‎1 ‏הַדָּבָר֙ אֲשֶׁ֣ר הָיָ֣ה אֶֽל־יִרְמְיָ֔הוּ מֵאֵ֥ת יְהוָ֖ה לֵאמֹֽר׃

‎2 ‏שִׁמְע֕וּ אֶת־דִּבְרֵ֖י הַבְּרִ֣ית הַזֹּ֑את וְדִבַּרְתָּם֙ אֶל־אִ֣ישׁ יְהוּדָ֔ה וְעַל־יֹשְׁבֵ֖י יְרוּשָׁלִָֽם׃

‎3 ‏וְאָמַרְתָּ֣ אֲלֵיהֶ֔ם כֹּֽה־אָמַ֥ר יְהוָ֖ה אֱלֹהֵ֣י יִשְׂרָאֵ֑ל אָר֣וּר הָאִ֔ישׁ אֲשֶׁר֙ לֹ֣א יִשְׁמַ֔ע אֶת־דִּבְרֵ֖י הַבְּרִ֥ית הַזֹּֽאת׃

‎4 ‏אֲשֶׁ֣ר צִוִּ֣יתִי אֶת־אֲבֽוֹתֵיכֶ֡ם בְּי֣וֹם הוֹצִיאִֽי־אוֹתָ֣ם מֵאֶֽרֶץ־מִצְרַיִם֩ מִכּ֨וּר הַבַּרְזֶ֜ל לֵאמֹ֗ר שִׁמְע֤וּ בְקוֹלִי֙ וַעֲשִׂיתֶ֣ם אוֹתָ֔ם כְּכֹ֥ל אֲשֶׁר־אֲצַוֶּ֖ה אֶתְכֶ֑ם וִהְיִ֤יתֶם לִי֙ לְעָ֔ם וְאָ֣נֹכִ֔י אֶהְיֶ֥ה לָכֶ֖ם לֵאלֹהִֽים׃

‎5 ‏לְמַעַן֩ הָקִ֨ים אֶת־הַשְּׁבוּעָ֜ה אֲשֶׁר־נִשְׁבַּ֣עְתִּי לַאֲבֽוֹתֵיכֶ֗ם לָתֵ֤ת לָהֶם֙ אֶ֣רֶץ זָבַ֥ת חָלָ֛ב וּדְבַ֖שׁ כַּיּ֣וֹם הַזֶּ֑ה וָאַ֥עַן וָאֹמַ֖ר אָמֵ֥ן׀ יְהוָֽה׃ ס

‎6 ‏וַיֹּ֤אמֶר יְהוָה֙ אֵלַ֔י קְרָ֨א אֶת־כָּל־הַדְּבָרִ֤ים הָאֵ֙לֶּה֙ בְּעָרֵ֣י יְהוּדָ֔ה וּבְחֻצ֥וֹת יְרוּשָׁלִַ֖ם לֵאמֹ֑ר שִׁמְע֗וּ אֶת־דִּבְרֵי֙ הַבְּרִ֣ית הַזֹּ֔את וַעֲשִׂיתֶ֖ם אוֹתָֽם׃

‎7 ‏כִּי֩ הָעֵ֨ד הַעִדֹ֜תִי בַּאֲבֽוֹתֵיכֶ֗ם בְּיוֹם֩ הַעֲלוֹתִ֨י אוֹתָ֜ם מֵאֶ֤רֶץ מִצְרַ֙יִם֙ וְעַד־הַיּ֣וֹם הַזֶּ֔ה הַשְׁכֵּ֥ם וְהָעֵ֖ד לֵאמֹ֑ר שִׁמְע֖וּ בְּקוֹלִֽי׃

‎8 ‏וְלֹ֤א שָֽׁמְעוּ֙ וְלֹֽא־הִטּ֣וּ אֶת־אָזְנָ֔ם וַיֵּ֣לְכ֔וּ אִ֕ישׁ בִּשְׁרִיר֖וּת לִבָּ֣ם הָרָ֑ע וָאָבִ֨יא עֲלֵיהֶ֜ם אֶֽת־כָּל־דִּבְרֵ֧י הַבְּרִית־הַזֹּ֛את אֲשֶׁר־צִוִּ֥יתִי לַעֲשׂ֖וֹת וְלֹ֥א עָשֽׂוּ׃ ס

‎9 ‏וַיֹּ֥אמֶר יְהוָ֖ה אֵלָ֑י נִֽמְצָא־קֶ֙שֶׁר֙ בְּאִ֣ישׁ יְהוּדָ֔ה וּבְיֹשְׁבֵ֖י יְרוּשָׁלִָֽם׃

‎10 ‏שָׁ֩בוּ֩ עַל־עֲוֹנֹ֨ת אֲבוֹתָ֜ם הָרִֽאשֹׁנִ֗ים אֲשֶׁ֤ר מֵֽאֲנוּ֙ לִשְׁמ֣וֹעַ אֶת־דְּבָרַ֔י וְהֵ֣מָּה הָלְכ֗וּ אַחֲרֵ֛י אֱלֹהִ֥ים אֲחֵרִ֖ים לְעָבְדָ֑ם הֵפֵ֤רוּ בֵֽית־יִשְׂרָאֵל֙ וּבֵ֣ית יְהוּדָ֔ה אֶת־בְּרִיתִ֕י אֲשֶׁ֥ר כָּרַ֖תִּי אֶת־אֲבוֹתָֽם׃ ס

‎11 ‏לָכֵ֗ן כֹּ֚ה אָמַ֣ר יְהוָ֔ה הִנְנִ֨י מֵבִ֤יא אֲלֵיהֶם֙ רָעָ֔ה אֲשֶׁ֥ר לֹֽא־יוּכְל֖וּ לָצֵ֣את מִמֶּ֑נָּה וְזָעֲק֣וּ אֵלַ֔י וְלֹ֥א אֶשְׁמַ֖ע אֲלֵיהֶֽם׃

‎12 ‏וְהָֽלְכ֞וּ עָרֵ֣י יְהוּדָ֗ה וְיֹשְׁבֵי֙ יְר֣וּשָׁלִַ֔ם וְזָֽעֲקוּ֙ אֶל־הָ֣אֱלֹהִ֔ים אֲשֶׁ֛ר הֵ֥ם מְקַטְּרִ֖ים לָהֶ֑ם וְהוֹשֵׁ֛עַ לֹֽא־יוֹשִׁ֥יעוּ לָהֶ֖ם בְּעֵ֥ת רָעָתָֽם׃

‎13 ‏כִּ֚י מִסְפַּ֣ר עָרֶ֔יךָ הָי֥וּ אֱלֹהֶ֖יךָ יְהוּדָ֑ה וּמִסְפַּ֞ר חֻצ֣וֹת יְרוּשָׁלִַ֗ם שַׂמְתֶּ֤ם מִזְבְּחוֹת֙ לַבֹּ֔שֶׁת מִזְבְּח֖וֹת לְקַטֵּ֥ר לַבָּֽעַל׃ ס

‎14 ‏וְאַתָּ֗ה אַל־תִּתְפַּלֵּל֙ בְּעַד־הָעָ֣ם הַזֶּ֔ה וְאַל־תִּשָּׂ֥א בַעֲדָ֖ם רִנָּ֣ה וּתְפִלָּ֑ה כִּ֣י אֵינֶ֣נִּי שֹׁמֵ֗עַ בְּעֵ֛ת קָרְאָ֥ם אֵלַ֖י בְּעַ֥ד רָעָתָֽם׃ ס

‎15 ‏מֶ֣ה לִֽידִידִ֞י בְּבֵיתִ֗י עֲשׂוֹתָ֤הּ הַֽמְזִמָּ֙תָה֙ הָֽרַבִּ֔ים וּבְשַׂר־קֹ֖דֶשׁ יַעַבְר֣וּ מֵֽעָלָ֑יִךְ כִּ֥י רָעָתֵ֖כִי אָ֥ז תַּעֲלֹֽזִי׃

‎16 ‏זַ֤יִת רַֽעֲנָן֙ יְפֵ֣ה פְרִי־תֹ֔אַר קָרָ֥א יְהוָ֖ה שְׁמֵ֑ךְ לְק֣וֹל׀ הֲמוּלָּ֣ה גְדֹלָ֗ה הִצִּ֥ית אֵשׁ֙ עָלֶ֔יהָ וְרָע֖וּ דָּלִיּוֹתָֽיו׃

‎17 ‏וַיהוָ֤ה צְבָאוֹת֙ הַנּוֹטֵ֣עַ אוֹתָ֔ךְ דִּבֶּ֥ר עָלַ֖יִךְ רָעָ֑ה בִּ֠גְלַל רָעַ֨ת בֵּֽית־יִשְׂרָאֵ֜ל וּבֵ֣ית יְהוּדָ֗ה אֲשֶׁ֨ר עָשׂ֥וּ לָהֶ֛ם לְהַכְעִסֵ֖נִי לְקַטֵּ֥ר לַבָּֽעַל׃ ס

‎18 ‏וַֽיהוָ֥ה הֽוֹדִיעַ֖נִי וָֽאֵדָ֑עָה אָ֖ז הִרְאִיתַ֥נִי מַעַלְלֵיהֶֽם׃

‎19 ‏וַאֲנִ֕י כְּכֶ֥בֶשׂ אַלּ֖וּף יוּבַ֣ל לִטְב֑וֹחַ וְלֹֽא־יָדַ֜עְתִּי כִּֽי־עָלַ֣י׀ חָשְׁב֣וּ מַחֲשָׁב֗וֹת נַשְׁחִ֨יתָה עֵ֤ץ בְּלַחְמוֹ֙ וְנִכְרְתֶ֙נּוּ֙ מֵאֶ֣רֶץ חַיִּ֔ים וּשְׁמ֖וֹ לֹֽא־יִזָּכֵ֥ר עֽוֹד׃

‎20 ‏וַֽיהוָ֤ה צְבָאוֹת֙ שֹׁפֵ֣ט צֶ֔דֶק בֹּחֵ֥ן כְּלָי֖וֹת וָלֵ֑ב אֶרְאֶ֤ה נִקְמָֽתְךָ֙ מֵהֶ֔ם כִּ֥י אֵלֶ֖יךָ גִּלִּ֥יתִי אֶת־רִיבִֽי׃ ס

‎21 ‏לָכֵ֗ן כֹּֽה־אָמַ֤ר יְהוָה֙ עַל־אַנְשֵׁ֣י עֲנָת֔וֹת הַֽמְבַקְשִׁ֥ים אֶֽת־נַפְשְׁךָ֖ לֵאמֹ֑ר לֹ֤א תִנָּבֵא֙ בְּשֵׁ֣ם יְהוָ֔ה וְלֹ֥א תָמ֖וּת בְּיָדֵֽנוּ׃ ס

‎22 ‏לָכֵ֗ן כֹּ֤ה אָמַר֙ יְהוָ֣ה צְבָא֔וֹת הִנְנִ֥י פֹקֵ֖ד עֲלֵיהֶ֑ם הַבַּֽחוּרִים֙ יָמֻ֣תוּ בַחֶ֔רֶב בְּנֵיהֶם֙ וּבְנ֣וֹתֵיהֶ֔ם יָמֻ֖תוּ בָּרָעָֽב׃

‎23 ‏וּשְׁאֵרִ֕ית לֹ֥א תִֽהְיֶ֖ה לָהֶ֑ם כִּֽי־אָבִ֥יא רָעָ֛ה אֶל־אַנְשֵׁ֥י עֲנָת֖וֹת שְׁנַ֥ת פְּקֻדָּתָֽם׃ ס

1 hadāḇār ’ăšer hāyâ ’el-yirəməyâû mē’ēṯ yəhwâ lē’mōr:

2 šimə‘û ’eṯ-diḇərê habərîṯ hazzō’ṯ wəḏibarətām ’el-’îš yəhûḏâ wə‘al-yōšəḇê yərûšālāim:

3 wə’āmarətā ’ălêhem kōh-’āmar yəhwâ ’ĕlōhê yiśərā’ēl ’ārûr hā’îš ’ăšer lō’ yišəm^a‘ ’eṯ-diḇərê habərîṯ hazzō’ṯ:

4 ’ăšer ṣiûîṯî ’eṯ-’ăḇwōṯêḵem bəywōm hwōṣî’î-’wōṯām mē’ereṣ-miṣərayim mikûr habarəzel lē’mōr šimə‘û ḇəqwōlî w^a‘ăśîṯem ’wōṯām kəḵōl ’ăšer-’ăṣaûeh ’eṯəḵem wihəyîṯem lî lə‘ām wə’ānōḵî ’ehəyeh lāḵem lē’lōhîm:

5 ləm^a‘an hāqîm ’eṯ-haššəḇû‘â ’ăšer-nišəb^a‘ətî la’ăḇwōṯêḵem lāṯēṯ lâem ’ereṣ zāḇaṯ ḥālāḇ ûḏəḇaš kayywōm hazzeh wā’^a‘an wā’ōmar ’āmēn| yəhwâ: s

6 wayyō’mer yəhwâ ’ēlay qərā’ ’eṯ-kāl-hadəḇārîm hā’ēlleh bə‘ārê yəhûḏâ ûḇəḥuṣwōṯ yərûšālaim lē’mōr šimə‘û ’eṯ-diḇərê habərîṯ hazzō’ṯ w^a‘ăśîṯem ’wōṯām:

7 kî hā‘ēḏ h^a‘iḏōṯî ba’ăḇwōṯêḵem bəywōm h^a‘ălwōṯî ’wōṯām mē’ereṣ miṣərayim wə‘aḏ-hayywōm hazzeh hašəkēm wəhā‘ēḏ lē’mōr šimə‘û bəqwōlî:

8 wəlō’ šāmə‘û wəlō’-hiṭṭû ’eṯ-’āzənām wayyēləḵû ’îš bišərîrûṯ libām hārā‘ wā’āḇî’ ‘ălêhem ’eṯ-kāl-diḇərê habərîṯ-hazzō’ṯ ’ăšer-ṣiûîṯî l^a‘ăśwōṯ wəlō’ ‘āśû: s

9 wayyō’mer yəhwâ ’ēlāy niməṣā’-qešer bə’îš yəhûḏâ ûḇəyōšəḇê yərûšālāim:

10 šāḇû ‘al-‘ăwōnōṯ ’ăḇwōṯām hāri’šōnîm ’ăšer mē’ănû lišəmwō‘a ’eṯ-dəḇāray wəhēmmâ hāləḵû ’^aḥărê ’ĕlōhîm ’ăḥērîm lə‘āḇəḏām hēfērû ḇêṯ-yiśərā’ēl ûḇêṯ yəhûḏâ ’eṯ-bərîṯî ’ăšer kāratî ’eṯ-’ăḇwōṯām: s

11 lāḵēn kōh ’āmar yəhwâ hinənî mēḇî’ ’ălêhem rā‘â ’ăšer lō’-yûḵəlû lāṣē’ṯ mimmennâ wəzā‘ăqû ’ēlay wəlō’ ’ešəm^a‘ ’ălêhem:

12 wəhāləḵû ‘ārê yəhûḏâ wəyōšəḇê yərûšālaim wəzā‘ăqû ’el-hā’ĕlōhîm ’ăšer hēm məqaṭṭərîm lâem wəhwōšē‘a lō’-ywōšî‘û lâem bə‘ēṯ rā‘āṯām:

13 kî misəpar ‘āreyḵā hāyû ’ĕlōheyḵā yəhûḏâ ûmisəpar ḥuṣwōṯ yərûšālaim śamətem mizəbəḥwōṯ labōšeṯ mizəbəḥwōṯ ləqaṭṭēr labā‘al: s

14 wə’atâ ’al-tiṯəpallēl bə‘aḏ-hā‘ām hazzeh wə’al-tiśśā’ ḇ^a‘ăḏām rinnâ ûṯəfillâ kî ’ênennî šōmē‘a bə‘ēṯ qārə’ām ’ēlay bə‘aḏ rā‘āṯām: s

15 meh lîḏîḏî bəḇêṯî ‘ăśwōṯāh haməzimmāṯâ hārabîm ûḇəśar-qōḏeš y^a‘aḇərû mē‘ālāyiḵə kî rā‘āṯēḵî ’āz t^a‘ălōzî:

16 zayiṯ r^a‘ănān yəfēh fərî-ṯō’ar qārā’ yəhwâ šəmēḵə ləqwōl| hămûllâ ḡəḏōlâ hiṣṣîṯ ’ēš ‘āleyhā wərā‘û dālîywōṯāyw:

17 wayhwâ ṣəḇā’wōṯ hannwōṭē‘a ’wōṯāḵə diber ‘ālayiḵə rā‘â biḡəlal rā‘aṯ bêṯ-yiśərā’ēl ûḇêṯ yəhûḏâ ’ăšer ‘āśû lâem ləhaḵə‘isēnî ləqaṭṭēr labā‘al: s

18 wayhwâ hwōḏî‘anî wā’ēḏā‘â ’āz hirə’îṯanî m^a‘aləlêhem:

19 wa’ănî kəḵeḇeś ’allûf yûḇal liṭəḇwōḥa wəlō’-yāḏ^a‘ətî kî-‘ālay| ḥāšəḇû m^aḥăšāḇwōṯ našəḥîṯâ ‘ēṣ bəl^aḥəmwō wəniḵərəṯennû mē’ereṣ ḥayyîm ûšəmwō lō’-yizzāḵēr ‘wōḏ:

20 wayhwâ ṣəḇā’wōṯ šōfēṭ ṣeḏeq bōḥēn kəlāywōṯ wālēḇ ’erə’eh niqəmāṯəḵā mēhem kî ’ēleyḵā gillîṯî ’eṯ-rîḇî: s

21 lāḵēn kōh-’āmar yəhwâ ‘al-’anəšê ‘ănāṯwōṯ haməḇaqəšîm ’eṯ-nafəšəḵā lē’mōr lō’ ṯinnāḇē’ bəšēm yəhwâ wəlō’ ṯāmûṯ bəyāḏēnû: s

22 lāḵēn kōh ’āmar yəhwâ ṣəḇā’wōṯ hinənî fōqēḏ ‘ălêhem hab^aḥûrîm yāmuṯû ḇ^aḥereḇ bənêhem ûḇənwōṯêhem yāmuṯû bārā‘āḇ:

23 ûšə’ērîṯ lō’ ṯihəyeh lâem kî-’āḇî’ rā‘â ’el-’anəšê ‘ănāṯwōṯ šənaṯ pəqudāṯām: s