‎1 ‏וַיֵּ֖דַע יוֹאָ֣ב בֶּן־צְרֻיָ֑ה כִּֽי־לֵ֥ב הַמֶּ֖לֶךְ עַל־אַבְשָׁלֽוֹם׃

‎2 ‏וַיִּשְׁלַ֤ח יוֹאָב֙ תְּק֔וֹעָה וַיִּקַּ֥ח מִשָּׁ֖ם אִשָּׁ֣ה חֲכָמָ֑ה וַיֹּ֣אמֶר אֵ֠לֶיהָ הִֽתְאַבְּלִי־נָ֞א וְלִבְשִׁי־נָ֣א בִגְדֵי־אֵ֗בֶל וְאַל־תָּס֙וּכִי֙ שֶׁ֔מֶן וְהָיִ֕ית כְּאִשָּׁ֗ה זֶ֚ה יָמִ֣ים רַבִּ֔ים מִתְאַבֶּ֖לֶת עַל־מֵֽת׃

‎3 ‏וּבָאת֙ אֶל־הַמֶּ֔לֶךְ וְדִבַּ֥רְתְּ אֵלָ֖יו כַּדָּבָ֣ר הַזֶּ֑ה וַיָּ֧שֶׂם יוֹאָ֛ב אֶת־הַדְּבָרִ֖ים בְּפִֽיהָ׃

‎4 ‏וַ֠תֹּאמֶר הָאִשָּׁ֤ה הַתְּקֹעִית֙ אֶל־הַמֶּ֔לֶךְ וַתִּפֹּ֧ל עַל־אַפֶּ֛יהָ אַ֖רְצָה וַתִּשְׁתָּ֑חוּ וַתֹּ֖אמֶר הוֹשִׁ֥עָה הַמֶּֽלֶךְ׃ ס

‎5 ‏וַיֹּֽאמֶר־לָ֥הּ הַמֶּ֖לֶךְ מַה־לָּ֑ךְ וַתֹּ֗אמֶר אֲבָ֛ל אִשָּֽׁה־אַלְמָנָ֥ה אָ֖נִי וַיָּ֥מָת אִישִֽׁי׃

‎6 ‏וּלְשִׁפְחָֽתְךָ֙ שְׁנֵ֣י בָנִ֔ים וַיִּנָּצ֤וּ שְׁנֵיהֶם֙ בַּשָּׂדֶ֔ה וְאֵ֥ין מַצִּ֖יל בֵּֽינֵיהֶ֑ם וַיַּכּ֧וֹ הָאֶחָ֛ד אֶת־הָאֶחָ֖ד וַיָּ֥מֶת אֹתֽוֹ׃

‎7 ‏וְהִנֵּה֩ קָ֨מָה כָֽל־הַמִּשְׁפָּחָ֜ה עַל־שִׁפְחָתֶ֗ךָ וַיֹּֽאמְרוּ֙ תְּנִ֣י׀ אֶת־מַכֵּ֣ה אָחִ֗יו וּנְמִתֵ֙הוּ֙ בְּנֶ֤פֶשׁ אָחִיו֙ אֲשֶׁ֣ר הָרָ֔ג וְנַשְׁמִ֖ידָה גַּ֣ם אֶת־הַיּוֹרֵ֑שׁ וְכִבּ֗וּ אֶת־גַּֽחַלְתִּי֙ אֲשֶׁ֣ר נִשְׁאָ֔רָה לְבִלְתִּ֧י שום־ שִׂים־ לְאִישִׁ֛י שֵׁ֥ם וּשְׁאֵרִ֖ית עַל־פְּנֵ֥י הָאֲדָמָֽה׃ פ

‎8 ‏וַיֹּ֧אמֶר הַמֶּ֛לֶךְ אֶל־הָאִשָּׁ֖ה לְכִ֣י לְבֵיתֵ֑ךְ וַאֲנִ֖י אֲצַוֶּ֥ה עָלָֽיִךְ׃

‎9 ‏וַתֹּ֜אמֶר הָאִשָּׁ֤ה הַתְּקוֹעִית֙ אֶל־הַמֶּ֔לֶךְ עָלַ֞י אֲדֹנִ֥י הַמֶּ֛לֶךְ הֶעָוֹ֖ן וְעַל־בֵּ֣ית אָבִ֑י וְהַמֶּ֥לֶךְ וְכִסְא֖וֹ נָקִֽי׃ ס

‎10 ‏וַיֹּ֖אמֶר הַמֶּ֑לֶךְ הַֽמְדַבֵּ֤ר אֵלַ֙יִךְ֙ וַֽהֲבֵאת֣וֹ אֵלַ֔י וְלֹֽא־יֹסִ֥יף ע֖וֹד לָגַ֥עַת בָּֽךְ׃

‎11 ‏וַתֹּאמֶר֩ יִזְכָּר־נָ֨א הַמֶּ֜לֶךְ אֶת־יְהוָ֣ה אֱלֹהֶ֗יךָ מהרבית מֵהַרְבַּ֞ת גֹּאֵ֤ל הַדָּם֙ לְשַׁחֵ֔ת וְלֹ֥א יַשְׁמִ֖ידוּ אֶת־בְּנִ֑י וַיֹּ֙אמֶר֙ חַי־יְהוָ֔ה אִם־יִפֹּ֛ל מִשַּׂעֲרַ֥ת בְּנֵ֖ךְ אָֽרְצָה׃

‎12 ‏וַתֹּ֙אמֶר֙ הָֽאִשָּׁ֔ה תְּדַבֶּר־נָ֧א שִׁפְחָתְךָ֛ אֶל־אֲדֹנִ֥י הַמֶּ֖לֶךְ דָּבָ֑ר וַיֹּ֖אמֶר דַּבֵּֽרִי׃ ס

‎13 ‏וַתֹּ֙אמֶר֙ הָֽאִשָּׁ֔ה וְלָ֧מָּה חָשַׁ֛בְתָּה כָּזֹ֖את עַל־עַ֣ם אֱלֹהִ֑ים וּמִדַּבֵּ֨ר הַמֶּ֜לֶךְ הַדָּבָ֤ר הַזֶּה֙ כְּאָשֵׁ֔ם לְבִלְתִּ֛י הָשִׁ֥יב הַמֶּ֖לֶךְ אֶֽת־נִדְּחֽוֹ׃

‎14 ‏כִּי־מ֣וֹת נָמ֔וּת וְכַמַּ֙יִם֙ הַנִּגָּרִ֣ים אַ֔רְצָה אֲשֶׁ֖ר לֹ֣א יֵאָסֵ֑פוּ וְלֹֽא־יִשָּׂ֤א אֱלֹהִים֙ נֶ֔פֶשׁ וְחָשַׁב֙ מַֽחֲשָׁב֔וֹת לְבִלְתִּ֛י יִדַּ֥ח מִמֶּ֖נּוּ נִדָּֽח׃

‎15 ‏וְ֠עַתָּה אֲשֶׁר־בָּ֜אתִי לְדַבֵּ֨ר אֶל־הַמֶּ֤לֶךְ אֲדֹנִי֙ אֶת־הַדָּבָ֣ר הַזֶּ֔ה כִּ֥י יֵֽרְאֻ֖נִי הָעָ֑ם וַתֹּ֤אמֶר שִׁפְחָֽתְךָ֙ אֲדַבְּרָה־נָּ֣א אֶל־הַמֶּ֔לֶךְ אוּלַ֛י יַעֲשֶׂ֥ה הַמֶּ֖לֶךְ אֶת־דְּבַ֥ר אֲמָתֽוֹ׃

‎16 ‏כִּ֚י יִשְׁמַ֣ע הַמֶּ֔לֶךְ לְהַצִּ֥יל אֶת־אֲמָת֖וֹ מִכַּ֣ף הָאִ֑ישׁ לְהַשְׁמִ֨יד אֹתִ֤י וְאֶת־בְּנִי֙ יַ֔חַד מִֽנַּחֲלַ֖ת אֱלֹהִֽים׃

‎17 ‏וַתֹּ֙אמֶר֙ שִׁפְחָ֣תְךָ֔ יִֽהְיֶה־נָּ֛א דְּבַר־אֲדֹנִ֥י הַמֶּ֖לֶךְ לִמְנוּחָ֑ה כִּ֣י׀ כְּמַלְאַ֣ךְ הָאֱלֹהִ֗ים כֵּ֣ן אֲדֹנִ֤י הַמֶּ֙לֶךְ֙ לִשְׁמֹ֙עַ֙ הַטּ֣וֹב וְהָרָ֔ע וַֽיהוָ֥ה אֱלֹהֶ֖יךָ יְהִ֥י עִמָּֽךְ׃ פ

‎18 ‏וַיַּ֣עַן הַמֶּ֗לֶךְ וַיֹּ֙אמֶר֙ אֶל־הָ֣אִשָּׁ֔ה אַל־נָ֨א תְכַחֲדִ֤י מִמֶּ֙נִּי֙ דָּבָ֔ר אֲשֶׁ֥ר אָנֹכִ֖י שֹׁאֵ֣ל אֹתָ֑ךְ וַתֹּ֙אמֶר֙ הָֽאִשָּׁ֔ה יְדַבֶּר־נָ֖א אֲדֹנִ֥י הַמֶּֽלֶךְ׃

‎19 ‏וַיֹּ֣אמֶר הַמֶּ֔לֶךְ הֲיַ֥ד יוֹאָ֛ב אִתָּ֖ךְ בְּכָל־זֹ֑את וַתַּ֣עַן הָאִשָּׁ֣ה וַתֹּ֡אמֶר חֵֽי־נַפְשְׁךָ֩ אֲדֹנִ֨י הַמֶּ֜לֶךְ אִם־אִ֣שׁ׀ לְהֵמִ֣ין וּלְהַשְׂמִ֗יל מִכֹּ֤ל אֲשֶׁר־דִּבֶּר֙ אֲדֹנִ֣י הַמֶּ֔לֶךְ כִּֽי־עַבְדְּךָ֤ יוֹאָב֙ ה֣וּא צִוָּ֔נִי וְה֗וּא שָׂ֚ם בְּפִ֣י שִׁפְחָֽתְךָ֔ אֵ֥ת כָּל־הַדְּבָרִ֖ים הָאֵֽלֶּה׃

‎20 ‏לְבַעֲב֤וּר סַבֵּב֙ אֶת־פְּנֵ֣י הַדָּבָ֔ר עָשָׂ֛ה עַבְדְּךָ֥ יוֹאָ֖ב אֶת־הַדָּבָ֣ר הַזֶּ֑ה וַאדֹנִ֣י חָכָ֗ם כְּחָכְמַת֙ מַלְאַ֣ךְ הָאֱלֹהִ֔ים לָדַ֖עַת אֶֽת־כָּל־אֲשֶׁ֥ר בָּאָֽרֶץ׃ ס

‎21 ‏וַיֹּ֤אמֶר הַמֶּ֙לֶךְ֙ אֶל־יוֹאָ֔ב הִנֵּה־נָ֥א עָשִׂ֖יתִי אֶת־הַדָּבָ֣ר הַזֶּ֑ה וְלֵ֛ךְ הָשֵׁ֥ב אֶת־הַנַּ֖עַר אֶת־אַבְשָׁלֽוֹם׃

‎22 ‏וַיִּפֹּל֩ יוֹאָ֨ב אֶל־פָּנָ֥יו אַ֛רְצָה וַיִּשְׁתַּ֖חוּ וַיְבָ֣רֶךְ אֶת־הַמֶּ֑לֶךְ וַיֹּ֣אמֶר יוֹאָ֡ב הַיּוֹם֩ יָדַ֨ע עַבְדְּךָ֜ כִּי־מָצָ֨אתִי חֵ֤ן בְּעֵינֶ֙יךָ֙ אֲדֹנִ֣י הַמֶּ֔לֶךְ אֲשֶׁר־עָשָׂ֥ה הַמֶּ֖לֶךְ אֶת־דְּבַ֥ר עבדו עַבְדֶּֽךָ׃

