‎1 ‏וַיְדַבֵּ֨ר יְהוָ֤ה אֶל־מֹשֶׁה֙ לֵ֣ךְ עֲלֵ֣ה מִזֶּ֔ה אַתָּ֣ה וְהָעָ֔ם אֲשֶׁ֥ר הֶֽעֱלִ֖יתָ מֵאֶ֣רֶץ מִצְרָ֑יִם אֶל־הָאָ֗רֶץ אֲשֶׁ֣ר נִ֠שְׁבַּעְתִּי לְאַבְרָהָ֨ם לְיִצְחָ֤ק וּֽלְיַעֲקֹב֙ לֵאמֹ֔ר לְזַרְעֲךָ֖ אֶתְּנֶֽנָּה׃

‎2 ‏וְשָׁלַחְתִּ֥י לְפָנֶ֖יךָ מַלְאָ֑ךְ וְגֵֽרַשְׁתִּ֗י אֶת־הַֽכְּנַעֲנִי֙ הָֽאֱמֹרִ֔י וְהַֽחִתִּי֙ וְהַפְּרִזִּ֔י הַחִוִּ֖י וְהַיְבוּסִֽי׃

‎3 ‏אֶל־אֶ֛רֶץ זָבַ֥ת חָלָ֖ב וּדְבָ֑שׁ כִּי֩ לֹ֨א אֶֽעֱלֶ֜ה בְּקִרְבְּךָ֗ כִּ֤י עַם־קְשֵׁה־עֹ֙רֶף֙ אַ֔תָּה פֶּן־אֲכֶלְךָ֖ בַּדָּֽרֶךְ׃

‎4 ‏וַיִּשְׁמַ֣ע הָעָ֗ם אֶת־הַדָּבָ֥ר הָרָ֛ע הַזֶּ֖ה וַיִּתְאַבָּ֑לוּ וְלֹא־שָׁ֛תוּ אִ֥ישׁ עֶדְי֖וֹ עָלָֽיו׃

‎5 ‏וַיֹּ֨אמֶר יְהוָ֜ה אֶל־מֹשֶׁ֗ה אֱמֹ֤ר אֶל־בְּנֵֽי־יִשְׂרָאֵל֙ אַתֶּ֣ם עַם־קְשֵׁה־עֹ֔רֶף רֶ֧גַע אֶחָ֛ד אֶֽעֱלֶ֥ה בְקִרְבְּךָ֖ וְכִלִּיתִ֑יךָ וְעַתָּ֗ה הוֹרֵ֤ד עֶדְיְךָ֙ מֵֽעָלֶ֔יךָ וְאֵדְעָ֖ה מָ֥ה אֶֽעֱשֶׂה־לָּֽךְ׃

‎6 ‏וַיִּֽתְנַצְּל֧וּ בְנֵֽי־יִשְׂרָאֵ֛ל אֶת־עֶדְיָ֖ם מֵהַ֥ר חוֹרֵֽב׃

‎7 ‏וּמֹשֶׁה֩ יִקַּ֨ח אֶת־הָאֹ֜הֶל וְנָֽטָה־ל֣וֹ׀ מִח֣וּץ לַֽמַּחֲנֶ֗ה הַרְחֵק֙ מִן־הַֽמַּחֲנֶ֔ה וְקָ֥רָא ל֖וֹ אֹ֣הֶל מוֹעֵ֑ד וְהָיָה֙ כָּל־מְבַקֵּ֣שׁ יְהוָ֔ה יֵצֵא֙ אֶל־אֹ֣הֶל מוֹעֵ֔ד אֲשֶׁ֖ר מִח֥וּץ לַֽמַּחֲנֶֽה׃

‎8 ‏וְהָיָ֗ה כְּצֵ֤את מֹשֶׁה֙ אֶל־הָאֹ֔הֶל יָק֙וּמוּ֙ כָּל־הָעָ֔ם וְנִ֨צְּב֔וּ אִ֖ישׁ פֶּ֣תַח אָהֳל֑וֹ וְהִבִּ֙יטוּ֙ אַחֲרֵ֣י מֹשֶׁ֔ה עַד־בֹּא֖וֹ הָאֹֽהֱלָה׃

