‎1 ‏וַיֹּסִ֙פוּ֙ בְּנֵ֣י יִשְׂרָאֵ֔ל לַעֲשׂ֥וֹת הָרַ֖ע בְּעֵינֵ֣י יְהוָ֑ה וְאֵה֖וּד מֵֽת׃

‎2 ‏וַיִּמְכְּרֵ֣ם יְהוָ֗ה בְּיַד֙ יָבִ֣ין מֶֽלֶךְ־כְּנַ֔עַן אֲשֶׁ֥ר מָלַ֖ךְ בְּחָצ֑וֹר וְשַׂר־צְבָאוֹ֙ סִֽיסְרָ֔א וְה֥וּא יוֹשֵׁ֖ב בַּחֲרֹ֥שֶׁת הַגּוֹיִֽם׃

‎3 ‏וַיִּצְעֲק֥וּ בְנֵֽי־יִשְׂרָאֵ֖ל אֶל־יְהוָ֑ה כִּ֠י תְּשַׁ֨ע מֵא֤וֹת רֶֽכֶב־בַּרְזֶל֙ ל֔וֹ וְ֠הוּא לָחַ֞ץ אֶת־בְּנֵ֧י יִשְׂרָאֵ֛ל בְּחָזְקָ֖ה עֶשְׂרִ֥ים שָׁנָֽה׃ ס

‎4 ‏וּדְבוֹרָה֙ אִשָּׁ֣ה נְבִיאָ֔ה אֵ֖שֶׁת לַפִּיד֑וֹת הִ֛יא שֹׁפְטָ֥ה אֶת־יִשְׂרָאֵ֖ל בָּעֵ֥ת הַהִֽיא׃

‎5 ‏וְ֠הִיא יוֹשֶׁ֨בֶת תַּֽחַת־תֹּ֜מֶר דְּבוֹרָ֗ה בֵּ֧ין הָרָמָ֛ה וּבֵ֥ין בֵּֽית־אֵ֖ל בְּהַ֣ר אֶפְרָ֑יִם וַיַּעֲל֥וּ אֵלֶ֛יהָ בְּנֵ֥י יִשְׂרָאֵ֖ל לַמִּשְׁפָּֽט׃

‎6 ‏וַתִּשְׁלַ֗ח וַתִּקְרָא֙ לְבָרָ֣ק בֶּן־אֲבִינֹ֔עַם מִקֶּ֖דֶשׁ נַפְתָּלִ֑י וַתֹּ֨אמֶר אֵלָ֜יו הֲלֹ֥א צִוָּ֣ה׀ יְהוָ֣ה אֱלֹהֵֽי־יִשְׂרָאֵ֗ל לֵ֤ךְ וּמָֽשַׁכְתָּ֙ בְּהַ֣ר תָּב֔וֹר וְלָקַחְתָּ֣ עִמְּךָ֗ עֲשֶׂ֤רֶת אֲלָפִים֙ אִ֔ישׁ מִבְּנֵ֥י נַפְתָּלִ֖י וּמִבְּנֵ֥י זְבֻלֽוּן׃

‎7 ‏וּמָשַׁכְתִּ֨י אֵלֶ֜יךָ אֶל־נַ֣חַל קִישׁ֗וֹן אֶת־סִֽיסְרָא֙ שַׂר־צְבָ֣א יָבִ֔ין וְאֶת־רִכְבּ֖וֹ וְאֶת־הֲמוֹנ֑וֹ וּנְתַתִּ֖יהוּ בְּיָדֶֽךָ׃

‎8 ‏וַיֹּ֤אמֶר אֵלֶ֙יהָ֙ בָּרָ֔ק אִם־תֵּלְכִ֥י עִמִּ֖י וְהָלָ֑כְתִּי וְאִם־לֹ֥א תֵלְכִ֛י עִמִּ֖י לֹ֥א אֵלֵֽךְ׃

