‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏מַה־לָּכֶ֗ם אַתֶּם֙ מֹֽשְׁלִים֙ אֶת־הַמָּשָׁ֣ל הַזֶּ֔ה עַל־אַדְמַ֥ת יִשְׂרָאֵ֖ל לֵאמֹ֑ר אָבוֹת֙ יֹ֣אכְלוּ בֹ֔סֶר וְשִׁנֵּ֥י הַבָּנִ֖ים תִּקְהֶֽינָה׃

‎3 ‏חַי־אָ֕נִי נְאֻ֖ם אֲדֹנָ֣י יְהוִ֑ה אִם־יִֽהְיֶ֨ה לָכֶ֜ם ע֗וֹד מְשֹׁ֛ל הַמָּשָׁ֥ל הַזֶּ֖ה בְּיִשְׂרָאֵֽל׃

‎4 ‏הֵ֤ן כָּל־הַנְּפָשׁוֹת֙ לִ֣י הֵ֔נָּה כְּנֶ֧פֶשׁ הָאָ֛ב וּכְנֶ֥פֶשׁ הַבֵּ֖ן לִי־הֵ֑נָּה הַנֶּ֥פֶשׁ הַחֹטֵ֖את הִ֥יא תָמֽוּת׃ ס

‎5 ‏וְאִ֖ישׁ כִּי־יִהְיֶ֣ה צַדִּ֑יק וְעָשָׂ֥ה מִשְׁפָּ֖ט וּצְדָקָֽה׃

‎6 ‏אֶל־הֶֽהָרִים֙ לֹ֣א אָכָ֔ל וְעֵינָיו֙ לֹ֣א נָשָׂ֔א אֶל־גִּלּוּלֵ֖י בֵּ֣ית יִשְׂרָאֵ֑ל וְאֶת־אֵ֤שֶׁת רֵעֵ֙הוּ֙ לֹ֣א טִמֵּ֔א³ וְאֶל־אִשָּׁ֥ה נִדָּ֖ה לֹ֥א יִקְרָֽב׃

‎7 ‏וְאִישׁ֙ לֹ֣א יוֹנֶ֔ה חֲבֹלָת֥וֹ חוֹב֙ יָשִׁ֔יב גְּזֵלָ֖ה לֹ֣א יִגְזֹ֑ל לַחְמוֹ֙ לְרָעֵ֣ב יִתֵּ֔ן וְעֵירֹ֖ם יְכַסֶּה־בָּֽגֶד׃

‎8 ‏בַּנֶּ֣שֶׁךְ לֹֽא־יִתֵּ֗ן וְתַרְבִּית֙ לֹ֣א יִקָּ֔ח מֵעָ֖וֶל יָשִׁ֣יב יָד֑וֹ מִשְׁפַּ֤ט אֱמֶת֙ יַֽעֲשֶׂ֔ה בֵּ֥ין אִ֖ישׁ לְאִֽישׁ׃

‎9 ‏בְּחֻקּוֹתַ֧י יְהַלֵּ֛ךְ וּמִשְׁפָּטַ֥י שָׁמַ֖ר לַעֲשׂ֣וֹת אֱמֶ֑ת צַדִּ֥יק הוּא֙ חָיֹ֣ה יִֽחְיֶ֔ה נְאֻ֖ם אֲדֹנָ֥י יְהוִֽה׃

‎10 ‏וְהוֹלִ֥יד בֵּן־פָּרִ֖יץ שֹׁפֵ֣ךְ דָּ֑ם וְעָ֣שָׂה אָ֔ח מֵאַחַ֖ד מֵאֵֽלֶּה׃

‎11 ‏וְה֕וּא אֶת־כָּל־אֵ֖לֶּה לֹ֣א עָשָׂ֑ה כִּ֣י גַ֤ם אֶל־הֶֽהָרִים֙ אָכַ֔ל וְאֶת־אֵ֥שֶׁת רֵעֵ֖הוּ טִמֵּֽא׃

‎12 ‏עָנִ֤י וְאֶבְיוֹן֙ הוֹנָ֔ה גְּזֵל֣וֹת גָּזָ֔ל חֲבֹ֖ל לֹ֣א יָשִׁ֑יב וְאֶל־הַגִּלּוּלִים֙ נָשָׂ֣א עֵינָ֔יו תּוֹעֵבָ֖ה עָשָֽׂה׃

