‎1 ‏הִרְאַנִי֮ יְהוָה֒ וְהִנֵּ֗ה שְׁנֵי֙ דּוּדָאֵ֣י תְאֵנִ֔ים מוּעָדִ֕ים לִפְנֵ֖י הֵיכַ֣ל יְהוָ֑ה אַחֲרֵ֣י הַגְל֣וֹת נְבוּכַדְרֶאצַּ֣ר מֶֽלֶךְ־בָּבֶ֡ל אֶת־יְכָנְיָ֣הוּ בֶן־יְהוֹיָקִ֣ים מֶֽלֶךְ־יְהוּדָה֩ וְאֶת־שָׂרֵ֨י יְהוּדָ֜ה וְאֶת־הֶחָרָ֤שׁ וְאֶת־הַמַּסְגֵּר֙ מִיר֣וּשָׁלִַ֔ם וַיְבִאֵ֖ם בָּבֶֽל׃

‎2 ‏הַדּ֣וּד אֶחָ֗ד תְּאֵנִים֙ טֹב֣וֹת מְאֹ֔ד כִּתְאֵנֵ֖י הַבַּכֻּר֑וֹת וְהַדּ֣וּד אֶחָ֗ד תְּאֵנִים֙ רָע֣וֹת מְאֹ֔ד אֲשֶׁ֥ר לֹא־תֵֽאָכַ֖לְנָה מֵרֹֽעַ׃ ס

‎3 ‏וַיֹּ֨אמֶר יְהוָ֜ה אֵלַ֗י מָֽה־אַתָּ֤ה רֹאֶה֙ יִרְמְיָ֔הוּ וָאֹמַ֖ר תְּאֵנִ֑ים הַתְּאֵנִ֤ים הַטֹּבוֹת֙ טֹב֣וֹת מְאֹ֔ד וְהָֽרָעוֹת֙ רָע֣וֹת מְאֹ֔ד אֲשֶׁ֥ר לֹא־תֵאָכַ֖לְנָה מֵרֹֽעַ׃ פ

‎4 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎5 ‏כֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל כַּתְּאֵנִ֥ים הַטֹּב֖וֹת הָאֵ֑לֶּה כֵּֽן־אַכִּ֞יר אֶת־גָּל֣וּת יְהוּדָ֗ה אֲשֶׁ֨ר שִׁלַּ֜חְתִּי מִן־הַמָּק֥וֹם הַזֶּ֛ה אֶ֥רֶץ כַּשְׂדִּ֖ים לְטוֹבָֽה׃

‎6 ‏וְשַׂמְתִּ֨י עֵינִ֤י עֲלֵיהֶם֙ לְטוֹבָ֔ה וַהֲשִׁבֹתִ֖ים עַל־הָאָ֣רֶץ הַזֹּ֑את וּבְנִיתִים֙ וְלֹ֣א אֶהֱרֹ֔ס וּנְטַעְתִּ֖ים וְלֹ֥א אֶתּֽוֹשׁ׃

‎7 ‏וְנָתַתִּי֩ לָהֶ֨ם לֵ֜ב לָדַ֣עַת אֹתִ֗י כִּ֚י אֲנִ֣י יְהוָ֔ה וְהָיוּ־לִ֣י לְעָ֔ם וְאָ֣נֹכִ֔י אֶהְיֶ֥ה לָהֶ֖ם לֵאלֹהִ֑ים כִּֽי־יָשֻׁ֥בוּ אֵלַ֖י בְּכָל־לִבָּֽם׃ ס

‎8 ‏וְכַתְּאֵנִים֙ הָֽרָע֔וֹת אֲשֶׁ֥ר לֹא־תֵאָכַ֖לְנָה מֵרֹ֑עַ כִּי־כֹ֣ה׀ אָמַ֣ר יְהוָ֗ה כֵּ֣ן אֶ֠תֵּן אֶת־צִדְקִיָּ֨הוּ מֶֽלֶךְ־יְהוּדָ֤ה וְאֶת־שָׂרָיו֙ וְאֵ֣ת׀ שְׁאֵרִ֣ית יְרוּשָׁלִַ֗ם הַנִּשְׁאָרִים֙ בָּאָ֣רֶץ הַזֹּ֔את וְהַיֹּשְׁבִ֖ים בְּאֶ֥רֶץ מִצְרָֽיִם׃

‎9 ‏וּנְתַתִּים֙ לזועה לְזַעֲוָ֣ה לְרָעָ֔ה לְכֹ֖ל מַמְלְכ֣וֹת הָאָ֑רֶץ לְחֶרְפָּ֤ה וּלְמָשָׁל֙ לִשְׁנִינָ֣ה וְלִקְלָלָ֔ה בְּכָל־הַמְּקֹמ֖וֹת אֲשֶֽׁר־אַדִּיחֵ֥ם שָֽׁם׃

‎10 ‏וְשִׁלַּ֣חְתִּי בָ֔ם אֶת־הַחֶ֖רֶב אֶת־הָרָעָ֣ב וְאֶת־הַדָּ֑בֶר עַד־תֻּמָּם֙ מֵעַ֣ל הָאֲדָמָ֔ה אֲשֶׁר־נָתַ֥תִּי לָהֶ֖ם וְלַאֲבוֹתֵיהֶֽם׃ פ

1 hirə’anî yəhwâ wəhinnēh šənê dûḏā’ê ṯə’ēnîm mû‘āḏîm lifənê hêḵal yəhwâ ’^aḥărê haḡəlwōṯ nəḇûḵaḏəre’ṣṣar meleḵə-bāḇel ’eṯ-yəḵānəyâû ḇen-yəhwōyāqîm meleḵə-yəhûḏâ wə’eṯ-śārê yəhûḏâ wə’eṯ-heḥārāš wə’eṯ-hammasəgēr mîrûšālaim wayəḇi’ēm bāḇel:

2 hadûḏ ’eḥāḏ tə’ēnîm ṭōḇwōṯ mə’ōḏ kiṯə’ēnê habakurwōṯ wəhadûḏ ’eḥāḏ tə’ēnîm rā‘wōṯ mə’ōḏ ’ăšer lō’-ṯē’āḵalənâ mērō‘a: s

3 wayyō’mer yəhwâ ’ēlay mâ-’atâ rō’eh yirəməyâû wā’ōmar tə’ēnîm hatə’ēnîm haṭṭōḇwōṯ ṭōḇwōṯ mə’ōḏ wəhārā‘wōṯ rā‘wōṯ mə’ōḏ ’ăšer lō’-ṯē’āḵalənâ mērō‘a: f

4 wayəhî ḏəḇar-yəhwâ ’ēlay lē’mōr:

5 kōh-’āmar yəhwâ ’ĕlōhê yiśərā’ēl katə’ēnîm haṭṭōḇwōṯ hā’ēlleh kēn-’akîr ’eṯ-gālûṯ yəhûḏâ ’ăšer šill^aḥətî min-hammāqwōm hazzeh ’ereṣ kaśədîm ləṭwōḇâ:

6 wəśamətî ‘ênî ‘ălêhem ləṭwōḇâ wahăšiḇōṯîm ‘al-hā’āreṣ hazzō’ṯ ûḇənîṯîm wəlō’ ’ehĕrōs ûnəṭ^a‘ətîm wəlō’ ’etwōš:

7 wənāṯatî lâem lēḇ lāḏ^a‘aṯ ’ōṯî kî ’ănî yəhwâ wəhāyû-lî lə‘ām wə’ānōḵî ’ehəyeh lâem lē’lōhîm kî-yāšuḇû ’ēlay bəḵāl-libām: s

8 wəḵatə’ēnîm hārā‘wōṯ ’ăšer lō’-ṯē’āḵalənâ mērō‘a kî-ḵōh| ’āmar yəhwâ kēn ’etēn ’eṯ-ṣiḏəqîyâû meleḵə-yəhûḏâ wə’eṯ-śārāyw wə’ēṯ| šə’ērîṯ yərûšālaim hannišə’ārîm bā’āreṣ hazzō’ṯ wəhayyōšəḇîm bə’ereṣ miṣərāyim:

9 ûnəṯatîm lizəwā‘â ləz^a‘ăwâ lərā‘â ləḵōl mamələḵwōṯ hā’āreṣ ləḥerəpâ ûləmāšāl lišənînâ wəliqəlālâ bəḵāl-hamməqōmwōṯ ’ăšer-’adîḥēm šām:

10 wəšill^aḥətî ḇām ’eṯ-h^aḥereḇ ’eṯ-hārā‘āḇ wə’eṯ-hadāḇer ‘aḏ-tummām mē‘al hā’ăḏāmâ ’ăšer-nāṯatî lâem wəla’ăḇwōṯêhem: f