‎1 ‏וַיְהִי֙ כִּֽי־זָקֵ֣ן יִצְחָ֔ק וַתִּכְהֶ֥יןָ עֵינָ֖יו מֵרְאֹ֑ת וַיִּקְרָ֞א אֶת־עֵשָׂ֣ו׀ בְּנ֣וֹ הַגָּדֹ֗ל וַיֹּ֤אמֶר אֵלָיו֙ בְּנִ֔י וַיֹּ֥אמֶר אֵלָ֖יו הִנֵּֽנִי׃

‎2 ‏וַיֹּ֕אמֶר הִנֵּה־נָ֖א זָקַ֑נְתִּי לֹ֥א יָדַ֖עְתִּי י֥וֹם מוֹתִֽי׃

‎3 ‏וְעַתָּה֙ שָׂא־נָ֣א כֵלֶ֔יךָ תֶּלְיְךָ֖ וְקַשְׁתֶּ֑ךָ וְצֵא֙ הַשָּׂדֶ֔ה וְצ֥וּדָה לִּ֖י צידה צָֽיִד׃

‎4 ‏וַעֲשֵׂה־לִ֨י מַטְעַמִּ֜ים כַּאֲשֶׁ֥ר אָהַ֛בְתִּי וְהָבִ֥יאָה לִּ֖י וְאֹכֵ֑לָה בַּעֲב֛וּר תְּבָרֶכְךָ֥ נַפְשִׁ֖י בְּטֶ֥רֶם אָמֽוּת׃

‎5 ‏וְרִבְקָ֣ה שֹׁמַ֔עַת בְּדַבֵּ֣ר יִצְחָ֔ק אֶל־עֵשָׂ֖ו בְּנ֑וֹ וַיֵּ֤לֶךְ עֵשָׂו֙ הַשָּׂדֶ֔ה לָצ֥וּד צַ֖יִד לְהָבִֽיא׃

‎6 ‏וְרִבְקָה֙ אָֽמְרָ֔ה אֶל־יַעֲקֹ֥ב בְּנָ֖הּ לֵאמֹ֑ר הִנֵּ֤ה שָׁמַ֙עְתִּי֙ אֶת־אָבִ֔יךָ מְדַבֵּ֛ר אֶל־עֵשָׂ֥ו אָחִ֖יךָ לֵאמֹֽר׃

‎7 ‏הָבִ֨יאָה לִּ֥י צַ֛יִד וַעֲשֵׂה־לִ֥י מַטְעַמִּ֖ים וְאֹכֵ֑לָה וַאֲבָרֶכְכָ֛ה לִפְנֵ֥י יְהוָ֖ה לִפְנֵ֥י מוֹתִֽי׃

‎8 ‏וְעַתָּ֥ה בְנִ֖י שְׁמַ֣ע בְּקֹלִ֑י לַאֲשֶׁ֥ר אֲנִ֖י מְצַוָּ֥ה אֹתָֽךְ׃

‎9 ‏לֶךְ־נָא֙ אֶל־הַצֹּ֔אן וְקַֽח־לִ֣י מִשָּׁ֗ם שְׁנֵ֛י גְּדָיֵ֥י עִזִּ֖ים טֹבִ֑ים וְאֶֽעֱשֶׂ֨ה אֹתָ֧ם מַטְעַמִּ֛ים לְאָבִ֖יךָ כַּאֲשֶׁ֥ר אָהֵֽב׃

‎10 ‏וְהֵבֵאתָ֥ לְאָבִ֖יךָ וְאָכָ֑ל בַּעֲבֻ֛ר אֲשֶׁ֥ר יְבָרֶכְךָ֖ לִפְנֵ֥י מוֹתֽוֹ׃

‎11 ‏וַיֹּ֣אמֶר יַעֲקֹ֔ב אֶל־רִבְקָ֖ה אִמּ֑וֹ הֵ֣ן עֵשָׂ֤ו אָחִי֙ אִ֣ישׁ שָׂעִ֔ר וְאָנֹכִ֖י אִ֥ישׁ חָלָֽק׃

‎12 ‏אוּלַ֤י יְמֻשֵּׁ֙נִי֙ אָבִ֔י וְהָיִ֥יתִי בְעֵינָ֖יו כִּמְתַעְתֵּ֑עַ וְהֵבֵאתִ֥י עָלַ֛י קְלָלָ֖ה וְלֹ֥א בְרָכָֽה׃

‎13 ‏וַתֹּ֤אמֶר לוֹ֙ אִמּ֔וֹ עָלַ֥י קִלְלָתְךָ֖ בְּנִ֑י אַ֛ךְ שְׁמַ֥ע בְּקֹלִ֖י וְלֵ֥ךְ קַֽח־לִֽי׃

‎14 ‏וַיֵּ֙לֶךְ֙ וַיִּקַּ֔ח וַיָּבֵ֖א לְאִמּ֑וֹ וַתַּ֤עַשׂ אִמּוֹ֙ מַטְעַמִּ֔ים כַּאֲשֶׁ֖ר אָהֵ֥ב אָבִֽיו׃

‎15 ‏וַתִּקַּ֣ח רִ֠בְקָה אֶת־בִּגְדֵ֨י עֵשָׂ֜ו בְּנָ֤הּ הַגָּדֹל֙ הַחֲמֻדֹ֔ת אֲשֶׁ֥ר אִתָּ֖הּ בַּבָּ֑יִת וַתַּלְבֵּ֥שׁ אֶֽת־יַעֲקֹ֖ב בְּנָ֥הּ הַקָּטָֽן׃

‎16 ‏וְאֵ֗ת עֹרֹת֙ גְּדָיֵ֣י הָֽעִזִּ֔ים הִלְבִּ֖ישָׁה עַל־יָדָ֑יו וְעַ֖ל חֶלְקַ֥ת צַוָּארָֽיו׃

‎17 ‏וַתִּתֵּ֧ן אֶת־הַמַּטְעַמִּ֛ים וְאֶת־הַלֶּ֖חֶם אֲשֶׁ֣ר עָשָׂ֑תָה בְּיַ֖ד יַעֲקֹ֥ב בְּנָֽהּ׃

‎18 ‏וַיָּבֹ֥א אֶל־אָבִ֖יו וַיֹּ֣אמֶר³ אָבִ֑י וַיֹּ֣אמֶר הִנֶּ֔נִּי מִ֥י אַתָּ֖ה בְּנִֽי׃

‎19 ‏וַיֹּ֨אמֶר יַעֲקֹ֜ב אֶל־אָבִ֗יו אָנֹכִי֙ עֵשָׂ֣ו בְּכֹרֶ֔ךָ עָשִׂ֕יתִי כַּאֲשֶׁ֥ר דִּבַּ֖רְתָּ אֵלָ֑י קֽוּם־נָ֣א שְׁבָ֗ה וְאָכְלָה֙ מִצֵּידִ֔י בַּעֲב֖וּר תְּבָרֲכַ֥נִּי נַפְשֶֽׁךָ׃

‎20 ‏וַיֹּ֤אמֶר יִצְחָק֙ אֶל־בְּנ֔וֹ מַה־זֶּ֛ה מִהַ֥רְתָּ לִמְצֹ֖א בְּנִ֑י וַיֹּ֕אמֶר כִּ֥י הִקְרָ֛ה יְהוָ֥ה אֱלֹהֶ֖יךָ לְפָנָֽי׃

‎21 ‏וַיֹּ֤אמֶר יִצְחָק֙ אֶֽל־יַעֲקֹ֔ב גְּשָׁה־נָּ֥א וַאֲמֻֽשְׁךָ֖ בְּנִ֑י הַֽאַתָּ֥ה זֶ֛ה בְּנִ֥י עֵשָׂ֖ו אִם־לֹֽא׃

‎22 ‏וַיִּגַּ֧שׁ יַעֲקֹ֛ב אֶל־יִצְחָ֥ק אָבִ֖יו וַיְמֻשֵּׁ֑הוּ וַיֹּ֗אמֶר הַקֹּל֙ ק֣וֹל יַעֲקֹ֔ב וְהַיָּדַ֖יִם יְדֵ֥י עֵשָֽׂו׃

‎23 ‏וְלֹ֣א הִכִּיר֔וֹ כִּֽי־הָי֣וּ יָדָ֗יו כִּידֵ֛י עֵשָׂ֥ו אָחִ֖יו שְׂעִרֹ֑ת וַֽיְבָרְכֵֽהוּ׃

‎24 ‏וַיֹּ֕אמֶר אַתָּ֥ה זֶ֖ה בְּנִ֣י עֵשָׂ֑ו וַיֹּ֖אמֶר אָֽנִי׃

‎25 ‏וַיֹּ֗אמֶר הַגִּ֤שָׁה לִּי֙ וְאֹֽכְלָה֙ מִצֵּ֣יד בְּנִ֔י לְמַ֥עַן תְּבָֽרֶכְךָ֖ נַפְשִׁ֑י וַיַּגֶּשׁ־לוֹ֙ וַיֹּאכַ֔ל וַיָּ֧בֵא ל֦וֹ יַ֖יִן וַיֵּֽשְׁתְּ׃

‎26 ‏וַיֹּ֥אמֶר אֵלָ֖יו יִצְחָ֣ק אָבִ֑יו גְּשָׁה־נָּ֥א וּשְׁקָה־לִּ֖י בְּנִֽי׃

‎27 ‏וַיִּגַּשׁ֙ וַיִּשַּׁק־ל֔וֹ וַיָּ֛רַח אֶת־רֵ֥יחַ בְּגָדָ֖יו וַֽיְבָרֲכֵ֑הוּ וַיֹּ֗אמֶר רְאֵה֙ רֵ֣יחַ בְּנִ֔י כְּרֵ֣יחַ שָׂדֶ֔ה אֲשֶׁ֥ר בֵּרֲכ֖וֹ יְהוָֽה׃

‎28 ‏וְיִֽתֶּן־לְךָ֙ הָאֱלֹהִ֔ים מִטַּל֙ הַשָּׁמַ֔יִם וּמִשְׁמַנֵּ֖י הָאָ֑רֶץ וְרֹ֥ב דָּגָ֖ן וְתִירֹֽשׁ׃

‎29 ‏יַֽעַבְד֣וּךָ עַמִּ֗ים וישתחו וְיִֽשְׁתַּחֲו֤וּ לְךָ֙ לְאֻמִּ֔ים הֱוֵ֤ה גְבִיר֙ לְאַחֶ֔יךָ וְיִשְׁתַּחֲוּ֥וּ¹ לְךָ֖ בְּנֵ֣י אִמֶּ֑ךָ אֹרְרֶ֣יךָ אָר֔וּר וּֽמְבָרֲכֶ֖יךָ בָּרֽוּךְ׃

‎30 ‏וַיְהִ֗י כַּאֲשֶׁ֨ר כִּלָּ֣ה יִצְחָק֮ לְבָרֵ֣ךְ אֶֽת־יַעֲקֹב֒ וַיְהִ֗י אַ֣ךְ יָצֹ֤א יָצָא֙ יַעֲקֹ֔ב מֵאֵ֥ת פְּנֵ֖י יִצְחָ֣ק אָבִ֑יו וְעֵשָׂ֣ו אָחִ֔יו בָּ֖א מִצֵּידֽוֹ׃

‎31 ‏וַיַּ֤עַשׂ גַּם־הוּא֙ מַטְעַמִּ֔ים וַיָּבֵ֖א לְאָבִ֑יו וַיֹּ֣אמֶר לְאָבִ֗יו יָקֻ֤ם אָבִי֙ וְיֹאכַל֙ מִצֵּ֣יד בְּנ֔וֹ בַּעֲב֖וּר תְּבָרֲכַ֥נִּי נַפְשֶֽׁךָ׃

‎32 ‏וַיֹּ֥אמֶר ל֛וֹ יִצְחָ֥ק אָבִ֖יו מִי־אָ֑תָּה וַיֹּ֕אמֶר אֲנִ֛י בִּנְךָ֥ בְכֹֽרְךָ֖ עֵשָֽׂו׃

‎33 ‏וַיֶּחֱרַ֨ד יִצְחָ֣ק חֲרָדָה֮ גְּדֹלָ֣ה עַד־מְאֹד֒ וַיֹּ֡אמֶר מִֽי־אֵפ֡וֹא ה֣וּא הַצָּֽד־צַיִד֩ וַיָּ֨בֵא לִ֜י וָאֹכַ֥ל מִכֹּ֛ל בְּטֶ֥רֶם תָּב֖וֹא וָאֲבָרֲכֵ֑הוּ גַּם־בָּר֖וּךְ יִהְיֶֽה׃

‎34 ‏כִּשְׁמֹ֤עַ עֵשָׂו֙ אֶת־דִּבְרֵ֣י אָבִ֔יו וַיִּצְעַ֣ק צְעָקָ֔ה גְּדֹלָ֥ה וּמָרָ֖ה עַד־מְאֹ֑ד וַיֹּ֣אמֶר לְאָבִ֔יו בָּרֲכֵ֥נִי גַם־אָ֖נִי אָבִֽי׃

