‎1 ‏וְאַתָּ֤ה בֶן־אָדָם֙ הִנָּבֵ֣א עַל־גּ֔וֹג וְאָ֣מַרְתָּ֔ כֹּ֥ה אָמַ֖ר אֲדֹנָ֣י יְהוִ֑ה הִנְנִ֤י אֵלֶ֙יךָ֙ גּ֔וֹג נְשִׂ֕יא רֹ֖אשׁ מֶ֥שֶׁךְ וְתֻבָֽל׃

‎2 ‏וְשֹׁבַבְתִּ֙יךָ֙ וְשִׁשֵּׁאתִ֔יךָ וְהַעֲלִיתִ֖יךָ מִיַּרְכְּתֵ֣י צָפ֑וֹן וַהֲבִאוֹתִ֖ךָ עַל־הָרֵ֥י יִשְׂרָאֵֽל׃

‎3 ‏וְהִכֵּיתִ֥י קַשְׁתְּךָ֖ מִיַּ֣ד שְׂמֹאולֶ֑ךָ וְחִצֶּ֕יךָ מִיַּ֥ד יְמִינְךָ֖ אַפִּֽיל׃

‎4 ‏עַל־הָרֵ֨י יִשְׂרָאֵ֜ל תִּפּ֗וֹל אַתָּה֙ וְכָל־אֲגַפֶּ֔יךָ וְעַמִּ֖ים אֲשֶׁ֣ר אִתָּ֑ךְ לְעֵ֨יט צִפּ֧וֹר כָּל־כָּנָ֛ף וְחַיַּ֥ת הַשָּׂדֶ֖ה נְתַתִּ֥יךָ לְאָכְלָֽה׃

‎5 ‏עַל־פְּנֵ֥י הַשָּׂדֶ֖ה תִּפּ֑וֹל כִּ֚י אֲנִ֣י דִבַּ֔רְתִּי נְאֻ֖ם אֲדֹנָ֥י יְהוִֽה׃

‎6 ‏וְשִׁלַּחְתִּי־אֵ֣שׁ בְּמָג֔וֹג וּבְיֹשְׁבֵ֥י הָאִיִּ֖ים לָבֶ֑טַח וְיָדְע֖וּ כִּי־אֲנִ֥י יְהוָֽה׃

‎7 ‏וְאֶת־שֵׁ֨ם קָדְשִׁ֜י אוֹדִ֗יעַ בְּתוֹךְ֙ עַמִּ֣י יִשְׂרָאֵ֔ל וְלֹֽא־אַחֵ֥ל אֶת־שֵׁם־קָדְשִׁ֖י ע֑וֹד וְיָדְע֤וּ הַגּוֹיִם֙ כִּי־אֲנִ֣י יְהוָ֔ה קָד֖וֹשׁ בְּיִשְׂרָאֵֽל׃

‎8 ‏הִנֵּ֤ה בָאָה֙ וְנִֽהְיָ֔תָה נְאֻ֖ם אֲדֹנָ֣י יְהוִ֑ה ה֥וּא הַיּ֖וֹם אֲשֶׁ֥ר דִּבַּֽרְתִּי׃

‎9 ‏וְֽיָצְא֞וּ יֹשְׁבֵ֣י׀ עָרֵ֣י יִשְׂרָאֵ֗ל וּבִעֲר֡וּ וְ֠הִשִּׂיקוּ בְּנֶ֨שֶׁק וּמָגֵ֤ן וְצִנָּה֙ בְּקֶ֣שֶׁת וּבְחִצִּ֔ים וּבְמַקֵּ֥ל יָ֖ד וּבְרֹ֑מַח וּבִעֲר֥וּ בָהֶ֛ם אֵ֖שׁ שֶׁ֥בַע שָׁנִֽים׃

‎10 ‏וְלֹֽא־יִשְׂא֨וּ עֵצִ֜ים מִן־הַשָּׂדֶ֗ה וְלֹ֤א יַחְטְבוּ֙ מִן־הַיְּעָרִ֔ים כִּ֥י בַנֶּ֖שֶׁק יְבַֽעֲרוּ־אֵ֑שׁ וְשָׁלְל֣וּ אֶת־שֹׁלְלֵיהֶ֗ם וּבָֽזְזוּ֙ אֶת־בֹּ֣זְזֵיהֶ֔ם נְאֻ֖ם אֲדֹנָ֥י יְהוִֽה׃ ס

‎11 ‏וְהָיָ֣ה בַיּ֣וֹם הַה֡וּא אֶתֵּ֣ן לְגוֹג֩׀ מְקֽוֹם־שָׁ֨ם קֶ֜בֶר בְּיִשְׂרָאֵ֗ל גֵּ֤י הָעֹֽבְרִים֙ קִדְמַ֣ת הַיָּ֔ם וְחֹסֶ֥מֶת הִ֖יא אֶת־הָעֹֽבְרִ֑ים וְקָ֣בְרוּ שָׁ֗ם אֶת־גּוֹג֙ וְאֶת־כָּל־הֲמוֹנֹ֔ה^q וְקָ֣רְא֔וּ גֵּ֖יא הֲמ֥וֹן גּֽוֹג׃

‎12 ‏וּקְבָרוּם֙ בֵּ֣ית יִשְׂרָאֵ֔ל לְמַ֖עַן טַהֵ֣ר אֶת־הָאָ֑רֶץ שִׁבְעָ֖ה חֳדָשִֽׁים׃

‎13 ‏וְקָֽבְרוּ֙ כָּל־עַ֣ם הָאָ֔רֶץ וְהָיָ֥ה לָהֶ֖ם לְשֵׁ֑ם י֚וֹם הִכָּ֣בְדִ֔י נְאֻ֖ם אֲדֹנָ֥י יְהוִֽה׃

‎14 ‏וְאַנְשֵׁ֨י תָמִ֤יד יַבְדִּ֙ילוּ֙ עֹבְרִ֣ים בָּאָ֔רֶץ מְקַבְּרִ֣ים אֶת־הָעֹבְרִ֗ים אֶת־הַנּוֹתָרִ֛ים עַל־פְּנֵ֥י הָאָ֖רֶץ לְטַֽהֲרָ֑הּ מִקְצֵ֥ה שִׁבְעָֽה־חֳדָשִׁ֖ים יַחְקֹֽרוּ׃

‎15 ‏וְעָבְר֤וּ הָעֹֽבְרִים֙ בָּאָ֔רֶץ וְרָאָה֙ עֶ֣צֶם אָדָ֔ם וּבָנָ֥ה אֶצְל֖וֹ צִיּ֑וּן עַ֣ד קָבְר֤וּ אֹתוֹ֙ הַֽמְקַבְּרִ֔ים אֶל־גֵּ֖יא הֲמ֥וֹן גּֽוֹג׃

‎16 ‏וְגַ֥ם שֶׁם־עִ֛יר הֲמוֹנָ֖ה וְטִהֲר֥וּ הָאָֽרֶץ׃ ס

‎17 ‏וְאַתָּ֨ה בֶן־אָדָ֜ם כֹּֽה־אָמַ֣ר׀ אֲדֹנָ֣י יְהוִֹ֗ה אֱמֹר֩ לְצִפּ֨וֹר כָּל־כָּנָ֜ף וּלְכֹ֣ל׀ חַיַּ֣ת הַשָּׂדֶ֗ה הִקָּבְצ֤וּ וָבֹ֙אוּ֙ הֵאָסְפ֣וּ מִסָּבִ֔יב עַל־זִבְחִ֗י אֲשֶׁ֨ר אֲנִ֜י זֹבֵ֤חַ לָכֶם֙ זֶ֣בַח גָּד֔וֹל עַ֖ל הָרֵ֣י יִשְׂרָאֵ֑ל וַאֲכַלְתֶּ֥ם בָּשָׂ֖ר וּשְׁתִ֥יתֶם דָּֽם׃

‎18 ‏בְּשַׂ֤ר גִּבּוֹרִים֙ תֹּאכֵ֔לוּ וְדַם־נְשִׂיאֵ֥י הָאָ֖רֶץ תִּשְׁתּ֑וּ אֵילִ֨ים כָּרִ֤ים וְעַתּוּדִים֙ פָּרִ֔ים מְרִיאֵ֥י בָשָׁ֖ן כֻּלָּֽם׃

‎19 ‏וַאֲכַלְתֶּם־חֵ֣לֶב לְשָׂבְעָ֔ה וּשְׁתִ֥יתֶם דָּ֖ם לְשִׁכָּר֑וֹן מִזִּבְחִ֖י אֲשֶׁר־זָבַ֥חְתִּי לָכֶֽם׃

‎20 ‏וּשְׂבַעְתֶּ֤ם עַל־שֻׁלְחָנִי֙ ס֣וּס וָרֶ֔כֶב גִּבּ֖וֹר וְכָל־אִ֣ישׁ מִלְחָמָ֑ה נְאֻ֖ם אֲדֹנָ֥י יְהוִֽה׃

‎21 ‏וְנָתַתִּ֥י אֶת־כְּבוֹדִ֖י בַּגּוֹיִ֑ם וְרָא֣וּ כָל־הַגּוֹיִ֗ם אֶת־מִשְׁפָּטִי֙ אֲשֶׁ֣ר עָשִׂ֔יתִי וְאֶת־יָדִ֖י אֲשֶׁר־שַׂ֥מְתִּי בָהֶֽם׃

‎22 ‏וְיָֽדְעוּ֙ בֵּ֣ית יִשְׂרָאֵ֔ל כִּ֛י אֲנִ֥י יְהוָ֖ה אֱלֹֽהֵיהֶ֑ם מִן־הַיּ֥וֹם הַה֖וּא וָהָֽלְאָה׃

‎23 ‏וְיָדְע֣וּ הַ֠גּוֹיִם כִּ֣י בַעֲוֹנָ֞ם גָּל֣וּ בֵֽית־יִשְׂרָאֵ֗ל עַ֚ל אֲשֶׁ֣ר מָֽעֲלוּ־בִ֔י וָאַסְתִּ֥ר פָּנַ֖י מֵהֶ֑ם וָֽאֶתְּנֵם֙ בְּיַ֣ד צָרֵיהֶ֔ם וַיִּפְּל֥וּ בַחֶ֖רֶב כֻּלָּֽם׃

‎24 ‏כְּטֻמְאָתָ֥ם וּכְפִשְׁעֵיהֶ֖ם עָשִׂ֣יתִי אֹתָ֑ם וָאַסְתִּ֥ר פָּנַ֖י מֵהֶֽם׃ ס

‎25 ‏לָכֵ֗ן כֹּ֤ה אָמַר֙ אֲדֹנָ֣י יְהוִ֔ה עַתָּ֗ה אָשִׁיב֙ אֶת־שבית שְׁב֣וּת יַֽעֲקֹ֔ב וְרִֽחַמְתִּ֖י כָּל־בֵּ֣ית יִשְׂרָאֵ֑ל וְקִנֵּאתִ֖י לְשֵׁ֥ם קָדְשִֽׁי׃

‎26 ‏וְנָשׂוּ֙ אֶת־כְּלִמָּתָ֔ם וְאֶת־כָּל־מַעֲלָ֖ם אֲשֶׁ֣ר מָעֲלוּ־בִ֑י בְּשִׁבְתָּ֧ם עַל־אַדְמָתָ֛ם לָבֶ֖טַח וְאֵ֥ין מַחֲרִֽיד׃

‎27 ‏בְּשׁוֹבְבִ֤י אוֹתָם֙ מִן־הָ֣עַמִּ֔ים וְקִבַּצְתִּ֣י אֹתָ֔ם מֵֽאַרְצ֖וֹת אֹֽיְבֵיהֶ֑ם וְנִקְדַּ֣שְׁתִּי בָ֔ם לְעֵינֵ֖י הַגּוֹיִ֥ם רַבִּֽים׃

‎28 ‏וְיָדְע֗וּ כִּ֣י אֲנִ֤י יְהוָה֙ אֱלֹ֣הֵיהֶ֔ם בְּהַגְלוֹתִ֤י אֹתָם֙ אֶל־הַגּוֹיִ֔ם וְכִנַּסְתִּ֖ים עַל־אַדְמָתָ֑ם וְלֹֽא־אוֹתִ֥יר ע֛וֹד מֵהֶ֖ם שָֽׁם׃

‎29 ‏וְלֹֽא־אַסְתִּ֥יר ע֛וֹד פָּנַ֖י מֵהֶ֑ם אֲשֶׁ֨ר שָׁפַ֤כְתִּי אֶת־רוּחִי֙ עַל־בֵּ֣ית יִשְׂרָאֵ֔ל נְאֻ֖ם אֲדֹנָ֥י יְהוִֽה׃ פ

1 wə’atâ ḇen-’āḏām hinnāḇē’ ‘al-gwōḡ wə’āmarətā kōh ’āmar ’ăḏōnāy yəhwih hinənî ’ēleyḵā gwōḡ nəśî’ rō’š mešeḵə wəṯuḇāl:

2 wəšōḇaḇətîḵā wəšiššē’ṯîḵā wəh^a‘ălîṯîḵā mîyarəkəṯê ṣāfwōn wahăḇi’wōṯiḵā ‘al-hārê yiśərā’ēl:

3 wəhikêṯî qašətəḵā mîyaḏ śəmō’wleḵā wəḥiṣṣeyḵā mîyaḏ yəmînəḵā ’apîl:

4 ‘al-hārê yiśərā’ēl tipwōl ’atâ wəḵāl-’ăḡapeyḵā wə‘ammîm ’ăšer ’itāḵə lə‘êṭ ṣipwōr kāl-kānāf wəḥayyaṯ haśśāḏeh nəṯatîḵā lə’āḵəlâ:

5 ‘al-pənê haśśāḏeh tipwōl kî ’ănî ḏibarətî nə’um ’ăḏōnāy yəhwih:

6 wəšill^aḥətî-’ēš bəmāḡwōḡ ûḇəyōšəḇê hā’îyîm lāḇeṭ^aḥ wəyāḏə‘û kî-’ănî yəhwâ:

7 wə’eṯ-šēm qāḏəšî ’wōḏî‘a bəṯwōḵə ‘ammî yiśərā’ēl wəlō’-’^aḥēl ’eṯ-šēm-qāḏəšî ‘wōḏ wəyāḏə‘û hagwōyim kî-’ănî yəhwâ qāḏwōš bəyiśərā’ēl:

8 hinnēh ḇā’â wənihəyāṯâ nə’um ’ăḏōnāy yəhwih hû’ hayywōm ’ăšer dibarətî:

9 wəyāṣə’û yōšəḇê| ‘ārê yiśərā’ēl ûḇi‘ărû wəhiśśîqû bənešeq ûmāḡēn wəṣinnâ bəqešeṯ ûḇəḥiṣṣîm ûḇəmaqqēl yāḏ ûḇərōm^aḥ ûḇi‘ărû ḇâem ’ēš šeḇ^a‘ šānîm:

10 wəlō’-yiśə’û ‘ēṣîm min-haśśāḏeh wəlō’ y^aḥəṭəḇû min-hayyə‘ārîm kî ḇannešeq yəḇ^a‘ărû-’ēš wəšāləlû ’eṯ-šōləlêhem ûḇāzəzû ’eṯ-bōzəzêhem nə’um ’ăḏōnāy yəhwih: s

11 wəhāyâ ḇayywōm hahû’ ’etēn ləḡwōḡ| məqwōm-šām qeḇer bəyiśərā’ēl gê hā‘ōḇərîm qiḏəmaṯ hayyām wəḥōsemeṯ hî’ ’eṯ-hā‘ōḇərîm wəqāḇərû šām ’eṯ-gwōḡ wə’eṯ-kāl-hămwōnōh^q wəqārə’û gê’ hămwōn gwōḡ:

12 ûqəḇārûm bêṯ yiśərā’ēl ləm^a‘an ṭahēr ’eṯ-hā’āreṣ šiḇə‘â ḥŏḏāšîm:

13 wəqāḇərû kāl-‘am hā’āreṣ wəhāyâ lâem ləšēm ywōm hikāḇəḏî nə’um ’ăḏōnāy yəhwih:

14 wə’anəšê ṯāmîḏ yaḇədîlû ‘ōḇərîm bā’āreṣ məqabərîm ’eṯ-hā‘ōḇərîm ’eṯ-hannwōṯārîm ‘al-pənê hā’āreṣ ləṭahărāh miqəṣēh šiḇə‘â-ḥŏḏāšîm y^aḥəqōrû:

15 wə‘āḇərû hā‘ōḇərîm bā’āreṣ wərā’â ‘eṣem ’āḏām ûḇānâ ’eṣəlwō ṣîyûn ‘aḏ qāḇərû ’ōṯwō haməqabərîm ’el-gê’ hămwōn gwōḡ:

16 wəḡam šem-‘îr hămwōnâ wəṭihărû hā’āreṣ: s

17 wə’atâ ḇen-’āḏām kōh-’āmar| ’ăḏōnāy yəhwōih ’ĕmōr ləṣipwōr kāl-kānāf ûləḵōl| ḥayyaṯ haśśāḏeh hiqqāḇəṣû wāḇō’û hē’āsəfû missāḇîḇ ‘al-ziḇəḥî ’ăšer ’ănî zōḇēḥa lāḵem zeḇ^aḥ gāḏwōl ‘al hārê yiśərā’ēl wa’ăḵalətem bāśār ûšəṯîṯem dām:

18 bəśar gibwōrîm tō’ḵēlû wəḏam-nəśî’ê hā’āreṣ tišətû ’êlîm kārîm wə‘atûḏîm pārîm mərî’ê ḇāšān kullām:

19 wa’ăḵalətem-ḥēleḇ ləśāḇə‘â ûšəṯîṯem dām ləšikārwōn mizziḇəḥî ’ăšer-zāḇ^aḥətî lāḵem:

20 ûśəḇ^a‘ətem ‘al-šuləḥānî sûs wāreḵeḇ gibwōr wəḵāl-’îš miləḥāmâ nə’um ’ăḏōnāy yəhwih:

21 wənāṯatî ’eṯ-kəḇwōḏî bagwōyim wərā’û ḵāl-hagwōyim ’eṯ-mišəpāṭî ’ăšer ‘āśîṯî wə’eṯ-yāḏî ’ăšer-śamətî ḇâem:

22 wəyāḏə‘û bêṯ yiśərā’ēl kî ’ănî yəhwâ ’ĕlōhêhem min-hayywōm hahû’ wâālə’â:

23 wəyāḏə‘û hagwōyim kî ḇ^a‘ăwōnām gālû ḇêṯ-yiśərā’ēl ‘al ’ăšer mā‘ălû-ḇî wā’asətir pānay mēhem wā’etənēm bəyaḏ ṣārêhem wayyipəlû ḇ^aḥereḇ kullām:

24 kəṭumə’āṯām ûḵəfišə‘êhem ‘āśîṯî ’ōṯām wā’asətir pānay mēhem: s

25 lāḵēn kōh ’āmar ’ăḏōnāy yəhwih ‘atâ ’āšîḇ ’eṯ-šəḇîṯ šəḇûṯ y^a‘ăqōḇ wəriḥamətî kāl-bêṯ yiśərā’ēl wəqinnē’ṯî ləšēm qāḏəšî:

26 wənāśû ’eṯ-kəlimmāṯām wə’eṯ-kāl-m^a‘ălām ’ăšer mā‘ălû-ḇî bəšiḇətām ‘al-’aḏəmāṯām lāḇeṭ^aḥ wə’ên m^aḥărîḏ:

27 bəšwōḇəḇî ’wōṯām min-hā‘ammîm wəqibaṣətî ’ōṯām mē’arəṣwōṯ ’ōyəḇêhem wəniqədašətî ḇām lə‘ênê hagwōyim rabîm:

28 wəyāḏə‘û kî ’ănî yəhwâ ’ĕlōhêhem bəhaḡəlwōṯî ’ōṯām ’el-hagwōyim wəḵinnasətîm ‘al-’aḏəmāṯām wəlō’-’wōṯîr ‘wōḏ mēhem šām:

29 wəlō’-’asətîr ‘wōḏ pānay mēhem ’ăšer šāfaḵətî ’eṯ-rûḥî ‘al-bêṯ yiśərā’ēl nə’um ’ăḏōnāy yəhwih: f