‎1 ‏וַיָּבֹ֜אוּ אַנְשֵׁ֣י׀ קִרְיַ֣ת יְעָרִ֗ים וַֽיַּעֲלוּ֙ אֶת־אֲר֣וֹן יְהוָ֔ה וַיָּבִ֣אוּ אֹת֔וֹ אֶל־בֵּ֥ית אֲבִינָדָ֖ב בַּגִּבְעָ֑ה וְאֶת־אֶלְעָזָ֤ר בְּנוֹ֙ קִדְּשׁ֔וּ לִשְׁמֹ֖ר אֶת־אֲר֥וֹן יְהוָֽה׃ פ

‎2 ‏וַיְהִ֗י מִיּ֞וֹם שֶׁ֤בֶת הָֽאָרוֹן֙ בְּקִרְיַ֣ת יְעָרִ֔ים וַיִּרְבּוּ֙ הַיָּמִ֔ים וַיִּֽהְי֖וּ עֶשְׂרִ֣ים שָׁנָ֑ה וַיִּנָּה֛וּ כָּל־בֵּ֥ית יִשְׂרָאֵ֖ל אַחֲרֵ֥י יְהוָֽה׃ ס

‎3 ‏וַיֹּ֣אמֶר שְׁמוּאֵ֗ל אֶל־כָּל־בֵּ֣ית יִשְׂרָאֵל֮ לֵאמֹר֒ אִם־בְּכָל־לְבַבְכֶ֗ם אַתֶּ֤ם שָׁבִים֙ אֶל־יְהוָ֔ה הָסִ֜ירוּ אֶת־אֱלֹהֵ֧י הַנֵּכָ֛ר מִתּוֹכְכֶ֖ם וְהָעַשְׁתָּר֑וֹת וְהָכִ֨ינוּ לְבַבְכֶ֤ם אֶל־יְהוָה֙ וְעִבְדֻ֣הוּ לְבַדּ֔וֹ וְיַצֵּ֥ל אֶתְכֶ֖ם מִיַּ֥ד פְּלִשְׁתִּֽים׃

‎4 ‏וַיָּסִ֙ירוּ֙ בְּנֵ֣י יִשְׂרָאֵ֔ל אֶת־הַבְּעָלִ֖ים וְאֶת־הָעַשְׁתָּרֹ֑ת וַיַּעַבְד֥וּ אֶת־יְהוָ֖ה לְבַדּֽוֹ׃ פ

‎5 ‏וַיֹּ֣אמֶר שְׁמוּאֵ֔ל קִבְצ֥וּ אֶת־כָּל־יִשְׂרָאֵ֖ל הַמִּצְפָּ֑תָה וְאֶתְפַּלֵּ֥ל בַּעַדְכֶ֖ם אֶל־יְהוָֽה׃

‎6 ‏וַיִּקָּבְצ֣וּ הַ֠מִּצְפָּתָה וַיִּֽשְׁאֲבוּ־מַ֜יִם וַֽיִּשְׁפְּכ֣וּ׀ לִפְנֵ֣י יְהוָ֗ה וַיָּצ֙וּמוּ֙ בַּיּ֣וֹם הַה֔וּא וַיֹּ֣אמְרוּ שָׁ֔ם חָטָ֖אנוּ לַיהוָ֑ה וַיִּשְׁפֹּ֧ט שְׁמוּאֵ֛ל אֶת־בְּנֵ֥י יִשְׂרָאֵ֖ל בַּמִּצְפָּֽה׃

‎7 ‏וַיִּשְׁמְע֣וּ פְלִשְׁתִּ֗ים כִּֽי־הִתְקַבְּצ֤וּ בְנֵֽי־יִשְׂרָאֵל֙ הַמִּצְפָּ֔תָה וַיַּעֲל֥וּ סַרְנֵֽי־פְלִשְׁתִּ֖ים אֶל־יִשְׂרָאֵ֑ל וַֽיִּשְׁמְעוּ֙ בְּנֵ֣י יִשְׂרָאֵ֔ל וַיִּֽרְא֖וּ מִפְּנֵ֥י פְלִשְׁתִּֽים׃

‎8 ‏וַיֹּאמְר֤וּ בְנֵֽי־יִשְׂרָאֵל֙ אֶל־שְׁמוּאֵ֔ל אַל־תַּחֲרֵ֣שׁ מִמֶּ֔נּוּ מִזְּעֹ֖ק אֶל־יְהוָ֣ה אֱלֹהֵ֑ינוּ וְיֹשִׁעֵ֖נוּ מִיַּ֥ד פְּלִשְׁתִּֽים׃

‎9 ‏וַיִּקַּ֣ח שְׁמוּאֵ֗ל טְלֵ֤ה חָלָב֙ אֶחָ֔ד ויעלה וַיַּעֲלֵ֧הוּ עוֹלָ֛ה כָּלִ֖יל לַֽיהוָ֑ה וַיִּזְעַ֨ק שְׁמוּאֵ֤ל אֶל־יְהוָה֙ בְּעַ֣ד יִשְׂרָאֵ֔ל וַֽיַּעֲנֵ֖הוּ יְהוָֽה׃

‎10 ‏וַיְהִ֤י שְׁמוּאֵל֙ מַעֲלֶ֣ה הָעוֹלָ֔ה וּפְלִשְׁתִּ֣ים נִגְּשׁ֔וּ לַמִּלְחָמָ֖ה בְּיִשְׂרָאֵ֑ל וַיַּרְעֵ֣ם יְהוָ֣ה׀ בְּקוֹל־גָּ֠דוֹל בַּיּ֨וֹם הַה֤וּא עַל־פְּלִשְׁתִּים֙ וַיְהֻמֵּ֔ם וַיִּנָּגְפ֖וּ לִפְנֵ֥י יִשְׂרָאֵֽל׃

‎11 ‏וַיֵּ֨צְא֜וּ אַנְשֵׁ֤י יִשְׂרָאֵל֙ מִן־הַמִּצְפָּ֔ה וַֽיִּרְדְּפ֖וּ אֶת־פְּלִשְׁתִּ֑ים וַיַּכּ֕וּם עַד־מִתַּ֖חַת לְבֵ֥ית כָּֽר׃

‎12 ‏וַיִּקַּ֨ח שְׁמוּאֵ֜ל אֶ֣בֶן אַחַ֗ת וַיָּ֤שֶׂם בֵּֽין־הַמִּצְפָּה֙ וּבֵ֣ין הַשֵּׁ֔ן וַיִּקְרָ֥א אֶת־שְׁמָ֖הּ אֶ֣בֶן הָעָ֑זֶר וַיֹּאמַ֕ר עַד־הֵ֖נָּה עֲזָרָ֥נוּ יְהוָֽה׃

‎13 ‏וַיִּכָּֽנְעוּ֙ הַפְּלִשְׁתִּ֔ים וְלֹא־יָסְפ֣וּ ע֔וֹד לָב֖וֹא בִּגְב֣וּל יִשְׂרָאֵ֑ל וַתְּהִ֤י יַד־יְהוָה֙ בַּפְּלִשְׁתִּ֔ים כֹּ֖ל יְמֵ֥י שְׁמוּאֵֽל׃

‎14 ‏וַתָּשֹׁ֣בְנָה הֶעָרִ֡ים אֲשֶׁ֣ר לָֽקְחוּ־פְלִשְׁתִּים֩ מֵאֵ֨ת יִשְׂרָאֵ֤ל׀ לְיִשְׂרָאֵל֙ מֵעֶקְר֣וֹן וְעַד־גַּ֔ת וְאֶ֨ת־גְּבוּלָ֔ן הִצִּ֥יל יִשְׂרָאֵ֖ל מִיַּ֣ד פְּלִשְׁתִּ֑ים וַיְהִ֣י שָׁל֔וֹם בֵּ֥ין יִשְׂרָאֵ֖ל וּבֵ֥ין הָאֱמֹרִֽי׃

‎15 ‏וַיִּשְׁפֹּ֤ט שְׁמוּאֵל֙ אֶת־יִשְׂרָאֵ֔ל כֹּ֖ל יְמֵ֥י חַיָּֽיו׃

‎16 ‏וְהָלַ֗ךְ מִדֵּ֤י שָׁנָה֙ בְּשָׁנָ֔ה וְסָבַב֙ בֵּֽית־אֵ֔ל וְהַגִּלְגָּ֖ל וְהַמִּצְפָּ֑ה וְשָׁפַט֙ אֶת־יִשְׂרָאֵ֔ל אֵ֥ת כָּל־הַמְּקוֹמ֖וֹת הָאֵֽלֶּה׃

‎17 ‏וּתְשֻׁבָת֤וֹ הָרָמָ֙תָה֙ כִּֽי־שָׁ֣ם בֵּית֔וֹ וְשָׁ֖ם שָׁפָ֣ט אֶת־יִשְׂרָאֵ֑ל וַיִּֽבֶן־שָׁ֥ם מִזְבֵּ֖חַ לַֽיהוָֽה׃ פ

1 wayyāḇō’û ’anəšê| qirəyaṯ yə‘ārîm wayy^a‘ălû ’eṯ-’ărwōn yəhwâ wayyāḇi’û ’ōṯwō ’el-bêṯ ’ăḇînāḏāḇ bagiḇə‘â wə’eṯ-’elə‘āzār bənwō qidəšû lišəmōr ’eṯ-’ărwōn yəhwâ: f

2 wayəhî mîywōm šeḇeṯ hā’ārwōn bəqirəyaṯ yə‘ārîm wayyirəbû hayyāmîm wayyihəyû ‘eśərîm šānâ wayyinnâû kāl-bêṯ yiśərā’ēl ’^aḥărê yəhwâ: s

3 wayyō’mer šəmû’ēl ’el-kāl-bêṯ yiśərā’ēl lē’mōr ’im-bəḵāl-ləḇaḇəḵem ’atem šāḇîm ’el-yəhwâ hāsîrû ’eṯ-’ĕlōhê hannēḵār mitwōḵəḵem wəhā‘ašətārwōṯ wəhāḵînû ləḇaḇəḵem ’el-yəhwâ wə‘iḇəḏuhû ləḇadwō wəyaṣṣēl ’eṯəḵem mîyaḏ pəlišətîm:

4 wayyāsîrû bənê yiśərā’ēl ’eṯ-habə‘ālîm wə’eṯ-hā‘ašətārōṯ wayy^a‘aḇəḏû ’eṯ-yəhwâ ləḇadwō: f

5 wayyō’mer šəmû’ēl qiḇəṣû ’eṯ-kāl-yiśərā’ēl hammiṣəpāṯâ wə’eṯəpallēl b^a‘aḏəḵem ’el-yəhwâ:

6 wayyiqqāḇəṣû hammiṣəpāṯâ wayyišə’ăḇû-mayim wayyišəpəḵû| lifənê yəhwâ wayyāṣûmû bayywōm hahû’ wayyō’mərû šām ḥāṭā’nû layhwâ wayyišəpōṭ šəmû’ēl ’eṯ-bənê yiśərā’ēl bammiṣəpâ:

7 wayyišəmə‘û fəlišətîm kî-hiṯəqabəṣû ḇənê-yiśərā’ēl hammiṣəpāṯâ wayy^a‘ălû sarənê-fəlišətîm ’el-yiśərā’ēl wayyišəmə‘û bənê yiśərā’ēl wayyirə’û mipənê fəlišətîm:

8 wayyō’mərû ḇənê-yiśərā’ēl ’el-šəmû’ēl ’al-t^aḥărēš mimmennû mizzə‘ōq ’el-yəhwâ ’ĕlōhênû wəyōši‘ēnû mîyaḏ pəlišətîm:

9 wayyiqq^aḥ šəmû’ēl ṭəlēh ḥālāḇ ’eḥāḏ wayy^a‘ăleh wayy^a‘ălēhû ‘wōlâ kālîl layhwâ wayyizə‘aq šəmû’ēl ’el-yəhwâ bə‘aḏ yiśərā’ēl wayy^a‘ănēhû yəhwâ:

10 wayəhî šəmû’ēl m^a‘ăleh hā‘wōlâ ûfəlišətîm nigəšû lammiləḥāmâ bəyiśərā’ēl wayyarə‘ēm yəhwâ| bəqwōl-gāḏwōl bayywōm hahû’ ‘al-pəlišətîm wayəhummēm wayyinnāḡəfû lifənê yiśərā’ēl:

11 wayyēṣə’û ’anəšê yiśərā’ēl min-hammiṣəpâ wayyirədəfû ’eṯ-pəlišətîm wayyakûm ‘aḏ-mit^aḥaṯ ləḇêṯ kār:

12 wayyiqq^aḥ šəmû’ēl ’eḇen ’^aḥaṯ wayyāśem bên-hammiṣəpâ ûḇên haššēn wayyiqərā’ ’eṯ-šəmāh ’eḇen hā‘āzer wayyō’mar ‘aḏ-hēnnâ ‘ăzārānû yəhwâ:

13 wayyikānə‘û hapəlišətîm wəlō’-yāsəfû ‘wōḏ lāḇwō’ biḡəḇûl yiśərā’ēl watəhî yaḏ-yəhwâ bapəlišətîm kōl yəmê šəmû’ēl:

14 watāšōḇənâ he‘ārîm ’ăšer lāqəḥû-fəlišətîm mē’ēṯ yiśərā’ēl| ləyiśərā’ēl mē‘eqərwōn wə‘aḏ-gaṯ wə’eṯ-gəḇûlān hiṣṣîl yiśərā’ēl mîyaḏ pəlišətîm wayəhî šālwōm bên yiśərā’ēl ûḇên hā’ĕmōrî:

15 wayyišəpōṭ šəmû’ēl ’eṯ-yiśərā’ēl kōl yəmê ḥayyāyw:

16 wəhālaḵə midê šānâ bəšānâ wəsāḇaḇ bêṯ-’ēl wəhagiləgāl wəhammiṣəpâ wəšāfaṭ ’eṯ-yiśərā’ēl ’ēṯ kāl-hamməqwōmwōṯ hā’ēlleh:

17 ûṯəšuḇāṯwō hārāmāṯâ kî-šām bêṯwō wəšām šāfāṭ ’eṯ-yiśərā’ēl wayyiḇen-šām mizəbēḥa layhwâ: f