‎1 ‏וְיָצָ֥א חֹ֖טֶר מִגֵּ֣זַע יִשָׁ֑י וְנֵ֖צֶר מִשָּׁרָשָׁ֥יו יִפְרֶֽה׃

‎2 ‏וְנָחָ֥ה עָלָ֖יו ר֣וּחַ יְהוָ֑ה ר֧וּחַ חָכְמָ֣ה וּבִינָ֗ה ר֤וּחַ עֵצָה֙ וּגְבוּרָ֔ה ר֥וּחַ דַּ֖עַת וְיִרְאַ֥ת יְהוָֽה׃

‎3 ‏וַהֲרִיח֖וֹ בְּיִרְאַ֣ת יְהוָ֑ה וְלֹֽא־לְמַרְאֵ֤ה עֵינָיו֙ יִשְׁפּ֔וֹט וְלֹֽא־לְמִשְׁמַ֥ע אָזְנָ֖יו יוֹכִֽיחַ׃

‎4 ‏וְשָׁפַ֤ט בְּצֶ֙דֶק֙ דַּלִּ֔ים וְהוֹכִ֥יחַ בְּמִישׁ֖וֹר לְעַנְוֵי־אָ֑רֶץ וְהִֽכָּה־אֶ֙רֶץ֙ בְּשֵׁ֣בֶט פִּ֔יו וּבְר֥וּחַ שְׂפָתָ֖יו יָמִ֥ית רָשָֽׁע׃

‎5 ‏וְהָ֥יָה צֶ֖דֶק אֵז֣וֹר מָתְנָ֑יו וְהָאֱמוּנָ֖ה אֵז֥וֹר חֲלָצָֽיו׃

‎6 ‏וְגָ֤ר זְאֵב֙ עִם־כֶּ֔בֶשׂ וְנָמֵ֖ר עִם־גְּדִ֣י יִרְבָּ֑ץ וְעֵ֨גֶל וּכְפִ֤יר וּמְרִיא֙ יַחְדָּ֔ו וְנַ֥עַר קָטֹ֖ן נֹהֵ֥ג בָּֽם׃

‎7 ‏וּפָרָ֤ה וָדֹב֙ תִּרְעֶ֔ינָה יַחְדָּ֖ו יִרְבְּצ֣וּ יַלְדֵיהֶ֑ן וְאַרְיֵ֖ה כַּבָּקָ֥ר יֹֽאכַל־תֶּֽבֶן׃

‎8 ‏וְשִֽׁעֲשַׁ֥ע יוֹנֵ֖ק עַל־חֻ֣ר פָּ֑תֶן וְעַל֙ מְאוּרַ֣ת צִפְעוֹנִ֔י גָּמ֖וּל יָד֥וֹ הָדָֽה׃

‎9 ‏לֹֽא־יָרֵ֥עוּ וְלֹֽא־יַשְׁחִ֖יתוּ בְּכָל־הַ֣ר קָדְשִׁ֑י כִּֽי־מָלְאָ֣ה הָאָ֗רֶץ דֵּעָה֙ אֶת־יְהוָ֔ה כַּמַּ֖יִם לַיָּ֥ם מְכַסִּֽים׃ פ

‎10 ‏וְהָיָה֙ בַּיּ֣וֹם הַה֔וּא שֹׁ֣רֶשׁ יִשַׁ֗י אֲשֶׁ֤ר עֹמֵד֙ לְנֵ֣ס עַמִּ֔ים אֵלָ֖יו גּוֹיִ֣ם יִדְרֹ֑שׁוּ וְהָיְתָ֥ה מְנֻחָת֖וֹ כָּבֽוֹד׃ פ

‎11 ‏וְהָיָ֣ה׀ בַּיּ֣וֹם הַה֗וּא יוֹסִ֨יף אֲדֹנָ֤י׀ שֵׁנִית֙ יָד֔וֹ לִקְנ֖וֹת אֶת־שְׁאָ֣ר עַמּ֑וֹ אֲשֶׁ֣ר יִשָּׁאֵר֩ מֵאַשּׁ֨וּר וּמִמִּצְרַ֜יִם וּמִפַּתְר֣וֹס וּמִכּ֗וּשׁ וּמֵעֵילָ֤ם וּמִשִּׁנְעָר֙ וּמֵ֣חֲמָ֔ת וּמֵאִיֵּ֖י הַיָּֽם׃

‎12 ‏וְנָשָׂ֥א נֵס֙ לַגּוֹיִ֔ם וְאָסַ֖ף נִדְחֵ֣י יִשְׂרָאֵ֑ל וּנְפֻצ֤וֹת יְהוּדָה֙ יְקַבֵּ֔ץ מֵאַרְבַּ֖ע כַּנְפ֥וֹת הָאָֽרֶץ׃

‎13 ‏וְסָ֙רָה֙ קִנְאַ֣ת אֶפְרַ֔יִם וְצֹרְרֵ֥י יְהוּדָ֖ה יִכָּרֵ֑תוּ אֶפְרַ֙יִם֙ לֹֽא־יְקַנֵּ֣א אֶת־יְהוּדָ֔ה וִֽיהוּדָ֖ה לֹֽא־יָצֹ֥ר אֶת־אֶפְרָֽיִם׃

