‎1 ‏אֲנָ֣ה נְבוּכַדְנֶצַּ֗ר שְׁלֵ֤ה הֲוֵית֙ בְּבֵיתִ֔י וְרַעְנַ֖ן בְּהֵיכְלִֽי׃

‎2 ‏חֵ֥לֶם חֲזֵ֖ית וִֽידַחֲלִנַּ֑נִי וְהַרְהֹרִין֙ עַֽל־מִשְׁכְּבִ֔י וְחֶזְוֵ֥י רֵאשִׁ֖י יְבַהֲלֻנַּֽנִי׃

‎3 ‏וּמִנִּי֙ שִׂ֣ים טְעֵ֔ם לְהַנְעָלָ֣ה קָֽדָמַ֔י לְכֹ֖ל חַכִּימֵ֣י בָבֶ֑ל דִּֽי־פְשַׁ֥ר חֶלְמָ֖א יְהֽוֹדְעֻנַּֽנִי׃

‎4 ‏בֵּאדַ֣יִן עללין עָלִּ֗ין חַרְטֻמַיָּא֙ אָֽשְׁפַיָּ֔א כשדיא כַּשְׂדָּאֵ֖י וְגָזְרַיָּ֑א וְחֶלְמָ֗א אָמַ֤ר אֲנָה֙ קֳדָ֣מֵיה֔וֹן וּפִשְׁרֵ֖הּ לָא־מְהוֹדְעִ֥ין לִֽי׃

‎5 ‏וְעַ֣ד אָחֳרֵ֡ין עַל֩ קָֽדָמַ֨י דָּנִיֵּ֜אל דִּֽי־שְׁמֵ֤הּ בֵּלְטְשַׁאצַּר֙ כְּשֻׁ֣ם אֱלָהִ֔י וְדִ֛י רֽוּחַ־אֱלָהִ֥ין קַדִּישִׁ֖ין בֵּ֑הּ וְחֶלְמָ֖א קָֽדָמ֥וֹהִי אַמְרֵֽת׃

‎6 ‏בֵּלְטְשַׁאצַּר֮ רַ֣ב חַרְטֻמַיָּא֒ דִּ֣י׀ אֲנָ֣ה יִדְעֵ֗ת דִּ֠י ר֣וּחַ אֱלָהִ֤ין קַדִּישִׁין֙ בָּ֔ךְ וְכָל־רָ֖ז לָא־אָנֵ֣ס לָ֑ךְ חֶזְוֵ֨י חֶלְמִ֧י דִֽי־חֲזֵ֛ית וּפִשְׁרֵ֖הּ אֱמַֽר׃

‎7 ‏וְחֶזְוֵ֥י רֵאשִׁ֖י עַֽל־מִשְׁכְּבִ֑י חָזֵ֣ה הֲוֵ֔ית וַאֲל֥וּ אִילָ֛ן בְּג֥וֹא אַרְעָ֖א וְרוּמֵ֥הּ שַׂגִּֽיא׃

‎8 ‏רְבָ֥ה אִֽילָנָ֖א וּתְקִ֑ף וְרוּמֵהּ֙ יִמְטֵ֣א לִשְׁמַיָּ֔א וַחֲזוֹתֵ֖הּ לְס֥וֹף כָּל־אַרְעָֽא׃

‎9 ‏עָפְיֵ֤הּ שַׁפִּיר֙ וְאִנְבֵּ֣הּ שַׂגִּ֔יא וּמָז֨וֹן לְכֹ֖לָּא־בֵ֑הּ תְּחֹת֜וֹהִי תַּטְלֵ֣ל׀ חֵיוַ֣ת בָּרָ֗א וּבְעַנְפ֙וֹהִי֙ ידרון יְדוּרָן֙ צִפֲּרֵ֣י שְׁמַיָּ֔א וּמִנֵּ֖הּ יִתְּזִ֥ין כָּל־בִּשְׂרָֽא׃

‎10 ‏חָזֵ֥ה הֲוֵ֛ית בְּחֶזְוֵ֥י רֵאשִׁ֖י עַֽל־מִשְׁכְּבִ֑י וַאֲלוּ֙ עִ֣יר וְקַדִּ֔ישׁ מִן־שְׁמַיָּ֖א נָחִֽת׃

‎11 ‏קָרֵ֨א בְחַ֜יִל וְכֵ֣ן אָמַ֗ר גֹּ֤דּוּ אִֽילָנָא֙ וְקַצִּ֣צוּ עַנְפ֔וֹהִי אַתַּ֥רוּ עָפְיֵ֖הּ וּבַדַּ֣רוּ אִנְבֵּ֑הּ תְּנֻ֤ד חֵֽיוְתָא֙ מִן־תַּחְתּ֔וֹהִי וְצִפְּרַיָּ֖א מִן־עַנְפֽוֹהִי׃

‎12 ‏בְּרַ֨ם עִקַּ֤ר שָׁרְשׁ֙וֹהִי֙ בְּאַרְעָ֣א שְׁבֻ֔קוּ וּבֶֽאֱסוּר֙ דִּֽי־פַרְזֶ֣ל וּנְחָ֔שׁ בְּדִתְאָ֖א דִּ֣י בָרָ֑א וּבְטַ֤ל שְׁמַיָּא֙ יִצְטַבַּ֔ע וְעִם־חֵיוְתָ֥א חֲלָקֵ֖הּ בַּעֲשַׂ֥ב אַרְעָֽא׃

‎13 ‏לִבְבֵהּ֙ מִן־אנושא אֲנָשָׁ֣א יְשַׁנּ֔וֹן וּלְבַ֥ב חֵיוָ֖ה יִתְיְהִ֣ב לֵ֑הּ וְשִׁבְעָ֥ה עִדָּנִ֖ין יַחְלְפ֥וּן עֲלֽוֹהִי׃

‎14 ‏בִּגְזֵרַ֤ת עִירִין֙ פִּתְגָמָ֔א וּמֵאמַ֥ר קַדִּישִׁ֖ין שְׁאֵֽלְתָ֑א עַד־דִּבְרַ֡ת דִּ֣י יִנְדְּע֣וּן חַ֠יַּיָּא דִּֽי־שַׁלִּ֨יט עליא עִלָּאָ֜ה בְּמַלְכ֣וּת אנושא אֲנָשָׁ֗א^y וּלְמַן־דִּ֤י יִצְבֵּא֙ יִתְּנִנַּ֔הּ וּשְׁפַ֥ל אֲנָשִׁ֖ים יְקִ֥ים עליה עֲלַֽהּ׃

‎15 ‏דְּנָה֙ חֶלְמָ֣א חֲזֵ֔ית אֲנָ֖ה מַלְכָּ֣א נְבוּכַדְנֶצַּ֑ר ואנתה וְאַ֨נְתְּ בֵּלְטְשַׁאצַּ֜ר פִּשְׁרֵ֣א׀ אֱמַ֗ר כָּל־קֳבֵל֙ דִּ֣י׀ כָּל־חַכִּימֵ֣י מַלְכוּתִ֗י לָֽא־יָכְלִ֤ין פִּשְׁרָא֙ לְהוֹדָ֣עֻתַ֔נִי ואנתה וְאַ֣נְתְּ כָּהֵ֔ל דִּ֛י רֽוּחַ־אֱלָהִ֥ין קַדִּישִׁ֖ין בָּֽךְ׃

‎16 ‏אֱדַ֨יִן דָּֽנִיֵּ֜אל דִּֽי־שְׁמֵ֣הּ בֵּלְטְשַׁאצַּ֗ר אֶשְׁתּוֹמַם֙ כְּשָׁעָ֣ה חֲדָ֔ה וְרַעְיֹנֹ֖הִי יְבַהֲלֻנֵּ֑הּ עָנֵ֨ה מַלְכָּ֜א וְאָמַ֗ר בֵּלְטְשַׁאצַּר֙ חֶלְמָ֤א וּפִשְׁרֵא֙ אַֽל־יְבַהֲלָ֔ךְ עָנֵ֤ה בֵלְטְשַׁאצַּר֙ וְאָמַ֔ר מראי מָרִ֕י חֶלְמָ֥א לשנאיך לְשָֽׂנְאָ֖ךְ וּפִשְׁרֵ֥הּ לעריך לְעָרָֽךְ׃³

‎17 ‏אִֽילָנָא֙ דִּ֣י חֲזַ֔יְתָ דִּ֥י רְבָ֖ה וּתְקִ֑ף וְרוּמֵהּ֙ יִמְטֵ֣א לִשְׁמַיָּ֔א וַחֲזוֹתֵ֖הּ לְכָל־אַרְעָֽא׃

