‎1 ‏וַיְהִ֛י דְּבַר־יְהוָ֥ה צְבָא֖וֹת לֵאמֹֽר׃

‎2 ‏כֹּ֤ה אָמַר֙ יְהוָ֣ה צְבָא֔וֹת קִנֵּ֥אתִי לְצִיּ֖וֹן קִנְאָ֣ה גְדוֹלָ֑ה וְחֵמָ֥ה גְדוֹלָ֖ה קִנֵּ֥אתִי לָֽהּ׃

‎3 ‏כֹּ֚ה אָמַ֣ר יְהוָ֔ה שַׁ֚בְתִּי אֶל־צִיּ֔וֹן וְשָׁכַנְתִּ֖י בְּת֣וֹךְ יְרֽוּשָׁלִָ֑ם וְנִקְרְאָ֤ה יְרוּשָׁלִַ֙ם֙ עִ֣יר־הָֽאֱמֶ֔ת וְהַר־יְהוָ֥ה צְבָא֖וֹת הַ֥ר הַקֹּֽדֶשׁ׃ ס

‎4 ‏כֹּ֤ה אָמַר֙ יְהוָ֣ה צְבָא֔וֹת עֹ֤ד יֵֽשְׁבוּ֙ זְקֵנִ֣ים וּזְקֵנ֔וֹת בִּרְחֹב֖וֹת יְרוּשָׁלִָ֑ם וְאִ֧ישׁ מִשְׁעַנְתּ֛וֹ בְּיָד֖וֹ מֵרֹ֥ב יָמִֽים׃

‎5 ‏וּרְחֹב֤וֹת הָעִיר֙ יִמָּ֣לְא֔וּ יְלָדִ֖ים וִֽילָד֑וֹת מְשַׂחֲקִ֖ים בִּרְחֹֽבֹתֶֽיהָ׃ ס

‎6 ‏כֹּ֤ה אָמַר֙ יְהוָ֣ה צְבָא֔וֹת כִּ֣י יִפָּלֵ֗א בְּעֵינֵי֙ שְׁאֵרִית֙ הָעָ֣ם הַזֶּ֔ה בַּיָּמִ֖ים הָהֵ֑ם גַּם־בְּעֵינַי֙ יִפָּלֵ֔א נְאֻ֖ם יְהוָ֥ה צְבָאֽוֹת׃ פ

‎7 ‏כֹּ֤ה אָמַר֙ יְהוָ֣ה צְבָא֔וֹת הִנְנִ֥י מוֹשִׁ֛יעַ אֶת־עַמִּ֖י מֵאֶ֣רֶץ מִזְרָ֑ח וּמֵאֶ֖רֶץ מְב֥וֹא הַשָּֽׁמֶשׁ׃

‎8 ‏וְהֵבֵאתִ֣י אֹתָ֔ם וְשָׁכְנ֖וּ בְּת֣וֹךְ יְרוּשָׁלִָ֑ם וְהָיוּ־לִ֣י לְעָ֗ם וַֽאֲנִי֙ אֶהְיֶ֤ה לָהֶם֙ לֵֽאלֹהִ֔ים בֶּאֱמֶ֖ת וּבִצְדָקָֽה׃ ס

‎9 ‏כֹּֽה־אָמַר֮ יְהוָ֣ה צְבָאוֹת֒ תֶּחֱזַ֣קְנָה יְדֵיכֶ֔ם הַשֹּֽׁמְעִים֙ בַּיָּמִ֣ים הָאֵ֔לֶּה אֵ֖ת הַדְּבָרִ֣ים הָאֵ֑לֶּה מִפִּי֙ הַנְּבִיאִ֔ים אֲ֠שֶׁר בְּי֞וֹם יֻסַּ֨ד בֵּית־יְהוָ֧ה צְבָא֛וֹת הַהֵיכָ֖ל לְהִבָּנֽוֹת׃

‎10 ‏כִּ֗י לִפְנֵי֙ הַיָּמִ֣ים הָהֵ֔ם שְׂכַ֤ר הָֽאָדָם֙ לֹ֣א נִֽהְיָ֔ה וּשְׂכַ֥ר הַבְּהֵמָ֖ה אֵינֶ֑נָּה וְלַיּוֹצֵ֨א וְלַבָּ֤א אֵין־שָׁלוֹם֙ מִן־הַצָּ֔ר וַאֲשַׁלַּ֥ח אֶת־כָּל־הָאָדָ֖ם אִ֥ישׁ בְּרֵעֵֽהוּ׃

‎11 ‏וְעַתָּ֗ה לֹ֣א כַיָּמִ֤ים הָרִֽאשֹׁנִים֙ אֲנִ֔י לִשְׁאֵרִ֖ית הָעָ֣ם הַזֶּ֑ה נְאֻ֖ם יְהוָ֥ה צְבָאֽוֹת׃

‎12 ‏כִּֽי־זֶ֣רַע הַשָּׁל֗וֹם הַגֶּ֜פֶן תִּתֵּ֤ן פִּרְיָהּ֙ וְהָאָ֙רֶץ֙ תִּתֵּ֣ן אֶת־יְבוּלָ֔הּ וְהַשָּׁמַ֖יִם יִתְּנ֣וּ טַלָּ֑ם וְהִנְחַלְתִּ֗י אֶת־שְׁאֵרִ֛ית הָעָ֥ם הַזֶּ֖ה אֶת־כָּל־אֵֽלֶּה׃

‎13 ‏וְהָיָ֡ה כַּאֲשֶׁר֩ הֱיִיתֶ֨ם קְלָלָ֜ה בַּגּוֹיִ֗ם בֵּ֤ית יְהוּדָה֙ וּבֵ֣ית יִשְׂרָאֵ֔ל כֵּ֚ן אוֹשִׁ֣יעַ אֶתְכֶ֔ם וִהְיִיתֶ֖ם בְּרָכָ֑ה אַל־תִּירָ֖אוּ תֶּחֱזַ֥קְנָה יְדֵיכֶֽם׃ ס

‎14 ‏כִּ֣י כֹ֣ה אָמַר֮ יְהוָ֣ה צְבָאוֹת֒ כַּאֲשֶׁ֨ר זָמַמְ֜תִּי¹ לְהָרַ֣ע לָכֶ֗ם בְּהַקְצִ֤יף אֲבֹֽתֵיכֶם֙ אֹתִ֔י אָמַ֖ר יְהוָ֣ה צְבָא֑וֹת וְלֹ֖א נִחָֽמְתִּי׃

‎15 ‏כֵּ֣ן שַׁ֤בְתִּי זָמַ֙מְתִּי֙ בַּיָּמִ֣ים הָאֵ֔לֶּה לְהֵיטִ֥יב אֶת־יְרוּשָׁלִַ֖ם וְאֶת־בֵּ֣ית יְהוּדָ֑ה אַל־תִּירָֽאוּ׃

‎16 ‏אֵ֥לֶּה הַדְּבָרִ֖ים אֲשֶׁ֣ר תַּֽעֲשׂ֑וּ דַּבְּר֤וּ אֱמֶת֙ אִ֣ישׁ אֶת־רֵעֵ֔הוּ אֱמֶת֙ וּמִשְׁפַּ֣ט שָׁל֔וֹם שִׁפְט֖וּ בְּשַׁעֲרֵיכֶֽם׃

‎17 ‏וְאִ֣ישׁ׀ אֶת־רָעַ֣ת רֵעֵ֗הוּ אַֽל־תַּחְשְׁבוּ֙ בִּלְבַבְכֶ֔ם וּשְׁבֻ֥עַת שֶׁ֖קֶר אַֽל־תֶּאֱהָ֑בוּ כִּ֧י אֶת־כָּל־אֵ֛לֶּה אֲשֶׁ֥ר שָׂנֵ֖אתִי נְאֻם־יְהוָֽה׃ ס

‎18 ‏וַיְהִ֛י דְּבַר־יְהוָ֥ה צְבָא֖וֹת אֵלַ֥י לֵאמֹֽר׃

‎19 ‏כֹּֽה־אָמַ֞ר יְהוָ֣ה צְבָא֗וֹת צ֣וֹם הָרְבִיעִ֡י וְצ֣וֹם הַחֲמִישִׁי֩ וְצ֨וֹם הַשְּׁבִיעִ֜י וְצ֣וֹם הָעֲשִׂירִ֗י יִהְיֶ֤ה לְבֵית־יְהוּדָה֙ לְשָׂשׂ֣וֹן וּלְשִׂמְחָ֔ה וּֽלְמֹעֲדִ֖ים טוֹבִ֑ים וְהָאֱמֶ֥ת וְהַשָּׁל֖וֹם אֱהָֽבוּ׃ פ

‎20 ‏כֹּ֥ה אָמַ֖ר יְהוָ֣ה צְבָא֑וֹת עֹ֚ד אֲשֶׁ֣ר יָבֹ֣אוּ עַמִּ֔ים וְיֹשְׁבֵ֖י עָרִ֥ים רַבּֽוֹת׃

‎21 ‏וְֽהָלְכ֡וּ יֹשְׁבֵי֩ אַחַ֨ת אֶל־אַחַ֜ת לֵאמֹ֗ר נֵלְכָ֤ה הָלוֹךְ֙ לְחַלּוֹת֙ אֶת־פְּנֵ֣י יְהוָ֔ה וּלְבַקֵּ֖שׁ אֶת־יְהוָ֣ה צְבָא֑וֹת אֵלְכָ֖ה גַּם־אָֽנִי׃

‎22 ‏וּבָ֨אוּ עַמִּ֤ים רַבִּים֙ וְגוֹיִ֣ם עֲצוּמִ֔ים לְבַקֵּ֛שׁ אֶת־יְהוָ֥ה צְבָא֖וֹת בִּירוּשָׁלִָ֑ם וּלְחַלּ֖וֹת אֶת־פְּנֵ֥י יְהוָֽה׃ ס

‎23 ‏כֹּ֥ה¹ אָמַר֮ יְהוָ֣ה צְבָאוֹת֒ בַּיָּמִ֣ים הָהֵ֔מָּה אֲשֶׁ֤ר יַחֲזִ֙יקוּ֙ עֲשָׂרָ֣ה אֲנָשִׁ֔ים מִכֹּ֖ל לְשֹׁנ֣וֹת הַגּוֹיִ֑ם וְֽהֶחֱזִ֡יקוּ³ בִּכְנַף֩ אִ֨ישׁ יְהוּדִ֜י לֵאמֹ֗ר נֵֽלְכָה֙ עִמָּכֶ֔ם כִּ֥י שָׁמַ֖עְנוּ אֱלֹהִ֥ים עִמָּכֶֽם׃ ס

1 wayəhî dəḇar-yəhwâ ṣəḇā’wōṯ lē’mōr:

2 kōh ’āmar yəhwâ ṣəḇā’wōṯ qinnē’ṯî ləṣîywōn qinə’â ḡəḏwōlâ wəḥēmâ ḡəḏwōlâ qinnē’ṯî lāh:

3 kōh ’āmar yəhwâ šaḇətî ’el-ṣîywōn wəšāḵanətî bəṯwōḵə yərûšālāim wəniqərə’â yərûšālaim ‘îr-hā’ĕmeṯ wəhar-yəhwâ ṣəḇā’wōṯ har haqqōḏeš: s

4 kōh ’āmar yəhwâ ṣəḇā’wōṯ ‘ōḏ yēšəḇû zəqēnîm ûzəqēnwōṯ birəḥōḇwōṯ yərûšālāim wə’îš mišə‘anətwō bəyāḏwō mērōḇ yāmîm:

5 ûrəḥōḇwōṯ hā‘îr yimmālə’û yəlāḏîm wîlāḏwōṯ məś^aḥăqîm birəḥōḇōṯeyhā: s

6 kōh ’āmar yəhwâ ṣəḇā’wōṯ kî yipālē’ bə‘ênê šə’ērîṯ hā‘ām hazzeh bayyāmîm hâēm gam-bə‘ênay yipālē’ nə’um yəhwâ ṣəḇā’wōṯ: f

7 kōh ’āmar yəhwâ ṣəḇā’wōṯ hinənî mwōšî‘a ’eṯ-‘ammî mē’ereṣ mizərāḥ ûmē’ereṣ məḇwō’ haššāmeš:

8 wəhēḇē’ṯî ’ōṯām wəšāḵənû bəṯwōḵə yərûšālāim wəhāyû-lî lə‘ām wa’ănî ’ehəyeh lâem lē’lōhîm be’ĕmeṯ ûḇiṣəḏāqâ: s

9 kōh-’āmar yəhwâ ṣəḇā’wōṯ teḥĕzaqənâ yəḏêḵem haššōmə‘îm bayyāmîm hā’ēlleh ’ēṯ hadəḇārîm hā’ēlleh mipî hannəḇî’îm ’ăšer bəywōm yussaḏ bêṯ-yəhwâ ṣəḇā’wōṯ hahêḵāl ləhibānwōṯ:

10 kî lifənê hayyāmîm hâēm śəḵar hā’āḏām lō’ nihəyâ ûśəḵar habəhēmâ ’ênennâ wəlayywōṣē’ wəlabā’ ’ên-šālwōm min-haṣṣār wa’ăšall^aḥ ’eṯ-kāl-hā’āḏām ’îš bərē‘ēhû:

11 wə‘atâ lō’ ḵayyāmîm hāri’šōnîm ’ănî lišə’ērîṯ hā‘ām hazzeh nə’um yəhwâ ṣəḇā’wōṯ:

12 kî-zer^a‘ haššālwōm hagefen titēn pirəyāh wəhā’āreṣ titēn ’eṯ-yəḇûlāh wəhaššāmayim yitənû ṭallām wəhinəḥalətî ’eṯ-šə’ērîṯ hā‘ām hazzeh ’eṯ-kāl-’ēlleh:

13 wəhāyâ ka’ăšer hĕyîṯem qəlālâ bagwōyim bêṯ yəhûḏâ ûḇêṯ yiśərā’ēl kēn ’wōšî‘a ’eṯəḵem wihəyîṯem bərāḵâ ’al-tîrā’û teḥĕzaqənâ yəḏêḵem: s

14 kî ḵōh ’āmar yəhwâ ṣəḇā’wōṯ ka’ăšer zāmamətî¹ ləhār^a‘ lāḵem bəhaqəṣîf ’ăḇōṯêḵem ’ōṯî ’āmar yəhwâ ṣəḇā’wōṯ wəlō’ niḥāmətî:

15 kēn šaḇətî zāmamətî bayyāmîm hā’ēlleh ləhêṭîḇ ’eṯ-yərûšālaim wə’eṯ-bêṯ yəhûḏâ ’al-tîrā’û:

16 ’ēlleh hadəḇārîm ’ăšer t^a‘ăśû dabərû ’ĕmeṯ ’îš ’eṯ-rē‘ēhû ’ĕmeṯ ûmišəpaṭ šālwōm šifəṭû bəš^a‘ărêḵem:

17 wə’îš| ’eṯ-rā‘aṯ rē‘ēhû ’al-t^aḥəšəḇû biləḇaḇəḵem ûšəḇu‘aṯ šeqer ’al-te’ĕhāḇû kî ’eṯ-kāl-’ēlleh ’ăšer śānē’ṯî nə’um-yəhwâ: s

18 wayəhî dəḇar-yəhwâ ṣəḇā’wōṯ ’ēlay lē’mōr:

19 kōh-’āmar yəhwâ ṣəḇā’wōṯ ṣwōm hārəḇî‘î wəṣwōm h^aḥămîšî wəṣwōm haššəḇî‘î wəṣwōm hā‘ăśîrî yihəyeh ləḇêṯ-yəhûḏâ ləśāśwōn ûləśiməḥâ ûləmō‘ăḏîm ṭwōḇîm wəhā’ĕmeṯ wəhaššālwōm ’ĕhāḇû: f

20 kōh ’āmar yəhwâ ṣəḇā’wōṯ ‘ōḏ ’ăšer yāḇō’û ‘ammîm wəyōšəḇê ‘ārîm rabwōṯ:

21 wəhāləḵû yōšəḇê ’^aḥaṯ ’el-’^aḥaṯ lē’mōr nēləḵâ hālwōḵə ləḥallwōṯ ’eṯ-pənê yəhwâ ûləḇaqqēš ’eṯ-yəhwâ ṣəḇā’wōṯ ’ēləḵâ gam-’ānî:

22 ûḇā’û ‘ammîm rabîm wəḡwōyim ‘ăṣûmîm ləḇaqqēš ’eṯ-yəhwâ ṣəḇā’wōṯ bîrûšālāim ûləḥallwōṯ ’eṯ-pənê yəhwâ: s

23 kōh¹ ’āmar yəhwâ ṣəḇā’wōṯ bayyāmîm hâēmmâ ’ăšer y^aḥăzîqû ‘ăśārâ ’ănāšîm mikōl ləšōnwōṯ hagwōyim wəheḥĕzîqû³ biḵənaf ’îš yəhûḏî lē’mōr nēləḵâ ‘immāḵem kî šām^a‘ənû ’ĕlōhîm ‘immāḵem: s