‎9 ‏וַתֹּ֜אמֶר הָלֹ֧ךְ אֵלֵ֣ךְ עִמָּ֗ךְ אֶ֚פֶס כִּי֩ לֹ֨א תִֽהְיֶ֜ה תִּֽפְאַרְתְּךָ֗ עַל־הַדֶּ֙רֶךְ֙ אֲשֶׁ֣ר אַתָּ֣ה הוֹלֵ֔ךְ כִּ֣י בְֽיַד־אִשָּׁ֔ה יִמְכֹּ֥ר יְהוָ֖ה אֶת־סִֽיסְרָ֑א וַתָּ֧קָם דְּבוֹרָ֛ה וַתֵּ֥לֶךְ עִם־בָּרָ֖ק קֶֽדְשָׁה׃

‎10 ‏וַיַּזְעֵ֨ק בָּרָ֜ק אֶת־זְבוּלֻ֤ן וְאֶת־נַפְתָּלִי֙ קֶ֔דְשָׁה וַיַּ֣עַל בְּרַגְלָ֔יו עֲשֶׂ֥רֶת אַלְפֵ֖י אִ֑ישׁ וַתַּ֥עַל עִמּ֖וֹ דְּבוֹרָֽה׃

‎11 ‏וְחֶ֤בֶר הַקֵּינִי֙ נִפְרָ֣ד מִקַּ֔יִן מִבְּנֵ֥י חֹבָ֖ב חֹתֵ֣ן מֹשֶׁ֑ה וַיֵּ֣ט אָהֳל֔וֹ עַד־אֵל֥וֹן בצענים בְּצַעֲנַנִּ֖ים אֲשֶׁ֥ר אֶת־קֶֽדֶשׁ׃

‎12 ‏וַיַּגִּ֖דוּ לְסִֽיסְרָ֑א כִּ֥י עָלָ֛ה בָּרָ֥ק בֶּן־אֲבִינֹ֖עַם הַר־תָּבֽוֹר׃ ס

‎13 ‏וַיַּזְעֵ֨ק סִֽיסְרָ֜א אֶת־כָּל־רִכְבּ֗וֹ תְּשַׁ֤ע מֵאוֹת֙ רֶ֣כֶב בַּרְזֶ֔ל וְאֶת־כָּל־הָעָ֖ם אֲשֶׁ֣ר אִתּ֑וֹ מֵחֲרֹ֥שֶׁת הַגּוֹיִ֖ם אֶל־נַ֥חַל קִישֽׁוֹן׃

‎14 ‏וַתֹּאמֶר֩ דְּבֹרָ֨ה אֶל־בָּרָ֜ק ק֗וּם כִּ֣י זֶ֤ה הַיּוֹם֙ אֲשֶׁר֩ נָתַ֨ן יְהוָ֤ה אֶת־סִֽיסְרָא֙ בְּיָדֶ֔ךָ הֲלֹ֥א יְהוָ֖ה יָצָ֣א לְפָנֶ֑יךָ וַיֵּ֤רֶד בָּרָק֙ מֵהַ֣ר תָּב֔וֹר וַעֲשֶׂ֧רֶת אֲלָפִ֛ים אִ֖ישׁ אַחֲרָֽיו׃

‎15 ‏וַיָּ֣הָם יְ֠הוָה אֶת־סִֽיסְרָ֨א וְאֶת־כָּל־הָרֶ֧כֶב וְאֶת־כָּל־הַֽמַּחֲנֶ֛ה לְפִי־חֶ֖רֶב לִפְנֵ֣י בָרָ֑ק וַיֵּ֧רֶד סִֽיסְרָ֛א מֵעַ֥ל הַמֶּרְכָּבָ֖ה וַיָּ֥נָס בְּרַגְלָֽיו׃

‎16 ‏וּבָרָ֗ק רָדַ֞ף אַחֲרֵ֤י הָרֶ֙כֶב֙ וְאַחֲרֵ֣י הַֽמַּחֲנֶ֔ה עַ֖ד חֲרֹ֣שֶׁת הַגּוֹיִ֑ם וַיִּפֹּ֞ל כָּל־מַחֲנֵ֤ה סִֽיסְרָא֙ לְפִי־חֶ֔רֶב לֹ֥א נִשְׁאַ֖ר עַד־אֶחָֽד׃

‎17 ‏וְסִֽיסְרָא֙ נָ֣ס בְּרַגְלָ֔יו אֶל־אֹ֣הֶל יָעֵ֔ל אֵ֖שֶׁת חֶ֣בֶר הַקֵּינִ֑י כִּ֣י שָׁל֗וֹם בֵּ֚ין יָבִ֣ין מֶֽלֶךְ־חָצ֔וֹר וּבֵ֕ין בֵּ֖ית חֶ֥בֶר הַקֵּינִֽי׃

‎18 ‏וַתֵּצֵ֣א יָעֵל֮ לִקְרַ֣את סִֽיסְרָא֒ וַתֹּ֣אמֶר אֵלָ֗יו סוּרָ֧ה אֲדֹנִ֛י סוּרָ֥ה אֵלַ֖י אַל־תִּירָ֑א וַיָּ֤סַר אֵלֶ֙יהָ֙ הָאֹ֔הֱלָה וַתְּכַסֵּ֖הוּ בַּשְּׂמִיכָֽה׃

‎19 ‏וַיֹּ֧אמֶר אֵלֶ֛יהָ הַשְׁקִינִי־נָ֥א מְעַט־מַ֖יִם כִּ֣י צָמֵ֑אתִי וַתִּפְתַּ֞ח אֶת־נֹ֧אוד הֶחָלָ֛ב וַתַּשְׁקֵ֖הוּ וַתְּכַסֵּֽהוּ׃

‎20 ‏וַיֹּ֣אמֶר אֵלֶ֔יהָ עֲמֹ֖ד פֶּ֣תַח הָאֹ֑הֶל וְהָיָה֩ אִם־אִ֨ישׁ יָב֜וֹא וּשְׁאֵלֵ֗ךְ וְאָמַ֛ר הֲיֵֽשׁ־פֹּ֥ה אִ֖ישׁ וְאָמַ֥רְתְּ אָֽיִן׃

‎21 ‏וַתִּקַּ֣ח יָעֵ֣ל אֵֽשֶׁת־חֶ֠בֶר אֶת־יְתַ֨ד הָאֹ֜הֶל וַתָּ֧שֶׂם אֶת־הַמַּקֶּ֣בֶת בְּיָדָ֗הּ וַתָּב֤וֹא אֵלָיו֙ בַּלָּ֔אט וַתִּתְקַ֤ע אֶת־הַיָּתֵד֙ בְּרַקָּת֔וֹ וַתִּצְנַ֖ח בָּאָ֑רֶץ וְהֽוּא־נִרְדָּ֥ם וַיָּ֖עַף וַיָּמֹֽת׃

‎22 ‏וְהִנֵּ֣ה בָרָק֮ רֹדֵ֣ף אֶת־סִֽיסְרָא֒ וַתֵּצֵ֤א יָעֵל֙ לִקְרָאת֔וֹ וַתֹּ֣אמֶר ל֔וֹ לֵ֣ךְ וְאַרְאֶ֔ךָּ אֶת־הָאִ֖ישׁ אֲשֶׁר־אַתָּ֣ה מְבַקֵּ֑שׁ וַיָּבֹ֣א אֵלֶ֔יהָ וְהִנֵּ֤ה סִֽיסְרָא֙ נֹפֵ֣ל מֵ֔ת וְהַיָּתֵ֖ד בְּרַקָּתֽוֹ׃

‎23 ‏וַיַּכְנַ֤ע אֱלֹהִים֙ בַּיּ֣וֹם הַה֔וּא אֵ֖ת יָבִ֣ין מֶֽלֶךְ־כְּנָ֑עַן לִפְנֵ֖י בְּנֵ֥י יִשְׂרָאֵֽל׃

‎24 ‏וַתֵּ֜לֶךְ יַ֤ד בְּנֵֽי־יִשְׂרָאֵל֙ הָל֣וֹךְ וְקָשָׁ֔ה עַ֖ל יָבִ֣ין מֶֽלֶךְ־כְּנָ֑עַן עַ֚ד אֲשֶׁ֣ר הִכְרִ֔יתוּ אֵ֖ת יָבִ֥ין מֶֽלֶךְ־כְּנָֽעַן׃ פ

1 wayyōsifû bənê yiśərā’ēl l^a‘ăśwōṯ hār^a‘ bə‘ênê yəhwâ wə’ēhûḏ mēṯ:

2 wayyiməkərēm yəhwâ bəyaḏ yāḇîn meleḵə-kən^a‘an ’ăšer mālaḵə bəḥāṣwōr wəśar-ṣəḇā’wō sîsərā’ wəhû’ ywōšēḇ b^aḥărōšeṯ hagwōyim:

3 wayyiṣə‘ăqû ḇənê-yiśərā’ēl ’el-yəhwâ kî təš^a‘ mē’wōṯ reḵeḇ-barəzel lwō wəhû’ lāḥaṣ ’eṯ-bənê yiśərā’ēl bəḥāzəqâ ‘eśərîm šānâ: s

4 ûḏəḇwōrâ ’iššâ nəḇî’â ’ēšeṯ lapîḏwōṯ hî’ šōfəṭâ ’eṯ-yiśərā’ēl bā‘ēṯ hahî’:

5 wəhî’ ywōšeḇeṯ t^aḥaṯ-tōmer dəḇwōrâ bên hārāmâ ûḇên bêṯ-’ēl bəhar ’efərāyim wayy^a‘ălû ’ēleyhā bənê yiśərā’ēl lammišəpāṭ:

6 watišəl^aḥ watiqərā’ ləḇārāq ben-’ăḇînō‘am miqqeḏeš nafətālî watō’mer ’ēlāyw hălō’ ṣiûâ| yəhwâ ’ĕlōhê-yiśərā’ēl lēḵə ûmāšaḵətā bəhar tāḇwōr wəlāq^aḥətā ‘imməḵā ‘ăśereṯ ’ălāfîm ’îš mibənê nafətālî ûmibənê zəḇulûn:

7 ûmāšaḵətî ’ēleyḵā ’el-n^aḥal qîšwōn ’eṯ-sîsərā’ śar-ṣəḇā’ yāḇîn wə’eṯ-riḵəbwō wə’eṯ-hămwōnwō ûnəṯatîhû bəyāḏeḵā:

8 wayyō’mer ’ēleyhā bārāq ’im-tēləḵî ‘immî wəhālāḵətî wə’im-lō’ ṯēləḵî ‘immî lō’ ’ēlēḵə:

9 watō’mer hālōḵə ’ēlēḵə ‘immāḵə ’efes kî lō’ ṯihəyeh tifə’arətəḵā ‘al-hadereḵə ’ăšer ’atâ hwōlēḵə kî ḇəyaḏ-’iššâ yiməkōr yəhwâ ’eṯ-sîsərā’ watāqām dəḇwōrâ watēleḵə ‘im-bārāq qeḏəšâ:

10 wayyazə‘ēq bārāq ’eṯ-zəḇûlun wə’eṯ-nafətālî qeḏəšâ wayy^a‘al bəraḡəlāyw ‘ăśereṯ ’aləfê ’îš wat^a‘al ‘immwō dəḇwōrâ:

11 wəḥeḇer haqqênî nifərāḏ miqqayin mibənê ḥōḇāḇ ḥōṯēn mōšeh wayyēṭ ’âŏlwō ‘aḏ-’ēlwōn baṣə‘annîm bəṣ^a‘ănannîm ’ăšer ’eṯ-qeḏeš:

12 wayyagiḏû ləsîsərā’ kî ‘ālâ bārāq ben-’ăḇînō‘am har-tāḇwōr: s

13 wayyazə‘ēq sîsərā’ ’eṯ-kāl-riḵəbwō təš^a‘ mē’wōṯ reḵeḇ barəzel wə’eṯ-kāl-hā‘ām ’ăšer ’itwō mēḥărōšeṯ hagwōyim ’el-n^aḥal qîšwōn:

14 watō’mer dəḇōrâ ’el-bārāq qûm kî zeh hayywōm ’ăšer nāṯan yəhwâ ’eṯ-sîsərā’ bəyāḏeḵā hălō’ yəhwâ yāṣā’ ləfāneyḵā wayyēreḏ bārāq mēhar tāḇwōr w^a‘ăśereṯ ’ălāfîm ’îš ’^aḥărāyw:

15 wayyâām yəhwâ ’eṯ-sîsərā’ wə’eṯ-kāl-hāreḵeḇ wə’eṯ-kāl-hamm^aḥăneh ləfî-ḥereḇ lifənê ḇārāq wayyēreḏ sîsərā’ mē‘al hammerəkāḇâ wayyānās bəraḡəlāyw:

16 ûḇārāq rāḏaf ’^aḥărê hāreḵeḇ wə’^aḥărê hamm^aḥăneh ‘aḏ ḥărōšeṯ hagwōyim wayyipōl kāl-m^aḥănēh sîsərā’ ləfî-ḥereḇ lō’ nišə’ar ‘aḏ-’eḥāḏ:

17 wəsîsərā’ nās bəraḡəlāyw ’el-’ōhel yā‘ēl ’ēšeṯ ḥeḇer haqqênî kî šālwōm bên yāḇîn meleḵə-ḥāṣwōr ûḇên bêṯ ḥeḇer haqqênî:

18 watēṣē’ yā‘ēl liqəra’ṯ sîsərā’ watō’mer ’ēlāyw sûrâ ’ăḏōnî sûrâ ’ēlay ’al-tîrā’ wayyāsar ’ēleyhā hā’ōhĕlâ watəḵassēhû baśśəmîḵâ:

19 wayyō’mer ’ēleyhā hašəqînî-nā’ mə‘aṭ-mayim kî ṣāmē’ṯî watifət^aḥ ’eṯ-nō’wḏ heḥālāḇ watašəqēhû watəḵassēhû:

20 wayyō’mer ’ēleyhā ‘ămōḏ peṯ^aḥ hā’ōhel wəhāyâ ’im-’îš yāḇwō’ ûšə’ēlēḵə wə’āmar hăyēš-pōh ’îš wə’āmarətə ’āyin:

21 watiqq^aḥ yā‘ēl ’ēšeṯ-ḥeḇer ’eṯ-yəṯaḏ hā’ōhel watāśem ’eṯ-hammaqqeḇeṯ bəyāḏāh watāḇwō’ ’ēlāyw ballā’ṭ watiṯəq^a‘ ’eṯ-hayyāṯēḏ bəraqqāṯwō watiṣən^aḥ bā’āreṣ wəhû’-nirədām wayyā‘af wayyāmōṯ:

22 wəhinnēh ḇārāq rōḏēf ’eṯ-sîsərā’ watēṣē’ yā‘ēl liqərā’ṯwō watō’mer lwō lēḵə wə’arə’eḵḵā ’eṯ-hā’îš ’ăšer-’atâ məḇaqqēš wayyāḇō’ ’ēleyhā wəhinnēh sîsərā’ nōfēl mēṯ wəhayyāṯēḏ bəraqqāṯwō:

23 wayyaḵən^a‘ ’ĕlōhîm bayywōm hahû’ ’ēṯ yāḇîn meleḵə-kənā‘an lifənê bənê yiśərā’ēl:

24 watēleḵə yaḏ bənê-yiśərā’ēl hālwōḵə wəqāšâ ‘al yāḇîn meleḵə-kənā‘an ‘aḏ ’ăšer hiḵərîṯû ’ēṯ yāḇîn meleḵə-kənā‘an: f