‎1 ‏וְהָיָה֩ כִֽי־יָבֹ֨אוּ עָלֶ֜יךָ כָּל־הַדְּבָרִ֣ים הָאֵ֗לֶּה הַבְּרָכָה֙ וְהַקְּלָלָ֔ה אֲשֶׁ֥ר נָתַ֖תִּי לְפָנֶ֑יךָ וַהֲשֵׁבֹתָ֙ אֶל־לְבָבֶ֔ךָ בְּכָל־הַגּוֹיִ֔ם אֲשֶׁ֧ר הִדִּיחֲךָ֛ יְהוָ֥ה אֱלֹהֶ֖יךָ שָֽׁמָּה׃

‎2 ‏וְשַׁבְתָּ֞ עַד־יְהוָ֤ה אֱלֹהֶ֙יךָ֙ וְשָׁמַעְתָּ֣ בְקֹל֔וֹ כְּכֹ֛ל אֲשֶׁר־אָנֹכִ֥י מְצַוְּךָ֖ הַיּ֑וֹם אַתָּ֣ה וּבָנֶ֔יךָ בְּכָל־לְבָבְךָ֖ וּבְכָל־נַפְשֶֽׁךָ׃

‎3 ‏וְשָׁ֨ב יְהוָ֧ה אֱלֹהֶ֛יךָ אֶת־שְׁבוּתְךָ֖ וְרִחֲמֶ֑ךָ וְשָׁ֗ב וְקִבֶּצְךָ֙ מִכָּל־הָ֣עַמִּ֔ים אֲשֶׁ֧ר הֱפִֽיצְךָ֛ יְהוָ֥ה אֱלֹהֶ֖יךָ שָֽׁמָּה׃

‎4 ‏אִם־יִהְיֶ֥ה נִֽדַּחֲךָ֖ בִּקְצֵ֣ה הַשָּׁמָ֑יִם מִשָּׁ֗ם יְקַבֶּצְךָ֙ יְהוָ֣ה אֱלֹהֶ֔יךָ וּמִשָּׁ֖ם יִקָּחֶֽךָ׃

‎5 ‏וֶהֱבִֽיאֲךָ֞ יְהוָ֣ה אֱלֹהֶ֗יךָ אֶל־הָאָ֛רֶץ אֲשֶׁר־יָרְשׁ֥וּ אֲבֹתֶ֖יךָ וִֽירִשְׁתָּ֑הּ וְהֵיטִֽבְךָ֥ וְהִרְבְּךָ֖ מֵאֲבֹתֶֽיךָ׃

‎6 ‏וּמָ֨ל יְהוָ֧ה אֱלֹהֶ֛יךָ אֶת־לְבָבְךָ֖ וְאֶת־לְבַ֣ב זַרְעֶ֑ךָ לְאַהֲבָ֞ה אֶת־יְהוָ֧ה אֱלֹהֶ֛יךָ בְּכָל־לְבָבְךָ֥ וּבְכָל־נַפְשְׁךָ֖ לְמַ֥עַן חַיֶּֽיךָ׃

‎7 ‏וְנָתַן֙ יְהוָ֣ה אֱלֹהֶ֔יךָ אֵ֥ת כָּל־הָאָל֖וֹת הָאֵ֑לֶּה עַל־אֹיְבֶ֥יךָ וְעַל־שֹׂנְאֶ֖יךָ אֲשֶׁ֥ר רְדָפֽוּךָ׃

‎8 ‏וְאַתָּ֣ה תָשׁ֔וּב וְשָׁמַעְתָּ֖ בְּק֣וֹל יְהוָ֑ה וְעָשִׂ֙יתָ֙ אֶת־כָּל־מִצְוֹתָ֔יו אֲשֶׁ֛ר אָנֹכִ֥י מְצַוְּךָ֖ הַיּֽוֹם׃

‎9 ‏וְהוֹתִֽירְךָ֩ יְהוָ֨ה אֱלֹהֶ֜יךָ בְּכֹ֣ל׀ מַעֲשֵׂ֣ה יָדֶ֗ךָ בִּפְרִ֨י בִטְנְךָ֜ וּבִפְרִ֧י בְהֶמְתְּךָ֛ וּבִפְרִ֥י אַדְמָתְךָ֖ לְטוֹבָ֑ה כִּ֣י׀ יָשׁ֣וּב יְהוָ֗ה לָשׂ֤וּשׂ עָלֶ֙יךָ֙ לְט֔וֹב כַּאֲשֶׁר־שָׂ֖שׂ עַל־אֲבֹתֶֽיךָ׃

‎10 ‏כִּ֣י תִשְׁמַ֗ע בְּקוֹל֙ יְהוָ֣ה אֱלֹהֶ֔יךָ לִשְׁמֹ֤ר מִצְוֹתָיו֙ וְחֻקֹּתָ֔יו הַכְּתוּבָ֕ה בְּסֵ֥פֶר הַתּוֹרָ֖ה הַזֶּ֑ה כִּ֤י תָשׁוּב֙ אֶל־יְהוָ֣ה אֱלֹהֶ֔יךָ בְּכָל־לְבָבְךָ֖ וּבְכָל־נַפְשֶֽׁךָ׃ פ

‎11 ‏כִּ֚י הַמִּצְוָ֣ה הַזֹּ֔את אֲשֶׁ֛ר אָנֹכִ֥י מְצַוְּךָ֖ הַיּ֑וֹם לֹֽא־נִפְלֵ֥את הִוא֙ מִמְּךָ֔ וְלֹ֥א רְחֹקָ֖ה הִֽוא׃

‎12 ‏לֹ֥א בַשָּׁמַ֖יִם הִ֑וא לֵאמֹ֗ר מִ֣י יַעֲלֶה־לָּ֤נוּ הַשָּׁמַ֙יְמָה֙ וְיִקָּחֶ֣הָ לָּ֔נוּ וְיַשְׁמִעֵ֥נוּ אֹתָ֖הּ וְנַעֲשֶֽׂנָּה׃

‎13 ‏וְלֹֽא־מֵעֵ֥בֶר לַיָּ֖ם הִ֑וא לֵאמֹ֗ר מִ֣י יַעֲבָר־לָ֜נוּ אֶל־עֵ֤בֶר הַיָּם֙ וְיִקָּחֶ֣הָ לָּ֔נוּ וְיַשְׁמִעֵ֥נוּ אֹתָ֖הּ וְנַעֲשֶֽׂנָּה׃

‎14 ‏כִּֽי־קָר֥וֹב אֵלֶ֛יךָ הַדָּבָ֖ר מְאֹ֑ד בְּפִ֥יךָ וּבִֽלְבָבְךָ֖ לַעֲשֹׂתֽוֹ׃ ס

‎15 ‏רְאֵ֨ה נָתַ֤תִּי לְפָנֶ֙יךָ֙ הַיּ֔וֹם אֶת־הַֽחַיִּ֖ים וְאֶת־הַטּ֑וֹב וְאֶת־הַמָּ֖וֶת וְאֶת־הָרָֽע׃

‎16 ‏אֲשֶׁ֨ר אָנֹכִ֣י מְצַוְּךָ֮ הַיּוֹם֒ לְאַהֲבָ֞ה אֶת־יְהוָ֤ה אֱלֹהֶ֙יךָ֙ לָלֶ֣כֶת בִּדְרָכָ֔יו וְלִשְׁמֹ֛ר מִצְוֹתָ֥יו וְחֻקֹּתָ֖יו וּמִשְׁפָּטָ֑יו וְחָיִ֣יתָ וְרָבִ֔יתָ וּבֵֽרַכְךָ֙ יְהוָ֣ה אֱלֹהֶ֔יךָ בָּאָ֕רֶץ אֲשֶׁר־אַתָּ֥ה בָא־שָׁ֖מָּה לְרִשְׁתָּֽהּ׃

‎17 ‏וְאִם־יִפְנֶ֥ה לְבָבְךָ֖ וְלֹ֣א תִשְׁמָ֑ע וְנִדַּחְתָּ֗ וְהִֽשְׁתַּחֲוִ֛יתָ לֵאלֹהִ֥ים אֲחֵרִ֖ים וַעֲבַדְתָּֽם׃

‎18 ‏הִגַּ֤דְתִּי לָכֶם֙ הַיּ֔וֹם כִּ֥י אָבֹ֖ד תֹּאבֵד֑וּן לֹא־תַאֲרִיכֻ֤ן יָמִים֙ עַל־הָ֣אֲדָמָ֔ה אֲשֶׁ֨ר אַתָּ֤ה עֹבֵר֙ אֶת־הַיַּרְדֵּ֔ן לָבֹ֥א שָׁ֖מָּה לְרִשְׁתָּֽהּ׃

‎19 ‏הַעִידֹ֨תִי בָכֶ֣ם הַיּוֹם֮ אֶת־הַשָּׁמַ֣יִם וְאֶת־הָאָרֶץ֒ הַחַיִּ֤ים וְהַמָּ֙וֶת֙ נָתַ֣תִּי לְפָנֶ֔יךָ הַבְּרָכָ֖ה וְהַקְּלָלָ֑ה וּבָֽחַרְתָּ֙ בַּֽחַיִּ֔ים לְמַ֥עַן תִּחְיֶ֖ה אַתָּ֥ה וְזַרְעֶֽךָ׃

‎20 ‏לְאַֽהֲבָה֙ אֶת־יְהוָ֣ה אֱלֹהֶ֔יךָ לִשְׁמֹ֥עַ בְּקֹל֖וֹ וּלְדָבְקָה־ב֑וֹ כִּ֣י ה֤וּא חַיֶּ֙יךָ֙ וְאֹ֣רֶךְ יָמֶ֔יךָ לָשֶׁ֣בֶת עַל־הָאֲדָמָ֗ה אֲשֶׁר֩ נִשְׁבַּ֨ע יְהוָ֧ה לַאֲבֹתֶ֛יךָ לְאַבְרָהָ֛ם לְיִצְחָ֥ק וּֽלְיַעֲקֹ֖ב לָתֵ֥ת לָהֶֽם׃ פ

1 wəhāyâ ḵî-yāḇō’û ‘āleyḵā kāl-hadəḇārîm hā’ēlleh habərāḵâ wəhaqqəlālâ ’ăšer nāṯatî ləfāneyḵā wahăšēḇōṯā ’el-ləḇāḇeḵā bəḵāl-hagwōyim ’ăšer hidîḥăḵā yəhwâ ’ĕlōheyḵā šāmmâ:

2 wəšaḇətā ‘aḏ-yəhwâ ’ĕlōheyḵā wəšām^a‘ətā ḇəqōlwō kəḵōl ’ăšer-’ānōḵî məṣaûəḵā hayywōm ’atâ ûḇāneyḵā bəḵāl-ləḇāḇəḵā ûḇəḵāl-nafəšeḵā:

3 wəšāḇ yəhwâ ’ĕlōheyḵā ’eṯ-šəḇûṯəḵā wəriḥămeḵā wəšāḇ wəqibeṣəḵā mikāl-hā‘ammîm ’ăšer hĕfîṣəḵā yəhwâ ’ĕlōheyḵā šāmmâ:

4 ’im-yihəyeh nid^aḥăḵā biqəṣēh haššāmāyim miššām yəqabeṣəḵā yəhwâ ’ĕlōheyḵā ûmiššām yiqqāḥeḵā:

5 wehĕḇî’ăḵā yəhwâ ’ĕlōheyḵā ’el-hā’āreṣ ’ăšer-yārəšû ’ăḇōṯeyḵā wîrišətāh wəhêṭiḇəḵā wəhirəbəḵā mē’ăḇōṯeyḵā:

6 ûmāl yəhwâ ’ĕlōheyḵā ’eṯ-ləḇāḇəḵā wə’eṯ-ləḇaḇ zarə‘eḵā lə’ahăḇâ ’eṯ-yəhwâ ’ĕlōheyḵā bəḵāl-ləḇāḇəḵā ûḇəḵāl-nafəšəḵā ləm^a‘an ḥayyeyḵā:

7 wənāṯan yəhwâ ’ĕlōheyḵā ’ēṯ kāl-hā’ālwōṯ hā’ēlleh ‘al-’ōyəḇeyḵā wə‘al-śōnə’eyḵā ’ăšer rəḏāfûḵā:

8 wə’atâ ṯāšûḇ wəšām^a‘ətā bəqwōl yəhwâ wə‘āśîṯā ’eṯ-kāl-miṣəwōṯāyw ’ăšer ’ānōḵî məṣaûəḵā hayywōm:

9 wəhwōṯîrəḵā yəhwâ ’ĕlōheyḵā bəḵōl| m^a‘ăśēh yāḏeḵā bifərî ḇiṭənəḵā ûḇifərî ḇəhemətəḵā ûḇifərî ’aḏəmāṯəḵā ləṭwōḇâ kî| yāšûḇ yəhwâ lāśûś ‘āleyḵā ləṭwōḇ ka’ăšer-śāś ‘al-’ăḇōṯeyḵā:

10 kî ṯišəm^a‘ bəqwōl yəhwâ ’ĕlōheyḵā lišəmōr miṣəwōṯāyw wəḥuqqōṯāyw hakəṯûḇâ bəsēfer hatwōrâ hazzeh kî ṯāšûḇ ’el-yəhwâ ’ĕlōheyḵā bəḵāl-ləḇāḇəḵā ûḇəḵāl-nafəšeḵā: f

11 kî hammiṣəwâ hazzō’ṯ ’ăšer ’ānōḵî məṣaûəḵā hayywōm lō’-nifəlē’ṯ hiw’ mimməḵā wəlō’ rəḥōqâ hiw’:

12 lō’ ḇaššāmayim hiw’ lē’mōr mî y^a‘ăleh-llānû haššāmayəmâ wəyiqqāḥehā llānû wəyašəmi‘ēnû ’ōṯāh wən^a‘ăśennâ:

13 wəlō’-mē‘ēḇer layyām hiw’ lē’mōr mî y^a‘ăḇār-lānû ’el-‘ēḇer hayyām wəyiqqāḥehā llānû wəyašəmi‘ēnû ’ōṯāh wən^a‘ăśennâ:

14 kî-qārwōḇ ’ēleyḵā hadāḇār mə’ōḏ bəfîḵā ûḇiləḇāḇəḵā l^a‘ăśōṯwō: s

15 rə’ēh nāṯatî ləfāneyḵā hayywōm ’eṯ-h^aḥayyîm wə’eṯ-haṭṭwōḇ wə’eṯ-hammāweṯ wə’eṯ-hārā‘:

16 ’ăšer ’ānōḵî məṣaûəḵā hayywōm lə’ahăḇâ ’eṯ-yəhwâ ’ĕlōheyḵā lāleḵeṯ biḏərāḵāyw wəlišəmōr miṣəwōṯāyw wəḥuqqōṯāyw ûmišəpāṭāyw wəḥāyîṯā wərāḇîṯā ûḇēraḵəḵā yəhwâ ’ĕlōheyḵā bā’āreṣ ’ăšer-’atâ ḇā’-šāmmâ lərišətāh:

17 wə’im-yifəneh ləḇāḇəḵā wəlō’ ṯišəmā‘ wənid^aḥətā wəhišət^aḥăwîṯā lē’lōhîm ’ăḥērîm w^a‘ăḇaḏətām:

18 higaḏətî lāḵem hayywōm kî ’āḇōḏ tō’ḇēḏûn lō’-ṯa’ărîḵun yāmîm ‘al-hā’ăḏāmâ ’ăšer ’atâ ‘ōḇēr ’eṯ-hayyarədēn lāḇō’ šāmmâ lərišətāh:

19 h^a‘îḏōṯî ḇāḵem hayywōm ’eṯ-haššāmayim wə’eṯ-hā’āreṣ h^aḥayyîm wəhammāweṯ nāṯatî ləfāneyḵā habərāḵâ wəhaqqəlālâ ûḇāḥarətā b^aḥayyîm ləm^a‘an tiḥəyeh ’atâ wəzarə‘eḵā:

20 lə’ahăḇâ ’eṯ-yəhwâ ’ĕlōheyḵā lišəmō‘a bəqōlwō ûləḏāḇəqâ-ḇwō kî hû’ ḥayyeyḵā wə’ōreḵə yāmeyḵā lāšeḇeṯ ‘al-hā’ăḏāmâ ’ăšer nišəb^a‘ yəhwâ la’ăḇōṯeyḵā lə’aḇərâām ləyiṣəḥāq ûləy^a‘ăqōḇ lāṯēṯ lâem: f