‎35 ‏וַיֹּ֕אמֶר בָּ֥א אָחִ֖יךָ בְּמִרְמָ֑ה וַיִּקַּ֖ח בִּרְכָתֶֽךָ׃

‎36 ‏וַיֹּ֡אמֶר הֲכִי֩ קָרָ֨א שְׁמ֜וֹ יַעֲקֹ֗ב וַֽיַּעְקְבֵ֙נִי֙ זֶ֣ה פַעֲמַ֔יִם אֶת־בְּכֹרָתִ֣י לָקָ֔ח וְהִנֵּ֥ה עַתָּ֖ה לָקַ֣ח בִּרְכָתִ֑י וַיֹּאמַ֕ר הֲלֹא־אָצַ֥לְתָּ לִּ֖י בְּרָכָֽה׃

‎37 ‏וַיַּ֨עַן יִצְחָ֜ק וַיֹּ֣אמֶר לְעֵשָׂ֗ו הֵ֣ן גְּבִ֞יר שַׂמְתִּ֥יו לָךְ֙ וְאֶת־כָּל־אֶחָ֗יו נָתַ֤תִּי לוֹ֙ לַעֲבָדִ֔ים וְדָגָ֥ן וְתִירֹ֖שׁ סְמַכְתִּ֑יו וּלְכָ֣ה אֵפ֔וֹא מָ֥ה אֶֽעֱשֶׂ֖ה בְּנִֽי׃

‎38 ‏וַיֹּ֨אמֶר עֵשָׂ֜ו אֶל־אָבִ֗יו הַֽבְרָכָ֨ה אַחַ֤ת הִֽוא־לְךָ֙ אָבִ֔י בָּרֲכֵ֥נִי גַם־אָ֖נִי אָבִ֑י וַיִּשָּׂ֥א עֵשָׂ֛ו קֹל֖וֹ וַיֵּֽבְךְּ׃

‎39 ‏וַיַּ֛עַן יִצְחָ֥ק אָבִ֖יו וַיֹּ֣אמֶר אֵלָ֑יו הִנֵּ֞ה מִשְׁמַנֵּ֤י הָאָ֙רֶץ֙ יִהְיֶ֣ה מֽוֹשָׁבֶ֔ךָ וּמִטַּ֥ל הַשָּׁמַ֖יִם מֵעָֽל׃

‎40 ‏וְעַל־חַרְבְּךָ֣ תִֽחְיֶ֔ה וְאֶת־אָחִ֖יךָ תַּעֲבֹ֑ד וְהָיָה֙ כַּאֲשֶׁ֣ר תָּרִ֔יד וּפָרַקְתָּ֥ עֻלּ֖וֹ מֵעַ֥ל צַוָּארֶֽךָ׃

‎41 ‏וַיִּשְׂטֹ֤ם עֵשָׂו֙ אֶֽת־יַעֲקֹ֔ב עַל־הַ֨בְּרָכָ֔ה אֲשֶׁ֥ר בֵּרֲכ֖וֹ אָבִ֑יו וַיֹּ֨אמֶר עֵשָׂ֜ו בְּלִבּ֗וֹ יִקְרְבוּ֙ יְמֵי֙ אֵ֣בֶל אָבִ֔י וְאַֽהַרְגָ֖ה אֶת־יַעֲקֹ֥ב אָחִֽי׃

‎42 ‏וַיֻּגַּ֣ד לְרִבְקָ֔ה אֶת־דִּבְרֵ֥י עֵשָׂ֖ו בְּנָ֣הּ הַגָּדֹ֑ל וַתִּשְׁלַ֞ח וַתִּקְרָ֤א לְיַעֲקֹב֙ בְּנָ֣הּ הַקָּטָ֔ן וַתֹּ֣אמֶר אֵלָ֔יו הִנֵּה֙ עֵשָׂ֣ו אָחִ֔יךָ מִתְנַחֵ֥ם לְךָ֖ לְהָרְגֶֽךָ׃

‎43 ‏וְעַתָּ֥ה בְנִ֖י שְׁמַ֣ע בְּקֹלִ֑י וְק֧וּם בְּרַח־לְךָ֛ אֶל־לָבָ֥ן אָחִ֖י חָרָֽנָה׃

‎44 ‏וְיָשַׁבְתָּ֥ עִמּ֖וֹ יָמִ֣ים אֲחָדִ֑ים עַ֥ד אֲשֶׁר־תָּשׁ֖וּב חֲמַ֥ת אָחִֽיךָ׃

‎45 ‏עַד־שׁ֨וּב אַף־אָחִ֜יךָ מִמְּךָ֗ וְשָׁכַח֙ אֵ֣ת אֲשֶׁר־עָשִׂ֣יתָ לּ֔וֹ וְשָׁלַחְתִּ֖י וּלְקַחְתִּ֣יךָ מִשָּׁ֑ם לָמָ֥ה אֶשְׁכַּ֛ל גַּם־שְׁנֵיכֶ֖ם י֥וֹם אֶחָֽד׃

‎46 ‏וַתֹּ֤אמֶר רִבְקָה֙ אֶל־יִצְחָ֔ק קַ֣צְתִּי בְחַיַּ֔י מִפְּנֵ֖י בְּנ֣וֹת חֵ֑ת אִם־לֹקֵ֣חַ יַ֠עֲקֹב אִשָּׁ֨ה מִבְּנֽוֹת־חֵ֤ת כָּאֵ֙לֶּה֙ מִבְּנ֣וֹת הָאָ֔רֶץ לָ֥מָּה לִּ֖י חַיִּֽים׃

1 wayəhî kî-zāqēn yiṣəḥāq watiḵəheynā ‘ênāyw mērə’ōṯ wayyiqərā’ ’eṯ-‘ēśāw| bənwō hagāḏōl wayyō’mer ’ēlāyw bənî wayyō’mer ’ēlāyw hinnēnî:

2 wayyō’mer hinnēh-nā’ zāqanətî lō’ yāḏ^a‘ətî ywōm mwōṯî:

3 wə‘atâ śā’-nā’ ḵēleyḵā teləyəḵā wəqašəteḵā wəṣē’ haśśāḏeh wəṣûḏâ llî ṣêḏâ ṣāyiḏ:

4 w^a‘ăśēh-lî maṭə‘ammîm ka’ăšer ’âaḇətî wəhāḇî’â llî wə’ōḵēlâ b^a‘ăḇûr təḇāreḵəḵā nafəšî bəṭerem ’āmûṯ:

5 wəriḇəqâ šōm^a‘aṯ bəḏabēr yiṣəḥāq ’el-‘ēśāw bənwō wayyēleḵə ‘ēśāw haśśāḏeh lāṣûḏ ṣayiḏ ləhāḇî’:

6 wəriḇəqâ ’āmərâ ’el-y^a‘ăqōḇ bənāh lē’mōr hinnēh šām^a‘ətî ’eṯ-’āḇîḵā məḏabēr ’el-‘ēśāw ’āḥîḵā lē’mōr:

7 hāḇî’â llî ṣayiḏ w^a‘ăśēh-lî maṭə‘ammîm wə’ōḵēlâ wa’ăḇāreḵəḵâ lifənê yəhwâ lifənê mwōṯî:

8 wə‘atâ ḇənî šəm^a‘ bəqōlî la’ăšer ’ănî məṣaûâ ’ōṯāḵə:

9 leḵə-nā’ ’el-haṣṣō’n wəq^aḥ-lî miššām šənê gəḏāyê ‘izzîm ṭōḇîm wə’e‘ĕśeh ’ōṯām maṭə‘ammîm lə’āḇîḵā ka’ăšer ’âēḇ:

10 wəhēḇē’ṯā lə’āḇîḵā wə’āḵāl b^a‘ăḇur ’ăšer yəḇāreḵəḵā lifənê mwōṯwō:

11 wayyō’mer y^a‘ăqōḇ ’el-riḇəqâ ’immwō hēn ‘ēśāw ’āḥî ’îš śā‘ir wə’ānōḵî ’îš ḥālāq:

12 ’ûlay yəmuššēnî ’āḇî wəhāyîṯî ḇə‘ênāyw kiməṯ^a‘ətē‘a wəhēḇē’ṯî ‘ālay qəlālâ wəlō’ ḇərāḵâ:

13 watō’mer lwō ’immwō ‘ālay qiləlāṯəḵā bənî ’aḵə šəm^a‘ bəqōlî wəlēḵə q^aḥ-lî:

