‎1 ‏בְּרֵאשִׁ֗ית מַמְלְכ֛וּת יְהוֹיָקִ֥ים בֶּן־יֹאשִׁיָּ֖הוּ מֶ֣לֶךְ יְהוּדָ֑ה הָיָה֙ הַדָּבָ֣ר הַזֶּ֔ה מֵאֵ֥ת יְהוָ֖ה לֵאמֹֽר׃

‎2 ‏כֹּ֣ה׀ אָמַ֣ר יְהוָ֗ה עֲמֹד֮ בַּחֲצַ֣ר בֵּית־יְהוָה֒ וְדִבַּרְתָּ֞ עַל־כָּל־עָרֵ֣י יְהוּדָ֗ה הַבָּאִים֙ לְהִשְׁתַּחֲוֹ֣ת בֵּית־יְהוָ֔ה אֵ֚ת כָּל־הַדְּבָרִ֔ים אֲשֶׁ֥ר צִוִּיתִ֖יךָ לְדַבֵּ֣ר אֲלֵיהֶ֑ם אַל־תִּגְרַ֖ע דָּבָֽר׃

‎3 ‏אוּלַ֣י יִשְׁמְע֔וּ וְיָשֻׁ֕בוּ אִ֖ישׁ מִדַּרְכּ֣וֹ הָרָעָ֑ה וְנִחַמְתִּ֣י אֶל־הָרָעָ֗ה אֲשֶׁ֨ר אָנֹכִ֤י חֹשֵׁב֙ לַעֲשׂ֣וֹת לָהֶ֔ם מִפְּנֵ֖י רֹ֥עַ מַעַלְלֵיהֶֽם׃

‎4 ‏וְאָמַרְתָּ֣ אֲלֵיהֶ֔ם כֹּ֖ה אָמַ֣ר יְהוָ֑ה אִם־לֹ֤א תִשְׁמְעוּ֙ אֵלַ֔י לָלֶ֙כֶת֙ בְּת֣וֹרָתִ֔י אֲשֶׁ֥ר נָתַ֖תִּי לִפְנֵיכֶֽם׃

‎5 ‏לִשְׁמֹ֗עַ עַל־דִּבְרֵ֨י עֲבָדַ֣י הַנְּבִאִ֔ים אֲשֶׁ֥ר אָנֹכִ֖י שֹׁלֵ֣חַ אֲלֵיכֶ֑ם וְהַשְׁכֵּ֥ם וְשָׁלֹ֖חַ וְלֹ֥א שְׁמַעְתֶּֽם׃

‎6 ‏וְנָתַתִּ֛י אֶת־הַבַּ֥יִת הַזֶּ֖ה כְּשִׁלֹ֑ה וְאֶת־הָעִ֤יר הזאתה הַזֹּאת֙ אֶתֵּ֣ן לִקְלָלָ֔ה לְכֹ֖ל גּוֹיֵ֥י הָאָֽרֶץ׃ ס

‎7 ‏וַֽיִּשְׁמְע֛וּ הַכֹּהֲנִ֥ים וְהַנְּבִאִ֖ים וְכָל־הָעָ֑ם אֶֽת־יִרְמְיָ֔הוּ מְדַבֵּ֛ר אֶת־הַדְּבָרִ֥ים הָאֵ֖לֶּה בְּבֵ֥ית יְהוָֽה׃

‎8 ‏וַיְהִ֣י׀ כְּכַלּ֣וֹת יִרְמְיָ֗הוּ לְדַבֵּר֙ אֵ֣ת כָּל־אֲשֶׁר־צִוָּ֣ה יְהוָ֔ה לְדַבֵּ֖ר אֶל־כָּל־הָעָ֑ם וַיִּתְפְּשׂ֨וּ אֹת֜וֹ הַכֹּהֲנִ֧ים וְהַנְּבִאִ֛ים וְכָל־הָעָ֥ם לֵאמֹ֖ר מ֥וֹת תָּמֽוּת׃

‎9 ‏מַדּוּעַ֩ נִבֵּ֨יתָ בְשֵׁם־יְהוָ֜ה לֵאמֹ֗ר כְּשִׁלוֹ֙ יִֽהְיֶה֙ הַבַּ֣יִת הַזֶּ֔ה וְהָעִ֥יר הַזֹּ֛את תֶּחֱרַ֖ב מֵאֵ֣ין יוֹשֵׁ֑ב וַיִּקָּהֵ֧ל כָּל־הָעָ֛ם אֶֽל־יִרְמְיָ֖הוּ בְּבֵ֥ית יְהוָֽה׃

‎10 ‏וַֽיִּשְׁמְע֣וּ׀ שָׂרֵ֣י יְהוּדָ֗ה אֵ֚ת הַדְּבָרִ֣ים הָאֵ֔לֶּה וַיַּעֲל֥וּ מִבֵּית־הַמֶּ֖לֶךְ בֵּ֣ית יְהוָ֑ה וַיֵּֽשְׁב֛וּ בְּפֶ֥תַח שַֽׁעַר־יְהוָ֖ה הֶחָדָֽשׁ׃ ס

‎11 ‏וַיֹּ֨אמְר֜וּ הַכֹּהֲנִ֤ים וְהַנְּבִאִים֙ אֶל־הַשָּׂרִ֔ים וְאֶל־כָּל־הָעָ֖ם לֵאמֹ֑ר מִשְׁפַּט־מָ֙וֶת֙ לָאִ֣ישׁ הַזֶּ֔ה כִּ֤י נִבָּא֙ אֶל־הָעִ֣יר הַזֹּ֔את כַּאֲשֶׁ֥ר שְׁמַעְתֶּ֖ם בְּאָזְנֵיכֶֽם׃

‎12 ‏וַיֹּ֤אמֶר יִרְמְיָ֙הוּ֙ אֶל־כָּל־הַשָּׂרִ֔ים וְאֶל־כָּל־הָעָ֖ם לֵאמֹ֑ר יְהוָ֣ה שְׁלָחַ֗נִי לְהִנָּבֵ֞א אֶל־הַבַּ֤יִת הַזֶּה֙ וְאֶל־הָעִ֣יר הַזֹּ֔את אֵ֥ת כָּל־הַדְּבָרִ֖ים אֲשֶׁ֥ר שְׁמַעְתֶּֽם׃

‎13 ‏וְעַתָּ֗ה הֵיטִ֤יבוּ דַרְכֵיכֶם֙ וּמַ֣עַלְלֵיכֶ֔ם וְשִׁמְע֕וּ בְּק֖וֹל יְהוָ֣ה אֱלֹהֵיכֶ֑ם וְיִנָּחֵ֣ם יְהוָ֔ה אֶל־הָ֣רָעָ֔ה אֲשֶׁ֥ר דִּבֶּ֖ר עֲלֵיכֶֽם׃

‎14 ‏וַאֲנִ֖י הִנְנִ֣י בְיֶדְכֶ֑ם עֲשׂוּ־לִ֛י כַּטּ֥וֹב וְכַיָּשָׁ֖ר בְּעֵינֵיכֶֽם׃

‎15 ‏אַ֣ךְ׀ יָדֹ֣עַ תֵּדְע֗וּ כִּ֣י אִם־מְמִתִ֣ים אַתֶּם֮ אֹתִי֒ כִּי־דָ֣ם נָקִ֗י אַתֶּם֙ נֹתְנִ֣ים עֲלֵיכֶ֔ם וְאֶל־הָעִ֥יר הַזֹּ֖את וְאֶל־יֹשְׁבֶ֑יהָ כִּ֣י בֶאֱמֶ֗ת שְׁלָחַ֤נִי יְהוָה֙ עֲלֵיכֶ֔ם לְדַבֵּר֙ בְּאָזְנֵיכֶ֔ם אֵ֥ת כָּל־הַדְּבָרִ֖ים הָאֵֽלֶּה׃ ס

‎16 ‏וַיֹּאמְר֤וּ הַשָּׂרִים֙ וְכָל־הָעָ֔ם אֶל־הַכֹּהֲנִ֖ים וְאֶל־הַנְּבִיאִ֑ים אֵין־לָאִ֤ישׁ הַזֶּה֙ מִשְׁפַּט־מָ֔וֶת כִּ֗י בְּשֵׁ֛ם יְהוָ֥ה אֱלֹהֵ֖ינוּ דִּבֶּ֥ר אֵלֵֽינוּ׃

‎17 ‏וַיָּקֻ֣מוּ אֲנָשִׁ֔ים מִזִּקְנֵ֖י הָאָ֑רֶץ וַיֹּ֣אמְר֔וּ אֶל־כָּל־קְהַ֥ל הָעָ֖ם לֵאמֹֽר׃

‎18 ‏מיכיה מִיכָה֙ הַמּ֣וֹרַשְׁתִּ֔י הָיָ֣ה נִבָּ֔א בִּימֵ֖י חִזְקִיָּ֣הוּ מֶֽלֶךְ־יְהוּדָ֑ה וַיֹּ֣אמֶר אֶל־כָּל־עַם֩ יְהוּדָ֨ה לֵאמֹ֜ר כֹּֽה־אָמַ֣ר׀ יְהוָ֣ה צְבָא֗וֹת צִיּ֞וֹן שָׂדֶ֤ה תֵֽחָרֵשׁ֙ וִירוּשָׁלַ֙יִם֙ עִיִּ֣ים תִּֽהְיֶ֔ה וְהַ֥ר הַבַּ֖יִת לְבָמ֥וֹת יָֽעַר׃

‎19 ‏הֶהָמֵ֣ת הֱ֠מִתֻהוּ חִזְקִיָּ֨הוּ מֶֽלֶךְ־יְהוּדָ֜ה וְכָל־יְהוּדָ֗ה הֲלֹא֮ יָרֵ֣א אֶת־יְהוָה֒ וַיְחַל֙ אֶת־פְּנֵ֣י יְהוָ֔ה וַיִּנָּ֣חֶם יְהוָ֔ה אֶל־הָרָעָ֖ה אֲשֶׁר־דִּבֶּ֣ר עֲלֵיהֶ֑ם וַאֲנַ֗חְנוּ עֹשִׂ֛ים רָעָ֥ה גְדוֹלָ֖ה עַל־נַפְשׁוֹתֵֽינוּ׃

‎20 ‏וְגַם־אִ֗ישׁ הָיָ֤ה מִתְנַבֵּא֙ בְּשֵׁ֣ם יְהוָ֔ה אֽוּרִיָּ֙הוּ֙ בֶּֽן־שְׁמַעְיָ֔הוּ מִקִּרְיַ֖ת הַיְּעָרִ֑ים וַיִּנָּבֵ֞א עַל־הָעִ֤יר הַזֹּאת֙ וְעַל־הָאָ֣רֶץ הַזֹּ֔את כְּכֹ֖ל דִּבְרֵ֥י יִרְמְיָֽהוּ׃

‎21 ‏וַיִּשְׁמַ֣ע הַמֶּֽלֶךְ־יְ֠הוֹיָקִים וְכָל־גִּבּוֹרָ֤יו וְכָל־הַשָּׂרִים֙ אֶת־דְּבָרָ֔יו וַיְבַקֵּ֥שׁ הַמֶּ֖לֶךְ הֲמִית֑וֹ וַיִּשְׁמַ֤ע אוּרִיָּ֙הוּ֙ וַיִּרָ֔א וַיִּבְרַ֖ח וַיָּבֹ֥א מִצְרָֽיִם׃

‎22 ‏וַיִּשְׁלַ֞ח הַמֶּ֧לֶךְ יְהוֹיָקִ֛ים אֲנָשִׁ֖ים מִצְרָ֑יִם אֵ֣ת אֶלְנָתָ֧ן בֶּן־עַכְבּ֛וֹר וַאֲנָשִׁ֥ים אִתּ֖וֹ אֶל־מִצְרָֽיִם׃

‎23 ‏וַיּוֹצִ֨יאוּ אֶת־אוּרִיָּ֜הוּ מִמִּצְרַ֗יִם וַיְבִאֻ֙הוּ֙ אֶל־הַמֶּ֣לֶךְ יְהוֹיָקִ֔ים וַיַּכֵּ֖הוּ בֶּחָ֑רֶב וַיַּשְׁלֵךְ֙ אֶת־נִבְלָת֔וֹ אֶל־קִבְרֵ֖י בְּנֵ֥י הָעָֽם׃

‎24 ‏אַ֗ךְ יַ֚ד אֲחִיקָ֣ם בֶּן־שָׁפָ֔ן הָיְתָ֖ה אֶֽת־יִרְמְיָ֑הוּ לְבִלְתִּ֛י תֵּת־אֹת֥וֹ בְיַד־הָעָ֖ם לַהֲמִיתֽוֹ׃ פ

1 bərē’šîṯ mamələḵûṯ yəhwōyāqîm ben-yō’šîyâû meleḵə yəhûḏâ hāyâ hadāḇār hazzeh mē’ēṯ yəhwâ lē’mōr:

2 kōh| ’āmar yəhwâ ‘ămōḏ b^aḥăṣar bêṯ-yəhwâ wəḏibarətā ‘al-kāl-‘ārê yəhûḏâ habā’îm ləhišət^aḥăwōṯ bêṯ-yəhwâ ’ēṯ kāl-hadəḇārîm ’ăšer ṣiûîṯîḵā ləḏabēr ’ălêhem ’al-tiḡər^a‘ dāḇār:

3 ’ûlay yišəmə‘û wəyāšuḇû ’îš midarəkwō hārā‘â wəniḥamətî ’el-hārā‘â ’ăšer ’ānōḵî ḥōšēḇ l^a‘ăśwōṯ lâem mipənê rō‘a m^a‘aləlêhem:

4 wə’āmarətā ’ălêhem kōh ’āmar yəhwâ ’im-lō’ ṯišəmə‘û ’ēlay lāleḵeṯ bəṯwōrāṯî ’ăšer nāṯatî lifənêḵem:

5 lišəmō‘a ‘al-diḇərê ‘ăḇāḏay hannəḇi’îm ’ăšer ’ānōḵî šōlēḥa ’ălêḵem wəhašəkēm wəšālōḥa wəlō’ šəm^a‘ətem:

6 wənāṯatî ’eṯ-habayiṯ hazzeh kəšilōh wə’eṯ-hā‘îr hazzō’ṯâ hazzō’ṯ ’etēn liqəlālâ ləḵōl gwōyê hā’āreṣ: s

7 wayyišəmə‘û hakōhănîm wəhannəḇi’îm wəḵāl-hā‘ām ’eṯ-yirəməyâû məḏabēr ’eṯ-hadəḇārîm hā’ēlleh bəḇêṯ yəhwâ:

8 wayəhî| kəḵallwōṯ yirəməyâû ləḏabēr ’ēṯ kāl-’ăšer-ṣiûâ yəhwâ ləḏabēr ’el-kāl-hā‘ām wayyiṯəpəśû ’ōṯwō hakōhănîm wəhannəḇi’îm wəḵāl-hā‘ām lē’mōr mwōṯ tāmûṯ:

9 madû‘a nibêṯā ḇəšēm-yəhwâ lē’mōr kəšilwō yihəyeh habayiṯ hazzeh wəhā‘îr hazzō’ṯ teḥĕraḇ mē’ên ywōšēḇ wayyiqqâēl kāl-hā‘ām ’el-yirəməyâû bəḇêṯ yəhwâ:

10 wayyišəmə‘û| śārê yəhûḏâ ’ēṯ hadəḇārîm hā’ēlleh wayy^a‘ălû mibêṯ-hammeleḵə bêṯ yəhwâ wayyēšəḇû bəfeṯ^aḥ š^a‘ar-yəhwâ heḥāḏāš: s

11 wayyō’mərû hakōhănîm wəhannəḇi’îm ’el-haśśārîm wə’el-kāl-hā‘ām lē’mōr mišəpaṭ-māweṯ lā’îš hazzeh kî nibā’ ’el-hā‘îr hazzō’ṯ ka’ăšer šəm^a‘ətem bə’āzənêḵem:

12 wayyō’mer yirəməyâû ’el-kāl-haśśārîm wə’el-kāl-hā‘ām lē’mōr yəhwâ šəlāḥanî ləhinnāḇē’ ’el-habayiṯ hazzeh wə’el-hā‘îr hazzō’ṯ ’ēṯ kāl-hadəḇārîm ’ăšer šəm^a‘ətem:

13 wə‘atâ hêṭîḇû ḏarəḵêḵem ûm^a‘aləlêḵem wəšimə‘û bəqwōl yəhwâ ’ĕlōhêḵem wəyinnāḥēm yəhwâ ’el-hārā‘â ’ăšer diber ‘ălêḵem:

14 wa’ănî hinənî ḇəyeḏəḵem ‘ăśû-lî kaṭṭwōḇ wəḵayyāšār bə‘ênêḵem:

15 ’aḵə| yāḏō‘a tēḏə‘û kî ’im-məmiṯîm ’atem ’ōṯî kî-ḏām nāqî ’atem nōṯənîm ‘ălêḵem wə’el-hā‘îr hazzō’ṯ wə’el-yōšəḇeyhā kî ḇe’ĕmeṯ šəlāḥanî yəhwâ ‘ălêḵem ləḏabēr bə’āzənêḵem ’ēṯ kāl-hadəḇārîm hā’ēlleh: s

16 wayyō’mərû haśśārîm wəḵāl-hā‘ām ’el-hakōhănîm wə’el-hannəḇî’îm ’ên-lā’îš hazzeh mišəpaṭ-māweṯ kî bəšēm yəhwâ ’ĕlōhênû diber ’ēlênû:

17 wayyāqumû ’ănāšîm mizziqənê hā’āreṣ wayyō’mərû ’el-kāl-qəhal hā‘ām lē’mōr:

18 mîḵāyâ mîḵâ hammwōrašətî hāyâ nibā’ bîmê ḥizəqîyâû meleḵə-yəhûḏâ wayyō’mer ’el-kāl-‘am yəhûḏâ lē’mōr kōh-’āmar| yəhwâ ṣəḇā’wōṯ ṣîywōn śāḏeh ṯēḥārēš wîrûšālayim ‘îyîm tihəyeh wəhar habayiṯ ləḇāmwōṯ yā‘ar:

19 hehāmēṯ hĕmiṯuhû ḥizəqîyâû meleḵə-yəhûḏâ wəḵāl-yəhûḏâ hălō’ yārē’ ’eṯ-yəhwâ wayəḥal ’eṯ-pənê yəhwâ wayyinnāḥem yəhwâ ’el-hārā‘â ’ăšer-diber ‘ălêhem wa’ăn^aḥənû ‘ōśîm rā‘â ḡəḏwōlâ ‘al-nafəšwōṯênû:

20 wəḡam-’îš hāyâ miṯənabē’ bəšēm yəhwâ ’ûrîyâû ben-šəm^a‘əyâû miqqirəyaṯ hayyə‘ārîm wayyinnāḇē’ ‘al-hā‘îr hazzō’ṯ wə‘al-hā’āreṣ hazzō’ṯ kəḵōl diḇərê yirəməyâû:

21 wayyišəm^a‘ hammeleḵə-yəhwōyāqîm wəḵāl-gibwōrāyw wəḵāl-haśśārîm ’eṯ-dəḇārāyw wayəḇaqqēš hammeleḵə hămîṯwō wayyišəm^a‘ ’ûrîyâû wayyirā’ wayyiḇər^aḥ wayyāḇō’ miṣərāyim:

22 wayyišəl^aḥ hammeleḵə yəhwōyāqîm ’ănāšîm miṣərāyim ’ēṯ ’elənāṯān ben-‘aḵəbwōr wa’ănāšîm ’itwō ’el-miṣərāyim:

23 wayywōṣî’û ’eṯ-’ûrîyâû mimmiṣərayim wayəḇi’uhû ’el-hammeleḵə yəhwōyāqîm wayyakēhû beḥāreḇ wayyašəlēḵə ’eṯ-niḇəlāṯwō ’el-qiḇərê bənê hā‘ām:

24 ’aḵə yaḏ ’ăḥîqām ben-šāfān hāyəṯâ ’eṯ-yirəməyâû ləḇilətî tēṯ-’ōṯwō ḇəyaḏ-hā‘ām lahămîṯwō: f