‎1 ‏וְהִנֵּ֣ה׀ אִ֣ישׁ אֱלֹהִ֗ים בָּ֧א מִיהוּדָ֛ה בִּדְבַ֥ר יְהוָ֖ה אֶל־בֵּֽית־אֵ֑ל וְיָרָבְעָ֛ם עֹמֵ֥ד עַל־הַמִּזְבֵּ֖חַ לְהַקְטִֽיר׃

‎2 ‏וַיִּקְרָ֤א עַל־הַמִּזְבֵּ֙חַ֙ בִּדְבַ֣ר יְהוָ֔ה וַיֹּ֙אמֶר֙ מִזְבֵּ֣חַ מִזְבֵּ֔חַ כֹּ֖ה אָמַ֣ר יְהוָ֑ה הִנֵּֽה־בֵ֞ן נוֹלָ֤ד לְבֵית־דָּוִד֙ יֹאשִׁיָּ֣הוּ שְׁמ֔וֹ וְזָבַ֣ח עָלֶ֗יךָ אֶת־כֹּהֲנֵ֤י הַבָּמוֹת֙ הַמַּקְטִרִ֣ים עָלֶ֔יךָ וְעַצְמ֥וֹת אָדָ֖ם יִשְׂרְפ֥וּ עָלֶֽיךָ׃

‎3 ‏וְנָתַן֩ בַּיּ֨וֹם הַה֤וּא מוֹפֵת֙ לֵאמֹ֔ר זֶ֣ה הַמּוֹפֵ֔ת אֲשֶׁ֖ר דִּבֶּ֣ר יְהוָ֑ה הִנֵּ֤ה הַמִּזְבֵּ֙חַ֙ נִקְרָ֔ע וְנִשְׁפַּ֖ךְ הַדֶּ֥שֶׁן אֲשֶׁר־עָלָֽיו׃

‎4 ‏וַיְהִי֩ כִשְׁמֹ֨עַ הַמֶּ֜לֶךְ אֶת־דְּבַ֣ר אִישׁ־הָאֱלֹהִ֗ים אֲשֶׁ֨ר קָרָ֤א עַל־הַמִּזְבֵּ֙חַ֙ בְּבֵֽית־אֵ֔ל וַיִּשְׁלַ֨ח יָרָבְעָ֧ם אֶת־יָד֛וֹ מֵעַ֥ל הַמִּזְבֵּ֖חַ לֵאמֹ֣ר׀ תִּפְשֻׂ֑הוּ וַתִּיבַ֤שׁ יָדוֹ֙ אֲשֶׁ֣ר שָׁלַ֣ח עָלָ֔יו וְלֹ֥א יָכֹ֖ל לַהֲשִׁיבָ֥הּ אֵלָֽיו׃

‎5 ‏וְהַמִּזְבֵּ֣חַ נִקְרָ֔ע וַיִּשָּׁפֵ֥ךְ הַדֶּ֖שֶׁן מִן־הַמִּזְבֵּ֑חַ כַּמּוֹפֵ֗ת אֲשֶׁ֥ר נָתַ֛ן אִ֥ישׁ הָאֱלֹהִ֖ים בִּדְבַ֥ר יְהוָֽה׃

‎6 ‏וַיַּ֨עַן הַמֶּ֜לֶךְ וַיֹּ֣אמֶר׀ אֶל־אִ֣ישׁ הָאֱלֹהִ֗ים חַל־נָ֞א אֶת־פְּנֵ֨י יְהוָ֤ה אֱלֹהֶ֙יךָ֙ וְהִתְפַּלֵּ֣ל בַּעֲדִ֔י וְתָשֹׁ֥ב יָדִ֖י אֵלָ֑י וַיְחַ֤ל אִישׁ־הָֽאֱלֹהִים֙ אֶת־פְּנֵ֣י יְהוָ֔ה וַתָּ֤שָׁב יַד־הַמֶּ֙לֶךְ֙ אֵלָ֔יו וַתְּהִ֖י כְּבָרִֽאשֹׁנָֽה׃

‎7 ‏וַיְדַבֵּ֤ר הַמֶּ֙לֶךְ֙ אֶל־אִ֣ישׁ הָאֱלֹהִ֔ים בֹּאָה־אִתִּ֥י הַבַּ֖יְתָה וּֽסְעָ֑דָה וְאֶתְּנָ֥ה לְךָ֖ מַתָּֽת׃

‎8 ‏וַיֹּ֤אמֶר אִישׁ־הָֽאֱלֹהִים֙ אֶל־הַמֶּ֔לֶךְ אִם־תִּתֶּן־לִי֙ אֶת־חֲצִ֣י בֵיתֶ֔ךָ לֹ֥א אָבֹ֖א עִמָּ֑ךְ וְלֹֽא־אֹ֤כַל לֶ֙חֶם֙ וְלֹ֣א אֶשְׁתֶּה־מַּ֔יִם בַּמָּק֖וֹם הַזֶּֽה׃

‎9 ‏כִּֽי־כֵ֣ן׀ צִוָּ֣ה אֹתִ֗י בִּדְבַ֤ר יְהוָה֙ לֵאמֹ֔ר לֹא־תֹ֥אכַל לֶ֖חֶם וְלֹ֣א תִשְׁתֶּה־מָּ֑יִם וְלֹ֣א תָשׁ֔וּב בַּדֶּ֖רֶךְ אֲשֶׁ֥ר הָלָֽכְתָּ׃

‎10 ‏וַיֵּ֖לֶךְ בְּדֶ֣רֶךְ אַחֵ֑ר וְלֹֽא־שָׁ֣ב בַּדֶּ֔רֶךְ אֲשֶׁ֛ר בָּ֥א בָ֖הּ אֶל־בֵּֽית־אֵֽל׃ פ

‎11 ‏וְנָבִ֤יא אֶחָד֙ זָקֵ֔ן יֹשֵׁ֖ב בְּבֵֽית־אֵ֑ל וַיָּב֣וֹא בְנ֡וֹ וַיְסַפֶּר־ל֣וֹ אֶת־כָּל־הַמַּעֲשֶׂ֣ה אֲשֶׁר־עָשָׂה֩ אִישׁ־הָאֱלֹהִ֨ים׀ הַיּ֜וֹם בְּבֵֽית־אֵ֗ל אֶת־הַדְּבָרִים֙ אֲשֶׁ֣ר דִּבֶּ֣ר אֶל־הַמֶּ֔לֶךְ וַֽיְסַפְּר֖וּם לַאֲבִיהֶֽם׃

‎12 ‏וַיְדַבֵּ֤ר אֲלֵהֶם֙ אֲבִיהֶ֔ם אֵֽי־זֶ֥ה הַדֶּ֖רֶךְ הָלָ֑ךְ וַיִּרְא֣וּ בָנָ֗יו אֶת־הַדֶּ֙רֶךְ֙ אֲשֶׁ֤ר הָלַךְ֙ אִ֣ישׁ הָאֱלֹהִ֔ים אֲשֶׁר־בָּ֖א מִיהוּדָֽה׃

‎13 ‏וַיֹּ֙אמֶר֙ אֶל־בָּנָ֔יו חִבְשׁוּ־לִ֖י הַחֲמ֑וֹר וַיַּחְבְּשׁוּ־ל֣וֹ הַחֲמ֔וֹר וַיִּרְכַּ֖ב עָלָֽיו׃

‎14 ‏וַיֵּ֗לֶךְ אַֽחֲרֵי֙ אִ֣ישׁ הָאֱלֹהִ֔ים וַיִּ֨מְצָאֵ֔הוּ יֹשֵׁ֖ב תַּ֣חַת הָאֵלָ֑ה וַיֹּ֣אמֶר אֵלָ֗יו הַאַתָּ֧ה אִישׁ־הָאֱלֹהִ֛ים אֲשֶׁר־בָּ֥אתָ מִֽיהוּדָ֖ה וַיֹּ֥אמֶר אָֽנִי׃

‎15 ‏וַיֹּ֣אמֶר אֵלָ֔יו לֵ֥ךְ אִתִּ֖י הַבָּ֑יְתָה וֶאֱכֹ֖ל לָֽחֶם׃

‎16 ‏וַיֹּ֗אמֶר לֹ֥א אוּכַ֛ל לָשׁ֥וּב אִתָּ֖ךְ וְלָב֣וֹא אִתָּ֑ךְ וְלֹֽא־אֹ֣כַל לֶ֗חֶם וְלֹֽא־אֶשְׁתֶּ֤ה אִתְּךָ֙ מַ֔יִם בַּמָּק֖וֹם הַזֶּֽה׃

‎17 ‏כִּֽי־דָבָ֤ר אֵלַי֙ בִּדְבַ֣ר יְהוָ֔ה לֹֽא־תֹאכַ֣ל לֶ֔חֶם וְלֹֽא־תִשְׁתֶּ֥ה שָׁ֖ם מָ֑יִם לֹא־תָשׁ֣וּב לָלֶ֔כֶת בַּדֶּ֖רֶךְ אֲשֶׁר־הָלַ֥כְתָּ בָּֽהּ׃

‎18 ‏וַיֹּ֣אמֶר ל֗וֹ גַּם־אֲנִ֣י נָבִיא֮ כָּמוֹךָ֒ וּמַלְאָ֡ךְ דִּבֶּ֣ר אֵלַי֩ בִּדְבַ֨ר יְהוָ֜ה לֵאמֹ֗ר הֲשִׁבֵ֤הוּ אִתְּךָ֙ אֶל־בֵּיתֶ֔ךָ וְיֹ֥אכַל לֶ֖חֶם וְיֵ֣שְׁתְּ מָ֑יִם כִּחֵ֖שׁ לֽוֹ׃

‎19 ‏וַיָּ֣שָׁב אִתּ֗וֹ וַיֹּ֥אכַל לֶ֛חֶם בְּבֵית֖וֹ וַיֵּ֥שְׁתְּ מָֽיִם׃

‎20 ‏וַיְהִ֕י הֵ֥ם יֹשְׁבִ֖ים אֶל־הַשֻּׁלְחָ֑ן פוַֽיְהִי֙ דְּבַר־יְהוָ֔ה אֶל־הַנָּבִ֖יא אֲשֶׁ֥ר הֱשִׁיבֽוֹ׃

‎21 ‏וַיִּקְרָ֞א אֶל־אִ֣ישׁ הָאֱלֹהִ֗ים אֲשֶׁר־בָּ֤א מִֽיהוּדָה֙ לֵאמֹ֔ר כֹּ֖ה אָמַ֣ר יְהוָ֑ה יַ֗עַן כִּ֤י מָרִ֙יתָ֙ פִּ֣י יְהוָ֔ה וְלֹ֤א שָׁמַ֙רְתָּ֙ אֶת־הַמִּצְוָ֔ה אֲשֶׁ֥ר צִוְּךָ֖ יְהוָ֥ה אֱלֹהֶֽיךָ׃

‎22 ‏וַתָּ֗שָׁב וַתֹּ֤אכַל לֶ֙חֶם֙ וַתֵּ֣שְׁתְּ מַ֔יִם בַּמָּקוֹם֙ אֲשֶׁ֣ר דִּבֶּ֣ר אֵלֶ֔יךָ אַל־תֹּ֥אכַל לֶ֖חֶם וְאַל־תֵּ֣שְׁתְּ מָ֑יִם לֹֽא־תָב֥וֹא נִבְלָתְךָ֖ אֶל־קֶ֥בֶר אֲבֹתֶֽיךָ׃

‎23 ‏וַיְהִ֗י אַחֲרֵ֛י אָכְל֥וֹ לֶ֖חֶם וְאַחֲרֵ֣י שְׁתוֹת֑וֹ וַיַּחֲבָשׁ־ל֣וֹ הַחֲמ֔וֹר לַנָּבִ֖יא אֲשֶׁ֥ר הֱשִׁיבֽוֹ׃

‎24 ‏וַיֵּ֕לֶךְ וַיִּמְצָאֵ֧הוּ אַרְיֵ֛ה בַּדֶּ֖רֶךְ וַיְמִיתֵ֑הוּ וַתְּהִ֤י נִבְלָתוֹ֙ מֻשְׁלֶ֣כֶת בַּדֶּ֔רֶךְ וְהַחֲמוֹר֙ עֹמֵ֣ד אֶצְלָ֔הּ וְהָ֣אַרְיֵ֔ה עֹמֵ֖ד אֵ֥צֶל הַנְּבֵלָֽה׃

‎25 ‏וְהִנֵּ֧ה אֲנָשִׁ֣ים עֹבְרִ֗ים וַיִּרְא֤וּ אֶת־הַנְּבֵלָה֙ מֻשְׁלֶ֣כֶת בַּדֶּ֔רֶךְ וְאֶת־הָ֣אַרְיֵ֔ה עֹמֵ֖ד אֵ֣צֶל הַנְּבֵלָ֑ה וַיָּבֹ֙אוּ֙ וַיְדַבְּר֣וּ בָעִ֔יר אֲשֶׁ֛ר הַנָּבִ֥יא הַזָּקֵ֖ן יֹשֵׁ֥ב בָּֽהּ׃

‎26 ‏וַיִּשְׁמַ֣ע הַנָּבִיא֮ אֲשֶׁ֣ר הֱשִׁיב֣וֹ מִן־הַדֶּרֶךְ֒ וַיֹּ֙אמֶר֙ אִ֣ישׁ הָאֱלֹהִ֣ים ה֔וּא אֲשֶׁ֥ר מָרָ֖ה אֶת־פִּ֣י יְהוָ֑ה וַיִּתְּנֵ֨הוּ יְהוָ֜ה לָאַרְיֵ֗ה וַֽיִּשְׁבְּרֵ֙הוּ֙ וַיְמִתֵ֔הוּ כִּדְבַ֥ר יְהוָ֖ה אֲשֶׁ֥ר דִּבֶּר־לֽוֹ׃

‎27 ‏וַיְדַבֵּ֤ר אֶל־בָּנָיו֙ לֵאמֹ֔ר חִבְשׁוּ־לִ֖י אֶֽת־הַחֲמ֑וֹר וַֽיַּחֲבֹֽשׁוּ׃

‎28 ‏וַיֵּ֗לֶךְ וַיִּמְצָ֤א אֶת־נִבְלָתוֹ֙ מֻשְׁלֶ֣כֶת בַּדֶּ֔רֶךְ וַֽחֲמוֹר֙ וְהָ֣אַרְיֵ֔ה עֹמְדִ֖ים אֵ֣צֶל הַנְּבֵלָ֑ה לֹֽא־אָכַ֤ל הָֽאַרְיֵה֙ אֶת־הַנְּבֵלָ֔ה וְלֹ֥א שָׁבַ֖ר אֶֽת־הַחֲמֽוֹר׃

‎29 ‏וַיִּשָּׂ֨א הַנָּבִ֜יא אֶת־נִבְלַ֧ת אִישׁ־הָאֱלֹהִ֛ים וַיַּנִּחֵ֥הוּ אֶֽל־הַחֲמ֖וֹר וַיְשִׁיבֵ֑הוּ וַיָּבֹ֗א אֶל־עִיר֙ הַנָּבִ֣יא הַזָּקֵ֔ן לִסְפֹּ֖ד וּלְקָבְרֽוֹ׃

‎30 ‏וַיַּנַּ֥ח אֶת־נִבְלָת֖וֹ בְּקִבְר֑וֹ וַיִּסְפְּד֥וּ עָלָ֖יו ה֥וֹי אָחִֽי׃

‎31 ‏וַיְהִי֮ אַחֲרֵ֣י קָבְר֣וֹ אֹתוֹ֒ וַיֹּ֤אמֶר אֶל־בָּנָיו֙ לֵאמֹ֔ר בְּמוֹתִי֙ וּקְבַרְתֶּ֣ם אֹתִ֔י בַּקֶּ֕בֶר אֲשֶׁ֛ר אִ֥ישׁ הָאֱלֹהִ֖ים קָב֣וּר בּ֑וֹ אֵ֚צֶל עַצְמֹתָ֔יו הַנִּ֖יחוּ אֶת־עַצְמֹתָֽי׃

‎32 ‏כִּי֩ הָיֹ֨ה יִהְיֶ֜ה הַדָּבָ֗ר אֲשֶׁ֤ר קָרָא֙ בִּדְבַ֣ר יְהוָ֔ה עַל־הַמִּזְבֵּ֖חַ אֲשֶׁ֣ר בְּבֵֽית־אֵ֑ל וְעַל֙ כָּל־בָּתֵּ֣י הַבָּמ֔וֹת אֲשֶׁ֖ר בְּעָרֵ֥י שֹׁמְרֽוֹן׃ פ

‎33 ‏אַחַר֙ הַדָּבָ֣ר הַזֶּ֔ה לֹֽא־שָׁ֥ב יָרָבְעָ֖ם מִדַּרְכּ֣וֹ הָרָעָ֑ה וַ֠יָּשָׁב וַיַּ֜עַשׂ מִקְצ֤וֹת הָעָם֙ כֹּהֲנֵ֣י בָמ֔וֹת הֶֽחָפֵץ֙ יְמַלֵּ֣א אֶת־יָד֔וֹ וִיהִ֖י כֹּהֲנֵ֥י בָמֽוֹת׃

‎34 ‏וַיְהִי֙ בַּדָּבָ֣ר הַזֶּ֔ה לְחַטַּ֖את בֵּ֣ית יָרָבְעָ֑ם וּלְהַכְחִיד֙ וּלְהַשְׁמִ֔יד מֵעַ֖ל פְּנֵ֥י הָאֲדָמָֽה׃ פ

1 wəhinnēh| ’îš ’ĕlōhîm bā’ mîhûḏâ biḏəḇar yəhwâ ’el-bêṯ-’ēl wəyārāḇə‘ām ‘ōmēḏ ‘al-hammizəbēḥa ləhaqəṭîr:

2 wayyiqərā’ ‘al-hammizəbēḥa biḏəḇar yəhwâ wayyō’mer mizəbēḥa mizəbēḥa kōh ’āmar yəhwâ hinnēh-ḇēn nwōlāḏ ləḇêṯ-dāwiḏ yō’šîyâû šəmwō wəzāḇ^aḥ ‘āleyḵā ’eṯ-kōhănê habāmwōṯ hammaqəṭirîm ‘āleyḵā wə‘aṣəmwōṯ ’āḏām yiśərəfû ‘āleyḵā:

3 wənāṯan bayywōm hahû’ mwōfēṯ lē’mōr zeh hammwōfēṯ ’ăšer diber yəhwâ hinnēh hammizəbēḥa niqərā‘ wənišəpaḵə hadešen ’ăšer-‘ālāyw:

4 wayəhî ḵišəmō‘a hammeleḵə ’eṯ-dəḇar ’îš-hā’ĕlōhîm ’ăšer qārā’ ‘al-hammizəbēḥa bəḇêṯ-’ēl wayyišəl^aḥ yārāḇə‘ām ’eṯ-yāḏwō mē‘al hammizəbēḥa lē’mōr| tifəśuhû watîḇaš yāḏwō ’ăšer šāl^aḥ ‘ālāyw wəlō’ yāḵōl lahăšîḇāh ’ēlāyw:

5 wəhammizəbēḥa niqərā‘ wayyiššāfēḵə hadešen min-hammizəbēḥa kammwōfēṯ ’ăšer nāṯan ’îš hā’ĕlōhîm biḏəḇar yəhwâ:

6 wayy^a‘an hammeleḵə wayyō’mer| ’el-’îš hā’ĕlōhîm ḥal-nā’ ’eṯ-pənê yəhwâ ’ĕlōheyḵā wəhiṯəpallēl b^a‘ăḏî wəṯāšōḇ yāḏî ’ēlāy wayəḥal ’îš-hā’ĕlōhîm ’eṯ-pənê yəhwâ watāšāḇ yaḏ-hammeleḵə ’ēlāyw watəhî kəḇāri’šōnâ:

7 wayəḏabēr hammeleḵə ’el-’îš hā’ĕlōhîm bō’â-’itî habayəṯâ ûsə‘āḏâ wə’etənâ ləḵā matāṯ:

8 wayyō’mer ’îš-hā’ĕlōhîm ’el-hammeleḵə ’im-titen-lî ’eṯ-ḥăṣî ḇêṯeḵā lō’ ’āḇō’ ‘immāḵə wəlō’-’ōḵal leḥem wəlō’ ’ešəteh-mmayim bammāqwōm hazzeh:

9 kî-ḵēn| ṣiûâ ’ōṯî biḏəḇar yəhwâ lē’mōr lō’-ṯō’ḵal leḥem wəlō’ ṯišəteh-mmāyim wəlō’ ṯāšûḇ badereḵə ’ăšer hālāḵətā:

10 wayyēleḵə bəḏereḵə ’^aḥēr wəlō’-šāḇ badereḵə ’ăšer bā’ ḇāh ’el-bêṯ-’ēl: f

11 wənāḇî’ ’eḥāḏ zāqēn yōšēḇ bəḇêṯ-’ēl wayyāḇwō’ ḇənwō wayəsaper-lwō ’eṯ-kāl-hamm^a‘ăśeh ’ăšer-‘āśâ ’îš-hā’ĕlōhîm| hayywōm bəḇêṯ-’ēl ’eṯ-hadəḇārîm ’ăšer diber ’el-hammeleḵə wayəsapərûm la’ăḇîhem:

12 wayəḏabēr ’ălēhem ’ăḇîhem ’ê-zeh hadereḵə hālāḵə wayyirə’û ḇānāyw ’eṯ-hadereḵə ’ăšer hālaḵə ’îš hā’ĕlōhîm ’ăšer-bā’ mîhûḏâ:

13 wayyō’mer ’el-bānāyw ḥiḇəšû-lî h^aḥămwōr wayy^aḥəbəšû-lwō h^aḥămwōr wayyirəkaḇ ‘ālāyw:

14 wayyēleḵə ’^aḥărê ’îš hā’ĕlōhîm wayyiməṣā’ēhû yōšēḇ t^aḥaṯ hā’ēlâ wayyō’mer ’ēlāyw ha’atâ ’îš-hā’ĕlōhîm ’ăšer-bā’ṯā mîhûḏâ wayyō’mer ’ānî:

15 wayyō’mer ’ēlāyw lēḵə ’itî habāyəṯâ we’ĕḵōl lāḥem:

16 wayyō’mer lō’ ’ûḵal lāšûḇ ’itāḵə wəlāḇwō’ ’itāḵə wəlō’-’ōḵal leḥem wəlō’-’ešəteh ’itəḵā mayim bammāqwōm hazzeh:

17 kî-ḏāḇār ’ēlay biḏəḇar yəhwâ lō’-ṯō’ḵal leḥem wəlō’-ṯišəteh šām māyim lō’-ṯāšûḇ lāleḵeṯ badereḵə ’ăšer-hālaḵətā bāh:

18 wayyō’mer lwō gam-’ănî nāḇî’ kāmwōḵā ûmalə’āḵə diber ’ēlay biḏəḇar yəhwâ lē’mōr hăšiḇēhû ’itəḵā ’el-bêṯeḵā wəyō’ḵal leḥem wəyēšətə māyim kiḥēš lwō:

19 wayyāšāḇ ’itwō wayyō’ḵal leḥem bəḇêṯwō wayyēšətə māyim:

20 wayəhî hēm yōšəḇîm ’el-haššuləḥān fwayəhî dəḇar-yəhwâ ’el-hannāḇî’ ’ăšer hĕšîḇwō:

21 wayyiqərā’ ’el-’îš hā’ĕlōhîm ’ăšer-bā’ mîhûḏâ lē’mōr kōh ’āmar yəhwâ y^a‘an kî mārîṯā pî yəhwâ wəlō’ šāmarətā ’eṯ-hammiṣəwâ ’ăšer ṣiûəḵā yəhwâ ’ĕlōheyḵā:

22 watāšāḇ watō’ḵal leḥem watēšətə mayim bammāqwōm ’ăšer diber ’ēleyḵā ’al-tō’ḵal leḥem wə’al-tēšətə māyim lō’-ṯāḇwō’ niḇəlāṯəḵā ’el-qeḇer ’ăḇōṯeyḵā:

23 wayəhî ’^aḥărê ’āḵəlwō leḥem wə’^aḥărê šəṯwōṯwō wayy^aḥăḇāš-lwō h^aḥămwōr lannāḇî’ ’ăšer hĕšîḇwō:

24 wayyēleḵə wayyiməṣā’ēhû ’arəyēh badereḵə wayəmîṯēhû watəhî niḇəlāṯwō mušəleḵeṯ badereḵə wəh^aḥămwōr ‘ōmēḏ ’eṣəlāh wəhā’arəyēh ‘ōmēḏ ’ēṣel hannəḇēlâ:

25 wəhinnēh ’ănāšîm ‘ōḇərîm wayyirə’û ’eṯ-hannəḇēlâ mušəleḵeṯ badereḵə wə’eṯ-hā’arəyēh ‘ōmēḏ ’ēṣel hannəḇēlâ wayyāḇō’û wayəḏabərû ḇā‘îr ’ăšer hannāḇî’ hazzāqēn yōšēḇ bāh:

26 wayyišəm^a‘ hannāḇî’ ’ăšer hĕšîḇwō min-hadereḵə wayyō’mer ’îš hā’ĕlōhîm hû’ ’ăšer mārâ ’eṯ-pî yəhwâ wayyitənēhû yəhwâ lā’arəyēh wayyišəbərēhû wayəmiṯēhû kiḏəḇar yəhwâ ’ăšer diber-lwō:

27 wayəḏabēr ’el-bānāyw lē’mōr ḥiḇəšû-lî ’eṯ-h^aḥămwōr wayy^aḥăḇōšû:

28 wayyēleḵə wayyiməṣā’ ’eṯ-niḇəlāṯwō mušəleḵeṯ badereḵə w^aḥămwōr wəhā’arəyēh ‘ōməḏîm ’ēṣel hannəḇēlâ lō’-’āḵal hā’arəyēh ’eṯ-hannəḇēlâ wəlō’ šāḇar ’eṯ-h^aḥămwōr:

29 wayyiśśā’ hannāḇî’ ’eṯ-niḇəlaṯ ’îš-hā’ĕlōhîm wayyanniḥēhû ’el-h^aḥămwōr wayəšîḇēhû wayyāḇō’ ’el-‘îr hannāḇî’ hazzāqēn lisəpōḏ ûləqāḇərwō:

30 wayyann^aḥ ’eṯ-niḇəlāṯwō bəqiḇərwō wayyisəpəḏû ‘ālāyw hwōy ’āḥî:

31 wayəhî ’^aḥărê qāḇərwō ’ōṯwō wayyō’mer ’el-bānāyw lē’mōr bəmwōṯî ûqəḇarətem ’ōṯî baqqeḇer ’ăšer ’îš hā’ĕlōhîm qāḇûr bwō ’ēṣel ‘aṣəmōṯāyw hannîḥû ’eṯ-‘aṣəmōṯāy:

32 kî hāyōh yihəyeh hadāḇār ’ăšer qārā’ biḏəḇar yəhwâ ‘al-hammizəbēḥa ’ăšer bəḇêṯ-’ēl wə‘al kāl-bātê habāmwōṯ ’ăšer bə‘ārê šōmərwōn: f

33 ’^aḥar hadāḇār hazzeh lō’-šāḇ yārāḇə‘ām midarəkwō hārā‘â wayyāšāḇ wayy^a‘aś miqəṣwōṯ hā‘ām kōhănê ḇāmwōṯ heḥāfēṣ yəmallē’ ’eṯ-yāḏwō wîhî kōhănê ḇāmwōṯ:

34 wayəhî badāḇār hazzeh ləḥaṭṭa’ṯ bêṯ yārāḇə‘ām ûləhaḵəḥîḏ ûləhašəmîḏ mē‘al pənê hā’ăḏāmâ: f