‎1 ‏וְהַמֶּ֤לֶךְ דָּוִד֙ זָקֵ֔ן בָּ֖א בַּיָּמִ֑ים וַיְכַסֻּ֙הוּ֙ בַּבְּגָדִ֔ים וְלֹ֥א יִחַ֖ם לֽוֹ׃

‎2 ‏וַיֹּ֧אמְרוּ ל֣וֹ עֲבָדָ֗יו יְבַקְשׁ֞וּ לַאדֹנִ֤י הַמֶּ֙לֶךְ֙ נַעֲרָ֣ה בְתוּלָ֔ה וְעָֽמְדָה֙ לִפְנֵ֣י הַמֶּ֔לֶךְ וּתְהִי־ל֖וֹ סֹכֶ֑נֶת וְשָׁכְבָ֣ה בְחֵיקֶ֔ךָ וְחַ֖ם לַאדֹנִ֥י הַמֶּֽלֶךְ׃

‎3 ‏וַיְבַקְשׁוּ֙ נַעֲרָ֣ה יָפָ֔ה בְּכֹ֖ל גְּב֣וּל יִשְׂרָאֵ֑ל וַֽיִּמְצְא֗וּ אֶת־אֲבִישַׁג֙ הַשּׁ֣וּנַמִּ֔ית וַיָּבִ֥אוּ אֹתָ֖הּ לַמֶּֽלֶךְ׃

‎4 ‏וְהַֽנַּעֲרָ֖ה יָפָ֣ה עַד־מְאֹ֑ד וַתְּהִ֨י לַמֶּ֤לֶךְ סֹכֶ֙נֶת֙ וַתְּשָׁ֣רְתֵ֔הוּ וְהַמֶּ֖לֶךְ לֹ֥א יְדָעָֽהּ׃

‎5 ‏וַאֲדֹנִיָּ֧ה בֶן־חַגִּ֛ית מִתְנַשֵּׂ֥א לֵאמֹ֖ר אֲנִ֣י אֶמְלֹ֑ךְ וַיַּ֣עַשׂ ל֗וֹ רֶ֚כֶב וּפָ֣רָשִׁ֔ים וַחֲמִשִּׁ֥ים אִ֖ישׁ רָצִ֥ים לְפָנָֽיו׃

‎6 ‏וְלֹֽא־עֲצָב֨וֹ אָבִ֤יו מִיָּמָיו֙ לֵאמֹ֔ר מַדּ֖וּעַ כָּ֣כָה עָשִׂ֑יתָ וְגַם־ה֤וּא טֽוֹב־תֹּ֙אַר֙ מְאֹ֔ד וְאֹת֥וֹ יָלְדָ֖ה אַחֲרֵ֥י אַבְשָׁלֽוֹם׃

‎7 ‏וַיִּהְי֣וּ דְבָרָ֔יו עִ֚ם יוֹאָ֣ב בֶּן־צְרוּיָ֔ה וְעִ֖ם אֶבְיָתָ֣ר הַכֹּהֵ֑ן וַֽיַּעְזְר֔וּ אַחֲרֵ֖י אֲדֹנִיָּֽה׃

‎8 ‏וְצָד֣וֹק הַ֠כֹּהֵן וּבְנָיָ֨הוּ בֶן־יְהוֹיָדָ֜ע וְנָתָ֤ן הַנָּבִיא֙ וְשִׁמְעִ֣י וְרֵעִ֔י וְהַגִּבּוֹרִ֖ים אֲשֶׁ֣ר לְדָוִ֑ד לֹ֥א הָי֖וּ עִם־אֲדֹנִיָּֽהוּ׃

‎9 ‏וַיִּזְבַּ֣ח אֲדֹנִיָּ֗הוּ צֹ֤אן וּבָקָר֙ וּמְרִ֔יא עִ֚ם אֶ֣בֶן הַזֹּחֶ֔לֶת אֲשֶׁר־אֵ֖צֶל עֵ֣ין רֹגֵ֑ל וַיִּקְרָ֗א אֶת־כָּל־אֶחָיו֙ בְּנֵ֣י הַמֶּ֔לֶךְ וּלְכָל־אַנְשֵׁ֥י יְהוּדָ֖ה עַבְדֵ֥י הַמֶּֽלֶךְ׃

‎10 ‏וְֽאֶת־נָתָן֩ הַנָּבִ֨יא וּבְנָיָ֜הוּ וְאֶת־הַגִּבּוֹרִ֛ים וְאֶת־שְׁלֹמֹ֥ה אָחִ֖יו לֹ֥א קָרָֽא׃

‎11 ‏וַיֹּ֣אמֶר נָתָ֗ן אֶל־בַּת־שֶׁ֤בַע אֵם־שְׁלֹמֹה֙ לֵאמֹ֔ר הֲל֣וֹא שָׁמַ֔עַתְּ כִּ֥י מָלַ֖ךְ אֲדֹנִיָּ֣הוּ בֶן־חַגִּ֑ית וַאֲדֹנֵ֥ינוּ דָוִ֖ד לֹ֥א יָדָֽע׃

‎12 ‏וְעַתָּ֕ה לְכִ֛י אִיעָצֵ֥ךְ נָ֖א עֵצָ֑ה וּמַלְּטִי֙ אֶת־נַפְשֵׁ֔ךְ וְאֶת־נֶ֥פֶשׁ בְּנֵ֖ךְ שְׁלֹמֹֽה׃

‎13 ‏לְכִ֞י וּבֹ֣אִי׀ אֶל־הַמֶּ֣לֶךְ דָּוִ֗ד וְאָמַ֤רְתְּ אֵלָיו֙ הֲלֹֽא־אַתָּ֞ה אֲדֹנִ֣י הַמֶּ֗לֶךְ נִשְׁבַּ֤עְתָּ לַאֲמָֽתְךָ֙ לֵאמֹ֔ר כִּֽי־שְׁלֹמֹ֤ה בְנֵךְ֙ יִמְלֹ֣ךְ אַחֲרַ֔י וְה֖וּא יֵשֵׁ֣ב עַל־כִּסְאִ֑י וּמַדּ֖וּעַ מָלַ֥ךְ אֲדֹנִיָֽהוּ׃¹

‎14 ‏הִנֵּ֗ה עוֹדָ֛ךְ מְדַבֶּ֥רֶת שָׁ֖ם עִם־הַמֶּ֑לֶךְ וַאֲנִי֙ אָב֣וֹא אַחֲרַ֔יִךְ וּמִלֵּאתִ֖י אֶת־דְּבָרָֽיִךְ׃

‎15 ‏וַתָּבֹ֨א בַת־שֶׁ֤בֶע אֶל־הַמֶּ֙לֶךְ֙ הַחַ֔דְרָה וְהַמֶּ֖לֶךְ זָקֵ֣ן מְאֹ֑ד וַֽאֲבִישַׁג֙ הַשּׁ֣וּנַמִּ֔ית מְשָׁרַ֖ת אֶת־הַמֶּֽלֶךְ׃

‎16 ‏וַתִּקֹּ֣ד בַּת־שֶׁ֔בַע וַתִּשְׁתַּ֖חוּ לַמֶּ֑לֶךְ וַיֹּ֥אמֶר הַמֶּ֖לֶךְ מַה־לָּֽךְ׃

‎17 ‏וַתֹּ֣אמֶר ל֗וֹ אֲדֹנִי֙ אַתָּ֨ה נִשְׁבַּ֜עְתָּ בַּֽיהוָ֤ה אֱלֹהֶ֙יךָ֙ לַֽאֲמָתֶ֔ךָ כִּֽי־שְׁלֹמֹ֥ה בְנֵ֖ךְ יִמְלֹ֣ךְ אַחֲרָ֑י וְה֖וּא יֵשֵׁ֥ב עַל־כִּסְאִֽי׃

‎18 ‏וְעַתָּ֕ה הִנֵּ֥ה אֲדֹנִיָּ֖ה מָלָ֑ךְ וְעַתָּ֛ה אֲדֹנִ֥י הַמֶּ֖לֶךְ לֹ֥א יָדָֽעְתָּ׃

‎19 ‏וַ֠יִּזְבַּח שׁ֥וֹר וּֽמְרִיא־וְצֹאן֮ לָרֹב֒ וַיִּקְרָא֙ לְכָל־בְּנֵ֣י הַמֶּ֔לֶךְ וּלְאֶבְיָתָר֙ הַכֹּהֵ֔ן וּלְיֹאָ֖ב שַׂ֣ר הַצָּבָ֑א וְלִשְׁלֹמֹ֥ה עַבְדְּךָ֖ לֹ֥א קָרָֽא׃

‎20 ‏וְאַתָּה֙ אֲדֹנִ֣י הַמֶּ֔לֶךְ עֵינֵ֥י כָל־יִשְׂרָאֵ֖ל עָלֶ֑יךָ לְהַגִּ֣יד לָהֶ֔ם מִ֗י יֵשֵׁ֛ב עַל־כִּסֵּ֥א אֲדֹנִֽי־הַמֶּ֖לֶךְ אַחֲרָֽיו׃

‎21 ‏וְהָיָ֕ה כִּשְׁכַ֥ב אֲדֹנִֽי־הַמֶּ֖לֶךְ עִם־אֲבֹתָ֑יו וְהָיִ֗יתִי אֲנִ֛י וּבְנִ֥י שְׁלֹמֹ֖ה חַטָּאִֽים׃

‎22 ‏וְהִנֵּ֛ה עוֹדֶ֥נָּה מְדַבֶּ֖רֶת עִם־הַמֶּ֑לֶךְ וְנָתָ֥ן הַנָּבִ֖יא בָּֽא׃

‎23 ‏וַיַּגִּ֤ידוּ לַמֶּ֙לֶךְ֙ לֵאמֹ֔ר הִנֵּ֖ה נָתָ֣ן הַנָּבִ֑יא וַיָּבֹא֙ לִפְנֵ֣י הַמֶּ֔לֶךְ וַיִּשְׁתַּ֧חוּ לַמֶּ֛לֶךְ עַל־אַפָּ֖יו אָֽרְצָה׃

‎24 ‏וַיֹּאמֶר֮ נָתָן֒ אֲדֹנִ֣י הַמֶּ֔לֶךְ אַתָּ֣ה אָמַ֔רְתָּ אֲדֹנִיָּ֖הוּ יִמְלֹ֣ךְ אַחֲרָ֑י וְה֖וּא יֵשֵׁ֥ב עַל־כִּסְאִֽי׃

‎25 ‏כִּ֣י׀ יָרַ֣ד הַיּ֗וֹם וַ֠יִּזְבַּח שׁ֥וֹר וּֽמְרִיא־וְצֹאן֮ לָרֹב֒ וַיִּקְרָא֩ לְכָל־בְּנֵ֨י הַמֶּ֜לֶךְ וּלְשָׂרֵ֤י הַצָּבָא֙ וּלְאֶבְיָתָ֣ר הַכֹּהֵ֔ן וְהִנָּ֛ם אֹכְלִ֥ים וְשֹׁתִ֖ים לְפָנָ֑יו וַיֹּ֣אמְר֔וּ יְחִ֖י הַמֶּ֥לֶךְ אֲדֹנִיָּֽהוּ׃

‎26 ‏וְלִ֣י אֲנִֽי־עַ֠בְדֶּךָ וּלְצָדֹ֨ק הַכֹּהֵ֜ן וְלִבְנָיָ֧הוּ בֶן־יְהוֹיָדָ֛ע וְלִשְׁלֹמֹ֥ה עַבְדְּךָ֖ לֹ֥א קָרָֽא׃

‎27 ‏אִ֗ם מֵאֵת֙ אֲדֹנִ֣י הַמֶּ֔לֶךְ נִהְיָ֖ה הַדָּבָ֣ר הַזֶּ֑ה וְלֹ֤א הוֹדַ֙עְתָּ֙ אֶֽת־עבדיך עַבְדְּךָ֔ מִ֗י יֵשֵׁ֛ב עַל־כִּסֵּ֥א אֲדֹנִֽי־הַמֶּ֖לֶךְ אַחֲרָֽיו׃ ס

‎28 ‏וַיַּ֨עַן הַמֶּ֤לֶךְ דָּוִד֙ וַיֹּ֔אמֶר קִרְאוּ־לִ֖י לְבַת־שָׁ֑בַע וַתָּבֹא֙ לִפְנֵ֣י הַמֶּ֔לֶךְ וַֽתַּעֲמֹ֖ד לִפְנֵ֥י הַמֶּֽלֶךְ׃

‎29 ‏וַיִּשָּׁבַ֥ע הַמֶּ֖לֶךְ וַיֹּאמַ֑ר חַי־יְהוָ֕ה אֲשֶׁר־פָּדָ֥ה אֶת־נַפְשִׁ֖י מִכָּל־צָרָֽה׃

‎30 ‏כִּ֡י כַּאֲשֶׁר֩ נִשְׁבַּ֨עְתִּי לָ֜ךְ בַּיהוָ֨ה אֱלֹהֵ֤י יִשְׂרָאֵל֙ לֵאמֹ֔ר כִּֽי־שְׁלֹמֹ֤ה בְנֵךְ֙ יִמְלֹ֣ךְ אַחֲרַ֔י וְה֛וּא יֵשֵׁ֥ב עַל־כִּסְאִ֖י תַּחְתָּ֑י כִּ֛י כֵּ֥ן אֶעֱשֶׂ֖ה הַיּ֥וֹם הַזֶּֽה׃

‎31 ‏וַתִּקֹּ֨ד בַּת־שֶׁ֤בַע אַפַּ֙יִם֙ אֶ֔רֶץ וַתִּשְׁתַּ֖חוּ לַמֶּ֑לֶךְ וַתֹּ֕אמֶר יְחִ֗י אֲדֹנִ֛י הַמֶּ֥לֶךְ דָּוִ֖ד לְעֹלָֽם׃ פ

‎32 ‏וַיֹּ֣אמֶר׀ הַמֶּ֣לֶךְ דָּוִ֗ד קִרְאוּ־לִ֞י לְצָד֤וֹק הַכֹּהֵן֙ וּלְנָתָ֣ן הַנָּבִ֔יא וְלִבְנָיָ֖הוּ בֶּן־יְהוֹיָדָ֑ע וַיָּבֹ֖אוּ לִפְנֵ֥י הַמֶּֽלֶךְ׃

‎33 ‏וַיֹּ֨אמֶר הַמֶּ֜לֶךְ לָהֶ֗ם קְח֤וּ עִמָּכֶם֙ אֶת־עַבְדֵ֣י אֲדֹנֵיכֶ֔ם וְהִרְכַּבְתֶּם֙ אֶת־שְׁלֹמֹ֣ה בְנִ֔י עַל־הַפִּרְדָּ֖ה אֲשֶׁר־לִ֑י וְהוֹרַדְתֶּ֥ם אֹת֖וֹ אֶל־גִּחֽוֹן׃

‎34 ‏וּמָשַׁ֣ח אֹת֣וֹ שָׁ֠ם צָד֨וֹק הַכֹּהֵ֜ן וְנָתָ֧ן הַנָּבִ֛יא לְמֶ֖לֶךְ עַל־יִשְׂרָאֵ֑ל וּתְקַעְתֶּם֙ בַּשּׁוֹפָ֔ר וַאֲמַרְתֶּ֕ם יְחִ֖י הַמֶּ֥לֶךְ שְׁלֹמֹֽה׃

‎35 ‏וַעֲלִיתֶ֣ם אַחֲרָ֗יו וּבָא֙ וְיָשַׁ֣ב עַל־כִּסְאִ֔י וְה֥וּא יִמְלֹ֖ךְ תַּחְתָּ֑י וְאֹת֤וֹ צִוִּ֙יתִי֙ לִֽהְי֣וֹת נָגִ֔יד עַל־יִשְׂרָאֵ֖ל וְעַל־יְהוּדָֽה׃

‎36 ‏וַיַּ֨עַן בְּנָיָ֧הוּ בֶן־יְהֽוֹיָדָ֛ע אֶת־הַמֶּ֖לֶךְ וַיֹּ֣אמֶר׀ אָמֵ֑ן כֵּ֚ן יֹאמַ֣ר יְהוָ֔ה אֱלֹהֵ֖י אֲדֹנִ֥י הַמֶּֽלֶךְ׃

‎37 ‏כַּאֲשֶׁ֨ר הָיָ֤ה יְהוָה֙ עִם־אֲדֹנִ֣י הַמֶּ֔לֶךְ כֵּ֖ן יהי יִֽהְיֶ֣ה עִם־שְׁלֹמֹ֑ה וִֽיגַדֵּל֙ אֶת־כִּסְא֔וֹ מִ֨כִּסֵּ֔א אֲדֹנִ֖י הַמֶּ֥לֶךְ דָּוִֽד׃

‎38 ‏וַיֵּ֣רֶד צָד֣וֹק הַ֠כֹּהֵן וְנָתָ֨ן הַנָּבִ֜יא וּבְנָיָ֣הוּ בֶן־יְהוֹיָדָ֗ע וְהַכְּרֵתִי֙ וְהַפְּלֵתִ֔י וַיַּרְכִּ֙בוּ֙ אֶת־שְׁלֹמֹ֔ה עַל־פִּרְדַּ֖ת הַמֶּ֣לֶךְ דָּוִ֑ד וַיֹּלִ֥כוּ אֹת֖וֹ עַל־גִּחֽוֹן׃

‎39 ‏וַיִּקַּח֩ צָד֨וֹק הַכֹּהֵ֜ן אֶת־קֶ֤רֶן הַשֶּׁ֙מֶן֙ מִן־הָאֹ֔הֶל וַיִּמְשַׁ֖ח אֶת־שְׁלֹמֹ֑ה וַֽיִּתְקְעוּ֙ בַּשּׁוֹפָ֔ר וַיֹּֽאמְרוּ֙ כָּל־הָעָ֔ם יְחִ֖י הַמֶּ֥לֶךְ שְׁלֹמֹֽה׃

‎40 ‏וַיַּעֲל֤וּ כָל־הָעָם֙ אַֽחֲרָ֔יו וְהָעָם֙ מְחַלְּלִ֣ים בַּחֲלִלִ֔ים וּשְׂמֵחִ֖ים שִׂמְחָ֣ה גְדוֹלָ֑ה וַתִּבָּקַ֥ע הָאָ֖רֶץ בְּקוֹלָֽם׃

‎41 ‏וַיִּשְׁמַ֣ע אֲדֹנִיָּ֗הוּ וְכָל־הַקְּרֻאִים֙ אֲשֶׁ֣ר אִתּ֔וֹ וְהֵ֖ם כִּלּ֣וּ לֶאֱכֹ֑ל וַיִּשְׁמַ֤ע יוֹאָב֙ אֶת־ק֣וֹל הַשּׁוֹפָ֔ר וַיֹּ֕אמֶר מַדּ֥וּעַ קֽוֹל־הַקִּרְיָ֖ה הוֹמָֽה׃

‎42 ‏עוֹדֶ֣נּוּ מְדַבֵּ֔ר וְהִנֵּ֧ה יוֹנָתָ֛ן בֶּן־אֶבְיָתָ֥ר הַכֹּהֵ֖ן בָּ֑א וַיֹּ֤אמֶר אֲדֹנִיָּ֙הוּ֙ בֹּ֔א כִּ֣י אִ֥ישׁ חַ֛יִל אַ֖תָּה וְט֥וֹב תְּבַשֵּֽׂר׃

‎43 ‏וַיַּ֙עַן֙ יוֹנָתָ֔ן וַיֹּ֖אמֶר לַאֲדֹנִיָּ֑הוּ אֲבָ֕ל אֲדֹנֵ֥ינוּ הַמֶּֽלֶךְ־דָּוִ֖ד הִמְלִ֥יךְ אֶת־שְׁלֹמֹֽה׃

‎44 ‏וַיִּשְׁלַ֣ח אִתּֽוֹ־הַ֠מֶּלֶךְ אֶת־צָד֨וֹק הַכֹּהֵ֜ן וְאֶת־נָתָ֣ן הַנָּבִ֗יא וּבְנָיָ֙הוּ֙ בֶּן־יְה֣וֹיָדָ֔ע וְהַכְּרֵתִ֖י וְהַפְּלֵתִ֑י וַיַּרְכִּ֣בוּ אֹת֔וֹ עַ֖ל פִּרְדַּ֥ת הַמֶּֽלֶךְ׃

‎45 ‏וַיִּמְשְׁח֣וּ אֹת֡וֹ צָד֣וֹק הַכֹּהֵ֣ן וְנָתָן֩ הַנָּבִ֨יא לְמֶ֜לֶךְ בְּגִח֗וֹן וַיַּעֲל֤וּ מִשָּׁם֙ שְׂמֵחִ֔ים וַתֵּהֹ֖ם הַקִּרְיָ֑ה ה֥וּא הַקּ֖וֹל אֲשֶׁ֥ר שְׁמַעְתֶּֽם׃

‎46 ‏וְגַם֙ יָשַׁ֣ב שְׁלֹמֹ֔ה עַ֖ל כִּסֵּ֥א הַמְּלוּכָֽה׃

‎47 ‏וְגַם־בָּ֜אוּ עַבְדֵ֣י הַמֶּ֗לֶךְ לְ֠בָרֵךְ אֶת־אֲדֹנֵ֜ינוּ הַמֶּ֣לֶךְ דָּוִד֮ לֵאמֹר֒ יֵיטֵ֨ב אלהיך אֱלֹהִ֜ים אֶת־שֵׁ֤ם שְׁלֹמֹה֙ מִשְּׁמֶ֔ךָ וִֽיגַדֵּ֥ל אֶת־כִּסְא֖וֹ מִכִּסְאֶ֑ךָ וַיִּשְׁתַּ֥חוּ הַמֶּ֖לֶךְ עַל־הַמִּשְׁכָּֽב׃

‎48 ‏וְגַם־כָּ֖כָה אָמַ֣ר הַמֶּ֑לֶךְ בָּר֨וּךְ יְהוָ֜ה אֱלֹהֵ֣י יִשְׂרָאֵ֗ל אֲשֶׁ֨ר נָתַ֥ן הַיּ֛וֹם יֹשֵׁ֥ב עַל־כִּסְאִ֖י וְעֵינַ֥י רֹאֽוֹת׃

‎49 ‏וַיֶּֽחֶרְדוּ֙ וַיָּקֻ֔מוּ כָּל־הַ֨קְּרֻאִ֔ים אֲשֶׁ֖ר לַאֲדֹנִיָּ֑הוּ וַיֵּלְכ֖וּ אִ֥ישׁ לְדַרְכּֽוֹ׃

‎50 ‏וַאֲדֹ֣נִיָּ֔הוּ יָרֵ֖א מִפְּנֵ֣י שְׁלֹמֹ֑ה וַיָּ֣קָם וַיֵּ֔לֶךְ וַֽיַּחֲזֵ֖ק בְּקַרְנ֥וֹת הַמִּזְבֵּֽחַ׃

‎51 ‏וַיֻּגַּ֤ד לִשְׁלֹמֹה֙ לֵאמֹ֔ר הִנֵּה֙ אֲדֹ֣נִיָּ֔הוּ יָרֵ֖א אֶת־הַמֶּ֣לֶךְ שְׁלֹמֹ֑ה וְ֠הִנֵּה אָחַ֞ז בְּקַרְנ֤וֹת הַמִּזְבֵּ֙חַ֙ לֵאמֹ֔ר יִשָּֽׁבַֽע־לִ֤י כַיּוֹם֙ הַמֶּ֣לֶךְ שְׁלֹמֹ֔ה אִם־יָמִ֥ית אֶת־עַבְדּ֖וֹ בֶּחָֽרֶב׃

‎52 ‏וַיֹּ֣אמֶר שְׁלֹמֹ֔ה אִ֚ם יִהְיֶ֣ה לְבֶן־חַ֔יִל לֹֽא־יִפֹּ֥ל מִשַּׂעֲרָת֖וֹ אָ֑רְצָה וְאִם־רָעָ֥ה תִמָּצֵא־ב֖וֹ וָמֵֽת׃

‎53 ‏וַיִּשְׁלַ֞ח הַמֶּ֣לֶךְ שְׁלֹמֹ֗ה וַיֹּרִדֻ֙הוּ֙ מֵעַ֣ל הַמִּזְבֵּ֔חַ וַיָּבֹ֕א וַיִּשְׁתַּ֖חוּ לַמֶּ֣לֶךְ שְׁלֹמֹ֑ה וַיֹּֽאמֶר־ל֥וֹ שְׁלֹמֹ֖ה לֵ֥ךְ לְבֵיתֶֽךָ׃ פ

1 wəhammeleḵə dāwiḏ zāqēn bā’ bayyāmîm wayəḵassuhû babəḡāḏîm wəlō’ yiḥam lwō:

2 wayyō’mərû lwō ‘ăḇāḏāyw yəḇaqəšû la’ḏōnî hammeleḵə n^a‘ărâ ḇəṯûlâ wə‘āməḏâ lifənê hammeleḵə ûṯəhî-lwō sōḵeneṯ wəšāḵəḇâ ḇəḥêqeḵā wəḥam la’ḏōnî hammeleḵə:

3 wayəḇaqəšû n^a‘ărâ yāfâ bəḵōl gəḇûl yiśərā’ēl wayyiməṣə’û ’eṯ-’ăḇîšaḡ haššûnammîṯ wayyāḇi’û ’ōṯāh lammeleḵə:

4 wəhann^a‘ărâ yāfâ ‘aḏ-mə’ōḏ watəhî lammeleḵə sōḵeneṯ watəšārəṯēhû wəhammeleḵə lō’ yəḏā‘āh:

5 wa’ăḏōnîyâ ḇen-ḥagîṯ miṯənaśśē’ lē’mōr ’ănî ’eməlōḵə wayy^a‘aś lwō reḵeḇ ûfārāšîm w^aḥămiššîm ’îš rāṣîm ləfānāyw:

6 wəlō’-‘ăṣāḇwō ’āḇîw mîyāmāyw lē’mōr madû‘a kāḵâ ‘āśîṯā wəḡam-hû’ ṭwōḇ-tō’ar mə’ōḏ wə’ōṯwō yāləḏâ ’^aḥărê ’aḇəšālwōm:

7 wayyihəyû ḏəḇārāyw ‘im ywō’āḇ ben-ṣərûyâ wə‘im ’eḇəyāṯār hakōhēn wayy^a‘əzərû ’^aḥărê ’ăḏōnîyâ:

8 wəṣāḏwōq hakōhēn ûḇənāyâû ḇen-yəhwōyāḏā‘ wənāṯān hannāḇî’ wəšimə‘î wərē‘î wəhagibwōrîm ’ăšer ləḏāwiḏ lō’ hāyû ‘im-’ăḏōnîyâû:

9 wayyizəb^aḥ ’ăḏōnîyâû ṣō’n ûḇāqār ûmərî’ ‘im ’eḇen hazzōḥeleṯ ’ăšer-’ēṣel ‘ên rōḡēl wayyiqərā’ ’eṯ-kāl-’eḥāyw bənê hammeleḵə ûləḵāl-’anəšê yəhûḏâ ‘aḇəḏê hammeleḵə:

10 wə’eṯ-nāṯān hannāḇî’ ûḇənāyâû wə’eṯ-hagibwōrîm wə’eṯ-šəlōmōh ’āḥîw lō’ qārā’:

11 wayyō’mer nāṯān ’el-baṯ-šeḇ^a‘ ’ēm-šəlōmōh lē’mōr hălwō’ šām^a‘atə kî mālaḵə ’ăḏōnîyâû ḇen-ḥagîṯ wa’ăḏōnênû ḏāwiḏ lō’ yāḏā‘:

12 wə‘atâ ləḵî ’î‘āṣēḵə nā’ ‘ēṣâ ûmalləṭî ’eṯ-nafəšēḵə wə’eṯ-nefeš bənēḵə šəlōmōh:

13 ləḵî ûḇō’î| ’el-hammeleḵə dāwiḏ wə’āmarətə ’ēlāyw hălō’-’atâ ’ăḏōnî hammeleḵə nišəb^a‘ətā la’ămāṯəḵā lē’mōr kî-šəlōmōh ḇənēḵə yiməlōḵə ’^aḥăray wəhû’ yēšēḇ ‘al-kisə’î ûmadû‘a mālaḵə ’ăḏōnîâû:¹

14 hinnēh ‘wōḏāḵə məḏabereṯ šām ‘im-hammeleḵə wa’ănî ’āḇwō’ ’^aḥărayiḵə ûmillē’ṯî ’eṯ-dəḇārāyiḵə:

15 watāḇō’ ḇaṯ-šeḇe‘ ’el-hammeleḵə h^aḥaḏərâ wəhammeleḵə zāqēn mə’ōḏ wa’ăḇîšaḡ haššûnammîṯ məšāraṯ ’eṯ-hammeleḵə:

16 watiqqōḏ baṯ-šeḇ^a‘ watišət^aḥû lammeleḵə wayyō’mer hammeleḵə mah-llāḵə:

17 watō’mer lwō ’ăḏōnî ’atâ nišəb^a‘ətā bayhwâ ’ĕlōheyḵā la’ămāṯeḵā kî-šəlōmōh ḇənēḵə yiməlōḵə ’^aḥărāy wəhû’ yēšēḇ ‘al-kisə’î:

18 wə‘atâ hinnēh ’ăḏōnîyâ mālāḵə wə‘atâ ’ăḏōnî hammeleḵə lō’ yāḏā‘ətā:

19 wayyizəb^aḥ šwōr ûmərî’-wəṣō’n lārōḇ wayyiqərā’ ləḵāl-bənê hammeleḵə ûlə’eḇəyāṯār hakōhēn ûləyō’āḇ śar haṣṣāḇā’ wəlišəlōmōh ‘aḇədəḵā lō’ qārā’:

20 wə’atâ ’ăḏōnî hammeleḵə ‘ênê ḵāl-yiśərā’ēl ‘āleyḵā ləhagîḏ lâem mî yēšēḇ ‘al-kissē’ ’ăḏōnî-hammeleḵə ’^aḥărāyw:

21 wəhāyâ kišəḵaḇ ’ăḏōnî-hammeleḵə ‘im-’ăḇōṯāyw wəhāyîṯî ’ănî ûḇənî šəlōmōh ḥaṭṭā’îm:

22 wəhinnēh ‘wōḏennâ məḏabereṯ ‘im-hammeleḵə wənāṯān hannāḇî’ bā’:

23 wayyagîḏû lammeleḵə lē’mōr hinnēh nāṯān hannāḇî’ wayyāḇō’ lifənê hammeleḵə wayyišət^aḥû lammeleḵə ‘al-’apāyw ’ārəṣâ:

24 wayyō’mer nāṯān ’ăḏōnî hammeleḵə ’atâ ’āmarətā ’ăḏōnîyâû yiməlōḵə ’^aḥărāy wəhû’ yēšēḇ ‘al-kisə’î:

25 kî| yāraḏ hayywōm wayyizəb^aḥ šwōr ûmərî’-wəṣō’n lārōḇ wayyiqərā’ ləḵāl-bənê hammeleḵə ûləśārê haṣṣāḇā’ ûlə’eḇəyāṯār hakōhēn wəhinnām ’ōḵəlîm wəšōṯîm ləfānāyw wayyō’mərû yəḥî hammeleḵə ’ăḏōnîyâû:

26 wəlî ’ănî-‘aḇədeḵā ûləṣāḏōq hakōhēn wəliḇənāyâû ḇen-yəhwōyāḏā‘ wəlišəlōmōh ‘aḇədəḵā lō’ qārā’:

27 ’im mē’ēṯ ’ăḏōnî hammeleḵə nihəyâ hadāḇār hazzeh wəlō’ hwōḏ^a‘ətā ’eṯ-‘ăḇāḏeyḵā ‘aḇədəḵā mî yēšēḇ ‘al-kissē’ ’ăḏōnî-hammeleḵə ’^aḥărāyw: s

28 wayy^a‘an hammeleḵə dāwiḏ wayyō’mer qirə’û-lî ləḇaṯ-šāḇ^a‘ watāḇō’ lifənê hammeleḵə wat^a‘ămōḏ lifənê hammeleḵə:

29 wayyiššāḇ^a‘ hammeleḵə wayyō’mar ḥay-yəhwâ ’ăšer-pāḏâ ’eṯ-nafəšî mikāl-ṣārâ:

30 kî ka’ăšer nišəb^a‘ətî lāḵə bayhwâ ’ĕlōhê yiśərā’ēl lē’mōr kî-šəlōmōh ḇənēḵə yiməlōḵə ’^aḥăray wəhû’ yēšēḇ ‘al-kisə’î t^aḥətāy kî kēn ’e‘ĕśeh hayywōm hazzeh:

31 watiqqōḏ baṯ-šeḇ^a‘ ’apayim ’ereṣ watišət^aḥû lammeleḵə watō’mer yəḥî ’ăḏōnî hammeleḵə dāwiḏ lə‘ōlām: f

32 wayyō’mer| hammeleḵə dāwiḏ qirə’û-lî ləṣāḏwōq hakōhēn ûlənāṯān hannāḇî’ wəliḇənāyâû ben-yəhwōyāḏā‘ wayyāḇō’û lifənê hammeleḵə:

33 wayyō’mer hammeleḵə lâem qəḥû ‘immāḵem ’eṯ-‘aḇəḏê ’ăḏōnêḵem wəhirəkaḇətem ’eṯ-šəlōmōh ḇənî ‘al-hapirədâ ’ăšer-lî wəhwōraḏətem ’ōṯwō ’el-giḥwōn:

34 ûmāš^aḥ ’ōṯwō šām ṣāḏwōq hakōhēn wənāṯān hannāḇî’ ləmeleḵə ‘al-yiśərā’ēl ûṯəq^a‘ətem baššwōfār wa’ămarətem yəḥî hammeleḵə šəlōmōh:

35 w^a‘ălîṯem ’^aḥărāyw ûḇā’ wəyāšaḇ ‘al-kisə’î wəhû’ yiməlōḵə t^aḥətāy wə’ōṯwō ṣiûîṯî lihəywōṯ nāḡîḏ ‘al-yiśərā’ēl wə‘al-yəhûḏâ:

36 wayy^a‘an bənāyâû ḇen-yəhwōyāḏā‘ ’eṯ-hammeleḵə wayyō’mer| ’āmēn kēn yō’mar yəhwâ ’ĕlōhê ’ăḏōnî hammeleḵə:

37 ka’ăšer hāyâ yəhwâ ‘im-’ăḏōnî hammeleḵə kēn yəhî yihəyeh ‘im-šəlōmōh wîḡadēl ’eṯ-kisə’wō mikissē’ ’ăḏōnî hammeleḵə dāwiḏ:

38 wayyēreḏ ṣāḏwōq hakōhēn wənāṯān hannāḇî’ ûḇənāyâû ḇen-yəhwōyāḏā‘ wəhakərēṯî wəhapəlēṯî wayyarəkiḇû ’eṯ-šəlōmōh ‘al-pirədaṯ hammeleḵə dāwiḏ wayyōliḵû ’ōṯwō ‘al-giḥwōn:

39 wayyiqq^aḥ ṣāḏwōq hakōhēn ’eṯ-qeren haššemen min-hā’ōhel wayyiməš^aḥ ’eṯ-šəlōmōh wayyiṯəqə‘û baššwōfār wayyō’mərû kāl-hā‘ām yəḥî hammeleḵə šəlōmōh:

40 wayy^a‘ălû ḵāl-hā‘ām ’^aḥărāyw wəhā‘ām məḥalləlîm b^aḥălilîm ûśəmēḥîm śiməḥâ ḡəḏwōlâ watibāq^a‘ hā’āreṣ bəqwōlām:

41 wayyišəm^a‘ ’ăḏōnîyâû wəḵāl-haqqəru’îm ’ăšer ’itwō wəhēm killû le’ĕḵōl wayyišəm^a‘ ywō’āḇ ’eṯ-qwōl haššwōfār wayyō’mer madû‘a qwōl-haqqirəyâ hwōmâ:

42 ‘wōḏennû məḏabēr wəhinnēh ywōnāṯān ben-’eḇəyāṯār hakōhēn bā’ wayyō’mer ’ăḏōnîyâû bō’ kî ’îš ḥayil ’atâ wəṭwōḇ təḇaśśēr:

43 wayy^a‘an ywōnāṯān wayyō’mer la’ăḏōnîyâû ’ăḇāl ’ăḏōnênû hammeleḵə-dāwiḏ himəlîḵə ’eṯ-šəlōmōh:

44 wayyišəl^aḥ ’itwō-hammeleḵə ’eṯ-ṣāḏwōq hakōhēn wə’eṯ-nāṯān hannāḇî’ ûḇənāyâû ben-yəhwōyāḏā‘ wəhakərēṯî wəhapəlēṯî wayyarəkiḇû ’ōṯwō ‘al pirədaṯ hammeleḵə:

45 wayyiməšəḥû ’ōṯwō ṣāḏwōq hakōhēn wənāṯān hannāḇî’ ləmeleḵə bəḡiḥwōn wayy^a‘ălû miššām śəmēḥîm watēhōm haqqirəyâ hû’ haqqwōl ’ăšer šəm^a‘ətem:

46 wəḡam yāšaḇ šəlōmōh ‘al kissē’ hamməlûḵâ:

47 wəḡam-bā’û ‘aḇəḏê hammeleḵə ləḇārēḵə ’eṯ-’ăḏōnênû hammeleḵə dāwiḏ lē’mōr yêṭēḇ ’ĕlōheyḵā ’ĕlōhîm ’eṯ-šēm šəlōmōh miššəmeḵā wîḡadēl ’eṯ-kisə’wō mikisə’eḵā wayyišət^aḥû hammeleḵə ‘al-hammišəkāḇ:

48 wəḡam-kāḵâ ’āmar hammeleḵə bārûḵə yəhwâ ’ĕlōhê yiśərā’ēl ’ăšer nāṯan hayywōm yōšēḇ ‘al-kisə’î wə‘ênay rō’wōṯ:

49 wayyeḥerəḏû wayyāqumû kāl-haqqəru’îm ’ăšer la’ăḏōnîyâû wayyēləḵû ’îš ləḏarəkwō:

50 wa’ăḏōnîyâû yārē’ mipənê šəlōmōh wayyāqām wayyēleḵə wayy^aḥăzēq bəqarənwōṯ hammizəbēḥa:

51 wayyugaḏ lišəlōmōh lē’mōr hinnēh ’ăḏōnîyâû yārē’ ’eṯ-hammeleḵə šəlōmōh wəhinnēh ’āḥaz bəqarənwōṯ hammizəbēḥa lē’mōr yiššāḇ^a‘-lî ḵayywōm hammeleḵə šəlōmōh ’im-yāmîṯ ’eṯ-‘aḇədwō beḥāreḇ:

52 wayyō’mer šəlōmōh ’im yihəyeh ləḇen-ḥayil lō’-yipōl miśś^a‘ărāṯwō ’ārəṣâ wə’im-rā‘â ṯimmāṣē’-ḇwō wāmēṯ:

53 wayyišəl^aḥ hammeleḵə šəlōmōh wayyōriḏuhû mē‘al hammizəbēḥa wayyāḇō’ wayyišət^aḥû lammeleḵə šəlōmōh wayyō’mer-lwō šəlōmōh lēḵə ləḇêṯeḵā: f