‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏דַּבֵּ֞ר אֶל־בְּנֵ֣י יִשְׂרָאֵל֮³ לֵאמֹר֒ נֶ֗פֶשׁ כִּֽי־תֶחֱטָ֤א בִשְׁגָגָה֙ מִכֹּל֙ מִצְוֹ֣ת יְהוָ֔ה אֲשֶׁ֖ר לֹ֣א תֵעָשֶׂ֑ינָה וְעָשָׂ֕ה מֵאַחַ֖ת מֵהֵֽנָּה׃

‎3 ‏אִ֣ם הַכֹּהֵ֧ן הַמָּשִׁ֛יחַ יֶחֱטָ֖א לְאַשְׁמַ֣ת הָעָ֑ם וְהִקְרִ֡יב עַ֣ל חַטָּאתוֹ֩ אֲשֶׁ֨ר חָטָ֜א פַּ֣ר בֶּן־בָּקָ֥ר תָּמִ֛ים לַיהוָ֖ה לְחַטָּֽאת׃

‎4 ‏וְהֵבִ֣יא אֶת־הַפָּ֗ר אֶל־פֶּ֛תַח אֹ֥הֶל מוֹעֵ֖ד לִפְנֵ֣י יְהוָ֑ה וְסָמַ֤ךְ אֶת־יָדוֹ֙ עַל־רֹ֣אשׁ הַפָּ֔ר וְשָׁחַ֥ט אֶת־הַפָּ֖ר לִפְנֵ֥י יְהוָֽה׃

‎5 ‏וְלָקַ֛ח הַכֹּהֵ֥ן הַמָּשִׁ֖יחַ מִדַּ֣ם הַפָּ֑ר וְהֵבִ֥יא אֹת֖וֹ אֶל־אֹ֥הֶל מוֹעֵֽד׃

‎6 ‏וְטָבַ֧ל הַכֹּהֵ֛ן אֶת־אֶצְבָּע֖וֹ בַּדָּ֑ם וְהִזָּ֨ה מִן־הַדָּ֜ם שֶׁ֤בַע פְּעָמִים֙ לִפְנֵ֣י יְהוָ֔ה אֶת־פְּנֵ֖י פָּרֹ֥כֶת הַקֹּֽדֶשׁ׃

‎7 ‏וְנָתַן֩ הַכֹּהֵ֨ן מִן־הַדָּ֜ם עַל־קַ֠רְנוֹת מִזְבַּ֨ח קְטֹ֤רֶת הַסַּמִּים֙ לִפְנֵ֣י יְהוָ֔ה אֲשֶׁ֖ר בְּאֹ֣הֶל מוֹעֵ֑ד וְאֵ֣ת׀ כָּל־דַּ֣ם הַפָּ֗ר יִשְׁפֹּךְ֙ אֶל־יְסוֹד֙ מִזְבַּ֣ח הָעֹלָ֔ה אֲשֶׁר־פֶּ֖תַח אֹ֥הֶל מוֹעֵֽד׃

‎8 ‏וְאֶת־כָּל־חֵ֛לֶב פַּ֥ר הַֽחַטָּ֖את יָרִ֣ים מִמֶּ֑נּוּ אֶת־הַחֵ֙לֶב֙ הַֽמְכַסֶּ֣ה עַל־הַקֶּ֔רֶב וְאֵת֙ כָּל־הַחֵ֔לֶב אֲשֶׁ֖ר עַל־הַקֶּֽרֶב׃

‎9 ‏וְאֵת֙ שְׁתֵּ֣י הַכְּלָיֹ֔ת וְאֶת־הַחֵ֙לֶב֙ אֲשֶׁ֣ר עֲלֵיהֶ֔ן אֲשֶׁ֖ר עַל־הַכְּסָלִ֑ים וְאֶת־הַיֹּתֶ֙רֶת֙ עַל־הַכָּבֵ֔ד עַל־הַכְּלָי֖וֹת יְסִירֶֽנָּה׃

‎10 ‏כַּאֲשֶׁ֣ר יוּרַ֔ם מִשּׁ֖וֹר זֶ֣בַח הַשְּׁלָמִ֑ים וְהִקְטִירָם֙ הַכֹּהֵ֔ן עַ֖ל מִזְבַּ֥ח הָעֹלָֽה׃

‎11 ‏וְאֶת־ע֤וֹר הַפָּר֙ וְאֶת־כָּל־בְּשָׂר֔וֹ עַל־רֹאשׁ֖וֹ וְעַל־כְּרָעָ֑יו וְקִרְבּ֖וֹ וּפִרְשֽׁוֹ׃

‎12 ‏וְהוֹצִ֣יא אֶת־כָּל־הַ֠פָּר אֶל־מִח֨וּץ לַֽמַּחֲנֶ֜ה אֶל־מָק֤וֹם טָהוֹר֙ אֶל־שֶׁ֣פֶךְ הַדֶּ֔שֶׁן וְשָׂרַ֥ף אֹת֛וֹ עַל־עֵצִ֖ים בָּאֵ֑שׁ עַל־שֶׁ֥פֶךְ הַדֶּ֖שֶׁן יִשָּׂרֵֽף׃ פ

‎13 ‏וְאִ֨ם כָּל־עֲדַ֤ת יִשְׂרָאֵל֙ יִשְׁגּ֔וּ וְנֶעְלַ֣ם דָּבָ֔ר מֵעֵינֵ֖י הַקָּהָ֑ל וְ֠עָשׂוּ אַחַ֨ת מִכָּל־מִצְוֹ֧ת יְהוָ֛ה אֲשֶׁ֥ר לֹא־תֵעָשֶׂ֖ינָה וְאָשֵֽׁמוּ׃

‎14 ‏וְנֽוֹדְעָה֙ הַֽחַטָּ֔את אֲשֶׁ֥ר חָטְא֖וּ עָלֶ֑יהָ וְהִקְרִ֨יבוּ הַקָּהָ֜ל פַּ֤ר בֶּן־בָּקָר֙ לְחַטָּ֔את וְהֵבִ֣יאוּ אֹת֔וֹ לִפְנֵ֖י אֹ֥הֶל מוֹעֵֽד׃

‎15 ‏וְ֠סָמְכוּ זִקְנֵ֨י הָעֵדָ֧ה אֶת־יְדֵיהֶ֛ם עַל־רֹ֥אשׁ הַפָּ֖ר לִפְנֵ֣י יְהוָ֑ה וְשָׁחַ֥ט אֶת־הַפָּ֖ר לִפְנֵ֥י יְהוָֽה׃

‎16 ‏וְהֵבִ֛יא הַכֹּהֵ֥ן הַמָּשִׁ֖יחַ מִדַּ֣ם הַפָּ֑ר אֶל־אֹ֖הֶל מוֹעֵֽד׃

‎17 ‏וְטָבַ֧ל הַכֹּהֵ֛ן אֶצְבָּע֖וֹ מִן־הַדָּ֑ם וְהִזָּ֞ה שֶׁ֤בַע פְּעָמִים֙ לִפְנֵ֣י יְהוָ֔ה אֵ֖ת פְּנֵ֥י הַפָּרֹֽכֶת׃

‎18 ‏וּמִן־הַדָּ֞ם יִתֵּ֣ן׀ עַל־קַרְנֹ֣ת הַמִּזְבֵּ֗חַ אֲשֶׁר֙ לִפְנֵ֣י יְהוָ֔ה אֲשֶׁ֖ר בְּאֹ֣הֶל מוֹעֵ֑ד וְאֵ֣ת כָּל־הַדָּ֗ם יִשְׁפֹּךְ֙ אֶל־יְסוֹד֙ מִזְבַּ֣ח הָעֹלָ֔ה אֲשֶׁר־פֶּ֖תַח אֹ֥הֶל מוֹעֵֽד׃

‎19 ‏וְאֵ֥ת כָּל־חֶלְבּ֖וֹ יָרִ֣ים מִמֶּ֑נּוּ וְהִקְטִ֖יר הַמִּזְבֵּֽחָה׃

‎20 ‏וְעָשָׂ֣ה לַפָּ֔ר כַּאֲשֶׁ֤ר עָשָׂה֙ לְפַ֣ר הַֽחַטָּ֔את כֵּ֖ן יַעֲשֶׂה־לּ֑וֹ וְכִפֶּ֧ר עֲלֵהֶ֛ם הַכֹּהֵ֖ן וְנִסְלַ֥ח לָהֶֽם׃

‎21 ‏וְהוֹצִ֣יא אֶת־הַפָּ֗ר אֶל־מִחוּץ֙ לַֽמַּחֲנֶ֔ה וְשָׂרַ֣ף אֹת֔וֹ כַּאֲשֶׁ֣ר שָׂרַ֔ף אֵ֖ת הַפָּ֣ר הָרִאשׁ֑וֹן חַטַּ֥את הַקָּהָ֖ל הֽוּא׃ פ

‎22 ‏אֲשֶׁ֥ר נָשִׂ֖יא יֶֽחֱטָ֑א וְעָשָׂ֡ה אַחַ֣ת מִכָּל־מִצְוֹת֩ יְהוָ֨ה אֱלֹהָ֜יו אֲשֶׁ֧ר לֹא־תֵעָשֶׂ֛ינָה בִּשְׁגָגָ֖ה וְאָשֵֽׁם׃

‎23 ‏אֽוֹ־הוֹדַ֤ע אֵלָיו֙ חַטָּאת֔וֹ אֲשֶׁ֥ר חָטָ֖א בָּ֑הּ וְהֵבִ֧יא אֶת־קָרְבָּנ֛וֹ שְׂעִ֥יר עִזִּ֖ים זָכָ֥ר תָּמִֽים׃

‎24 ‏וְסָמַ֤ךְ יָדוֹ֙ עַל־רֹ֣אשׁ הַשָּׂעִ֔יר וְשָׁחַ֣ט אֹת֔וֹ בִּמְק֛וֹם אֲשֶׁר־יִשְׁחַ֥ט אֶת־הָעֹלָ֖ה לִפְנֵ֣י יְהוָ֑ה חַטָּ֖את הֽוּא׃

‎25 ‏וְלָקַ֨ח הַכֹּהֵ֜ן מִדַּ֤ם הַֽחַטָּאת֙ בְּאֶצְבָּע֔וֹ וְנָתַ֕ן עַל־קַרְנֹ֖ת מִזְבַּ֣ח הָעֹלָ֑ה וְאֶת־דָּמ֣וֹ יִשְׁפֹּ֔ךְ אֶל־יְס֖וֹד מִזְבַּ֥ח הָעֹלָֽה׃

‎26 ‏וְאֶת־כָּל־חֶלְבּוֹ֙ יַקְטִ֣יר הַמִּזְבֵּ֔חָה כְּחֵ֖לֶב זֶ֣בַח הַשְּׁלָמִ֑ים וְכִפֶּ֨ר עָלָ֧יו הַכֹּהֵ֛ן מֵחַטָּאת֖וֹ וְנִסְלַ֥ח לֽוֹ׃ פ

‎27 ‏וְאִם־נֶ֧פֶשׁ אַחַ֛ת תֶּחֱטָ֥א בִשְׁגָגָ֖ה מֵעַ֣ם הָאָ֑רֶץ בַּ֠עֲשֹׂתָהּ אַחַ֨ת מִמִּצְוֹ֧ת יְהוָ֛ה אֲשֶׁ֥ר לֹא־תֵעָשֶׂ֖ינָה וְאָשֵֽׁם׃

‎28 ‏א֚וֹ הוֹדַ֣ע אֵלָ֔יו חַטָּאת֖וֹ אֲשֶׁ֣ר חָטָ֑א וְהֵבִ֨יא קָרְבָּנ֜וֹ שְׂעִירַ֤ת עִזִּים֙ תְּמִימָ֣ה נְקֵבָ֔ה עַל־חַטָּאת֖וֹ אֲשֶׁ֥ר חָטָֽא׃

‎29 ‏וְסָמַךְ֙ אֶת־יָד֔וֹ עַ֖ל רֹ֣אשׁ הַֽחַטָּ֑את וְשָׁחַט֙ אֶת־הַ֣חַטָּ֔את בִּמְק֖וֹם הָעֹלָֽה׃

‎30 ‏וְלָקַ֨ח הַכֹּהֵ֤ן מִדָּמָהּ֙ בְּאֶצְבָּע֔וֹ וְנָתַ֕ן עַל־קַרְנֹ֖ת מִזְבַּ֣ח הָעֹלָ֑ה וְאֶת־כָּל־דָּמָ֣הּ יִשְׁפֹּ֔ךְ אֶל־יְס֖וֹד הַמִּזְבֵּֽחַ׃

‎31 ‏וְאֶת־כָּל־חֶלְבָּ֣הּ יָסִ֗יר כַּאֲשֶׁ֨ר הוּסַ֣ר חֵלֶב֮ מֵעַ֣ל זֶ֣בַח הַשְּׁלָמִים֒ וְהִקְטִ֤יר הַכֹּהֵן֙ הַמִּזְבֵּ֔חָה לְרֵ֥יחַ נִיחֹ֖חַ לַיהוָ֑ה וְכִפֶּ֥ר עָלָ֛יו הַכֹּהֵ֖ן וְנִסְלַ֥ח לֽוֹ׃ פ

‎32 ‏וְאִם־כֶּ֛בֶשׂ יָבִ֥יא קָרְבָּנ֖וֹ לְחַטָּ֑את נְקֵבָ֥ה תְמִימָ֖ה יְבִיאֶֽנָּה׃

‎33 ‏וְסָמַךְ֙ אֶת־יָד֔וֹ עַ֖ל רֹ֣אשׁ הַֽחַטָּ֑את וְשָׁחַ֤ט אֹתָהּ֙ לְחַטָּ֔את בִּמְק֕וֹם אֲשֶׁ֥ר יִשְׁחַ֖ט אֶת־הָעֹלָֽה׃

‎34 ‏וְלָקַ֨ח הַכֹּהֵ֜ן מִדַּ֤ם הַֽחַטָּאת֙ בְּאֶצְבָּע֔וֹ וְנָתַ֕ן עַל־קַרְנֹ֖ת מִזְבַּ֣ח הָעֹלָ֑ה וְאֶת־כָּל־דָּמָ֣הּ יִשְׁפֹּ֔ךְ אֶל־יְס֖וֹד הַמִּזְבֵּֽחַ׃

‎35 ‏וְאֶת־כָּל־חֶלְבָּ֣ה יָסִ֗יר כַּאֲשֶׁ֨ר יוּסַ֥ר חֵֽלֶב־הַכֶּשֶׂב֮ מִזֶּ֣בַח הַשְּׁלָמִים֒ וְהִקְטִ֨יר הַכֹּהֵ֤ן אֹתָם֙ הַמִּזְבֵּ֔חָה עַ֖ל אִשֵּׁ֣י יְהוָ֑ה וְכִפֶּ֨ר עָלָ֧יו הַכֹּהֵ֛ן עַל־חַטָּאת֥וֹ אֲשֶׁר־חָטָ֖א וְנִסְלַ֥ח לֽוֹ׃ פ

1 wayəḏabēr yəhwâ ’el-mōšeh llē’mōr:

2 dabēr ’el-bənê yiśərā’ēl³ lē’mōr nefeš kî-ṯeḥĕṭā’ ḇišəḡāḡâ mikōl miṣəwōṯ yəhwâ ’ăšer lō’ ṯē‘āśeynâ wə‘āśâ mē’^aḥaṯ mēhēnnâ:

3 ’im hakōhēn hammāšîḥa yeḥĕṭā’ lə’ašəmaṯ hā‘ām wəhiqərîḇ ‘al ḥaṭṭā’ṯwō ’ăšer ḥāṭā’ par ben-bāqār tāmîm layhwâ ləḥaṭṭā’ṯ:

4 wəhēḇî’ ’eṯ-hapār ’el-peṯ^aḥ ’ōhel mwō‘ēḏ lifənê yəhwâ wəsāmaḵə ’eṯ-yāḏwō ‘al-rō’š hapār wəšāḥaṭ ’eṯ-hapār lifənê yəhwâ:

5 wəlāq^aḥ hakōhēn hammāšîḥa midam hapār wəhēḇî’ ’ōṯwō ’el-’ōhel mwō‘ēḏ:

6 wəṭāḇal hakōhēn ’eṯ-’eṣəbā‘wō badām wəhizzâ min-hadām šeḇ^a‘ pə‘āmîm lifənê yəhwâ ’eṯ-pənê pārōḵeṯ haqqōḏeš:

7 wənāṯan hakōhēn min-hadām ‘al-qarənwōṯ mizəb^aḥ qəṭōreṯ hassammîm lifənê yəhwâ ’ăšer bə’ōhel mwō‘ēḏ wə’ēṯ| kāl-dam hapār yišəpōḵə ’el-yəswōḏ mizəb^aḥ hā‘ōlâ ’ăšer-peṯ^aḥ ’ōhel mwō‘ēḏ:

8 wə’eṯ-kāl-ḥēleḇ par h^aḥaṭṭā’ṯ yārîm mimmennû ’eṯ-h^aḥēleḇ haməḵasseh ‘al-haqqereḇ wə’ēṯ kāl-h^aḥēleḇ ’ăšer ‘al-haqqereḇ:

9 wə’ēṯ šətê hakəlāyōṯ wə’eṯ-h^aḥēleḇ ’ăšer ‘ălêhen ’ăšer ‘al-hakəsālîm wə’eṯ-hayyōṯereṯ ‘al-hakāḇēḏ ‘al-hakəlāywōṯ yəsîrennâ:

10 ka’ăšer yûram miššwōr zeḇ^aḥ haššəlāmîm wəhiqəṭîrām hakōhēn ‘al mizəb^aḥ hā‘ōlâ:

11 wə’eṯ-‘wōr hapār wə’eṯ-kāl-bəśārwō ‘al-rō’šwō wə‘al-kərā‘āyw wəqirəbwō ûfirəšwō:

12 wəhwōṣî’ ’eṯ-kāl-hapār ’el-miḥûṣ lamm^aḥăneh ’el-māqwōm ṭâwōr ’el-šefeḵə hadešen wəśāraf ’ōṯwō ‘al-‘ēṣîm bā’ēš ‘al-šefeḵə hadešen yiśśārēf: f

13 wə’im kāl-‘ăḏaṯ yiśərā’ēl yišəgû wəne‘əlam dāḇār mē‘ênê haqqâāl wə‘āśû ’^aḥaṯ mikāl-miṣəwōṯ yəhwâ ’ăšer lō’-ṯē‘āśeynâ wə’āšēmû:

14 wənwōḏə‘â h^aḥaṭṭā’ṯ ’ăšer ḥāṭə’û ‘āleyhā wəhiqərîḇû haqqâāl par ben-bāqār ləḥaṭṭā’ṯ wəhēḇî’û ’ōṯwō lifənê ’ōhel mwō‘ēḏ:

15 wəsāməḵû ziqənê hā‘ēḏâ ’eṯ-yəḏêhem ‘al-rō’š hapār lifənê yəhwâ wəšāḥaṭ ’eṯ-hapār lifənê yəhwâ:

16 wəhēḇî’ hakōhēn hammāšîḥa midam hapār ’el-’ōhel mwō‘ēḏ:

17 wəṭāḇal hakōhēn ’eṣəbā‘wō min-hadām wəhizzâ šeḇ^a‘ pə‘āmîm lifənê yəhwâ ’ēṯ pənê hapārōḵeṯ:

18 ûmin-hadām yitēn| ‘al-qarənōṯ hammizəbēḥa ’ăšer lifənê yəhwâ ’ăšer bə’ōhel mwō‘ēḏ wə’ēṯ kāl-hadām yišəpōḵə ’el-yəswōḏ mizəb^aḥ hā‘ōlâ ’ăšer-peṯ^aḥ ’ōhel mwō‘ēḏ:

19 wə’ēṯ kāl-ḥeləbwō yārîm mimmennû wəhiqəṭîr hammizəbēḥâ:

20 wə‘āśâ lapār ka’ăšer ‘āśâ ləfar h^aḥaṭṭā’ṯ kēn y^a‘ăśeh-llwō wəḵiper ‘ălēhem hakōhēn wənisəl^aḥ lâem:

21 wəhwōṣî’ ’eṯ-hapār ’el-miḥûṣ lamm^aḥăneh wəśāraf ’ōṯwō ka’ăšer śāraf ’ēṯ hapār hāri’šwōn ḥaṭṭa’ṯ haqqâāl hû’: f

22 ’ăšer nāśî’ yeḥĕṭā’ wə‘āśâ ’^aḥaṯ mikāl-miṣəwōṯ yəhwâ ’ĕlōhāyw ’ăšer lō’-ṯē‘āśeynâ bišəḡāḡâ wə’āšēm:

23 ’wō-hwōḏ^a‘ ’ēlāyw ḥaṭṭā’ṯwō ’ăšer ḥāṭā’ bāh wəhēḇî’ ’eṯ-qārəbānwō śə‘îr ‘izzîm zāḵār tāmîm:

24 wəsāmaḵə yāḏwō ‘al-rō’š haśśā‘îr wəšāḥaṭ ’ōṯwō biməqwōm ’ăšer-yišəḥaṭ ’eṯ-hā‘ōlâ lifənê yəhwâ ḥaṭṭā’ṯ hû’:

25 wəlāq^aḥ hakōhēn midam h^aḥaṭṭā’ṯ bə’eṣəbā‘wō wənāṯan ‘al-qarənōṯ mizəb^aḥ hā‘ōlâ wə’eṯ-dāmwō yišəpōḵə ’el-yəswōḏ mizəb^aḥ hā‘ōlâ:

26 wə’eṯ-kāl-ḥeləbwō yaqəṭîr hammizəbēḥâ kəḥēleḇ zeḇ^aḥ haššəlāmîm wəḵiper ‘ālāyw hakōhēn mēḥaṭṭā’ṯwō wənisəl^aḥ lwō: f

27 wə’im-nefeš ’^aḥaṯ teḥĕṭā’ ḇišəḡāḡâ mē‘am hā’āreṣ b^a‘ăśōṯāh ’^aḥaṯ mimmiṣəwōṯ yəhwâ ’ăšer lō’-ṯē‘āśeynâ wə’āšēm:

28 ’wō hwōḏ^a‘ ’ēlāyw ḥaṭṭā’ṯwō ’ăšer ḥāṭā’ wəhēḇî’ qārəbānwō śə‘îraṯ ‘izzîm təmîmâ nəqēḇâ ‘al-ḥaṭṭā’ṯwō ’ăšer ḥāṭā’:

29 wəsāmaḵə ’eṯ-yāḏwō ‘al rō’š h^aḥaṭṭā’ṯ wəšāḥaṭ ’eṯ-h^aḥaṭṭā’ṯ biməqwōm hā‘ōlâ:

30 wəlāq^aḥ hakōhēn midāmāh bə’eṣəbā‘wō wənāṯan ‘al-qarənōṯ mizəb^aḥ hā‘ōlâ wə’eṯ-kāl-dāmāh yišəpōḵə ’el-yəswōḏ hammizəbēḥa:

31 wə’eṯ-kāl-ḥeləbāh yāsîr ka’ăšer hûsar ḥēleḇ mē‘al zeḇ^aḥ haššəlāmîm wəhiqəṭîr hakōhēn hammizəbēḥâ lərêḥa nîḥōḥa layhwâ wəḵiper ‘ālāyw hakōhēn wənisəl^aḥ lwō: f

32 wə’im-keḇeś yāḇî’ qārəbānwō ləḥaṭṭā’ṯ nəqēḇâ ṯəmîmâ yəḇî’ennâ:

33 wəsāmaḵə ’eṯ-yāḏwō ‘al rō’š h^aḥaṭṭā’ṯ wəšāḥaṭ ’ōṯāh ləḥaṭṭā’ṯ biməqwōm ’ăšer yišəḥaṭ ’eṯ-hā‘ōlâ:

34 wəlāq^aḥ hakōhēn midam h^aḥaṭṭā’ṯ bə’eṣəbā‘wō wənāṯan ‘al-qarənōṯ mizəb^aḥ hā‘ōlâ wə’eṯ-kāl-dāmāh yišəpōḵə ’el-yəswōḏ hammizəbēḥa:

35 wə’eṯ-kāl-ḥeləbâ yāsîr ka’ăšer yûsar ḥēleḇ-hakeśeḇ mizzeḇ^aḥ haššəlāmîm wəhiqəṭîr hakōhēn ’ōṯām hammizəbēḥâ ‘al ’iššê yəhwâ wəḵiper ‘ālāyw hakōhēn ‘al-ḥaṭṭā’ṯwō ’ăšer-ḥāṭā’ wənisəl^aḥ lwō: f