‎23 ‏וַיָּ֥קָם יוֹאָ֖ב וַיֵּ֣לֶךְ גְּשׁ֑וּרָה וַיָּבֵ֥א אֶת־אַבְשָׁל֖וֹם יְרוּשָׁלִָֽם׃ פ

‎24 ‏וַיֹּ֤אמֶר הַמֶּ֙לֶךְ֙ יִסֹּ֣ב אֶל־בֵּית֔וֹ וּפָנַ֖י לֹ֣א יִרְאֶ֑ה וַיִּסֹּ֤ב אַבְשָׁלוֹם֙ אֶל־בֵּית֔וֹ וּפְנֵ֥י הַמֶּ֖לֶךְ לֹ֥א רָאָֽה׃ ס

‎25 ‏וּכְאַבְשָׁל֗וֹם לֹא־הָיָ֧ה אִישׁ־יָפֶ֛ה בְּכָל־יִשְׂרָאֵ֖ל לְהַלֵּ֣ל מְאֹ֑ד מִכַּ֤ף רַגְלוֹ֙ וְעַ֣ד קָדְקֳד֔וֹ לֹא־הָ֥יָה ב֖וֹ מֽוּם׃

‎26 ‏וּֽבְגַלְּחוֹ֮ אֶת־רֹאשׁוֹ֒ וְֽ֠הָיָה מִקֵּץ֙ יָמִ֤ים׀ לַיָּמִים֙ אֲשֶׁ֣ר יְגַלֵּ֔חַ כִּֽי־כָבֵ֥ד עָלָ֖יו וְגִלְּח֑וֹ וְשָׁקַל֙ אֶת־שְׂעַ֣ר רֹאשׁ֔וֹ מָאתַ֥יִם שְׁקָלִ֖ים בְּאֶ֥בֶן הַמֶּֽלֶךְ׃

‎27 ‏וַיִּֽוָּלְד֤וּ לְאַבְשָׁלוֹם֙ שְׁלוֹשָׁ֣ה בָנִ֔ים וּבַ֥ת אַחַ֖ת וּשְׁמָ֣הּ תָּמָ֑ר הִ֣יא הָיְתָ֔ה אִשָּׁ֖ה יְפַ֥ת מַרְאֶֽה׃ פ

‎28 ‏וַיֵּ֧שֶׁב אַבְשָׁל֛וֹם בִּירוּשָׁלִַ֖ם שְׁנָתַ֣יִם יָמִ֑ים וּפְנֵ֥י הַמֶּ֖לֶךְ לֹ֥א רָאָֽה׃

‎29 ‏וַיִּשְׁלַ֨ח אַבְשָׁל֜וֹם אֶל־יוֹאָ֗ב לִשְׁלֹ֤חַ אֹתוֹ֙ אֶל־הַמֶּ֔לֶךְ וְלֹ֥א אָבָ֖ה לָב֣וֹא אֵלָ֑יו וַיִּשְׁלַ֥ח עוֹד֙ שֵׁנִ֔ית וְלֹ֥א אָבָ֖ה לָבֽוֹא׃

‎30 ‏וַיֹּ֨אמֶר אֶל־עֲבָדָ֜יו רְאוּ֩ חֶלְקַ֨ת יוֹאָ֤ב אֶל־יָדִי֙ וְלוֹ־שָׁ֣ם שְׂעֹרִ֔ים לְכ֖וּ והוצתיה וְהַצִּית֣וּהָ בָאֵ֑שׁ וַיַּצִּ֜תוּ עַבְדֵ֧י אַבְשָׁל֛וֹם אֶת־הַחֶלְקָ֖ה בָּאֵֽשׁ׃ פ

‎31 ‏וַיָּ֣קָם יוֹאָ֔ב וַיָּבֹ֥א אֶל־אַבְשָׁל֖וֹם הַבָּ֑יְתָה וַיֹּ֣אמֶר אֵלָ֔יו לָ֣מָּה הִצִּ֧יתוּ עֲבָדֶ֛ךָ אֶת־הַחֶלְקָ֥ה אֲשֶׁר־לִ֖י בָּאֵֽשׁ׃

‎32 ‏וַיֹּ֣אמֶר אַבְשָׁל֣וֹם אֶל־יוֹאָ֡ב הִנֵּ֣ה שָׁלַ֣חְתִּי אֵלֶ֣יךָ׀ לֵאמֹ֡ר בֹּ֣א הֵ֠נָּה וְאֶשְׁלְחָה֩ אֹתְךָ֙ אֶל־הַמֶּ֜לֶךְ לֵאמֹ֗ר לָ֤מָּה בָּ֙אתִי֙ מִגְּשׁ֔וּר ט֥וֹב לִ֖י עֹ֣ד אֲנִי־שָׁ֑ם וְעַתָּ֗ה אֶרְאֶה֙ פְּנֵ֣י הַמֶּ֔לֶךְ וְאִם־יֶשׁ־בִּ֥י עָוֹ֖ן וֶהֱמִתָֽנִי׃

‎33 ‏וַיָּבֹ֨א יוֹאָ֣ב אֶל־הַמֶּלֶךְ֮ וַיַּגֶּד־לוֹ֒ וַיִּקְרָ֤א אֶל־אַבְשָׁלוֹם֙ וַיָּבֹ֣א אֶל־הַמֶּ֔לֶךְ וַיִּשְׁתַּ֨חוּ ל֧וֹ עַל־אַפָּ֛יו אַ֖רְצָה לִפְנֵ֣י הַמֶּ֑לֶךְ וַיִּשַּׁ֥ק הַמֶּ֖לֶךְ לְאַבְשָׁלֽוֹם׃ פ

1 wayyēḏ^a‘ ywō’āḇ ben-ṣəruyâ kî-lēḇ hammeleḵə ‘al-’aḇəšālwōm:

2 wayyišəl^aḥ ywō’āḇ təqwō‘â wayyiqq^aḥ miššām ’iššâ ḥăḵāmâ wayyō’mer ’ēleyhā hiṯə’abəlî-nā’ wəliḇəšî-nā’ ḇiḡəḏê-’ēḇel wə’al-tāsûḵî šemen wəhāyîṯ kə’iššâ zeh yāmîm rabîm miṯə’abeleṯ ‘al-mēṯ:

3 ûḇā’ṯ ’el-hammeleḵə wəḏibarətə ’ēlāyw kadāḇār hazzeh wayyāśem ywō’āḇ ’eṯ-hadəḇārîm bəfîhā:

4 watō’mer hā’iššâ hatəqō‘îṯ ’el-hammeleḵə watipōl ‘al-’apeyhā ’arəṣâ watišətāḥû watō’mer hwōši‘â hammeleḵə: s

5 wayyō’mer-lāh hammeleḵə mah-llāḵə watō’mer ’ăḇāl ’iššâ-’aləmānâ ’ānî wayyāmāṯ ’îšî:

6 ûləšifəḥāṯəḵā šənê ḇānîm wayyinnāṣû šənêhem baśśāḏeh wə’ên maṣṣîl bênêhem wayyakwō hā’eḥāḏ ’eṯ-hā’eḥāḏ wayyāmeṯ ’ōṯwō:

7 wəhinnēh qāmâ ḵāl-hammišəpāḥâ ‘al-šifəḥāṯeḵā wayyō’mərû tənî| ’eṯ-makēh ’āḥîw ûnəmiṯēhû bənefeš ’āḥîw ’ăšer hārāḡ wənašəmîḏâ gam ’eṯ-hayywōrēš wəḵibû ’eṯ-g^aḥalətî ’ăšer nišə’ārâ ləḇilətî śûm- śîm- lə’îšî šēm ûšə’ērîṯ ‘al-pənê hā’ăḏāmâ: f

8 wayyō’mer hammeleḵə ’el-hā’iššâ ləḵî ləḇêṯēḵə wa’ănî ’ăṣaûeh ‘ālāyiḵə:

9 watō’mer hā’iššâ hatəqwō‘îṯ ’el-hammeleḵə ‘ālay ’ăḏōnî hammeleḵə he‘āwōn wə‘al-bêṯ ’āḇî wəhammeleḵə wəḵisə’wō nāqî: s

10 wayyō’mer hammeleḵə haməḏabēr ’ēlayiḵə wahăḇē’ṯwō ’ēlay wəlō’-yōsîf ‘wōḏ lāḡ^a‘aṯ bāḵə:

11 watō’mer yizəkār-nā’ hammeleḵə ’eṯ-yəhwâ ’ĕlōheyḵā mēharəbîṯ mēharəbaṯ gō’ēl hadām ləš^aḥēṯ wəlō’ yašəmîḏû ’eṯ-bənî wayyō’mer ḥay-yəhwâ ’im-yipōl miśś^a‘ăraṯ bənēḵə ’ārəṣâ:

12 watō’mer hā’iššâ təḏaber-nā’ šifəḥāṯəḵā ’el-’ăḏōnî hammeleḵə dāḇār wayyō’mer dabērî: s

13 watō’mer hā’iššâ wəlāmmâ ḥāšaḇətâ kāzō’ṯ ‘al-‘am ’ĕlōhîm ûmidabēr hammeleḵə hadāḇār hazzeh kə’āšēm ləḇilətî hāšîḇ hammeleḵə ’eṯ-nidəḥwō:

14 kî-mwōṯ nāmûṯ wəḵammayim hannigārîm ’arəṣâ ’ăšer lō’ yē’āsēfû wəlō’-yiśśā’ ’ĕlōhîm nefeš wəḥāšaḇ m^aḥăšāḇwōṯ ləḇilətî yid^aḥ mimmennû nidāḥ:

15 wə‘atâ ’ăšer-bā’ṯî ləḏabēr ’el-hammeleḵə ’ăḏōnî ’eṯ-hadāḇār hazzeh kî yērə’unî hā‘ām watō’mer šifəḥāṯəḵā ’ăḏabərâ-nnā’ ’el-hammeleḵə ’ûlay y^a‘ăśeh hammeleḵə ’eṯ-dəḇar ’ămāṯwō:

16 kî yišəm^a‘ hammeleḵə ləhaṣṣîl ’eṯ-’ămāṯwō mikaf hā’îš ləhašəmîḏ ’ōṯî wə’eṯ-bənî y^aḥaḏ minn^aḥălaṯ ’ĕlōhîm:

17 watō’mer šifəḥāṯəḵā yihəyeh-nnā’ dəḇar-’ăḏōnî hammeleḵə limənûḥâ kî| kəmalə’aḵə hā’ĕlōhîm kēn ’ăḏōnî hammeleḵə lišəmō‘a haṭṭwōḇ wəhārā‘ wayhwâ ’ĕlōheyḵā yəhî ‘immāḵə: f

18 wayy^a‘an hammeleḵə wayyō’mer ’el-hā’iššâ ’al-nā’ ṯəḵ^aḥăḏî mimmennî dāḇār ’ăšer ’ānōḵî šō’ēl ’ōṯāḵə watō’mer hā’iššâ yəḏaber-nā’ ’ăḏōnî hammeleḵə:

19 wayyō’mer hammeleḵə hăyaḏ ywō’āḇ ’itāḵə bəḵāl-zō’ṯ wat^a‘an hā’iššâ watō’mer ḥê-nafəšəḵā ’ăḏōnî hammeleḵə ’im-’iš| ləhēmîn ûləhaśəmîl mikōl ’ăšer-diber ’ăḏōnî hammeleḵə kî-‘aḇədəḵā ywō’āḇ hû’ ṣiûānî wəhû’ śām bəfî šifəḥāṯəḵā ’ēṯ kāl-hadəḇārîm hā’ēlleh:

20 ləḇ^a‘ăḇûr sabēḇ ’eṯ-pənê hadāḇār ‘āśâ ‘aḇədəḵā ywō’āḇ ’eṯ-hadāḇār hazzeh wa’ḏōnî ḥāḵām kəḥāḵəmaṯ malə’aḵə hā’ĕlōhîm lāḏ^a‘aṯ ’eṯ-kāl-’ăšer bā’āreṣ: s

21 wayyō’mer hammeleḵə ’el-ywō’āḇ hinnēh-nā’ ‘āśîṯî ’eṯ-hadāḇār hazzeh wəlēḵə hāšēḇ ’eṯ-hann^a‘ar ’eṯ-’aḇəšālwōm:

22 wayyipōl ywō’āḇ ’el-pānāyw ’arəṣâ wayyišət^aḥû wayəḇāreḵə ’eṯ-hammeleḵə wayyō’mer ywō’āḇ hayywōm yāḏ^a‘ ‘aḇədəḵā kî-māṣā’ṯî ḥēn bə‘êneyḵā ’ăḏōnî hammeleḵə ’ăšer-‘āśâ hammeleḵə ’eṯ-dəḇar ‘aḇədwō ‘aḇədeḵā:

23 wayyāqām ywō’āḇ wayyēleḵə gəšûrâ wayyāḇē’ ’eṯ-’aḇəšālwōm yərûšālāim: f

24 wayyō’mer hammeleḵə yissōḇ ’el-bêṯwō ûfānay lō’ yirə’eh wayyissōḇ ’aḇəšālwōm ’el-bêṯwō ûfənê hammeleḵə lō’ rā’â: s

25 ûḵə’aḇəšālwōm lō’-hāyâ ’îš-yāfeh bəḵāl-yiśərā’ēl ləhallēl mə’ōḏ mikaf raḡəlwō wə‘aḏ qāḏəqŏḏwō lō’-hāyâ ḇwō mûm:

26 ûḇəḡalləḥwō ’eṯ-rō’šwō wəhāyâ miqqēṣ yāmîm| layyāmîm ’ăšer yəḡallēḥa kî-ḵāḇēḏ ‘ālāyw wəḡilləḥwō wəšāqal ’eṯ-śə‘ar rō’šwō mā’ṯayim šəqālîm bə’eḇen hammeleḵə:

27 wayyiûāləḏû lə’aḇəšālwōm šəlwōšâ ḇānîm ûḇaṯ ’^aḥaṯ ûšəmāh tāmār hî’ hāyəṯâ ’iššâ yəfaṯ marə’eh: f

28 wayyēšeḇ ’aḇəšālwōm bîrûšālaim šənāṯayim yāmîm ûfənê hammeleḵə lō’ rā’â:

29 wayyišəl^aḥ ’aḇəšālwōm ’el-ywō’āḇ lišəlōḥa ’ōṯwō ’el-hammeleḵə wəlō’ ’āḇâ lāḇwō’ ’ēlāyw wayyišəl^aḥ ‘wōḏ šēnîṯ wəlō’ ’āḇâ lāḇwō’:

30 wayyō’mer ’el-‘ăḇāḏāyw rə’û ḥeləqaṯ ywō’āḇ ’el-yāḏî wəlwō-šām śə‘ōrîm ləḵû wəhwōṣitîhā wəhaṣṣîṯûhā ḇā’ēš wayyaṣṣiṯû ‘aḇəḏê ’aḇəšālwōm ’eṯ-h^aḥeləqâ bā’ēš: f

31 wayyāqām ywō’āḇ wayyāḇō’ ’el-’aḇəšālwōm habāyəṯâ wayyō’mer ’ēlāyw lāmmâ hiṣṣîṯû ‘ăḇāḏeḵā ’eṯ-h^aḥeləqâ ’ăšer-lî bā’ēš:

32 wayyō’mer ’aḇəšālwōm ’el-ywō’āḇ hinnēh šāl^aḥətî ’ēleyḵā| lē’mōr bō’ hēnnâ wə’ešələḥâ ’ōṯəḵā ’el-hammeleḵə lē’mōr lāmmâ bā’ṯî migəšûr ṭwōḇ lî ‘ōḏ ’ănî-šām wə‘atâ ’erə’eh pənê hammeleḵə wə’im-yeš-bî ‘āwōn wehĕmiṯānî:

33 wayyāḇō’ ywō’āḇ ’el-hammeleḵə wayyageḏ-lwō wayyiqərā’ ’el-’aḇəšālwōm wayyāḇō’ ’el-hammeleḵə wayyišət^aḥû lwō ‘al-’apāyw ’arəṣâ lifənê hammeleḵə wayyiššaq hammeleḵə lə’aḇəšālwōm: f