‎1 ‏וּבְהַפִּֽילְכֶ֨ם אֶת־הָאָ֜רֶץ בְּנַחֲלָ֗ה תָּרִימוּ֩ תְרוּמָ֨ה לַיהוָ֥ה׀ קֹדֶשׁ֮ מִן־הָאָרֶץ֒ אֹ֗רֶךְ חֲמִשָּׁ֨ה וְעֶשְׂרִ֥ים אֶ֙לֶף֙ אֹ֔רֶךְ וְרֹ֖חַב עֲשָׂ֣רָה אָ֑לֶף קֹדֶשׁ־ה֥וּא בְכָל־גְּבוּלָ֖הּ סָבִֽיב׃

‎2 ‏יִהְיֶ֤ה מִזֶּה֙ אֶל־הַקֹּ֔דֶשׁ חֲמֵ֥שׁ מֵא֛וֹת בַּחֲמֵ֥שׁ מֵא֖וֹת מְרֻבָּ֣ע סָבִ֑יב וַחֲמִשִּׁ֣ים אַמָּ֔ה מִגְרָ֥שׁ ל֖וֹ סָבִֽיב׃

‎3 ‏וּמִן־הַמִּדָּ֤ה הַזֹּאת֙ תָּמ֔וֹד אֹ֗רֶךְ חמש חֲמִשָּׁ֤ה וְעֶשְׂרִים֙ אֶ֔לֶף וְרֹ֖חַב עֲשֶׂ֣רֶת אֲלָפִ֑ים וּבֽוֹ־יִהְיֶ֥ה הַמִּקְדָּ֖שׁ קֹ֥דֶשׁ קָדָשִֽׁים׃

‎4 ‏קֹ֣דֶשׁ מִן־הָאָ֜רֶץ ה֗וּא לַכֹּ֨הֲנִ֜ים מְשָׁרְתֵ֤י הַמִּקְדָּשׁ֙ יִֽהְיֶ֔ה הַקְּרֵבִ֖ים לְשָׁרֵ֣ת אֶת־יְהוָ֑ה וְהָיָ֨ה לָהֶ֤ם מָקוֹם֙ לְבָ֣תִּ֔ים וּמִקְדָּ֖שׁ לַמִּקְדָּֽשׁ׃

‎5 ‏וַחֲמִשָּׁ֨ה וְעֶשְׂרִ֥ים אֶ֙לֶף֙ אֹ֔רֶךְ וַעֲשֶׂ֥רֶת אֲלָפִ֖ים רֹ֑חַב יהיה וְֽהָיָ֡ה לַלְוִיִּם֩ מְשָׁרְתֵ֨י הַבַּ֧יִת לָהֶ֛ם לַאֲחֻזָּ֖ה עֶשְׂרִ֥ים לְשָׁכֹֽת׃

‎6 ‏וַאֲחֻזַּ֨ת הָעִ֜יר תִּתְּנ֗וּ חֲמֵ֤שֶׁת אֲלָפִים֙ רֹ֔חַב וְאֹ֗רֶךְ חֲמִשָּׁ֤ה וְעֶשְׂרִים֙ אֶ֔לֶף לְעֻמַּ֖ת תְּרוּמַ֣ת הַקֹּ֑דֶשׁ לְכָל־בֵּ֥ית יִשְׂרָאֵ֖ל יִהְיֶֽה׃

‎7 ‏וְלַנָּשִׂ֡יא מִזֶּ֣ה וּמִזֶּה֩ לִתְרוּמַ֨ת הַקֹּ֜דֶשׁ וְלַאֲחֻזַּ֣ת הָעִ֗יר אֶל־פְּנֵ֤י תְרֽוּמַת־הַקֹּ֙דֶשׁ֙ וְאֶל־פְּנֵי֙ אֲחֻזַּ֣ת הָעִ֔יר מִפְּאַת־יָ֣ם יָ֔מָּה וּמִפְּאַת־קֵ֖דְמָה קָדִ֑ימָה וְאֹ֗רֶךְ לְעֻמּוֹת֙ אַחַ֣ד הַחֲלָקִ֔ים מִגְּב֥וּל יָ֖ם אֶל־גְּב֥וּל קָדִֽימָה׃

‎8 ‏לָאָ֛רֶץ יִֽהְיֶה־לּ֥וֹ לַֽאֲחֻזָּ֖ה בְּיִשְׂרָאֵ֑ל וְלֹא־יוֹנ֨וּ ע֤וֹד נְשִׂיאַי֙ אֶת־עַמִּ֔י וְהָאָ֛רֶץ יִתְּנ֥וּ לְבֵֽית־יִשְׂרָאֵ֖ל לְשִׁבְטֵיהֶֽם׃ ס

‎9 ‏כֹּֽה־אָמַ֞ר אֲדֹנָ֣י יְהוִ֗ה רַב־לָכֶם֙ נְשִׂיאֵ֣י יִשְׂרָאֵ֔ל חָמָ֤ס וָשֹׁד֙ הָסִ֔ירוּ וּמִשְׁפָּ֥ט וּצְדָקָ֖ה עֲשׂ֑וּ הָרִ֤ימוּ גְרֻשֹֽׁתֵיכֶם֙ מֵעַ֣ל עַמִּ֔י נְאֻ֖ם אֲדֹנָ֥י יְהוִֽה׃

‎10 ‏מֹֽאזְנֵי־צֶ֧דֶק וְאֵֽיפַת־צֶ֛דֶק וּבַת־צֶ֖דֶק יְהִ֥י לָכֶֽם׃

‎11 ‏הָאֵיפָ֣ה וְהַבַּ֗ת תֹּ֤כֶן אֶחָד֙ יִֽהְיֶ֔ה לָשֵׂ֕את מַעְשַׂ֥ר הַחֹ֖מֶר הַבָּ֑ת וַעֲשִׂירִ֤ת הַחֹ֙מֶר֙ הָֽאֵיפָ֔ה אֶל־הַחֹ֖מֶר יִהְיֶ֥ה מַתְכֻּנְתּֽוֹ׃

‎12 ‏וְהַשֶּׁ֖קֶל עֶשְׂרִ֣ים גֵּרָ֑ה עֶשְׂרִ֨ים שְׁקָלִ֜ים חֲמִשָּׁ֧ה וְעֶשְׂרִ֣ים שְׁקָלִ֗ים עֲשָׂרָ֤ה וַחֲמִשָּׁה֙ שֶׁ֔קֶל הַמָּנֶ֖ה יִֽהְיֶ֥ה לָכֶֽם׃

‎13 ‏זֹ֥את הַתְּרוּמָ֖ה אֲשֶׁ֣ר תָּרִ֑ימוּ שִׁשִּׁ֤ית הָֽאֵיפָה֙ מֵחֹ֣מֶר הַֽחִטִּ֔ים וְשִׁשִּׁיתֶם֙ הָֽאֵיפָ֔ה מֵחֹ֖מֶר הַשְּׂעֹרִֽים׃

‎14 ‏וְחֹ֨ק הַשֶּׁ֜מֶן הַבַּ֣ת הַשֶּׁ֗מֶן מַעְשַׂ֤ר הַבַּת֙ מִן־הַכֹּ֔ר עֲשֶׂ֥רֶת הַבַּתִּ֖ים חֹ֑מֶר כִּֽי־עֲשֶׂ֥רֶת הַבַּתִּ֖ים חֹֽמֶר׃

‎15 ‏וְשֶׂה־אַחַ֨ת מִן־הַצֹּ֤אן מִן־הַמָּאתַ֙יִם֙ מִמַּשְׁקֵ֣ה יִשְׂרָאֵ֔ל לְמִנְחָ֖ה וּלְעוֹלָ֣ה וְלִשְׁלָמִ֑ים לְכַפֵּ֣ר עֲלֵיהֶ֔ם נְאֻ֖ם אֲדֹנָ֥י יְהוִֽה׃

‎16 ‏כֹּ֚ל הָעָ֣ם הָאָ֔רֶץ יִהְי֖וּ אֶל־הַתְּרוּמָ֣ה הַזֹּ֑את לַנָּשִׂ֖יא בְּיִשְׂרָאֵֽל׃

‎17 ‏וְעַֽל־הַנָּשִׂ֣יא יִהְיֶ֗ה הָעוֹל֣וֹת וְהַמִּנְחָה֮ וְהַנֵּסֶךְ֒ בַּחַגִּ֤ים וּבֶחֳדָשִׁים֙ וּבַשַּׁבָּת֔וֹת בְּכָֽל־מוֹעֲדֵ֖י בֵּ֣ית יִשְׂרָאֵ֑ל הֽוּא־יַעֲשֶׂ֞ה אֶת־הַחַטָּ֣את וְאֶת־הַמִּנְחָ֗ה וְאֶת־הָֽעוֹלָה֙ וְאֶת־הַשְּׁלָמִ֔ים לְכַפֵּ֖ר בְּעַ֥ד בֵּֽית־יִשְׂרָאֵֽל׃ ס

‎18 ‏כֹּה־אָמַר֮ אֲדֹנָ֣י יְהוִה֒ בָּֽרִאשׁוֹן֙ בְּאֶחָ֣ד לַחֹ֔דֶשׁ תִּקַּ֥ח פַּר־בֶּן־בָּקָ֖ר תָּמִ֑ים וְחִטֵּאתָ֖ אֶת־הַמִּקְדָּֽשׁ׃

‎19 ‏וְלָקַ֨ח הַכֹּהֵ֜ן מִדַּ֣ם הַחַטָּ֗את וְנָתַן֙ אֶל־מְזוּזַ֣ת הַבַּ֔יִת וְאֶל־אַרְבַּ֛ע פִּנּ֥וֹת הָעֲזָרָ֖ה לַמִּזְבֵּ֑חַ וְעַ֨ל־מְזוּזַ֔ת שַׁ֖עַר הֶחָצֵ֥ר הַפְּנִימִֽית׃

‎20 ‏וְכֵ֤ן תַּֽעֲשֶׂה֙ בְּשִׁבְעָ֣ה בַחֹ֔דֶשׁ מֵאִ֥ישׁ שֹׁגֶ֖ה וּמִפֶּ֑תִי וְכִפַּרְתֶּ֖ם אֶת־הַבָּֽיִת׃

‎21 ‏בָּ֠רִאשׁוֹן בְּאַרְבָּעָ֨ה עָשָׂ֥ר יוֹם֙ לַחֹ֔דֶשׁ יִהְיֶ֥ה לָכֶ֖ם הַפָּ֑סַח חָ֕ג שְׁבֻע֣וֹת יָמִ֔ים מַצּ֖וֹת יֵאָכֵֽל׃

‎22 ‏וְעָשָׂ֤ה הַנָּשִׂיא֙ בַּיּ֣וֹם הַה֔וּא בַּעֲד֕וֹ וּבְעַ֖ד כָּל־עַ֣ם הָאָ֑רֶץ פַּ֖ר חַטָּֽאת׃

‎23 ‏וְשִׁבְעַ֨ת יְמֵֽי־הֶחָ֜ג יַעֲשֶׂ֧ה עוֹלָ֣ה לַֽיהוָ֗ה שִׁבְעַ֣ת פָּ֠רִים וְשִׁבְעַ֨ת אֵילִ֤ים תְּמִימִם֙ לַיּ֔וֹם שִׁבְעַ֖ת הַיָּמִ֑ים וְחַטָּ֕את שְׂעִ֥יר עִזִּ֖ים לַיּֽוֹם׃

‎24 ‏וּמִנְחָ֗ה אֵיפָ֥ה לַפָּ֛ר וְאֵיפָ֥ה לָאַ֖יִל יַֽעֲשֶׂ֑ה וְשֶׁ֖מֶן הִ֥ין לָאֵיפָֽה׃

‎25 ‏בַּשְּׁבִיעִ֡י בַּחֲמִשָּׁה֩ עָשָׂ֨ר י֤וֹם לַחֹ֙דֶשׁ֙ בֶּחָ֔ג יַעֲשֶׂ֥ה כָאֵ֖לֶּה שִׁבְעַ֣ת הַיָּמִ֑ים כַּֽחַטָּאת֙ כָּעֹלָ֔ה וְכַמִּנְחָ֖ה וְכַשָּֽׁמֶן׃ ס

1 ûḇəhapîləḵem ’eṯ-hā’āreṣ bən^aḥălâ tārîmû ṯərûmâ layhwâ| qōḏeš min-hā’āreṣ ’ōreḵə ḥămiššâ wə‘eśərîm ’elef ’ōreḵə wərōḥaḇ ‘ăśārâ ’ālef qōḏeš-hû’ ḇəḵāl-gəḇûlāh sāḇîḇ:

2 yihəyeh mizzeh ’el-haqqōḏeš ḥămēš mē’wōṯ b^aḥămēš mē’wōṯ mərubā‘ sāḇîḇ w^aḥămiššîm ’ammâ miḡərāš lwō sāḇîḇ:

3 ûmin-hammidâ hazzō’ṯ tāmwōḏ ’ōreḵə ḥāmēš ḥămiššâ wə‘eśərîm ’elef wərōḥaḇ ‘ăśereṯ ’ălāfîm ûḇwō-yihəyeh hammiqədāš qōḏeš qāḏāšîm:

4 qōḏeš min-hā’āreṣ hû’ lakōhănîm məšārəṯê hammiqədāš yihəyeh haqqərēḇîm ləšārēṯ ’eṯ-yəhwâ wəhāyâ lâem māqwōm ləḇātîm ûmiqədāš lammiqədāš:

5 w^aḥămiššâ wə‘eśərîm ’elef ’ōreḵə w^a‘ăśereṯ ’ălāfîm rōḥaḇ yihəyeh wəhāyâ laləwîyim məšārəṯê habayiṯ lâem la’ăḥuzzâ ‘eśərîm ləšāḵōṯ:

6 wa’ăḥuzzaṯ hā‘îr titənû ḥămēšeṯ ’ălāfîm rōḥaḇ wə’ōreḵə ḥămiššâ wə‘eśərîm ’elef lə‘ummaṯ tərûmaṯ haqqōḏeš ləḵāl-bêṯ yiśərā’ēl yihəyeh:

7 wəlannāśî’ mizzeh ûmizzeh liṯərûmaṯ haqqōḏeš wəla’ăḥuzzaṯ hā‘îr ’el-pənê ṯərûmaṯ-haqqōḏeš wə’el-pənê ’ăḥuzzaṯ hā‘îr mipə’aṯ-yām yāmmâ ûmipə’aṯ-qēḏəmâ qāḏîmâ wə’ōreḵə lə‘ummwōṯ ’^aḥaḏ h^aḥălāqîm migəḇûl yām ’el-gəḇûl qāḏîmâ:

8 lā’āreṣ yihəyeh-llwō la’ăḥuzzâ bəyiśərā’ēl wəlō’-ywōnû ‘wōḏ nəśî’ay ’eṯ-‘ammî wəhā’āreṣ yitənû ləḇêṯ-yiśərā’ēl ləšiḇəṭêhem: s

9 kōh-’āmar ’ăḏōnāy yəhwih raḇ-lāḵem nəśî’ê yiśərā’ēl ḥāmās wāšōḏ hāsîrû ûmišəpāṭ ûṣəḏāqâ ‘ăśû hārîmû ḡərušōṯêḵem mē‘al ‘ammî nə’um ’ăḏōnāy yəhwih:

10 mō’zənê-ṣeḏeq wə’êfaṯ-ṣeḏeq ûḇaṯ-ṣeḏeq yəhî lāḵem:

11 hā’êfâ wəhabaṯ tōḵen ’eḥāḏ yihəyeh lāśē’ṯ m^a‘əśar h^aḥōmer habāṯ w^a‘ăśîriṯ h^aḥōmer hā’êfâ ’el-h^aḥōmer yihəyeh maṯəkunətwō:

