‎1 ‏וַיַּ֣רְא יַעֲקֹ֔ב כִּ֥י יֶשׁ־שֶׁ֖בֶר בְּמִצְרָ֑יִם וַיֹּ֤אמֶר יַעֲקֹב֙ לְבָנָ֔יו לָ֖מָּה תִּתְרָאֽוּ׃

‎2 ‏וַיֹּ֕אמֶר הִנֵּ֣ה שָׁמַ֔עְתִּי כִּ֥י יֶשׁ־שֶׁ֖בֶר בְּמִצְרָ֑יִם רְדוּ־שָׁ֙מָּה֙ וְשִׁבְרוּ־לָ֣נוּ מִשָּׁ֔ם וְנִחְיֶ֖ה וְלֹ֥א נָמֽוּת׃

‎3 ‏וַיֵּרְד֥וּ אֲחֵֽי־יוֹסֵ֖ף עֲשָׂרָ֑ה לִשְׁבֹּ֥ר בָּ֖ר מִמִּצְרָֽיִם׃

‎4 ‏וְאֶת־בִּנְיָמִין֙ אֲחִ֣י יוֹסֵ֔ף לֹא־שָׁלַ֥ח יַעֲקֹ֖ב אֶת־אֶחָ֑יו כִּ֣י אָמַ֔ר פֶּן־יִקְרָאֶ֖נּוּ אָסֽוֹן׃

‎5 ‏וַיָּבֹ֙אוּ֙ בְּנֵ֣י יִשְׂרָאֵ֔ל לִשְׁבֹּ֖ר בְּת֣וֹךְ הַבָּאִ֑ים כִּֽי־הָיָ֥ה הָרָעָ֖ב בְּאֶ֥רֶץ כְּנָֽעַן׃

‎6 ‏וְיוֹסֵ֗ף ה֚וּא³ הַשַּׁלִּ֣יט עַל־הָאָ֔רֶץ ה֥וּא הַמַּשְׁבִּ֖יר לְכָל־עַ֣ם הָאָ֑רֶץ וַיָּבֹ֙אוּ֙ אֲחֵ֣י יוֹסֵ֔ף וַיִּשְׁתַּֽחֲווּ־ל֥וֹ אַפַּ֖יִם אָֽרְצָה׃

‎7 ‏וַיַּ֥רְא יוֹסֵ֛ף אֶת־אֶחָ֖יו וַיַּכִּרֵ֑ם וַיִּתְנַכֵּ֨ר אֲלֵיהֶ֜ם וַיְדַבֵּ֧ר אִתָּ֣ם קָשׁ֗וֹת וַיֹּ֤אמֶר אֲלֵהֶם֙ מֵאַ֣יִן בָּאתֶ֔ם וַיֹּ֣אמְר֔וּ מֵאֶ֥רֶץ כְּנַ֖עַן לִשְׁבָּר־אֹֽכֶל׃

‎8 ‏וַיַּכֵּ֥ר יוֹסֵ֖ף אֶת־אֶחָ֑יו וְהֵ֖ם לֹ֥א הִכִּרֻֽהוּ׃

‎9 ‏וַיִּזְכֹּ֣ר יוֹסֵ֔ף אֵ֚ת הַחֲלֹמ֔וֹת אֲשֶׁ֥ר חָלַ֖ם לָהֶ֑ם וַיֹּ֤אמֶר אֲלֵהֶם֙ מְרַגְּלִ֣ים אַתֶּ֔ם לִרְא֛וֹת אֶת־עֶרְוַ֥ת הָאָ֖רֶץ בָּאתֶֽם׃

‎10 ‏וַיֹּאמְר֥וּ אֵלָ֖יו לֹ֣א אֲדֹנִ֑י וַעֲבָדֶ֥יךָ בָּ֖אוּ לִשְׁבָּר־אֹֽכֶל׃

‎11 ‏כֻּלָּ֕נוּ בְּנֵ֥י אִישׁ־אֶחָ֖ד נָ֑חְנוּ כֵּנִ֣ים אֲנַ֔חְנוּ לֹא־הָי֥וּ עֲבָדֶ֖יךָ מְרַגְּלִֽים׃

‎12 ‏וַיֹּ֖אמֶר אֲלֵהֶ֑ם לֹ֕א כִּֽי־עֶרְוַ֥ת הָאָ֖רֶץ בָּאתֶ֥ם לִרְאֽוֹת׃

‎13 ‏וַיֹּאמְר֗וּ שְׁנֵ֣ים עָשָׂר֩ עֲבָדֶ֨יךָ אַחִ֧ים׀ אֲנַ֛חְנוּ בְּנֵ֥י אִישׁ־אֶחָ֖ד בְּאֶ֣רֶץ כְּנָ֑עַן וְהִנֵּ֨ה הַקָּטֹ֤ן אֶת־אָבִ֙ינוּ֙ הַיּ֔וֹם וְהָאֶחָ֖ד אֵינֶֽנּוּ׃

‎14 ‏וַיֹּ֥אמֶר אֲלֵהֶ֖ם יוֹסֵ֑ף ה֗וּא אֲשֶׁ֨ר דִּבַּ֧רְתִּי אֲלֵכֶ֛ם לֵאמֹ֖ר מְרַגְּלִ֥ים אַתֶּֽם׃

‎15 ‏בְּזֹ֖את תִּבָּחֵ֑נוּ חֵ֤י פַרְעֹה֙ אִם־תֵּצְא֣וּ מִזֶּ֔ה כִּ֧י אִם־בְּב֛וֹא אֲחִיכֶ֥ם הַקָּטֹ֖ן הֵֽנָּה׃

‎16 ‏שִׁלְח֨וּ מִכֶּ֣ם אֶחָד֮ וְיִקַּ֣ח אֶת־אֲחִיכֶם֒ וְאַתֶּם֙ הֵאָ֣סְר֔וּ וְיִבָּֽחֲנוּ֙ דִּבְרֵיכֶ֔ם הַֽאֱמֶ֖ת אִתְּכֶ֑ם וְאִם־לֹ֕א חֵ֣י פַרְעֹ֔ה כִּ֥י מְרַגְּלִ֖ים אַתֶּֽם׃

‎17 ‏וַיֶּאֱסֹ֥ף אֹתָ֛ם אֶל־מִשְׁמָ֖ר שְׁלֹ֥שֶׁת יָמִֽים׃

‎18 ‏וַיֹּ֨אמֶר אֲלֵהֶ֤ם יוֹסֵף֙ בַּיּ֣וֹם הַשְּׁלִישִׁ֔י זֹ֥את עֲשׂ֖וּ וִֽחְי֑וּ אֶת־הָאֱלֹהִ֖ים אֲנִ֥י יָרֵֽא׃

‎19 ‏אִם־כֵּנִ֣ים אַתֶּ֔ם אֲחִיכֶ֣ם אֶחָ֔ד יֵאָסֵ֖ר בְּבֵ֣ית מִשְׁמַרְכֶ֑ם וְאַתֶּם֙ לְכ֣וּ הָבִ֔יאוּ שֶׁ֖בֶר רַעֲב֥וֹן בָּתֵּיכֶֽם׃

‎20 ‏וְאֶת־אֲחִיכֶ֤ם הַקָּטֹן֙ תָּבִ֣יאוּ אֵלַ֔י וְיֵאָמְנ֥וּ דִבְרֵיכֶ֖ם וְלֹ֣א תָמ֑וּתוּ וַיַּעֲשׂוּ־כֵֽן׃

‎21 ‏וַיֹּאמְר֞וּ אִ֣ישׁ אֶל־אָחִ֗יו אֲבָל֮ אֲשֵׁמִ֣ים׀ אֲנַחְנוּ֮ עַל־אָחִינוּ֒ אֲשֶׁ֨ר רָאִ֜ינוּ צָרַ֥ת נַפְשׁ֛וֹ בְּהִתְחַֽנְנ֥וֹ אֵלֵ֖ינוּ וְלֹ֣א שָׁמָ֑עְנוּ עַל־כֵּן֙ בָּ֣אָה אֵלֵ֔ינוּ הַצָּרָ֖ה הַזֹּֽאת׃

