‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏צַ֚ו אֶת־בְּנֵ֣י יִשְׂרָאֵ֔ל וִֽישַׁלְּחוּ֙ מִן־הַֽמַּחֲנֶ֔ה כָּל־צָר֖וּעַ וְכָל־זָ֑ב וְכֹ֖ל טָמֵ֥א לָנָֽפֶשׁ׃

‎3 ‏מִזָּכָ֤ר עַד־נְקֵבָה֙ תְּשַׁלֵּ֔חוּ אֶל־מִח֥וּץ לַֽמַּחֲנֶ֖ה תְּשַׁלְּח֑וּם וְלֹ֤א יְטַמְּאוּ֙ אֶת־מַ֣חֲנֵיהֶ֔ם אֲשֶׁ֥ר אֲנִ֖י שֹׁכֵ֥ן בְּתוֹכָֽם׃

‎4 ‏וַיַּֽעֲשׂוּ־כֵן֙ בְּנֵ֣י יִשְׂרָאֵ֔ל וַיְשַׁלְּח֣וּ אוֹתָ֔ם אֶל־מִח֖וּץ לַֽמַּחֲנֶ֑ה כַּאֲשֶׁ֨ר דִּבֶּ֤ר יְהוָה֙ אֶל־מֹשֶׁ֔ה כֵּ֥ן עָשׂ֖וּ בְּנֵ֥י יִשְׂרָאֵֽל׃ פ

‎5 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎6 ‏דַּבֵּר֮ אֶל־בְּנֵ֣י יִשְׂרָאֵל֒ אִ֣ישׁ אֽוֹ־אִשָּׁ֗ה כִּ֤י יַעֲשׂוּ֙ מִכָּל־חַטֹּ֣את הָֽאָדָ֔ם לִמְעֹ֥ל מַ֖עַל בַּיהוָ֑ה וְאָֽשְׁמָ֖ה הַנֶּ֥פֶשׁ הַהִֽוא׃

‎7 ‏וְהִתְוַדּ֗וּ אֶֽת־חַטָּאתָם֮ אֲשֶׁ֣ר עָשׂוּ֒ וְהֵשִׁ֤יב אֶת־אֲשָׁמוֹ֙ בְּרֹאשׁ֔וֹ וַחֲמִישִׁת֖וֹ יֹסֵ֣ף עָלָ֑יו וְנָתַ֕ן לַאֲשֶׁ֖ר אָשַׁ֥ם לֽוֹ׃

‎8 ‏וְאִם־אֵ֨ין לָאִ֜ישׁ גֹּאֵ֗ל לְהָשִׁ֤יב הָאָשָׁם֙ אֵלָ֔יו הָאָשָׁ֛ם הַמּוּשָׁ֥ב לַיהוָ֖ה לַכֹּהֵ֑ן מִלְּבַ֗ד אֵ֚יל הַכִּפֻּרִ֔ים אֲשֶׁ֥ר יְכַפֶּר־בּ֖וֹ עָלָֽיו׃

‎9 ‏וְכָל־תְּרוּמָ֞ה לְכָל־קָדְשֵׁ֧י בְנֵי־יִשְׂרָאֵ֛ל אֲשֶׁר־יַקְרִ֥יבוּ לַכֹּהֵ֖ן ל֥וֹ יִהְיֶֽה׃

‎10 ‏וְאִ֥ישׁ אֶת־קֳדָשָׁ֖יו ל֣וֹ יִהְי֑וּ אִ֛ישׁ אֲשֶׁר־יִתֵּ֥ן לַכֹּהֵ֖ן ל֥וֹ יִהְיֶֽה׃ פ

‎11 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎12 ‏דַּבֵּר֙ אֶל־בְּנֵ֣י יִשְׂרָאֵ֔ל וְאָמַרְתָּ֖ אֲלֵהֶ֑ם אִ֥ישׁ אִישׁ֙ כִּֽי־תִשְׂטֶ֣ה אִשְׁתּ֔וֹ וּמָעֲלָ֥ה ב֖וֹ מָֽעַל׃

‎13 ‏וְשָׁכַ֨ב אִ֣ישׁ אֹתָהּ֮ שִׁכְבַת־זֶרַע֒ וְנֶעְלַם֙ מֵעֵינֵ֣י אִישָׁ֔הּ וְנִסְתְּרָ֖ה וְהִ֣יא נִטְמָ֑אָה וְעֵד֙ אֵ֣ין בָּ֔הּ וְהִ֖וא לֹ֥א נִתְפָּֽשָׂה׃

‎14 ‏וְעָבַ֨ר עָלָ֧יו רֽוּחַ־קִנְאָ֛ה וְקִנֵּ֥א אֶת־אִשְׁתּ֖וֹ וְהִ֣וא נִטְמָ֑אָה אוֹ־עָבַ֨ר עָלָ֤יו רֽוּחַ־קִנְאָה֙ וְקִנֵּ֣א אֶת־אִשְׁתּ֔וֹ וְהִ֖יא לֹ֥א נִטְמָֽאָה׃

‎15 ‏וְהֵבִ֨יא הָאִ֣ישׁ אֶת־אִשְׁתּוֹ֮ אֶל־הַכֹּהֵן֒ וְהֵבִ֤יא אֶת־קָרְבָּנָהּ֙ עָלֶ֔יהָ עֲשִׂירִ֥ת הָאֵיפָ֖ה קֶ֣מַח שְׂעֹרִ֑ים לֹֽא־יִצֹ֨ק עָלָ֜יו שֶׁ֗מֶן וְלֹֽא־יִתֵּ֤ן עָלָיו֙ לְבֹנָ֔ה כִּֽי־מִנְחַ֤ת קְנָאֹת֙ ה֔וּא מִנְחַ֥ת זִכָּר֖וֹן מַזְכֶּ֥רֶת עָוֹֽן׃

‎16 ‏וְהִקְרִ֥יב אֹתָ֖הּ הַכֹּהֵ֑ן וְהֶֽעֱמִדָ֖הּ לִפְנֵ֥י יְהוָֽה׃

‎17 ‏וְלָקַ֧ח הַכֹּהֵ֛ן מַ֥יִם קְדֹשִׁ֖ים בִּכְלִי־חָ֑רֶשׂ וּמִן־הֶֽעָפָ֗ר אֲשֶׁ֤ר יִהְיֶה֙ בְּקַרְקַ֣ע הַמִּשְׁכָּ֔ן יִקַּ֥ח הַכֹּהֵ֖ן וְנָתַ֥ן אֶל־הַמָּֽיִם׃

‎18 ‏וְהֶעֱמִ֨יד הַכֹּהֵ֥ן אֶֽת־הָאִשָּׁה֮ לִפְנֵ֣י יְהוָה֒ וּפָרַע֙ אֶת־רֹ֣אשׁ הָֽאִשָּׁ֔ה וְנָתַ֣ן עַל־כַּפֶּ֗יהָ אֵ֚ת מִנְחַ֣ת הַזִּכָּר֔וֹן מִנְחַ֥ת קְנָאֹ֖ת הִ֑וא וּבְיַ֤ד הַכֹּהֵן֙ יִהְי֔וּ מֵ֥י הַמָּרִ֖ים הַמְאָֽרֲרִֽים׃³

‎19 ‏וְהִשְׁבִּ֨יעַ אֹתָ֜הּ הַכֹּהֵ֗ן וְאָמַ֤ר אֶל־הָֽאִשָּׁה֙ אִם־לֹ֨א שָׁכַ֥ב אִישׁ֙ אֹתָ֔ךְ וְאִם־לֹ֥א שָׂטִ֛ית טֻמְאָ֖ה תַּ֣חַת אִישֵׁ֑ךְ הִנָּקִ֕י מִמֵּ֛י הַמָּרִ֥ים הַֽמְאָרֲרִ֖ים הָאֵֽלֶּה׃

‎20 ‏וְאַ֗תְּ כִּ֥י שָׂטִ֛ית תַּ֥חַת אִישֵׁ֖ךְ וְכִ֣י נִטְמֵ֑את וַיִּתֵּ֨ן אִ֥ישׁ בָּךְ֙ אֶת־שְׁכָבְתּ֔וֹ מִֽבַּלְעֲדֵ֖י אִישֵֽׁךְ׃

‎21 ‏וְהִשְׁבִּ֨יעַ הַכֹּהֵ֥ן אֶֽת־הָֽאִשָּׁה֮ בִּשְׁבֻעַ֣ת הָאָלָה֒ וְאָמַ֤ר הַכֹּהֵן֙ לָֽאִשָּׁ֔ה יִתֵּ֨ן יְהוָ֥ה אוֹתָ֛ךְ לְאָלָ֥ה וְלִשְׁבֻעָ֖ה בְּת֣וֹךְ עַמֵּ֑ךְ בְּתֵ֨ת יְהוָ֤ה אֶת־יְרֵכֵךְ֙ נֹפֶ֔לֶת וְאֶת־בִּטְנֵ֖ךְ צָבָֽה׃

‎22 ‏וּ֠בָאוּ הַמַּ֨יִם הַמְאָרְרִ֤ים הָאֵ֙לֶּה֙ בְּֽמֵעַ֔יִךְ לַצְבּ֥וֹת בֶּ֖טֶן וְלַנְפִּ֣ל יָרֵ֑ךְ וְאָמְרָ֥ה הָאִשָּׁ֖ה אָמֵ֥ן׀ אָמֵֽן׃

‎23 ‏וְ֠כָתַב אֶת־הָאָלֹ֥ת הָאֵ֛לֶּה הַכֹּהֵ֖ן בַּסֵּ֑פֶר וּמָחָ֖ה אֶל־מֵ֥י הַמָּרִֽים׃

‎24 ‏וְהִשְׁקָה֙ אֶת־הָ֣אִשָּׁ֔ה אֶת־מֵ֥י הַמָּרִ֖ים הַמְאָֽרֲרִ֑ים וּבָ֥אוּ בָ֛הּ הַמַּ֥יִם הַֽמְאָרֲרִ֖ים לְמָרִֽים׃

‎25 ‏וְלָקַ֤ח הַכֹּהֵן֙ מִיַּ֣ד הָֽאִשָּׁ֔ה אֵ֖ת מִנְחַ֣ת הַקְּנָאֹ֑ת וְהֵנִ֤יף אֶת־הַמִּנְחָה֙ לִפְנֵ֣י יְהוָ֔ה וְהִקְרִ֥יב אֹתָ֖הּ אֶל־הַמִּזְבֵּֽחַ׃

‎26 ‏וְקָמַ֨ץ הַכֹּהֵ֤ן מִן־הַמִּנְחָה֙ אֶת־אַזְכָּ֣רָתָ֔הּ וְהִקְטִ֖יר הַמִּזְבֵּ֑חָה וְאַחַ֛ר יַשְׁקֶ֥ה אֶת־הָאִשָּׁ֖ה אֶת־הַמָּֽיִם׃

‎27 ‏וְהִשְׁקָ֣הּ אֶת־הַמַּ֗יִם וְהָיְתָ֣ה אִֽם־נִטְמְאָה֮ וַתִּמְעֹ֣ל מַ֣עַל בְּאִישָׁהּ֒ וּבָ֨אוּ בָ֜הּ הַמַּ֤יִם הַמְאָֽרֲרִים֙ לְמָרִ֔ים וְצָבְתָ֣ה בִטְנָ֔הּ וְנָפְלָ֖ה יְרֵכָ֑הּ וְהָיְתָ֧ה הָאִשָּׁ֛ה לְאָלָ֖ה בְּקֶ֥רֶב עַמָּֽהּ׃

‎28 ‏וְאִם־לֹ֤א נִטְמְאָה֙ הָֽאִשָּׁ֔ה וּטְהֹרָ֖ה הִ֑וא וְנִקְּתָ֖ה וְנִזְרְעָ֥ה זָֽרַע׃

‎29 ‏זֹ֥את תּוֹרַ֖ת הַקְּנָאֹ֑ת אֲשֶׁ֨ר תִּשְׂטֶ֥ה אִשָּׁ֛ה תַּ֥חַת אִישָׁ֖הּ וְנִטְמָֽאָה׃

‎30 ‏א֣וֹ אִ֗ישׁ אֲשֶׁ֨ר תַּעֲבֹ֥ר עָלָ֛יו ר֥וּחַ קִנְאָ֖ה וְקִנֵּ֣א אֶת־אִשְׁתּ֑וֹ וְהֶעֱמִ֤יד אֶת־הָֽאִשָּׁה֙ לִפְנֵ֣י יְהוָ֔ה וְעָ֤שָׂה לָהּ֙ הַכֹּהֵ֔ן אֵ֥ת כָּל־הַתּוֹרָ֖ה הַזֹּֽאת׃

‎31 ‏וְנִקָּ֥ה הָאִ֖ישׁ מֵעָוֹ֑ן וְהָאִשָּׁ֣ה הַהִ֔וא תִּשָּׂ֖א אֶת־עֲוֹנָֽהּ׃ פ

1 wayəḏabēr yəhwâ ’el-mōšeh llē’mōr:

2 ṣaw ’eṯ-bənê yiśərā’ēl wîšalləḥû min-hamm^aḥăneh kāl-ṣārû‘a wəḵāl-zāḇ wəḵōl ṭāmē’ lānāfeš:

3 mizzāḵār ‘aḏ-nəqēḇâ təšallēḥû ’el-miḥûṣ lamm^aḥăneh təšalləḥûm wəlō’ yəṭammə’û ’eṯ-m^aḥănêhem ’ăšer ’ănî šōḵēn bəṯwōḵām:

4 wayy^a‘ăśû-ḵēn bənê yiśərā’ēl wayəšalləḥû ’wōṯām ’el-miḥûṣ lamm^aḥăneh ka’ăšer diber yəhwâ ’el-mōšeh kēn ‘āśû bənê yiśərā’ēl: f

5 wayəḏabēr yəhwâ ’el-mōšeh llē’mōr:

6 dabēr ’el-bənê yiśərā’ēl ’îš ’wō-’iššâ kî y^a‘ăśû mikāl-ḥaṭṭō’ṯ hā’āḏām limə‘ōl m^a‘al bayhwâ wə’āšəmâ hannefeš hahiw’:

7 wəhiṯəwadû ’eṯ-ḥaṭṭā’ṯām ’ăšer ‘āśû wəhēšîḇ ’eṯ-’ăšāmwō bərō’šwō w^aḥămîšiṯwō yōsēf ‘ālāyw wənāṯan la’ăšer ’āšam lwō:

8 wə’im-’ên lā’îš gō’ēl ləhāšîḇ hā’āšām ’ēlāyw hā’āšām hammûšāḇ layhwâ lakōhēn milləḇaḏ ’êl hakipurîm ’ăšer yəḵaper-bwō ‘ālāyw:

9 wəḵāl-tərûmâ ləḵāl-qāḏəšê ḇənê-yiśərā’ēl ’ăšer-yaqərîḇû lakōhēn lwō yihəyeh:

10 wə’îš ’eṯ-qŏḏāšāyw lwō yihəyû ’îš ’ăšer-yitēn lakōhēn lwō yihəyeh: f

11 wayəḏabēr yəhwâ ’el-mōšeh llē’mōr:

12 dabēr ’el-bənê yiśərā’ēl wə’āmarətā ’ălēhem ’îš ’îš kî-ṯiśəṭeh ’išətwō ûmā‘ălâ ḇwō mā‘al:

13 wəšāḵaḇ ’îš ’ōṯāh šiḵəḇaṯ-zer^a‘ wəne‘əlam mē‘ênê ’îšāh wənisətərâ wəhî’ niṭəmā’â wə‘ēḏ ’ên bāh wəhiw’ lō’ niṯəpāśâ:

14 wə‘āḇar ‘ālāyw rûḥa-qinə’â wəqinnē’ ’eṯ-’išətwō wəhiw’ niṭəmā’â ’wō-‘āḇar ‘ālāyw rûḥa-qinə’â wəqinnē’ ’eṯ-’išətwō wəhî’ lō’ niṭəmā’â:

15 wəhēḇî’ hā’îš ’eṯ-’išətwō ’el-hakōhēn wəhēḇî’ ’eṯ-qārəbānāh ‘āleyhā ‘ăśîriṯ hā’êfâ qem^aḥ śə‘ōrîm lō’-yiṣōq ‘ālāyw šemen wəlō’-yitēn ‘ālāyw ləḇōnâ kî-minəḥaṯ qənā’ōṯ hû’ minəḥaṯ zikārwōn mazəkereṯ ‘āwōn:

16 wəhiqərîḇ ’ōṯāh hakōhēn wəhe‘ĕmiḏāh lifənê yəhwâ:

17 wəlāq^aḥ hakōhēn mayim qəḏōšîm biḵəlî-ḥāreś ûmin-he‘āfār ’ăšer yihəyeh bəqarəq^a‘ hammišəkān yiqq^aḥ hakōhēn wənāṯan ’el-hammāyim:

18 wəhe‘ĕmîḏ hakōhēn ’eṯ-hā’iššâ lifənê yəhwâ ûfār^a‘ ’eṯ-rō’š hā’iššâ wənāṯan ‘al-kapeyhā ’ēṯ minəḥaṯ hazzikārwōn minəḥaṯ qənā’ōṯ hiw’ ûḇəyaḏ hakōhēn yihəyû mê hammārîm hamə’ārărîm:³

19 wəhišəbî‘a ’ōṯāh hakōhēn wə’āmar ’el-hā’iššâ ’im-lō’ šāḵaḇ ’îš ’ōṯāḵə wə’im-lō’ śāṭîṯ ṭumə’â t^aḥaṯ ’îšēḵə hinnāqî mimmê hammārîm hamə’ārărîm hā’ēlleh:

20 wə’atə kî śāṭîṯ t^aḥaṯ ’îšēḵə wəḵî niṭəmē’ṯ wayyitēn ’îš bāḵə ’eṯ-šəḵāḇətwō mibalə‘ăḏê ’îšēḵə:

21 wəhišəbî‘a hakōhēn ’eṯ-hā’iššâ bišəḇu‘aṯ hā’ālâ wə’āmar hakōhēn lā’iššâ yitēn yəhwâ ’wōṯāḵə lə’ālâ wəlišəḇu‘â bəṯwōḵə ‘ammēḵə bəṯēṯ yəhwâ ’eṯ-yərēḵēḵə nōfeleṯ wə’eṯ-biṭənēḵə ṣāḇâ:

22 ûḇā’û hammayim hamə’ārərîm hā’ēlleh bəmē‘ayiḵə laṣəbwōṯ beṭen wəlanəpil yārēḵə wə’āmərâ hā’iššâ ’āmēn| ’āmēn:

23 wəḵāṯaḇ ’eṯ-hā’ālōṯ hā’ēlleh hakōhēn bassēfer ûmāḥâ ’el-mê hammārîm:

24 wəhišəqâ ’eṯ-hā’iššâ ’eṯ-mê hammārîm hamə’ārărîm ûḇā’û ḇāh hammayim hamə’ārărîm ləmārîm:

25 wəlāq^aḥ hakōhēn mîyaḏ hā’iššâ ’ēṯ minəḥaṯ haqqənā’ōṯ wəhēnîf ’eṯ-hamminəḥâ lifənê yəhwâ wəhiqərîḇ ’ōṯāh ’el-hammizəbēḥa:

26 wəqāmaṣ hakōhēn min-hamminəḥâ ’eṯ-’azəkārāṯāh wəhiqəṭîr hammizəbēḥâ wə’^aḥar yašəqeh ’eṯ-hā’iššâ ’eṯ-hammāyim:

27 wəhišəqāh ’eṯ-hammayim wəhāyəṯâ ’im-niṭəmə’â watimə‘ōl m^a‘al bə’îšāh ûḇā’û ḇāh hammayim hamə’ārărîm ləmārîm wəṣāḇəṯâ ḇiṭənāh wənāfəlâ yərēḵāh wəhāyəṯâ hā’iššâ lə’ālâ bəqereḇ ‘ammāh:

28 wə’im-lō’ niṭəmə’â hā’iššâ ûṭəhōrâ hiw’ wəniqqəṯâ wənizərə‘â zār^a‘:

29 zō’ṯ twōraṯ haqqənā’ōṯ ’ăšer tiśəṭeh ’iššâ t^aḥaṯ ’îšāh wəniṭəmā’â:

30 ’wō ’îš ’ăšer t^a‘ăḇōr ‘ālāyw rûḥa qinə’â wəqinnē’ ’eṯ-’išətwō wəhe‘ĕmîḏ ’eṯ-hā’iššâ lifənê yəhwâ wə‘āśâ lāh hakōhēn ’ēṯ kāl-hatwōrâ hazzō’ṯ:

31 wəniqqâ hā’îš mē‘āwōn wəhā’iššâ hahiw’ tiśśā’ ’eṯ-‘ăwōnāh: f