‎13 ‏בַּנֶּ֧שֶׁךְ נָתַ֛ן וְתַרְבִּ֥ית לָקַ֖ח וָחָ֑י לֹ֣א יִֽחְיֶ֗ה אֵ֣ת כָּל־הַתּוֹעֵב֤וֹת הָאֵ֙לֶּה֙ עָשָׂ֔ה מ֣וֹת יוּמָ֔ת דָּמָ֖יו בּ֥וֹ יִהְיֶֽה׃

‎14 ‏וְהִנֵּה֙ הוֹלִ֣יד בֵּ֔ן וַיַּ֕רְא אֶת־כָּל־חַטֹּ֥את אָבִ֖יו אֲשֶׁ֣ר עָשָׂ֑ה וַיִּרְאֶ֕ה וְלֹ֥א יַעֲשֶׂ֖ה כָּהֵֽן׃

‎15 ‏עַל־הֶֽהָרִים֙ לֹ֣א אָכָ֔ל וְעֵינָיו֙ לֹ֣א נָשָׂ֔א אֶל־גִּלּוּלֵ֖י בֵּ֣ית יִשְׂרָאֵ֑ל אֶת־אֵ֥שֶׁת רֵעֵ֖הוּ לֹ֥א טִמֵּֽא׃

‎16 ‏וְאִישׁ֙ לֹ֣א הוֹנָ֔ה חֲבֹל֙ לֹ֣א חָבָ֔ל וּגְזֵלָ֖ה לֹ֣א גָזָ֑ל לַחְמוֹ֙ לְרָעֵ֣ב נָתָ֔ן וְעֵר֖וֹם כִּסָּה־בָֽגֶד׃

‎17 ‏מֵעָנִ֞י הֵשִׁ֣יב יָד֗וֹ נֶ֤שֶׁךְ וְתַרְבִּית֙ לֹ֣א לָקָ֔ח מִשְׁפָּטַ֣י עָשָׂ֔ה בְּחֻקּוֹתַ֖י הָלָ֑ךְ ה֗וּא לֹ֥א יָמ֛וּת בַּעֲוֹ֥ן אָבִ֖יו חָיֹ֥ה יִחְיֶֽה׃

‎18 ‏אָבִ֞יו כִּֽי־עָ֣שַׁק עֹ֗שֶׁק גָּזַל֙ גֵּ֣זֶל אָ֔ח וַאֲשֶׁ֥ר לֹא־ט֛וֹב עָשָׂ֖ה בְּת֣וֹךְ עַמָּ֑יו וְהִנֵּה־מֵ֖ת בַּעֲוֹנֽוֹ׃

‎19 ‏וַאֲמַרְתֶּ֕ם מַדֻּ֛עַ לֹא־נָשָׂ֥א הַבֵּ֖ן בַּעֲוֹ֣ן הָאָ֑ב וְהַבֵּ֞ן מִשְׁפָּ֧ט וּצְדָקָ֣ה עָשָׂ֗ה אֵ֣ת כָּל־חֻקּוֹתַ֥י שָׁמַ֛ר וַיַּעֲשֶׂ֥ה אֹתָ֖ם חָיֹ֥ה יִחְיֶֽה׃

‎20 ‏הַנֶּ֥פֶשׁ הַחֹטֵ֖את הִ֣יא תָמ֑וּת בֵּ֞ן לֹא־יִשָּׂ֣א׀ בַּעֲוֹ֣ן הָאָ֗ב וְאָב֙ לֹ֤א יִשָּׂא֙ בַּעֲוֹ֣ן הַבֵּ֔ן צִדְקַ֤ת הַצַּדִּיק֙ עָלָ֣יו תִּֽהְיֶ֔ה וְרִשְׁעַ֥ת רשע הָרָשָׁ֖ע עָלָ֥יו תִּֽהְיֶֽה׃ ס

‎21 ‏וְהָרָשָׁ֗ע כִּ֤י יָשׁוּב֙ מִכָּל־חטאתו חַטֹּאתָיו֙ אֲשֶׁ֣ר עָשָׂ֔ה וְשָׁמַר֙ אֶת־כָּל־חֻקּוֹתַ֔י וְעָשָׂ֥ה מִשְׁפָּ֖ט וּצְדָקָ֑ה חָיֹ֥ה יִחְיֶ֖ה לֹ֥א יָמֽוּת׃

‎22 ‏כָּל־פְּשָׁעָיו֙ אֲשֶׁ֣ר עָשָׂ֔ה לֹ֥א יִזָּכְר֖וּ ל֑וֹ בְּצִדְקָת֥וֹ אֲשֶׁר־עָשָׂ֖ה יִֽחְיֶֽה׃

‎23 ‏הֶחָפֹ֤ץ אֶחְפֹּץ֙ מ֣וֹת רָשָׁ֔ע נְאֻ֖ם אֲדֹנָ֣י יְהוִ֑ה הֲל֛וֹא בְּשׁוּב֥וֹ מִדְּרָכָ֖יו וְחָיָֽה׃ ס

‎24 ‏וּבְשׁ֨וּב צַדִּ֤יק מִצִּדְקָתוֹ֙ וְעָ֣שָׂה עָ֔וֶל כְּכֹ֨ל הַתּוֹעֵב֜וֹת אֲשֶׁר־עָשָׂ֧ה הָרָשָׁ֛ע יַעֲשֶׂ֖ה וָחָ֑י כָּל־צדקתו צִדְקֹתָ֤יו אֲשֶׁר־עָשָׂה֙ לֹ֣א תִזָּכַ֔רְנָה בְּמַעֲל֧וֹ אֲשֶׁר־מָעַ֛ל וּבְחַטָּאת֥וֹ אֲשֶׁר־חָטָ֖א בָּ֥ם יָמֽוּת׃

‎25 ‏וַאֲמַרְתֶּ֕ם לֹ֥א יִתָּכֵ֖ן דֶּ֣רֶךְ אֲדֹנָ֑י שִׁמְעוּ־נָא֙ בֵּ֣ית יִשְׂרָאֵ֔ל הֲדַרְכִּי֙ לֹ֣א יִתָּכֵ֔ן הֲלֹ֥א דַרְכֵיכֶ֖ם לֹ֥א יִתָּכֵֽנוּ׃

‎26 ‏בְּשׁוּב־צַדִּ֧יק מִצִּדְקָת֛וֹ וְעָ֥שָׂה עָ֖וֶל וּמֵ֣ת עֲלֵיהֶ֑ם בְּעַוְל֥וֹ אֲשֶׁר־עָשָׂ֖ה יָמֽוּת׃ ס

‎27 ‏וּבְשׁ֣וּב רָשָׁ֗ע מֵֽרִשְׁעָתוֹ֙ אֲשֶׁ֣ר עָשָׂ֔ה וַיַּ֥עַשׂ מִשְׁפָּ֖ט וּצְדָקָ֑ה ה֖וּא אֶת־נַפְשׁ֥וֹ יְחַיֶּֽה׃

‎28 ‏וַיִּרְאֶ֣ה וישוב וַיָּ֔שָׁב מִכָּל־פְּשָׁעָ֖יו אֲשֶׁ֣ר עָשָׂ֑ה חָי֥וֹ יִחְיֶ֖ה לֹ֥א יָמֽוּת׃

‎29 ‏וְאָֽמְרוּ֙ בֵּ֣ית יִשְׂרָאֵ֔ל לֹ֥א יִתָּכֵ֖ן דֶּ֣רֶךְ אֲדֹנָ֑י הַדְּרָכַ֞י לֹ֤א יִתָּֽכְנּוּ֙¹ בֵּ֣ית יִשְׂרָאֵ֔ל הֲלֹ֥א דַרְכֵיכֶ֖ם לֹ֥א יִתָּכֵֽן׃

‎30 ‏לָכֵן֩ אִ֨ישׁ כִּדְרָכָ֜יו אֶשְׁפֹּ֤ט אֶתְכֶם֙ בֵּ֣ית יִשְׂרָאֵ֔ל נְאֻ֖ם אֲדֹנָ֣י יְהוִ֑ה שׁ֤וּבוּ וְהָשִׁ֙יבוּ֙ מִכָּל־פִּשְׁעֵיכֶ֔ם וְלֹֽא־יִהְיֶ֥ה לָכֶ֛ם לְמִכְשׁ֖וֹל עָוֹֽן׃

‎31 ‏הַשְׁלִ֣יכוּ מֵעֲלֵיכֶ֗ם אֶת־כָּל־פִּשְׁעֵיכֶם֙ אֲשֶׁ֣ר פְּשַׁעְתֶּ֣ם בָּ֔ם וַעֲשׂ֥וּ לָכֶ֛ם לֵ֥ב חָדָ֖שׁ וְר֣וּחַ חֲדָשָׁ֑ה וְלָ֥מָּה תָמֻ֖תוּ בֵּ֥ית יִשְׂרָאֵֽל׃

‎32 ‏כִּ֣י לֹ֤א אֶחְפֹּץ֙ בְּמ֣וֹת הַמֵּ֔ת נְאֻ֖ם אֲדֹנָ֣י יְהוִ֑ה וְהָשִׁ֖יבוּ וִֽחְיֽוּ׃ פ

1 wayəhî ḏəḇar-yəhwâ ’ēlay lē’mōr:

2 mah-llāḵem ’atem mōšəlîm ’eṯ-hammāšāl hazzeh ‘al-’aḏəmaṯ yiśərā’ēl lē’mōr ’āḇwōṯ yō’ḵəlû ḇōser wəšinnê habānîm tiqəheynâ:

3 ḥay-’ānî nə’um ’ăḏōnāy yəhwih ’im-yihəyeh lāḵem ‘wōḏ məšōl hammāšāl hazzeh bəyiśərā’ēl:

4 hēn kāl-hannəfāšwōṯ lî hēnnâ kənefeš hā’āḇ ûḵənefeš habēn lî-hēnnâ hannefeš h^aḥōṭē’ṯ hî’ ṯāmûṯ: s

5 wə’îš kî-yihəyeh ṣadîq wə‘āśâ mišəpāṭ ûṣəḏāqâ:

6 ’el-hehārîm lō’ ’āḵāl wə‘ênāyw lō’ nāśā’ ’el-gillûlê bêṯ yiśərā’ēl wə’eṯ-’ēšeṯ rē‘ēhû lō’ ṭimmē’³ wə’el-’iššâ nidâ lō’ yiqərāḇ:

7 wə’îš lō’ ywōneh ḥăḇōlāṯwō ḥwōḇ yāšîḇ gəzēlâ lō’ yiḡəzōl l^aḥəmwō lərā‘ēḇ yitēn wə‘êrōm yəḵasseh-bāḡeḏ:

8 bannešeḵə lō’-yitēn wəṯarəbîṯ lō’ yiqqāḥ mē‘āwel yāšîḇ yāḏwō mišəpaṭ ’ĕmeṯ y^a‘ăśeh bên ’îš lə’îš:

9 bəḥuqqwōṯay yəhallēḵə ûmišəpāṭay šāmar l^a‘ăśwōṯ ’ĕmeṯ ṣadîq hû’ ḥāyōh yiḥəyeh nə’um ’ăḏōnāy yəhwih:

10 wəhwōlîḏ bēn-pārîṣ šōfēḵə dām wə‘āśâ ’āḥ mē’^aḥaḏ mē’ēlleh:

11 wəhû’ ’eṯ-kāl-’ēlleh lō’ ‘āśâ kî ḡam ’el-hehārîm ’āḵal wə’eṯ-’ēšeṯ rē‘ēhû ṭimmē’:

12 ‘ānî wə’eḇəywōn hwōnâ gəzēlwōṯ gāzāl ḥăḇōl lō’ yāšîḇ wə’el-hagillûlîm nāśā’ ‘ênāyw twō‘ēḇâ ‘āśâ:

13 bannešeḵə nāṯan wəṯarəbîṯ lāq^aḥ wāḥāy lō’ yiḥəyeh ’ēṯ kāl-hatwō‘ēḇwōṯ hā’ēlleh ‘āśâ mwōṯ yûmāṯ dāmāyw bwō yihəyeh:

14 wəhinnēh hwōlîḏ bēn wayyarə’ ’eṯ-kāl-ḥaṭṭō’ṯ ’āḇîw ’ăšer ‘āśâ wayyirə’eh wəlō’ y^a‘ăśeh kâēn:

15 ‘al-hehārîm lō’ ’āḵāl wə‘ênāyw lō’ nāśā’ ’el-gillûlê bêṯ yiśərā’ēl ’eṯ-’ēšeṯ rē‘ēhû lō’ ṭimmē’:

16 wə’îš lō’ hwōnâ ḥăḇōl lō’ ḥāḇāl ûḡəzēlâ lō’ ḡāzāl l^aḥəmwō lərā‘ēḇ nāṯān wə‘ērwōm kissâ-ḇāḡeḏ:

17 mē‘ānî hēšîḇ yāḏwō nešeḵə wəṯarəbîṯ lō’ lāqāḥ mišəpāṭay ‘āśâ bəḥuqqwōṯay hālāḵə hû’ lō’ yāmûṯ b^a‘ăwōn ’āḇîw ḥāyōh yiḥəyeh:

18 ’āḇîw kî-‘āšaq ‘ōšeq gāzal gēzel ’āḥ wa’ăšer lō’-ṭwōḇ ‘āśâ bəṯwōḵə ‘ammāyw wəhinnēh-mēṯ b^a‘ăwōnwō:

19 wa’ămarətem madu‘a lō’-nāśā’ habēn b^a‘ăwōn hā’āḇ wəhabēn mišəpāṭ ûṣəḏāqâ ‘āśâ ’ēṯ kāl-ḥuqqwōṯay šāmar wayy^a‘ăśeh ’ōṯām ḥāyōh yiḥəyeh:

20 hannefeš h^aḥōṭē’ṯ hî’ ṯāmûṯ bēn lō’-yiśśā’| b^a‘ăwōn hā’āḇ wə’āḇ lō’ yiśśā’ b^a‘ăwōn habēn ṣiḏəqaṯ haṣṣadîq ‘ālāyw tihəyeh wərišə‘aṯ rāšā‘ hārāšā‘ ‘ālāyw tihəyeh: s

21 wəhārāšā‘ kî yāšûḇ mikāl-ḥaṭṭō’ṯāw ḥaṭṭō’ṯāyw ’ăšer ‘āśâ wəšāmar ’eṯ-kāl-ḥuqqwōṯay wə‘āśâ mišəpāṭ ûṣəḏāqâ ḥāyōh yiḥəyeh lō’ yāmûṯ:

22 kāl-pəšā‘āyw ’ăšer ‘āśâ lō’ yizzāḵərû lwō bəṣiḏəqāṯwō ’ăšer-‘āśâ yiḥəyeh:

23 heḥāfōṣ ’eḥəpōṣ mwōṯ rāšā‘ nə’um ’ăḏōnāy yəhwih hălwō’ bəšûḇwō midərāḵāyw wəḥāyâ: s

24 ûḇəšûḇ ṣadîq miṣṣiḏəqāṯwō wə‘āśâ ‘āwel kəḵōl hatwō‘ēḇwōṯ ’ăšer-‘āśâ hārāšā‘ y^a‘ăśeh wāḥāy kāl-ṣiḏəqāṯwō ṣiḏəqōṯāyw ’ăšer-‘āśâ lō’ ṯizzāḵarənâ bəm^a‘ălwō ’ăšer-mā‘al ûḇəḥaṭṭā’ṯwō ’ăšer-ḥāṭā’ bām yāmûṯ:

25 wa’ămarətem lō’ yitāḵēn dereḵə ’ăḏōnāy šimə‘û-nā’ bêṯ yiśərā’ēl hăḏarəkî lō’ yitāḵēn hălō’ ḏarəḵêḵem lō’ yitāḵēnû:

26 bəšûḇ-ṣadîq miṣṣiḏəqāṯwō wə‘āśâ ‘āwel ûmēṯ ‘ălêhem bə‘awəlwō ’ăšer-‘āśâ yāmûṯ: s

27 ûḇəšûḇ rāšā‘ mērišə‘āṯwō ’ăšer ‘āśâ wayy^a‘aś mišəpāṭ ûṣəḏāqâ hû’ ’eṯ-nafəšwō yəḥayyeh:

28 wayyirə’eh wayyāšwōḇ wayyāšāḇ mikāl-pəšā‘āyw ’ăšer ‘āśâ ḥāywō yiḥəyeh lō’ yāmûṯ:

29 wə’āmərû bêṯ yiśərā’ēl lō’ yitāḵēn dereḵə ’ăḏōnāy hadərāḵay lō’ yitāḵənnû¹ bêṯ yiśərā’ēl hălō’ ḏarəḵêḵem lō’ yitāḵēn:

30 lāḵēn ’îš kiḏərāḵāyw ’ešəpōṭ ’eṯəḵem bêṯ yiśərā’ēl nə’um ’ăḏōnāy yəhwih šûḇû wəhāšîḇû mikāl-pišə‘êḵem wəlō’-yihəyeh lāḵem ləmiḵəšwōl ‘āwōn:

31 hašəlîḵû mē‘ălêḵem ’eṯ-kāl-pišə‘êḵem ’ăšer pəš^a‘ətem bām w^a‘ăśû lāḵem lēḇ ḥāḏāš wərûḥa ḥăḏāšâ wəlāmmâ ṯāmuṯû bêṯ yiśərā’ēl:

32 kî lō’ ’eḥəpōṣ bəmwōṯ hammēṯ nə’um ’ăḏōnāy yəhwih wəhāšîḇû wiḥəyû: f