‎1 ‏וַיֵּ֖לֶךְ מֹשֶׁ֑ה וַיְדַבֵּ֛ר אֶת־הַדְּבָרִ֥ים הָאֵ֖לֶּה אֶל־כָּל־יִשְׂרָאֵֽל׃

‎2 ‏וַיֹּ֣אמֶר אֲלֵהֶ֗ם בֶּן־מֵאָה֩ וְעֶשְׂרִ֨ים שָׁנָ֤ה אָנֹכִי֙ הַיּ֔וֹם לֹא־אוּכַ֥ל ע֖וֹד לָצֵ֣את וְלָב֑וֹא וַֽיהוָה֙ אָמַ֣ר אֵלַ֔י לֹ֥א תַעֲבֹ֖ר אֶת־הַיַּרְדֵּ֥ן הַזֶּֽה׃

‎3 ‏יְהוָ֨ה אֱלֹהֶ֜יךָ ה֣וּא׀ עֹבֵ֣ר לְפָנֶ֗יךָ הֽוּא־יַשְׁמִ֞יד אֶת־הַגּוֹיִ֥ם הָאֵ֛לֶּה מִלְּפָנֶ֖יךָ וִֽירִשְׁתָּ֑ם יְהוֹשֻׁ֗עַ ה֚וּא עֹבֵ֣ר לְפָנֶ֔יךָ כַּאֲשֶׁ֖ר דִּבֶּ֥ר יְהוָֽה׃

‎4 ‏וְעָשָׂ֤ה יְהוָה֙ לָהֶ֔ם כַּאֲשֶׁ֣ר עָשָׂ֗ה לְסִיח֥וֹן וּלְע֛וֹג מַלְכֵ֥י הָאֱמֹרִ֖י וּלְאַרְצָ֑ם אֲשֶׁ֥ר הִשְׁמִ֖יד אֹתָֽם׃

‎5 ‏וּנְתָנָ֥ם יְהוָ֖ה לִפְנֵיכֶ֑ם וַעֲשִׂיתֶ֣ם לָהֶ֔ם כְּכָל־הַמִּצְוָ֔ה אֲשֶׁ֥ר צִוִּ֖יתִי אֶתְכֶֽם׃

‎6 ‏חִזְק֣וּ וְאִמְצ֔וּ אַל־תִּֽירְא֥וּ וְאַל־תַּעַרְצ֖וּ מִפְּנֵיהֶ֑ם כִּ֣י׀ יְהוָ֣ה אֱלֹהֶ֗יךָ ה֚וּא הַהֹלֵ֣ךְ עִמָּ֔ךְ לֹ֥א יַרְפְּךָ֖ וְלֹ֥א יַעַזְבֶֽךָּ׃ פ

‎7 ‏וַיִּקְרָ֨א מֹשֶׁ֜ה לִֽיהוֹשֻׁ֗עַ וַיֹּ֨אמֶר אֵלָ֜יו לְעֵינֵ֣י כָל־יִשְׂרָאֵל֮³ חֲזַ֣ק וֶאֱמָץ֒ כִּ֣י אַתָּ֗ה תָּבוֹא֙ אֶת־הָעָ֣ם הַזֶּ֔ה אֶל־הָאָ֕רֶץ אֲשֶׁ֨ר נִשְׁבַּ֧ע יְהוָ֛ה לַאֲבֹתָ֖ם לָתֵ֣ת לָהֶ֑ם וְאַתָּ֖ה תַּנְחִילֶ֥נָּה אוֹתָֽם׃

‎8 ‏וַֽיהוָ֞ה ה֣וּא׀ הַהֹלֵ֣ךְ לְפָנֶ֗יךָ ה֚וּא יִהְיֶ֣ה עִמָּ֔ךְ לֹ֥א יַרְפְּךָ֖ וְלֹ֣א יַֽעַזְבֶ֑ךָּ לֹ֥א תִירָ֖א וְלֹ֥א תֵחָֽת׃

‎9 ‏וַיִּכְתֹּ֣ב מֹשֶׁה֮ אֶת־הַתּוֹרָ֣ה הַזֹּאת֒ וַֽיִּתְּנָ֗הּ אֶל־הַכֹּהֲנִים֙ בְּנֵ֣י לֵוִ֔י הַנֹּ֣שְׂאִ֔ים אֶת־אֲר֖וֹן בְּרִ֣ית יְהוָ֑ה וְאֶל־כָּל־זִקְנֵ֖י יִשְׂרָאֵֽל׃

‎10 ‏וַיְצַ֥ו מֹשֶׁ֖ה אוֹתָ֣ם לֵאמֹ֑ר מִקֵּ֣ץ׀ שֶׁ֣בַע שָׁנִ֗ים בְּמֹעֵ֛ד שְׁנַ֥ת הַשְּׁמִטָּ֖ה בְּחַ֥ג הַסֻּכּֽוֹת׃

‎11 ‏בְּב֣וֹא כָל־יִשְׂרָאֵ֗ל לֵרָאוֹת֙ אֶת־פְּנֵי֙ יְהוָ֣ה אֱלֹהֶ֔יךָ בַּמָּק֖וֹם אֲשֶׁ֣ר יִבְחָ֑ר תִּקְרָ֞א אֶת־הַתּוֹרָ֥ה הַזֹּ֛את נֶ֥גֶד כָּל־יִשְׂרָאֵ֖ל בְּאָזְנֵיהֶֽם׃

‎12 ‏הַקְהֵ֣ל אֶת־הָעָ֗ם הָֽאֲנָשִׁ֤ים וְהַנָּשִׁים֙ וְהַטַּ֔ף וְגֵרְךָ֖ אֲשֶׁ֣ר בִּשְׁעָרֶ֑יךָ לְמַ֨עַן יִשְׁמְע֜וּ וּלְמַ֣עַן יִלְמְד֗וּ וְיָֽרְאוּ֙ אֶת־יְהוָ֣ה אֱלֹֽהֵיכֶ֔ם וְשָׁמְר֣וּ³ לַעֲשׂ֔וֹת אֶת־כָּל־דִּבְרֵ֖י הַתּוֹרָ֥ה הַזֹּֽאת׃

‎13 ‏וּבְנֵיהֶ֞ם אֲשֶׁ֣ר לֹֽא־יָדְע֗וּ יִשְׁמְעוּ֙ וְלָ֣מְד֔וּ לְיִרְאָ֖ה אֶת־יְהוָ֣ה אֱלֹהֵיכֶ֑ם כָּל־הַיָּמִ֗ים אֲשֶׁ֨ר אַתֶּ֤ם חַיִּים֙ עַל־הָ֣אֲדָמָ֔ה אֲשֶׁ֨ר אַתֶּ֜ם עֹבְרִ֧ים אֶת־הַיַּרְדֵּ֛ן שָׁ֖מָּה לְרִשְׁתָּֽהּ׃ פ

‎14 ‏וַיֹּ֨אמֶר יְהוָ֜ה אֶל־מֹשֶׁ֗ה הֵ֣ן קָרְב֣וּ יָמֶיךָ֮ לָמוּת֒ קְרָ֣א אֶת־יְהוֹשֻׁ֗עַ וְהִֽתְיַצְּב֛וּ בְּאֹ֥הֶל מוֹעֵ֖ד וַאֲצַוֶּ֑נּוּ וַיֵּ֤לֶךְ מֹשֶׁה֙ וִֽיהוֹשֻׁ֔עַ וַיִּֽתְיַצְּב֖וּ בְּאֹ֥הֶל מוֹעֵֽד׃

‎15 ‏וַיֵּרָ֧א יְהוָ֛ה בָּאֹ֖הֶל בְּעַמּ֣וּד עָנָ֑ן וַיַּעֲמֹ֛ד עַמּ֥וּד הֶעָנָ֖ן עַל־פֶּ֥תַח הָאֹֽהֶל׃ ס

‎16 ‏וַיֹּ֤אמֶר יְהוָה֙ אֶל־מֹשֶׁ֔ה הִנְּךָ֥ שֹׁכֵ֖ב עִם־אֲבֹתֶ֑יךָ וְקָם֩ הָעָ֨ם הַזֶּ֜ה וְזָנָ֣ה׀ אַחֲרֵ֣י׀ אֱלֹהֵ֣י נֵֽכַר־הָאָ֗רֶץ אֲשֶׁ֨ר ה֤וּא בָא־שָׁ֙מָּה֙ בְּקִרְבּ֔וֹ וַעֲזָבַ֕נִי וְהֵפֵר֙ אֶת־בְּרִיתִ֔י אֲשֶׁ֥ר כָּרַ֖תִּי אִתּֽוֹ׃

‎17 ‏וְחָרָ֣ה אַפִּ֣י ב֣וֹ בַיּוֹם־הַ֠הוּא וַעֲזַבְתִּ֞ים וְהִסְתַּרְתִּ֨י פָנַ֤י מֵהֶם֙ וְהָיָ֣ה לֶֽאֱכֹ֔ל וּמְצָאֻ֛הוּ רָע֥וֹת רַבּ֖וֹת וְצָר֑וֹת וְאָמַר֙ בַּיּ֣וֹם הַה֔וּא הֲלֹ֗א עַ֣ל כִּֽי־אֵ֤ין אֱלֹהַי֙ בְּקִרְבִּ֔י מְצָא֖וּנִי הָרָע֥וֹת הָאֵֽלֶּה׃

‎18 ‏וְאָנֹכִ֗י הַסְתֵּ֨ר אַסְתִּ֤יר פָּנַי֙ בַּיּ֣וֹם הַה֔וּא עַ֥ל כָּל־הָרָעָ֖ה אֲשֶׁ֣ר עָשָׂ֑ה כִּ֣י פָנָ֔ה אֶל־אֱלֹהִ֖ים אֲחֵרִֽים׃

‎19 ‏וְעַתָּ֗ה כִּתְב֤וּ לָכֶם֙ אֶת־הַשִּׁירָ֣ה הַזֹּ֔את וְלַמְּדָ֥הּ אֶת־בְּנֵי־יִשְׂרָאֵ֖ל שִׂימָ֣הּ בְּפִיהֶ֑ם לְמַ֨עַן תִּהְיֶה־לִּ֜י הַשִּׁירָ֥ה הַזֹּ֛את לְעֵ֖ד בִּבְנֵ֥י יִשְׂרָאֵֽל׃

‎20 ‏כִּֽי־אֲבִיאֶ֜נּוּ אֶֽל־הָאֲדָמָ֣ה׀ אֲשֶׁר־נִשְׁבַּ֣עְתִּי לַאֲבֹתָ֗יו זָבַ֤ת חָלָב֙ וּדְבַ֔שׁ וְאָכַ֥ל וְשָׂבַ֖ע וְדָשֵׁ֑ן וּפָנָ֞ה אֶל־אֱלֹהִ֤ים אֲחֵרִים֙ וַעֲבָד֔וּם וְנִ֣אֲצ֔וּנִי וְהֵפֵ֖ר אֶת־בְּרִיתִֽי׃

‎21 ‏וְ֠הָיָה כִּֽי־תִמְצֶ֨אןָ אֹת֜וֹ רָע֣וֹת רַבּוֹת֮ וְצָרוֹת֒ וְ֠עָנְתָה הַשִּׁירָ֨ה הַזֹּ֤את לְפָנָיו֙ לְעֵ֔ד כִּ֛י לֹ֥א תִשָּׁכַ֖ח מִפִּ֣י זַרְע֑וֹ כִּ֧י יָדַ֣עְתִּי אֶת־יִצְר֗וֹ אֲשֶׁ֨ר ה֤וּא עֹשֶׂה֙ הַיּ֔וֹם בְּטֶ֣רֶם אֲבִיאֶ֔נּוּ אֶל־הָאָ֖רֶץ אֲשֶׁ֥ר נִשְׁבָּֽעְתִּי׃

‎22 ‏וַיִּכְתֹּ֥ב מֹשֶׁ֛ה אֶת־הַשִּׁירָ֥ה הַזֹּ֖את בַּיּ֣וֹם הַה֑וּא וַֽיְלַמְּדָ֖הּ אֶת־בְּנֵ֥י יִשְׂרָאֵֽל׃

‎23 ‏וַיְצַ֞ו אֶת־יְהוֹשֻׁ֣עַ בִּן־נ֗וּן וַיֹּאמֶר֮ חֲזַ֣ק וֶֽאֱמָץ֒ כִּ֣י אַתָּ֗ה תָּבִיא֙ אֶת־בְּנֵ֣י יִשְׂרָאֵ֔ל אֶל־הָאָ֖רֶץ אֲשֶׁר־נִשְׁבַּ֣עְתִּי לָהֶ֑ם וְאָנֹכִ֖י אֶֽהְיֶ֥ה עִמָּֽךְ׃

‎24 ‏וַיְהִ֣י׀ כְּכַלּ֣וֹת מֹשֶׁ֗ה לִכְתֹּ֛ב אֶת־דִּבְרֵ֥י הַתּוֹרָֽה־הַזֹּ֖את עַל־סֵ֑פֶר עַ֖ד תֻּמָּֽם׃

‎25 ‏וַיְצַ֤ו מֹשֶׁה֙ אֶת־הַלְוִיִּ֔ם נֹֽשְׂאֵ֛י¹ אֲר֥וֹן בְּרִית־יְהוָ֖ה לֵאמֹֽר׃

‎26 ‏לָקֹ֗חַ אֵ֣ת סֵ֤פֶר הַתּוֹרָה֙ הַזֶּ֔ה וְשַׂמְתֶּ֣ם אֹת֔וֹ מִצַּ֛ד אֲר֥וֹן בְּרִית־יְהוָ֖ה אֱלֹהֵיכֶ֑ם וְהָֽיָה־שָׁ֥ם בְּךָ֖ לְעֵֽד׃

‎27 ‏כִּ֣י אָנֹכִ֤י יָדַ֙עְתִּי֙ אֶֽת־מֶרְיְךָ֔ וְאֶֽת־עָרְפְּךָ֖ הַקָּשֶׁ֑ה הֵ֣ן בְּעוֹדֶנִּי֩ חַ֨י עִמָּכֶ֜ם הַיּ֗וֹם מַמְרִ֤ים הֱיִתֶם֙ עִם־יְהוָֹ֔ה וְאַ֖ף כִּי־אַחֲרֵ֥י מוֹתִֽי׃

‎28 ‏הַקְהִ֧ילוּ אֵלַ֛י אֶת־כָּל־זִקְנֵ֥י שִׁבְטֵיכֶ֖ם וְשֹׁטְרֵיכֶ֑ם וַאֲדַבְּרָ֣ה בְאָזְנֵיהֶ֗ם אֵ֚ת הַדְּבָרִ֣ים הָאֵ֔לֶּה וְאָעִ֣ידָה בָּ֔ם אֶת־הַשָּׁמַ֖יִם וְאֶת־הָאָֽרֶץ׃

‎29 ‏כִּ֣י יָדַ֗עְתִּי אַחֲרֵ֤י מוֹתִי֙ כִּֽי־הַשְׁחֵ֣ת תַּשְׁחִת֔וּן וְסַרְתֶּ֣ם מִן־הַדֶּ֔רֶךְ אֲשֶׁ֥ר צִוִּ֖יתִי אֶתְכֶ֑ם וְקָרָ֨את אֶתְכֶ֤ם הָֽרָעָה֙ בְּאַחֲרִ֣ית הַיָּמִ֔ים כִּֽי־תַעֲשׂ֤וּ אֶת־הָרַע֙ בְּעֵינֵ֣י יְהוָ֔ה לְהַכְעִיס֖וֹ בְּמַעֲשֵׂ֥ה יְדֵיכֶֽם׃

‎30 ‏וַיְדַבֵּ֣ר מֹשֶׁ֗ה בְּאָזְנֵי֙ כָּל־קְהַ֣ל יִשְׂרָאֵ֔ל אֶת־דִּבְרֵ֥י הַשִּׁירָ֖ה הַזֹּ֑את עַ֖ד תֻּמָּֽם׃ פ

1 wayyēleḵə mōšeh wayəḏabēr ’eṯ-hadəḇārîm hā’ēlleh ’el-kāl-yiśərā’ēl:

2 wayyō’mer ’ălēhem ben-mē’â wə‘eśərîm šānâ ’ānōḵî hayywōm lō’-’ûḵal ‘wōḏ lāṣē’ṯ wəlāḇwō’ wayhwâ ’āmar ’ēlay lō’ ṯ^a‘ăḇōr ’eṯ-hayyarədēn hazzeh:

3 yəhwâ ’ĕlōheyḵā hû’| ‘ōḇēr ləfāneyḵā hû’-yašəmîḏ ’eṯ-hagwōyim hā’ēlleh milləfāneyḵā wîrišətām yəhwōšu‘a hû’ ‘ōḇēr ləfāneyḵā ka’ăšer diber yəhwâ:

4 wə‘āśâ yəhwâ lâem ka’ăšer ‘āśâ ləsîḥwōn ûlə‘wōḡ maləḵê hā’ĕmōrî ûlə’arəṣām ’ăšer hišəmîḏ ’ōṯām:

5 ûnəṯānām yəhwâ lifənêḵem w^a‘ăśîṯem lâem kəḵāl-hammiṣəwâ ’ăšer ṣiûîṯî ’eṯəḵem:

6 ḥizəqû wə’iməṣû ’al-tîrə’û wə’al-t^a‘arəṣû mipənêhem kî| yəhwâ ’ĕlōheyḵā hû’ hahōlēḵə ‘immāḵə lō’ yarəpəḵā wəlō’ y^a‘azəḇeḵḵā: f

7 wayyiqərā’ mōšeh lîhwōšu‘a wayyō’mer ’ēlāyw lə‘ênê ḵāl-yiśərā’ēl³ ḥăzaq we’ĕmāṣ kî ’atâ tāḇwō’ ’eṯ-hā‘ām hazzeh ’el-hā’āreṣ ’ăšer nišəb^a‘ yəhwâ la’ăḇōṯām lāṯēṯ lâem wə’atâ tanəḥîlennâ ’wōṯām:

8 wayhwâ hû’| hahōlēḵə ləfāneyḵā hû’ yihəyeh ‘immāḵə lō’ yarəpəḵā wəlō’ y^a‘azəḇeḵḵā lō’ ṯîrā’ wəlō’ ṯēḥāṯ:

9 wayyiḵətōḇ mōšeh ’eṯ-hatwōrâ hazzō’ṯ wayyitənāh ’el-hakōhănîm bənê lēwî hannōśə’îm ’eṯ-’ărwōn bərîṯ yəhwâ wə’el-kāl-ziqənê yiśərā’ēl:

10 wayəṣaw mōšeh ’wōṯām lē’mōr miqqēṣ| šeḇ^a‘ šānîm bəmō‘ēḏ šənaṯ haššəmiṭṭâ bəḥaḡ hassukwōṯ:

11 bəḇwō’ ḵāl-yiśərā’ēl lērā’wōṯ ’eṯ-pənê yəhwâ ’ĕlōheyḵā bammāqwōm ’ăšer yiḇəḥār tiqərā’ ’eṯ-hatwōrâ hazzō’ṯ neḡeḏ kāl-yiśərā’ēl bə’āzənêhem:

12 haqəhēl ’eṯ-hā‘ām hā’ănāšîm wəhannāšîm wəhaṭṭaf wəḡērəḵā ’ăšer bišə‘āreyḵā ləm^a‘an yišəmə‘û ûləm^a‘an yiləməḏû wəyārə’û ’eṯ-yəhwâ ’ĕlōhêḵem wəšāmərû³ l^a‘ăśwōṯ ’eṯ-kāl-diḇərê hatwōrâ hazzō’ṯ:

13 ûḇənêhem ’ăšer lō’-yāḏə‘û yišəmə‘û wəlāməḏû ləyirə’â ’eṯ-yəhwâ ’ĕlōhêḵem kāl-hayyāmîm ’ăšer ’atem ḥayyîm ‘al-hā’ăḏāmâ ’ăšer ’atem ‘ōḇərîm ’eṯ-hayyarədēn šāmmâ lərišətāh: f

14 wayyō’mer yəhwâ ’el-mōšeh hēn qārəḇû yāmeyḵā lāmûṯ qərā’ ’eṯ-yəhwōšu‘a wəhiṯəyaṣṣəḇû bə’ōhel mwō‘ēḏ wa’ăṣaûennû wayyēleḵə mōšeh wîhwōšu‘a wayyiṯəyaṣṣəḇû bə’ōhel mwō‘ēḏ:

15 wayyērā’ yəhwâ bā’ōhel bə‘ammûḏ ‘ānān wayy^a‘ămōḏ ‘ammûḏ he‘ānān ‘al-peṯ^aḥ hā’ōhel: s

16 wayyō’mer yəhwâ ’el-mōšeh hinnəḵā šōḵēḇ ‘im-’ăḇōṯeyḵā wəqām hā‘ām hazzeh wəzānâ| ’^aḥărê| ’ĕlōhê nēḵar-hā’āreṣ ’ăšer hû’ ḇā’-šāmmâ bəqirəbwō w^a‘ăzāḇanî wəhēfēr ’eṯ-bərîṯî ’ăšer kāratî ’itwō:

17 wəḥārâ ’apî ḇwō ḇayywōm-hahû’ w^a‘ăzaḇətîm wəhisətarətî fānay mēhem wəhāyâ le’ĕḵōl ûməṣā’uhû rā‘wōṯ rabwōṯ wəṣārwōṯ wə’āmar bayywōm hahû’ hălō’ ‘al kî-’ên ’ĕlōhay bəqirəbî məṣā’ûnî hārā‘wōṯ hā’ēlleh:

18 wə’ānōḵî hasətēr ’asətîr pānay bayywōm hahû’ ‘al kāl-hārā‘â ’ăšer ‘āśâ kî fānâ ’el-’ĕlōhîm ’ăḥērîm:

19 wə‘atâ kiṯəḇû lāḵem ’eṯ-haššîrâ hazzō’ṯ wəlamməḏāh ’eṯ-bənê-yiśərā’ēl śîmāh bəfîhem ləm^a‘an tihəyeh-llî haššîrâ hazzō’ṯ lə‘ēḏ biḇənê yiśərā’ēl:

20 kî-’ăḇî’ennû ’el-hā’ăḏāmâ| ’ăšer-nišəb^a‘ətî la’ăḇōṯāyw zāḇaṯ ḥālāḇ ûḏəḇaš wə’āḵal wəśāḇ^a‘ wəḏāšēn ûfānâ ’el-’ĕlōhîm ’ăḥērîm w^a‘ăḇāḏûm wəni’ăṣûnî wəhēfēr ’eṯ-bərîṯî:

21 wəhāyâ kî-ṯiməṣe’nā ’ōṯwō rā‘wōṯ rabwōṯ wəṣārwōṯ wə‘ānəṯâ haššîrâ hazzō’ṯ ləfānāyw lə‘ēḏ kî lō’ ṯiššāḵ^aḥ mipî zarə‘wō kî yāḏ^a‘ətî ’eṯ-yiṣərwō ’ăšer hû’ ‘ōśeh hayywōm bəṭerem ’ăḇî’ennû ’el-hā’āreṣ ’ăšer nišəbā‘ətî:

22 wayyiḵətōḇ mōšeh ’eṯ-haššîrâ hazzō’ṯ bayywōm hahû’ wayəlamməḏāh ’eṯ-bənê yiśərā’ēl:

23 wayəṣaw ’eṯ-yəhwōšu‘a bin-nûn wayyō’mer ḥăzaq we’ĕmāṣ kî ’atâ tāḇî’ ’eṯ-bənê yiśərā’ēl ’el-hā’āreṣ ’ăšer-nišəb^a‘ətî lâem wə’ānōḵî ’ehəyeh ‘immāḵə:

24 wayəhî| kəḵallwōṯ mōšeh liḵətōḇ ’eṯ-diḇərê hatwōrâ-hazzō’ṯ ‘al-sēfer ‘aḏ tummām:

25 wayəṣaw mōšeh ’eṯ-haləwîyim nōśə’ê¹ ’ărwōn bərîṯ-yəhwâ lē’mōr:

26 lāqōḥa ’ēṯ sēfer hatwōrâ hazzeh wəśamətem ’ōṯwō miṣṣaḏ ’ărwōn bərîṯ-yəhwâ ’ĕlōhêḵem wəhāyâ-šām bəḵā lə‘ēḏ:

27 kî ’ānōḵî yāḏ^a‘ətî ’eṯ-merəyəḵā wə’eṯ-‘ārəpəḵā haqqāšeh hēn bə‘wōḏennî ḥay ‘immāḵem hayywōm mamərîm hĕyiṯem ‘im-yəhwōâ wə’af kî-’^aḥărê mwōṯî:

28 haqəhîlû ’ēlay ’eṯ-kāl-ziqənê šiḇəṭêḵem wəšōṭərêḵem wa’ăḏabərâ ḇə’āzənêhem ’ēṯ hadəḇārîm hā’ēlleh wə’ā‘îḏâ bām ’eṯ-haššāmayim wə’eṯ-hā’āreṣ:

29 kî yāḏ^a‘ətî ’^aḥărê mwōṯî kî-hašəḥēṯ tašəḥiṯûn wəsarətem min-hadereḵə ’ăšer ṣiûîṯî ’eṯəḵem wəqārā’ṯ ’eṯəḵem hārā‘â bə’^aḥărîṯ hayyāmîm kî-ṯ^a‘ăśû ’eṯ-hār^a‘ bə‘ênê yəhwâ ləhaḵə‘îswō bəm^a‘ăśēh yəḏêḵem:

30 wayəḏabēr mōšeh bə’āzənê kāl-qəhal yiśərā’ēl ’eṯ-diḇərê haššîrâ hazzō’ṯ ‘aḏ tummām: f