14 wayyēleḵə wayyiqq^aḥ wayyāḇē’ lə’immwō wat^a‘aś ’immwō maṭə‘ammîm ka’ăšer ’âēḇ ’āḇîw:

15 watiqq^aḥ riḇəqâ ’eṯ-biḡəḏê ‘ēśāw bənāh hagāḏōl h^aḥămuḏōṯ ’ăšer ’itāh babāyiṯ wataləbēš ’eṯ-y^a‘ăqōḇ bənāh haqqāṭān:

16 wə’ēṯ ‘ōrōṯ gəḏāyê hā‘izzîm hiləbîšâ ‘al-yāḏāyw wə‘al ḥeləqaṯ ṣaûā’rāyw:

17 watitēn ’eṯ-hammaṭə‘ammîm wə’eṯ-halleḥem ’ăšer ‘āśāṯâ bəyaḏ y^a‘ăqōḇ bənāh:

18 wayyāḇō’ ’el-’āḇîw wayyō’mer³ ’āḇî wayyō’mer hinnennî mî ’atâ bənî:

19 wayyō’mer y^a‘ăqōḇ ’el-’āḇîw ’ānōḵî ‘ēśāw bəḵōreḵā ‘āśîṯî ka’ăšer dibarətā ’ēlāy qûm-nā’ šəḇâ wə’āḵəlâ miṣṣêḏî b^a‘ăḇûr təḇārăḵannî nafəšeḵā:

20 wayyō’mer yiṣəḥāq ’el-bənwō mah-zzeh miharətā liməṣō’ bənî wayyō’mer kî hiqərâ yəhwâ ’ĕlōheyḵā ləfānāy:

21 wayyō’mer yiṣəḥāq ’el-y^a‘ăqōḇ gəšâ-nnā’ wa’ămušəḵā bənî ha’atâ zeh bənî ‘ēśāw ’im-lō’:

22 wayyigaš y^a‘ăqōḇ ’el-yiṣəḥāq ’āḇîw wayəmuššēhû wayyō’mer haqqōl qwōl y^a‘ăqōḇ wəhayyāḏayim yəḏê ‘ēśāw:

23 wəlō’ hikîrwō kî-hāyû yāḏāyw kîḏê ‘ēśāw ’āḥîw śə‘irōṯ wayəḇārəḵēhû:

24 wayyō’mer ’atâ zeh bənî ‘ēśāw wayyō’mer ’ānî:

25 wayyō’mer hagišâ llî wə’ōḵəlâ miṣṣêḏ bənî ləm^a‘an təḇāreḵəḵā nafəšî wayyageš-lwō wayyō’ḵal wayyāḇē’ lwō yayin wayyēšətə:

26 wayyō’mer ’ēlāyw yiṣəḥāq ’āḇîw gəšâ-nnā’ ûšəqâ-llî bənî:

27 wayyigaš wayyiššaq-lwō wayyār^aḥ ’eṯ-rêḥa bəḡāḏāyw wayəḇārăḵēhû wayyō’mer rə’ēh rêḥa bənî kərêḥa śāḏeh ’ăšer bērăḵwō yəhwâ:

28 wəyiten-ləḵā hā’ĕlōhîm miṭṭal haššāmayim ûmišəmannê hā’āreṣ wərōḇ dāḡān wəṯîrōš:

29 y^a‘aḇəḏûḵā ‘ammîm wəyišət^aḥû wəyišət^aḥăwû ləḵā lə’ummîm hĕwēh ḡəḇîr lə’^aḥeyḵā wəyišət^aḥăûû¹ ləḵā bənê ’immeḵā ’ōrəreyḵā ’ārûr ûməḇārăḵeyḵā bārûḵə:

30 wayəhî ka’ăšer killâ yiṣəḥāq ləḇārēḵə ’eṯ-y^a‘ăqōḇ wayəhî ’aḵə yāṣō’ yāṣā’ y^a‘ăqōḇ mē’ēṯ pənê yiṣəḥāq ’āḇîw wə‘ēśāw ’āḥîw bā’ miṣṣêḏwō:

31 wayy^a‘aś gam-hû’ maṭə‘ammîm wayyāḇē’ lə’āḇîw wayyō’mer lə’āḇîw yāqum ’āḇî wəyō’ḵal miṣṣêḏ bənwō b^a‘ăḇûr təḇārăḵannî nafəšeḵā:

32 wayyō’mer lwō yiṣəḥāq ’āḇîw mî-’ātâ wayyō’mer ’ănî binəḵā ḇəḵōrəḵā ‘ēśāw:

33 wayyeḥĕraḏ yiṣəḥāq ḥărāḏâ gəḏōlâ ‘aḏ-mə’ōḏ wayyō’mer mî-’ēfwō’ hû’ haṣṣāḏ-ṣayiḏ wayyāḇē’ lî wā’ōḵal mikōl bəṭerem tāḇwō’ wā’ăḇārăḵēhû gam-bārûḵə yihəyeh:

34 kišəmō‘a ‘ēśāw ’eṯ-diḇərê ’āḇîw wayyiṣə‘aq ṣə‘āqâ gəḏōlâ ûmārâ ‘aḏ-mə’ōḏ wayyō’mer lə’āḇîw bārăḵēnî ḡam-’ānî ’āḇî:

35 wayyō’mer bā’ ’āḥîḵā bəmirəmâ wayyiqq^aḥ birəḵāṯeḵā:

36 wayyō’mer hăḵî qārā’ šəmwō y^a‘ăqōḇ wayy^a‘əqəḇēnî zeh f^a‘ămayim ’eṯ-bəḵōrāṯî lāqāḥ wəhinnēh ‘atâ lāq^aḥ birəḵāṯî wayyō’mar hălō’-’āṣalətā llî bərāḵâ:

37 wayy^a‘an yiṣəḥāq wayyō’mer lə‘ēśāw hēn gəḇîr śamətîw lāḵə wə’eṯ-kāl-’eḥāyw nāṯatî lwō l^a‘ăḇāḏîm wəḏāḡān wəṯîrōš səmaḵətîw ûləḵâ ’ēfwō’ mâ ’e‘ĕśeh bənî:

38 wayyō’mer ‘ēśāw ’el-’āḇîw haḇərāḵâ ’^aḥaṯ hiw’-ləḵā ’āḇî bārăḵēnî ḡam-’ānî ’āḇî wayyiśśā’ ‘ēśāw qōlwō wayyēḇəḵḵə:

39 wayy^a‘an yiṣəḥāq ’āḇîw wayyō’mer ’ēlāyw hinnēh mišəmannê hā’āreṣ yihəyeh mwōšāḇeḵā ûmiṭṭal haššāmayim mē‘āl:

40 wə‘al-ḥarəbəḵā ṯiḥəyeh wə’eṯ-’āḥîḵā t^a‘ăḇōḏ wəhāyâ ka’ăšer tārîḏ ûfāraqətā ‘ullwō mē‘al ṣaûā’reḵā:

41 wayyiśəṭōm ‘ēśāw ’eṯ-y^a‘ăqōḇ ‘al-habərāḵâ ’ăšer bērăḵwō ’āḇîw wayyō’mer ‘ēśāw bəlibwō yiqərəḇû yəmê ’ēḇel ’āḇî wə’aharəḡâ ’eṯ-y^a‘ăqōḇ ’āḥî:

42 wayyugaḏ ləriḇəqâ ’eṯ-diḇərê ‘ēśāw bənāh hagāḏōl watišəl^aḥ watiqərā’ ləy^a‘ăqōḇ bənāh haqqāṭān watō’mer ’ēlāyw hinnēh ‘ēśāw ’āḥîḵā miṯən^aḥēm ləḵā ləhārəḡeḵā:

43 wə‘atâ ḇənî šəm^a‘ bəqōlî wəqûm bər^aḥ-ləḵā ’el-lāḇān ’āḥî ḥārānâ:

44 wəyāšaḇətā ‘immwō yāmîm ’ăḥāḏîm ‘aḏ ’ăšer-tāšûḇ ḥămaṯ ’āḥîḵā:

45 ‘aḏ-šûḇ ’af-’āḥîḵā mimməḵā wəšāḵ^aḥ ’ēṯ ’ăšer-‘āśîṯā llwō wəšāl^aḥətî ûləq^aḥətîḵā miššām lāmâ ’ešəkal gam-šənêḵem ywōm ’eḥāḏ:

46 watō’mer riḇəqâ ’el-yiṣəḥāq qaṣətî ḇəḥayyay mipənê bənwōṯ ḥēṯ ’im-lōqēḥa y^a‘ăqōḇ ’iššâ mibənwōṯ-ḥēṯ kā’ēlleh mibənwōṯ hā’āreṣ lāmmâ llî ḥayyîm: