‎1 ‏וַיַּ֣רְא בִּלְעָ֗ם כִּ֣י ט֞וֹב בְּעֵינֵ֤י יְהוָה֙ לְבָרֵ֣ךְ אֶת־יִשְׂרָאֵ֔ל וְלֹא־הָלַ֥ךְ כְּפַֽעַם־בְּפַ֖עַם לִקְרַ֣את נְחָשִׁ֑ים וַיָּ֥שֶׁת אֶל־הַמִּדְבָּ֖ר פָּנָֽיו׃

‎2 ‏וַיִּשָּׂ֨א בִלְעָ֜ם אֶת־עֵינָ֗יו וַיַּרְא֙ אֶת־יִשְׂרָאֵ֔ל שֹׁכֵ֖ן לִשְׁבָטָ֑יו וַתְּהִ֥י עָלָ֖יו ר֥וּחַ אֱלֹהִֽים׃

‎3 ‏וַיִּשָּׂ֥א מְשָׁל֖וֹ וַיֹּאמַ֑ר נְאֻ֤ם בִּלְעָם֙ בְּנ֣וֹ בְעֹ֔ר וּנְאֻ֥ם הַגֶּ֖בֶר שְׁתֻ֥ם הָעָֽיִן׃

‎4 ‏נְאֻ֕ם שֹׁמֵ֖עַ אִמְרֵי־אֵ֑ל אֲשֶׁ֨ר מַחֲזֵ֤ה שַׁדַּי֙ יֶֽחֱזֶ֔ה נֹפֵ֖ל וּגְל֥וּי עֵינָֽיִם׃

‎5 ‏מַה־טֹּ֥בוּ אֹהָלֶ֖יךָ יַעֲקֹ֑ב מִשְׁכְּנֹתֶ֖יךָ יִשְׂרָאֵֽל׃

‎6 ‏כִּנְחָלִ֣ים נִטָּ֔יוּ כְּגַנֹּ֖ת עֲלֵ֣י נָהָ֑ר כַּאֲהָלִים֙ נָטַ֣ע יְהוָ֔ה כַּאֲרָזִ֖ים עֲלֵי־מָֽיִם׃

‎7 ‏יִֽזַּל־מַ֙יִם֙ מִדָּ֣לְיָ֔ו וְזַרְע֖וֹ בְּמַ֣יִם רַבִּ֑ים וְיָרֹ֤ם מֵֽאֲגַג֙ מַלְכּ֔וֹ וְתִנַּשֵּׂ֖א מַלְכֻתֽוֹ׃

‎8 ‏אֵ֚ל מוֹצִיא֣וֹ מִמִּצְרַ֔יִם כְּתוֹעֲפֹ֥ת רְאֵ֖ם ל֑וֹ יֹאכַ֞ל גּוֹיִ֣ם צָרָ֗יו וְעַצְמֹתֵיהֶ֛ם יְגָרֵ֖ם וְחִצָּ֥יו יִמְחָֽץ׃

‎9 ‏כָּרַ֨ע שָׁכַ֧ב כַּאֲרִ֛י וּכְלָבִ֖יא מִ֣י יְקִימֶ֑נּוּ מְבָרֲכֶ֣יךָ בָר֔וּךְ וְאֹרְרֶ֖יךָ אָרֽוּר׃

‎10 ‏וַיִּֽחַר־אַ֤ף בָּלָק֙ אֶל־בִּלְעָ֔ם וַיִּסְפֹּ֖ק אֶת־כַּפָּ֑יו וַיֹּ֨אמֶר בָּלָ֜ק אֶל־בִּלְעָ֗ם לָקֹ֤ב אֹֽיְבַי֙ קְרָאתִ֔יךָ וְהִנֵּה֙ בֵּרַ֣כְתָּ בָרֵ֔ךְ זֶ֖ה שָׁלֹ֥שׁ פְּעָמִֽים׃

‎11 ‏וְעַתָּ֖ה בְּרַח־לְךָ֣ אֶל־מְקוֹמֶ֑ךָ אָמַ֙רְתִּי֙ כַּבֵּ֣ד אֲכַבֶּדְךָ֔ וְהִנֵּ֛ה מְנָעֲךָ֥ יְהוָ֖ה מִכָּבֽוֹד׃

‎12 ‏וַיֹּ֥אמֶר בִּלְעָ֖ם אֶל־בָּלָ֑ק הֲלֹ֗א גַּ֧ם אֶל־מַלְאָכֶ֛יךָ אֲשֶׁר־שָׁלַ֥חְתָּ אֵלַ֖י דִּבַּ֥רְתִּי לֵאמֹֽר׃

‎13 ‏אִם־יִתֶּן־לִ֨י בָלָ֜ק מְלֹ֣א בֵיתוֹ֮ כֶּ֣סֶף וְזָהָב֒ לֹ֣א אוּכַ֗ל לַעֲבֹר֙ אֶת־פִּ֣י יְהוָ֔ה לַעֲשׂ֥וֹת טוֹבָ֛ה א֥וֹ רָעָ֖ה מִלִּבִּ֑י אֲשֶׁר־יְדַבֵּ֥ר יְהוָ֖ה אֹת֥וֹ אֲדַבֵּֽר׃

‎14 ‏וְעַתָּ֕ה הִנְנִ֥י הוֹלֵ֖ךְ לְעַמִּ֑י לְכָה֙ אִיעָ֣צְךָ֔ אֲשֶׁ֨ר יַעֲשֶׂ֜ה הָעָ֥ם הַזֶּ֛ה לְעַמְּךָ֖ בְּאַחֲרִ֥ית הַיָּמִֽים׃

‎15 ‏וַיִּשָּׂ֥א מְשָׁל֖וֹ וַיֹּאמַ֑ר נְאֻ֤ם בִּלְעָם֙ בְּנ֣וֹ בְעֹ֔ר וּנְאֻ֥ם הַגֶּ֖בֶר שְׁתֻ֥ם הָעָֽיִן׃

‎16 ‏נְאֻ֗ם שֹׁמֵ֙עַ֙ אִמְרֵי־אֵ֔ל וְיֹדֵ֖עַ דַּ֣עַת עֶלְי֑וֹן מַחֲזֵ֤ה שַׁדַּי֙ יֶֽחֱזֶ֔ה נֹפֵ֖ל וּגְל֥וּי עֵינָֽיִם׃

‎17 ‏אֶרְאֶ֙נּוּ֙ וְלֹ֣א עַתָּ֔ה אֲשׁוּרֶ֖נּוּ וְלֹ֣א קָר֑וֹב דָּרַ֨ךְ כּוֹכָ֜ב מִֽיַּעֲקֹ֗ב וְקָ֥ם שֵׁ֙בֶט֙ מִיִּשְׂרָאֵ֔ל וּמָחַץ֙ פַּאֲתֵ֣י מוֹאָ֔ב וְקַרְקַ֖ר כָּל־בְּנֵי־שֵֽׁת׃

‎18 ‏וְהָיָ֨ה אֱד֜וֹם יְרֵשָׁ֗ה וְהָיָ֧ה יְרֵשָׁ֛ה שֵׂעִ֖יר אֹיְבָ֑יו וְיִשְׂרָאֵ֖ל עֹ֥שֶׂה חָֽיִל׃

‎19 ‏וְיֵ֖רְדְּ מִֽיַּעֲקֹ֑ב וְהֶֽאֱבִ֥יד שָׂרִ֖יד מֵעִֽיר׃

‎20 ‏וַיַּרְא֙ אֶת־עֲמָלֵ֔ק וַיִּשָּׂ֥א מְשָׁל֖וֹ וַיֹּאמַ֑ר רֵאשִׁ֤ית גּוֹיִם֙ עֲמָלֵ֔ק וְאַחֲרִית֖וֹ עֲדֵ֥י אֹבֵֽד׃

‎21 ‏וַיַּרְא֙ אֶת־הַקֵּינִ֔י וַיִּשָּׂ֥א מְשָׁל֖וֹ וַיֹּאמַ֑ר אֵיתָן֙ מֽוֹשָׁבֶ֔ךָ וְשִׂ֥ים בַּסֶּ֖לַע קִנֶּֽךָ׃

‎22 ‏כִּ֥י אִם־יִהְיֶ֖ה לְבָ֣עֵֽר קָ֑יִן עַד־מָ֖ה אַשּׁ֥וּר תִּשְׁבֶּֽךָּ׃

‎23 ‏וַיִּשָּׂ֥א מְשָׁל֖וֹ וַיֹּאמַ֑ר א֕וֹי מִ֥י יִחְיֶ֖ה מִשֻּׂמ֥וֹ אֵֽל׃

‎24 ‏וְצִים֙ מִיַּ֣ד כִּתִּ֔ים וְעִנּ֥וּ אַשּׁ֖וּר וְעִנּוּ־עֵ֑בֶר וְגַם־ה֖וּא עֲדֵ֥י אֹבֵֽד׃

‎25 ‏וַיָּ֣קָם בִּלְעָ֔ם וַיֵּ֖לֶךְ וַיָּ֣שָׁב לִמְקֹמ֑וֹ וְגַם־בָּלָ֖ק הָלַ֥ךְ לְדַרְכּֽוֹ׃ פ

1 wayyarə’ bilə‘ām kî ṭwōḇ bə‘ênê yəhwâ ləḇārēḵə ’eṯ-yiśərā’ēl wəlō’-hālaḵə kəf^a‘am-bəf^a‘am liqəra’ṯ nəḥāšîm wayyāšeṯ ’el-hammiḏəbār pānāyw:

2 wayyiśśā’ ḇilə‘ām ’eṯ-‘ênāyw wayyarə’ ’eṯ-yiśərā’ēl šōḵēn lišəḇāṭāyw watəhî ‘ālāyw rûḥa ’ĕlōhîm:

3 wayyiśśā’ məšālwō wayyō’mar nə’um bilə‘ām bənwō ḇə‘ōr ûnə’um hageḇer šəṯum hā‘āyin:

4 nə’um šōmē‘a ’imərê-’ēl ’ăšer m^aḥăzēh šaday yeḥĕzeh nōfēl ûḡəlûy ‘ênāyim:

5 mah-ṭṭōḇû ’ōhāleyḵā y^a‘ăqōḇ mišəkənōṯeyḵā yiśərā’ēl:

6 kinəḥālîm niṭṭāyû kəḡannōṯ ‘ălê nâār ka’ăhālîm nāṭ^a‘ yəhwâ ka’ărāzîm ‘ălê-māyim:

7 yizzal-mayim midāləyāw wəzarə‘wō bəmayim rabîm wəyārōm mē’ăḡaḡ maləkwō wəṯinnaśśē’ maləḵuṯwō:

8 ’ēl mwōṣî’wō mimmiṣərayim kəṯwō‘ăfōṯ rə’ēm lwō yō’ḵal gwōyim ṣārāyw wə‘aṣəmōṯêhem yəḡārēm wəḥiṣṣāyw yiməḥāṣ:

9 kār^a‘ šāḵaḇ ka’ărî ûḵəlāḇî’ mî yəqîmennû məḇārăḵeyḵā ḇārûḵə wə’ōrəreyḵā ’ārûr:

10 wayyiḥar-’af bālāq ’el-bilə‘ām wayyisəpōq ’eṯ-kapāyw wayyō’mer bālāq ’el-bilə‘ām lāqōḇ ’ōyəḇay qərā’ṯîḵā wəhinnēh bēraḵətā ḇārēḵə zeh šālōš pə‘āmîm:

11 wə‘atâ bər^aḥ-ləḵā ’el-məqwōmeḵā ’āmarətî kabēḏ ’ăḵabeḏəḵā wəhinnēh mənā‘ăḵā yəhwâ mikāḇwōḏ:

12 wayyō’mer bilə‘ām ’el-bālāq hălō’ gam ’el-malə’āḵeyḵā ’ăšer-šāl^aḥətā ’ēlay dibarətî lē’mōr:

13 ’im-yiten-lî ḇālāq məlō’ ḇêṯwō kesef wəzâāḇ lō’ ’ûḵal l^a‘ăḇōr ’eṯ-pî yəhwâ l^a‘ăśwōṯ ṭwōḇâ ’wō rā‘â millibî ’ăšer-yəḏabēr yəhwâ ’ōṯwō ’ăḏabēr:

14 wə‘atâ hinənî hwōlēḵə lə‘ammî ləḵâ ’î‘āṣəḵā ’ăšer y^a‘ăśeh hā‘ām hazzeh lə‘amməḵā bə’^aḥărîṯ hayyāmîm:

15 wayyiśśā’ məšālwō wayyō’mar nə’um bilə‘ām bənwō ḇə‘ōr ûnə’um hageḇer šəṯum hā‘āyin:

16 nə’um šōmē‘a ’imərê-’ēl wəyōḏē‘a d^a‘aṯ ‘eləywōn m^aḥăzēh šaday yeḥĕzeh nōfēl ûḡəlûy ‘ênāyim:

17 ’erə’ennû wəlō’ ‘atâ ’ăšûrennû wəlō’ qārwōḇ dāraḵə kwōḵāḇ mîy^a‘ăqōḇ wəqām šēḇeṭ mîyiśərā’ēl ûmāḥaṣ pa’ăṯê mwō’āḇ wəqarəqar kāl-bənê-šēṯ:

18 wəhāyâ ’ĕḏwōm yərēšâ wəhāyâ yərēšâ śē‘îr ’ōyəḇāyw wəyiśərā’ēl ‘ōśeh ḥāyil:

19 wəyērədə mîy^a‘ăqōḇ wəhe’ĕḇîḏ śārîḏ mē‘îr:

20 wayyarə’ ’eṯ-‘ămālēq wayyiśśā’ məšālwō wayyō’mar rē’šîṯ gwōyim ‘ămālēq wə’^aḥărîṯwō ‘ăḏê ’ōḇēḏ:

21 wayyarə’ ’eṯ-haqqênî wayyiśśā’ məšālwō wayyō’mar ’êṯān mwōšāḇeḵā wəśîm bassel^a‘ qinneḵā:

22 kî ’im-yihəyeh ləḇā‘ēr qāyin ‘aḏ-mâ ’aššûr tišəbeḵḵā:

23 wayyiśśā’ məšālwō wayyō’mar ’wōy mî yiḥəyeh miśśumwō ’ēl:

24 wəṣîm mîyaḏ kitîm wə‘innû ’aššûr wə‘innû-‘ēḇer wəḡam-hû’ ‘ăḏê ’ōḇēḏ:

25 wayyāqām bilə‘ām wayyēleḵə wayyāšāḇ liməqōmwō wəḡam-bālāq hālaḵə ləḏarəkwō: f