‎18 ‏וְעָפְיֵ֤הּ שַׁפִּיר֙ וְאִנְבֵּ֣הּ שַׂגִּ֔יא וּמָז֨וֹן לְכֹ֖לָּא־בֵ֑הּ תְּחֹת֗וֹהִי תְּדוּר֙ חֵיוַ֣ת בָּרָ֔א וּבְעַנְפ֕וֹהִי יִשְׁכְּנָ֖ן צִפֲּרֵ֥י שְׁמַיָּֽא׃

‎19 ‏אנתה־ אַנְתְּ־ ה֣וּא מַלְכָּ֔א דִּ֥י רְבַ֖ית וּתְקֵ֑פְתְּ וּרְבוּתָ֤ךְ רְבָת֙ וּמְטָ֣ת לִשְׁמַיָּ֔א וְשָׁלְטָנָ֖ךְ לְס֥וֹף אַרְעָֽא׃

‎20 ‏וְדִ֣י חֲזָ֣ה מַלְכָּ֡א עִ֣יר וְקַדִּ֣ישׁ נָחִ֣ת׀ מִן־שְׁמַיָּ֡א וְאָמַר֩ גֹּ֨דּוּ אִֽילָנָ֜א וְחַבְּל֗וּהִי בְּרַ֨ם עִקַּ֤ר שָׁרְשׁ֙וֹהִי֙ בְּאַרְעָ֣א שְׁבֻ֔קוּ וּבֶאֱסוּר֙ דִּֽי־פַרְזֶ֣ל וּנְחָ֔שׁ בְּדִתְאָ֖א דִּ֣י בָרָ֑א וּבְטַ֧ל שְׁמַיָּ֣א יִצְטַבַּ֗ע וְעִם־חֵיוַ֤ת בָּרָא֙ חֲלָקֵ֔הּ עַ֛ד דִּֽי־שִׁבְעָ֥ה עִדָּנִ֖ין יַחְלְפ֥וּן עֲלֽוֹהִי׃

‎21 ‏דְּנָ֥ה פִשְׁרָ֖א מַלְכָּ֑א וּגְזֵרַ֤ת עליא עִלָּאָה֙ הִ֔יא דִּ֥י מְטָ֖ת עַל־מראי מָרִ֥י מַלְכָּֽא׃

‎22 ‏וְלָ֣ךְ טָֽרְדִ֣ין מִן־אֲנָשָׁ֡א וְעִם־חֵיוַ֣ת בָּרָא֩ לֶהֱוֵ֨ה מְדֹרָ֜ךְ וְעִשְׂבָּ֥א כְתוֹרִ֣ין׀ לָ֣ךְ יְטַֽעֲמ֗וּן וּמִטַּ֤ל שְׁמַיָּא֙ לָ֣ךְ מְצַבְּעִ֔ין וְשִׁבְעָ֥ה עִדָּנִ֖ין יַחְלְפ֣וּן עליך עֲלָ֑ךְ⁹ עַ֣ד דִּֽי־תִנְדַּ֗ע דִּֽי־שַׁלִּ֤יט עליא עִלָּאָה֙⁹ בְּמַלְכ֣וּת אֲנָשָׁ֔א וּלְמַן־דִּ֥י יִצְבֵּ֖א יִתְּנִנַּֽהּ׃

‎23 ‏וְדִ֣י אֲמַ֗רוּ לְמִשְׁבַּ֞ק עִקַּ֤ר שָׁרְשׁ֙וֹהִי֙ דִּ֣י אִֽילָנָ֔א מַלְכוּתָ֖ךְ לָ֣ךְ קַיָּמָ֑ה מִן־דִּ֣י תִנְדַּ֔ע דִּ֥י שַׁלִּטִ֖ן שְׁמַיָּֽא׃

‎24 ‏לָהֵ֣ן מַלְכָּ֗א מִלְכִּי֙ יִשְׁפַּ֣ר עליך עֲלָ֔ךְ וחטיך וַחֲטָאָךְ֙ בְּצִדְקָ֣ה פְרֻ֔ק וַעֲוָיָתָ֖ךְ בְּמִחַ֣ן עֲנָ֑יִן הֵ֛ן תֶּהֱוֵ֥א אַרְכָ֖ה לִשְׁלֵוְתָֽךְ׃

‎25 ‏כֹּ֣לָּא מְּטָ֔א עַל־נְבוּכַדְנֶצַּ֖ר מַלְכָּֽא׃ פ

‎26 ‏לִקְצָ֥ת יַרְחִ֖ין תְּרֵֽי־עֲשַׂ֑ר עַל־הֵיכַ֧ל מַלְכוּתָ֛א דִּ֥י בָבֶ֖ל מְהַלֵּ֥ךְ הֲוָֽה׃

‎27 ‏עָנֵ֤ה מַלְכָּא֙ וְאָמַ֔ר הֲלָ֥א דָא־הִ֖יא בָּבֶ֣ל רַבְּתָ֑א דִּֽי־אֲנָ֤ה בֱנַיְתַהּ֙ לְבֵ֣ית מַלְכ֔וּ בִּתְקַ֥ף חִסְנִ֖י וְלִיקָ֥ר הַדְרִֽי׃

‎28 ‏ע֗וֹד מִלְּתָא֙ בְּפֻ֣ם מַלְכָּ֔א קָ֖ל מִן־שְׁמַיָּ֣א נְפַ֑ל לָ֤ךְ אָֽמְרִין֙ נְבוּכַדְנֶצַּ֣ר מַלְכָּ֔א מַלְכוּתָ֖ה עֲדָ֥ת מִנָּֽךְ׃

‎29 ‏וּמִן־אֲנָשָׁא֩ לָ֨ךְ טָֽרְדִ֜ין וְֽעִם־חֵיוַ֧ת בָּרָ֣א מְדֹרָ֗ךְ עִשְׂבָּ֤א כְתוֹרִין֙ לָ֣ךְ יְטַעֲמ֔וּן וְשִׁבְעָ֥ה עִדָּנִ֖ין יַחְלְפ֣וּן עליך עֲלָ֑ךְ עַ֣ד דִּֽי־תִנְדַּ֗ע דִּֽי־שַׁלִּ֤יט עליא עִלָּאָה֙⁹ בְּמַלְכ֣וּת אֲנָשָׁ֔א וּלְמַן־דִּ֥י יִצְבֵּ֖א יִתְּנִנַּֽהּ׃

‎30 ‏בַּהּ־שַׁעֲתָ֗א מִלְּתָא֮ סָ֣פַת עַל־נְבוּכַדְנֶצַּר֒ וּמִן־אֲנָשָׁ֣א טְרִ֔יד וְעִשְׂבָּ֤א כְתוֹרִין֙ יֵאכֻ֔ל וּמִטַּ֥ל שְׁמַיָּ֖א גִּשְׁמֵ֣הּ יִצְטַבַּ֑ע עַ֣ד דִּ֥י שַׂעְרֵ֛הּ כְּנִשְׁרִ֥ין רְבָ֖ה וְטִפְר֥וֹהִי כְצִפְּרִֽין׃

‎31 ‏וְלִקְצָ֣ת יֽוֹמַיָּה֩ אֲנָ֨ה נְבוּכַדְנֶצַּ֜ר עַיְנַ֣י׀ לִשְׁמַיָּ֣א נִטְלֵ֗ת וּמַנְדְּעִי֙ עֲלַ֣י יְת֔וּב ולעליא וּלְעִלָּאָה֙ בָּרְכֵ֔ת וּלְחַ֥י עָלְמָ֖א שַׁבְּחֵ֣ת וְהַדְּרֵ֑ת דִּ֤י שָׁלְטָנֵהּ֙ שָׁלְטָ֣ן עָלַ֔ם וּמַלְכוּתֵ֖הּ עִם־דָּ֥ר וְדָֽר׃

‎32 ‏וְכָל־דארי דָּיְרֵ֤י אַרְעָא֙ כְּלָ֣ה חֲשִׁיבִ֔ין וּֽכְמִצְבְּיֵ֗הּ עָבֵד֙ בְּחֵ֣יל שְׁמַיָּ֔א ודארי וְדָיְרֵ֖י אַרְעָ֑א וְלָ֤א אִיתַי֙ דִּֽי־יְמַחֵ֣א בִידֵ֔הּ וְיֵ֥אמַר לֵ֖הּ מָ֥ה עֲבַֽדְתְּ׃

‎33 ‏בֵּהּ־זִמְנָ֞א מַנְדְּעִ֣י׀ יְת֣וּב עֲלַ֗י וְלִיקַ֨ר מַלְכוּתִ֜י הַדְרִ֤י וְזִוִי֙ יְת֣וּב עֲלַ֔י וְלִ֕י הַדָּֽבְרַ֥י וְרַבְרְבָנַ֖י יְבַע֑וֹן וְעַל־מַלְכוּתִ֣י הָתְקְנַ֔ת וּרְב֥וּ יַתִּירָ֖ה ה֥וּסְפַת לִֽי׃

‎34 ‏כְּעַ֞ן אֲנָ֣ה נְבוּכַדְנֶצַּ֗ר מְשַׁבַּ֨ח וּמְרוֹמֵ֤ם וּמְהַדַּר֙ לְמֶ֣לֶךְ שְׁמַיָּ֔א דִּ֤י כָל־מַעֲבָד֙וֹהִי֙ קְשֹׁ֔ט וְאֹרְחָתֵ֖הּ דִּ֑ין וְדִי֙ מַהְלְכִ֣ין בְּגֵוָ֔ה יָכִ֖ל לְהַשְׁפָּלָֽה׃ פ

1 ’ănâ nəḇûḵaḏəneṣṣar šəlēh hăwêṯ bəḇêṯî wər^a‘ənan bəhêḵəlî:

2 ḥēlem ḥăzêṯ wîḏ^aḥălinnanî wəharəhōrîn ‘al-mišəkəḇî wəḥezəwê rē’šî yəḇahălunnanî:

3 ûminnî śîm ṭə‘ēm ləhanə‘ālâ qāḏāmay ləḵōl ḥakîmê ḇāḇel dî-fəšar ḥeləmā’ yəhwōḏə‘unnanî:

4 bē’ḏayin ‘ālălîn ‘āllîn ḥarəṭumayyā’ ’āšəfayyā’ kaśədāyē’ kaśədā’ê wəḡāzərayyā’ wəḥeləmā’ ’āmar ’ănâ qŏḏāmêhwōn ûfišərēhh lā’-məhwōḏə‘în lî:

5 wə‘aḏ ’āḥŏrên ‘al qāḏāmay dānîyē’l dî-šəmēhh bēləṭəša’ṣṣar kəšum ’ĕlâî wəḏî rûḥa-’ĕlâîn qadîšîn bēhh wəḥeləmā’ qāḏāmwōhî ’amərēṯ:

6 bēləṭəša’ṣṣar raḇ ḥarəṭumayyā’ dî| ’ănâ yiḏə‘ēṯ dî rûḥa ’ĕlâîn qadîšîn bāḵə wəḵāl-rāz lā’-’ānēs lāḵə ḥezəwê ḥeləmî ḏî-ḥăzêṯ ûfišərēhh ’ĕmar:

7 wəḥezəwê rē’šî ‘al-mišəkəḇî ḥāzēh hăwêṯ wa’ălû ’îlān bəḡwō’ ’arə‘ā’ wərûmēhh śagî’:

8 rəḇâ ’îlānā’ ûṯəqif wərûmēhh yiməṭē’ lišəmayyā’ w^aḥăzwōṯēhh ləswōf kāl-’arə‘ā’:

9 ‘āfəyēhh šapîr wə’inəbēhh śagî’ ûmāzwōn ləḵōllā’-ḇēhh təḥōṯwōhî taṭəlēl| ḥêwaṯ bārā’ ûḇə‘anəfwōhî yəḏurûn yəḏûrān ṣipărê šəmayyā’ ûminnēhh yitəzîn kāl-biśərā’:

10 ḥāzēh hăwêṯ bəḥezəwê rē’šî ‘al-mišəkəḇî wa’ălû ‘îr wəqadîš min-šəmayyā’ nāḥiṯ:

11 qārē’ ḇəḥayil wəḵēn ’āmar gōdû ’îlānā’ wəqaṣṣiṣû ‘anəfwōhî ’atarû ‘āfəyēhh ûḇadarû ’inəbēhh tənuḏ ḥêwəṯā’ min-t^aḥətwōhî wəṣipərayyā’ min-‘anəfwōhî:

12 bəram ‘iqqar šārəšwōhî bə’arə‘ā’ šəḇuqû ûḇe’ĕsûr dî-farəzel ûnəḥāš bəḏiṯə’ā’ dî ḇārā’ ûḇəṭal šəmayyā’ yiṣəṭab^a‘ wə‘im-ḥêwəṯā’ ḥălāqēhh b^a‘ăśaḇ ’arə‘ā’:

13 liḇəḇēhh min-’ĕnwōšā’ ’ănāšā’ yəšannwōn ûləḇaḇ ḥêwâ yiṯəyəhiḇ lēhh wəšiḇə‘â ‘idānîn y^aḥələfûn ‘ălwōhî:

14 biḡəzēraṯ ‘îrîn piṯəḡāmā’ ûmē’mar qadîšîn šə’ēləṯā’ ‘aḏ-diḇəraṯ dî yinədə‘ûn ḥayyayyā’ dî-šallîṭ ‘illāyā’ ‘illā’â bəmaləḵûṯ ’ĕnwōšā’ ’ănāšā’^y ûləman-dî yiṣəbē’ yitəninn^ah ûšəfal ’ănāšîm yəqîm ‘ălayy^ah ‘ăl^ah:

15 dənâ ḥeləmā’ ḥăzêṯ ’ănâ maləkā’ nəḇûḵaḏəneṣṣar wə’anətâ wə’anətə bēləṭəša’ṣṣar pišərē’| ’ĕmar kāl-qŏḇēl dî| kāl-ḥakîmê maləḵûṯî lā’-yāḵəlîn pišərā’ ləhwōḏā‘uṯanî wə’anətâ wə’anətə kâēl dî rûḥa-’ĕlâîn qadîšîn bāḵə:

16 ’ĕḏayin dānîyē’l dî-šəmēhh bēləṭəša’ṣṣar ’ešətwōmam kəšā‘â ḥăḏâ wər^a‘əyōnōhî yəḇahălunnēhh ‘ānēh maləkā’ wə’āmar bēləṭəša’ṣṣar ḥeləmā’ ûfišərē’ ’al-yəḇahălāḵə ‘ānēh ḇēləṭəša’ṣṣar wə’āmar mārə’î mārî ḥeləmā’ ləśānə’ayiḵə ləśānə’āḵə ûfišərēhh lə‘ārayiḵə lə‘ārāḵə:³

17 ’îlānā’ dî ḥăzayəṯā dî rəḇâ ûṯəqif wərûmēhh yiməṭē’ lišəmayyā’ w^aḥăzwōṯēhh ləḵāl-’arə‘ā’:

18 wə‘āfəyēhh šapîr wə’inəbēhh śagî’ ûmāzwōn ləḵōllā’-ḇēhh təḥōṯwōhî təḏûr ḥêwaṯ bārā’ ûḇə‘anəfwōhî yišəkənān ṣipărê šəmayyā’:

19 ’anətâ- ’anətə- hû’ maləkā’ dî rəḇayṯ ûṯəqēfətə ûrəḇûṯāḵə rəḇāṯ ûməṭāṯ lišəmayyā’ wəšāləṭānāḵə ləswōf ’arə‘ā’:

20 wəḏî ḥăzâ maləkā’ ‘îr wəqadîš nāḥiṯ| min-šəmayyā’ wə’āmar gōdû ’îlānā’ wəḥabəlûhî bəram ‘iqqar šārəšwōhî bə’arə‘ā’ šəḇuqû ûḇe’ĕsûr dî-farəzel ûnəḥāš bəḏiṯə’ā’ dî ḇārā’ ûḇəṭal šəmayyā’ yiṣəṭab^a‘ wə‘im-ḥêwaṯ bārā’ ḥălāqēhh ‘aḏ dî-šiḇə‘â ‘idānîn y^aḥələfûn ‘ălwōhî:

21 dənâ fišərā’ maləkā’ ûḡəzēraṯ ‘illāyā’ ‘illā’â hî’ dî məṭāṯ ‘al-marə’î mārî maləkā’:

22 wəlāḵə ṭārəḏîn min-’ănāšā’ wə‘im-ḥêwaṯ bārā’ lehĕwēh məḏōrāḵə wə‘iśəbā’ ḵəṯwōrîn| lāḵə yəṭ^a‘ămûn ûmiṭṭal šəmayyā’ lāḵə məṣabə‘în wəšiḇə‘â ‘idānîn y^aḥələfûn ‘ălayiḵə ‘ălāḵə⁹ ‘aḏ dî-ṯinəd^a‘ dî-šallîṭ ‘illāyā’ ‘illā’â⁹ bəmaləḵûṯ ’ănāšā’ ûləman-dî yiṣəbē’ yitəninn^ah:

23 wəḏî ’ămarû ləmišəbaq ‘iqqar šārəšwōhî dî ’îlānā’ maləḵûṯāḵə lāḵə qayyāmâ min-dî ṯinəd^a‘ dî šalliṭin šəmayyā’:

24 lâēn maləkā’ miləkî yišəpar ‘ălayiḵə ‘ălāḵə w^aḥăṭāyāḵə w^aḥăṭā’āḵə bəṣiḏəqâ fəruq w^a‘ăwāyāṯāḵə bəmiḥan ‘ănāyin hēn tehĕwē’ ’arəḵâ lišəlēwəṯāḵə:

25 kōllā’ mməṭā’ ‘al-nəḇûḵaḏəneṣṣar maləkā’: f

26 liqəṣāṯ yarəḥîn tərê-‘ăśar ‘al-hêḵal maləḵûṯā’ dî ḇāḇel məhallēḵə hăwâ:

27 ‘ānēh maləkā’ wə’āmar hălā’ ḏā’-hî’ bāḇel rabəṯā’ dî-’ănâ ḇĕnayəṯ^ah ləḇêṯ maləḵû biṯəqaf ḥisənî wəlîqār haḏərî:

28 ‘wōḏ milləṯā’ bəfum maləkā’ qāl min-šəmayyā’ nəfal lāḵə ’āmərîn nəḇûḵaḏəneṣṣar maləkā’ maləḵûṯâ ‘ăḏāṯ minnāḵə:

29 ûmin-’ănāšā’ lāḵə ṭārəḏîn wə‘im-ḥêwaṯ bārā’ məḏōrāḵə ‘iśəbā’ ḵəṯwōrîn lāḵə yəṭ^a‘ămûn wəšiḇə‘â ‘idānîn y^aḥələfûn ‘ălayiḵə ‘ălāḵə ‘aḏ dî-ṯinəd^a‘ dî-šallîṭ ‘illāyā’ ‘illā’â⁹ bəmaləḵûṯ ’ănāšā’ ûləman-dî yiṣəbē’ yitəninn^ah:

30 b^ah-š^a‘ăṯā’ milləṯā’ sāfaṯ ‘al-nəḇûḵaḏəneṣṣar ûmin-’ănāšā’ ṭərîḏ wə‘iśəbā’ ḵəṯwōrîn yē’ḵul ûmiṭṭal šəmayyā’ gišəmēhh yiṣəṭab^a‘ ‘aḏ dî ś^a‘ərēhh kənišərîn rəḇâ wəṭifərwōhî ḵəṣipərîn:

31 wəliqəṣāṯ ywōmayyâ ’ănâ nəḇûḵaḏəneṣṣar ‘ayənay| lišəmayyā’ niṭəlēṯ ûmanədə‘î ‘ălay yəṯûḇ ûlə‘illāyā’ ûlə‘illā’â bārəḵēṯ ûləḥay ‘āləmā’ šabəḥēṯ wəhadərēṯ dî šāləṭānēhh šāləṭān ‘ālam ûmaləḵûṯēhh ‘im-dār wəḏār:

32 wəḵāl-dā’ărê dāyərê ’arə‘ā’ kəlâ ḥăšîḇîn ûḵəmiṣəbəyēhh ‘āḇēḏ bəḥêl šəmayyā’ wəḏā’ărê wəḏāyərê ’arə‘ā’ wəlā’ ’îṯay dî-yəm^aḥē’ ḇîḏēhh wəyē’mar lēhh mâ ‘ăḇaḏətə:

33 bēhh-zimənā’ manədə‘î| yəṯûḇ ‘ălay wəlîqar maləḵûṯî haḏərî wəziwî yəṯûḇ ‘ălay wəlî hadāḇəray wəraḇərəḇānay yəḇ^a‘wōn wə‘al-maləḵûṯî hāṯəqənaṯ ûrəḇû yatîrâ hûsəfaṯ lî:

34 kə‘an ’ănâ nəḇûḵaḏəneṣṣar məšab^aḥ ûmərwōmēm ûməhadar ləmeleḵə šəmayyā’ dî ḵāl-m^a‘ăḇāḏwōhî qəšōṭ wə’ōrəḥāṯēhh dîn wəḏî mahələḵîn bəḡēwâ yāḵil ləhašəpālâ: f