə‘ênê ‘aḇəḏê-farə‘ōh ûḇə‘ênê hā‘ām: s

4 wayyō’mer mōšeh kōh ’āmar yəhwâ k^aḥăṣōṯ hallayəlâ ’ănî ywōṣē’ bəṯwōḵə miṣərāyim:

5 ûmēṯ kāl-bəḵwōr bə’ereṣ miṣərayim mibəḵwōr parə‘ōh hayyōšēḇ ‘al-kisə’wō ‘aḏ bəḵwōr haššifəḥâ ’ăšer ’^aḥar hārēḥāyim wəḵōl bəḵwōr bəhēmâ:

6 wəhāyəṯâ ṣə‘āqâ ḡəḏōlâ bəḵāl-’ereṣ miṣərāyim ’ăšer kāmōhû lō’ nihəyāṯâ wəḵāmōhû lō’ ṯōsif:

7 ûləḵōl| bənê yiśərā’ēl lō’ yeḥĕraṣ-keleḇ ləšōnwō ləmē’îš wə‘aḏ-bəhēmâ ləm^a‘an tēḏə‘ûn ’ăšer yafəleh yəhwâ bên miṣərayim ûḇên yiśərā’ēl:

8 wəyārəḏû ḵāl-‘ăḇāḏeyḵā ’ēlleh ’ēlay wəhišət^aḥăûû-lî lē’mōr ṣē’ ’atâ wəḵāl-hā‘ām ’ăšer-bəraḡəleyḵā wə’^aḥărê-ḵēn ’ēṣē’ wayyēṣē’ mē‘im-parə‘ōh bāḥŏrî-’āf: s

9 wayyō’mer yəhwâ ’el-mōšeh lō’-yišəm^a‘ ’ălêḵem parə‘ōh ləm^a‘an rəḇwōṯ mwōfəṯay bə’ereṣ miṣərāyim:

10 ûmōšeh wə’ahărōn ‘āśû ’eṯ-kāl-hammōfəṯîm hā’ēlleh lifənê farə‘ōh wayəḥazzēq yəhwâ ’eṯ-lēḇ parə‘ōh wəlō’-šill^aḥ ’eṯ-bənê-yiśərā’ēl mē’arəṣwō: f