‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏בֶּן־אָדָ֕ם שִׂ֥ים פָּנֶ֖יךָ אֶל־הָרֵ֣י יִשְׂרָאֵ֑ל וְהִנָּבֵ֖א אֲלֵיהֶֽם׃

‎3 ‏וְאָ֣מַרְתָּ֔ הָרֵי֙ יִשְׂרָאֵ֔ל שִׁמְע֖וּ דְּבַר־אֲדֹנָ֣י יְהוִ֑ה כֹּה־אָמַ֣ר אֲדֹנָ֣י יְ֠הוִה לֶהָרִ֨ים וְלַגְּבָע֜וֹת לָאֲפִיקִ֣ים ולגאית וְלַגֵּאָי֗וֹת הִנְנִ֨י אֲנִ֜י מֵבִ֤יא עֲלֵיכֶם֙ חֶ֔רֶב וְאִבַּדְתִּ֖י בָּמֽוֹתֵיכֶֽם׃

‎4 ‏וְנָשַׁ֙מּוּ֙ מִזְבְּח֣וֹתֵיכֶ֔ם וְנִשְׁבְּר֖וּ חַמָּֽנֵיכֶ֑ם וְהִפַּלְתִּי֙ חַלְלֵיכֶ֔ם לִפְנֵ֖י גִּלּוּלֵיכֶֽם׃

‎5 ‏וְנָתַתִּ֗י אֶת־פִּגְרֵי֙ בְּנֵ֣י יִשְׂרָאֵ֔ל לִפְנֵ֖י גִּלּֽוּלֵיהֶ֑ם וְזֵרִיתִי֙ אֶת־עַצְמ֣וֹתֵיכֶ֔ם סְבִיב֖וֹת מִזְבְּחוֹתֵיכֶֽם׃

‎6 ‏בְּכֹל֙ מוֹשְׁב֣וֹתֵיכֶ֔ם הֶעָרִ֣ים תֶּחֱרַ֔בְנָה וְהַבָּמ֖וֹת תִּישָׁ֑מְנָה לְמַעַן֩ יֶחֶרְב֨וּ וְיֶאְשְׁמ֜וּ מִזְבְּחֽוֹתֵיכֶ֗ם וְנִשְׁבְּר֤וּ וְנִשְׁבְּתוּ֙ גִּלּ֣וּלֵיכֶ֔ם וְנִגְדְּעוּ֙ חַמָּ֣נֵיכֶ֔ם וְנִמְח֖וּ מַעֲשֵׂיכֶֽם׃

‎7 ‏וְנָפַ֥ל חָלָ֖ל בְּתֽוֹכְכֶ֑ם וִֽידַעְתֶּ֖ם כִּֽי־אֲנִ֥י יְהוָֽה׃

‎8 ‏וְהוֹתַרְתִּ֗י בִּהְי֥וֹת לָכֶ֛ם פְּלִ֥יטֵי חֶ֖רֶב בַּגּוֹיִ֑ם בְּהִזָּרֽוֹתֵיכֶ֖ם בָּאֲרָצֽוֹת׃

‎9 ‏וְזָכְר֨וּ פְלִֽיטֵיכֶ֜ם אוֹתִ֗י בַּגּוֹיִם֮ אֲשֶׁ֣ר נִשְׁבּוּ־שָׁם֒ אֲשֶׁ֨ר נִשְׁבַּ֜רְתִּי אֶת־לִבָּ֣ם הַזּוֹנֶ֗ה אֲשֶׁר־סָר֙ מֵֽעָלַ֔י וְאֵת֙ עֵֽינֵיהֶ֔ם הַזֹּנ֕וֹת אַחֲרֵ֖י גִּלּֽוּלֵיהֶ֑ם וְנָקֹ֙טּוּ֙ בִּפְנֵיהֶ֔ם אֶל־הָֽרָעוֹת֙ אֲשֶׁ֣ר עָשׂ֔וּ לְכֹ֖ל תּוֹעֲבֹתֵיהֶֽם׃

‎10 ‏וְיָדְע֖וּ כִּֽי־אֲנִ֣י יְהוָ֑ה לֹ֤א אֶל־חִנָּם֙ דִּבַּ֔רְתִּי לַעֲשׂ֥וֹת לָהֶ֖ם הָרָעָ֥ה הַזֹּֽאת׃ פ

‎11 ‏כֹּֽה־אָמַ֞ר אֲדֹנָ֣י יְהוִ֗ה הַכֵּ֨ה בְכַפְּךָ֜ וּרְקַ֤ע בְּרַגְלְךָ֙ וֶֽאֱמָר־אָ֔ח אֶ֛ל כָּל־תּוֹעֲב֥וֹת רָע֖וֹת בֵּ֣ית יִשְׂרָאֵ֑ל אֲשֶׁ֗ר בַּחֶ֛רֶב בָּרָעָ֥ב וּבַדֶּ֖בֶר יִפֹּֽלוּ׃

‎12 ‏הָרָח֞וֹק בַּדֶּ֣בֶר יָמ֗וּת וְהַקָּרוֹב֙ בַּחֶ֣רֶב יִפּ֔וֹל וְהַנִּשְׁאָר֙ וְהַנָּצ֔וּר בָּרָעָ֖ב יָמ֑וּת וְכִלֵּיתִ֥י חֲמָתִ֖י בָּֽם׃

‎13 ‏וִֽידַעְתֶּם֙ כִּֽי־אֲנִ֣י יְהוָ֔ה בִּֽהְי֣וֹת חַלְלֵיהֶ֗ם בְּתוֹךְ֙ גִּלּ֣וּלֵיהֶ֔ם סְבִיב֖וֹת מִזְבְּחֽוֹתֵיהֶ֑ם אֶל֩ כָּל־גִּבְעָ֨ה רָמָ֜ה בְּכֹ֣ל׀ רָאשֵׁ֣י הֶהָרִ֗ים וְתַ֨חַת כָּל־עֵ֤ץ רַֽעֲנָן֙ וְתַ֙חַת֙ כָּל־אֵלָ֣ה עֲבֻתָּ֔ה מְק֗וֹם אֲשֶׁ֤ר נָֽתְנוּ־שָׁם֙ רֵ֣יחַ נִיחֹ֔חַ לְכֹ֖ל גִּלּוּלֵיהֶֽם׃

‎14 ‏וְנָטִ֤יתִי אֶת־יָדִי֙ עֲלֵיהֶ֔ם וְנָתַתִּ֨י אֶת־הָאָ֜רֶץ שְׁמָמָ֤ה וּמְשַׁמָּה֙ מִמִּדְבַּ֣ר דִּבְלָ֔תָה בְּכֹ֖ל מוֹשְׁבֽוֹתֵיהֶ֑ם וְיָדְע֖וּ כִּֽי־אֲנִ֥י יְהוָֽה׃ פ

1 wayəhî ḏəḇar-yəhwâ ’ēlay lē’mōr:

2 ben-’āḏām śîm pāneyḵā ’el-hārê yiśərā’ēl wəhinnāḇē’ ’ălêhem:

3 wə’āmarətā hārê yiśərā’ēl šimə‘û dəḇar-’ăḏōnāy yəhwih kōh-’āmar ’ăḏōnāy yəhwih lehārîm wəlagəḇā‘wōṯ lā’ăfîqîm wəlagē’āyōṯ wəlagē’āywōṯ hinənî ’ănî mēḇî’ ‘ălêḵem ḥereḇ wə’ibaḏətî bāmwōṯêḵem:

4 wənāšammû mizəbəḥwōṯêḵem wənišəbərû ḥammānêḵem wəhipalətî ḥaləlêḵem lifənê gillûlêḵem:

5 wənāṯatî ’eṯ-piḡərê bənê yiśərā’ēl lifənê gillûlêhem wəzērîṯî ’eṯ-‘aṣəmwōṯêḵem səḇîḇwōṯ mizəbəḥwōṯêḵem:

6 bəḵōl mwōšəḇwōṯêḵem he‘ārîm teḥĕraḇənâ wəhabāmwōṯ tîšāmənâ ləm^a‘an yeḥerəḇû wəye’əšəmû mizəbəḥwōṯêḵem wənišəbərû wənišəbəṯû gillûlêḵem wəniḡədə‘û ḥammānêḵem wəniməḥû m^a‘ăśêḵem:

7 wənāfal ḥālāl bəṯwōḵəḵem wîḏ^a‘ətem kî-’ănî yəhwâ:

8 wəhwōṯarətî bihəywōṯ lāḵem pəlîṭê ḥereḇ bagwōyim bəhizzārwōṯêḵem bā’ărāṣwōṯ:

9 wəzāḵərû fəlîṭêḵem ’wōṯî bagwōyim ’ăšer nišəbû-šām ’ăšer nišəbarətî ’eṯ-libām hazzwōneh ’ăšer-sār mē‘ālay wə’ēṯ ‘ênêhem hazzōnwōṯ ’^aḥărê gillûlêhem wənāqōṭṭû bifənêhem ’el-hārā‘wōṯ ’ăšer ‘āśû ləḵōl twō‘ăḇōṯêhem:

10 wəyāḏə‘û kî-’ănî yəhwâ lō’ ’el-ḥinnām dibarətî l^a‘ăśwōṯ lâem hārā‘â hazzō’ṯ: f

11 kōh-’āmar ’ăḏōnāy yəhwih hakēh ḇəḵapəḵā ûrəq^a‘ bəraḡələḵā we’ĕmār-’āḥ ’el kāl-twō‘ăḇwōṯ rā‘wōṯ bêṯ yiśərā’ēl ’ăšer b^aḥereḇ bārā‘āḇ ûḇadeḇer yipōlû:

12 hārāḥwōq badeḇer yāmûṯ wəhaqqārwōḇ b^aḥereḇ yipwōl wəhannišə’ār wəhannāṣûr bārā‘āḇ yāmûṯ wəḵillêṯî ḥămāṯî bām:

13 wîḏ^a‘ətem kî-’ănî yəhwâ bihəywōṯ ḥaləlêhem bəṯwōḵə gillûlêhem səḇîḇwōṯ mizəbəḥwōṯêhem ’el kāl-giḇə‘â rāmâ bəḵōl| rā’šê hehārîm wəṯ^aḥaṯ kāl-‘ēṣ r^a‘ănān wəṯ^aḥaṯ kāl-’ēlâ ‘ăḇutâ məqwōm ’ăšer nāṯənû-šām rêḥa nîḥōḥa ləḵōl gillûlêhem:

14 wənāṭîṯî ’eṯ-yāḏî ‘ălêhem wənāṯatî ’eṯ-hā’āreṣ šəmāmâ ûməšammâ mimmiḏəbar diḇəlāṯâ bəḵōl mwōšəḇwōṯêhem wəyāḏə‘û kî-’ănî yəhwâ: f