‎1 ‏וָאֹמַ֗ר שִׁמְעוּ־נָא֙ רָאשֵׁ֣י יַעֲקֹ֔ב וּקְצִינֵ֖י בֵּ֣ית יִשְׂרָאֵ֑ל הֲל֣וֹא לָכֶ֔ם לָדַ֖עַת אֶת־הַמִּשְׁפָּֽט׃

‎2 ‏שֹׂ֥נְאֵי ט֖וֹב וְאֹ֣הֲבֵי רעה רָ֑ע גֹּזְלֵ֤י עוֹרָם֙ מֵֽעֲלֵיהֶ֔ם וּשְׁאֵרָ֖ם מֵעַ֥ל עַצְמוֹתָֽם׃

‎3 ‏וַאֲשֶׁ֣ר אָכְלוּ֮ שְׁאֵ֣ר עַמִּי֒ וְעוֹרָם֙ מֵעֲלֵיהֶ֣ם הִפְשִׁ֔יטוּ וְאֶת־עַצְמֹֽתֵיהֶ֖ם פִּצֵּ֑חוּ וּפָרְשׂוּ֙ כַּאֲשֶׁ֣ר בַּסִּ֔יר וּכְבָשָׂ֖ר בְּת֥וֹךְ קַלָּֽחַת׃

‎4 ‏אָ֚ז יִזְעֲק֣וּ אֶל־יְהוָ֔ה וְלֹ֥א יַעֲנֶ֖ה אוֹתָ֑ם וְיַסְתֵּ֨ר פָּנָ֤יו מֵהֶם֙ בָּעֵ֣ת הַהִ֔יא כַּאֲשֶׁ֥ר הֵרֵ֖עוּ מַעַלְלֵיהֶֽם׃ פ

‎5 ‏כֹּ֚ה אָמַ֣ר יְהוָ֔ה עַל־הַנְּבִיאִ֖ים הַמַּתְעִ֣ים אֶת־עַמִּ֑י הַנֹּשְׁכִ֤ים בְּשִׁנֵּיהֶם֙ וְקָרְא֣וּ שָׁל֔וֹם וַאֲשֶׁר֙ לֹא־יִתֵּ֣ן עַל־פִּיהֶ֔ם וְקִדְּשׁ֥וּ עָלָ֖יו מִלְחָמָֽה׃

‎6 ‏לָכֵ֞ן לַ֤יְלָה לָכֶם֙ מֵֽחָז֔וֹן וְחָשְׁכָ֥ה לָכֶ֖ם מִקְּסֹ֑ם וּבָ֤אָה הַשֶּׁ֙מֶשׁ֙ עַל־הַנְּבִיאִ֔ים וְקָדַ֥ר עֲלֵיהֶ֖ם הַיּֽוֹם׃

‎7 ‏וּבֹ֣שׁוּ³ הַחֹזִ֗ים וְחָֽפְרוּ֙ הַקֹּ֣סְמִ֔ים וְעָט֥וּ עַל־שָׂפָ֖ם כֻּלָּ֑ם כִּ֛י אֵ֥ין מַעֲנֵ֖ה אֱלֹהִֽים׃

‎8 ‏וְאוּלָ֗ם אָנֹכִ֞י מָלֵ֤אתִי כֹ֙חַ֙ אֶת־ר֣וּחַ יְהוָ֔ה וּמִשְׁפָּ֖ט וּגְבוּרָ֑ה לְהַגִּ֤יד לְיַֽעֲקֹב֙ פִּשְׁע֔וֹ וּלְיִשְׂרָאֵ֖ל חַטָּאתֽוֹ׃ ס

‎9 ‏שִׁמְעוּ־נָ֣א זֹ֗את רָאשֵׁי֙ בֵּ֣ית יַעֲקֹ֔ב וּקְצִינֵ֖י בֵּ֣ית יִשְׂרָאֵ֑ל הַֽמֲתַעֲבִ֣ים מִשְׁפָּ֔ט וְאֵ֥ת כָּל־הַיְשָׁרָ֖ה יְעַקֵּֽשׁוּ׃

‎10 ‏בֹּנֶ֥ה צִיּ֖וֹן בְּדָמִ֑ים וִירוּשָׁלִַ֖ם בְּעַוְלָֽה׃

‎11 ‏רָאשֶׁ֣יהָ׀ בְּשֹׁ֣חַד יִשְׁפֹּ֗טוּ וְכֹהֲנֶ֙יהָ֙ בִּמְחִ֣יר יוֹר֔וּ וּנְבִיאֶ֖יהָ בְּכֶ֣סֶף יִקְסֹ֑מוּ וְעַל־יְהוָה֙ יִשָּׁעֵ֣נוּ לֵאמֹ֔ר הֲל֤וֹא יְהוָה֙ בְּקִרְבֵּ֔נוּ לֹֽא־תָב֥וֹא עָלֵ֖ינוּ רָעָֽה׃

‎12 ‏לָכֵן֙ בִּגְלַלְכֶ֔ם צִיּ֖וֹן שָׂדֶ֣ה תֵֽחָרֵ֑שׁ וִירוּשָׁלִַ֙ם֙ עִיִּ֣ין תִּֽהְיֶ֔ה וְהַ֥ר הַבַּ֖יִת לְבָמ֥וֹת יָֽעַר׃ פ

1 wā’ōmar šimə‘û-nā’ rā’šê y^a‘ăqōḇ ûqəṣînê bêṯ yiśərā’ēl hălwō’ lāḵem lāḏ^a‘aṯ ’eṯ-hammišəpāṭ:

2 śōnə’ê ṭwōḇ wə’ōhăḇê rā‘â rā‘ gōzəlê ‘wōrām mē‘ălêhem ûšə’ērām mē‘al ‘aṣəmwōṯām:

3 wa’ăšer ’āḵəlû šə’ēr ‘ammî wə‘wōrām mē‘ălêhem hifəšîṭû wə’eṯ-‘aṣəmōṯêhem piṣṣēḥû ûfārəśû ka’ăšer bassîr ûḵəḇāśār bəṯwōḵə qallāḥaṯ:

4 ’āz yizə‘ăqû ’el-yəhwâ wəlō’ y^a‘ăneh ’wōṯām wəyasətēr pānāyw mēhem bā‘ēṯ hahî’ ka’ăšer hērē‘û m^a‘aləlêhem: f

5 kōh ’āmar yəhwâ ‘al-hannəḇî’îm hammaṯə‘îm ’eṯ-‘ammî hannōšəḵîm bəšinnêhem wəqārə’û šālwōm wa’ăšer lō’-yitēn ‘al-pîhem wəqidəšû ‘ālāyw miləḥāmâ:

6 lāḵēn layəlâ lāḵem mēḥāzwōn wəḥāšəḵâ lāḵem miqqəsōm ûḇā’â haššemeš ‘al-hannəḇî’îm wəqāḏar ‘ălêhem hayywōm:

7 ûḇōšû³ h^aḥōzîm wəḥāfərû haqqōsəmîm wə‘āṭû ‘al-śāfām kullām kî ’ên m^a‘ănēh ’ĕlōhîm:

8 wə’ûlām ’ānōḵî mālē’ṯî ḵōḥa ’eṯ-rûḥa yəhwâ ûmišəpāṭ ûḡəḇûrâ ləhagîḏ ləy^a‘ăqōḇ pišə‘wō ûləyiśərā’ēl ḥaṭṭā’ṯwō: s

9 šimə‘û-nā’ zō’ṯ rā’šê bêṯ y^a‘ăqōḇ ûqəṣînê bêṯ yiśərā’ēl hamăṯ^a‘ăḇîm mišəpāṭ wə’ēṯ kāl-hayəšārâ yə‘aqqēšû:

10 bōneh ṣîywōn bəḏāmîm wîrûšālaim bə‘awəlâ:

11 rā’šeyhā| bəšōḥaḏ yišəpōṭû wəḵōhăneyhā biməḥîr ywōrû ûnəḇî’eyhā bəḵesef yiqəsōmû wə‘al-yəhwâ yiššā‘ēnû lē’mōr hălwō’ yəhwâ bəqirəbēnû lō’-ṯāḇwō’ ‘ālênû rā‘â:

12 lāḵēn biḡəlaləḵem ṣîywōn śāḏeh ṯēḥārēš wîrûšālaim ‘îyîn tihəyeh wəhar habayiṯ ləḇāmwōṯ yā‘ar: f