‎14 ‏וְעָפ֨וּ בְכָתֵ֤ף פְּלִשְׁתִּים֙ יָ֔מָּה יַחְדָּ֖ו יָבֹ֣זּוּ אֶת־בְּנֵי־קֶ֑דֶם אֱד֤וֹם וּמוֹאָב֙ מִשְׁל֣וֹח¹ יָדָ֔ם וּבְנֵ֥י עַמּ֖וֹן מִשְׁמַעְתָּֽם׃

‎15 ‏וְהֶחֱרִ֣ים יְהוָ֗ה אֵ֚ת לְשׁ֣וֹן יָם־מִצְרַ֔יִם וְהֵנִ֥יף יָד֛וֹ עַל־הַנָּהָ֖ר בַּעְיָ֣ם רוּח֑וֹ וְהִכָּ֙הוּ֙ לְשִׁבְעָ֣ה נְחָלִ֔ים וְהִדְרִ֖יךְ בַּנְּעָלִֽים׃

‎16 ‏וְהָיְתָ֣ה מְסִלָּ֔ה לִשְׁאָ֣ר עַמּ֔וֹ אֲשֶׁ֥ר יִשָּׁאֵ֖ר מֵֽאַשּׁ֑וּר כַּאֲשֶׁ֤ר הָֽיְתָה֙ לְיִשְׂרָאֵ֔ל בְּי֥וֹם עֲלֹת֖וֹ מֵאֶ֥רֶץ מִצְרָֽיִם׃

1 wəyāṣā’ ḥōṭer migēz^a‘ yišāy wənēṣer miššārāšāyw yifəreh:

2 wənāḥâ ‘ālāyw rûḥa yəhwâ rûḥa ḥāḵəmâ ûḇînâ rûḥa ‘ēṣâ ûḡəḇûrâ rûḥa d^a‘aṯ wəyirə’aṯ yəhwâ:

3 wahărîḥwō bəyirə’aṯ yəhwâ wəlō’-ləmarə’ēh ‘ênāyw yišəpwōṭ wəlō’-ləmišəm^a‘ ’āzənāyw ywōḵîḥa:

4 wəšāfaṭ bəṣeḏeq dallîm wəhwōḵîḥa bəmîšwōr lə‘anəwê-’āreṣ wəhikâ-’ereṣ bəšēḇeṭ pîw ûḇərûḥa śəfāṯāyw yāmîṯ rāšā‘:

5 wəhāyâ ṣeḏeq ’ēzwōr māṯənāyw wəhā’ĕmûnâ ’ēzwōr ḥălāṣāyw:

6 wəḡār zə’ēḇ ‘im-keḇeś wənāmēr ‘im-gəḏî yirəbāṣ wə‘ēḡel ûḵəfîr ûmərî’ y^aḥədāw wən^a‘ar qāṭōn nōhēḡ bām:

7 ûfārâ wāḏōḇ tirə‘eynâ y^aḥədāw yirəbəṣû yaləḏêhen wə’arəyēh kabāqār yō’ḵal-teḇen:

8 wəši‘ăš^a‘ ywōnēq ‘al-ḥur pāṯen wə‘al mə’ûraṯ ṣifə‘wōnî gāmûl yāḏwō hāḏâ:

9 lō’-yārē‘û wəlō’-yašəḥîṯû bəḵāl-har qāḏəšî kî-mālə’â hā’āreṣ dē‘â ’eṯ-yəhwâ kammayim layyām məḵassîm: f

10 wəhāyâ bayywōm hahû’ šōreš yišay ’ăšer ‘ōmēḏ lənēs ‘ammîm ’ēlāyw gwōyim yiḏərōšû wəhāyəṯâ mənuḥāṯwō kāḇwōḏ: f

11 wəhāyâ| bayywōm hahû’ ywōsîf ’ăḏōnāy| šēnîṯ yāḏwō liqənwōṯ ’eṯ-šə’ār ‘ammwō ’ăšer yiššā’ēr mē’aššûr ûmimmiṣərayim ûmipaṯərwōs ûmikûš ûmē‘êlām ûmiššinə‘ār ûmēḥămāṯ ûmē’îyê hayyām:

12 wənāśā’ nēs lagwōyim wə’āsaf niḏəḥê yiśərā’ēl ûnəfuṣwōṯ yəhûḏâ yəqabēṣ mē’arəb^a‘ kanəfwōṯ hā’āreṣ:

13 wəsārâ qinə’aṯ ’efərayim wəṣōrərê yəhûḏâ yikārēṯû ’efərayim lō’-yəqannē’ ’eṯ-yəhûḏâ wîhûḏâ lō’-yāṣōr ’eṯ-’efərāyim:

14 wə‘āfû ḇəḵāṯēf pəlišətîm yāmmâ y^aḥədāw yāḇōzzû ’eṯ-bənê-qeḏem ’ĕḏwōm ûmwō’āḇ mišəlwōḥ¹ yāḏām ûḇənê ‘ammwōn mišəm^a‘ətām:

15 wəheḥĕrîm yəhwâ ’ēṯ ləšwōn yām-miṣərayim wəhēnîf yāḏwō ‘al-hannâār b^a‘əyām rûḥwō wəhikâû ləšiḇə‘â nəḥālîm wəhiḏərîḵə bannə‘ālîm:

16 wəhāyəṯâ məsillâ lišə’ār ‘ammwō ’ăšer yiššā’ēr mē’aššûr ka’ăšer hāyəṯâ ləyiśərā’ēl bəywōm ‘ălōṯwō mē’ereṣ miṣərāyim: