‎1 ‏לְדָוִ֨ד׀ יְהוָ֤ה׀ אוֹרִ֣י וְ֭יִשְׁעִי מִמִּ֣י אִירָ֑א יְהוָ֥ה מָֽעוֹז־חַ֝יַּ֗י מִמִּ֥י אֶפְחָֽד׃

‎2 ‏בִּקְרֹ֤ב עָלַ֨י׀ מְרֵעִים֮ לֶאֱכֹ֪ל אֶת־בְּשָׂ֫רִ֥י צָרַ֣י וְאֹיְבַ֣י לִ֑י הֵ֖מָּה כָשְׁל֣וּ וְנָפָֽלוּ׃

‎3 ‏אִם־תַּחֲנֶ֬ה עָלַ֨י׀ מַחֲנֶה֮ לֹֽא־יִירָ֪א לִ֫בִּ֥י אִם־תָּק֣וּם עָ֭לַי מִלְחָמָ֑ה בְּ֝זֹ֗את אֲנִ֣י בוֹטֵֽחַ׃

‎4 ‏אַחַ֤ת׀ שָׁאַ֣לְתִּי מֵֽאֵת־יְהוָה֮ אוֹתָ֪הּ אֲבַ֫קֵּ֥שׁ שִׁבְתִּ֣י בְּבֵית־יְ֭הוָה כָּל־יְמֵ֣י חַיַּ֑י לַחֲז֥וֹת בְּנֹֽעַם־יְ֝הוָ֗ה וּלְבַקֵּ֥ר בְּהֵיכָלֽוֹ׃

‎5 ‏כִּ֤י יִצְפְּנֵ֨נִי׀ בְּסֻכֹּה֮ בְּי֪וֹם רָ֫עָ֥ה יַ֭סְתִּרֵנִי בְּסֵ֣תֶר אָהֳל֑וֹ בְּ֝צ֗וּר יְרוֹמְמֵֽנִי׃

‎6 ‏וְעַתָּ֨ה יָר֪וּם רֹאשִׁ֡י עַ֤ל אֹֽיְבַ֬י סְֽבִיבוֹתַ֗י וְאֶזְבְּחָ֣ה בְ֭אָהֳלוֹ זִבְחֵ֣י תְרוּעָ֑ה אָשִׁ֥ירָה וַ֝אֲזַמְּרָ֗ה לַיהוָֽה׃

‎7 ‏שְׁמַע־יְהוָ֖ה קוֹלִ֥י אֶקְרָ֗א וְחָנֵּ֥נִי וַעֲנֵֽנִי׃

‎8 ‏לְךָ֤׀ אָמַ֣ר לִ֭בִּי בַּקְּשׁ֣וּ פָנָ֑י אֶת־פָּנֶ֖יךָ יְהוָ֣ה אֲבַקֵּֽשׁ׃

‎9 ‏אַל־תַּסְתֵּ֬ר פָּנֶ֨יךָ׀ מִמֶּנִּי֮ אַֽל־תַּט־בְּאַ֗ף עַ֫בְדֶּ֥ךָ עֶזְרָתִ֥י הָיִ֑יתָ אַֽל־תִּטְּשֵׁ֥נִי וְאַל־תַּֽ֝עַזְבֵ֗נִי אֱלֹהֵ֥י יִשְׁעִֽי׃

‎10 ‏כִּי־אָבִ֣י וְאִמִּ֣י עֲזָב֑וּנִי וַֽיהוָ֣ה יַֽאַסְפֵֽנִי׃

‎11 ‏ה֤וֹרֵ֥נִי יְהוָ֗ה דַּ֫רְכֶּ֥ךָ וּ֭נְחֵנִי בְּאֹ֣רַח מִישׁ֑וֹר לְ֝מַ֗עַן שׁוֹרְרָֽי׃

‎12 ‏אַֽל־תִּ֭תְּנֵנִי בְּנֶ֣פֶשׁ צָרָ֑י כִּ֥י³ קָֽמוּ־בִ֥י עֵֽדֵי־שֶׁ֝֗קֶר וִיפֵ֥חַ חָמָֽס׃

‎13 ‏לׅׄוּלֵׅ֗ׄאׅׄ⁴ הֶ֭אֱמַנְתִּי לִרְא֥וֹת בְּֽטוּב־יְהוָ֗ה בְּאֶ֣רֶץ חַיִּֽים׃

‎14 ‏קַוֵּ֗ה אֶל־יְה֫וָ֥ה חֲ֭זַק וְיַאֲמֵ֣ץ לִבֶּ֑ךָ וְ֝קַוֵּ֗ה אֶל־יְהוָֽה׃

1 ləḏāwiḏ| yəhwâ| ’wōrî wəyišə‘î mimmî ’îrā’ yəhwâ mā‘wōz-ḥayyay mimmî ’efəḥāḏ:

2 biqərōḇ ‘ālay| mərē‘îm le’ĕḵōl ’eṯ-bəśārî ṣāray wə’ōyəḇay lî hēmmâ ḵāšəlû wənāfālû:

3 ’im-t^aḥăneh ‘ālay| m^aḥăneh lō’-yîrā’ libî ’im-tāqûm ‘ālay miləḥāmâ bəzō’ṯ ’ănî ḇwōṭēḥa:

4 ’^aḥaṯ| šā’alətî mē’ēṯ-yəhwâ ’wōṯāh ’ăḇaqqēš šiḇətî bəḇêṯ-yəhwâ kāl-yəmê ḥayyay l^aḥăzwōṯ bənō‘am-yəhwâ ûləḇaqqēr bəhêḵālwō:

5 kî yiṣəpənēnî| bəsukōh bəywōm rā‘â yasətirēnî bəsēṯer ’âŏlwō bəṣûr yərwōməmēnî:

6 wə‘atâ yārûm rō’šî ‘al ’ōyəḇay səḇîḇwōṯay wə’ezəbəḥâ ḇə’âŏlwō ziḇəḥê ṯərû‘â ’āšîrâ wa’ăzammərâ layhwâ:

7 šəm^a‘-yəhwâ qwōlî ’eqərā’ wəḥānnēnî w^a‘ănēnî:

8 ləḵā| ’āmar libî baqqəšû fānāy ’eṯ-pāneyḵā yəhwâ ’ăḇaqqēš:

9 ’al-tasətēr pāneyḵā| mimmennî ’al-taṭ-bə’af ‘aḇədeḵā ‘ezərāṯî hāyîṯā ’al-tiṭṭəšēnî wə’al-t^a‘azəḇēnî ’ĕlōhê yišə‘î:

10 kî-’āḇî wə’immî ‘ăzāḇûnî wayhwâ ya’asəfēnî:

11 hwōrēnî yəhwâ darəkeḵā ûnəḥēnî bə’ōr^aḥ mîšwōr ləm^a‘an šwōrərāy:

12 ’al-titənēnî bənefeš ṣārāy kî³ qāmû-ḇî ‘ēḏê-šeqer wîfēḥa ḥāmās:

13 lׅ***ûlēׅ***’ׅ***⁴ he’ĕmanətî lirə’wōṯ bəṭûḇ-yəhwâ bə’ereṣ ḥayyîm:

14 qaûēh ’el-yəhwâ ḥăzaq wəya’ămēṣ libeḵā wəqaûēh ’el-yəhwâ: