‎1 ‏וֶאֱלִישָׁע֙ הַנָּבִ֔יא קָרָ֕א לְאַחַ֖ד מִבְּנֵ֣י הַנְּבִיאִ֑ים וַיֹּ֨אמֶר ל֜וֹ חֲגֹ֣ר מָתְנֶ֗יךָ וְ֠קַח פַּ֣ךְ הַשֶּׁ֤מֶן הַזֶּה֙ בְּיָדֶ֔ךָ וְלֵ֖ךְ רָמֹ֥ת גִּלְעָֽד׃

‎2 ‏וּבָ֖אתָ שָׁ֑מָּה וּרְאֵֽה־שָׁ֠ם יֵה֨וּא בֶן־יְהוֹשָׁפָ֜ט בֶּן־נִמְשִׁ֗י וּבָ֙אתָ֙ וַהֲקֵֽמֹתוֹ֙ מִתּ֣וֹך¹ אֶחָ֔יו וְהֵבֵיאתָ֥ אֹת֖וֹ חֶ֥דֶר בְּחָֽדֶר׃

‎3 ‏וְלָקַחְתָּ֤ פַךְ־הַשֶּׁ֙מֶן֙ וְיָצַקְתָּ֣ עַל־רֹאשׁ֔וֹ וְאָֽמַרְתָּ֙ כֹּֽה־אָמַ֣ר יְהוָ֔ה מְשַׁחְתִּ֥יךָֽ לְמֶ֖לֶךְ אֶל־יִשְׂרָאֵ֑ל וּפָתַחְתָּ֥ הַדֶּ֛לֶת וְנַ֖סְתָּה וְלֹ֥א תְחַכֶּֽה׃

‎4 ‏וַיֵּ֧לֶךְ הַנַּ֛עַר הַנַּ֥עַר הַנָּבִ֖יא רָמֹ֥ת גִּלְעָֽד׃

‎5 ‏וַיָּבֹ֗א וְהִנֵּ֨ה שָׂרֵ֤י הַחַ֙יִל֙ יֹֽשְׁבִ֔ים וַיֹּ֕אמֶר דָּבָ֥ר לִ֛י אֵלֶ֖יךָ הַשָּׂ֑ר וַיֹּ֤אמֶר יֵהוּא֙ אֶל־מִ֣י מִכֻּלָּ֔נוּ וַיֹּ֖אמֶר אֵלֶ֥יךָ הַשָּֽׂר׃

‎6 ‏וַיָּ֙קָם֙ וַיָּבֹ֣א הַבַּ֔יְתָה וַיִּצֹ֥ק הַשֶּׁ֖מֶן אֶל־רֹאשׁ֑וֹ וַיֹּ֣אמֶר ל֗וֹ כֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל מְשַׁחְתִּ֧יךָֽ לְמֶ֛לֶךְ אֶל־עַ֥ם יְהוָ֖ה אֶל־יִשְׂרָאֵֽל׃

‎7 ‏וְהִ֨כִּיתָ֔ה אֶת־בֵּ֥ית אַחְאָ֖ב אֲדֹנֶ֑יךָ וְנִקַּמְתִּ֞י דְּמֵ֣י׀ עֲבָדַ֣י הַנְּבִיאִ֗ים וּדְמֵ֛י כָּל־עַבְדֵ֥י יְהוָ֖ה מִיַּ֥ד אִיזָֽבֶל׃

‎8 ‏וְאָבַ֖ד כָּל־בֵּ֣ית אַחְאָ֑ב וְהִכְרַתִּ֤י לְאַחְאָב֙ מַשְׁתִּ֣ין בְּקִ֔יר וְעָצ֥וּר וְעָז֖וּב בְּיִשְׂרָאֵֽל׃

‎9 ‏וְנָֽתַתִּי֙ אֶת־בֵּ֣ית אַחְאָ֔ב כְּבֵ֖ית יָרָבְעָ֣ם בֶּן־נְבָ֑ט וּכְבֵ֖ית בַּעְשָׁ֥א בֶן־אֲחִיָּֽה׃

‎10 ‏וְאֶת־אִיזֶ֜בֶל יֹאכְל֧וּ הַכְּלָבִ֛ים בְּחֵ֥לֶק יִזְרְעֶ֖אל וְאֵ֣ין קֹבֵ֑ר וַיִּפְתַּ֥ח הַדֶּ֖לֶת וַיָּנֹֽס׃

‎11 ‏וְיֵה֗וּא יָצָא֙ אֶל־עַבְדֵ֣י אֲדֹנָ֔יו וַיֹּ֤אמֶר לוֹ֙ הֲשָׁל֔וֹם מַדּ֛וּעַ בָּֽא־הַמְשֻׁגָּ֥ע הַזֶּ֖ה אֵלֶ֑יךָ וַיֹּ֣אמֶר אֲלֵיהֶ֔ם אַתֶּ֛ם יְדַעְתֶּ֥ם אֶת־הָאִ֖ישׁ וְאֶת־שִׂיחֽוֹ׃

‎12 ‏וַיֹּאמְר֣וּ שֶׁ֔קֶר הַגֶּד־נָ֖א לָ֑נוּ וַיֹּ֗אמֶר כָּזֹ֤את וְכָזֹאת֙ אָמַ֤ר אֵלַי֙ לֵאמֹ֔ר כֹּ֚ה אָמַ֣ר יְהוָ֔ה מְשַׁחְתִּ֥יךָֽ לְמֶ֖לֶךְ אֶל־יִשְׂרָאֵֽל׃

‎13 ‏וַֽיְמַהֲר֗וּ וַיִּקְחוּ֙ אִ֣ישׁ בִּגְד֔וֹ וַיָּשִׂ֥ימוּ תַחְתָּ֖יו אֶל־גֶּ֣רֶם הַֽמַּעֲל֑וֹת וַֽיִּתְקְעוּ֙ בַּשּׁוֹפָ֔ר וַיֹּאמְר֖וּ מָלַ֥ךְ יֵהֽוּא׃

‎14 ‏וַיִּתְקַשֵּׁ֗ר יֵה֛וּא בֶּן־יְהוֹשָׁפָ֥ט בֶּן־נִמְשִׁ֖י אֶל־יוֹרָ֑ם וְיוֹרָם֩ הָיָ֨ה שֹׁמֵ֜ר בְּרָמֹ֣ת גִּלְעָ֗ד ה֚וּא וְכָל־יִשְׂרָאֵ֔ל מִפְּנֵ֥י חֲזָאֵ֖ל מֶֽלֶךְ־אֲרָֽם׃

‎15 ‏וַיָּשָׁב֩ יְהוֹרָ֨ם הַמֶּ֜לֶךְ לְהִתְרַפֵּ֣א בִיְזְרְעֶ֗אל מִן־הַמַּכִּים֙ אֲשֶׁ֣ר יַכֻּ֣הוּ אֲרַמִּ֔ים בְּהִלָּ֣חֲמ֔וֹ אֶת־חֲזָאֵ֖ל מֶ֣לֶךְ אֲרָ֑ם וַיֹּ֤אמֶר יֵהוּא֙ אִם־יֵ֣שׁ נַפְשְׁכֶ֔ם אַל־יֵצֵ֤א פָלִיט֙ מִן־הָעִ֔יר לָלֶ֖כֶת לגיד לְהַגִּ֥יד בְּיִזְרְעֶֽאל׃

‎16 ‏וַיִּרְכַּ֤ב יֵהוּא֙ וַיֵּ֣לֶךְ יִזְרְעֶ֔אלָה כִּ֥י יוֹרָ֖ם שֹׁכֵ֣ב שָׁ֑מָּה וַֽאֲחַזְיָה֙ מֶ֣לֶךְ יְהוּדָ֔ה יָרַ֖ד לִרְא֥וֹת אֶת־יוֹרָֽם׃

‎17 ‏וְהַצֹּפֶה֩ עֹמֵ֨ד עַֽל־הַמִּגְדָּ֜ל בְּיִזְרְעֶ֗אל וַיַּ֞רְא אֶת־שִׁפְעַ֤ת יֵהוּא֙ בְּבֹא֔וֹ וַיֹּ֕אמֶר שִׁפְעַ֖ת אֲנִ֣י רֹאֶ֑ה וַיֹּ֣אמֶר יְהוֹרָ֗ם קַ֥ח רַכָּ֛ב וּֽשְׁלַ֥ח לִקְרָאתָ֖ם וְיֹאמַ֥ר הֲשָׁלֽוֹם׃

‎18 ‏וַיֵּלֶךְ֩ רֹכֵ֨ב הַסּ֜וּס לִקְרָאת֗וֹ וַיֹּ֙אמֶר֙ כֹּֽה־אָמַ֤ר הַמֶּ֙לֶךְ֙ הֲשָׁל֔וֹם וַיֹּ֧אמֶר יֵה֛וּא מַה־לְּךָ֥ וּלְשָׁל֖וֹם סֹ֣ב אֶֽל־אַחֲרָ֑י וַיַּגֵּ֤ד הַצֹּפֶה֙ לֵאמֹ֔ר בָּֽא־הַמַּלְאָ֥ךְ עַד־הֵ֖ם וְלֹֽא־שָֽׁב׃

‎19 ‏וַיִּשְׁלַ֗ח רֹכֵ֣ב סוּס֮ שֵׁנִי֒ וַיָּבֹ֣א אֲלֵהֶ֔ם וַיֹּ֛אמֶר כֹּֽה־אָמַ֥ר הַמֶּ֖לֶךְ שָׁל֑וֹם וַיֹּ֧אמֶר יֵה֛וּא מַה־לְּךָ֥ וּלְשָׁל֖וֹם סֹ֥ב אֶֽל־אַחֲרָֽי׃

‎20 ‏וַיַּגֵּ֤ד הַצֹּפֶה֙ לֵאמֹ֔ר בָּ֥א עַד־אֲלֵיהֶ֖ם וְלֹֽא־שָׁ֑ב וְהַמִּנְהָ֗ג כְּמִנְהַג֙ יֵה֣וּא בֶן־נִמְשִׁ֔י כִּ֥י בְשִׁגָּע֖וֹן יִנְהָֽג׃

‎21 ‏וַיֹּ֤אמֶר יְהוֹרָם֙ אֱסֹ֔ר וַיֶּאְסֹ֖ר רִכְבּ֑וֹ וַיֵּצֵ֣א יְהוֹרָ֣ם מֶֽלֶךְ־יִ֠שְׂרָאֵל וַאֲחַזְיָ֨הוּ מֶֽלֶךְ־יְהוּדָ֜ה אִ֣ישׁ בְּרִכְבּ֗וֹ וַיֵּֽצְאוּ֙ לִקְרַ֣את יֵה֔וּא וַיִּמְצָאֻ֔הוּ בְּחֶלְקַ֖ת נָב֥וֹת הַיִּזְרְעֵאלִֽי׃

‎22 ‏וַיְהִ֗י כִּרְא֤וֹת יְהוֹרָם֙ אֶת־יֵה֔וּא וַיֹּ֖אמֶר הֲשָׁל֣וֹם יֵה֑וּא וַיֹּ֙אמֶר֙ מָ֣ה הַשָּׁל֔וֹם עַד־זְנוּנֵ֞י אִיזֶ֧בֶל אִמְּךָ֛ וּכְשָׁפֶ֖יהָ הָרַבִּֽים׃

‎23 ‏וַיַּהֲפֹ֧ךְ יְהוֹרָ֛ם יָדָ֖יו וַיָּנֹ֑ס וַיֹּ֥אמֶר אֶל־אֲחַזְיָ֖הוּ מִרְמָ֥ה אֲחַזְיָֽה׃

‎24 ‏וְיֵה֞וּא מִלֵּ֧א יָד֣וֹ בַקֶּ֗שֶׁת וַיַּ֤ךְ אֶת־יְהוֹרָם֙ בֵּ֣ין זְרֹעָ֔יו וַיֵּצֵ֥א הַחֵ֖צִי מִלִּבּ֑וֹ וַיִּכְרַ֖ע בְּרִכְבּֽוֹ׃

‎25 ‏וַיֹּ֗אמֶר אֶל־בִּדְקַר֙ שלשה שָֽׁלִשׁ֔וֹ שָׂ֚א הַשְׁלִכֵ֔הוּ בְּחֶלְקַ֕ת שְׂדֵ֖ה נָב֣וֹת הַיִּזְרְעֵאלִ֑י כִּֽי־זְכֹ֞ר אֲנִ֣י וָאַ֗תָּה אֵ֣ת רֹכְבִ֤ים צְמָדִים֙ אַֽחֲרֵי֙ אַחְאָ֣ב אָבִ֔יו וַֽיהוָה֙ נָשָׂ֣א עָלָ֔יו אֶת־הַמַּשָּׂ֖א הַזֶּֽה׃

‎26 ‏אִם־לֹ֡א אֶת־דְּמֵ֣י נָבוֹת֩ וְאֶת־דְּמֵ֨י בָנָ֜יו רָאִ֤יתִי אֶ֙מֶשׁ֙ נְאֻם־יְהוָ֔ה וְשִׁלַּמְתִּ֥י לְךָ֛ בַּחֶלְקָ֥ה הַזֹּ֖את נְאֻם־יְהוָ֑ה וְעַתָּ֗ה שָׂ֧א הַשְׁלִכֵ֛הוּ בַּחֶלְקָ֖ה כִּדְבַ֥ר יְהוָֽה׃

‎27 ‏וַאֲחַזְיָ֤ה מֶֽלֶךְ־יְהוּדָה֙ רָאָ֔ה וַיָּ֕נָס דֶּ֖רֶךְ בֵּ֣ית הַגָּ֑ן וַיִּרְדֹּ֨ף אַחֲרָ֜יו יֵה֗וּא וַ֠יֹּאמֶר גַּם־אֹת֞וֹ הַכֻּ֣הוּ אֶל־הַמֶּרְכָּבָ֗ה בְּמַֽעֲלֵה־גוּר֙ אֲשֶׁ֣ר אֶֽת־יִבְלְעָ֔ם וַיָּ֥נָס מְגִדּ֖וֹ וַיָּ֥מָת שָֽׁם׃

‎28 ‏וַיַּרְכִּ֧בוּ אֹת֛וֹ עֲבָדָ֖יו יְרוּשָׁלְָ֑מָה וַיִּקְבְּר֨וּ אֹת֧וֹ בִקְבֻרָת֛וֹ עִם־אֲבֹתָ֖יו בְּעִ֥יר דָּוִֽד׃ פ

‎29 ‏וּבִשְׁנַת֙ אַחַ֣ת עֶשְׂרֵ֣ה שָׁנָ֔ה לְיוֹרָ֖ם בֶּן־אַחְאָ֑ב מָלַ֥ךְ אֲחַזְיָ֖ה עַל־יְהוּדָֽה׃

‎30 ‏וַיָּב֥וֹא יֵה֖וּא יִזְרְעֶ֑אלָה וְאִיזֶ֣בֶל שָׁמְעָ֗ה וַתָּ֨שֶׂם בַּפּ֤וּךְ עֵינֶ֙יהָ֙ וַתֵּ֣יטֶב אֶת־רֹאשָׁ֔הּ וַתַּשְׁקֵ֖ף בְּעַ֥ד הַחַלּֽוֹן׃

‎31 ‏וְיֵה֖וּא בָּ֣א בַשָּׁ֑עַר וַתֹּ֣אמֶר הֲשָׁל֔וֹם זִמְרִ֖י הֹרֵ֥ג אֲדֹנָֽיו׃

‎32 ‏וַיִּשָּׂ֤א פָנָיו֙ אֶל־הַ֣חַלּ֔וֹן וַיֹּ֕אמֶר מִ֥י אִתִּ֖י מִ֑י וַיַּשְׁקִ֣יפוּ אֵלָ֔יו שְׁנַ֥יִם שְׁלֹשָׁ֖ה סָרִיסִֽים׃

‎33 ‏וַיֹּ֥אמֶר שמטהו שִׁמְט֖וּהָ וַֽיִּשְׁמְט֑וּהָ וַיִּ֨ז מִדָּמָ֧הּ אֶל־הַקִּ֛יר וְאֶל־הַסּוּסִ֖ים וַֽיִּרְמְסֶֽנָּה׃

‎34 ‏וַיָּבֹ֖א וַיֹּ֣אכַל וַיֵּ֑שְׁתְּ וַיֹּ֗אמֶר פִּקְדוּ־נָ֞א אֶת־הָאֲרוּרָ֤ה הַזֹּאת֙ וְקִבְר֔וּהָ כִּ֥י בַת־מֶ֖לֶךְ הִֽיא׃

‎35 ‏וַיֵּלְכ֖וּ לְקָבְרָ֑הּ וְלֹא־מָ֣צְאוּ בָ֗הּ כִּ֧י אִם־הַגֻּלְגֹּ֛לֶת וְהָרַגְלַ֖יִם וְכַפּ֥וֹת הַיָּדָֽיִם׃

‎36 ‏וַיָּשֻׁבוּ֮ וַיַּגִּ֣ידוּ לוֹ֒ וַיֹּ֙אמֶר֙ דְּבַר־יְהוָ֣ה ה֔וּא אֲשֶׁ֣ר דִּבֶּ֗ר בְּיַד־עַבְדּ֛וֹ אֵלִיָּ֥הוּ הַתִּשְׁבִּ֖י לֵאמֹ֑ר בְּחֵ֣לֶק יִזְרְעֶ֔אל יֹאכְל֥וּ הַכְּלָבִ֖ים אֶת־בְּשַׂ֥ר אִיזָֽבֶל׃

‎37 ‏והית וְֽהָיְתָ֞ה נִבְלַ֣ת אִיזֶ֗בֶל כְּדֹ֛מֶן עַל־פְּנֵ֥י הַשָּׂדֶ֖ה בְּחֵ֣לֶק יִזְרְעֶ֑אל אֲשֶׁ֥ר לֹֽא־יֹאמְר֖וּ זֹ֥את אִיזָֽבֶל׃ פ

1 we’ĕlîšā‘ hannāḇî’ qārā’ lə’^aḥaḏ mibənê hannəḇî’îm wayyō’mer lwō ḥăḡōr māṯəneyḵā wəq^aḥ paḵə haššemen hazzeh bəyāḏeḵā wəlēḵə rāmōṯ gilə‘āḏ:

2 ûḇā’ṯā šāmmâ ûrə’ēh-šām yēhû’ ḇen-yəhwōšāfāṭ ben-niməšî ûḇā’ṯā wahăqēmōṯwō mitwōḵ¹ ’eḥāyw wəhēḇê’ṯā ’ōṯwō ḥeḏer bəḥāḏer:

3 wəlāq^aḥətā faḵə-haššemen wəyāṣaqətā ‘al-rō’šwō wə’āmarətā kōh-’āmar yəhwâ məš^aḥətîḵā ləmeleḵə ’el-yiśərā’ēl ûfāṯ^aḥətā hadeleṯ wənasətâ wəlō’ ṯəḥakeh:

4 wayyēleḵə hann^a‘ar hann^a‘ar hannāḇî’ rāmōṯ gilə‘āḏ:

5 wayyāḇō’ wəhinnēh śārê h^aḥayil yōšəḇîm wayyō’mer dāḇār lî ’ēleyḵā haśśār wayyō’mer yēhû’ ’el-mî mikullānû wayyō’mer ’ēleyḵā haśśār:

6 wayyāqām wayyāḇō’ habayəṯâ wayyiṣōq haššemen ’el-rō’šwō wayyō’mer lwō kōh-’āmar yəhwâ ’ĕlōhê yiśərā’ēl məš^aḥətîḵā ləmeleḵə ’el-‘am yəhwâ ’el-yiśərā’ēl:

7 wəhikîṯâ ’eṯ-bêṯ ’^aḥə’āḇ ’ăḏōneyḵā wəniqqamətî dəmê| ‘ăḇāḏay hannəḇî’îm ûḏəmê kāl-‘aḇəḏê yəhwâ mîyaḏ ’îzāḇel:

8 wə’āḇaḏ kāl-bêṯ ’^aḥə’āḇ wəhiḵəratî lə’^aḥə’āḇ mašətîn bəqîr wə‘āṣûr wə‘āzûḇ bəyiśərā’ēl:

9 wənāṯatî ’eṯ-bêṯ ’^aḥə’āḇ kəḇêṯ yārāḇə‘ām ben-nəḇāṭ ûḵəḇêṯ b^a‘əšā’ ḇen-’ăḥîyâ:

10 wə’eṯ-’îzeḇel yō’ḵəlû hakəlāḇîm bəḥēleq yizərə‘e’l wə’ên qōḇēr wayyifət^aḥ hadeleṯ wayyānōs:

11 wəyēhû’ yāṣā’ ’el-‘aḇəḏê ’ăḏōnāyw wayyō’mer lwō hăšālwōm madû‘a bā’-haməšugā‘ hazzeh ’ēleyḵā wayyō’mer ’ălêhem ’atem yəḏ^a‘ətem ’eṯ-hā’îš wə’eṯ-śîḥwō:

12 wayyō’mərû šeqer hageḏ-nā’ lānû wayyō’mer kāzō’ṯ wəḵāzō’ṯ ’āmar ’ēlay lē’mōr kōh ’āmar yəhwâ məš^aḥətîḵā ləmeleḵə ’el-yiśərā’ēl:

13 wayəmahărû wayyiqəḥû ’îš biḡəḏwō wayyāśîmû ṯ^aḥətāyw ’el-gerem hamm^a‘ălwōṯ wayyiṯəqə‘û baššwōfār wayyō’mərû mālaḵə yēhû’:

14 wayyiṯəqaššēr yēhû’ ben-yəhwōšāfāṭ ben-niməšî ’el-ywōrām wəywōrām hāyâ šōmēr bərāmōṯ gilə‘āḏ hû’ wəḵāl-yiśərā’ēl mipənê ḥăzā’ēl meleḵə-’ărām:

15 wayyāšāḇ yəhwōrām hammeleḵə ləhiṯərapē’ ḇîəzərə‘e’l min-hammakîm ’ăšer yakuhû ’ărammîm bəhillāḥămwō ’eṯ-ḥăzā’ēl meleḵə ’ărām wayyō’mer yēhû’ ’im-yēš nafəšəḵem ’al-yēṣē’ fālîṭ min-hā‘îr lāleḵeṯ lagîḏ ləhagîḏ bəyizərə‘e’l:

16 wayyirəkaḇ yēhû’ wayyēleḵə yizərə‘e’lâ kî ywōrām šōḵēḇ šāmmâ wa’ăḥazəyâ meleḵə yəhûḏâ yāraḏ lirə’wōṯ ’eṯ-ywōrām:

17 wəhaṣṣōfeh ‘ōmēḏ ‘al-hammiḡədāl bəyizərə‘e’l wayyarə’ ’eṯ-šifə‘aṯ yēhû’ bəḇō’wō wayyō’mer šifə‘aṯ ’ănî rō’eh wayyō’mer yəhwōrām q^aḥ rakāḇ ûšəl^aḥ liqərā’ṯām wəyō’mar hăšālwōm:

18 wayyēleḵə rōḵēḇ hassûs liqərā’ṯwō wayyō’mer kōh-’āmar hammeleḵə hăšālwōm wayyō’mer yēhû’ mah-lləḵā ûləšālwōm sōḇ ’el-’^aḥărāy wayyagēḏ haṣṣōfeh lē’mōr bā’-hammalə’āḵə ‘aḏ-hēm wəlō’-šāḇ:

19 wayyišəl^aḥ rōḵēḇ sûs šēnî wayyāḇō’ ’ălēhem wayyō’mer kōh-’āmar hammeleḵə šālwōm wayyō’mer yēhû’ mah-lləḵā ûləšālwōm sōḇ ’el-’^aḥărāy:

20 wayyagēḏ haṣṣōfeh lē’mōr bā’ ‘aḏ-’ălêhem wəlō’-šāḇ wəhamminəhāḡ kəminəhaḡ yēhû’ ḇen-niməšî kî ḇəšigā‘wōn yinəhāḡ:

21 wayyō’mer yəhwōrām ’ĕsōr wayye’əsōr riḵəbwō wayyēṣē’ yəhwōrām meleḵə-yiśərā’ēl wa’ăḥazəyâû meleḵə-yəhûḏâ ’îš bəriḵəbwō wayyēṣə’û liqəra’ṯ yēhû’ wayyiməṣā’uhû bəḥeləqaṯ nāḇwōṯ hayyizərə‘ē’lî:

22 wayəhî kirə’wōṯ yəhwōrām ’eṯ-yēhû’ wayyō’mer hăšālwōm yēhû’ wayyō’mer mâ haššālwōm ‘aḏ-zənûnê ’îzeḇel ’imməḵā ûḵəšāfeyhā hārabîm:

23 wayyahăfōḵə yəhwōrām yāḏāyw wayyānōs wayyō’mer ’el-’ăḥazəyâû mirəmâ ’ăḥazəyâ:

24 wəyēhû’ millē’ yāḏwō ḇaqqešeṯ wayyaḵə ’eṯ-yəhwōrām bên zərō‘āyw wayyēṣē’ h^aḥēṣî millibwō wayyiḵər^a‘ bəriḵəbwō:

25 wayyō’mer ’el-biḏəqar šəlōšâ šālišwō śā’ hašəliḵēhû bəḥeləqaṯ śəḏēh nāḇwōṯ hayyizərə‘ē’lî kî-zəḵōr ’ănî wā’atâ ’ēṯ rōḵəḇîm ṣəmāḏîm ’^aḥărê ’^aḥə’āḇ ’āḇîw wayhwâ nāśā’ ‘ālāyw ’eṯ-hammaśśā’ hazzeh:

26 ’im-lō’ ’eṯ-dəmê nāḇwōṯ wə’eṯ-dəmê ḇānāyw rā’îṯî ’emeš nə’um-yəhwâ wəšillamətî ləḵā b^aḥeləqâ hazzō’ṯ nə’um-yəhwâ wə‘atâ śā’ hašəliḵēhû b^aḥeləqâ kiḏəḇar yəhwâ:

27 wa’ăḥazəyâ meleḵə-yəhûḏâ rā’â wayyānās dereḵə bêṯ hagān wayyirədōf ’^aḥărāyw yēhû’ wayyō’mer gam-’ōṯwō hakuhû ’el-hammerəkāḇâ bəm^a‘ălēh-ḡûr ’ăšer ’eṯ-yiḇələ‘ām wayyānās məḡidwō wayyāmāṯ šām:

28 wayyarəkiḇû ’ōṯwō ‘ăḇāḏāyw yərûšālāəmâ wayyiqəbərû ’ōṯwō ḇiqəḇurāṯwō ‘im-’ăḇōṯāyw bə‘îr dāwiḏ: f

29 ûḇišənaṯ ’^aḥaṯ ‘eśərēh šānâ ləywōrām ben-’^aḥə’āḇ mālaḵə ’ăḥazəyâ ‘al-yəhûḏâ:

30 wayyāḇwō’ yēhû’ yizərə‘e’lâ wə’îzeḇel šāmə‘â watāśem bapûḵə ‘êneyhā watêṭeḇ ’eṯ-rō’šāh watašəqēf bə‘aḏ h^aḥallwōn:

31 wəyēhû’ bā’ ḇaššā‘ar watō’mer hăšālwōm zimərî hōrēḡ ’ăḏōnāyw:

32 wayyiśśā’ fānāyw ’el-h^aḥallwōn wayyō’mer mî ’itî mî wayyašəqîfû ’ēlāyw šənayim šəlōšâ sārîsîm:

33 wayyō’mer šiməṭuhû šiməṭûhā wayyišəməṭûhā wayyiz midāmāh ’el-haqqîr wə’el-hassûsîm wayyirəməsennâ:

34 wayyāḇō’ wayyō’ḵal wayyēšətə wayyō’mer piqəḏû-nā’ ’eṯ-hā’ărûrâ hazzō’ṯ wəqiḇərûhā kî ḇaṯ-meleḵə hî’:

35 wayyēləḵû ləqāḇərāh wəlō’-māṣə’û ḇāh kî ’im-haguləgōleṯ wəhāraḡəlayim wəḵapwōṯ hayyāḏāyim:

36 wayyāšuḇû wayyagîḏû lwō wayyō’mer dəḇar-yəhwâ hû’ ’ăšer diber bəyaḏ-‘aḇədwō ’ēlîyâû hatišəbî lē’mōr bəḥēleq yizərə‘e’l yō’ḵəlû hakəlāḇîm ’eṯ-bəśar ’îzāḇel:

37 wəhāyāṯ wəhāyəṯâ niḇəlaṯ ’îzeḇel kəḏōmen ‘al-pənê haśśāḏeh bəḥēleq yizərə‘e’l ’ăšer lō’-yō’mərû zō’ṯ ’îzāḇel: f