‎1 ‏וַיֹּ֤אמֶר יְהוָה֙ אֶל־מֹשֶׁ֔ה עַתָּ֣ה תִרְאֶ֔ה אֲשֶׁ֥ר אֶֽעֱשֶׂ֖ה לְפַרְעֹ֑ה כִּ֣י בְיָ֤ד חֲזָקָה֙ יְשַׁלְּחֵ֔ם וּבְיָ֣ד חֲזָקָ֔ה יְגָרְשֵׁ֖ם מֵאַרְצֽוֹ׃ ס

‎2 ‏וַיְדַבֵּ֥ר אֱלֹהִ֖ים אֶל־מֹשֶׁ֑ה וַיֹּ֥אמֶר אֵלָ֖יו אֲנִ֥י יְהוָֽה׃

‎3 ‏וָאֵרָ֗א אֶל־אַבְרָהָ֛ם אֶל־יִצְחָ֥ק וְאֶֽל־יַעֲקֹ֖ב בְּאֵ֣ל שַׁדָּ֑י וּשְׁמִ֣י יְהוָ֔ה לֹ֥א נוֹדַ֖עְתִּי לָהֶֽם׃

‎4 ‏וְגַ֨ם הֲקִמֹ֤תִי אֶת־בְּרִיתִי֙ אִתָּ֔ם לָתֵ֥ת לָהֶ֖ם אֶת־אֶ֣רֶץ כְּנָ֑עַן אֵ֛ת אֶ֥רֶץ מְגֻרֵיהֶ֖ם אֲשֶׁר־גָּ֥רוּ בָֽהּ׃

‎5 ‏וְגַ֣ם׀ אֲנִ֣י שָׁמַ֗עְתִּי אֶֽת־נַאֲקַת֙ בְּנֵ֣י יִשְׂרָאֵ֔ל אֲשֶׁ֥ר מִצְרַ֖יִם מַעֲבִדִ֣ים אֹתָ֑ם וָאֶזְכֹּ֖ר אֶת־בְּרִיתִֽי׃

‎6 ‏לָכֵ֞ן אֱמֹ֥ר לִבְנֵֽי־יִשְׂרָאֵל֮³ אֲנִ֣י יְהוָה֒ וְהוֹצֵאתִ֣י אֶתְכֶ֗ם מִתַּ֙חַת֙ סִבְלֹ֣ת מִצְרַ֔יִם וְהִצַּלְתִּ֥י אֶתְכֶ֖ם מֵעֲבֹדָתָ֑ם וְגָאַלְתִּ֤י אֶתְכֶם֙ בִּזְר֣וֹעַ נְטוּיָ֔ה וּבִשְׁפָטִ֖ים גְּדֹלִֽים׃

‎7 ‏וְלָקַחְתִּ֨י אֶתְכֶ֥ם לִי֙ לְעָ֔ם וְהָיִ֥יתִי לָכֶ֖ם לֵֽאלֹהִ֑ים וִֽידַעְתֶּ֗ם כִּ֣י אֲנִ֤י יְהוָה֙ אֱלֹ֣הֵיכֶ֔ם הַמּוֹצִ֣יא אֶתְכֶ֔ם מִתַּ֖חַת סִבְל֥וֹת מִצְרָֽיִם׃

‎8 ‏וְהֵבֵאתִ֤י אֶתְכֶם֙ אֶל־הָאָ֔רֶץ אֲשֶׁ֤ר נָשָׂ֙אתִי֙ אֶת־יָדִ֔י לָתֵ֣ת אֹתָ֔הּ לְאַבְרָהָ֥ם לְיִצְחָ֖ק וּֽלְיַעֲקֹ֑ב וְנָתַתִּ֨י אֹתָ֥הּ לָכֶ֛ם מוֹרָשָׁ֖ה אֲנִ֥י יְהוָֽה׃

‎9 ‏וַיְדַבֵּ֥ר מֹשֶׁ֛ה כֵּ֖ן אֶל־בְּנֵ֣י יִשְׂרָאֵ֑ל וְלֹ֤א שָֽׁמְעוּ֙ אֶל־מֹשֶׁ֔ה מִקֹּ֣צֶר ר֔וּחַ וּמֵעֲבֹדָ֖ה קָשָֽׁה׃ פ

‎10 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎11 ‏בֹּ֣א דַבֵּ֔ר אֶל־פַּרְעֹ֖ה מֶ֣לֶךְ מִצְרָ֑יִם וִֽישַׁלַּ֥ח אֶת־בְּנֵֽי־יִשְׂרָאֵ֖ל מֵאַרְצֽוֹ׃

‎12 ‏וַיְדַבֵּ֣ר מֹשֶׁ֔ה לִפְנֵ֥י יְהוָ֖ה לֵאמֹ֑ר הֵ֤ן בְּנֵֽי־יִשְׂרָאֵל֙ לֹֽא־שָׁמְע֣וּ אֵלַ֔י וְאֵיךְ֙ יִשְׁמָעֵ֣נִי פַרְעֹ֔ה וַאֲנִ֖י עֲרַ֥ל שְׂפָתָֽיִם׃ פ

‎13 ‏וַיְדַבֵּ֣ר יְהוָה֮ אֶל־מֹשֶׁ֣ה וְאֶֽל־אַהֲרֹן֒ וַיְצַוֵּם֙ אֶל־בְּנֵ֣י יִשְׂרָאֵ֔ל וְאֶל־פַּרְעֹ֖ה מֶ֣לֶךְ מִצְרָ֑יִם לְהוֹצִ֥יא אֶת־בְּנֵֽי־יִשְׂרָאֵ֖ל מֵאֶ֥רֶץ מִצְרָֽיִם׃ ס

‎14 ‏אֵ֖לֶּה רָאשֵׁ֣י בֵית־אֲבֹתָ֑ם בְּנֵ֨י רְאוּבֵ֜ן בְּכֹ֣ר יִשְׂרָאֵ֗ל חֲנ֤וֹךְ וּפַלּוּא֙ חֶצְר֣וֹן וְכַרְמִ֔י אֵ֖לֶּה מִשְׁפְּחֹ֥ת רְאוּבֵֽן׃

‎15 ‏וּבְנֵ֣י שִׁמְע֗וֹן יְמוּאֵ֨ל וְיָמִ֤ין וְאֹ֙הַד֙ וְיָכִ֣ין וְצֹ֔חַר וְשָׁא֖וּל בֶּן־הַֽכְּנַעֲנִ֑ית אֵ֖לֶּה מִשְׁפְּחֹ֥ת שִׁמְעֽוֹן׃

‎16 ‏וְאֵ֨לֶּה שְׁמ֤וֹת בְּנֵֽי־לֵוִי֙ לְתֹ֣לְדֹתָ֔ם גֵּרְשׁ֕וֹן וּקְהָ֖ת וּמְרָרִ֑י וּשְׁנֵי֙ חַיֵּ֣י לֵוִ֔י שֶׁ֧בַע וּשְׁלֹשִׁ֛ים וּמְאַ֖ת שָׁנָֽה׃

‎17 ‏בְּנֵ֥י גֵרְשׁ֛וֹן לִבְנִ֥י וְשִׁמְעִ֖י לְמִשְׁפְּחֹתָֽם׃

‎18 ‏וּבְנֵ֣י קְהָ֔ת עַמְרָ֣ם וְיִצְהָ֔ר וְחֶבְר֖וֹן וְעֻזִּיאֵ֑ל וּשְׁנֵי֙ חַיֵּ֣י קְהָ֔ת שָׁלֹ֧שׁ וּשְׁלֹשִׁ֛ים וּמְאַ֖ת שָׁנָֽה׃

‎19 ‏וּבְנֵ֥י מְרָרִ֖י מַחְלִ֣י וּמוּשִׁ֑י אֵ֛לֶּה מִשְׁפְּחֹ֥ת הַלֵּוִ֖י לְתֹלְדֹתָֽם׃

‎20 ‏וַיִּקַּ֨ח עַמְרָ֜ם אֶת־יוֹכֶ֤בֶד דֹּֽדָתוֹ֙ ל֣וֹ לְאִשָּׁ֔ה וַתֵּ֣לֶד ל֔וֹ אֶֽת־אַהֲרֹ֖ן וְאֶת־מֹשֶׁ֑ה וּשְׁנֵי֙ חַיֵּ֣י עַמְרָ֔ם שֶׁ֧בַע וּשְׁלֹשִׁ֛ים וּמְאַ֖ת שָׁנָֽה׃

‎21 ‏וּבְנֵ֖י יִצְהָ֑ר קֹ֥רַח וָנֶ֖פֶג וְזִכְרִֽי׃

‎22 ‏וּבְנֵ֖י עֻזִּיאֵ֑ל מִֽישָׁאֵ֥ל וְאֶלְצָפָ֖ן וְסִתְרִֽי׃

‎23 ‏וַיִּקַּ֨ח³ אַהֲרֹ֜ן אֶת־אֱלִישֶׁ֧בַע בַּת־עַמִּינָדָ֛ב אֲח֥וֹת נַחְשׁ֖וֹן ל֣וֹ לְאִשָּׁ֑ה וַתֵּ֣לֶד ל֗וֹ אֶת־נָדָב֙ וְאֶת־אֲבִיה֔וּא אֶת־אֶלְעָזָ֖ר וְאֶת־אִֽיתָמָֽר׃

‎24 ‏וּבְנֵ֣י קֹ֔רַח אַסִּ֥יר וְאֶלְקָנָ֖ה וַאֲבִיאָסָ֑ף אֵ֖לֶּה מִשְׁפְּחֹ֥ת הַקָּרְחִֽי׃

‎25 ‏וְאֶלְעָזָ֨ר בֶּֽן־אַהֲרֹ֜ן לָקַֽח־ל֨וֹ מִבְּנ֤וֹת פּֽוּטִיאֵל֙ ל֣וֹ לְאִשָּׁ֔ה וַתֵּ֥לֶד ל֖וֹ אֶת־פִּֽינְחָ֑ס אֵ֗לֶּה רָאשֵׁ֛י אֲב֥וֹת הַלְוִיִּ֖ם לְמִשְׁפְּחֹתָֽם׃

‎26 ‏ה֥וּא אַהֲרֹ֖ן וּמֹשֶׁ֑ה אֲשֶׁ֨ר אָמַ֤ר יְהוָה֙ לָהֶ֔ם הוֹצִ֜יאוּ אֶת־בְּנֵ֧י יִשְׂרָאֵ֛ל מֵאֶ֥רֶץ מִצְרַ֖יִם עַל־צִבְאֹתָֽם׃

‎27 ‏הֵ֗ם הַֽמְדַבְּרִים֙ אֶל־פַּרְעֹ֣ה מֶֽלֶךְ־מִצְרַ֔יִם לְהוֹצִ֥יא אֶת־בְּנֵֽי־יִשְׂרָאֵ֖ל מִמִּצְרָ֑יִם ה֥וּא מֹשֶׁ֖ה וְאַהֲרֹֽן׃

‎28 ‏וַיְהִ֗י בְּי֨וֹם דִּבֶּ֧ר יְהוָ֛ה אֶל־מֹשֶׁ֖ה בְּאֶ֥רֶץ מִצְרָֽיִם׃ פ

‎29 ‏וַיְדַבֵּ֧ר יְהוָ֛ה אֶל־מֹשֶׁ֥ה לֵּאמֹ֖ר אֲנִ֣י יְהוָ֑ה דַּבֵּ֗ר אֶל־פַּרְעֹה֙ מֶ֣לֶךְ מִצְרַ֔יִם אֵ֛ת כָּל־אֲשֶׁ֥ר אֲנִ֖י דֹּבֵ֥ר אֵלֶֽיךָ׃

‎30 ‏וַיֹּ֥אמֶר מֹשֶׁ֖ה לִפְנֵ֣י יְהוָ֑ה הֵ֤ן אֲנִי֙ עֲרַ֣ל שְׂפָתַ֔יִם וְאֵ֕יךְ יִשְׁמַ֥ע אֵלַ֖י פַּרְעֹֽה׃ פ

1 wayyō’mer yəhwâ ’el-mōšeh ‘atâ ṯirə’eh ’ăšer ’e‘ĕśeh ləfarə‘ōh kî ḇəyāḏ ḥăzāqâ yəšalləḥēm ûḇəyāḏ ḥăzāqâ yəḡārəšēm mē’arəṣwō: s

2 wayəḏabēr ’ĕlōhîm ’el-mōšeh wayyō’mer ’ēlāyw ’ănî yəhwâ:

3 wā’ērā’ ’el-’aḇərâām ’el-yiṣəḥāq wə’el-y^a‘ăqōḇ bə’ēl šadāy ûšəmî yəhwâ lō’ nwōḏ^a‘ətî lâem:

4 wəḡam hăqimōṯî ’eṯ-bərîṯî ’itām lāṯēṯ lâem ’eṯ-’ereṣ kənā‘an ’ēṯ ’ereṣ məḡurêhem ’ăšer-gārû ḇāh:

5 wəḡam| ’ănî šām^a‘ətî ’eṯ-na’ăqaṯ bənê yiśərā’ēl ’ăšer miṣərayim m^a‘ăḇiḏîm ’ōṯām wā’ezəkōr ’eṯ-bərîṯî:

6 lāḵēn ’ĕmōr liḇənê-yiśərā’ēl³ ’ănî yəhwâ wəhwōṣē’ṯî ’eṯəḵem mit^aḥaṯ siḇəlōṯ miṣərayim wəhiṣṣalətî ’eṯəḵem mē‘ăḇōḏāṯām wəḡā’alətî ’eṯəḵem bizərwō‘a nəṭûyâ ûḇišəfāṭîm gəḏōlîm:

7 wəlāq^aḥətî ’eṯəḵem lî lə‘ām wəhāyîṯî lāḵem lē’lōhîm wîḏ^a‘ətem kî ’ănî yəhwâ ’ĕlōhêḵem hammwōṣî’ ’eṯəḵem mit^aḥaṯ siḇəlwōṯ miṣərāyim:

8 wəhēḇē’ṯî ’eṯəḵem ’el-hā’āreṣ ’ăšer nāśā’ṯî ’eṯ-yāḏî lāṯēṯ ’ōṯāh lə’aḇərâām ləyiṣəḥāq ûləy^a‘ăqōḇ wənāṯatî ’ōṯāh lāḵem mwōrāšâ ’ănî yəhwâ:

9 wayəḏabēr mōšeh kēn ’el-bənê yiśərā’ēl wəlō’ šāmə‘û ’el-mōšeh miqqōṣer rûḥa ûmē‘ăḇōḏâ qāšâ: f

10 wayəḏabēr yəhwâ ’el-mōšeh llē’mōr:

11 bō’ ḏabēr ’el-parə‘ōh meleḵə miṣərāyim wîšall^aḥ ’eṯ-bənê-yiśərā’ēl mē’arəṣwō:

12 wayəḏabēr mōšeh lifənê yəhwâ lē’mōr hēn bənê-yiśərā’ēl lō’-šāmə‘û ’ēlay wə’êḵə yišəmā‘ēnî farə‘ōh wa’ănî ‘ăral śəfāṯāyim: f

13 wayəḏabēr yəhwâ ’el-mōšeh wə’el-’ahărōn wayəṣaûēm ’el-bənê yiśərā’ēl wə’el-parə‘ōh meleḵə miṣərāyim ləhwōṣî’ ’eṯ-bənê-yiśərā’ēl mē’ereṣ miṣərāyim: s

14 ’ēlleh rā’šê ḇêṯ-’ăḇōṯām bənê rə’ûḇēn bəḵōr yiśərā’ēl ḥănwōḵə ûfallû’ ḥeṣərwōn wəḵarəmî ’ēlleh mišəpəḥōṯ rə’ûḇēn:

15 ûḇənê šimə‘wōn yəmû’ēl wəyāmîn wə’ōhaḏ wəyāḵîn wəṣōḥar wəšā’ûl ben-hakən^a‘ănîṯ ’ēlleh mišəpəḥōṯ šimə‘wōn:

16 wə’ēlleh šəmwōṯ bənê-lēwî ləṯōləḏōṯām gērəšwōn ûqəhāṯ ûmərārî ûšənê ḥayyê lēwî šeḇ^a‘ ûšəlōšîm ûmə’aṯ šānâ:

17 bənê ḡērəšwōn liḇənî wəšimə‘î ləmišəpəḥōṯām:

18 ûḇənê qəhāṯ ‘amərām wəyiṣəhār wəḥeḇərwōn wə‘uzzî’ēl ûšənê ḥayyê qəhāṯ šālōš ûšəlōšîm ûmə’aṯ šānâ:

19 ûḇənê mərārî m^aḥəlî ûmûšî ’ēlleh mišəpəḥōṯ hallēwî ləṯōləḏōṯām:

20 wayyiqq^aḥ ‘amərām ’eṯ-ywōḵeḇeḏ dōḏāṯwō lwō lə’iššâ watēleḏ lwō ’eṯ-’ahărōn wə’eṯ-mōšeh ûšənê ḥayyê ‘amərām šeḇ^a‘ ûšəlōšîm ûmə’aṯ šānâ:

21 ûḇənê yiṣəhār qōr^aḥ wānefeḡ wəziḵərî:

22 ûḇənê ‘uzzî’ēl mîšā’ēl wə’eləṣāfān wəsiṯərî:

23 wayyiqq^aḥ³ ’ahărōn ’eṯ-’ĕlîšeḇ^a‘ baṯ-‘ammînāḏāḇ ’ăḥwōṯ n^aḥəšwōn lwō lə’iššâ watēleḏ lwō ’eṯ-nāḏāḇ wə’eṯ-’ăḇîhû’ ’eṯ-’elə‘āzār wə’eṯ-’îṯāmār:

24 ûḇənê qōr^aḥ ’assîr wə’eləqānâ wa’ăḇî’āsāf ’ēlleh mišəpəḥōṯ haqqārəḥî:

25 wə’elə‘āzār ben-’ahărōn lāq^aḥ-lwō mibənwōṯ pûṭî’ēl lwō lə’iššâ watēleḏ lwō ’eṯ-pînəḥās ’ēlleh rā’šê ’ăḇwōṯ haləwîyim ləmišəpəḥōṯām:

26 hû’ ’ahărōn ûmōšeh ’ăšer ’āmar yəhwâ lâem hwōṣî’û ’eṯ-bənê yiśərā’ēl mē’ereṣ miṣərayim ‘al-ṣiḇə’ōṯām:

27 hēm haməḏabərîm ’el-parə‘ōh meleḵə-miṣərayim ləhwōṣî’ ’eṯ-bənê-yiśərā’ēl mimmiṣərāyim hû’ mōšeh wə’ahărōn:

28 wayəhî bəywōm diber yəhwâ ’el-mōšeh bə’ereṣ miṣərāyim: f

29 wayəḏabēr yəhwâ ’el-mōšeh llē’mōr ’ănî yəhwâ dabēr ’el-parə‘ōh meleḵə miṣərayim ’ēṯ kāl-’ăšer ’ănî dōḇēr ’ēleyḵā:

30 wayyō’mer mōšeh lifənê yəhwâ hēn ’ănî ‘ăral śəfāṯayim wə’êḵə yišəm^a‘ ’ēlay parə‘ōh: f