‎9 ‏וְהָיָ֗ה כְּבֹ֤א מֹשֶׁה֙ הָאֹ֔הֱלָה יֵרֵד֙ עַמּ֣וּד הֶֽעָנָ֔ן וְעָמַ֖ד פֶּ֣תַח הָאֹ֑הֶל וְדִבֶּ֖ר עִם־מֹשֶֽׁה׃

‎10 ‏וְרָאָ֤ה כָל־הָעָם֙ אֶת־עַמּ֣וּד הֶֽעָנָ֔ן עֹמֵ֖ד פֶּ֣תַח הָאֹ֑הֶל וְקָ֤ם כָּל־הָעָם֙ וְהִֽשְׁתַּחֲוּ֔וּ¹ אִ֖ישׁ פֶּ֥תַח אָהֳלֽוֹ׃

‎11 ‏וְדִבֶּ֨ר יְהוָ֤ה אֶל־מֹשֶׁה֙ פָּנִ֣ים אֶל־פָּנִ֔ים כַּאֲשֶׁ֛ר יְדַבֵּ֥ר אִ֖ישׁ אֶל־רֵעֵ֑הוּ וְשָׁב֙ אֶל־הַֽמַּחֲנֶ֔ה וּמְשָׁ֨רְת֜וֹ יְהוֹשֻׁ֤עַ בִּן־נוּן֙ נַ֔עַר לֹ֥א יָמִ֖ישׁ מִתּ֥וֹךְ הָאֹֽהֶל׃ ס

‎12 ‏וַיֹּ֨אמֶר מֹשֶׁ֜ה אֶל־יְהוָ֗ה רְ֠אֵה אַתָּ֞ה אֹמֵ֤ר אֵלַי֙ הַ֚עַל אֶת־הָעָ֣ם הַזֶּ֔ה וְאַתָּה֙ לֹ֣א הֽוֹדַעְתַּ֔נִי אֵ֥ת אֲשֶׁר־תִּשְׁלַ֖ח עִמִּ֑י וְאַתָּ֤ה אָמַ֙רְתָּ֙ יְדַעְתִּ֣יךָֽ בְשֵׁ֔ם וְגַם־מָצָ֥אתָ חֵ֖ן בְּעֵינָֽי׃

‎13 ‏וְעַתָּ֡ה אִם־נָא֩ מָצָ֨אתִי חֵ֜ן בְּעֵינֶ֗יךָ הוֹדִעֵ֤נִי נָא֙ אֶת־דְּרָכֶ֔ךָ וְאֵדָ֣עֲךָ֔ לְמַ֥עַן אֶמְצָא־חֵ֖ן בְּעֵינֶ֑יךָ וּרְאֵ֕ה כִּ֥י עַמְּךָ֖ הַגּ֥וֹי הַזֶּֽה׃

‎14 ‏וַיֹּאמַ֑ר פָּנַ֥י יֵלֵ֖כוּ וַהֲנִחֹ֥תִי לָֽךְ׃

‎15 ‏וַיֹּ֖אמֶר אֵלָ֑יו אִם־אֵ֤ין פָּנֶ֙יךָ֙ הֹלְכִ֔ים אַֽל־תַּעֲלֵ֖נוּ מִזֶּֽה׃

‎16 ‏וּבַמֶּ֣ה׀ יִוָּדַ֣ע אֵפ֗וֹא כִּֽי־מָצָ֨אתִי חֵ֤ן בְּעֵינֶ֙יךָ֙ אֲנִ֣י וְעַמֶּ֔ךָ הֲל֖וֹא בְּלֶכְתְּךָ֣ עִמָּ֑נוּ וְנִפְלֵ֙ינוּ֙¹ אֲנִ֣י וְעַמְּךָ֔ מִכָּ֨ל־הָעָ֔ם אֲשֶׁ֖ר עַל־פְּנֵ֥י הָאֲדָמָֽה׃ פ

‎17 ‏וַיֹּ֤אמֶר יְהוָה֙ אֶל־מֹשֶׁ֔ה גַּ֣ם אֶת־הַדָּבָ֥ר הַזֶּ֛ה אֲשֶׁ֥ר דִּבַּ֖רְתָּ אֶֽעֱשֶׂ֑ה כִּֽי־מָצָ֤אתָ חֵן֙ בְּעֵינַ֔י וָאֵדָעֲךָ֖ בְּשֵֽׁם׃

‎18 ‏וַיֹּאמַ֑ר הַרְאֵ֥נִי נָ֖א אֶת־כְּבֹדֶֽךָ׃

‎19 ‏וַיֹּ֗אמֶר אֲנִ֨י אַעֲבִ֤יר כָּל־טוּבִי֙ עַל־פָּנֶ֔יךָ וְקָרָ֧אתִֽי בְשֵׁ֛ם יְהוָ֖ה לְפָנֶ֑יךָ וְחַנֹּתִי֙ אֶת־אֲשֶׁ֣ר אָחֹ֔ן וְרִחַמְתִּ֖י אֶת־אֲשֶׁ֥ר אֲרַחֵֽם׃

‎20 ‏וַיֹּ֕אמֶר לֹ֥א תוּכַ֖ל לִרְאֹ֣ת אֶת־פָּנָ֑י כִּ֛י לֹֽא־יִרְאַ֥נִי הָאָדָ֖ם וָחָֽי׃

‎21 ‏וַיֹּ֣אמֶר יְהוָ֔ה הִנֵּ֥ה מָק֖וֹם אִתִּ֑י וְנִצַּבְתָּ֖ עַל־הַצּֽוּר׃

‎22 ‏וְהָיָה֙ בַּעֲבֹ֣ר כְּבֹדִ֔י וְשַׂמְתִּ֖יךָ בְּנִקְרַ֣ת הַצּ֑וּר וְשַׂכֹּתִ֥י כַפִּ֛י עָלֶ֖יךָ עַד־עָבְרִֽי׃

‎23 ‏וַהֲסִרֹתִי֙ אֶת־כַּפִּ֔י וְרָאִ֖יתָ אֶת־אֲחֹרָ֑י וּפָנַ֖י לֹ֥א יֵרָאֽוּ׃ ס

1 wayəḏabēr yəhwâ ’el-mōšeh lēḵə ‘ălēh mizzeh ’atâ wəhā‘ām ’ăšer he‘ĕlîṯā mē’ereṣ miṣərāyim ’el-hā’āreṣ ’ăšer nišəb^a‘ətî lə’aḇərâām ləyiṣəḥāq ûləy^a‘ăqōḇ lē’mōr ləzarə‘ăḵā ’etənennâ:

2 wəšāl^aḥətî ləfāneyḵā malə’āḵə wəḡērašətî ’eṯ-hakən^a‘ănî hā’ĕmōrî wəh^aḥitî wəhapərizzî h^aḥiûî wəhayəḇûsî:

3 ’el-’ereṣ zāḇaṯ ḥālāḇ ûḏəḇāš kî lō’ ’e‘ĕleh bəqirəbəḵā kî ‘am-qəšēh-‘ōref ’atâ pen-’ăḵeləḵā badāreḵə:

4 wayyišəm^a‘ hā‘ām ’eṯ-hadāḇār hārā‘ hazzeh wayyiṯə’abālû wəlō’-šāṯû ’îš ‘eḏəywō ‘ālāyw:

5 wayyō’mer yəhwâ ’el-mōšeh ’ĕmōr ’el-bənê-yiśərā’ēl ’atem ‘am-qəšēh-‘ōref reḡ^a‘ ’eḥāḏ ’e‘ĕleh ḇəqirəbəḵā wəḵillîṯîḵā wə‘atâ hwōrēḏ ‘eḏəyəḵā mē‘āleyḵā wə’ēḏə‘â mâ ’e‘ĕśeh-llāḵə:

6 wayyiṯənaṣṣəlû ḇənê-yiśərā’ēl ’eṯ-‘eḏəyām mēhar ḥwōrēḇ:

7 ûmōšeh yiqq^aḥ ’eṯ-hā’ōhel wənāṭâ-lwō| miḥûṣ lamm^aḥăneh harəḥēq min-hamm^aḥăneh wəqārā’ lwō ’ōhel mwō‘ēḏ wəhāyâ kāl-məḇaqqēš yəhwâ yēṣē’ ’el-’ōhel mwō‘ēḏ ’ăšer miḥûṣ lamm^aḥăneh:

8 wəhāyâ kəṣē’ṯ mōšeh ’el-hā’ōhel yāqûmû kāl-hā‘ām wəniṣṣəḇû ’îš peṯ^aḥ ’âŏlwō wəhibîṭû ’^aḥărê mōšeh ‘aḏ-bō’wō hā’ōhĕlâ:

9 wəhāyâ kəḇō’ mōšeh hā’ōhĕlâ yērēḏ ‘ammûḏ he‘ānān wə‘āmaḏ peṯ^aḥ hā’ōhel wəḏiber ‘im-mōšeh:

10 wərā’â ḵāl-hā‘ām ’eṯ-‘ammûḏ he‘ānān ‘ōmēḏ peṯ^aḥ hā’ōhel wəqām kāl-hā‘ām wəhišət^aḥăûû¹ ’îš peṯ^aḥ ’âŏlwō:

11 wəḏiber yəhwâ ’el-mōšeh pānîm ’el-pānîm ka’ăšer yəḏabēr ’îš ’el-rē‘ēhû wəšāḇ ’el-hamm^aḥăneh ûməšārəṯwō yəhwōšu‘a bin-nûn n^a‘ar lō’ yāmîš mitwōḵə hā’ōhel: s

12 wayyō’mer mōšeh ’el-yəhwâ rə’ēh ’atâ ’ōmēr ’ēlay h^a‘al ’eṯ-hā‘ām hazzeh wə’atâ lō’ hwōḏ^a‘ətanî ’ēṯ ’ăšer-tišəl^aḥ ‘immî wə’atâ ’āmarətā yəḏ^a‘ətîḵā ḇəšēm wəḡam-māṣā’ṯā ḥēn bə‘ênāy:

13 wə‘atâ ’im-nā’ māṣā’ṯî ḥēn bə‘êneyḵā hwōḏi‘ēnî nā’ ’eṯ-dərāḵeḵā wə’ēḏā‘ăḵā ləm^a‘an ’eməṣā’-ḥēn bə‘êneyḵā ûrə’ēh kî ‘amməḵā hagwōy hazzeh:

14 wayyō’mar pānay yēlēḵû wahăniḥōṯî lāḵə:

15 wayyō’mer ’ēlāyw ’im-’ên pāneyḵā hōləḵîm ’al-t^a‘ălēnû mizzeh:

16 ûḇammeh| yiûāḏ^a‘ ’ēfwō’ kî-māṣā’ṯî ḥēn bə‘êneyḵā ’ănî wə‘ammeḵā hălwō’ bəleḵətəḵā ‘immānû wənifəlênû¹ ’ănî wə‘amməḵā mikāl-hā‘ām ’ăšer ‘al-pənê hā’ăḏāmâ: f

17 wayyō’mer yəhwâ ’el-mōšeh gam ’eṯ-hadāḇār hazzeh ’ăšer dibarətā ’e‘ĕśeh kî-māṣā’ṯā ḥēn bə‘ênay wā’ēḏā‘ăḵā bəšēm:

18 wayyō’mar harə’ēnî nā’ ’eṯ-kəḇōḏeḵā:

19 wayyō’mer ’ănî ’^a‘ăḇîr kāl-ṭûḇî ‘al-pāneyḵā wəqārā’ṯî ḇəšēm yəhwâ ləfāneyḵā wəḥannōṯî ’eṯ-’ăšer ’āḥōn wəriḥamətî ’eṯ-’ăšer ’ăr^aḥēm:

20 wayyō’mer lō’ ṯûḵal lirə’ōṯ ’eṯ-pānāy kî lō’-yirə’anî hā’āḏām wāḥāy:

21 wayyō’mer yəhwâ hinnēh māqwōm ’itî wəniṣṣaḇətā ‘al-haṣṣûr:

22 wəhāyâ b^a‘ăḇōr kəḇōḏî wəśamətîḵā bəniqəraṯ haṣṣûr wəśakōṯî ḵapî ‘āleyḵā ‘aḏ-‘āḇərî:

23 wahăsirōṯî ’eṯ-kapî wərā’îṯā ’eṯ-’ăḥōrāy ûfānay lō’ yērā’û: s