‎1 ‏לַ֝מְנַצֵּ֗חַ לְדָוִ֥ד מִזְמֽוֹר׃

‎2 ‏קַוֹּ֣ה קִוִּ֣יתִי יְהוָ֑ה וַיֵּ֥ט אֵ֝לַ֗י וַיִּשְׁמַ֥ע שַׁוְעָתִֽי׃

‎3 ‏וַיַּעֲלֵ֤נִי׀ מִבּ֥וֹר שָׁאוֹן֮ מִטִּ֪יט הַיָּ֫וֵ֥ן וַיָּ֖קֶם עַל־סֶ֥לַע רַגְלַ֗י כּוֹנֵ֥ן אֲשֻׁרָֽי׃

‎4 ‏וַיִּתֵּ֬ן בְּפִ֨י׀ שִׁ֥יר חָדָשׁ֮ תְּהִלָּ֪ה לֵֽאלֹ֫הֵ֥ינוּ יִרְא֣וּ רַבִּ֣ים וְיִירָ֑אוּ וְ֝יִבְטְח֗וּ בַּיהוָֽה׃

‎5 ‏אַ֥שְֽׁרֵי הַגֶּ֗בֶר אֲשֶׁר־שָׂ֣ם יְ֭הוָֹה מִבְטַח֑וֹ וְֽלֹא־פָנָ֥ה אֶל־רְ֝הָבִ֗ים וְשָׂטֵ֥י כָזָֽב׃

‎6 ‏רַבּ֤וֹת עָשִׂ֨יתָ׀ אַתָּ֤ה׀ יְהוָ֣ה אֱלֹהַי֮ נִֽפְלְאֹתֶ֥יךָ וּמַחְשְׁבֹתֶ֗יךָ אֵ֫לֵ֥ינוּ אֵ֤ין׀ עֲרֹ֬ךְ אֵלֶ֗יךָ אַגִּ֥ידָה וַאֲדַבֵּ֑רָה עָ֝צְמ֗וּ מִסַּפֵּֽר׃

‎7 ‏זֶ֤בַח וּמִנְחָ֨ה׀ לֹֽא־חָפַ֗צְתָּ אָ֭זְנַיִם כָּרִ֣יתָ לִּ֑י עוֹלָ֥ה וַ֝חֲטָאָ֗ה לֹ֣א שָׁאָֽלְתָּ׃

‎8 ‏אָ֣ז אָ֭מַרְתִּי הִנֵּה־בָ֑אתִי בִּמְגִלַּת־סֵ֝֗פֶר כָּת֥וּב עָלָֽי׃

‎9 ‏לַֽעֲשֽׂוֹת־רְצוֹנְךָ֣ אֱלֹהַ֣י חָפָ֑צְתִּי וְ֝ת֥וֹרָתְךָ֗³ בְּת֣וֹךְ מֵעָֽי׃

‎10 ‏בִּשַּׂ֤רְתִּי צֶ֨דֶק׀ בְּקָ֘הָ֤ל רָ֗ב הִנֵּ֣ה שְׂ֭פָתַי לֹ֣א אֶכְלָ֑א יְ֝הוָ֗ה אַתָּ֥ה יָדָֽעְתָּ׃

‎11 ‏צִדְקָתְךָ֬ לֹא־כִסִּ֨יתִי׀ בְּת֬וֹךְ לִבִּ֗י³ אֱמוּנָתְךָ֣ וּתְשׁוּעָתְךָ֣ אָמָ֑רְתִּי לֹא־כִחַ֥דְתִּי חַסְדְּךָ֥ וַ֝אֲמִתְּךָ֗ לְקָהָ֥ל רָֽב׃

‎12 ‏אַתָּ֤ה יְהוָ֗ה לֹא־תִכְלָ֣א רַחֲמֶ֣יךָ מִמֶּ֑נִּי חַסְדְּךָ֥ וַ֝אֲמִתְּךָ֗ תָּמִ֥יד יִצְּרֽוּנִי׃

‎13 ‏כִּ֤י אָפְפ֥וּ־עָלַ֨י׀ רָע֡וֹת עַד־אֵ֬ין מִסְפָּ֗ר הִשִּׂיג֣וּנִי עֲ֭וֹנֹתַי וְלֹא־יָכֹ֣לְתִּי לִרְא֑וֹת עָצְמ֥וּ מִשַּֽׂעֲר֥וֹת רֹ֝אשִׁ֗י וְלִבִּ֥י עֲזָבָֽנִי׃

‎14 ‏רְצֵ֣ה יְ֭הוָה לְהַצִּילֵ֑נִי יְ֝הוָ֗ה לְעֶזְרָ֥תִי חֽוּשָׁה׃

‎15 ‏יֵ֘בֹ֤שׁוּ וְיַחְפְּר֨וּ׀ יַחַד֮ מְבַקְשֵׁ֥י נַפְשִׁ֗י לִסְפּ֫וֹתָ֥הּ יִסֹּ֣גוּ אָ֭חוֹר וְיִכָּלְמ֑וּ חֲ֝פֵצֵ֗י רָעָתִֽי׃

‎16 ‏יָ֭שֹׁמּוּ עַל־עֵ֣קֶב בָּשְׁתָּ֑ם הָאֹמְרִ֥ים לִ֝֗י הֶאָ֥ח׀ הֶאָֽח׃

‎17 ‏יָ֘שִׂ֤ישׂוּ וְיִשְׂמְח֨וּ׀ בְּךָ֗ כָּֽל־מְבַ֫קְשֶׁ֥יךָ יֹאמְר֣וּ תָ֭מִיד יִגְדַּ֣ל יְהוָ֑ה אֹֽ֝הֲבֵ֗י תְּשׁוּעָתֶֽךָ׃

‎18 ‏וַאֲנִ֤י׀ עָנִ֣י וְאֶבְיוֹן֮ אֲדֹנָ֪י יַחֲשָׁ֫ב לִ֥י עֶזְרָתִ֣י וּמְפַלְטִ֣י אַ֑תָּה אֱ֝לֹהַ֗י אַל־תְּאַחַֽר׃

1 lamənaṣṣēḥa ləḏāwiḏ mizəmwōr:

2 qaûōh qiûîṯî yəhwâ wayyēṭ ’ēlay wayyišəm^a‘ šawə‘āṯî:

3 wayy^a‘ălēnî| mibwōr šā’wōn miṭṭîṭ hayyāwēn wayyāqem ‘al-sel^a‘ raḡəlay kwōnēn ’ăšurāy:

4 wayyitēn bəfî| šîr ḥāḏāš təhillâ lē’lōhênû yirə’û rabîm wəyîrā’û wəyiḇəṭəḥû bayhwâ:

5 ’ašərê hageḇer ’ăšer-śām yəhwōâ miḇəṭ^aḥwō wəlō’-fānâ ’el-rəhāḇîm wəśāṭê ḵāzāḇ:

6 rabwōṯ ‘āśîṯā| ’atâ| yəhwâ ’ĕlōhay nifələ’ōṯeyḵā ûm^aḥəšəḇōṯeyḵā ’ēlênû ’ên| ‘ărōḵə ’ēleyḵā ’agîḏâ wa’ăḏabērâ ‘āṣəmû missapēr:

7 zeḇ^aḥ ûminəḥâ| lō’-ḥāfaṣətā ’āzənayim kārîṯā llî ‘wōlâ w^aḥăṭā’â lō’ šā’ālətā:

8 ’āz ’āmarətî hinnēh-ḇā’ṯî biməḡillaṯ-sēfer kāṯûḇ ‘ālāy:

9 l^a‘ăśwōṯ-rəṣwōnəḵā ’ĕlōhay ḥāfāṣətî wəṯwōrāṯəḵā³ bəṯwōḵə mē‘āy:

10 biśśarətî ṣeḏeq| bəqâāl rāḇ hinnēh śəfāṯay lō’ ’eḵəlā’ yəhwâ ’atâ yāḏā‘ətā:

11 ṣiḏəqāṯəḵā lō’-ḵissîṯî| bəṯwōḵə libî³ ’ĕmûnāṯəḵā ûṯəšû‘āṯəḵā ’āmārətî lō’-ḵiḥaḏətî ḥasədəḵā wa’ămitəḵā ləqâāl rāḇ:

12 ’atâ yəhwâ lō’-ṯiḵəlā’ r^aḥămeyḵā mimmennî ḥasədəḵā wa’ămitəḵā tāmîḏ yiṣṣərûnî:

13 kî ’āfəfû-‘ālay| rā‘wōṯ ‘aḏ-’ên misəpār hiśśîḡûnî ‘ăwōnōṯay wəlō’-yāḵōlətî lirə’wōṯ ‘āṣəmû miśś^a‘ărwōṯ rō’šî wəlibî ‘ăzāḇānî:

14 rəṣēh yəhwâ ləhaṣṣîlēnî yəhwâ lə‘ezərāṯî ḥûšâ:

15 yēḇōšû wəy^aḥəpərû| y^aḥaḏ məḇaqəšê nafəšî lisəpwōṯāh yissōḡû ’āḥwōr wəyikāləmû ḥăfēṣê rā‘āṯî:

16 yāšōmmû ‘al-‘ēqeḇ bāšətām hā’ōmərîm lî he’āḥ| he’āḥ:

17 yāśîśû wəyiśəməḥû| bəḵā kāl-məḇaqəšeyḵā yō’mərû ṯāmîḏ yiḡədal yəhwâ ’ōhăḇê təšû‘āṯeḵā:

18 wa’ănî| ‘ānî wə’eḇəywōn ’ăḏōnāy y^aḥăšāḇ lî ‘ezərāṯî ûməfaləṭî ’atâ ’ĕlōhay ’al-tə’^aḥar: