‎1 ‏וַיְהִ֗י בְּהַעֲל֤וֹת יְהוָה֙ אֶת־אֵ֣לִיָּ֔הוּ בַּֽסְעָרָ֖ה הַשָּׁמָ֑יִם וַיֵּ֧לֶךְ אֵלִיָּ֛הוּ וֶאֱלִישָׁ֖ע מִן־הַגִּלְגָּֽל׃

‎2 ‏וַיֹּאמֶר֩ אֵלִיָּ֨הוּ אֶל־אֱלִישָׁ֜ע שֵֽׁב־נָ֣א פֹ֗ה כִּ֤י יְהוָה֙ שְׁלָחַ֣נִי עַד־בֵּֽית־אֵ֔ל וַיֹּ֣אמֶר אֱלִישָׁ֔ע חַי־יְהוָ֥ה וְחֵֽי־נַפְשְׁךָ֖ אִם־אֶעֶזְבֶ֑ךָּ וַיֵּרְד֖וּ בֵּֽית־אֵֽל׃

‎3 ‏וַיֵּצְא֨וּ בְנֵֽי־הַנְּבִיאִ֥ים אֲשֶׁר־בֵּֽית־אֵל֮ אֶל־אֱלִישָׁע֒ וַיֹּאמְר֣וּ אֵלָ֔יו הֲיָדַ֕עְתָּ כִּ֣י הַיּ֗וֹם יְהוָ֛ה לֹקֵ֥חַ אֶת־אֲדֹנֶ֖יךָ מֵעַ֣ל רֹאשֶׁ֑ךָ וַיֹּ֛אמֶר גַּם־אֲנִ֥י יָדַ֖עְתִּי הֶחֱשֽׁוּ׃

‎4 ‏וַיֹּאמֶר֩ ל֨וֹ אֵלִיָּ֜הוּ אֱלִישָׁ֣ע׀ שֵֽׁב־נָ֣א פֹ֗ה כִּ֤י יְהוָה֙ שְׁלָחַ֣נִי יְרִיח֔וֹ וַיֹּ֕אמֶר חַי־יְהוָ֥ה וְחֵֽי־נַפְשְׁךָ֖ אִם־אֶעֶזְבֶ֑ךָּ וַיָּבֹ֖אוּ יְרִיחֽוֹ׃

‎5 ‏וַיִּגְּשׁ֨וּ בְנֵֽי־הַנְּבִיאִ֥ים אֲשֶׁר־בִּֽירִיחוֹ֮ אֶל־אֱלִישָׁע֒ וַיֹּאמְר֣וּ אֵלָ֔יו הֲיָדַ֕עְתָּ כִּ֣י הַיּ֗וֹם יְהוָ֛ה לֹקֵ֥חַ אֶת־אֲדֹנֶ֖יךָ מֵעַ֣ל רֹאשֶׁ֑ךָ וַיֹּ֛אמֶר גַּם־אֲנִ֥י יָדַ֖עְתִּי הֶחֱשֽׁוּ׃

‎6 ‏וַיֹּאמֶר֩ ל֨וֹ אֵלִיָּ֜הוּ שֵֽׁב־נָ֣א פֹ֗ה כִּ֤י יְהוָה֙ שְׁלָחַ֣נִי הַיַּרְדֵּ֔נָה וַיֹּ֕אמֶר חַי־יְהוָ֥ה וְחֵֽי־נַפְשְׁךָ֖ אִם־אֶעֶזְבֶ֑ךָּ וַיֵּלְכ֖וּ שְׁנֵיהֶֽם׃

‎7 ‏וַחֲמִשִּׁ֨ים אִ֜ישׁ מִבְּנֵ֤י הַנְּבִיאִים֙ הָֽלְכ֔וּ וַיַּעַמְד֥וּ מִנֶּ֖גֶד מֵרָח֑וֹק וּשְׁנֵיהֶ֖ם עָמְד֥וּ עַל־הַיַּרְדֵּֽן׃

‎8 ‏וַיִּקַּח֩ אֵלִיָּ֨הוּ אֶת־אַדַּרְתּ֤וֹ וַיִּגְלֹם֙ וַיַּכֶּ֣ה אֶת־הַמַּ֔יִם וַיֵּחָצ֖וּ הֵ֣נָּה וָהֵ֑נָּה וַיַּעַבְר֥וּ שְׁנֵיהֶ֖ם בֶּחָרָבָֽה׃

‎9 ‏וַיְהִ֣י כְעָבְרָ֗ם וְאֵ֨לִיָּ֜הוּ אָמַ֤ר אֶל־אֱלִישָׁע֙ שְׁאַל֙ מָ֣ה אֶֽעֱשֶׂה־לָּ֔ךְ בְּטֶ֖רֶם אֶלָּקַ֣ח מֵעִמָּ֑ךְ וַיֹּ֣אמֶר אֱלִישָׁ֔ע וִֽיהִי־נָ֛א פִּֽי־שְׁנַ֥יִם בְּרוּחֲךָ֖ אֵלָֽי׃

‎10 ‏וַיֹּ֖אמֶר הִקְשִׁ֣יתָ לִשְׁא֑וֹל אִם־תִּרְאֶ֨ה אֹתִ֜י לֻקָּ֤ח מֵֽאִתָּךְ֙ יְהִֽי־לְךָ֣ כֵ֔ן וְאִם־אַ֖יִן לֹ֥א יִהְיֶֽה׃

‎11 ‏וַיְהִ֗י הֵ֣מָּה הֹלְכִ֤ים הָלוֹךְ֙ וְדַבֵּ֔ר וְהִנֵּ֤ה רֶֽכֶב־אֵשׁ֙ וְס֣וּסֵי אֵ֔שׁ וַיַּפְרִ֖דוּ בֵּ֣ין שְׁנֵיהֶ֑ם וַיַּ֙עַל֙ אֵ֣לִיָּ֔הוּ בַּֽסְּעָרָ֖ה³ הַשָּׁמָֽיִם׃

‎12 ‏וֶאֱלִישָׁ֣ע רֹאֶ֗ה וְה֤וּא מְצַעֵק֙ אָבִ֣י׀ אָבִ֗י רֶ֤כֶב יִשְׂרָאֵל֙ וּפָ֣רָשָׁ֔יו וְלֹ֥א רָאָ֖הוּ ע֑וֹד וַֽיַּחֲזֵק֙ בִּבְגָדָ֔יו וַיִּקְרָעֵ֖ם לִשְׁנַ֥יִם קְרָעִֽים׃

‎13 ‏וַיָּ֙רֶם֙ אֶת־אַדֶּ֣רֶת אֵלִיָּ֔הוּ אֲשֶׁ֥ר נָפְלָ֖ה מֵעָלָ֑יו וַיָּ֥שָׁב וַֽיַּעֲמֹ֖ד עַל־שְׂפַ֥ת הַיַּרְדֵּֽן׃

‎14 ‏וַיִּקַּח֩ אֶת־אַדֶּ֨רֶת אֵלִיָּ֜הוּ אֲשֶׁר־נָפְלָ֤ה מֵֽעָלָיו֙ וַיַּכֶּ֣ה אֶת־הַמַּ֔יִם וַיֹּאמַ֕ר אַיֵּ֕ה יְהוָ֖ה אֱלֹהֵ֣י אֵלִיָּ֑הוּ אַף־ה֣וּא׀ וַיַּכֶּ֣ה אֶת־הַמַּ֗יִם וַיֵּֽחָצוּ֙ הֵ֣נָּה וָהֵ֔נָּה וַֽיַּעֲבֹ֖ר אֱלִישָֽׁע׃

‎15 ‏וַיִּרְאֻ֨הוּ בְנֵֽי־הַנְּבִיאִ֤ים אֲשֶׁר־בִּֽירִיחוֹ֙ מִנֶּ֔גֶד וַיֹּ֣אמְר֔וּ נָ֛חָה ר֥וּחַ אֵלִיָּ֖הוּ עַל־אֱלִישָׁ֑ע וַיָּבֹ֙אוּ֙ לִקְרָאת֔וֹ וַיִּשְׁתַּחֲווּ־ל֖וֹ אָֽרְצָה׃

‎16 ‏וַיֹּאמְר֣וּ אֵלָ֡יו הִנֵּה־נָ֣א יֵֽשׁ־אֶת־עֲבָדֶיךָ֩ חֲמִשִּׁ֨ים אֲנָשִׁ֜ים בְּנֵֽי־חַ֗יִל יֵ֣לְכוּ נָא֮ וִיבַקְשׁ֣וּ אֶת־אֲדֹנֶיךָ֒ פֶּן־נְשָׂאוֹ֙ ר֣וּחַ יְהוָ֔ה וַיַּשְׁלִכֵ֙הוּ֙ בְּאַחַ֣ד הֶהָרִ֔ים א֖וֹ בְּאַחַ֣ת הגיאות הַגֵּאָי֑וֹת וַיֹּ֖אמֶר לֹ֥א תִשְׁלָֽחוּ׃

‎17 ‏וַיִּפְצְרוּ־ב֥וֹ עַד־בֹּ֖שׁ וַיֹּ֣אמֶר שְׁלָ֑חוּ וַֽיִּשְׁלְחוּ֙ חֲמִשִּׁ֣ים אִ֔ישׁ וַיְבַקְשׁ֥וּ שְׁלֹשָֽׁה־יָמִ֖ים וְלֹ֥א מְצָאֻֽהוּ׃

‎18 ‏וַיָּשֻׁ֣בוּ אֵלָ֔יו וְה֖וּא יֹשֵׁ֣ב בִּירִיח֑וֹ וַיֹּ֣אמֶר אֲלֵהֶ֔ם הֲלֽוֹא־אָמַ֥רְתִּי אֲלֵיכֶ֖ם אַל־תֵּלֵֽכוּ׃

‎19 ‏וַיֹּ֨אמְר֜וּ אַנְשֵׁ֤י הָעִיר֙ אֶל־אֱלִישָׁ֔ע הִנֵּה־נָ֞א מוֹשַׁ֤ב הָעִיר֙ ט֔וֹב כַּאֲשֶׁ֥ר אֲדֹנִ֖י רֹאֶ֑ה וְהַמַּ֥יִם רָעִ֖ים וְהָאָ֥רֶץ מְשַׁכָּֽלֶת׃

‎20 ‏וַיֹּ֗אמֶר קְחוּ־לִי֙ צְלֹחִ֣ית חֲדָשָׁ֔ה וְשִׂ֥ימוּ שָׁ֖ם מֶ֑לַח וַיִּקְח֖וּ אֵלָֽיו׃

‎21 ‏וַיֵּצֵא֙ אֶל־מוֹצָ֣א הַמַּ֔יִם וַיַּשְׁלֶךְ־שָׁ֖ם מֶ֑לַח וַיֹּ֜אמֶר כֹּֽה־אָמַ֣ר יְהוָ֗ה רִפִּ֙אתִי֙ לַמַּ֣יִם הָאֵ֔לֶּה לֹֽא־יִהְיֶ֥ה מִשָּׁ֛ם ע֖וֹד מָ֥וֶת וּמְשַׁכָּֽלֶת׃

‎22 ‏וַיֵּרָפ֣וּ הַמַּ֔יִם עַ֖ד הַיּ֣וֹם הַזֶּ֑ה כִּדְבַ֥ר אֱלִישָׁ֖ע אֲשֶׁ֥ר דִּבֵּֽר׃ פ

‎23 ‏וַיַּ֥עַל מִשָּׁ֖ם בֵּֽית־אֵ֑ל וְה֣וּא׀ עֹלֶ֣ה בַדֶּ֗רֶךְ וּנְעָרִ֤ים קְטַנִּים֙ יָצְא֣וּ מִן־הָעִ֔יר וַיִּתְקַלְּסוּ־בוֹ֙ וַיֹּ֣אמְרוּ ל֔וֹ עֲלֵ֥ה קֵרֵ֖חַ עֲלֵ֥ה קֵרֵֽחַ׃

‎24 ‏וַיִּ֤פֶן אַֽחֲרָיו֙ וַיִּרְאֵ֔ם וַֽיְקַלְלֵ֖ם בְּשֵׁ֣ם יְהוָ֑ה וַתֵּצֶ֨אנָה שְׁתַּ֤יִם דֻּבִּים֙ מִן־הַיַּ֔עַר וַתְּבַקַּ֣עְנָה מֵהֶ֔ם אַרְבָּעִ֥ים וּשְׁנֵ֖י יְלָדִֽים׃

‎25 ‏וַיֵּ֥לֶךְ מִשָּׁ֖ם אֶל־הַ֣ר הַכַּרְמֶ֑ל וּמִשָּׁ֖ם שָׁ֥ב שֹׁמְרֽוֹן׃ פ

1 wayəhî bəh^a‘ălwōṯ yəhwâ ’eṯ-’ēlîyâû basə‘ārâ haššāmāyim wayyēleḵə ’ēlîyâû we’ĕlîšā‘ min-hagiləgāl:

2 wayyō’mer ’ēlîyâû ’el-’ĕlîšā‘ šēḇ-nā’ fōh kî yəhwâ šəlāḥanî ‘aḏ-bêṯ-’ēl wayyō’mer ’ĕlîšā‘ ḥay-yəhwâ wəḥê-nafəšəḵā ’im-’e‘ezəḇeḵḵā wayyērəḏû bêṯ-’ēl:

3 wayyēṣə’û ḇənê-hannəḇî’îm ’ăšer-bêṯ-’ēl ’el-’ĕlîšā‘ wayyō’mərû ’ēlāyw hăyāḏ^a‘ətā kî hayywōm yəhwâ lōqēḥa ’eṯ-’ăḏōneyḵā mē‘al rō’šeḵā wayyō’mer gam-’ănî yāḏ^a‘ətî heḥĕšû:

4 wayyō’mer lwō ’ēlîyâû ’ĕlîšā‘| šēḇ-nā’ fōh kî yəhwâ šəlāḥanî yərîḥwō wayyō’mer ḥay-yəhwâ wəḥê-nafəšəḵā ’im-’e‘ezəḇeḵḵā wayyāḇō’û yərîḥwō:

5 wayyigəšû ḇənê-hannəḇî’îm ’ăšer-bîrîḥwō ’el-’ĕlîšā‘ wayyō’mərû ’ēlāyw hăyāḏ^a‘ətā kî hayywōm yəhwâ lōqēḥa ’eṯ-’ăḏōneyḵā mē‘al rō’šeḵā wayyō’mer gam-’ănî yāḏ^a‘ətî heḥĕšû:

6 wayyō’mer lwō ’ēlîyâû šēḇ-nā’ fōh kî yəhwâ šəlāḥanî hayyarədēnâ wayyō’mer ḥay-yəhwâ wəḥê-nafəšəḵā ’im-’e‘ezəḇeḵḵā wayyēləḵû šənêhem:

7 w^aḥămiššîm ’îš mibənê hannəḇî’îm hāləḵû wayy^a‘aməḏû minneḡeḏ mērāḥwōq ûšənêhem ‘āməḏû ‘al-hayyarədēn:

8 wayyiqq^aḥ ’ēlîyâû ’eṯ-’adarətwō wayyiḡəlōm wayyakeh ’eṯ-hammayim wayyēḥāṣû hēnnâ wâēnnâ wayy^a‘aḇərû šənêhem beḥārāḇâ:

9 wayəhî ḵə‘āḇərām wə’ēlîyâû ’āmar ’el-’ĕlîšā‘ šə’al mâ ’e‘ĕśeh-llāḵə bəṭerem ’ellāq^aḥ mē‘immāḵə wayyō’mer ’ĕlîšā‘ wîhî-nā’ pî-šənayim bərûḥăḵā ’ēlāy:

10 wayyō’mer hiqəšîṯā lišə’wōl ’im-tirə’eh ’ōṯî luqqāḥ mē’itāḵə yəhî-ləḵā ḵēn wə’im-’ayin lō’ yihəyeh:

11 wayəhî hēmmâ hōləḵîm hālwōḵə wəḏabēr wəhinnēh reḵeḇ-’ēš wəsûsê ’ēš wayyafəriḏû bên šənêhem wayy^a‘al ’ēlîyâû bassə‘ārâ³ haššāmāyim:

12 we’ĕlîšā‘ rō’eh wəhû’ məṣ^a‘ēq ’āḇî| ’āḇî reḵeḇ yiśərā’ēl ûfārāšāyw wəlō’ rā’âû ‘wōḏ wayy^aḥăzēq biḇəḡāḏāyw wayyiqərā‘ēm lišənayim qərā‘îm:

13 wayyārem ’eṯ-’adereṯ ’ēlîyâû ’ăšer nāfəlâ mē‘ālāyw wayyāšāḇ wayy^a‘ămōḏ ‘al-śəfaṯ hayyarədēn:

14 wayyiqq^aḥ ’eṯ-’adereṯ ’ēlîyâû ’ăšer-nāfəlâ mē‘ālāyw wayyakeh ’eṯ-hammayim wayyō’mar ’ayyēh yəhwâ ’ĕlōhê ’ēlîyâû ’af-hû’| wayyakeh ’eṯ-hammayim wayyēḥāṣû hēnnâ wâēnnâ wayy^a‘ăḇōr ’ĕlîšā‘:

15 wayyirə’uhû ḇənê-hannəḇî’îm ’ăšer-bîrîḥwō minneḡeḏ wayyō’mərû nāḥâ rûḥa ’ēlîyâû ‘al-’ĕlîšā‘ wayyāḇō’û liqərā’ṯwō wayyišət^aḥăwû-lwō ’ārəṣâ:

16 wayyō’mərû ’ēlāyw hinnēh-nā’ yēš-’eṯ-‘ăḇāḏeyḵā ḥămiššîm ’ănāšîm bənê-ḥayil yēləḵû nā’ wîḇaqəšû ’eṯ-’ăḏōneyḵā pen-nəśā’wō rûḥa yəhwâ wayyašəliḵēhû bə’^aḥaḏ hehārîm ’wō bə’^aḥaṯ hagəyā’wōṯ hagē’āywōṯ wayyō’mer lō’ ṯišəlāḥû:

17 wayyifəṣərû-ḇwō ‘aḏ-bōš wayyō’mer šəlāḥû wayyišələḥû ḥămiššîm ’îš wayəḇaqəšû šəlōšâ-yāmîm wəlō’ məṣā’uhû:

18 wayyāšuḇû ’ēlāyw wəhû’ yōšēḇ bîrîḥwō wayyō’mer ’ălēhem hălwō’-’āmarətî ’ălêḵem ’al-tēlēḵû:

19 wayyō’mərû ’anəšê hā‘îr ’el-’ĕlîšā‘ hinnēh-nā’ mwōšaḇ hā‘îr ṭwōḇ ka’ăšer ’ăḏōnî rō’eh wəhammayim rā‘îm wəhā’āreṣ məšakāleṯ:

20 wayyō’mer qəḥû-lî ṣəlōḥîṯ ḥăḏāšâ wəśîmû šām mel^aḥ wayyiqəḥû ’ēlāyw:

21 wayyēṣē’ ’el-mwōṣā’ hammayim wayyašəleḵə-šām mel^aḥ wayyō’mer kōh-’āmar yəhwâ ripi’ṯî lammayim hā’ēlleh lō’-yihəyeh miššām ‘wōḏ māweṯ ûməšakāleṯ:

22 wayyērāfû hammayim ‘aḏ hayywōm hazzeh kiḏəḇar ’ĕlîšā‘ ’ăšer dibēr: f

23 wayy^a‘al miššām bêṯ-’ēl wəhû’| ‘ōleh ḇadereḵə ûnə‘ārîm qəṭannîm yāṣə’û min-hā‘îr wayyiṯəqalləsû-ḇwō wayyō’mərû lwō ‘ălēh qērēḥa ‘ălēh qērēḥa:

24 wayyifen ’^aḥărāyw wayyirə’ēm wayəqaləlēm bəšēm yəhwâ watēṣe’nâ šətayim dubîm min-hayy^a‘ar watəḇaqq^a‘ənâ mēhem ’arəbā‘îm ûšənê yəlāḏîm:

25 wayyēleḵə miššām ’el-har hakarəmel ûmiššām šāḇ šōmərwōn: f