‎1 ‏וַיֹּ֙סֶף֙ אַף־יְהוָ֔ה לַחֲר֖וֹת בְּיִשְׂרָאֵ֑ל וַיָּ֨סֶת אֶת־דָּוִ֤ד בָּהֶם֙ לֵאמֹ֔ר לֵ֛ךְ מְנֵ֥ה אֶת־יִשְׂרָאֵ֖ל וְאֶת־יְהוּדָֽה׃

‎2 ‏וַיֹּ֨אמֶר הַמֶּ֜לֶךְ אֶל־יוֹאָ֣ב׀ שַׂר־הַחַ֣יִל אֲשֶׁר־אִתּ֗וֹ שֽׁוּט־נָ֞א בְּכָל־שִׁבְטֵ֤י יִשְׂרָאֵל֙ מִדָּן֙ וְעַד־בְּאֵ֣ר שֶׁ֔בַע וּפִקְד֖וּ אֶת־הָעָ֑ם וְיָ֣דַעְתִּ֔י אֵ֖ת מִסְפַּ֥ר הָעָֽם׃ ס

‎3 ‏וַיֹּ֨אמֶר יוֹאָ֜ב אֶל־הַמֶּ֗לֶךְ וְיוֹסֵ֣ף יְהוָה֩ אֱלֹהֶ֨יךָ אֶל־הָעָ֜ם כָּהֵ֤ם׀ וְכָהֵם֙ מֵאָ֣ה פְעָמִ֔ים וְעֵינֵ֥י אֲדֹנִֽי־הַמֶּ֖לֶךְ רֹא֑וֹת וַאדֹנִ֣י הַמֶּ֔לֶךְ לָ֥מָּה חָפֵ֖ץ בַּדָּבָ֥ר הַזֶּֽה׃

‎4 ‏וַיֶּחֱזַ֤ק דְּבַר־הַמֶּ֙לֶךְ֙ אֶל־יוֹאָ֔ב וְעַ֖ל שָׂרֵ֣י הֶחָ֑יִל וַיֵּצֵ֨א יוֹאָ֜ב וְשָׂרֵ֤י הַחַ֙יִל֙ לִפְנֵ֣י הַמֶּ֔לֶךְ לִפְקֹ֥ד אֶת־הָעָ֖ם אֶת־יִשְׂרָאֵֽל׃

‎5 ‏וַיַּעַבְר֖וּ אֶת־הַיַּרְדֵּ֑ן וַיַּחֲנ֣וּ בַעֲרוֹעֵ֗ר יְמִ֥ין הָעִ֛יר אֲשֶׁ֛ר בְּתוֹךְ־הַנַּ֥חַל הַגָּ֖ד וְאֶל־יַעְזֵֽר׃

‎6 ‏וַיָּבֹ֙אוּ֙ הַגִּלְעָ֔דָה וְאֶל־אֶ֥רֶץ תַּחְתִּ֖ים חָדְשִׁ֑י וַיָּבֹ֙אוּ֙ דָּ֣נָה יַּ֔עַן וְסָבִ֖יב אֶל־צִידֽוֹן׃

‎7 ‏וַיָּבֹ֨אוּ מִבְצַר־צֹ֔ר וְכָל־עָרֵ֥י הַחִוִּ֖י וְהַֽכְּנַעֲנִ֑י וַיֵּֽצְא֛וּ אֶל־נֶ֥גֶב יְהוּדָ֖ה בְּאֵ֥ר שָֽׁבַע׃

‎8 ‏וַיָּשֻׁ֖טוּ בְּכָל־הָאָ֑רֶץ וַיָּבֹ֜אוּ מִקְצֵ֨ה תִשְׁעָ֧ה חֳדָשִׁ֛ים וְעֶשְׂרִ֥ים י֖וֹם יְרוּשָׁלִָֽם׃

‎9 ‏וַיִּתֵּ֥ן יוֹאָ֛ב אֶת־מִסְפַּ֥ר מִפְקַד־הָעָ֖ם אֶל־הַמֶּ֑לֶךְ וַתְּהִ֣י יִשְׂרָאֵ֡ל שְׁמֹנֶה֩ מֵא֨וֹת אֶ֤לֶף אִֽישׁ־חַ֙יִל֙ שֹׁ֣לֵֽף חֶ֔רֶב וְאִ֣ישׁ יְהוּדָ֔ה חֲמֵשׁ־מֵא֥וֹת אֶ֖לֶף אִֽישׁ׃

‎10 ‏וַיַּ֤ךְ לֵב־דָּוִד֙ אֹת֔וֹ אַחֲרֵי־כֵ֖ן סָפַ֣ר אֶת־הָעָ֑ם סוַיֹּ֨אמֶר דָּוִ֜ד אֶל־יְהוָ֗ה חָטָ֤אתִי מְאֹד֙ אֲשֶׁ֣ר עָשִׂ֔יתִי וְעַתָּ֣ה יְהוָ֔ה הַֽעֲבֶר־נָא֙ אֶת־עֲוֹ֣ן עַבְדְּךָ֔ כִּ֥י נִסְכַּ֖לְתִּי מְאֹֽד׃

‎11 ‏וַיָּ֥קָם דָּוִ֖ד בַּבֹּ֑קֶר פוּדְבַר־יְהוָ֗ה הָיָה֙ אֶל־גָּ֣ד הַנָּבִ֔יא חֹזֵ֥ה דָוִ֖ד לֵאמֹֽר׃

‎12 ‏הָל֞וֹךְ וְדִבַּרְתָּ֣ אֶל־דָּוִ֗ד כֹּ֚ה אָמַ֣ר יְהוָ֔ה שָׁלֹ֕שׁ אָנֹכִ֖י נוֹטֵ֣ל עָלֶ֑יךָ בְּחַר־לְךָ֥ אַֽחַת־מֵהֶ֖ם וְאֶֽעֱשֶׂה־לָּֽךְ׃

‎13 ‏וַיָּבֹא־גָ֥ד אֶל־דָּוִ֖ד וַיַּגֶּד־ל֑וֹ וַיֹּ֣אמֶר ל֡וֹ הֲתָב֣וֹא לְךָ֣ שֶֽׁבַע שָׁנִ֣ים׀ רָעָ֣ב׀ בְּאַרְצֶ֡ךָ אִם־שְׁלֹשָׁ֣ה חֳ֠דָשִׁים נֻסְךָ֙ לִפְנֵֽי־צָרֶ֜יךָ וְה֣וּא רֹדְפֶ֗ךָ וְאִם־הֱ֠יוֹת שְׁלֹ֨שֶׁת יָמִ֥ים דֶּ֙בֶר֙ בְּאַרְצֶ֔ךָ עַתָּה֙ דַּ֣ע וּרְאֵ֔ה מָה־אָשִׁ֥יב שֹׁלְחִ֖י דָּבָֽר׃ ס

‎14 ‏וַיֹּ֧אמֶר דָּוִ֛ד אֶל־גָּ֖ד צַר־לִ֣י מְאֹ֑ד נִפְּלָה־נָּ֤א בְיַד־יְהוָה֙ כִּֽי־רַבִּ֣ים רחמו רַֽחֲמָ֔יו וּבְיַד־אָדָ֖ם אַל־אֶפֹּֽלָה׃

‎15 ‏וַיִּתֵּ֨ן יְהוָ֥ה דֶּ֙בֶר֙ בְּיִשְׂרָאֵ֔ל מֵהַבֹּ֖קֶר וְעַד־עֵ֣ת מוֹעֵ֑ד וַיָּ֣מָת מִן־הָעָ֗ם מִדָּן֙ וְעַד־בְּאֵ֣ר שֶׁ֔בַע שִׁבְעִ֥ים אֶ֖לֶף אִֽישׁ׃

‎16 ‏וַיִּשְׁלַח֩ יָד֨וֹ הַמַּלְאָ֥ךְ׀ יְרֽוּשָׁלִַם֮ לְשַׁחֲתָהּ֒ וַיִּנָּ֤חֶם יְהוָה֙ אֶל־הָ֣רָעָ֔ה וַ֠יֹּאמֶר לַמַּלְאָ֞ךְ הַמַּשְׁחִ֤ית בָּעָם֙ רַ֔ב עַתָּ֖ה הֶ֣רֶף יָדֶ֑ךָ וּמַלְאַ֤ךְ יְהוָה֙ הָיָ֔ה עִם־גֹּ֖רֶן האורנה הָאֲרַ֥וְנָה הַיְבֻסִֽי׃ ס

‎17 ‏וַיֹּאמֶר֩ דָּוִ֨ד אֶל־יְהוָ֜ה בִּרְאֹת֣וֹ׀ אֶֽת־הַמַּלְאָ֣ךְ׀ הַמַּכֶּ֣ה בָעָ֗ם וַיֹּ֙אמֶר֙ הִנֵּ֨ה אָנֹכִ֤י חָטָ֙אתִי֙ וְאָנֹכִ֣י הֶעֱוֵ֔יתִי וְאֵ֥לֶּה הַצֹּ֖אן מֶ֣ה עָשׂ֑וּ תְּהִ֨י נָ֥א יָדְךָ֛ בִּ֖י וּבְבֵ֥ית אָבִֽי׃ פ

‎18 ‏וַיָּבֹא־גָ֥ד אֶל־דָּוִ֖ד בַּיּ֣וֹם הַה֑וּא וַיֹּ֣אמֶר ל֗וֹ עֲלֵה֙ הָקֵ֤ם לַֽיהוָה֙ מִזְבֵּ֔חַ בְּגֹ֖רֶן ארניה אֲרַ֥וְנָה הַיְבֻסִֽי׃

‎19 ‏וַיַּ֤עַל דָּוִד֙ כִּדְבַר־גָּ֔ד כַּאֲשֶׁ֖ר צִוָּ֥ה יְהוָֽה׃

‎20 ‏וַיַּשְׁקֵ֣ף אֲרַ֗וְנָה וַיַּ֤רְא אֶת־הַמֶּ֙לֶךְ֙ וְאֶת־עֲבָדָ֔יו עֹבְרִ֖ים עָלָ֑יו וַיֵּצֵ֣א אֲרַ֔וְנָה וַיִּשְׁתַּ֧חוּ לַמֶּ֛לֶךְ אַפָּ֖יו אָֽרְצָה׃

‎21 ‏וַיֹּ֣אמֶר אֲרַ֔וְנָה מַדּ֛וּעַ בָּ֥א אֲדֹנִֽי־הַמֶּ֖לֶךְ אֶל־עַבְדּ֑וֹ וַיֹּ֨אמֶר דָּוִ֜ד לִקְנ֧וֹת מֵעִמְּךָ֣ אֶת־הַגֹּ֗רֶן לִבְנ֤וֹת מִזְבֵּ֙חַ֙ לַֽיהוָ֔ה וְתֵעָצַ֥ר הַמַּגֵּפָ֖ה מֵעַ֥ל הָעָֽם׃

‎22 ‏וַיֹּ֤אמֶר אֲרַ֙וְנָה֙ אֶל־דָּוִ֔ד יִקַּ֥ח וְיַ֛עַל אֲדֹנִ֥י הַמֶּ֖לֶךְ הַטּ֣וֹב בעינו בְּעֵינָ֑יו רְאֵה֙ הַבָּקָ֣ר לָעֹלָ֔ה וְהַמֹּרִגִּ֛ים וּכְלֵ֥י הַבָּקָ֖ר לָעֵצִֽים׃

‎23 ‏הַכֹּ֗ל נָתַ֛ן אֲרַ֥וְנָה הַמֶּ֖לֶךְ לַמֶּ֑לֶךְ סוַיֹּ֤אמֶר אֲרַ֙וְנָה֙ אֶל־הַמֶּ֔לֶךְ יְהוָ֥ה אֱלֹהֶ֖יךָ יִרְצֶֽךָ׃

‎24 ‏וַיֹּ֨אמֶר הַמֶּ֜לֶךְ אֶל־אֲרַ֗וְנָה לֹ֤א כִּֽי־קָנ֨וֹ אֶקְנֶ֤ה מֵאֽוֹתְךָ֙ בִּמְחִ֔יר וְלֹ֧א אַעֲלֶ֛ה לַיהוָ֥ה אֱלֹהַ֖י עֹל֣וֹת חִנָּ֑ם וַיִּ֨קֶן דָּוִ֤ד אֶת־הַגֹּ֙רֶן֙ וְאֶת־הַבָּקָ֔ר בְּכֶ֖סֶף שְׁקָלִ֥ים חֲמִשִּֽׁים׃

‎25 ‏וַיִּבֶן֩ שָׁ֨ם דָּוִ֤ד מִזְבֵּ֙חַ֙ לַֽיהוָ֔ה וַיַּ֥עַל עֹל֖וֹת וּשְׁלָמִ֑ים וַיֵּעָתֵ֤ר יְהוָה֙ לָאָ֔רֶץ וַתֵּעָצַ֥ר הַמַּגֵּפָ֖ה מֵעַ֥ל יִשְׂרָאֵֽל׃

1 wayyōsef ’af-yəhwâ l^aḥărwōṯ bəyiśərā’ēl wayyāseṯ ’eṯ-dāwiḏ bâem lē’mōr lēḵə mənēh ’eṯ-yiśərā’ēl wə’eṯ-yəhûḏâ:

2 wayyō’mer hammeleḵə ’el-ywō’āḇ| śar-h^aḥayil ’ăšer-’itwō šûṭ-nā’ bəḵāl-šiḇəṭê yiśərā’ēl midān wə‘aḏ-bə’ēr šeḇ^a‘ ûfiqəḏû ’eṯ-hā‘ām wəyāḏ^a‘ətî ’ēṯ misəpar hā‘ām: s

3 wayyō’mer ywō’āḇ ’el-hammeleḵə wəywōsēf yəhwâ ’ĕlōheyḵā ’el-hā‘ām kâēm| wəḵâēm mē’â fə‘āmîm wə‘ênê ’ăḏōnî-hammeleḵə rō’wōṯ wa’ḏōnî hammeleḵə lāmmâ ḥāfēṣ badāḇār hazzeh:

4 wayyeḥĕzaq dəḇar-hammeleḵə ’el-ywō’āḇ wə‘al śārê heḥāyil wayyēṣē’ ywō’āḇ wəśārê h^aḥayil lifənê hammeleḵə lifəqōḏ ’eṯ-hā‘ām ’eṯ-yiśərā’ēl:

5 wayy^a‘aḇərû ’eṯ-hayyarədēn wayy^aḥănû ḇ^a‘ărwō‘ēr yəmîn hā‘îr ’ăšer bəṯwōḵə-hann^aḥal hagāḏ wə’el-y^a‘əzēr:

6 wayyāḇō’û hagilə‘āḏâ wə’el-’ereṣ t^aḥətîm ḥāḏəšî wayyāḇō’û dānâ yy^a‘an wəsāḇîḇ ’el-ṣîḏwōn:

7 wayyāḇō’û miḇəṣar-ṣōr wəḵāl-‘ārê h^aḥiûî wəhakən^a‘ănî wayyēṣə’û ’el-neḡeḇ yəhûḏâ bə’ēr šāḇ^a‘:

8 wayyāšuṭû bəḵāl-hā’āreṣ wayyāḇō’û miqəṣēh ṯišə‘â ḥŏḏāšîm wə‘eśərîm ywōm yərûšālāim:

9 wayyitēn ywō’āḇ ’eṯ-misəpar mifəqaḏ-hā‘ām ’el-hammeleḵə watəhî yiśərā’ēl šəmōneh mē’wōṯ ’elef ’îš-ḥayil šōlēf ḥereḇ wə’îš yəhûḏâ ḥămēš-mē’wōṯ ’elef ’îš:

10 wayyaḵə lēḇ-dāwiḏ ’ōṯwō ’^aḥărê-ḵēn sāfar ’eṯ-hā‘ām swayyō’mer dāwiḏ ’el-yəhwâ ḥāṭā’ṯî mə’ōḏ ’ăšer ‘āśîṯî wə‘atâ yəhwâ h^a‘ăḇer-nā’ ’eṯ-‘ăwōn ‘aḇədəḵā kî nisəkalətî mə’ōḏ:

11 wayyāqām dāwiḏ babōqer fûḏəḇar-yəhwâ hāyâ ’el-gāḏ hannāḇî’ ḥōzēh ḏāwiḏ lē’mōr:

12 hālwōḵə wəḏibarətā ’el-dāwiḏ kōh ’āmar yəhwâ šālōš ’ānōḵî nwōṭēl ‘āleyḵā bəḥar-ləḵā ’^aḥaṯ-mēhem wə’e‘ĕśeh-llāḵə:

13 wayyāḇō’-ḡāḏ ’el-dāwiḏ wayyageḏ-lwō wayyō’mer lwō hăṯāḇwō’ ləḵā šeḇ^a‘ šānîm| rā‘āḇ| bə’arəṣeḵā ’im-šəlōšâ ḥŏḏāšîm nusəḵā lifənê-ṣāreyḵā wəhû’ rōḏəfeḵā wə’im-hĕywōṯ šəlōšeṯ yāmîm deḇer bə’arəṣeḵā ‘atâ d^a‘ ûrə’ēh mâ-’āšîḇ šōləḥî dāḇār: s

14 wayyō’mer dāwiḏ ’el-gāḏ ṣar-lî mə’ōḏ nipəlâ-nnā’ ḇəyaḏ-yəhwâ kî-rabîm r^aḥămāw r^aḥămāyw ûḇəyaḏ-’āḏām ’al-’epōlâ:

15 wayyitēn yəhwâ deḇer bəyiśərā’ēl mēhabōqer wə‘aḏ-‘ēṯ mwō‘ēḏ wayyāmāṯ min-hā‘ām midān wə‘aḏ-bə’ēr šeḇ^a‘ šiḇə‘îm ’elef ’îš:

16 wayyišəl^aḥ yāḏwō hammalə’āḵə| yərûšālaim ləš^aḥăṯāh wayyinnāḥem yəhwâ ’el-hārā‘â wayyō’mer lammalə’āḵə hammašəḥîṯ bā‘ām raḇ ‘atâ heref yāḏeḵā ûmalə’aḵə yəhwâ hāyâ ‘im-gōren hā’wōrənâ hā’ărawənâ hayəḇusî: s

17 wayyō’mer dāwiḏ ’el-yəhwâ birə’ōṯwō| ’eṯ-hammalə’āḵə| hammakeh ḇā‘ām wayyō’mer hinnēh ’ānōḵî ḥāṭā’ṯî wə’ānōḵî he‘ĕwêṯî wə’ēlleh haṣṣō’n meh ‘āśû təhî nā’ yāḏəḵā bî ûḇəḇêṯ ’āḇî: f

18 wayyāḇō’-ḡāḏ ’el-dāwiḏ bayywōm hahû’ wayyō’mer lwō ‘ălēh hāqēm layhwâ mizəbēḥa bəḡōren ’ăranəyâ ’ărawənâ hayəḇusî:

19 wayy^a‘al dāwiḏ kiḏəḇar-gāḏ ka’ăšer ṣiûâ yəhwâ:

20 wayyašəqēf ’ărawənâ wayyarə’ ’eṯ-hammeleḵə wə’eṯ-‘ăḇāḏāyw ‘ōḇərîm ‘ālāyw wayyēṣē’ ’ărawənâ wayyišət^aḥû lammeleḵə ’apāyw ’ārəṣâ:

21 wayyō’mer ’ărawənâ madû‘a bā’ ’ăḏōnî-hammeleḵə ’el-‘aḇədwō wayyō’mer dāwiḏ liqənwōṯ mē‘imməḵā ’eṯ-hagōren liḇənwōṯ mizəbēḥa layhwâ wəṯē‘āṣar hammagēfâ mē‘al hā‘ām:

22 wayyō’mer ’ărawənâ ’el-dāwiḏ yiqq^aḥ wəy^a‘al ’ăḏōnî hammeleḵə haṭṭwōḇ bə‘ênāw bə‘ênāyw rə’ēh habāqār lā‘ōlâ wəhammōrigîm ûḵəlê habāqār lā‘ēṣîm:

23 hakōl nāṯan ’ărawənâ hammeleḵə lammeleḵə swayyō’mer ’ărawənâ ’el-hammeleḵə yəhwâ ’ĕlōheyḵā yirəṣeḵā:

24 wayyō’mer hammeleḵə ’el-’ărawənâ lō’ kî-qānwō ’eqəneh mē’wōṯəḵā biməḥîr wəlō’ ’^a‘ăleh layhwâ ’ĕlōhay ‘ōlwōṯ ḥinnām wayyiqen dāwiḏ ’eṯ-hagōren wə’eṯ-habāqār bəḵesef šəqālîm ḥămiššîm:

25 wayyiḇen šām dāwiḏ mizəbēḥa layhwâ wayy^a‘al ‘ōlwōṯ ûšəlāmîm wayyē‘āṯēr yəhwâ lā’āreṣ watē‘āṣar hammagēfâ mē‘al yiśərā’ēl: