‎1 ‏וַיֹּ֣אמֶר אֱלִישָׁ֔ע שִׁמְע֖וּ דְּבַר־יְהוָ֑ה כֹּ֣ה׀ אָמַ֣ר יְהוָ֗ה כָּעֵ֤ת׀ מָחָר֙ סְאָֽה־סֹ֣לֶת בְּשֶׁ֗קֶל וְסָאתַ֧יִם שְׂעֹרִ֛ים בְּשֶׁ֖קֶל בְּשַׁ֥עַר שֹׁמְרֽוֹן׃

‎2 ‏וַיַּ֣עַן הַשָּׁלִ֡ישׁ אֲשֶׁר־לַמֶּלֶךְ֩ נִשְׁעָ֨ן עַל־יָד֜וֹ אֶת־אִ֣ישׁ הָאֱלֹהִים֮ וַיֹּאמַר֒ הִנֵּ֣ה יְהוָ֗ה עֹשֶׂ֤ה אֲרֻבּוֹת֙ בַּשָּׁמַ֔יִם הֲיִהְיֶ֖ה הַדָּבָ֣ר הַזֶּ֑ה וַיֹּ֗אמֶר הִנְּכָ֤ה רֹאֶה֙ בְּעֵינֶ֔יךָ וּמִשָּׁ֖ם לֹ֥א תֹאכֵֽל׃ ס

‎3 ‏וְאַרְבָּעָ֧ה אֲנָשִׁ֛ים הָי֥וּ מְצֹרָעִ֖ים פֶּ֣תַח הַשָּׁ֑עַר וַיֹּֽאמְרוּ֙ אִ֣ישׁ אֶל־רֵעֵ֔הוּ מָ֗ה אֲנַ֛חְנוּ יֹשְׁבִ֥ים פֹּ֖ה עַד־מָֽתְנוּ׃

‎4 ‏אִם־אָמַרְנוּ֩ נָב֨וֹא הָעִ֜יר וְהָרָעָ֤ב בָּעִיר֙ וָמַ֣תְנוּ שָׁ֔ם וְאִם־יָשַׁ֥בְנוּ פֹ֖ה וָמָ֑תְנוּ וְעַתָּ֗ה לְכוּ֙ וְנִפְּלָה֙ אֶל־מַחֲנֵ֣ה אֲרָ֔ם אִם־יְחַיֻּ֣נוּ נִֽחְיֶ֔ה וְאִם־יְמִיתֻ֖נוּ וָמָֽתְנוּ׃

‎5 ‏וַיָּק֣וּמוּ בַנֶּ֔שֶׁף לָב֖וֹא אֶל־מַחֲנֵ֣ה אֲרָ֑ם וַיָּבֹ֗אוּ עַד־קְצֵה֙ מַחֲנֵ֣ה אֲרָ֔ם וְהִנֵּ֥ה אֵֽין־שָׁ֖ם אִֽישׁ׃

‎6 ‏וַאדֹנָ֞י הִשְׁמִ֣יעַ׀ אֶת־מַחֲנֵ֣ה אֲרָ֗ם ק֥וֹל רֶ֙כֶב֙ ק֣וֹל ס֔וּס ק֖וֹל חַ֣יִל גָּד֑וֹל וַיֹּאמְר֞וּ אִ֣ישׁ אֶל־אָחִ֗יו הִנֵּ֣ה שָֽׂכַר־עָלֵינוּ֩ מֶ֨לֶךְ יִשְׂרָאֵ֜ל אֶת־מַלְכֵ֧י הַחִתִּ֛ים וְאֶת־מַלְכֵ֥י מִצְרַ֖יִם לָב֥וֹא עָלֵֽינוּ׃

‎7 ‏וַיָּקוּמוּ֮ וַיָּנ֣וּסוּ בַנֶּשֶׁף֒ וַיַּעַזְב֣וּ אֶת־אָהֳלֵיהֶ֗ם וְאֶת־סֽוּסֵיהֶם֙ וְאֶת־חֲמֹ֣רֵיהֶ֔ם הַֽמַּחֲנֶ֖ה כַּאֲשֶׁר־הִ֑יא וַיָּנֻ֖סוּ אֶל־נַפְשָֽׁם׃

‎8 ‏וַיָּבֹאוּ֩ הַֽמְצֹרָעִ֨ים הָאֵ֜לֶּה עַד־קְצֵ֣ה הַֽמַּחֲנֶ֗ה וַיָּבֹ֜אוּ אֶל־אֹ֤הֶל אֶחָד֙ וַיֹּאכְל֣וּ וַיִּשְׁתּ֔וּ וַיִּשְׂא֣וּ מִשָּׁ֗ם כֶּ֤סֶף וְזָהָב֙ וּבְגָדִ֔ים וַיֵּלְכ֖וּ וַיַּטְמִ֑נוּ וַיָּשֻׁ֗בוּ וַיָּבֹ֙אוּ֙ אֶל־אֹ֣הֶל אַחֵ֔ר וַיִּשְׂא֣וּ מִשָּׁ֔ם וַיֵּלְכ֖וּ וַיַּטְמִֽנוּ׃

‎9 ‏וַיֹּאמְרוּ֩ אִ֨ישׁ אֶל־רֵעֵ֜הוּ לֹֽא־כֵ֣ן׀ אֲנַ֣חְנוּ עֹשִׂ֗ים הַיּ֤וֹם הַזֶּה֙ יוֹם־בְּשֹׂרָ֣ה ה֔וּא וַאֲנַ֣חְנוּ מַחְשִׁ֗ים וְחִכִּ֛ינוּ עַד־א֥וֹר הַבֹּ֖קֶר וּמְצָאָ֣נוּ עָו֑וֹן וְעַתָּה֙ לְכ֣וּ וְנָבֹ֔אָה וְנַגִּ֖ידָה בֵּ֥ית הַמֶּֽלֶךְ׃

‎10 ‏וַיָּבֹ֗אוּ וַֽיִּקְרְאוּ֮ אֶל־שֹׁעֵ֣ר הָעִיר֒ וַיַּגִּ֤ידוּ לָהֶם֙ לֵאמֹ֔ר בָּ֚אנוּ אֶל־מַחֲנֵ֣ה אֲרָ֔ם וְהִנֵּ֥ה אֵֽין־שָׁ֛ם אִ֖ישׁ וְק֣וֹל אָדָ֑ם כִּ֣י אִם־הַסּ֤וּס אָסוּר֙ וְהַחֲמ֣וֹר אָס֔וּר וְאֹהָלִ֖ים כַּאֲשֶׁר־הֵֽמָּה׃

‎11 ‏וַיִּקְרָ֖א הַשֹּֽׁעֲרִ֑ים וַיַּגִּ֕ידוּ בֵּ֥ית הַמֶּ֖לֶךְ פְּנִֽימָה׃

‎12 ‏וַיָּ֨קָם הַמֶּ֜לֶךְ לַ֗יְלָה וַיֹּ֙אמֶר֙ אֶל־עֲבָדָ֔יו אַגִּֽידָה־נָּ֣א לָכֶ֔ם אֵ֛ת אֲשֶׁר־עָ֥שׂוּ לָ֖נוּ אֲרָ֑ם יָדְע֞וּ כִּי־רְעֵבִ֣ים אֲנַ֗חְנוּ וַיֵּצְא֤וּ מִן־הַֽמַּחֲנֶה֙ לְהֵחָבֵ֤ה בהשדה בַשָּׂדֶה֙ לֵאמֹ֔ר כִּֽי־יֵצְא֤וּ מִן־הָעִיר֙ וְנִתְפְּשֵׂ֣ם חַיִּ֔ים וְאֶל־הָעִ֖יר נָבֹֽא׃

‎13 ‏וַיַּעַן֩ אֶחָ֨ד מֵעֲבָדָ֜יו וַיֹּ֗אמֶר וְיִקְחוּ־נָ֞א חֲמִשָּׁ֣ה מִן־הַסּוּסִים֮ הַֽנִּשְׁאָרִים֮ אֲשֶׁ֣ר נִשְׁאֲרוּ־בָהּ֒ הִנָּ֗ם כְּכָל־ההמון הֲמ֤וֹן יִשְׂרָאֵל֙ אֲשֶׁ֣ר נִשְׁאֲרוּ־בָ֔הּ הִנָּ֕ם כְּכָל־הֲמ֥וֹן יִשְׂרָאֵ֖ל אֲשֶׁר־תָּ֑מּוּ וְנִשְׁלְחָ֖ה וְנִרְאֶֽה׃

‎14 ‏וַיִּקְח֕וּ שְׁנֵ֖י רֶ֣כֶב סוּסִ֑ים וַיִּשְׁלַ֨ח הַמֶּ֜לֶךְ אַחֲרֵ֧י מַחֲנֵֽה־אֲרָ֛ם לֵאמֹ֖ר לְכ֥וּ וּרְאֽוּ׃

‎15 ‏וַיֵּלְכ֣וּ אַחֲרֵיהֶם֮ עַד־הַיַּרְדֵּן֒ וְהִנֵּ֣ה כָל־הַדֶּ֗רֶךְ מְלֵאָ֤ה בְגָדִים֙ וְכֵלִ֔ים אֲשֶׁר־הִשְׁלִ֥יכוּ אֲרָ֖ם בהחפזם בְּחָפְזָ֑ם וַיָּשֻׁ֙בוּ֙ הַמַּלְאָכִ֔ים וַיַּגִּ֖דוּ לַמֶּֽלֶךְ׃

‎16 ‏וַיֵּצֵ֣א הָעָ֔ם וַיָּבֹ֕זּוּ אֵ֖ת מַחֲנֵ֣ה אֲרָ֑ם וַיְהִ֨י סְאָה־סֹ֜לֶת בְּשֶׁ֗קֶל וְסָאתַ֧יִם שְׂעֹרִ֛ים בְּשֶׁ֖קֶל כִּדְבַ֥ר יְהוָֽה׃

‎17 ‏וְהַמֶּלֶךְ֩ הִפְקִ֨יד אֶת־הַשָּׁלִ֜ישׁ אֲשֶׁר־נִשְׁעָ֤ן עַל־יָדוֹ֙ עַל־הַשַּׁ֔עַר וַיִּרְמְסֻ֧הוּ הָעָ֛ם בַּשַּׁ֖עַר וַיָּמֹ֑ת כַּאֲשֶׁ֤ר דִּבֶּר֙ אִ֣ישׁ הָאֱלֹהִ֔ים אֲשֶׁ֣ר דִּבֶּ֔ר בְּרֶ֥דֶת הַמֶּ֖לֶךְ אֵלָֽיו׃

‎18 ‏וַיְהִ֗י כְּדַבֵּר֙ אִ֣ישׁ הָאֱלֹהִ֔ים אֶל־הַמֶּ֖לֶךְ לֵאמֹ֑ר סָאתַ֨יִם שְׂעֹרִ֜ים בְּשֶׁ֗קֶל וּֽסְאָה־סֹ֙לֶת֙ בְּשֶׁ֔קֶל יִהְיֶה֙ כָּעֵ֣ת מָחָ֔ר בְּשַׁ֖עַר שֹׁמְרֽוֹן׃

‎19 ‏וַיַּ֨עַן הַשָּׁלִ֜ישׁ אֶת־אִ֣ישׁ הָאֱלֹהִים֮ וַיֹּאמַר֒ וְהִנֵּ֣ה יְהוָ֗ה עֹשֶׂ֤ה אֲרֻבּוֹת֙ בַּשָּׁמַ֔יִם הֲיִהְיֶ֖ה כַּדָּבָ֣ר הַזֶּ֑ה וַיֹּ֗אמֶר הִנְּךָ֤ רֹאֶה֙ בְּעֵינֶ֔יךָ וּמִשָּׁ֖ם לֹ֥א תֹאכֵֽל׃

‎20 ‏וַיְהִי־ל֖וֹ כֵּ֑ן וַיִּרְמְס֨וּ אֹת֥וֹ הָעָ֛ם בַּשַּׁ֖עַר וַיָּמֹֽת׃ ס

1 wayyō’mer ’ĕlîšā‘ šimə‘û dəḇar-yəhwâ kōh| ’āmar yəhwâ kā‘ēṯ| māḥār sə’â-sōleṯ bəšeqel wəsā’ṯayim śə‘ōrîm bəšeqel bəš^a‘ar šōmərwōn:

2 wayy^a‘an haššālîš ’ăšer-lammeleḵə nišə‘ān ‘al-yāḏwō ’eṯ-’îš hā’ĕlōhîm wayyō’mar hinnēh yəhwâ ‘ōśeh ’ărubwōṯ baššāmayim hăyihəyeh hadāḇār hazzeh wayyō’mer hinnəḵâ rō’eh bə‘êneyḵā ûmiššām lō’ ṯō’ḵēl: s

3 wə’arəbā‘â ’ănāšîm hāyû məṣōrā‘îm peṯ^aḥ haššā‘ar wayyō’mərû ’îš ’el-rē‘ēhû mâ ’ăn^aḥənû yōšəḇîm pōh ‘aḏ-māṯənû:

4 ’im-’āmarənû nāḇwō’ hā‘îr wəhārā‘āḇ bā‘îr wāmaṯənû šām wə’im-yāšaḇənû fōh wāmāṯənû wə‘atâ ləḵû wənipəlâ ’el-m^aḥănēh ’ărām ’im-yəḥayyunû niḥəyeh wə’im-yəmîṯunû wāmāṯənû:

5 wayyāqûmû ḇannešef lāḇwō’ ’el-m^aḥănēh ’ărām wayyāḇō’û ‘aḏ-qəṣēh m^aḥănēh ’ărām wəhinnēh ’ên-šām ’îš:

6 wa’ḏōnāy hišəmî‘a| ’eṯ-m^aḥănēh ’ărām qwōl reḵeḇ qwōl sûs qwōl ḥayil gāḏwōl wayyō’mərû ’îš ’el-’āḥîw hinnēh śāḵar-‘ālênû meleḵə yiśərā’ēl ’eṯ-maləḵê h^aḥitîm wə’eṯ-maləḵê miṣərayim lāḇwō’ ‘ālênû:

7 wayyāqûmû wayyānûsû ḇannešef wayy^a‘azəḇû ’eṯ-’âŏlêhem wə’eṯ-sûsêhem wə’eṯ-ḥămōrêhem hamm^aḥăneh ka’ăšer-hî’ wayyānusû ’el-nafəšām:

8 wayyāḇō’û haməṣōrā‘îm hā’ēlleh ‘aḏ-qəṣēh hamm^aḥăneh wayyāḇō’û ’el-’ōhel ’eḥāḏ wayyō’ḵəlû wayyišətû wayyiśə’û miššām kesef wəzâāḇ ûḇəḡāḏîm wayyēləḵû wayyaṭəminû wayyāšuḇû wayyāḇō’û ’el-’ōhel ’^aḥēr wayyiśə’û miššām wayyēləḵû wayyaṭəminû:

9 wayyō’mərû ’îš ’el-rē‘ēhû lō’-ḵēn| ’ăn^aḥənû ‘ōśîm hayywōm hazzeh ywōm-bəśōrâ hû’ wa’ăn^aḥənû m^aḥəšîm wəḥikînû ‘aḏ-’wōr habōqer ûməṣā’ānû ‘āwwōn wə‘atâ ləḵû wənāḇō’â wənagîḏâ bêṯ hammeleḵə:

10 wayyāḇō’û wayyiqərə’û ’el-šō‘ēr hā‘îr wayyagîḏû lâem lē’mōr bā’nû ’el-m^aḥănēh ’ărām wəhinnēh ’ên-šām ’îš wəqwōl ’āḏām kî ’im-hassûs ’āsûr wəh^aḥămwōr ’āsûr wə’ōhālîm ka’ăšer-hēmmâ:

11 wayyiqərā’ haššō‘ărîm wayyagîḏû bêṯ hammeleḵə pənîmâ:

12 wayyāqām hammeleḵə layəlâ wayyō’mer ’el-‘ăḇāḏāyw ’agîḏâ-nnā’ lāḵem ’ēṯ ’ăšer-‘āśû lānû ’ărām yāḏə‘û kî-rə‘ēḇîm ’ăn^aḥənû wayyēṣə’û min-hamm^aḥăneh ləhēḥāḇēh ḇəhaśśāḏeh ḇaśśāḏeh lē’mōr kî-yēṣə’û min-hā‘îr wəniṯəpəśēm ḥayyîm wə’el-hā‘îr nāḇō’:

13 wayy^a‘an ’eḥāḏ mē‘ăḇāḏāyw wayyō’mer wəyiqəḥû-nā’ ḥămiššâ min-hassûsîm hannišə’ārîm ’ăšer nišə’ărû-ḇāh hinnām kəḵāl-hehāmwōn hămwōn yiśərā’ēl ’ăšer nišə’ărû-ḇāh hinnām kəḵāl-hămwōn yiśərā’ēl ’ăšer-tāmmû wənišələḥâ wənirə’eh:

14 wayyiqəḥû šənê reḵeḇ sûsîm wayyišəl^aḥ hammeleḵə ’^aḥărê m^aḥănēh-’ărām lē’mōr ləḵû ûrə’û:

15 wayyēləḵû ’^aḥărêhem ‘aḏ-hayyarədēn wəhinnēh ḵāl-hadereḵə məlē’â ḇəḡāḏîm wəḵēlîm ’ăšer-hišəlîḵû ’ărām bəhēḥāfəzām bəḥāfəzām wayyāšuḇû hammalə’āḵîm wayyagiḏû lammeleḵə:

16 wayyēṣē’ hā‘ām wayyāḇōzzû ’ēṯ m^aḥănēh ’ărām wayəhî sə’â-sōleṯ bəšeqel wəsā’ṯayim śə‘ōrîm bəšeqel kiḏəḇar yəhwâ:

17 wəhammeleḵə hifəqîḏ ’eṯ-haššālîš ’ăšer-nišə‘ān ‘al-yāḏwō ‘al-hašš^a‘ar wayyirəməsuhû hā‘ām bašš^a‘ar wayyāmōṯ ka’ăšer diber ’îš hā’ĕlōhîm ’ăšer diber bəreḏeṯ hammeleḵə ’ēlāyw:

18 wayəhî kəḏabēr ’îš hā’ĕlōhîm ’el-hammeleḵə lē’mōr sā’ṯayim śə‘ōrîm bəšeqel ûsə’â-sōleṯ bəšeqel yihəyeh kā‘ēṯ māḥār bəš^a‘ar šōmərwōn:

19 wayy^a‘an haššālîš ’eṯ-’îš hā’ĕlōhîm wayyō’mar wəhinnēh yəhwâ ‘ōśeh ’ărubwōṯ baššāmayim hăyihəyeh kadāḇār hazzeh wayyō’mer hinnəḵā rō’eh bə‘êneyḵā ûmiššām lō’ ṯō’ḵēl:

20 wayəhî-lwō kēn wayyirəməsû ’ōṯwō hā‘ām bašš^a‘ar wayyāmōṯ: s