‎1 ‏כִּ֛י נַ֥עַר יִשְׂרָאֵ֖ל וָאֹהֲבֵ֑הוּ וּמִמִּצְרַ֖יִם קָרָ֥אתִי לִבְנִֽי׃

‎2 ‏קָרְא֖וּ לָהֶ֑ם כֵּ֚ן הָלְכ֣וּ מִפְּנֵיהֶ֔ם לַבְּעָלִ֣ים יְזַבֵּ֔חוּ וְלַפְּסִלִ֖ים יְקַטֵּרֽוּן׃

‎3 ‏וְאָנֹכִ֤י תִרְגַּ֙לְתִּי֙ לְאֶפְרַ֔יִם קָחָ֖ם עַל־זְרֽוֹעֹתָ֑יו וְלֹ֥א יָדְע֖וּ כִּ֥י רְפָאתִֽים׃

‎4 ‏בְּחַבְלֵ֨י אָדָ֤ם אֶמְשְׁכֵם֙ בַּעֲבֹת֣וֹת אַהֲבָ֔ה וָאֶהְיֶ֥ה לָהֶ֛ם כִּמְרִ֥ימֵי עֹ֖ל עַ֣ל לְחֵיהֶ֑ם וְאַ֥ט אֵלָ֖יו אוֹכִֽיל׃

‎5 ‏לֹ֤א יָשׁוּב֙ אֶל־אֶ֣רֶץ מִצְרַ֔יִם וְאַשּׁ֖וּר ה֣וּא מַלְכּ֑וֹ כִּ֥י מֵאֲנ֖וּ לָשֽׁוּב׃

‎6 ‏וְחָלָ֥ה חֶ֙רֶב֙ בְּעָרָ֔יו וְכִלְּתָ֥ה בַדָּ֖יו וְאָכָ֑לָה מִֽמֹּעֲצ֖וֹתֵיהֶֽם׃

‎7 ‏וְעַמִּ֥י תְלוּאִ֖ים לִמְשֽׁוּבָתִ֑י וְאֶל־עַל֙ יִקְרָאֻ֔הוּ יַ֖חַד לֹ֥א יְרוֹמֵם׃¹

‎8 ‏אֵ֞יךְ אֶתֶּנְךָ֣ אֶפְרַ֗יִם אֲמַגֶּנְךָ֙ יִשְׂרָאֵ֔ל אֵ֚יךְ אֶתֶּנְךָ֣ כְאַדְמָ֔ה אֲשִֽׂימְךָ֖ כִּצְבֹאיִ֑ם נֶהְפַּ֤ךְ עָלַי֙ לִבִּ֔י יַ֖חַד נִכְמְר֥וּ נִחוּמָֽי׃

‎9 ‏לֹ֤א אֶֽעֱשֶׂה֙ חֲר֣וֹן אַפִּ֔י לֹ֥א אָשׁ֖וּב לְשַׁחֵ֣ת אֶפְרָ֑יִם כִּ֣י אֵ֤ל אָֽנֹכִי֙ וְלֹא־אִ֔ישׁ בְּקִרְבְּךָ֣ קָד֔וֹשׁ וְלֹ֥א אָב֖וֹא בְּעִֽיר׃

‎10 ‏אַחֲרֵ֧י יְהוָ֛ה יֵלְכ֖וּ כְּאַרְיֵ֣ה יִשְׁאָ֑ג כִּֽי־ה֣וּא יִשְׁאַ֔ג וְיֶחֶרְד֥וּ בָנִ֖ים מִיָּֽם׃

‎11 ‏יֶחֶרְד֤וּ כְצִפּוֹר֙ מִמִּצְרַ֔יִם וּכְיוֹנָ֖ה מֵאֶ֣רֶץ אַשּׁ֑וּר וְהוֹשַׁבְתִּ֥ים עַל־בָּתֵּיהֶ֖ם נְאֻם־יְהוָֽה׃ ס

1 kî n^a‘ar yiśərā’ēl wā’ōhăḇēhû ûmimmiṣərayim qārā’ṯî liḇənî:

2 qārə’û lâem kēn hāləḵû mipənêhem labə‘ālîm yəzabēḥû wəlapəsilîm yəqaṭṭērûn:

3 wə’ānōḵî ṯirəgalətî lə’efərayim qāḥām ‘al-zərwō‘ōṯāyw wəlō’ yāḏə‘û kî rəfā’ṯîm:

4 bəḥaḇəlê ’āḏām ’eməšəḵēm b^a‘ăḇōṯwōṯ ’ahăḇâ wā’ehəyeh lâem kimərîmê ‘ōl ‘al ləḥêhem wə’aṭ ’ēlāyw ’wōḵîl:

5 lō’ yāšûḇ ’el-’ereṣ miṣərayim wə’aššûr hû’ maləkwō kî mē’ănû lāšûḇ:

6 wəḥālâ ḥereḇ bə‘ārāyw wəḵilləṯâ ḇadāyw wə’āḵālâ mimmō‘ăṣwōṯêhem:

7 wə‘ammî ṯəlû’îm liməšûḇāṯî wə’el-‘al yiqərā’uhû y^aḥaḏ lō’ yərwōmēm:¹

8 ’êḵə ’etenəḵā ’efərayim ’ămagenəḵā yiśərā’ēl ’êḵə ’etenəḵā ḵə’aḏəmâ ’ăśîməḵā kiṣəḇō’yim nehəpaḵə ‘ālay libî y^aḥaḏ niḵəmərû niḥûmāy:

9 lō’ ’e‘ĕśeh ḥărwōn ’apî lō’ ’āšûḇ ləš^aḥēṯ ’efərāyim kî ’ēl ’ānōḵî wəlō’-’îš bəqirəbəḵā qāḏwōš wəlō’ ’āḇwō’ bə‘îr:

10 ’^aḥărê yəhwâ yēləḵû kə’arəyēh yišə’āḡ kî-hû’ yišə’aḡ wəyeḥerəḏû ḇānîm mîyām:

11 yeḥerəḏû ḵəṣipwōr mimmiṣərayim ûḵəywōnâ mē’ereṣ ’aššûr wəhwōšaḇətîm ‘al-bātêhem nə’um-yəhwâ: s