12 wəhaššeqel ‘eśərîm gērâ ‘eśərîm šəqālîm ḥămiššâ wə‘eśərîm šəqālîm ‘ăśārâ w^aḥămiššâ šeqel hammāneh yihəyeh lāḵem:

13 zō’ṯ hatərûmâ ’ăšer tārîmû šiššîṯ hā’êfâ mēḥōmer h^aḥiṭṭîm wəšiššîṯem hā’êfâ mēḥōmer haśśə‘ōrîm:

14 wəḥōq haššemen habaṯ haššemen m^a‘əśar habaṯ min-hakōr ‘ăśereṯ habatîm ḥōmer kî-‘ăśereṯ habatîm ḥōmer:

15 wəśeh-’^aḥaṯ min-haṣṣō’n min-hammā’ṯayim mimmašəqēh yiśərā’ēl ləminəḥâ ûlə‘wōlâ wəlišəlāmîm ləḵapēr ‘ălêhem nə’um ’ăḏōnāy yəhwih:

16 kōl hā‘ām hā’āreṣ yihəyû ’el-hatərûmâ hazzō’ṯ lannāśî’ bəyiśərā’ēl:

17 wə‘al-hannāśî’ yihəyeh hā‘wōlwōṯ wəhamminəḥâ wəhannēseḵə b^aḥagîm ûḇeḥŏḏāšîm ûḇaššabāṯwōṯ bəḵāl-mwō‘ăḏê bêṯ yiśərā’ēl hû’-y^a‘ăśeh ’eṯ-h^aḥaṭṭā’ṯ wə’eṯ-hamminəḥâ wə’eṯ-hā‘wōlâ wə’eṯ-haššəlāmîm ləḵapēr bə‘aḏ bêṯ-yiśərā’ēl: s

18 kōh-’āmar ’ăḏōnāy yəhwih bāri’šwōn bə’eḥāḏ l^aḥōḏeš tiqq^aḥ par-ben-bāqār tāmîm wəḥiṭṭē’ṯā ’eṯ-hammiqədāš:

19 wəlāq^aḥ hakōhēn midam h^aḥaṭṭā’ṯ wənāṯan ’el-məzûzaṯ habayiṯ wə’el-’arəb^a‘ pinnwōṯ hā‘ăzārâ lammizəbēḥa wə‘al-məzûzaṯ š^a‘ar heḥāṣēr hapənîmîṯ:

20 wəḵēn t^a‘ăśeh bəšiḇə‘â ḇ^aḥōḏeš mē’îš šōḡeh ûmipeṯî wəḵiparətem ’eṯ-habāyiṯ:

21 bāri’šwōn bə’arəbā‘â ‘āśār ywōm l^aḥōḏeš yihəyeh lāḵem hapās^aḥ ḥāḡ šəḇu‘wōṯ yāmîm maṣṣwōṯ yē’āḵēl:

22 wə‘āśâ hannāśî’ bayywōm hahû’ b^a‘ăḏwō ûḇə‘aḏ kāl-‘am hā’āreṣ par ḥaṭṭā’ṯ:

23 wəšiḇə‘aṯ yəmê-heḥāḡ y^a‘ăśeh ‘wōlâ layhwâ šiḇə‘aṯ pārîm wəšiḇə‘aṯ ’êlîm təmîmim layywōm šiḇə‘aṯ hayyāmîm wəḥaṭṭā’ṯ śə‘îr ‘izzîm layywōm:

24 ûminəḥâ ’êfâ lapār wə’êfâ lā’ayil y^a‘ăśeh wəšemen hîn lā’êfâ:

25 baššəḇî‘î b^aḥămiššâ ‘āśār ywōm l^aḥōḏeš beḥāḡ y^a‘ăśeh ḵā’ēlleh šiḇə‘aṯ hayyāmîm k^aḥaṭṭā’ṯ kā‘ōlâ wəḵamminəḥâ wəḵaššāmen: s