‎1 ‏בַּשְּׁבִיעִ֕י בְּעֶשְׂרִ֥ים וְאֶחָ֖ד לַחֹ֑דֶשׁ הָיָה֙ דְּבַר־יְהוָ֔ה בְּיַד־חַגַּ֥י הַנָּבִ֖יא לֵאמֹֽר׃

‎2 ‏אֱמָר־נָ֗א אֶל־זְרֻבָּבֶ֤ל בֶּן־שַׁלְתִּיאֵל֙ פַּחַ֣ת יְהוּדָ֔ה וְאֶל־יְהוֹשֻׁ֥עַ בֶּן־יְהוֹצָדָ֖ק הַכֹּהֵ֣ן הַגָּד֑וֹל וְאֶל־שְׁאֵרִ֥ית הָעָ֖ם לֵאמֹֽר׃

‎3 ‏מִ֤י בָכֶם֙ הַנִּשְׁאָ֔ר אֲשֶׁ֤ר רָאָה֙ אֶת־הַבַּ֣יִת הַזֶּ֔ה בִּכְבוֹד֖וֹ הָרִאשׁ֑וֹן וּמָ֨ה אַתֶּ֜ם רֹאִ֤ים אֹתוֹ֙ עַ֔תָּה הֲל֥וֹא כָמֹ֛הוּ כְּאַ֖יִן בְּעֵינֵיכֶֽם׃

‎4 ‏וְעַתָּ֣ה חֲזַ֣ק זְרֻבָּבֶ֣ל׀ נְאֻם־יְהוָ֡ה וַחֲזַ֣ק יְהוֹשֻׁ֣עַ בֶּן־יְהוֹצָדָק֩ הַכֹּהֵ֨ן הַגָּד֜וֹל וַחֲזַ֨ק כָּל־עַ֥ם הָאָ֛רֶץ נְאֻם־יְהוָ֖ה וַֽעֲשׂ֑וּ כִּֽי־אֲנִ֣י אִתְּכֶ֔ם נְאֻ֖ם יְהוָ֥ה צְבָאֽוֹת׃

‎5 ‏אֶֽת־הַדָּבָ֞ר אֲשֶׁר־כָּרַ֤תִּי אִתְּכֶם֙ בְּצֵאתְכֶ֣ם מִמִּצְרַ֔יִם וְרוּחִ֖י עֹמֶ֣דֶת בְּתוֹכְכֶ֑ם אַל־תִּירָֽאוּ׃ ס

‎6 ‏כִּ֣י כֹ֤ה אָמַר֙ יְהוָ֣ה צְבָא֔וֹת ע֥וֹד אַחַ֖ת מְעַ֣ט הִ֑יא וַאֲנִ֗י מַרְעִישׁ֙ אֶת־הַשָּׁמַ֣יִם וְאֶת־הָאָ֔רֶץ וְאֶת־הַיָּ֖ם וְאֶת־הֶחָרָבָֽה׃

‎7 ‏וְהִרְעַשְׁתִּי֙ אֶת־כָּל־הַגּוֹיִ֔ם וּבָ֖אוּ חֶמְדַּ֣ת כָּל־הַגּוֹיִ֑ם וּמִלֵּאתִ֞י אֶת־הַבַּ֤יִת הַזֶּה֙ כָּב֔וֹד אָמַ֖ר יְהוָ֥ה צְבָאֽוֹת׃

‎8 ‏לִ֥י הַכֶּ֖סֶף וְלִ֣י הַזָּהָ֑ב נְאֻ֖ם יְהוָ֥ה צְבָאֽוֹת׃

‎9 ‏גָּד֣וֹל יִֽהְיֶ֡ה כְּבוֹד֩ הַבַּ֨יִת הַזֶּ֤ה הָאַֽחֲרוֹן֙ מִן־הָ֣רִאשׁ֔וֹן אָמַ֖ר יְהוָ֣ה צְבָא֑וֹת וּבַמָּק֤וֹם הַזֶּה֙ אֶתֵּ֣ן שָׁל֔וֹם נְאֻ֖ם יְהוָ֥ה צְבָאֽוֹת׃ פ

‎10 ‏בְּעֶשְׂרִ֤ים וְאַרְבָּעָה֙ לַתְּשִׁיעִ֔י בִּשְׁנַ֥ת שְׁתַּ֖יִם לְדָרְיָ֑וֶשׁ הָיָה֙ דְּבַר־יְהוָ֔ה אֶל־חַגַּ֥י הַנָּבִ֖יא לֵאמֹֽר׃

‎11 ‏כֹּ֥ה אָמַ֖ר יְהוָ֣ה צְבָא֑וֹת שְׁאַל־נָ֧א אֶת־הַכֹּהֲנִ֛ים תּוֹרָ֖ה לֵאמֹֽר׃

‎12 ‏הֵ֣ן׀ יִשָּׂא־אִ֨ישׁ בְּשַׂר־קֹ֜דֶשׁ בִּכְנַ֣ף בִּגְד֗וֹ וְנָגַ֣ע בִּ֠כְנָפוֹ אֶל־הַלֶּ֨חֶם וְאֶל־הַנָּזִ֜יד וְאֶל־הַיַּ֧יִן וְאֶל־שֶׁ֛מֶן וְאֶל־כָּל־מַאֲכָ֖ל הֲיִקְדָּ֑שׁ וַיַּעֲנ֧וּ הַכֹּהֲנִ֛ים וַיֹּאמְר֖וּ לֹֽא׃

‎13 ‏וַיֹּ֣אמֶר חַגַּ֔י אִם־יִגַּ֧ע טְמֵא־נֶ֛פֶשׁ בְּכָל־אֵ֖לֶּה הֲיִטְמָ֑א וַיַּעֲנ֧וּ הַכֹּהֲנִ֛ים וַיֹּאמְר֖וּ יִטְמָֽא׃

‎14 ‏וַיַּ֨עַן חַגַּ֜י וַיֹּ֗אמֶר כֵּ֣ן הָֽעָם־הַ֠זֶּה וְכֵן־הַגּ֨וֹי הַזֶּ֤ה לְפָנַי֙ נְאֻם־יְהוָ֔ה וְכֵ֖ן כָּל־מַעֲשֵׂ֣ה יְדֵיהֶ֑ם וַאֲשֶׁ֥ר יַקְרִ֛יבוּ שָׁ֖ם טָמֵ֥א הֽוּא׃

‎15 ‏וְעַתָּה֙ שִֽׂימוּ־נָ֣א לְבַבְכֶ֔ם מִן־הַיּ֥וֹם הַזֶּ֖ה וָמָ֑עְלָה מִטֶּ֧רֶם שֽׂוּם־אֶ֛בֶן אֶל־אֶ֖בֶן בְּהֵיכַ֥ל יְהוָֽה׃

‎16 ‏מִֽהְיוֹתָ֥ם בָּא֙ אֶל־עֲרֵמַ֣ת עֶשְׂרִ֔ים וְהָיְתָ֖ה עֲשָׂרָ֑ה בָּ֣א אֶל־הַיֶּ֗קֶב לַחְשֹׂף֙ חֲמִשִּׁ֣ים פּוּרָ֔ה וְהָיְתָ֖ה עֶשְׂרִֽים׃

‎17 ‏הִכֵּ֨יתִי אֶתְכֶ֜ם בַּשִּׁדָּפ֤וֹן וּבַיֵּֽרָקוֹן֙ וּבַבָּרָ֔ד אֵ֖ת כָּל־מַעֲשֵׂ֣ה יְדֵיכֶ֑ם וְאֵין־אֶתְכֶ֥ם אֵלַ֖י נְאֻם־יְהוָֽה׃

‎18 ‏שִׂימוּ־נָ֣א לְבַבְכֶ֔ם מִן־הַיּ֥וֹם הַזֶּ֖ה וָמָ֑עְלָה מִיּוֹם֩ עֶשְׂרִ֨ים וְאַרְבָּעָ֜ה לַתְּשִׁיעִ֗י לְמִן־הַיּ֛וֹם אֲשֶׁר־יֻסַּ֥ד הֵֽיכַל־יְהוָ֖ה שִׂ֥ימוּ לְבַבְכֶֽם׃

‎19 ‏הַע֤וֹד הַזֶּ֙רַע֙ בַּמְּגוּרָ֔ה וְעַד־הַגֶּ֨פֶן וְהַתְּאֵנָ֧ה וְהָרִמּ֛וֹן וְעֵ֥ץ הַזַּ֖יִת לֹ֣א נָשָׂ֑א מִן־הַיּ֥וֹם הַזֶּ֖ה אֲבָרֵֽךְ׃ ס

‎20 ‏וַיְהִ֨י דְבַר־יְהוָ֤ה׀ שֵׁנִית֙ אֶל־חַגַּ֔י בְּעֶשְׂרִ֧ים וְאַרְבָּעָ֛ה לַחֹ֖דֶשׁ לֵאמֹֽר׃

‎21 ‏אֱמֹ֕ר אֶל־זְרֻבָּבֶ֥ל פַּֽחַת־יְהוּדָ֖ה לֵאמֹ֑ר אֲנִ֣י מַרְעִ֔ישׁ אֶת־הַשָּׁמַ֖יִם וְאֶת־הָאָֽרֶץ׃

‎22 ‏וְהָֽפַכְתִּי֙ כִּסֵּ֣א מַמְלָכ֔וֹת וְהִ֨שְׁמַדְתִּ֔י חֹ֖זֶק מַמְלְכ֣וֹת הַגּוֹיִ֑ם וְהָפַכְתִּ֤י מֶרְכָּבָה֙ וְרֹ֣כְבֶ֔יהָ וְיָרְד֤וּ סוּסִים֙ וְרֹ֣כְבֵיהֶ֔ם אִ֖ישׁ בְּחֶ֥רֶב אָחִֽיו׃

‎23 ‏בַּיּ֣וֹם הַה֣וּא נְאֻם־יְהוָ֣ה צְבָא֡וֹת אֶ֠קָּחֲךָ זְרֻבָּבֶ֨ל בֶּן־שְׁאַלְתִּיאֵ֤ל עַבְדִּי֙ נְאֻם־יְהוָ֔ה וְשַׂמְתִּ֖יךָ כַּֽחוֹתָ֑ם כִּֽי־בְךָ֣ בָחַ֔רְתִּי נְאֻ֖ם יְהוָ֥ה צְבָאֽוֹת׃

1 baššəḇî‘î bə‘eśərîm wə’eḥāḏ l^aḥōḏeš hāyâ dəḇar-yəhwâ bəyaḏ-ḥagay hannāḇî’ lē’mōr:

2 ’ĕmār-nā’ ’el-zərubāḇel ben-šalətî’ēl p^aḥaṯ yəhûḏâ wə’el-yəhwōšu‘a ben-yəhwōṣāḏāq hakōhēn hagāḏwōl wə’el-šə’ērîṯ hā‘ām lē’mōr:

3 mî ḇāḵem hannišə’ār ’ăšer rā’â ’eṯ-habayiṯ hazzeh biḵəḇwōḏwō hāri’šwōn ûmâ ’atem rō’îm ’ōṯwō ‘atâ hălwō’ ḵāmōhû kə’ayin bə‘ênêḵem:

4 wə‘atâ ḥăzaq zərubāḇel| nə’um-yəhwâ w^aḥăzaq yəhwōšu‘a ben-yəhwōṣāḏāq hakōhēn hagāḏwōl w^aḥăzaq kāl-‘am hā’āreṣ nə’um-yəhwâ w^a‘ăśû kî-’ănî ’itəḵem nə’um yəhwâ ṣəḇā’wōṯ:

5 ’eṯ-hadāḇār ’ăšer-kāratî ’itəḵem bəṣē’ṯəḵem mimmiṣərayim wərûḥî ‘ōmeḏeṯ bəṯwōḵəḵem ’al-tîrā’û: s

6 kî ḵōh ’āmar yəhwâ ṣəḇā’wōṯ ‘wōḏ ’^aḥaṯ mə‘aṭ hî’ wa’ănî marə‘îš ’eṯ-haššāmayim wə’eṯ-hā’āreṣ wə’eṯ-hayyām wə’eṯ-heḥārāḇâ:

7 wəhirə‘ašətî ’eṯ-kāl-hagwōyim ûḇā’û ḥemədaṯ kāl-hagwōyim ûmillē’ṯî ’eṯ-habayiṯ hazzeh kāḇwōḏ ’āmar yəhwâ ṣəḇā’wōṯ:

8 lî hakesef wəlî hazzâāḇ nə’um yəhwâ ṣəḇā’wōṯ:

9 gāḏwōl yihəyeh kəḇwōḏ habayiṯ hazzeh hā’^aḥărwōn min-hāri’šwōn ’āmar yəhwâ ṣəḇā’wōṯ ûḇammāqwōm hazzeh ’etēn šālwōm nə’um yəhwâ ṣəḇā’wōṯ: f

10 bə‘eśərîm wə’arəbā‘â latəšî‘î bišənaṯ šətayim ləḏārəyāweš hāyâ dəḇar-yəhwâ ’el-ḥagay hannāḇî’ lē’mōr:

11 kōh ’āmar yəhwâ ṣəḇā’wōṯ šə’al-nā’ ’eṯ-hakōhănîm twōrâ lē’mōr:

12 hēn| yiśśā’-’îš bəśar-qōḏeš biḵənaf biḡəḏwō wənāḡ^a‘ biḵənāfwō ’el-halleḥem wə’el-hannāzîḏ wə’el-hayyayin wə’el-šemen wə’el-kāl-ma’ăḵāl hăyiqədāš wayy^a‘ănû hakōhănîm wayyō’mərû lō’:

13 wayyō’mer ḥagay ’im-yig^a‘ ṭəmē’-nefeš bəḵāl-’ēlleh hăyiṭəmā’ wayy^a‘ănû hakōhănîm wayyō’mərû yiṭəmā’:

14 wayy^a‘an ḥagay wayyō’mer kēn hā‘ām-hazzeh wəḵēn-hagwōy hazzeh ləfānay nə’um-yəhwâ wəḵēn kāl-m^a‘ăśēh yəḏêhem wa’ăšer yaqərîḇû šām ṭāmē’ hû’:

15 wə‘atâ śîmû-nā’ ləḇaḇəḵem min-hayywōm hazzeh wāmā‘əlâ miṭṭerem śûm-’eḇen ’el-’eḇen bəhêḵal yəhwâ:

16 mihəywōṯām bā’ ’el-‘ărēmaṯ ‘eśərîm wəhāyəṯâ ‘ăśārâ bā’ ’el-hayyeqeḇ l^aḥəśōf ḥămiššîm pûrâ wəhāyəṯâ ‘eśərîm:

17 hikêṯî ’eṯəḵem baššidāfwōn ûḇayyērāqwōn ûḇabārāḏ ’ēṯ kāl-m^a‘ăśēh yəḏêḵem wə’ên-’eṯəḵem ’ēlay nə’um-yəhwâ:

18 śîmû-nā’ ləḇaḇəḵem min-hayywōm hazzeh wāmā‘əlâ mîywōm ‘eśərîm wə’arəbā‘â latəšî‘î ləmin-hayywōm ’ăšer-yussaḏ hêḵal-yəhwâ śîmû ləḇaḇəḵem:

19 h^a‘wōḏ hazzer^a‘ bamməḡûrâ wə‘aḏ-hagefen wəhatə’ēnâ wəhārimmwōn wə‘ēṣ hazzayiṯ lō’ nāśā’ min-hayywōm hazzeh ’ăḇārēḵə: s

20 wayəhî ḏəḇar-yəhwâ| šēnîṯ ’el-ḥagay bə‘eśərîm wə’arəbā‘â l^aḥōḏeš lē’mōr:

21 ’ĕmōr ’el-zərubāḇel p^aḥaṯ-yəhûḏâ lē’mōr ’ănî marə‘îš ’eṯ-haššāmayim wə’eṯ-hā’āreṣ:

22 wəhāfaḵətî kissē’ maməlāḵwōṯ wəhišəmaḏətî ḥōzeq mamələḵwōṯ hagwōyim wəhāfaḵətî merəkāḇâ wərōḵəḇeyhā wəyārəḏû sûsîm wərōḵəḇêhem ’îš bəḥereḇ ’āḥîw:

23 bayywōm hahû’ nə’um-yəhwâ ṣəḇā’wōṯ ’eqqāḥăḵā zərubāḇel ben-šə’alətî’ēl ‘aḇədî nə’um-yəhwâ wəśamətîḵā k^aḥwōṯām kî-ḇəḵā ḇāḥarətî nə’um yəhwâ ṣəḇā’wōṯ: