‎1 ‏וַיְהִ֣י אַֽחֲרֵי־כֵ֗ן וּלְאַבְשָׁל֧וֹם בֶּן־דָּוִ֛ד אָח֥וֹת יָפָ֖ה וּשְׁמָ֣הּ תָּמָ֑ר וַיֶּאֱהָבֶ֖הָ אַמְנ֥וֹן בֶּן־דָּוִֽד׃

‎2 ‏וַיֵּ֨צֶר לְאַמְנ֜וֹן לְהִתְחַלּ֗וֹת בַּֽעֲבוּר֙ תָּמָ֣ר אֲחֹת֔וֹ כִּ֥י בְתוּלָ֖ה הִ֑יא וַיִּפָּלֵא֙ בְּעֵינֵ֣י אַמְנ֔וֹן לַעֲשׂ֥וֹת לָ֖הּ מְאֽוּמָה׃

‎3 ‏וּלְאַמְנ֣וֹן רֵ֗עַ וּשְׁמוֹ֙ יֽוֹנָדָ֔ב בֶּן־שִׁמְעָ֖ה אֲחִ֣י דָוִ֑ד וְי֣וֹנָדָ֔ב אִ֥ישׁ חָכָ֖ם מְאֹֽד׃

‎4 ‏וַיֹּ֣אמֶר ל֗וֹ מַדּ֣וּעַ אַ֠תָּה כָּ֣כָה דַּ֤ל בֶּן־הַמֶּ֙לֶךְ֙ בַּבֹּ֣קֶר בַּבֹּ֔קֶר הֲל֖וֹא תַּגִּ֣יד לִ֑י וַיֹּ֤אמֶר לוֹ֙ אַמְנ֔וֹן אֶת־תָּמָ֗ר אֲח֛וֹת אַבְשָׁלֹ֥ם אָחִ֖י אֲנִ֥י אֹהֵֽב׃

‎5 ‏וַיֹּ֤אמֶר לוֹ֙ יְה֣וֹנָדָ֔ב שְׁכַ֥ב עַל־מִשְׁכָּבְךָ֖ וְהִתְחָ֑ל וּבָ֧א אָבִ֣יךָ לִרְאוֹתֶ֗ךָ וְאָמַרְתָּ֣ אֵלָ֡יו תָּ֣בֹא נָא֩ תָמָ֨ר אֲחוֹתִ֜י וְתַבְרֵ֣נִי לֶ֗חֶם וְעָשְׂתָ֤ה לְעֵינַי֙ אֶת־הַבִּרְיָ֔ה לְמַ֙עַן֙ אֲשֶׁ֣ר אֶרְאֶ֔ה וְאָכַלְתִּ֖י מִיָּדָֽהּ׃

‎6 ‏וַיִּשְׁכַּ֥ב אַמְנ֖וֹן וַיִּתְחָ֑ל וַיָּבֹ֨א הַמֶּ֜לֶךְ לִרְאֹת֗וֹ וַיֹּ֨אמֶר אַמְנ֤וֹן אֶל־הַמֶּ֙לֶךְ֙ תָּֽבוֹא־נָ֞א תָּמָ֣ר אֲחֹתִ֗י וּתְלַבֵּ֤ב לְעֵינַי֙ שְׁתֵּ֣י לְבִב֔וֹת וְאֶבְרֶ֖ה מִיָּדָֽהּ׃

‎7 ‏וַיִּשְׁלַ֥ח דָּוִ֛ד אֶל־תָּמָ֖ר הַבַּ֣יְתָה לֵאמֹ֑ר לְכִ֣י נָ֗א בֵּ֚ית אַמְנ֣וֹן אָחִ֔יךְ וַעֲשִׂי־ל֖וֹ הַבִּרְיָֽה׃

‎8 ‏וַתֵּ֣לֶךְ תָּמָ֗ר בֵּ֛ית אַמְנ֥וֹן אָחִ֖יהָ וְה֣וּא שֹׁכֵ֑ב וַתִּקַּ֨ח אֶת־הַבָּצֵ֤ק ותלוש וַתָּ֙לָשׁ֙ וַתְּלַבֵּ֣ב לְעֵינָ֔יו וַתְּבַשֵּׁ֖ל אֶת־הַלְּבִבֽוֹת׃

‎9 ‏וַתִּקַּ֤ח אֶת־הַמַּשְׂרֵת֙ וַתִּצֹ֣ק לְפָנָ֔יו וַיְמָאֵ֖ן לֶאֱכ֑וֹל וַיֹּ֣אמֶר אַמְנ֗וֹן הוֹצִ֤יאוּ כָל־אִישׁ֙ מֵֽעָלַ֔י וַיֵּצְא֥וּ כָל־אִ֖ישׁ מֵעָלָֽיו׃

‎10 ‏וַיֹּ֨אמֶר אַמְנ֜וֹן אֶל־תָּמָ֗ר הָבִ֤יאִי הַבִּרְיָה֙ הַחֶדֶ֔ר וְאֶבְרֶ֖ה מִיָּדֵ֑ךְ וַתִּקַּ֣ח תָּמָ֗ר אֶת־הַלְּבִבוֹת֙ אֲשֶׁ֣ר עָשָׂ֔תָה וַתָּבֵ֛א לְאַמְנ֥וֹן אָחִ֖יהָ הֶחָֽדְרָה׃

‎11 ‏וַתַּגֵּ֥שׁ אֵלָ֖יו לֶֽאֱכֹ֑ל וַיַּֽחֲזֶק־בָּהּ֙ וַיֹּ֣אמֶר לָ֔הּ בּ֛וֹאִי שִׁכְבִ֥י עִמִּ֖י אֲחוֹתִֽי׃

‎12 ‏וַתֹּ֣אמֶר ל֗וֹ אַל־אָחִי֙ אַל־תְּעַנֵּ֔נִי כִּ֛י לֹא־יֵֽעָשֶׂ֥ה כֵ֖ן בְּיִשְׂרָאֵ֑ל אַֽל־תַּעֲשֵׂ֖ה אֶת־הַנְּבָלָ֥ה הַזֹּֽאת׃

‎13 ‏וַאֲנִ֗י אָ֤נָה אוֹלִיךְ֙ אֶת־חֶרְפָּתִ֔י וְאַתָּ֗ה תִּהְיֶ֛ה כְּאַחַ֥ד הַנְּבָלִ֖ים בְּיִשְׂרָאֵ֑ל וְעַתָּה֙ דַּבֶּר־נָ֣א אֶל־הַמֶּ֔לֶךְ כִּ֛י לֹ֥א יִמְנָעֵ֖נִי מִמֶּֽךָּ׃

‎14 ‏וְלֹ֥א אָבָ֖ה לִשְׁמֹ֣עַ בְּקוֹלָ֑הּ וַיֶּחֱזַ֤ק מִמֶּ֙נָּה֙ וַיְעַנֶּ֔הָ וַיִּשְׁכַּ֖ב אֹתָֽהּ׃

‎15 ‏וַיִּשְׂנָאֶ֣הָ אַמְנ֗וֹן שִׂנְאָה֙ גְּדוֹלָ֣ה מְאֹ֔ד כִּ֣י גְדוֹלָ֗ה הַשִּׂנְאָה֙ אֲשֶׁ֣ר שְׂנֵאָ֔הּ מֵאַהֲבָ֖ה אֲשֶׁ֣ר אֲהֵבָ֑הּ וַֽיֹּאמֶר־לָ֥הּ אַמְנ֖וֹן ק֥וּמִי לֵֽכִי׃

‎16 ‏וַתֹּ֣אמֶר ל֗וֹ אַל־אוֹדֹ֞ת הָרָעָ֤ה הַגְּדוֹלָה֙ הַזֹּ֔את מֵאַחֶ֛רֶת אֲשֶׁר־עָשִׂ֥יתָ עִמִּ֖י לְשַׁלְּחֵ֑נִי וְלֹ֥א אָבָ֖ה לִשְׁמֹ֥עַֽ לָֽהּ׃

‎17 ‏וַיִּקְרָ֗א אֶֽת־נַעֲרוֹ֙ מְשָׁ֣רְת֔וֹ וַיֹּ֕אמֶר שִׁלְחוּ־נָ֥א אֶת־זֹ֛את מֵעָלַ֖י הַח֑וּצָה וּנְעֹ֥ל הַדֶּ֖לֶת אַחֲרֶֽיהָ׃

‎18 ‏וְעָלֶ֙יהָ֙ כְּתֹ֣נֶת פַּסִּ֔ים כִּי֩ כֵ֨ן תִּלְבַּ֧שְׁןָ בְנוֹת־הַמֶּ֛לֶךְ הַבְּתוּלֹ֖ת מְעִילִ֑ים וַיֹּצֵ֨א אוֹתָ֤הּ מְשָֽׁרְתוֹ֙ הַח֔וּץ וְנָעַ֥ל הַדֶּ֖לֶת אַחֲרֶֽיהָ׃

‎19 ‏וַתִּקַּ֨ח תָּמָ֥ר אֵ֙פֶר֙ עַל־רֹאשָׁ֔הּ וּכְתֹ֧נֶת הַפַּסִּ֛ים אֲשֶׁ֥ר עָלֶ֖יהָ קָרָ֑עָה וַתָּ֤שֶׂם יָדָהּ֙ עַל־רֹאשָׁ֔הּ וַתֵּ֥לֶךְ הָל֖וֹךְ וְזָעָֽקָה׃

‎20 ‏וַיֹּ֨אמֶר אֵלֶ֜יהָ אַבְשָׁל֣וֹם אָחִ֗יהָ הַאֲמִינ֣וֹן אָחִיךְ֮ הָיָ֣ה עִמָּךְ֒ וְעַתָּ֞ה אֲחוֹתִ֤י הַחֲרִ֙ישִׁי֙ אָחִ֣יךְ ה֔וּא אַל־תָּשִׁ֥יתִי אֶת־לִבֵּ֖ךְ לַדָּבָ֣ר הַזֶּ֑ה וַתֵּ֤שֶׁב תָּמָר֙ וְשֹׁ֣מֵמָ֔ה בֵּ֖ית אַבְשָׁל֥וֹם אָחִֽיהָ׃

‎21 ‏וְהַמֶּ֣לֶךְ דָּוִ֔ד שָׁמַ֕ע אֵ֥ת כָּל־הַדְּבָרִ֖ים הָאֵ֑לֶּה וַיִּ֥חַר ל֖וֹ מְאֹֽד׃

‎22 ‏וְלֹֽא־דִבֶּ֧ר אַבְשָׁל֛וֹם עִם־אַמְנ֖וֹן לְמֵרָ֣ע וְעַד־ט֑וֹב כִּֽי־שָׂנֵ֤א אַבְשָׁלוֹם֙ אֶת־אַמְנ֔וֹן עַל־דְּבַר֙ אֲשֶׁ֣ר עִנָּ֔ה אֵ֖ת תָּמָ֥ר אֲחֹתֽוֹ׃ פ

‎23 ‏וַֽיְהִי֙ לִשְׁנָתַ֣יִם יָמִ֔ים וַיִּהְי֤וּ גֹֽזְזִים֙ לְאַבְשָׁל֔וֹם בְּבַ֥עַל חָצ֖וֹר אֲשֶׁ֣ר עִם־אֶפְרָ֑יִם וַיִּקְרָ֥א אַבְשָׁל֖וֹם לְכָל־בְּנֵ֥י הַמֶּֽלֶךְ׃

‎24 ‏וַיָּבֹ֤א אַבְשָׁלוֹם֙ אֶל־הַמֶּ֔לֶךְ וַיֹּ֕אמֶר הִנֵּה־נָ֥א גֹזְזִ֖ים לְעַבְדֶּ֑ךָ יֵֽלֶךְ־נָ֥א הַמֶּ֛לֶךְ וַעֲבָדָ֖יו עִם־עַבְדֶּֽךָ׃

‎25 ‏וַיֹּ֨אמֶר הַמֶּ֜לֶךְ אֶל־אַבְשָׁל֗וֹם אַל־בְּנִי֙ אַל־נָ֤א נֵלֵךְ֙ כֻּלָּ֔נוּ וְלֹ֥א נִכְבַּ֖ד עָלֶ֑יךָ וַיִּפְרָץ־בּ֛וֹ וְלֹֽא־אָבָ֥ה לָלֶ֖כֶת וַֽיְבָרֲכֵֽהוּ׃

‎26 ‏וַיֹּ֙אמֶר֙ אַבְשָׁל֔וֹם וָלֹ֕א יֵֽלֶךְ־נָ֥א אִתָּ֖נוּ אַמְנ֣וֹן אָחִ֑י וַיֹּ֤אמֶר לוֹ֙ הַמֶּ֔לֶךְ לָ֥מָּה יֵלֵ֖ךְ עִמָּֽךְ׃

‎27 ‏וַיִּפְרָץ־בּ֖וֹ אַבְשָׁל֑וֹם וַיִּשְׁלַ֤ח אִתּוֹ֙ אֶת־אַמְנ֔וֹן וְאֵ֖ת כָּל־בְּנֵ֥י הַמֶּֽלֶךְ׃ ס

‎28 ‏וַיְצַו֩ אַבְשָׁל֨וֹם אֶת־נְעָרָ֜יו לֵאמֹ֗ר רְא֣וּ נָ֠א כְּט֨וֹב לֵב־אַמְנ֤וֹן בַּיַּ֙יִן֙ וְאָמַרְתִּ֣י אֲלֵיכֶ֔ם הַכּ֧וּ אֶת־אַמְנ֛וֹן וַהֲמִתֶּ֥ם אֹת֖וֹ אַל־תִּירָ֑אוּ הֲל֗וֹא כִּ֤י אָֽנֹכִי֙ צִוִּ֣יתִי אֶתְכֶ֔ם חִזְק֖וּ וִהְי֥וּ לִבְנֵי־חָֽיִל׃

‎29 ‏וַֽיַּעֲשׂ֞וּ נַעֲרֵ֤י אַבְשָׁלוֹם֙ לְאַמְנ֔וֹן כַּאֲשֶׁ֥ר צִוָּ֖ה אַבְשָׁל֑וֹם וַיָּקֻ֣מוּ׀ כָּל־בְּנֵ֣י הַמֶּ֗לֶךְ וַֽיִּרְכְּב֛וּ אִ֥ישׁ עַל־פִּרְדּ֖וֹ וַיָּנֻֽסוּ׃

‎30 ‏וַֽיְהִי֙ הֵ֣מָּה בַדֶּ֔רֶךְ וְהַשְּׁמֻעָ֣ה בָ֔אָה אֶל־דָּוִ֖ד לֵאמֹ֑ר הִכָּ֤ה אַבְשָׁלוֹם֙ אֶת־כָּל־בְּנֵ֣י הַמֶּ֔לֶךְ וְלֹֽא־נוֹתַ֥ר מֵהֶ֖ם אֶחָֽד׃ ס

‎31 ‏וַיָּ֧קָם הַמֶּ֛לֶךְ וַיִּקְרַ֥ע אֶת־בְּגָדָ֖יו וַיִּשְׁכַּ֣ב אָ֑רְצָה וְכָל־עֲבָדָ֥יו נִצָּבִ֖ים קְרֻעֵ֥י בְגָדִֽים׃ ס

‎32 ‏וַיַּ֡עַן יוֹנָדָ֣ב׀ בֶּן־שִׁמְעָ֨ה אֲחִֽי־דָוִ֜ד וַיֹּ֗אמֶר אַל־יֹאמַ֤ר אֲדֹנִי֙ אֵ֣ת כָּל־הַנְּעָרִ֤ים בְּנֵֽי־הַמֶּ֙לֶךְ֙ הֵמִ֔יתוּ כִּֽי־אַמְנ֥וֹן לְבַדּ֖וֹ מֵ֑ת כִּֽי־עַל־פִּ֤י אַבְשָׁלוֹם֙ הָיְתָ֣ה שׂוּמָ֔ה מִיּוֹם֙ עַנֹּת֔וֹ אֵ֖ת תָּמָ֥ר אֲחֹתֽוֹ׃

‎33 ‏וְעַתָּ֡ה אַל־יָשֵׂם֩ אֲדֹנִ֨י הַמֶּ֤לֶךְ אֶל־לִבּוֹ֙ דָּבָ֣ר לֵאמֹ֔ר כָּל־בְּנֵ֥י הַמֶּ֖לֶךְ מֵ֑תוּ כִּֽי־אִם־אַמְנ֥וֹן לְבַדּ֖וֹ מֵֽת׃ פ

‎34 ‏וַיִּבְרַ֖ח אַבְשָׁל֑וֹם וַיִּשָּׂ֞א הַנַּ֤עַר הַצֹּפֶה֙ אֶת־עינו עֵינָ֔יו וַיַּ֗רְא וְהִנֵּ֨ה עַם־רַ֜ב הֹלְכִ֥ים מִדֶּ֛רֶךְ אַחֲרָ֖יו מִצַּ֥ד הָהָֽר׃

‎35 ‏וַיֹּ֤אמֶר יֽוֹנָדָב֙ אֶל־הַמֶּ֔לֶךְ הִנֵּ֥ה בְנֵֽי־הַמֶּ֖לֶךְ בָּ֑אוּ כִּדְבַ֥ר עַבְדְּךָ֖ כֵּ֥ן הָיָֽה׃

‎36 ‏וַיְהִ֣י׀ כְּכַלֹּת֣וֹ לְדַבֵּ֗ר וְהִנֵּ֤ה בְנֵֽי־הַמֶּ֙לֶךְ֙ בָּ֔אוּ וַיִּשְׂא֥וּ קוֹלָ֖ם וַיִּבְכּ֑וּ וְגַם־הַמֶּ֙לֶךְ֙ וְכָל־עֲבָדָ֔יו בָּכ֕וּ בְּכִ֖י גָּד֥וֹל מְאֹֽד׃

‎37 ‏וְאַבְשָׁל֣וֹם בָּרַ֔ח וַיֵּ֛לֶךְ אֶל־תַּלְמַ֥י בֶּן־עמיחור עַמִּיה֖וּד מֶ֣לֶךְ גְּשׁ֑וּר וַיִּתְאַבֵּ֥ל עַל־בְּנ֖וֹ כָּל־הַיָּמִֽים׃

‎38 ‏וְאַבְשָׁל֥וֹם בָּרַ֖ח וַיֵּ֣לֶךְ גְּשׁ֑וּר וַיְהִי־שָׁ֖ם שָׁלֹ֥שׁ שָׁנִֽים׃

‎39 ‏וַתְּכַל֙ דָּוִ֣ד הַמֶּ֔לֶךְ לָצֵ֖את אֶל־אַבְשָׁל֑וֹם כִּֽי־נִחַ֥ם עַל־אַמְנ֖וֹן כִּֽי־מֵֽת׃ ס

1 wayəhî ’^aḥărê-ḵēn ûlə’aḇəšālwōm ben-dāwiḏ ’āḥwōṯ yāfâ ûšəmāh tāmār wayye’ĕhāḇehā ’amənwōn ben-dāwiḏ:

2 wayyēṣer lə’amənwōn ləhiṯəḥallwōṯ b^a‘ăḇûr tāmār ’ăḥōṯwō kî ḇəṯûlâ hî’ wayyipālē’ bə‘ênê ’amənwōn l^a‘ăśwōṯ lāh mə’ûmâ:

3 ûlə’amənwōn rē‘a ûšəmwō ywōnāḏāḇ ben-šimə‘â ’ăḥî ḏāwiḏ wəywōnāḏāḇ ’îš ḥāḵām mə’ōḏ:

4 wayyō’mer lwō madû‘a ’atâ kāḵâ dal ben-hammeleḵə babōqer babōqer hălwō’ tagîḏ lî wayyō’mer lwō ’amənwōn ’eṯ-tāmār ’ăḥwōṯ ’aḇəšālōm ’āḥî ’ănî ’ōhēḇ:

5 wayyō’mer lwō yəhwōnāḏāḇ šəḵaḇ ‘al-mišəkāḇəḵā wəhiṯəḥāl ûḇā’ ’āḇîḵā lirə’wōṯeḵā wə’āmarətā ’ēlāyw tāḇō’ nā’ ṯāmār ’ăḥwōṯî wəṯaḇərēnî leḥem wə‘āśəṯâ lə‘ênay ’eṯ-habirəyâ ləm^a‘an ’ăšer ’erə’eh wə’āḵalətî mîyāḏāh:

6 wayyišəkaḇ ’amənwōn wayyiṯəḥāl wayyāḇō’ hammeleḵə lirə’ōṯwō wayyō’mer ’amənwōn ’el-hammeleḵə tāḇwō’-nā’ tāmār ’ăḥōṯî ûṯəlabēḇ lə‘ênay šətê ləḇiḇwōṯ wə’eḇəreh mîyāḏāh:

7 wayyišəl^aḥ dāwiḏ ’el-tāmār habayəṯâ lē’mōr ləḵî nā’ bêṯ ’amənwōn ’āḥîḵə w^a‘ăśî-lwō habirəyâ:

8 watēleḵə tāmār bêṯ ’amənwōn ’āḥîhā wəhû’ šōḵēḇ watiqq^aḥ ’eṯ-habāṣēq watālwōš watālāš watəlabēḇ lə‘ênāyw watəḇaššēl ’eṯ-halləḇiḇwōṯ:

9 watiqq^aḥ ’eṯ-hammaśərēṯ watiṣōq ləfānāyw wayəmā’ēn le’ĕḵwōl wayyō’mer ’amənwōn hwōṣî’û ḵāl-’îš mē‘ālay wayyēṣə’û ḵāl-’îš mē‘ālāyw:

10 wayyō’mer ’amənwōn ’el-tāmār hāḇî’î habirəyâ h^aḥeḏer wə’eḇəreh mîyāḏēḵə watiqq^aḥ tāmār ’eṯ-halləḇiḇwōṯ ’ăšer ‘āśāṯâ watāḇē’ lə’amənwōn ’āḥîhā heḥāḏərâ:

11 watagēš ’ēlāyw le’ĕḵōl wayy^aḥăzeq-bāh wayyō’mer lāh bwō’î šiḵəḇî ‘immî ’ăḥwōṯî:

12 watō’mer lwō ’al-’āḥî ’al-tə‘annēnî kî lō’-yē‘āśeh ḵēn bəyiśərā’ēl ’al-t^a‘ăśēh ’eṯ-hannəḇālâ hazzō’ṯ:

13 wa’ănî ’ānâ ’wōlîḵə ’eṯ-ḥerəpāṯî wə’atâ tihəyeh kə’^aḥaḏ hannəḇālîm bəyiśərā’ēl wə‘atâ daber-nā’ ’el-hammeleḵə kî lō’ yimənā‘ēnî mimmeḵḵā:

14 wəlō’ ’āḇâ lišəmō‘a bəqwōlāh wayyeḥĕzaq mimmennâ wayə‘annehā wayyišəkaḇ ’ōṯāh:

15 wayyiśənā’ehā ’amənwōn śinə’â gəḏwōlâ mə’ōḏ kî ḡəḏwōlâ haśśinə’â ’ăšer śənē’āh mē’ahăḇâ ’ăšer ’ăhēḇāh wayyō’mer-lāh ’amənwōn qûmî lēḵî:

16 watō’mer lwō ’al-’wōḏōṯ hārā‘â hagəḏwōlâ hazzō’ṯ mē’^aḥereṯ ’ăšer-‘āśîṯā ‘immî ləšalləḥēnî wəlō’ ’āḇâ lišəmō‘a lāh:

17 wayyiqərā’ ’eṯ-n^a‘ărwō məšārəṯwō wayyō’mer šiləḥû-nā’ ’eṯ-zō’ṯ mē‘ālay h^aḥûṣâ ûnə‘ōl hadeleṯ ’^aḥăreyhā:

18 wə‘āleyhā kəṯōneṯ passîm kî ḵēn tiləbašənā ḇənwōṯ-hammeleḵə habəṯûlōṯ mə‘îlîm wayyōṣē’ ’wōṯāh məšārəṯwō h^aḥûṣ wənā‘al hadeleṯ ’^aḥăreyhā:

19 watiqq^aḥ tāmār ’ēfer ‘al-rō’šāh ûḵəṯōneṯ hapassîm ’ăšer ‘āleyhā qārā‘â watāśem yāḏāh ‘al-rō’šāh watēleḵə hālwōḵə wəzā‘āqâ:

20 wayyō’mer ’ēleyhā ’aḇəšālwōm ’āḥîhā ha’ămînwōn ’āḥîḵə hāyâ ‘immāḵə wə‘atâ ’ăḥwōṯî h^aḥărîšî ’āḥîḵə hû’ ’al-tāšîṯî ’eṯ-libēḵə ladāḇār hazzeh watēšeḇ tāmār wəšōmēmâ bêṯ ’aḇəšālwōm ’āḥîhā:

21 wəhammeleḵə dāwiḏ šām^a‘ ’ēṯ kāl-hadəḇārîm hā’ēlleh wayyiḥar lwō mə’ōḏ:

22 wəlō’-ḏiber ’aḇəšālwōm ‘im-’amənwōn ləmērā‘ wə‘aḏ-ṭwōḇ kî-śānē’ ’aḇəšālwōm ’eṯ-’amənwōn ‘al-dəḇar ’ăšer ‘innâ ’ēṯ tāmār ’ăḥōṯwō: f

23 wayəhî lišənāṯayim yāmîm wayyihəyû ḡōzəzîm lə’aḇəšālwōm bəḇ^a‘al ḥāṣwōr ’ăšer ‘im-’efərāyim wayyiqərā’ ’aḇəšālwōm ləḵāl-bənê hammeleḵə:

24 wayyāḇō’ ’aḇəšālwōm ’el-hammeleḵə wayyō’mer hinnēh-nā’ ḡōzəzîm lə‘aḇədeḵā yēleḵə-nā’ hammeleḵə w^a‘ăḇāḏāyw ‘im-‘aḇədeḵā:

25 wayyō’mer hammeleḵə ’el-’aḇəšālwōm ’al-bənî ’al-nā’ nēlēḵə kullānû wəlō’ niḵəbaḏ ‘āleyḵā wayyifərāṣ-bwō wəlō’-’āḇâ lāleḵeṯ wayəḇārăḵēhû:

26 wayyō’mer ’aḇəšālwōm wālō’ yēleḵə-nā’ ’itānû ’amənwōn ’āḥî wayyō’mer lwō hammeleḵə lāmmâ yēlēḵə ‘immāḵə:

27 wayyifərāṣ-bwō ’aḇəšālwōm wayyišəl^aḥ ’itwō ’eṯ-’amənwōn wə’ēṯ kāl-bənê hammeleḵə: s

28 wayəṣaw ’aḇəšālwōm ’eṯ-nə‘ārāyw lē’mōr rə’û nā’ kəṭwōḇ lēḇ-’amənwōn bayyayin wə’āmarətî ’ălêḵem hakû ’eṯ-’amənwōn wahămitem ’ōṯwō ’al-tîrā’û hălwō’ kî ’ānōḵî ṣiûîṯî ’eṯəḵem ḥizəqû wihəyû liḇənê-ḥāyil:

29 wayy^a‘ăśû n^a‘ărê ’aḇəšālwōm lə’amənwōn ka’ăšer ṣiûâ ’aḇəšālwōm wayyāqumû| kāl-bənê hammeleḵə wayyirəkəḇû ’îš ‘al-pirədwō wayyānusû:

30 wayəhî hēmmâ ḇadereḵə wəhaššəmu‘â ḇā’â ’el-dāwiḏ lē’mōr hikâ ’aḇəšālwōm ’eṯ-kāl-bənê hammeleḵə wəlō’-nwōṯar mēhem ’eḥāḏ: s

31 wayyāqām hammeleḵə wayyiqər^a‘ ’eṯ-bəḡāḏāyw wayyišəkaḇ ’ārəṣâ wəḵāl-‘ăḇāḏāyw niṣṣāḇîm qəru‘ê ḇəḡāḏîm: s

32 wayy^a‘an ywōnāḏāḇ| ben-šimə‘â ’ăḥî-ḏāwiḏ wayyō’mer ’al-yō’mar ’ăḏōnî ’ēṯ kāl-hannə‘ārîm bənê-hammeleḵə hēmîṯû kî-’amənwōn ləḇadwō mēṯ kî-‘al-pî ’aḇəšālwōm hāyəṯâ śûmâ mîywōm ‘annōṯwō ’ēṯ tāmār ’ăḥōṯwō:

33 wə‘atâ ’al-yāśēm ’ăḏōnî hammeleḵə ’el-libwō dāḇār lē’mōr kāl-bənê hammeleḵə mēṯû kî-’im-’amənwōn ləḇadwō mēṯ: f

34 wayyiḇər^aḥ ’aḇəšālwōm wayyiśśā’ hann^a‘ar haṣṣōfeh ’eṯ-‘ênāw ‘ênāyw wayyarə’ wəhinnēh ‘am-raḇ hōləḵîm midereḵə ’^aḥărāyw miṣṣaḏ hâār:

35 wayyō’mer ywōnāḏāḇ ’el-hammeleḵə hinnēh ḇənê-hammeleḵə bā’û kiḏəḇar ‘aḇədəḵā kēn hāyâ:

36 wayəhî| kəḵallōṯwō ləḏabēr wəhinnēh ḇənê-hammeleḵə bā’û wayyiśə’û qwōlām wayyiḇəkû wəḡam-hammeleḵə wəḵāl-‘ăḇāḏāyw bāḵû bəḵî gāḏwōl mə’ōḏ:

37 wə’aḇəšālwōm bār^aḥ wayyēleḵə ’el-taləmay ben-‘ammîḥûr ‘ammîhûḏ meleḵə gəšûr wayyiṯə’abēl ‘al-bənwō kāl-hayyāmîm:

38 wə’aḇəšālwōm bār^aḥ wayyēleḵə gəšûr wayəhî-šām šālōš šānîm:

39 watəḵal dāwiḏ hammeleḵə lāṣē’ṯ ’el-’aḇəšālwōm kî-niḥam ‘al-’amənwōn kî-mēṯ: s