‎22 ‏וַיַּעַן֩ רְאוּבֵ֨ן אֹתָ֜ם לֵאמֹ֗ר הֲלוֹא֩ אָמַ֨רְתִּי אֲלֵיכֶ֧ם׀ לֵאמֹ֛ר אַל־תֶּחֶטְא֥וּ בַיֶּ֖לֶד וְלֹ֣א שְׁמַעְתֶּ֑ם וְגַם־דָּמ֖וֹ הִנֵּ֥ה נִדְרָֽשׁ׃

‎23 ‏וְהֵם֙ לֹ֣א יָֽדְע֔וּ כִּ֥י שֹׁמֵ֖עַ יוֹסֵ֑ף כִּ֥י הַמֵּלִ֖יץ בֵּינֹתָֽם׃

‎24 ‏וַיִּסֹּ֥ב מֵֽעֲלֵיהֶ֖ם וַיֵּ֑בְךְּ וַיָּ֤שָׁב אֲלֵהֶם֙ וַיְדַבֵּ֣ר אֲלֵהֶ֔ם וַיִּקַּ֤ח מֵֽאִתָּם֙ אֶת־שִׁמְע֔וֹן וַיֶּאֱסֹ֥ר אֹת֖וֹ לְעֵינֵיהֶֽם׃

‎25 ‏וַיְצַ֣ו יוֹסֵ֗ף וַיְמַלְא֣וּ אֶת־כְּלֵיהֶם֮ בָּר֒ וּלְהָשִׁ֤יב כַּסְפֵּיהֶם֙ אִ֣ישׁ אֶל־שַׂקּ֔וֹ וְלָתֵ֥ת לָהֶ֛ם צֵדָ֖ה לַדָּ֑רֶךְ וַיַּ֥עַשׂ לָהֶ֖ם כֵּֽן׃

‎26 ‏וַיִּשְׂא֥וּ אֶת־שִׁבְרָ֖ם עַל־חֲמֹרֵיהֶ֑ם וַיֵּלְכ֖וּ מִשָּֽׁם׃

‎27 ‏וַיִּפְתַּ֨ח הָאֶחָ֜ד אֶת־שַׂקּ֗וֹ לָתֵ֥ת מִסְפּ֛וֹא לַחֲמֹר֖וֹ בַּמָּל֑וֹן וַיַּרְא֙ אֶת־כַּסְפּ֔וֹ וְהִנֵּה־ה֖וּא בְּפִ֥י אַמְתַּחְתּֽוֹ׃

‎28 ‏וַיֹּ֤אמֶר אֶל־אֶחָיו֙ הוּשַׁ֣ב כַּסְפִּ֔י וְגַ֖ם הִנֵּ֣ה בְאַמְתַּחְתִּ֑י וַיֵּצֵ֣א לִבָּ֗ם וַיֶּֽחֶרְד֞וּ אִ֤ישׁ אֶל־אָחִיו֙ לֵאמֹ֔ר מַה־זֹּ֛את עָשָׂ֥ה אֱלֹהִ֖ים לָֽנוּ׃

‎29 ‏וַיָּבֹ֛אוּ אֶל־יַעֲקֹ֥ב אֲבִיהֶ֖ם אַ֣רְצָה כְּנָ֑עַן וַיַּגִּ֣ידוּ ל֔וֹ אֵ֛ת כָּל־הַקֹּרֹ֥ת אֹתָ֖ם לֵאמֹֽר׃

‎30 ‏דִּ֠בֶּר הָאִ֨ישׁ אֲדֹנֵ֥י הָאָ֛רֶץ אִתָּ֖נוּ קָשׁ֑וֹת וַיִּתֵּ֣ן אֹתָ֔נוּ כִּֽמְרַגְּלִ֖ים אֶת־הָאָֽרֶץ׃

‎31 ‏וַנֹּ֥אמֶר אֵלָ֖יו כֵּנִ֣ים אֲנָ֑חְנוּ לֹ֥א הָיִ֖ינוּ מְרַגְּלִֽים׃

‎32 ‏שְׁנֵים־עָשָׂ֥ר אֲנַ֛חְנוּ אַחִ֖ים בְּנֵ֣י אָבִ֑ינוּ הָאֶחָ֣ד אֵינֶ֔נּוּ וְהַקָּטֹ֥ן הַיּ֛וֹם אֶת־אָבִ֖ינוּ בְּאֶ֥רֶץ כְּנָֽעַן׃

‎33 ‏וַיֹּ֣אמֶר אֵלֵ֗ינוּ הָאִישׁ֙ אֲדֹנֵ֣י הָאָ֔רֶץ בְּזֹ֣את אֵדַ֔ע כִּ֥י כֵנִ֖ים אַתֶּ֑ם אֲחִיכֶ֤ם הָֽאֶחָד֙ הַנִּ֣יחוּ אִתִּ֔י וְאֶת־רַעֲב֥וֹן בָּתֵּיכֶ֖ם קְח֥וּ וָלֵֽכוּ׃

‎34 ‏וְ֠הָבִיאוּ אֶת־אֲחִיכֶ֣ם הַקָּטֹן֮ אֵלַי֒ וְאֵֽדְעָ֗ה כִּ֣י לֹ֤א מְרַגְּלִים֙ אַתֶּ֔ם כִּ֥י כֵנִ֖ים אַתֶּ֑ם אֶת־אֲחִיכֶם֙ אֶתֵּ֣ן לָכֶ֔ם וְאֶת־הָאָ֖רֶץ תִּסְחָֽרוּ׃

‎35 ‏וַיְהִ֗י הֵ֚ם מְרִיקִ֣ים שַׂקֵּיהֶ֔ם וְהִנֵּה־אִ֥ישׁ צְרוֹר־כַּסְפּ֖וֹ בְּשַׂקּ֑וֹ וַיִּרְא֞וּ אֶת־צְרֹר֧וֹת כַּסְפֵּיהֶ֛ם הֵ֥מָּה וַאֲבִיהֶ֖ם וַיִּירָֽאוּ׃

‎36 ‏וַיֹּ֤אמֶר אֲלֵהֶם֙ יַעֲקֹ֣ב אֲבִיהֶ֔ם אֹתִ֖י שִׁכַּלְתֶּ֑ם יוֹסֵ֤ף אֵינֶ֙נּוּ֙ וְשִׁמְע֣וֹן אֵינֶ֔נּוּ וְאֶת־בִּנְיָמִ֣ן תִּקָּ֔חוּ עָלַ֖י הָי֥וּ כֻלָּֽנָה׃

‎37 ‏וַיֹּ֤אמֶר רְאוּבֵן֙ אֶל־אָבִ֣יו לֵאמֹ֔ר אֶת־שְׁנֵ֤י בָנַי֙ תָּמִ֔ית אִם־לֹ֥א אֲבִיאֶ֖נּוּ אֵלֶ֑יךָ תְּנָ֤ה אֹתוֹ֙ עַל־יָדִ֔י וַאֲנִ֖י אֲשִׁיבֶ֥נּוּ אֵלֶֽיךָ׃

‎38 ‏וַיֹּ֕אמֶר לֹֽא־יֵרֵ֥ד בְּנִ֖י עִמָּכֶ֑ם כִּֽי־אָחִ֨יו מֵ֜ת וְה֧וּא לְבַדּ֣וֹ נִשְׁאָ֗ר וּקְרָאָ֤הוּ אָסוֹן֙ בַּדֶּ֙רֶךְ֙ אֲשֶׁ֣ר תֵּֽלְכוּ־בָ֔הּ וְהוֹרַדְתֶּ֧ם אֶת־שֵׂיבָתִ֛י בְּיָג֖וֹן שְׁאֽוֹלָה׃

1 wayyarə’ y^a‘ăqōḇ kî yeš-šeḇer bəmiṣərāyim wayyō’mer y^a‘ăqōḇ ləḇānāyw lāmmâ tiṯərā’û:

2 wayyō’mer hinnēh šām^a‘ətî kî yeš-šeḇer bəmiṣərāyim rəḏû-šāmmâ wəšiḇərû-lānû miššām wəniḥəyeh wəlō’ nāmûṯ:

3 wayyērəḏû ’ăḥê-ywōsēf ‘ăśārâ lišəbōr bār mimmiṣərāyim:

4 wə’eṯ-binəyāmîn ’ăḥî ywōsēf lō’-šāl^aḥ y^a‘ăqōḇ ’eṯ-’eḥāyw kî ’āmar pen-yiqərā’ennû ’āswōn:

5 wayyāḇō’û bənê yiśərā’ēl lišəbōr bəṯwōḵə habā’îm kî-hāyâ hārā‘āḇ bə’ereṣ kənā‘an:

6 wəywōsēf hû’³ haššallîṭ ‘al-hā’āreṣ hû’ hammašəbîr ləḵāl-‘am hā’āreṣ wayyāḇō’û ’ăḥê ywōsēf wayyišət^aḥăwû-lwō ’apayim ’ārəṣâ:

7 wayyarə’ ywōsēf ’eṯ-’eḥāyw wayyakirēm wayyiṯənakēr ’ălêhem wayəḏabēr ’itām qāšwōṯ wayyō’mer ’ălēhem mē’ayin bā’ṯem wayyō’mərû mē’ereṣ kən^a‘an lišəbār-’ōḵel:

8 wayyakēr ywōsēf ’eṯ-’eḥāyw wəhēm lō’ hikiruhû:

9 wayyizəkōr ywōsēf ’ēṯ h^aḥălōmwōṯ ’ăšer ḥālam lâem wayyō’mer ’ălēhem məragəlîm ’atem lirə’wōṯ ’eṯ-‘erəwaṯ hā’āreṣ bā’ṯem:

10 wayyō’mərû ’ēlāyw lō’ ’ăḏōnî w^a‘ăḇāḏeyḵā bā’û lišəbār-’ōḵel:

11 kullānû bənê ’îš-’eḥāḏ nāḥənû kēnîm ’ăn^aḥənû lō’-hāyû ‘ăḇāḏeyḵā məragəlîm:

12 wayyō’mer ’ălēhem lō’ kî-‘erəwaṯ hā’āreṣ bā’ṯem lirə’wōṯ:

13 wayyō’mərû šənêm ‘āśār ‘ăḇāḏeyḵā ’^aḥîm| ’ăn^aḥənû bənê ’îš-’eḥāḏ bə’ereṣ kənā‘an wəhinnēh haqqāṭōn ’eṯ-’āḇînû hayywōm wəhā’eḥāḏ ’ênennû:

14 wayyō’mer ’ălēhem ywōsēf hû’ ’ăšer dibarətî ’ălēḵem lē’mōr məragəlîm ’atem:

15 bəzō’ṯ tibāḥēnû ḥê farə‘ōh ’im-tēṣə’û mizzeh kî ’im-bəḇwō’ ’ăḥîḵem haqqāṭōn hēnnâ:

16 šiləḥû mikem ’eḥāḏ wəyiqq^aḥ ’eṯ-’ăḥîḵem wə’atem hē’āsərû wəyibāḥănû diḇərêḵem ha’ĕmeṯ ’itəḵem wə’im-lō’ ḥê farə‘ōh kî məragəlîm ’atem:

17 wayye’ĕsōf ’ōṯām ’el-mišəmār šəlōšeṯ yāmîm:

18 wayyō’mer ’ălēhem ywōsēf bayywōm haššəlîšî zō’ṯ ‘ăśû wiḥəyû ’eṯ-hā’ĕlōhîm ’ănî yārē’:

19 ’im-kēnîm ’atem ’ăḥîḵem ’eḥāḏ yē’āsēr bəḇêṯ mišəmarəḵem wə’atem ləḵû hāḇî’û šeḇer r^a‘ăḇwōn bātêḵem:

20 wə’eṯ-’ăḥîḵem haqqāṭōn tāḇî’û ’ēlay wəyē’āmənû ḏiḇərêḵem wəlō’ ṯāmûṯû wayy^a‘ăśû-ḵēn:

21 wayyō’mərû ’îš ’el-’āḥîw ’ăḇāl ’ăšēmîm| ’ăn^aḥənû ‘al-’āḥînû ’ăšer rā’înû ṣāraṯ nafəšwō bəhiṯəḥanənwō ’ēlênû wəlō’ šāmā‘ənû ‘al-kēn bā’â ’ēlênû haṣṣārâ hazzō’ṯ:

22 wayy^a‘an rə’ûḇēn ’ōṯām lē’mōr hălwō’ ’āmarətî ’ălêḵem| lē’mōr ’al-teḥeṭə’û ḇayyeleḏ wəlō’ šəm^a‘ətem wəḡam-dāmwō hinnēh niḏərāš:

23 wəhēm lō’ yāḏə‘û kî šōmē‘a ywōsēf kî hammēlîṣ bênōṯām:

24 wayyissōḇ mē‘ălêhem wayyēḇəḵḵə wayyāšāḇ ’ălēhem wayəḏabēr ’ălēhem wayyiqq^aḥ mē’itām ’eṯ-šimə‘wōn wayye’ĕsōr ’ōṯwō lə‘ênêhem:

25 wayəṣaw ywōsēf wayəmalə’û ’eṯ-kəlêhem bār ûləhāšîḇ kasəpêhem ’îš ’el-śaqqwō wəlāṯēṯ lâem ṣēḏâ ladāreḵə wayy^a‘aś lâem kēn:

26 wayyiśə’û ’eṯ-šiḇərām ‘al-ḥămōrêhem wayyēləḵû miššām:

27 wayyifət^aḥ hā’eḥāḏ ’eṯ-śaqqwō lāṯēṯ misəpwō’ l^aḥămōrwō bammālwōn wayyarə’ ’eṯ-kasəpwō wəhinnēh-hû’ bəfî ’amət^aḥətwō:

28 wayyō’mer ’el-’eḥāyw hûšaḇ kasəpî wəḡam hinnēh ḇə’amət^aḥətî wayyēṣē’ libām wayyeḥerəḏû ’îš ’el-’āḥîw lē’mōr mah-zzō’ṯ ‘āśâ ’ĕlōhîm lānû:

29 wayyāḇō’û ’el-y^a‘ăqōḇ ’ăḇîhem ’arəṣâ kənā‘an wayyagîḏû lwō ’ēṯ kāl-haqqōrōṯ ’ōṯām lē’mōr:

30 diber hā’îš ’ăḏōnê hā’āreṣ ’itānû qāšwōṯ wayyitēn ’ōṯānû kiməragəlîm ’eṯ-hā’āreṣ:

31 wannō’mer ’ēlāyw kēnîm ’ănāḥənû lō’ hāyînû məragəlîm:

32 šənêm-‘āśār ’ăn^aḥənû ’^aḥîm bənê ’āḇînû hā’eḥāḏ ’ênennû wəhaqqāṭōn hayywōm ’eṯ-’āḇînû bə’ereṣ kənā‘an:

33 wayyō’mer ’ēlênû hā’îš ’ăḏōnê hā’āreṣ bəzō’ṯ ’ēḏ^a‘ kî ḵēnîm ’atem ’ăḥîḵem hā’eḥāḏ hannîḥû ’itî wə’eṯ-r^a‘ăḇwōn bātêḵem qəḥû wālēḵû:

34 wəhāḇî’û ’eṯ-’ăḥîḵem haqqāṭōn ’ēlay wə’ēḏə‘â kî lō’ məragəlîm ’atem kî ḵēnîm ’atem ’eṯ-’ăḥîḵem ’etēn lāḵem wə’eṯ-hā’āreṣ tisəḥārû:

35 wayəhî hēm mərîqîm śaqqêhem wəhinnēh-’îš ṣərwōr-kasəpwō bəśaqqwō wayyirə’û ’eṯ-ṣərōrwōṯ kasəpêhem hēmmâ wa’ăḇîhem wayyîrā’û:

36 wayyō’mer ’ălēhem y^a‘ăqōḇ ’ăḇîhem ’ōṯî šikalətem ywōsēf ’ênennû wəšimə‘wōn ’ênennû wə’eṯ-binəyāmin tiqqāḥû ‘ālay hāyû ḵullānâ:

37 wayyō’mer rə’ûḇēn ’el-’āḇîw lē’mōr ’eṯ-šənê ḇānay tāmîṯ ’im-lō’ ’ăḇî’ennû ’ēleyḵā tənâ ’ōṯwō ‘al-yāḏî wa’ănî ’ăšîḇennû ’ēleyḵā:

38 wayyō’mer lō’-yērēḏ bənî ‘immāḵem kî-’āḥîw mēṯ wəhû’ ləḇadwō nišə’ār ûqərā’âû ’āswōn badereḵə ’ăšer tēləḵû-ḇāh wəhwōraḏətem ’eṯ-śêḇāṯî bəyāḡwōn šə’wōlâ: