‎1 ‏וַיְהִ֧י דְבַר־יְהוָ֛ה אֶֽל־יִרְמְיָ֖הוּ שֵׁנִ֑ית וְהוּא֙ עוֹדֶ֣נּוּ עָצ֔וּר בַּחֲצַ֥ר הַמַּטָּרָ֖ה לֵאמֹֽר׃

‎2 ‏כֹּֽה־אָמַ֥ר יְהוָ֖ה עֹשָׂ֑הּ יְהוָ֗ה יוֹצֵ֥ר אוֹתָ֛הּ לַהֲכִינָ֖הּ יְהוָ֥ה שְׁמֽוֹ׃

‎3 ‏קְרָ֥א אֵלַ֖י וְאֶעֱנֶ֑ךָּ וְאַגִּ֧ידָה לְּךָ֛ גְּדֹל֥וֹת וּבְצֻר֖וֹת לֹ֥א יְדַעְתָּֽם׃ ס

‎4 ‏כִּי֩ כֹ֨ה אָמַ֤ר יְהוָה֙ אֱלֹהֵ֣י יִשְׂרָאֵ֔ל עַל־בָּתֵּי֙ הָעִ֣יר הַזֹּ֔את וְעַל־בָּתֵּ֖י מַלְכֵ֣י יְהוּדָ֑ה הַנְּתֻצִ֕ים אֶל־הַסֹּלְל֖וֹת וְאֶל־הֶחָֽרֶב׃

‎5 ‏בָּאִ֗ים לְהִלָּחֵם֙ אֶת־הַכַּשְׂדִּ֔ים וּלְמַלְאָם֙ אֶת־פִּגְרֵ֣י הָאָדָ֔ם אֲשֶׁר־הִכֵּ֥יתִי בְאַפִּ֖י וּבַחֲמָתִ֑י וַאֲשֶׁ֨ר הִסְתַּ֤רְתִּי פָנַי֙ מֵהָעִ֣יר הַזֹּ֔את עַ֖ל כָּל־רָעָתָֽם׃

‎6 ‏הִנְנִ֧י מַעֲלֶה־לָּ֛הּ אֲרֻכָ֥ה וּמַרְפֵּ֖א וּרְפָאתִ֑ים וְגִלֵּיתִ֣י לָהֶ֔ם עֲתֶ֥רֶת שָׁל֖וֹם וֶאֱמֶֽת׃

‎7 ‏וַהֲשִֽׁבֹתִי֙ אֶת־שְׁב֣וּת יְהוּדָ֔ה וְאֵ֖ת שְׁב֣וּת יִשְׂרָאֵ֑ל וּבְנִתִ֖ים כְּבָרִֽאשֹׁנָֽה׃

‎8 ‏וְטִ֣הַרְתִּ֔ים מִכָּל־עֲוֹנָ֖ם אֲשֶׁ֣ר חָֽטְאוּ־לִ֑י וְסָלַחְתִּ֗י לכול־ לְכָל־ עֲוֹנֽוֹתֵיהֶם֙ אֲשֶׁ֣ר חָֽטְאוּ־לִ֔י וַאֲשֶׁ֖ר פָּ֥שְׁעוּ בִֽי׃

‎9 ‏וְהָ֣יְתָה לִּ֗י לְשֵׁ֤ם שָׂשׂוֹן֙ לִתְהִלָּ֣ה וּלְתִפְאֶ֔רֶת לְכֹ֖ל גּוֹיֵ֣י הָאָ֑רֶץ אֲשֶׁ֨ר יִשְׁמְע֜וּ אֶת־כָּל־הַטּוֹבָ֗ה אֲשֶׁ֤ר אָֽנֹכִי֙ עֹשֶׂ֣ה אֹתָ֔ם וּפָחֲד֣וּ וְרָֽגְז֗וּ עַ֤ל כָּל־הַטּוֹבָה֙ וְעַ֣ל כָּל־הַשָּׁל֔וֹם אֲשֶׁ֥ר אָֽנֹכִ֖י עֹ֥שֶׂה לָּֽהּ׃ ס

‎10 ‏כֹּ֣ה׀ אָמַ֣ר יְהוָ֗ה עוֹד֮ יִשָּׁמַ֣ע בַּמָּקוֹם־הַזֶּה֒ אֲשֶׁר֙ אַתֶּ֣ם אֹֽמְרִ֔ים חָרֵ֣ב ה֔וּא מֵאֵ֥ין אָדָ֖ם וּמֵאֵ֣ין בְּהֵמָ֑ה בְּעָרֵ֤י יְהוּדָה֙ וּבְחֻצ֣וֹת יְרוּשָׁלִַ֔ם הַֽנְשַׁמּ֗וֹת מֵאֵ֥ין אָדָ֛ם וּמֵאֵ֥ין יוֹשֵׁ֖ב וּמֵאֵ֥ין בְּהֵמָֽה׃

‎11 ‏ק֣וֹל שָׂשׂ֞וֹן וְק֣וֹל שִׂמְחָ֗ה ק֣וֹל חָתָן֮ וְק֣וֹל כַּלָּה֒ ק֣וֹל אֹמְרִ֡ים הוֹדוּ֩ אֶת־יְהוָ֨ה צְבָא֜וֹת כִּֽי־ט֤וֹב יְהוָה֙ כִּֽי־לְעוֹלָ֣ם חַסְדּ֔וֹ מְבִאִ֥ים תּוֹדָ֖ה בֵּ֣ית יְהוָ֑ה כִּֽי־אָשִׁ֧יב אֶת־שְׁבוּת־הָאָ֛רֶץ כְּבָרִאשֹׁנָ֖ה אָמַ֥ר יְהוָֽה׃ ס

‎12 ‏כֹּֽה־אָמַר֮ יְהוָ֣ה צְבָאוֹת֒ ע֞וֹד יִֽהְיֶ֣ה׀ בַּמָּק֣וֹם הַזֶּ֗ה הֶחָרֵ֛ב מֵֽאֵין־אָדָ֥ם וְעַד־בְּהֵמָ֖ה וּבְכָל־עָרָ֑יו נְוֵ֣ה רֹעִ֔ים מַרְבִּצִ֖ים צֹֽאן׃

‎13 ‏בְּעָרֵ֨י הָהָ֜ר בְּעָרֵ֤י הַשְּׁפֵלָה֙ וּבְעָרֵ֣י הַנֶּ֔גֶב וּבְאֶ֧רֶץ בִּנְיָמִ֛ן וּבִסְבִיבֵ֥י יְרוּשָׁלִַ֖ם וּבְעָרֵ֣י יְהוּדָ֑ה עֹ֣ד תַּעֲבֹ֧רְנָה הַצֹּ֛אן עַל־יְדֵ֥י מוֹנֶ֖ה אָמַ֥ר יְהוָֽה׃ ס

‎14 ‏הִנֵּ֛ה יָמִ֥ים בָּאִ֖ים נְאֻם־יְהוָ֑ה וַהֲקִֽמֹתִי֙ אֶת־הַדָּבָ֣ר הַטּ֔וֹב אֲשֶׁ֥ר דִּבַּ֛רְתִּי אֶל־בֵּ֥ית יִשְׂרָאֵ֖ל וְעַל־בֵּ֥ית יְהוּדָֽה׃

‎15 ‏בַּיָּמִ֤ים הָהֵם֙ וּבָעֵ֣ת הַהִ֔יא אַצְמִ֥יחַ לְדָוִ֖ד צֶ֣מַח צְדָקָ֑ה וְעָשָׂ֛ה מִשְׁפָּ֥ט וּצְדָקָ֖ה בָּאָֽרֶץ׃

‎16 ‏בַּיָּמִ֤ים הָהֵם֙ תִּוָּשַׁ֣ע יְהוּדָ֔ה וִירוּשָׁלִַ֖ם תִּשְׁכּ֣וֹן לָבֶ֑טַח וְזֶ֥ה אֲשֶׁר־יִקְרָא־לָ֖הּ יְהוָ֥ה׀ צִדְקֵֽנוּ׃ ס

‎17 ‏כִּי־כֹ֖ה אָמַ֣ר יְהוָ֑ה לֹֽא־יִכָּרֵ֣ת לְדָוִ֔ד אִ֕ישׁ יֹשֵׁ֖ב עַל־כִּסֵּ֥א בֵֽית־יִשְׂרָאֵֽל׃

‎18 ‏וְלַכֹּהֲנִים֙ הַלְוִיִּ֔ם לֹֽא־יִכָּרֵ֥ת אִ֖ישׁ מִלְּפָנָ֑י מַעֲלֶ֨ה עוֹלָ֜ה וּמַקְטִ֥יר מִנְחָ֛ה וְעֹֽשֶׂה־זֶּ֖בַח³ כָּל־הַיָּמִֽים׃ ס

‎19 ‏וַֽיְהִי֙ דְּבַר־יְהוָ֔ה אֶֽל־יִרְמְיָ֖הוּ לֵאמֽוֹר׃

‎20 ‏כֹּ֚ה אָמַ֣ר יְהוָ֔ה אִם־תָּפֵ֙רוּ֙ אֶת־בְּרִיתִ֣י הַיּ֔וֹם וְאֶת־בְּרִיתִ֖י הַלָּ֑יְלָה וּלְבִלְתִּ֛י הֱי֥וֹת יֽוֹמָם־וָלַ֖יְלָה בְּעִתָּֽם׃

‎21 ‏גַּם־בְּרִיתִ֤י תֻפַר֙ אֶת־דָּוִ֣ד עַבְדִּ֔י מִהְיֽוֹת־ל֥וֹ בֵ֖ן מֹלֵ֣ךְ עַל־כִּסְא֑וֹ וְאֶת־הַלְוִיִּ֥ם הַכֹּהֲנִ֖ים מְשָׁרְתָֽי׃

‎22 ‏אֲשֶׁ֤ר לֹֽא־יִסָּפֵר֙ צְבָ֣א הַשָּׁמַ֔יִם וְלֹ֥א יִמַּ֖ד ח֣וֹל הַיָּ֑ם כֵּ֣ן אַרְבֶּ֗ה אֶת־זֶ֙רַע֙ דָּוִ֣ד עַבְדִּ֔י וְאֶת־הַלְוִיִּ֖ם מְשָׁרְתֵ֥י אֹתִֽי׃ ס

‎23 ‏וַֽיְהִי֙ דְּבַר־יְהוָ֔ה אֶֽל־יִרְמְיָ֖הוּ לֵאמֹֽר׃

‎24 ‏הֲל֣וֹא רָאִ֗יתָ מָֽה־הָעָ֤ם הַזֶּה֙ דִּבְּר֣וּ לֵאמֹ֔ר שְׁתֵּ֣י הַמִּשְׁפָּח֗וֹת אֲשֶׁ֨ר בָּחַ֧ר יְהוָ֛ה בָּהֶ֖ם וַיִּמְאָסֵ֑ם וְאֶת־עַמִּי֙ יִנְאָצ֔וּן מִֽהְי֥וֹת ע֖וֹד גּ֥וֹי לִפְנֵיהֶֽם׃ ס

‎25 ‏כֹּ֚ה אָמַ֣ר יְהוָ֔ה אִם־לֹ֥א בְרִיתִ֖י יוֹמָ֣ם וָלָ֑יְלָה חֻקּ֛וֹת שָׁמַ֥יִם וָאָ֖רֶץ לֹא־שָֽׂמְתִּי׃

‎26 ‏גַּם־זֶ֣רַע יַעֲקוֹב֩ וְדָוִ֨ד עַבְדִּ֜י אֶמְאַ֗ס מִקַּ֤חַת מִזַּרְעוֹ֙ מֹֽשְׁלִ֔ים אֶל־זֶ֥רַע אַבְרָהָ֖ם יִשְׂחָ֣ק וְיַעֲקֹ֑ב כִּֽי־אשוב אָשִׁ֥יב אֶת־שְׁבוּתָ֖ם וְרִחַמְתִּֽים׃ ס

1 wayəhî ḏəḇar-yəhwâ ’el-yirəməyâû šēnîṯ wəhû’ ‘wōḏennû ‘āṣûr b^aḥăṣar hammaṭṭārâ lē’mōr:

2 kōh-’āmar yəhwâ ‘ōśāh yəhwâ ywōṣēr ’wōṯāh lahăḵînāh yəhwâ šəmwō:

3 qərā’ ’ēlay wə’e‘ĕneḵḵā wə’agîḏâ lləḵā gəḏōlwōṯ ûḇəṣurwōṯ lō’ yəḏ^a‘ətām: s

4 kî ḵōh ’āmar yəhwâ ’ĕlōhê yiśərā’ēl ‘al-bātê hā‘îr hazzō’ṯ wə‘al-bātê maləḵê yəhûḏâ hannəṯuṣîm ’el-hassōləlwōṯ wə’el-heḥāreḇ:

5 bā’îm ləhillāḥēm ’eṯ-hakaśədîm ûləmalə’ām ’eṯ-piḡərê hā’āḏām ’ăšer-hikêṯî ḇə’apî ûḇ^aḥămāṯî wa’ăšer hisətarətî fānay mēhā‘îr hazzō’ṯ ‘al kāl-rā‘āṯām:

6 hinənî m^a‘ăleh-llāh ’ăruḵâ ûmarəpē’ ûrəfā’ṯîm wəḡillêṯî lâem ‘ăṯereṯ šālwōm we’ĕmeṯ:

7 wahăšiḇōṯî ’eṯ-šəḇûṯ yəhûḏâ wə’ēṯ šəḇûṯ yiśərā’ēl ûḇəniṯîm kəḇāri’šōnâ:

8 wəṭiharətîm mikāl-‘ăwōnām ’ăšer ḥāṭə’û-lî wəsāl^aḥətî ləḵwōl- ləḵāl- ‘ăwōnwōṯêhem ’ăšer ḥāṭə’û-lî wa’ăšer pāšə‘û ḇî:

9 wəhāyəṯâ llî ləšēm śāśwōn liṯəhillâ ûləṯifə’ereṯ ləḵōl gwōyê hā’āreṣ ’ăšer yišəmə‘û ’eṯ-kāl-haṭṭwōḇâ ’ăšer ’ānōḵî ‘ōśeh ’ōṯām ûfāḥăḏû wərāḡəzû ‘al kāl-haṭṭwōḇâ wə‘al kāl-haššālwōm ’ăšer ’ānōḵî ‘ōśeh llāh: s

10 kōh| ’āmar yəhwâ ‘wōḏ yiššām^a‘ bammāqwōm-hazzeh ’ăšer ’atem ’ōmərîm ḥārēḇ hû’ mē’ên ’āḏām ûmē’ên bəhēmâ bə‘ārê yəhûḏâ ûḇəḥuṣwōṯ yərûšālaim hanəšammwōṯ mē’ên ’āḏām ûmē’ên ywōšēḇ ûmē’ên bəhēmâ:

11 qwōl śāśwōn wəqwōl śiməḥâ qwōl ḥāṯān wəqwōl kallâ qwōl ’ōmərîm hwōḏû ’eṯ-yəhwâ ṣəḇā’wōṯ kî-ṭwōḇ yəhwâ kî-lə‘wōlām ḥasədwō məḇi’îm twōḏâ bêṯ yəhwâ kî-’āšîḇ ’eṯ-šəḇûṯ-hā’āreṣ kəḇāri’šōnâ ’āmar yəhwâ: s

12 kōh-’āmar yəhwâ ṣəḇā’wōṯ ‘wōḏ yihəyeh| bammāqwōm hazzeh heḥārēḇ mē’ên-’āḏām wə‘aḏ-bəhēmâ ûḇəḵāl-‘ārāyw nəwēh rō‘îm marəbiṣîm ṣō’n:

13 bə‘ārê hâār bə‘ārê haššəfēlâ ûḇə‘ārê hanneḡeḇ ûḇə’ereṣ binəyāmin ûḇisəḇîḇê yərûšālaim ûḇə‘ārê yəhûḏâ ‘ōḏ t^a‘ăḇōrənâ haṣṣō’n ‘al-yəḏê mwōneh ’āmar yəhwâ: s

14 hinnēh yāmîm bā’îm nə’um-yəhwâ wahăqimōṯî ’eṯ-hadāḇār haṭṭwōḇ ’ăšer dibarətî ’el-bêṯ yiśərā’ēl wə‘al-bêṯ yəhûḏâ:

15 bayyāmîm hâēm ûḇā‘ēṯ hahî’ ’aṣəmîḥa ləḏāwiḏ ṣem^aḥ ṣəḏāqâ wə‘āśâ mišəpāṭ ûṣəḏāqâ bā’āreṣ:

16 bayyāmîm hâēm tiûāš^a‘ yəhûḏâ wîrûšālaim tišəkwōn lāḇeṭ^aḥ wəzeh ’ăšer-yiqərā’-lāh yəhwâ| ṣiḏəqēnû: s

17 kî-ḵōh ’āmar yəhwâ lō’-yikārēṯ ləḏāwiḏ ’îš yōšēḇ ‘al-kissē’ ḇêṯ-yiśərā’ēl:

18 wəlakōhănîm haləwîyim lō’-yikārēṯ ’îš milləfānāy m^a‘ăleh ‘wōlâ ûmaqəṭîr minəḥâ wə‘ōśeh-zzeḇ^aḥ³ kāl-hayyāmîm: s

19 wayəhî dəḇar-yəhwâ ’el-yirəməyâû lē’mwōr:

20 kōh ’āmar yəhwâ ’im-tāfērû ’eṯ-bərîṯî hayywōm wə’eṯ-bərîṯî hallāyəlâ ûləḇilətî hĕywōṯ ywōmām-wālayəlâ bə‘itām:

21 gam-bərîṯî ṯufar ’eṯ-dāwiḏ ‘aḇədî mihəywōṯ-lwō ḇēn mōlēḵə ‘al-kisə’wō wə’eṯ-haləwîyim hakōhănîm məšārəṯāy:

22 ’ăšer lō’-yissāfēr ṣəḇā’ haššāmayim wəlō’ yimmaḏ ḥwōl hayyām kēn ’arəbeh ’eṯ-zer^a‘ dāwiḏ ‘aḇədî wə’eṯ-haləwîyim məšārəṯê ’ōṯî: s

23 wayəhî dəḇar-yəhwâ ’el-yirəməyâû lē’mōr:

24 hălwō’ rā’îṯā mâ-hā‘ām hazzeh dibərû lē’mōr šətê hammišəpāḥwōṯ ’ăšer bāḥar yəhwâ bâem wayyimə’āsēm wə’eṯ-‘ammî yinə’āṣûn mihəywōṯ ‘wōḏ gwōy lifənêhem: s

25 kōh ’āmar yəhwâ ’im-lō’ ḇərîṯî ywōmām wālāyəlâ ḥuqqwōṯ šāmayim wā’āreṣ lō’-śāmətî:

26 gam-zer^a‘ y^a‘ăqwōḇ wəḏāwiḏ ‘aḇədî ’emə’as miqq^aḥaṯ mizzarə‘wō mōšəlîm ’el-zer^a‘ ’aḇərâām yiśəḥāq wəy^a‘ăqōḇ kî-’āšûḇ ’āšîḇ ’eṯ-šəḇûṯām wəriḥamətîm: s