‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏שְׁלַח־לְךָ֣ אֲנָשִׁ֗ים וְיָתֻ֙רוּ֙ אֶת־אֶ֣רֶץ כְּנַ֔עַן אֲשֶׁר־אֲנִ֥י נֹתֵ֖ן לִבְנֵ֣י יִשְׂרָאֵ֑ל אִ֣ישׁ אֶחָד֩ אִ֨ישׁ אֶחָ֜ד לְמַטֵּ֤ה אֲבֹתָיו֙ תִּשְׁלָ֔חוּ כֹּ֖ל נָשִׂ֥יא בָהֶֽם׃

‎3 ‏וַיִּשְׁלַ֨ח אֹתָ֥ם מֹשֶׁ֛ה מִמִּדְבַּ֥ר פָּארָ֖ן עַל־פִּ֣י יְהוָ֑ה כֻּלָּ֣ם אֲנָשִׁ֔ים רָאשֵׁ֥י בְנֵֽי־יִשְׂרָאֵ֖ל הֵֽמָּה׃

‎4 ‏וְאֵ֖לֶּה שְׁמוֹתָ֑ם לְמַטֵּ֣ה רְאוּבֵ֔ן שַׁמּ֖וּעַ בֶּן־זַכּֽוּר׃

‎5 ‏לְמַטֵּ֣ה שִׁמְע֔וֹן שָׁפָ֖ט בֶּן־חוֹרִֽי׃

‎6 ‏לְמַטֵּ֣ה יְהוּדָ֔ה כָּלֵ֖ב בֶּן־יְפֻנֶּֽה׃

‎7 ‏לְמַטֵּ֣ה יִשָּׂשכָ֔ר יִגְאָ֖ל בֶּן־יוֹסֵֽף׃

‎8 ‏לְמַטֵּ֥ה אֶפְרָ֖יִם הוֹשֵׁ֥עַ בִּן־נֽוּן׃

‎9 ‏לְמַטֵּ֣ה בִנְיָמִ֔ן פַּלְטִ֖י בֶּן־רָפֽוּא׃

‎10 ‏לְמַטֵּ֣ה זְבוּלֻ֔ן גַּדִּיאֵ֖ל בֶּן־סוֹדִֽי׃

‎11 ‏לְמַטֵּ֥ה יוֹסֵ֖ף לְמַטֵּ֣ה מְנַשֶּׁ֑ה גַּדִּ֖י בֶּן־סוּסִֽי׃

‎12 ‏לְמַטֵּ֣ה דָ֔ן עַמִּיאֵ֖ל בֶּן־גְּמַלִּֽי׃

‎13 ‏לְמַטֵּ֣ה אָשֵׁ֔ר סְת֖וּר בֶּן־מִיכָאֵֽל׃

‎14 ‏לְמַטֵּ֣ה נַפְתָּלִ֔י נַחְבִּ֖י בֶּן־וָפְסִֽי׃

‎15 ‏לְמַטֵּ֣ה גָ֔ד גְּאוּאֵ֖ל בֶּן־מָכִֽי׃

‎16 ‏אֵ֚לֶּה שְׁמ֣וֹת הָֽאֲנָשִׁ֔ים אֲשֶׁר־שָׁלַ֥ח מֹשֶׁ֖ה לָת֣וּר אֶת־הָאָ֑רֶץ וַיִּקְרָ֥א מֹשֶׁ֛ה לְהוֹשֵׁ֥עַ בִּן־נ֖וּן יְהוֹשֻֽׁעַ׃

‎17 ‏וַיִּשְׁלַ֤ח אֹתָם֙ מֹשֶׁ֔ה לָת֖וּר אֶת־אֶ֣רֶץ כְּנָ֑עַן וַיֹּ֣אמֶר אֲלֵהֶ֗ם עֲל֥וּ זֶה֙ בַּנֶּ֔גֶב וַעֲלִיתֶ֖ם אֶת־הָהָֽר׃

‎18 ‏וּרְאִיתֶ֥ם אֶת־הָאָ֖רֶץ מַה־הִ֑וא וְאֶת־הָעָם֙ הַיֹּשֵׁ֣ב עָלֶ֔יהָ הֶחָזָ֥ק הוּא֙ הֲרָפֶ֔ה הַמְעַ֥ט ה֖וּא אִם־רָֽב׃

‎19 ‏וּמָ֣ה הָאָ֗רֶץ אֲשֶׁר־הוּא֙ יֹשֵׁ֣ב בָּ֔הּ הֲטוֹבָ֥ה הִ֖וא אִם־רָעָ֑ה וּמָ֣ה הֶֽעָרִ֗ים אֲשֶׁר־הוּא֙ יוֹשֵׁ֣ב בָּהֵ֔נָּה הַבְּמַֽחֲנִ֖ים אִ֥ם בְּמִבְצָרִֽים׃

‎20 ‏וּמָ֣ה הָ֠אָרֶץ הַשְּׁמֵנָ֨ה הִ֜וא אִם־רָזָ֗ה הֲיֵֽשׁ־בָּ֥הּ עֵץ֙ אִם־אַ֔יִן וְהִ֨תְחַזַּקְתֶּ֔ם וּלְקַחְתֶּ֖ם מִפְּרִ֣י הָאָ֑רֶץ וְהַ֨יָּמִ֔ים יְמֵ֖י בִּכּוּרֵ֥י עֲנָבִֽים׃

‎21 ‏וַֽיַּעֲל֖וּ וַיָּתֻ֣רוּ אֶת־הָאָ֑רֶץ מִמִּדְבַּר־צִ֥ן עַד־רְחֹ֖ב לְבֹ֥א חֲמָֽת׃

‎22 ‏וַיַּעֲל֣וּ בַנֶּגֶב֮ וַיָּבֹ֣א עַד־חֶבְרוֹן֒ וְשָׁ֤ם אֲחִימַן֙ שֵׁשַׁ֣י וְתַלְמַ֔י יְלִידֵ֖י הָעֲנָ֑ק וְחֶבְר֗וֹן שֶׁ֤בַע שָׁנִים֙ נִבְנְתָ֔ה לִפְנֵ֖י צֹ֥עַן מִצְרָֽיִם׃

‎23 ‏וַיָּבֹ֜אוּ עַד־נַ֣חַל אֶשְׁכֹּ֗ל וַיִּכְרְת֨וּ מִשָּׁ֤ם זְמוֹרָה֙ וְאֶשְׁכּ֤וֹל עֲנָבִים֙ אֶחָ֔ד וַיִּשָּׂאֻ֥הוּ בַמּ֖וֹט בִּשְׁנָ֑יִם וּמִן־הָרִמֹּנִ֖ים וּמִן־הַתְּאֵנִֽים׃

‎24 ‏לַמָּק֣וֹם הַה֔וּא קָרָ֖א נַ֣חַל אֶשְׁכּ֑וֹל עַ֚ל אֹד֣וֹת הָֽאֶשְׁכּ֔וֹל אֲשֶׁר־כָּרְת֥וּ מִשָּׁ֖ם בְּנֵ֥י יִשְׂרָאֵֽל׃

‎25 ‏וַיָּשֻׁ֖בוּ מִתּ֣וּר הָאָ֑רֶץ מִקֵּ֖ץ אַרְבָּעִ֥ים יֽוֹם׃

‎26 ‏וַיֵּלְכ֡וּ וַיָּבֹאוּ֩ אֶל־מֹשֶׁ֨ה וְאֶֽל־אַהֲרֹ֜ן וְאֶל־כָּל־עֲדַ֧ת בְּנֵֽי־יִשְׂרָאֵ֛ל אֶל־מִדְבַּ֥ר פָּארָ֖ן קָדֵ֑שָׁה וַיָּשִׁ֨יבוּ אוֹתָ֤ם דָּבָר֙ וְאֶת־כָּל־הָ֣עֵדָ֔ה וַיַּרְא֖וּם אֶת־פְּרִ֥י הָאָֽרֶץ׃

‎27 ‏וַיְסַפְּרוּ־לוֹ֙ וַיֹּ֣אמְר֔וּ בָּ֕אנוּ אֶל־הָאָ֖רֶץ אֲשֶׁ֣ר שְׁלַחְתָּ֑נוּ וְ֠גַם זָבַ֨ת חָלָ֥ב וּדְבַ֛שׁ הִ֖וא וְזֶה־פִּרְיָֽהּ׃

‎28 ‏אֶ֚פֶס כִּֽי־עַ֣ז הָעָ֔ם הַיֹּשֵׁ֖ב בָּאָ֑רֶץ וְהֶֽעָרִ֗ים בְּצֻר֤וֹת גְּדֹלֹת֙ מְאֹ֔ד וְגַם־יְלִדֵ֥י הָֽעֲנָ֖ק רָאִ֥ינוּ שָֽׁם׃

‎29 ‏עֲמָלֵ֥ק יוֹשֵׁ֖ב בְּאֶ֣רֶץ הַנֶּ֑גֶב וְ֠הַֽחִתִּי וְהַיְבוּסִ֤י וְהָֽאֱמֹרִי֙ יוֹשֵׁ֣ב בָּהָ֔ר וְהַֽכְּנַעֲנִי֙ יֹשֵׁ֣ב עַל־הַיָּ֔ם וְעַ֖ל יַ֥ד הַיַּרְדֵּֽן׃

‎30 ‏וַיַּ֧הַס כָּלֵ֛ב אֶת־הָעָ֖ם אֶל־מֹשֶׁ֑ה וַיֹּ֗אמֶר עָלֹ֤ה נַעֲלֶה֙ וְיָרַ֣שְׁנוּ אֹתָ֔הּ כִּֽי־יָכ֥וֹל נוּכַ֖ל לָֽהּ׃

‎31 ‏וְהָ֨אֲנָשִׁ֜ים אֲשֶׁר־עָל֤וּ עִמּוֹ֙ אָֽמְר֔וּ לֹ֥א נוּכַ֖ל לַעֲל֣וֹת אֶל־הָעָ֑ם כִּֽי־חָזָ֥ק ה֖וּא מִמֶּֽנּוּ׃

‎32 ‏וַיּוֹצִ֜יאוּ דִּבַּ֤ת הָאָ֙רֶץ֙ אֲשֶׁ֣ר תָּר֣וּ אֹתָ֔הּ אֶל־בְּנֵ֥י יִשְׂרָאֵ֖ל לֵאמֹ֑ר הָאָ֡רֶץ אֲשֶׁר֩ עָבַ֨רְנוּ בָ֜הּ לָת֣וּר אֹתָ֗הּ אֶ֣רֶץ אֹכֶ֤לֶת יוֹשְׁבֶ֙יהָ֙ הִ֔וא וְכָל־הָעָ֛ם אֲשֶׁר־רָאִ֥ינוּ בְתוֹכָ֖הּ אַנְשֵׁ֥י מִדּֽוֹת׃

‎33 ‏וְשָׁ֣ם רָאִ֗ינוּ אֶת־הַנְּפִילִ֛ים בְּנֵ֥י עֲנָ֖ק מִן־הַנְּפִלִ֑ים וַנְּהִ֤י בְעֵינֵ֙ינוּ֙ כַּֽחֲגָבִ֔ים וְכֵ֥ן הָיִ֖ינוּ בְּעֵינֵיהֶֽם׃

1 wayəḏabēr yəhwâ ’el-mōšeh llē’mōr:

2 šəl^aḥ-ləḵā ’ănāšîm wəyāṯurû ’eṯ-’ereṣ kən^a‘an ’ăšer-’ănî nōṯēn liḇənê yiśərā’ēl ’îš ’eḥāḏ ’îš ’eḥāḏ ləmaṭṭēh ’ăḇōṯāyw tišəlāḥû kōl nāśî’ ḇâem:

3 wayyišəl^aḥ ’ōṯām mōšeh mimmiḏəbar pā’rān ‘al-pî yəhwâ kullām ’ănāšîm rā’šê ḇənê-yiśərā’ēl hēmmâ:

4 wə’ēlleh šəmwōṯām ləmaṭṭēh rə’ûḇēn šammû‘a ben-zakûr:

5 ləmaṭṭēh šimə‘wōn šāfāṭ ben-ḥwōrî:

6 ləmaṭṭēh yəhûḏâ kālēḇ ben-yəfunneh:

7 ləmaṭṭēh yiśśāsḵār yiḡə’āl ben-ywōsēf:

8 ləmaṭṭēh ’efərāyim hwōšē‘a bin-nûn:

9 ləmaṭṭēh ḇinəyāmin paləṭî ben-rāfû’:

10 ləmaṭṭēh zəḇûlun gadî’ēl ben-swōḏî:

11 ləmaṭṭēh ywōsēf ləmaṭṭēh mənaššeh gadî ben-sûsî:

12 ləmaṭṭēh ḏān ‘ammî’ēl ben-gəmallî:

13 ləmaṭṭēh ’āšēr səṯûr ben-mîḵā’ēl:

14 ləmaṭṭēh nafətālî n^aḥəbî ben-wāfəsî:

15 ləmaṭṭēh ḡāḏ gə’û’ēl ben-māḵî:

16 ’ēlleh šəmwōṯ hā’ănāšîm ’ăšer-šāl^aḥ mōšeh lāṯûr ’eṯ-hā’āreṣ wayyiqərā’ mōšeh ləhwōšē‘a bin-nûn yəhwōšu‘a:

17 wayyišəl^aḥ ’ōṯām mōšeh lāṯûr ’eṯ-’ereṣ kənā‘an wayyō’mer ’ălēhem ‘ălû zeh banneḡeḇ w^a‘ălîṯem ’eṯ-hâār:

18 ûrə’îṯem ’eṯ-hā’āreṣ mah-hiw’ wə’eṯ-hā‘ām hayyōšēḇ ‘āleyhā heḥāzāq hû’ hărāfeh hamə‘aṭ hû’ ’im-rāḇ:

19 ûmâ hā’āreṣ ’ăšer-hû’ yōšēḇ bāh hăṭwōḇâ hiw’ ’im-rā‘â ûmâ he‘ārîm ’ăšer-hû’ ywōšēḇ bâēnnâ habəm^aḥănîm ’im bəmiḇəṣārîm:

20 ûmâ hā’āreṣ haššəmēnâ hiw’ ’im-rāzâ hăyēš-bāh ‘ēṣ ’im-’ayin wəhiṯəḥazzaqətem ûləq^aḥətem mipərî hā’āreṣ wəhayyāmîm yəmê bikûrê ‘ănāḇîm:

21 wayy^a‘ălû wayyāṯurû ’eṯ-hā’āreṣ mimmiḏəbar-ṣin ‘aḏ-rəḥōḇ ləḇō’ ḥămāṯ:

22 wayy^a‘ălû ḇanneḡeḇ wayyāḇō’ ‘aḏ-ḥeḇərwōn wəšām ’ăḥîman šēšay wəṯaləmay yəlîḏê hā‘ănāq wəḥeḇərwōn šeḇ^a‘ šānîm niḇənəṯâ lifənê ṣō‘an miṣərāyim:

23 wayyāḇō’û ‘aḏ-n^aḥal ’ešəkōl wayyiḵərəṯû miššām zəmwōrâ wə’ešəkwōl ‘ănāḇîm ’eḥāḏ wayyiśśā’uhû ḇammwōṭ bišənāyim ûmin-hārimmōnîm ûmin-hatə’ēnîm:

24 lammāqwōm hahû’ qārā’ n^aḥal ’ešəkwōl ‘al ’ōḏwōṯ hā’ešəkwōl ’ăšer-kārəṯû miššām bənê yiśərā’ēl:

25 wayyāšuḇû mitûr hā’āreṣ miqqēṣ ’arəbā‘îm ywōm:

26 wayyēləḵû wayyāḇō’û ’el-mōšeh wə’el-’ahărōn wə’el-kāl-‘ăḏaṯ bənê-yiśərā’ēl ’el-miḏəbar pā’rān qāḏēšâ wayyāšîḇû ’wōṯām dāḇār wə’eṯ-kāl-hā‘ēḏâ wayyarə’ûm ’eṯ-pərî hā’āreṣ:

27 wayəsapərû-lwō wayyō’mərû bā’nû ’el-hā’āreṣ ’ăšer šəl^aḥətānû wəḡam zāḇaṯ ḥālāḇ ûḏəḇaš hiw’ wəzeh-pirəyāh:

28 ’efes kî-‘az hā‘ām hayyōšēḇ bā’āreṣ wəhe‘ārîm bəṣurwōṯ gəḏōlōṯ mə’ōḏ wəḡam-yəliḏê hā‘ănāq rā’înû šām:

29 ‘ămālēq ywōšēḇ bə’ereṣ hanneḡeḇ wəh^aḥitî wəhayəḇûsî wəhā’ĕmōrî ywōšēḇ bâār wəhakən^a‘ănî yōšēḇ ‘al-hayyām wə‘al yaḏ hayyarədēn:

30 wayyahas kālēḇ ’eṯ-hā‘ām ’el-mōšeh wayyō’mer ‘ālōh n^a‘ăleh wəyārašənû ’ōṯāh kî-yāḵwōl nûḵal lāh:

31 wəhā’ănāšîm ’ăšer-‘ālû ‘immwō ’āmərû lō’ nûḵal l^a‘ălwōṯ ’el-hā‘ām kî-ḥāzāq hû’ mimmennû:

32 wayywōṣî’û dibaṯ hā’āreṣ ’ăšer tārû ’ōṯāh ’el-bənê yiśərā’ēl lē’mōr hā’āreṣ ’ăšer ‘āḇarənû ḇāh lāṯûr ’ōṯāh ’ereṣ ’ōḵeleṯ ywōšəḇeyhā hiw’ wəḵāl-hā‘ām ’ăšer-rā’înû ḇəṯwōḵāh ’anəšê midwōṯ:

33 wəšām rā’înû ’eṯ-hannəfîlîm bənê ‘ănāq min-hannəfilîm wannəhî ḇə‘ênênû k^aḥăḡāḇîm wəḵēn hāyînû bə‘ênêhem: